မြန်မာစစ်တပ်အရာရှိနှစ်ဦးအခြားအဆင့်နှစ်ဦးသတ်ခံရမှု ရွာသားလေးဦးဖမ်းဆီး

ချောက်အတွင်းပျက်ကျနေသောတပ်မတော်ကား။ ဓါတ်ပုံ တပ်မတော်ကာကွယ်ရေးဦးစီးချုပ်ရုံး

ရှမ်းပြည်နယ်(တောင်ပိုင်း) နယ်မြေခံတပ်ရင်းက အရာရှိ ၂ ဦး၊ အခြားအဆင့် ၂ ဦး ပေါင်း (၄) ဦးတို့ကို သတ်ဖြတ်ခဲ့တယ်ဆိုတဲ့ စွပ်စွဲချက်နဲ့ ဖယ်ခုံမြို့နယ်ကရွာသား (၄) ဦးကို အရေးယူထားတဲ့အကြောင်း ဗွီအိုအေသတင်းထောက် နိုင်ကွန်းအိန် သတင်းပေးပို့ထားပါတယ်။

အုပ်ချုပ်မှုကိစ္စဆောင်ရွက်ဖို့ မော်တော်ယာဉ်နဲ့လာတဲ့မြန်မာစစ်တပ်အရာရှိ (၂) ဦးအပါဝင် (၄)ဦးကို ရှမ်းပြည်နယ်တောင်ပိုင်း ဖယ်ခုံ မြို့နယ်အတွင်း ဒေသခံရွာသားတွေက ဖမ်းဆီးလုပ်ကြံခဲ့တယ်လို့ တပ်မတော်ဘက်က ထုတ်ပြန်ထားပါတယ်။

မတ် ၁၅ ရက်နေ့က အရပ်ဝတ်နဲ့ မြန်မာစစ်တပ်က (၄) ဦးကို လူတစုကနေ ဖယ်ခုံမြို့နယ်လယ်ထွန်ကျေးရွာအရှေ့မြောက်ဘက် တောင်ကုန်းပေါ်ကို ၎င်းတို့စီးနင်းလာတဲ့ယာဉ်နှဲ့အတူ ခေါ်ဆောင်သွားကြောင်း မတ်(၁၉) ရက်ကရှာဖွေခဲ့ရာမှာ ၃၅ ပေခန့်နက်တဲ့ ချောက်အတွင်း ကား(၁)စီး မီးလောင်နေတာ တွေ့ရှိရသလို ၎င်းနေရာတဝိုက် ဆက်လက်ရှာဖွေခဲ့ရာ ကျင်း ၁ ကျင်းအတွင်း လက်ပြန်ကြိုးတုပ်ထားလျက်သေဆုံးနေတဲ့ အရပ်ဝတ်နဲ့အလောင်းတွေကို တွေ့ရှိရတယ်လို့ တပ်မတော်ဘက်က ဆိုပါတယ်။

အဆိုပါ လုပ်ကြံသတ်ဖြတ်မှုမှာပါဝင်သူလို့ယုံကြည်ရတဲ့ဖယ်ခုံမြို့ လယ်ထွန်းကျေးရွာနေ ဦးကေကော်ရီရို ၅၅ နှစ်နဲ့ ဦးမောင်လာ ၄၈နှစ်၊ဖာလိုင်တောင်ခြေကျေးရွာနေ ဦးမောင်ငြိမ်း ၅၁ နှစ်၊ ဦးမောင်ခုန်း ၄၅ နှစ်အပါဝင် ရွာသား (၄) ဦးကို စစ်ဆေးဖော်ထုတ်လျက်ရှိပြီး ဥပဒေနှင့်အညီ ထိရောက်ပြင်းထန်စွာ အမြန်ဆုံးအရေးယူနိုင်ရေး ဆောင်ရွက်နေတယ်လို့ တပ်မတော်ကာကွယ် ရေးဦးစီးချုပ်ရုံးကနေ သတင်းထုတ်ပြန်ထားပါတယ်။

အရပ်ဝတ်နဲ့လာတဲ့တပ်မတော်သားတွေကို ဖယ်ခုံမြို့နယ် ဒေသခံရွာသားတချို့က ဖမ်းဆီးခဲ့ကြောင်းကိုတော့ ဒေသခံတဦးက ပြောပါတယ်။

