CDM မှာ ပါဝင်လာတဲ့ ဝါရှင်တန်အခြေစိုက် မြန်မာသံဝန်ထမ်းတချို့



Share/Bookmark
၀ါရှင်တန်အခြေစိုက် မြန်မာသံရုံး

မြန်မာနိုင်ငံမှာ စစ်တပ်က အာဏာသိမ်းတဲ့ လုပ်ရပ်ကို ဆန့်ကျင်တဲ့ အကြမ်းမဖက်တဲ့ CDM အာဏာဖီဆန်ရေး လှုပ်ရှားမှုမှာပူးပေါင်း လာကြတဲ့ ပြည်ပရောက် မြန်မာသံရုံးဝန်ထမ်းတွေ တိုးလာနေပါတယ်။

ကြာသပတေးနေ့မှာ ဆိုရင်လည်း အမေရိကန် ပြည်ထောင်စု ဝါရှင်တန်ဒီစီ အခြေစိုက် မြန်မာသံရုံးက တတိယအတွင်းဝန် ဦးကျော်စွာထွန်း အပါအဝင် ဝန်ထမ်း ၅ ဦး CDM လှုပ်ရှားမှုမှာ ပူးပေါင်းလိုက်ကြောင်း ကြေညာခဲ့တာပါ။

ဖိနှိပ်ခံ မြန်မာလူထုနဲ့ ပူးပေါင်းဖို့ ဆုံးဖြတ်လိုက်တဲ့ သံရုံးဝန်ထမ်းတဦးဖြစ်တဲ့ ဦးကျော်စွာထွန်းကို မအင်ကြင်းနိုင်က သီးသန့် ဆက်သွယ်မေးမြန်းရာမှာတော့ သံရုံးဝန်ထမ်းတွေရဲ့ ရပ်တည်ချက်နဲ့ ဆက်လုပ်မယ့် အစီအစဉ်တွေကို ဦးကျော်စွာထွန်းက ရှင်းပြပါတယ်။

“အထဲမှာ လုပ်တဲ့ CDM Movement က ရုံးမတက်ပဲ ရုန်းထွက်တာပါ။ ဒီက CDM Movement က ရုံးတက်ပြီးတော့ ရုန်းထွက်တာပါ။ ဒီမှာ ရုံးတက်ပြီးတော့ ရုန်းထွက်တယ်ဆိုတာမှာ ကျနော်တို့ အာဏာဖီဆန်ခြင်းလို့ ပြောလို့ရပါတယ်။ အဓိက ဒီ စစ်ကောင်စီအစိုးရဲ့ အာပေါ်တွေ လမ်းညွန်ချက်တွေမှာ ကျနော်တို့ လိုက်နာကျင့်သုံးခြင်းမရှိပဲနဲ့ ကျနော်တို့ အခုလက်ရှိဆိုရင် မအင်ကြင်းနိုင်တို့လည်းသိပါတယ် ကျနော်တို့ မြန်မာပြည်ကို ပြန်တဲ့ relief flight တွေ …ကောင်စစ် ဆိုင်ရာ ကိစ္စရပ်တွေ အစစ မြန်မာလူမျိုးအကျိုးအတွက်ပေါ့နော် ကျနော်တို့ မလုပ်မဖြစ်ဆိုတာတွေရှိပါတယ်။ ကျနော်တို့မှ မလုပ်ပေးရင် သူတို့ ဘယ်လိုလုပ်ကြမလဲ အဲဒါမျိုးလေးတွေပေါ့။ အခုလက်ရှိ ပြည်သူတွေအတွက် လုပ်ရမယ့် အလုပ်တွေရှိပါတယ် ကျနော်တို့ မြန်မာလူမျိုးတွေအတွက် သူတို့ရဲ့ ကောင်းကျိုးတွေအတွက်ရှိပါတယ် အဲဒါတွေကတော့ ကျနော်တို့ ဆက်လုပ်မှာပါ။ ကျနော်တို့ရဲ့ သဘောထားနဲ့ မသက်ဆိုင်တာတွေကိုတော့ သူတို့ အမိန့်နာခံပြီး လုပ်ဆောင်ပေးသွားမှာ မဟုတ်ပါဘူး။”

မြန်မာနိုင်ငံမှာ စစ်တပ်က အာဏာသိမ်းလိုက်တဲ့ လုပ်ရပ်ကို ဆန့်ကျင်ကြောင်း ကြေညာခဲ့တာ အခုဆိုရင် ဝါရှင်တန်သံရုံးမှာ ဝန်ထမ်း ၅ ဦး ရှိသွားပါပြီ။ ဒီမတိုင်ခင်မှာလည်း ကုလသမဂ္ဂဆိုင်ရာ သံအမတ်ကြီး ဦးကျော်မိုးထွန်း၊ သူ့နေရာမှာ စစ်အာဏာပိုင်တွေ အစားထိုးဖို့ ကြိုးစားခဲ့တဲ့ ဒုတိယ အမြဲတမ်းကိုယ်စားလှယ် ဦးတင်မောင်နိုင်တို့လည်း အကြမ်းမဖက်တဲ့ အာဏာဖီဆန်ရေး လှုပ်ရှားမှုကို ထောက်ခံကြောင်း ပြောဆိုခဲ့ကြတာပါ။

ကယ်လီဖိုးနီးယားပြည်နယ် လော့စ်အိန်ဂျလိစ်မြို့က မြန်မာသံရုံးဝန်ထမ်းတဦးဟာလည်း ဒီတပတ်ထဲမှာပဲ စစ်အာဏာသိမ်းမှု ဆန့်ကျင်တဲ့ လှုပ်ရှားမှုမှာ ပူးပေါင်းပါဝင်ခဲ့သလို၊ ကြာသပတေးနေ့မှာတော့ ဂျာမဏီနိုင်ငံ ဘာလင်မြို့တော်က မြန်မာသံရုံးဝန်ထမ်း ၃ ဦး၊ ဆွစ်ဇာလန်နိုင်ငံ ဂျနီဗာမြို့က သံရုံးဝန်ထမ်း ၃ ဦးတို့လည်း ပူးပေါင်းသွားခဲ့ကြပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/myanmar-embassy-staffs-cdm-movement-/5802085.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