Los Angeles မြို့ မြန်မာကောင်စစ်ဝန်ရုံးချုပ်က ပထမအတွင်းဝန် CDM မှာ ပါဝင်



Share/Bookmark
Los Angeles မြို့ မြန်မာကောင်စစ်ဝန်ရုံးချုပ်က ပထမအတွင်းဝန် ဦးအောင်ကျော်နိုင်

မြန်မာနိုင်ငံမှာ အရပ်သားအစိုးရကို ဖယ်ရှားပြီး စစ်တပ်က အာဏာသိမ်းလိုက်တဲ့ လုပ်ရပ်ကို ဆန့်ကျင်နေကြတဲ့ CDM လှုပ်ရှားမှုမှာ အမေရိကန်ရောက် သံရုံးဝန်ထမ်းတွေ ပါဝင်လာနေကြတာမှာ အခုနောက်ဆုံး ကာလီဖိုးနီးယားပြည်နယ် Los Angeles မြို့က မြန်မာ ကောင်စစ်ဝန်ရုံးချုပ်မှာ ပထမအတွင်းဝန်အဖြစ် တာဝန်ထမ်းဆောင်နေတဲ့ ဦးအောင်ကျော်နိုင်လည်း မတ်လ ၅ ရက်၊ သောကြာနေ့က စပြီး CDM လှုပ်ရှားမှာ ပါဝင်လာပြီ ဖြစ်ပါတယ်။ အမေရိကန်နိုင်ငံ၊ နယူးယောက်မြို့မှာရှိတဲ့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းအပါအဝင် ဝါရှင်တန် ဒီစီမြို့မှာရှိတဲ့ မြန်မာသံရုံးဝန်ထမ်း ၆ ဦး၊ Los Angeles မြို့ ကောင်စစ်ဝန်ရုံးက တခြား ဝန်ထမ်းတဦးတို့ CDM မှာ ပူးပေါင်း ပါဝင်လာကြပြီးတဲ့နောက် ဦးအောင်ကျော်နိုင်လဲ အခုလို ပါဝင်လာတာ ဖြစ်ပါတယ်။ ဦးအောင်ကျော်နိုင်ကို ကိုဇော်ဝင်းလှိုင်က ဆက်သွယ် မေးမြန်းထားပါတယ်။

ဦးအောင်ကျော်နိုင်။ ။ ဖေဖော်ဝါရီ ၁ ရက်နေ့ကနေစပြီး စစ်အာဏာသိမ်းခဲ့တယ် ။ စစ်အာဏာသိမ်းပြီးတဲ့နောက်ပိုင်းမှာ ကျနော်တို့ ပြည်သူတွေနဲ့ အထူးသဖြင့် Generation Z ဒီလူငယ်တွေကနေပြီးတော့ ငြိမ်းချမ်းစွာ ဆန္ဒပြကြတယ်ပေါ့ဗျာ။ မြန်မာနိုင်ငံမှာ ဆန္ဒဖော်ထုတ်ကြတယ် စစ်အာဏာသိမ်းတာ အလိုမရှိဘူးဆိုပြီးတော့ အဲလို ဆန္ဒဖော်ထုတ်ကြတာကို စစ်အာဏာသိမ်း အုပ်စုက ဒီလူငယ်တွေကို ရက်ရက်စက်စက် သတ်ဖြတ်နှိမ်နင်းတာတွေပေါ့ဗျာ ၊ တုတ်တွေနဲ့ရိုက်၊ စနိုက်ပါတွေနဲ့ ပစ်၊ သတ်ဖြတ်တာတွေက ဖြစ်လာတော့ ဖြစ်လာတဲ့အခြေအနေက တနေ့တခြား ပိုပြီးတော့ ဆိုးလာတယ် ။ ပိုပြီး ဆိုးလာတဲ့အချိန်မှာ ဒီ မတ်လ ၃ ရက်နေ့က ဖြစ်တဲ့ဟာကို ကြည့်ရတဲ့အခါကျတော့ တော်တော်လေးကို ကျနော်တို့မှာ ရင်ထဲမှာ မခံစားနိုင်တော့ဘူးဗျ။ အဲလို မခံစားနိုင်တော့တဲ့အခါကျတော့ အဲဒီလို ဖြစ်ပြီးတော့ ကျနော်ဆုံးဖြတ်လိုက်ရတာပေါ့ CDM လုပ်ဖို့ကို ဟုတ်ကဲ့။

