ကချင် ဖားကန့်မှာ ရဲကား ၃ စီး မိုင်းခွဲတိုက်ခိုက်ခံရ



Share/Bookmark
KIA Kachin Soldiers

ကချင်ပြည်နယ်၊ ဖားကန့်မြို့နယ်မှာ ရဲကား (၃) စီး တိုက်ခိုက်ခံရသလို ဗန်းမော်မြို့နယ်ဘက်မှာ မြန်မာစစ်တပ်နဲ့ KIA ကချင်လွတ် လပ်ရေးတပ်ဖွဲ့တို့ အကြားတိုက်ပွဲဖြစ်ပွါးနေဆဲအခြေအနေအကြောင်း ဗွီအိုအေသတင်းထောက် နိုင်ကွန်းအိန်က တင်ပြပေးထားပါတယ်။

ကချင်ပြည်နယ် မိုးညှင်းခရိုင် ဖားကန့်နယ် ဆိပ်မူ-ဆိုင်းတောင်ကျေးရွာ ကျောက်သွေးတောင်လမ်းမှာ မနေ့ ညနေ (၄)နာရီ လောက်မှာ ကျောက်စိမ်းတူးဖော်ရေး လုံခြုံရေးရဲတပ်ဖွဲ့ကား (၃) စီးတိုက်ခိုက်ခံရတယ်လို့ ဆိပ်မူကျေးရွာသားတဦးက ပြောပါတယ်။

“ကျနော်တို့ ဖားကန့်မှာ လုပ်ကွက်တွေလုံခြုံရေးအတွက် အဲဒီဘက် ရဲတပ်ရင်းတွေရှိတယ်ဗျ။ အဲဒီရဲတပ်ရင်းတွေက ညနေ (၄) နာရီလောက်မှာ ဖားကန့်ကနေ သူတို့အထိုင်စခန်းရှိတဲ့နေရာတွေကို သွားကြတာပေါ့နော်။ ဆိပ်မူကျေးရွာတံတား အသစ်ကနေမှ ဖားကန့်တောင်ဘက်အသွားမှာ လက်နက်ကြီးလား ဆွဲမိုင်းလား ဒုံးလား ဘာမှတော့မကွဲပြားဘူး။ (၃) စီးလာတဲ့အချိန်မှာ ဆီးပစ်တာ။ ဆီးခွဲတဲ့အခါကျတော့ ရှေ့ကကား (၂) စီးကတော့ မထိဘူး။ နောက်ဆုံးကားတော့ မီးခိုးလုံးကြီးနဲ့ဖြစ်ပြီးတော့မှ အဲဒီမီးခိုးလုံးကြားထဲက ရဲတွေ ထွက်ပြေးတာပေါ့နော်။ သေနတ်တွေနဲ့ တောင်ပေါ်ကနေဆီးပစ်တယ်လို့တော့ ပြောတယ်။ ရဲတယောက်တော့ လက်ထိသွားတယ်ပေါ့။”

ရဲကား (၃) စီးမိုင်းခွဲခံရတဲ့အပြင် တောင်ကုန်းပေါ်ကနေလှမ်းပစ်တာခံရသလို ဒေသအတွင်း သေနတ်သံတွေ ကြားနေရတယ်လို့လည်း ဆိုပါတယ်။ ဖားကန့်ဒေသ ပစ်ခတ်ဖောက်ခွဲမှုနဲ့ပတ်သက်လို့ အောက်ခြေကနေ တင်ပြလာတာမရှိသေးဘူးလို့ KIA ပြောခွင့်ရ ဒုဗိုလ်မှူး ကြီးနော်ဘူက ပြောပါတယ်။

ဖားကန့်ဒေသအခြေပြုလှုပ်ရှားနေတဲ့ KIA တပ်မဟာ(၉)၊ တပ်ရင်း (၆) ကနေ စစ်ကောင်စီတပ်ဖွဲ့တွေအနေနဲ့ ပြည်သူလူထုကိုထိခိုက်ရင် ထိရောက်စွာတုံ့ပြန်သွားမယ်လို့ မနေ့က ကြေညာချက်ထုတ်ပြန်ထားပါတယ်။

