နှိမ်နင်းမှုတွေကြားက ဆက်လက်ချီတက်နေဆဲ တနင်္သာရီ နဲ့ မွန်ပြည်နယ်က ဆန္ဒပြပွဲအခြေအနေ

မှတ်တမ်းဓါတ်ပုံ ဖေဇော်ဝါရီ ၂၈ ရက်တုန်းက တနင်္သာရီတိုင်း ထားဝယ်တွင် ဆန္ဒပြနေပုံများ

တိုင်းနဲ့ပြည်နယ် အသီးသီးမှာ စစ်အာဏာသိမ်း ဆန့်ကျင်ဆန္ဒပြသူတွေကို စစ်တပ်နဲ့ရဲက အကြမ်းဖက် ဖြိုခွဲတာတွေ လုပ်နေတဲ့ကြားကပဲ သူတို့အနေနဲ့ နောက်ဆုတ်သွားမှာမဟုတ်ပဲ ၊ အပြောင်းအလဲတွေ ဖြစ်ပေါ်လာတဲ့အထိ ကြိုးပမ်းလုပ်ဆောင်သွားမယ်လို့ တနင်္သာရီတိုင်းနဲ့ မွန်ပြည်နယ်အတွင်း သပိတ်စစ်ကြောင်း ဦးဆောင်သူတွေက ပြောကြားလိုက်ပါတယ်။ ဒီအကြောင်း ကိုဉာဏ်ဝင်းအောင်က စုစည်းတင်ပြထားပါတယ်။

ဖေဖေါ်ဝါရီ (၂၈)ရက်နေ့က နိုင်ငံတဝှမ်း တပြိုင်နက်ထဲ လုပ်ခဲ့ကြတဲ့ စစ်အာဏာရှင်ဆန့်ကျင်ရေး အထွေထွေသပိတ် ဖြိုခွင်းမှုအတွင်း တနင်္သာရီတိုင်း ထားဝယ်မြို့မှာ အနည်းဆုံး လူငယ်(၄)ဦး သေဆုံးခဲ့ရတာပါ။

မတ်လ(၄)ရက် ကြာသာပတေးနေ့ကလည်း ထားဝယ်မှာ လုံခြုံရေးအင်အား ထပ်မံတိုးချထားပြီး ဖိနှိပ်မှု ပြင်းထန်နေပေမယ့်လည်း သူတို့ကတော့ စစ်အာဏာရှင်စနစ် အဆုံးသတ်ရေးအတွက် ဆက်ပြီးလုပ်ဆောင်သွားမယ်လို့ ထားဝယ်မြို့ အထွေထွေသပိတ်ကော်မတီဝင် ကိုမင်းလွင်ဦးက VOA ကို ပြောပါတယ်။

"ကျနော်တို့ ထားဝယ်က ၂၈ ရက်- ၂လမှာ သတ်ဖြတ်နှိမ်နင်းတာကို ကောင်းကောင်း ခံလိုက်ရတယ်။ အဲဒီမှာ ကျနော်တို့ရဲဘော် (၄)ယောက်လောက် ကျဆုံးသွားတယ်။ ဒဏ်ရာရသွားသူတွေ အများကြီးရှိတာပေါ့။ ဟိုတနေ့ကဆိုရင် ၂၈ ရက်မှာ ကျဆုံးသွားတဲ့ ကိုကိုလွင်ဦးဆိုတဲ့ ရဲဘော်တယောက်ရဲ့ စျာပနအတွက် ကျနော်တို့ စစ်ကြောင်းတကြောင်းက ချီတက်အလေးပြုတဲ့အခါမှာ ကျနော်တို့ကို မျက်ရည်ယိုဗုံးတွေ ဘာတွေနဲ့ ဖြိုခွင်းတာတွေ ရှိတယ်ပေါ့။ ဒီကနေ့ထိလည်း သူတို့က ကျနော်တို့ကို ဖြိုခွင်းဖို့ဆိုပြီးတော့ အင်အားတွေ ထပ်ဖြည့်ထားတာ အများကြီးရှိတယ်ဗျာ။ အဲဒီတော့ ကျနော်တို့က လူစုခွဲတယ် ပြီးရင် ပြန်ထွက်တယ်။ အဲလို ပြန်ထွက်ပြီး ကျနော်တို့ စစ်ကြောင်း ပြန်ဆုံတဲ့အခါ သူတို့က နေရာယူပြီးဖြိုခွင့်းဖို့ လုပ်လာတာတွေ ရှိတယ်။ ဒါပေမယ့် ကျနော်တို့ အင်အားက လျော့သွားမျိုး မဟုတ်ဘူး။ ကျနော်တို့ စစ်ကြောင်းမှာ ချီတက်တာရယ် ၊ နောက်ဆုတ်တာရယ်ပဲ ရှိတာ။ အဲဒီတော့ စစ်အာဏာရှင် ပြုတ်ကျရေး ကျနော်တို့က ဆက်လက်ချီတက်ဖို့ ဆုံးဖြတ်ထားပြီးသား ဖြစ်ပါတယ်။ အခုဆိုရင် ကျနော်တို့ ထားဝယ်မြို့မှာ ရဲတပ်ဖွဲ့ဝင်ထဲက လူငယ်ရဲတပ်သား အတော်များများ CDM လုပ်လာတာတွေ ရှိတယ် ဒီရက်ပိုင်းထဲမှာ။"