ကိုဇော်ဝင်းလှိုင်။ ။ ဦးအောင်ကျော်နိုင် ပြောတာကတော့ ဒီ မတ်လ ၃ ရက်နေ့က နောက်ဆုံးဖြစ်သွားတဲ့ အကြမ်းဖက် ဖြိုခွဲမှုကြောင့် ဒီဆုံးဖြတ်ချက် ချဖို့ဖြစ်သွားတယ်ပေါ့ CDM လုပ်ဖို့က။

ဦးအောင်ကျော်နိုင်။ ။ ဟုတ်ကဲ့ ရှေ့ပိုင်းမှာလည်း ဖြစ်တော့ ဖြစ်နေတာပေါ့လေ ဒါပေမယ့် စဉ်းစားနေတာပေ့ါ။ ဒါတွေကတော့ တော်တော်အခြေအနေဆိုးလာတဲ့အခါကျတော့ ကျနော်တို့ ရင်ထဲမှာ ဘယ်လိုမှ ခံစားလို့ မရတော့ဘူးပေါ့ဗျာ ။ ဒါလူတိုင်းလည်း ဒီလိုဖြစ်မယ်ဆိုတာ ကျနော် ထင်ပါတယ် ယုံကြည်ပါတယ် ဟုတ်။

ကိုဇော်ဝင်းလှိုင်။ ။ ဦးအောင်ကျော်နိုင် အခုဆုံးဖြတ်ချက်တော့ ချလိုက်ပြီပေါ့နော် အခုဒါ ရှေ့လျှောက်ရော ဒီဟာကြီးက ရှင်းရှင်းပြောရရင်တော့ ဒီမိုကရေစီ လှုပ်ရှားမှုက ဘယ်လောက်အထိ ကြာမလဲ ၊ မြန်မလား နှေးမလားဆိုတာ ဘယ်သူမှ အတိအကျ မပြောနိုင်ဘူးလေ ဆိုတော့ ဦးအောင်ကျော်နိုင်က ဘယ်လောက်အထိ စိတ်ပိုင်းဖြတ်ထားပါသလဲ ဒါကို CDM လုပ်ဖို့အတွက်လေ။

ဦးအောင်ကျော်နိုင်။ ။ CDM လုပ်ရတာကတော့ စစ်အာဏာသိမ်းတာ အမြန်ဆုံး ကျဆုံးဖို့နဲ့ အာဏာသိမ်း စစ်အုပ်စုရဲ့ ယန္တရားကို ရပ်တန့်သွားဖို့ဆိုတဲ့ ရည်ရွယ်ချက်နဲ့ ကျနော်က စပြီးတော့ ဒီနေ့လုပ်တာတော့ မဟုတ်ပါဘူး ၊ မနက်ဖြန်မှ ကျနော် စလုပ်မှာပါ။ အဲဒီတော့ ရုံးကတော့ မသွားတော့ဘူးပေါ့လေ ပြည်သူ့အာဏာ ပြည်သူ့အစိုးရလက်ထဲ ပြန်ရောက်တဲ့အထိ ကျနော်တို့က ဒါ လုပ်ရမှာပေါ့လေ။ ကျနော်တို့ ကြားထဲမှာလည်း ဘယ်လိုဖြစ်လာမယ်ဆိုတာတော့ ဘာမှ မမျှော်မှန်းလို့ မရပါဘူး အဲလိုတော့ ရှိတာပေါ့။