ဒါ့အပြင် ဗန်းမော်မြို့နယ်ဘက်မှာလည်း မြန်မာစစ်တပ်နဲ့ KIA ကချင်လွတ်လပ်ရေးတပ်ဖွဲ့တို့အကြား တိုက်ပွဲ ဖြစ်နေတယ်လို့လည်း ဒေါ့ဖုန်းယန်ဒေသခံတဦးကပြောပါတယ်။

“လောလောဆယ်ထိတော့တိုက်ပွဲတွေဖြစ်နေတုန်းပဲ။ တိုက်ပွဲတွေကတော့ ဗန်းမော်နဲ့မြစ်ကြီးနားလမ်းမှာ မနေ့တုန်းကတော့ တကြိမ်တိုက်ပွဲဖြစ်တယ်။ ဒေါ့ဖုန်းယန်အကျော်ပေါ့။ နန်ဆာယန်မရောက်ခင်နားလေးမှာ။ မနေ့တုန်းက လေယာဉ်နဲ့ဟယ်လီကော်ပတာ (၃) စီးနဲ့ ဒေါ့ဖုန်းယန်မြို့ပေါ်ကနေပြီး KIA ရှိတယ်လို့ထင်ရတဲ့ သူတို့ရဲ့ တပ်စခန်းတွေကို လှန်းပစ်တာမျိုးတော့ ဆက်တိုက်လုပ်နေတယ်။”

မြန်မာစစ်တပ်ကနေ မနေ့က လေကြောင်းအကူသုံးပစ်ခတ်ကြောင်းကိုတော့ KIA ပြောခွင့်ရ ဒုဗိုလ်မှူးကြီးနော်ဘူက အတည်ပြု ပြောပါတယ်။

“မနေ့တုန်းကတော့ ခလာယန်ကို နန်ဆာယန်နဲ့ မြစ်ကြီးနားသွားတဲ့လမ်းမှာ လေယာဉ်ပျံနဲ့လာပစ်တာရှိပါတယ်။ နန်ဆာယန် တဝိုက်မှာ။ လေယာဉ်ပျံနဲ့ပစ်တာလည်း သူတို့စက်လက်နက်နဲ့ ပစ်တာ။ ”

ဖားကန့်နဲ့ဗန်းမော်ဘက်ပစ်ခတ်တိုက်ခိုက်မှုအခြေအနေကိုတော့တပ်မတော်ပြောရေးဆိုခွင့်ရှိသူကို ဆက်သွယ်ခဲ့ပေမဲ့ မရရှိခဲ့ပါဘူး။

ပြီးခဲ့တဲ့ မတ်လ(၂၄) ရက်နေ့ ညနေမှာ မြန်မာစစ်တပ် တပ်စခန်း (၃) ခုကို ကချင်လွတ်လပ်ရေးတပ် KIA ဘက်က ဝင်ရောက်တိုက်ခိုက်ခဲ့ပြီး အလောဘွမ် ပင်မတပ်စခန်းကိုသိမ်းပိုက်ခဲ့အပြီးမှာ မြန်မာစစ်တပ်ကနေ စစ်အင်အားဖြည့်တင်း ထိုးစစ်ဆင်မှုတွေ တိုးလုပ်ဆောင်လာနေတာပါ။

ဖေဖော်ဝါရီ (၁) ရက်နေ့မှာ မြန်မာတပ်မတော်ကနေ နိုင်ငံတော်အာဏာကိုထိန်းသိမ်းခဲ့အပြီး နိုင်ငံတဝှမ်း ဆန့်ကျင် သပိတ်မှောက်မှုနဲ့ကြုံနေရသလို တဖက်မှာလည်း ကချင်လွတ်လပ်ရေးအဖွဲ့ KIA ၊ တအာင်းပလောင်တပ်ဖွဲ့ TNLA ၊ ကရင်အမျိုးသားအစည်းအရုံး KNU လက်နောက်ခံ တပ်ဖွဲ့တချို့နဲ့ တိုက်ပွဲဖြစ်ပွါးနေဆဲ ဖြစ်ပါတယ်။ ကျွန်တော်နိုင်ကွန်းအိန် ဗွီအိုအေမြန်မာပိုင်းအတွက်သတင်းပေးပို့ထားပါတယ်။


နိုင်ကွန်းအိန်/ VOA Burmese

https://burmese.voanews.com/a/kia-attack-myanmar-military-police-vehicals-burned-down-/5830590.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