မြန်မာစစ်တပ်နဲ့ ပူးပေါင်းဆောင်ရွက်မှု တောင်ကိုရီးယားရပ်ဆိုင်း

Army officers intervene during a protest against the military coup in Yangon, Myanmar, March 2, 2021. Picture taken from behind a window. REUTERS/Stringer

မြန်မာစစ်တပ်က အရပ်သားအစိုးရကို ဖြုတ်ချပြီး ဒီမိုကရေစီရေး လိုလားသူတွေကို အင်အားသုံး အကြမ်းဖက် နှိမ်နင်းနေတာကြောင့် မြန်မာစစ်တပ်ကို စစ်ဘက်ဆိုင်ရာပစ္စည်း တင်ပို့မှုတွေ ပိတ်ပင်ပြီး ကာကွယ်ရေးနဲ့ လုံခြုံရေးဆိုင်ရာ ပူးပေါင်းဆောင်ရွက်မှုတွေ ဆိုင်းငံ့သွားမယ်လို့ တောင်ကိုရီးယားအစိုးရက ဒီကနေ့ ကြေညာလိုက်ပါတယ်။

စစ်ပစ္စည်းတင်ပို့မှု ပိတ်ပင်တာကြောင့် မျက်ရည်ယိုဗုံးအပါအဝင် တခြားလက်နက်ခဲယမ်း ဘာကိုမှ မြန်မာစစ်တပ်ကို တောင်ကိုရီးယားအနေနဲ့ ရောင်းလို့မရတော့ပါဘူး။ တောင်ကိုရီးယားလုပ် စစ်ဘက်သုံးထရပ်ကားတွေကို ၂၀၁၈ ခုနှစ်က တင်ပို့ခဲ့ဖူးသလို မျက်ရည်ယိုဗုံးတွေကိုလည်း ၂၀၁၄ နဲ့ ၂၀၁၅ ခုနှစ်တွေက ပို့ခဲ့ဖူးတယ်လို့ ကိုရီးယားတာဝန်ရှိသူတွေကို ကိုးကားပြီး ယွန်ဟပ်သတင်းတစ်ပုဒ်မှာ ရေးထားပါတယ်။ စစ်ဘက်ပစ္စည်းတွေ နောက်ဆုံးပို့ခဲ့တာကတော့ ၂၀၁၉ ခုနှစ်၊ ဇန်နဝါရီလကဖြစ်ပါတယ်။

အကြမ်းဖက်မှုတွေရပ်တန့်ဖို့ တောင်ကိုရီးယားအပါအဝင် နိုင်ငံတကာအသိုင်းအဝိုင်းက အကြိမ်ကြိမ် တောင်းဆိုနေတဲ့ကြားကပဲ မြန်မာစစ်တပ်နဲ့ ရဲတပ်ဖွဲ့ရဲ့ အကြမ်းဖက်ကိုင်တွယ်မှုတွေကြောင့် သေဆုံးသူတွေ တိုးလာနေတယ်လို့ ဒီကနေ့ နိုင်ငံခြားရေးဌာနက ထုတ်ပြန်တဲ့ကြေညာချက်မှာ ဖော်ပြထားပါတယ်။

ဒါကြောင့် တောင်ကိုရီးယားအစိုးရအနေနဲ့ မြန်မာနိုင်ငံကိုပေးနေတဲ့ ဖွံ့ဖြိုးရေးဆိုင်ရာ အထောက်အပံ့တွေကိုပါ ပြန်လည် သုံးသပ်တာတွေ လုပ်သွားမယ်လို့လည်း ကြေညာချက်မှာ ဖော်ပြထားပါတယ်။

မြန်မာနိုင်ငံတွင်းက အခြေအနေတွေကို တောင်ကိုရီးယားအစိုးရက အနီးကပ်စောင့်ကြည့်နေသလို တောင်ကိုရီးယားနိုင်ငံတွင်းမှာ ရှိနေကြတဲ့ မြန်မာနိုင်ငံသားတွေကိုလည်း သူတို့ရဲ့ နေထိုင်ခွင့် ဗီဇာသက်တမ်း ကုန်သွားပြီးတာပဲဖြစ်ဖြစ်၊ ဗီဇာသက်တမ်း ထပ်တိုးဖို့ အခက်အခဲ ဖြစ်နေတာပဲဖြစ်ဖြစ် အခြေအနေတွေ တည်ငြိမ်မှုမရှိသေးခင် မြန်မာနိုင်ငံကို အတင်းအကျပ် ပြန်ပို့တာတွေ လုပ်မှာမဟုတ်ဘဲ တောင်ကိုရီးယားမှာ နေထိုင်ခွင့် ဆက် ပေးထားမယ်လို့လည်း နိုင်ငံခြားရေးဌာန ထုတ်ပြန်ချက်မှာ ဖော်ပြထားပါတယ်။

မြန်မာပြည်သူတွေရဲ့ မျှော်လင့်ချက်တွေကို လေးစားသလို မြန်မာနိုင်ငံမှာ ဒီမိုကရေစီ ပြန်လည်ရရှိလာအောင် တောင်ကိုရီးယားအစိုးရက အားပေးကူညီသွားမယ့်အကြောင်းလည်း တောင်ကိုရီးယားအစိုးရက ဒီကနေ့ ထပ်မံ ပြောဆိုပါတယ်။

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ဖမ်းဆီးထိန်းသိမ်းထားသူတွေကို ပြန်လွှတ်ပေးဖို့၊ အရပ်သားပြည်သူတွေအပေါ် အကြမ်းဖက် နှိမ်နင်းနေတာတွေကို ရပ်တန့်ပြီး တရားဥပဒေနဲ့အညီ ဒီမိုကရေစီနည်းအတိုင်း ကျင့်သုံးပြီး ငြိမ်းငြိမ်းချမ်းချမ်း ဖြေရှင်းကိုင်တွယ်ဖို့လည်း တောင်းဆိုပါတယ်လို့ တောင်ကိုရီးယားအစိုးရက ဒီကနေ့ ထပ်မံ တိုက်တွန်းထားပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/s-korea-to-ban-military-exports-to-myanmar/5811846.html

မြန်မာစစ်တပ်နဲ့ ပူးပေါင်းဆောင်ရွက်မှု တောင်ကိုရီးယားရပ်ဆိုင်း မြန်မာစစ်တပ်နဲ့ ပူးပေါင်းဆောင်ရွက်မှု တောင်ကိုရီးယားရပ်ဆိုင်း Reviewed by THITHTOOLWIN on 20:46 Rating: 5

No comments:

Powered by Blogger.