ကိုဇော်ဝင်းလှိုင်။ ။ ဟုတ်ကဲ့ စစ်အာဏာရှင်စနစ်ကြီး ပြုတ်ကျသွားတဲ့အထိ အပြီးတိုင်အထိ ဆက်လက်ပြီးတော့ လုပ်ဆောင်သွားဖို့ ဆုံးဖြတ်ချက် ချထားတယ်ပေါ့။

ဦးအောင်ကျော်နိုင်။ ။ ဟုတ်ကဲ့ပါ။

ကိုဇော်ဝင်းလှိုင်။ ။ ဒီ Los Angeles ကပဲ ပြီးခဲ့တဲ့ရက်ပိုင်းတုန်းက ဦးအောင်ကျော်နိုင်သိတဲ့အတိုင်း ဒေါ်မြမြကြည်လည်း CDM လုပ်ထားတယ်ဆိုတော့ ဦးအောင်ကျော်နိုင် တို့ ရုံးကဆိုရင် ၂ ယောက်ရှိပြီပေါ့နော်။ ဆိုတော့ ဦးအောင်ကျော်နိုင် အခုလို ဆုံးဖြတ်ချက်ချတဲ့နေရာမှာ ကိုယ့်လုပ်ဖော်ကိုင်ဖက်အချင်းချင်း ၊ အထက်အရာရှိနဲ့ဖြစ်ဖြစ် ပေါ့နော် တိုင်ပင်ဆွေးနွေးတာတွေရော ရှိခဲ့သလား။

ဦးအောင်ကျော်နိုင်။ ။ ကျနော်တို့က အဲဒါကိုတော့ ဒီလိုဖြစ်နေတယ် ဒါကြီးက ခံစားလို့မရဘူးဆိုတာလောက်တော့ ကျနော်တို့ အချင်းချင်းတော့ ပြောတာပေါ့နော်။ ဒါပေမယ့် ကျနော် ဒီလိုမျိုးလုပ်သွားတော့ ဘယ်သူမှ ကျနော်မတိုင်ပင်ဘူး ကျနော်လုပ်မယ်ဆိုတာကတော့ ကျနော်မပြောဘူးလေ။ လုပ်လိုက်ပြီဆိုမှ ငါတော့ ဒီလို လုပ်လိုက်ပြီ ၊ မနက်ဖြန် ငါရုံးမတက်ဘူး ဒါပဲ ကျနော်ပြောထားလိုက်တယ်။

ကိုဇော်ဝင်းလှိုင်။ ။ ဦးအောင်ကျော်နိုင်ကတော့ ဒီသောကြာနေ့ကစပြီးတော့ ရုံးမတက်တော့ဘူး ကိုယ့် CDM လုပ်ငန်းကို စတင်အကောင်အထည်ဖော်ပြီ ၊ ကိုယ့်တဦးတယောက်အနေနဲ့ပဲ။

ဦးအောင်ကျော်နိုင်။ ။ ဟုတ်ကဲ့ အရှေ့မှာလည်း မမြကြည်ကလည်း သူစလုပ်တဲ့နေ့ကနေ စပြီး သူလည်း ရုံးလာမတက်ဘူး။ ရုံးကတော့ လိုက်ပြီးတော့ ရုံးပြန်တက်ဖို့ဆိုပြီးတော့ ခေါ်တယ်ပေါ့လေ ။ ဒါပေမယ့် သူ ရုံးလာမတက်ဘူးပေါ့နော် အဲလိုအခြေအနေဆိုတော့ ကျနော့်ကိုလည်း မနက်ဖြန်ကျတော့ ကျနော့်ကို ဘာဆက်ပြောလာမလဲဆိုတာကို ကျနော် စောင့်ကြည့်ရမှာပေါ့လေ။ လောလောလတ်လတ်ကတော့ ပြန်ရုံးတက်ဖို့အစီအစဉ် မရှိသေးပါဘူး။