အလားတူ တနင်္သာရီတိုင်း မြိတ်မြို့မှာလည်း ကြာသပတေးနေ့က သပိတ်စစ်ကြောင်းတွေ ဖြိုခွဲခံရပေမယ့် ထိခိုက်ကျဆုံးမှု နည်းရအောင် နည်းဗျူဟာပြောင်း လုပ်ဆောင်ခဲ့တယ်လို့ မြိတ်မြို့သပိတ်ကော်မတီဝင် မဇင်မာမိုးက ပြောပါတယ်။

"ဒီနေ့ကြာသပတေးမှာ မြိတ်မြို့က သပိတ်စစ်ကြောင်းတွေကို လာရောက်ဖြိုခွဲတာတွေ ရှိတယ်။ ဖြိုခွဲတယ်ဆိုတော့ ညီမတို့က ကြိုပြီးရှောင်လိုက်ပါတယ်။ သူတို့နဲ့ လွဲအောင်သွားလိုက်ပါတယ်။ ဗုဒ္ဓဟူးနေ့ကဆိုရင် အိမ်ထဲတွေထဲဝင်ပြီး ရိုက်တယ် ၊ ဖမ်းဆီး ခေါ်ဆောင်သွားတာတွေ ရှိပါတယ်ရှင့်။ အဲဒါက မြိတ်မြို့ရဲ့ ထားဝယ်စုရပ်ကွက်မှာပါ။ ပြီးတော့ ဟိုတနေ့က သပိတ်စစ်ကြောင်း ဖြိုခွင်းခံရတာတွေရှိတယ် .. ထိခိုက်ဒဏ်ရာတွေ ရခဲ့တာအများကြီးရှိတော့ လူတွေကြောက်သွားမှာ စိုးလို့ ၊ နည်းဗျူဟာ ပြောင်းလိုက်ကြတယ်။ ဒီဖက်မှာ စစ်တပ်က ပိတ်တယ်ဆိုရင် ဟိုဘက်ကို ပြောင်းသွား .. ပြောင်းသွားနဲ့ မြိတ်မှာတော့ သပိတ်စစ်ကြောင်း မရောက်တဲ့နေရာဆိုတာ မရှိပါဘူး။ မြို့အနှံ့မှာ ဆန္ဒပြနေကြတာပါ။ အခုဆိုရင် ဖြိုခွင်းခံရပြီး တရက်နှစ်ရက်အတွင်းမှာ လူကြီးတွေ သိပ်မထွက်တော့ဘူး ။ လူငယ်တွေပဲ အထွက်များတယ်။ ဒါပေမဲ့ လူငယ်တွေရဲ့ စိတ်ထဲမှာတော့ အာဏာရှင် မပြုတ်ကျမချင်း သူတို့တိုက်သွားမယ် လုပ်သွားမယ်ဆိုတာ တွေ့နေရတယ်ရှင့်။"

တနင်္သာရီတိုင်းနဲ့ ကပ်လျှက် မွန်ပြည်နယ်ရဲ့ မော်လမြိုင်မြို့မှာဆိုရင်လည်း စစ်တပ်နဲ့ရဲက ဖေဖေါ်ဝါရီ(၄)ရက်နေ့မှာ သပိတ်စစ်ကြောင်းတွေ လိုက်လံဖြိုခွင်းတာ ရှိသလို၊ စားနပ်ရိက္ခာ လုယူတာ ၊ ဆိုင်ကယ်နဲ့ကားတွေကို ရိုက်ခွဲဖျက်ဆီးတာတွေ ရှိကြောင်း CDM လှုပ်ရှားမှုမှာပါဝင်တဲ့ ပညာရေးဝန်ထမ်း အမျိုးသမီးတဦးက ပြောပါတယ်။