“သာမန်အရပ်သားတွေဆို မဖမ်းဘူးပေါ့။ ဒါပေမယ့် သူတို့က ဆိုင်ထဲမှာဘီယာဝင်ဝယ်ရင်းနဲ့ စစ်သားမှန်း ရွာတွေကသိတော့ တခါတည်း ဖမ်းချုပ်လိုက်တာပေါ့။ ဖမ်းချုပ်လိုက်တယ်ဆိုတဲ့ဟာမျိုးတွေဖြစ်သွားတယ်။”

ဒါပေမယ့် တိုးတက်သောကရင်နီပြည်သူ့အင်အားစု - PKPF သတင်းနှင့်ပြန်ကြားရေးဗျူရိုကတော့ မြန်မာစစ်တပ်က (၄) ဦးဟာ ကျေးရွာအတွင်း မူးရူးရမ်းကားပြီး အရက်သောက်လွန်လို့ မိုးဗြဲ ၄၂၂ တပ်ရင်း အနီးအနားက မိုးဗြဲရေလှောင်ကန်ထဲကရေနစ်သေဆုံးတာဖြစ်ပြီး ဒေသခံဖမ်းဆီးသတ်ဖြတ်ကြောင်းအကြောင်းပြချက်နဲ့ အဲဒီဒေသမှာ တပ်စွဲတာ လူဖမ်းဆီးတာဖြစ်တယ်လို့ ဒီကနေ့မှာ ထုတ်ပြန်ထားပါတယ်။

တပ်မတော်ဘက်ကရွာသား (၄) ဦးဖမ်းဆီးထားကြောင်း ကယားပြည်နယ်အခြေစိုက် LAIN နည်းပညာ အထောက်အကူပြုအဖွဲ့ တာဝန်ရှိသူကိုကျော်ထင်အောင်က အတည်ပြုပြောပါတယ်။

“တော်တော်များများတော့ပြန်လွတ်လာပြီးတော့မှ ကျေးရွာလူကြီးဟောင်းတဦးနဲ့ကျန်တဲ့ (၃) ဦးအထိဖြစ်နိုင်တယ်ပေါ့နော်။ အားလုံးပေါင်း (၄) ဦး ကျန်သေးတယ်ဆိုတဲ့ အခြေအနေရှိပါတယ်ခင်ဗျ။”

မြန်မာစစ်တပ်က (၄) ဦးပျောက်ဆုံးမှုကိုအကြောင်းပြုပြီး မြန်မာစစ်တပ်စစ်ကြောင်းကနေ မတ်လ (၁၈) ရက်နေ့မှာ ဖယ်ခုံမြို့နယ် မိုးဗြဲမြို့က ဆောင်ကန်းကျေးရွာ လယ်ထွန်ရွာနဲ့ ဝှာရီတောင်ခြေရွာတွေကို စစ်တပ်အင်အားအလုံးအရင်းနဲ့ ရောက်ရှိလာခဲ့ရာမှာ ရွာသားတွေ တားဆီးဆန္ဒဖော်ထုတ်ခဲ့လို့ သပိတ်ဖြိုခွင်းမှု ဖြစ်ပွါးခဲ့ပါတယ်။ ဒီဖြစ်စဉ်မှာ ကြားဝင်ညှိနှိုင်းပေးတဲ့ သပိတ်ခေါင်း ဆောင်ခွန်မျိုးလှိုင်ဝင်းနဲ့ရွာသား (၃၀) ကျော်ကို မြန်မာစစ်တပ်ကနေ ဖမ်းဆီးသွားခဲ့ပါတယ်။ ဒီအခြေအနေကို ကိုယ်တိုင်အဖမ်းခံရသူ ခွန်မျိုးလှိုင်ဝင်းကအခုလိုပြောပါတယ်။