ကိုဇော်ဝင်းလှိုင်။ ။ ဆိုတော့ ဦးအောင်ကျော်နိုင် အခုလို ကိုယ့်ဆုံးဖြတ်ချက်နဲ့ လုပ်လိုက်တဲ့အတွက် အဆိုးဆုံးဘာဖြစ်နိုင်မယ်လို့ တွက်မိထားသလဲ။ အခုဆိုရင် CDM လုပ်တဲ့အတွက် အလုပ်ပြုတ်နိုင်တယ်ပေါ့နော် မြန်မာပြည်ထဲမှာလည်း ဝန်ထမ်းတွေကို အဲလို ဖိအားပေးတာတွေ ဘာတွေ ဦးအောင်ကျော်နိုင် တို့လည်း ကြားသိနေမှာပေါ့ ။ ဆိုတော့ ကိုယ်ဒီမှာရှိနေတဲ့ ကိုယ့်ရာထူးတာဝန်တွေ ဆုံးရှုံးသွားနိုင်တယ်၊ ကိုယ့် မိသားစုအနေနဲ့ နိုင်ငံခြားမှာ အခက်အခဲတွေ ရင်ဆိုင်ရနိုင်တယ်ဆိုတဲ့ အတွေးမျိုးတွေရော ရှိခဲ့သလား။

ဦးအောင်ကျော်နိုင်။ ။ ဟုတ်ကဲ့ ရှိပါတယ်ခင်ဗျာ၊ ဒါကတော့ ကျနော့်ရာထူး ဆုံးရှုံးသွားနိုင်တဲ့အခြေအနေအထိ တွေးထားပါတယ်။ ကျန်တဲ့အခက်အခဲတွေလည်း ရှိလာနိုင်ပါတယ်၊ ရှိမယ်လို့ ကျနော် မျှော်မှန်းထားပါတယ်။ ဒါကတော့ ကျနော်ကြုံလာသမျှ ဖြစ်လာသမျှကို ကျနော် ရင်ဆိုင်ရမှာ ပေါ့လေ။

ကိုဇော်ဝင်းလှိုင်။ ။ CDM လုပ်ဖို့အတွက် ဆုံးဖြတ်ချက် မချခင်မှာဖြစ်ဖြစ်၊ အခု ဆုံးဖြတ်ချက် ချပြီးတဲ့အခါမှာဖြစ်ဖြစ်၊ အခု မြန်မာပြည်ထဲမှာ ဖွဲ့ထားတဲ့ CRPH နဲ့ ဒါမှမဟုတ်လည်း CRPH နိုင်ငံတကာရုံးနဲ့ ဆက်သွယ်မှုရှိသလား အဆက်အသွယ်ရှိသလား သူတို့နဲ့ စကားပြောတာတွေ ဘာတွေရှိပါသလား။

ဦးအောင်ကျော်နိုင်။ ။ အခုအချိန်အထိတော့ ကျနော်မရှိသေးပါဘူး ဟုတ်ကဲ့

ကိုဇော်ဝင်းလှိုင်။ ။ ဆက်သွယ်ဖို့ အစီအစဉ်ရော ရှိလားခင်ဗျ။

ဦးအောင်ကျော်နိုင်။ ။ ဆက်သွယ်ဖို့ကတော့ ကျနော်လည်း ဘယ်လို ပြောရမှန်းမသိဘူးခင်ဗျ ၊ ကျနော့်မှာ ဖုန်း Contact တွေဘာတွေ လောလောလတ်လတ်တော့ မရှိသေးဘူးခင်ဗျ။

CDM လှုပ်ရှားမှုမှာ ပူးပေါင်းပါဝင်ခဲ့တဲ့ Los Angeles မြန်မာ ကောင်စစ်ဝန်ရုံးချုပ်က ပထမအတွင်းဝန် ဦးအောင်ကျော်နိုင် ကို ဆက်သွယ်မေးမြန်းခဲ့တာပါ။


ကိုဇော်ဝင်းလှိုင်/ VOA Burmese

https://burmese.voanews.com/a/myanmar-la-counsulate-officer-cdm-/5803443.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