"ဗုဒ္ဓဟူးနေ့က ကလေးတယောက် သေဆုံးသွားတဲ့အတွက်ကြောင့် မြို့ခံတွေ တော်တော်လေးကို အုံကြွကြတယ်။ အတော်လေးကို ဒေါသထွက်နေကြတယ်။ ဒါပေမဲ့ ထိန်းထိန်းသိမ်းသိမ်း လုပ်နေကြပါတယ်။ ဒီနေ့ အခြေအနေပြောပါဆိုရင် မောင်ငံစျေးမှာ အသလွတ်ကြီး ရော်ဘာကျည်နဲ့ပစ်တယ်၊ ဆိုင်ကယ်တွေ တွန်းလှဲတယ် ကားမှန်တွေ ရိုက်ခွဲတယ်။ သူတို့ရဲ့ သွေးဆူနေမှုကို တွေ့နေရတယ်လေ။ ပြီးတော့ သူတို့မှာ ရိက္ခာတွေ ပြတ်လပ်နေလား မသိပါဘူး ... မောင်ငံအရပ်မှာရှိတဲ့ စျေးကနေ ရိက္ခာတွေ သူတို့ယူသွားတယ်။ ဆိတ် ၂ ကောင်၊ ငှက်ပျောခိုင်တို့ လုယူသွားတဲ့ သဘောပေါ့။ သူတို့ဘက်က ဘယ်လိုအင်အား သုံးသလဲဆိုရင် လက်ဖြောင့် sniper သမားလည်းပါတယ် ပြောတယ်။ sniper တွေက ရပ်ကွက်ထဲက တိုက်အမြင့်ကြီးတွေ ပေါ်မှာ နေရာယူထားတယ်။ နောက်ပြီး ရဲကားတွေနဲ့ ပိတ်ဖမ်းတာမျိုး လုပ်တယ်။ ဒီနေ့ဆို သပိတ်စစ်ကြောင်းက စုရပ်ကို ပထမ ကြေညာထားတာက စျေးချိုအရပ်လို့ ကြေညာထားတယ်။ တကယ်တော့ စျေးချိုမှာ မဟုတ်ပဲနဲ့ ဒိုင်းဝန်ကွင်းဘက်မှာ စီတန်း လှည့်ကြတယ်။ စစ်တပ်နဲ့ရဲ လိုက်လာတဲ့အခါကျတော့ မြို့ခံတွေက အကြောင်းကြားပေးတဲ့အတွက် လွတ်လွတ်ကျွတ်ကျွတ်နဲ့ လူစု ခွဲလိုက်နိုင်တယ်ပေါ့။ ဒါပေမယ့် သပိတ်က နားလိုက်တာတော့ မဟုတ်ဘူးပေါ့ နောက်နေ့တွေလည်း ဆက်ထွက်နေမှာပဲ။ နေ့တိုင်းကတော့ ထွက်နေမှာပါပဲ။"

ဆန္ဒပြပွဲတွေအတွင်း စစ်တပ်နဲ့ရဲရဲ့ ပစ်ခတ်နှိမ်နင်းမှုကြောင့် မြန်မာတနိုင်ငံလုံးမှာ ဒီနေ့အချိန်ထိ သေဆုံးသူ (၅၀)ထက်မနည်း ရှိလာပြီး၊ ဖိနှိပ် ဖြိုခွဲမှုအတွင်း ဒဏ်ရာရသူ အများအပြားရှိခဲ့ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ပြုစုထားတဲ့စာရင်းအရ စစ်တပ်က အာဏာ စသိမ်းခဲ့တဲ့ ဖေဖေါ်ဝါရီ(၁)ရက်ကနေ မတ်လ(၄)ရက်နေ့အထိ ဖမ်းဆီး ၊ တရားစွဲ ၊ ပြစ်ဒဏ်ချ ခံရသူ အားလုံးစုစုပေါင်း (၁၅၀၀)ကျော် ရှိသွားပြီဖြစ်ပါတယ်။ အဲဒီထဲက (၃)ဦး ထောင်ဒဏ်ချခံလိုက်ရပြီး၊ (၁၂၀၀)ကျော် ဆက်လက်ဖမ်းဆီး ခံနေရဆဲဖြစ်ကာ ၊ (၃၀၇)ဦး ပြန်လည်လွတ်မြောက်လာပါတယ်။ အမှုဖွင့် ခံထားရတဲ့ (၆၁)ဦးကတော့ တိမ်းရှောင်နေဆဲ ဖြစ်ပါတယ်။


ကိုဉာဏ်ဝင်းအောင်/ VOA Burmese

https://burmese.voanews.com/a/myanmar-protest-in-different-places-/5802609.html

နှိမ်နင်းမှုတွေကြားက ဆက်လက်ချီတက်နေဆဲ တနင်္သာရီ နဲ့ မွန်ပြည်နယ်က ဆန္ဒပြပွဲအခြေအနေ နှိမ်နင်းမှုတွေကြားက ဆက်လက်ချီတက်နေဆဲ တနင်္သာရီ နဲ့ မွန်ပြည်နယ်က ဆန္ဒပြပွဲအခြေအနေ Reviewed by THITHTOOLWIN on 07:41 Rating: 5

No comments:

Powered by Blogger.