“အဖမ်းခံရတယ်ကျွန်တော်တို့သိတဲ့အချိန်မှာ စစ်တပ်တွေက ရွာထဲကိုအလုံးအရင်းနဲ့ဝင်လာတယ်။ သူတို့လူအသတ်ခံရ ပါတယ်ဒီရွာမှာ သတင်းအတိကျရပါတယ်ဆိုပြီးတော့ လာရောက်ရှာဖွေတော့ ရွာသူရွာသားတွေနဲ့စစ်တပ်နဲ့ထိပ်တိုက်တွေ့တယ်။ ထိပ်တိုက်တွေ့တော့ ကျနော်တို့ ကြားဝင်ညှိနှိုင်းဖြန်ဖြေပေးတာပေါ့။ ကြားဝင်ဖြန်ဖြေပေးရင်းနဲ့ ရွာသူရွာသားတွေလက်ခံလို့ စစ်တပ်ကနေရွာထဲမှာဝင်ရှာဖွေတာ သူတို့က လက်ခံတယ်။ ဘာမှမတွေ့တော့ပြန်ထွက်သွားတယ်။ ပြန်ထွက်သွားပြီး စစ်တပ်တွေပြန်လာတော့ ရုတ်တရက်မထင်မှတ်အချိန်မှာ ရာဘာကျည်တို့ မျက်ရည်ယိုဗုံးတို့ ကျည်အစစ်နဲ့ပစ်ပြီးဖြိုခွဲတာပေါ့။ ရွာထဲမှာတပ်စွဲထားတယ်။ သူတို့စစ်သည်တော် (၄) ယောက် အလောင်းမရမချင်း ဒီရွာမှာပဲ တပ်စွဲထားမယ်။ နောက်ပြီးတော့မသင်္ကာသူတွေကို အားလုံးဖမ်းထားမယ်။ စစ်ဆေးမေးမြန်းမယ်ဆိုပြီး အဲဒီလိုလုပ်လိုက်တာပေါ့။ သူတို့က။ သူတို့လည်း ပြန်လွတ်လာတယ်။ ကျနော်နဲ့တူတူပဲ။ ဒါပေမယ့် သူတို့ကတော့စစ်ကြောရေးမှာ ရိုက်နှက်ပုတ်ခတ်တာတို့ ခံရတာပေါ့။”

လုပ်ကြံသူလို့စွပ်စွဲခံရတဲ့လူ (၄) ဦးကလွဲရင် ကျန်တဲ့အဖမ်းဆီးခံရသူတွေကိုတော့ မြန်မာစစ်တပ်ကနေ စီစစ်အပြီး ပြန်လွတ်လာပြီးလို့ ခွန်မျိုးလှိုင်ဝင်းကပြောပါတယ်။

ဖေဖော်ဝါရီ (၁) ရက်နေ့တုန်းက မဲမသမာမှုကိုအကြောင်းပြုပြီးတပ်မတော်ကနေ နိုင်ငံတော်အာဏာကိုထိန်းသိမ်းထားခဲ့ပြီး နောက်ပိုင်း တနိုင်ငံလုံး အတိုင်းအတာဆန့်ကျင်သပိတ်မှောက်ဆန္ဒပြမှုဖြစ်ပွါးခဲ့ပါတယ်။

စစ်အာဏာရှင်ဆန့်ကျင်ရေး သပိတ်မှောက်ဆန္ဒပြတာ ရက်ရှည်လာသလို လုံခြုံရေးအဖွဲ့တွေရဲ့သပိတ်ဖြိုခွင်းမှုကလည်း အရှိန်ပြင်းလာတာကြောင့် သေဆုံးဒဏ်ရာရရှိမှုတွေကလည်း များပြားလာနေပြီး တချို့ဒေသတွေမှာ ဆန္ဒပြသူတွေကနေ လုံခြုံရေးတပ်ဖွဲ့ဝင်တွေကိုရတဲ့နည်းလမ်းနဲ့ တုံ့ပြန်မှုတွေကလည်း ရှိလာနေပါတယ်ခင်ဗျာ။


နိုင်ကွန်းအိန်/ VOA Burmese

https://burmese.voanews.com/a/pekhon-myanmar-military-coup-4-soldiers-killed-shan-/5822802.html

မြန်မာစစ်တပ်အရာရှိနှစ်ဦးအခြားအဆင့်နှစ်ဦးသတ်ခံရမှု ရွာသားလေးဦးဖမ်းဆီး မြန်မာစစ်တပ်အရာရှိနှစ်ဦးအခြားအဆင့်နှစ်ဦးသတ်ခံရမှု ရွာသားလေးဦးဖမ်းဆီး Reviewed by THITHTOOLWIN on 21:07 Rating: 5

No comments:

Powered by Blogger.