ဒေါ်အောင်ဆန်းစုကြည်နဲ့ သမ္မတဦးဝင်းမြင့်ကို လွှတ်ပေးဖို့ လန်ဒန်မြန်မာသံအမတ်ကြီး မေတ္တာရပ်ခံ



Share/Bookmark
ဒေါ်အောင်ဆန်းစုကြည်နဲ့ သမ္မတဦးဝင်းမြင့်ကို လွှတ်ပေးဖို့ လန်ဒန်မြန်မာသံအမတ်ကြီး မေတ္တာရပ်ခံ

ပြည်သူလူထုရွေးကောက်တင်မြှောက်ထားတဲ့ ဒေါ်အောင်ဆန်းစုကြည် အစိုးရကပဲ သူ့ကို ခန့်အပ်ထားတဲ့အတွက် ဒေါ်အောင်ဆန်းစုကြည် ရဲ့ညွန်ကြားချက်အတိုင်းပဲ အလုပ်လုပ်မှာဖြစ်သလို၊ ဖမ်းဆီးခံထားရတဲ့ ဒေါ်အောင်ဆန်းစုကြည်နဲ့ သမ္မတ ဦးဝင်းမြင့်တို့ကို လွှတ်ပေးဖို့ ဗြိတိန်နိုင်ငံဆိုင်ရာ မြန်မာသံအမတ်ကြီး ဦးကျော်စွာမင်းက တနင်္လာနေ့က ကြေညာချက်ထုတ်ပြန်ခဲ့ပါတယ်။ ဒီကြေညာချက်နဲ့ ပတ်သက်လို့ ဗြိတိန်နိုင်ငံ မြန်မာအသိုင်းအဝိုင်းက CDM လှုပ်ရှားမှုကို တက်တက်ကြွကြွအကူအညီပေးနေသူလည်းဖြစ်၊ သံရုံးနဲ့ ညှိုနှိုင်းဆောင်ရွက်နေသူလည်းဖြစ်တဲ့ မြန်မာဆရာဝန် ဒေါက်တာသက်ကိုကို ကို မအင်ကြင်းနိုင်က ဆက်သွယ်မေးမြန်းထားပါတယ်။

မအင်ကြင်းနိုင်။ ။ လန်ဒန်က မြန်မာသံအမတ်ကြီး ဦးကျော်စွာမင်းကနေပြီးတော့ NLD အစိုးရသာ သူ့အစိုးရဖြစ်ကြောင်းဆိုတဲ့ ထုတ်ပြန်ကြေညာချက်နဲ့ ပတ်သက်ပြီးတော့ NLD ကို သူက သစ္စာခံမယ့်သဘောလား ဘယ်လိုနားလည်ထားလဲရှင့်။

ဒေါက်တာ သက်ကိုကို။ ။ ဘယ်လိုနားလည်ထားလဲဆိုတော့ ဦးကျော်စွာမင်းက ပြည်သူလူထု ရွေးကောက်တင်မြောက်ထားတဲ့ ဒေါ်အောင်ဆန်းစုကြည်အစိုးရက သူ့ကို ခန့်ထားတာပါတဲ့ ။ ဒေါ်အောင်ဆန်းစုကြည်အစိုးရက လက်အောက်မှာပဲ အလုပ်လုပ်ပါတယ်ဆိုတဲ့ ကြေညာချက်ကို ဒီနေ့ထုတ်ပါတယ်။ ပြီးတော့ ဒေါ်အောင်ဆန်းစုကြည်နဲ့ သမ္မတဦးဝင်းမြင့်ကိုလည်း အမြန်ဆုံး လွှတ်ပေးဖို့ သတင်းထုတ်တဲ့အထဲမှာ ပါပါတယ်။

မအင်ကြင်းနိုင်။ ။ အဲဒီတော့ သံအမတ်ကြီးကိုယ်တိုင်ပေါ့နော် သူတို့ လန်ဒန်က မြန်မာသံရုံး website မှာ တင်လိုက်တဲ့ကြေညာချက်နဲ့ ပတ်သက်လို့ CDM အမိန့်မနာခံရေး အကြမ်းမဖက်လှုပ်ရှားမှုပေါ့နော် ၊ စစ်အာဏာသိမ်း ဆန့်ကျင်တဲ့ လှုပ်ရှားမှုထဲမှာ ပါဝင်လာတယ်လို့ ပြောလို့ရသလား။

ဒေါက်တာ သက်ကိုကို။ ။ အဲဒါကတော့ indirectly လို့ ပြောလို့ရမယ်။ ဒါပေမယ့် သံအမတ်ကြီးကိုယ်တိုင်က အဲဒီကိစ္စကို ဘာမှ announce မလုပ်ပါဘူးခင်ဗျ။ မနက်ဖြန်ကျရင်တော့ သူ သတင်းထုတ်ပြန်ချက်တွေ လုပ်ပါလိမ့်မယ်လို့ ကျနော်ထင်ပါတယ်။ အဲဒီကျရင်တော့ အသေးစိတ် ပိုသိရမှာပေါ့နော်။

မအင်ကြင်းနိုင်။ ။ အဲဒီတော့ မြန်မာသံရုံးအနေနဲ့ တကယ်လို့ လက်ရှိ အခု မြန်မာနိုင်ငံထဲမှာကျတော့ စစ်တပ်က ဖွဲ့စည်းထားတဲ့အုပ်ချုပ်ရေးကောင်စီက ရှိနေတယ် တဖက်မှာလည်း NLD အစိုးရကိုလည်း သူတို့အစိုးရအဖြစ် ခံယူထားတဲ့အခါကျတော့ သံရုံးလုပ်ငန်းစဉ်တွေကျတော့ ဘယ်လို ဆက်လုပ်နိုင်မယ်လို့ မျှော်လင့်ထားသလဲရှင့်။

ဒေါက်တာ သက်ကိုကို။ ။ ကျနော်အဲဒါတော့ အတိအကျ မသိရပါဘူးခင်ဗျ။ ကျနော့်အနေနဲ့ ယူဆကြည့်တာပါ အခုမှ လုပ်တာတော့ မဖြစ်လောက်ဘူး ဘာဖြစ်လို့လဲဆိုတော့ သူသည် ဗြိတိသျှ နိုင်ငံခြားရေးဝန်ကြီးနဲ့ရော ၊ အာရှရေးရာလက်ထောက် နိုင်ငံခြားရေးဝန်ကြီးနဲ့ရော သူ သေချာတွေ့ထားတယ်ဆိုတော့ ဒါတွေအကုန်လုံးက သူတို့တွေအကုန်လုံး ကြိုတင်ပြီးတော့ စီမံမှုတွေရှိလိမ့်မယ်လို့ ယူဆပါတယ်ခင်ဗျ။ ဒါပေမယ့်ပေါ့နော် တခု သူအဲဒီထဲမှာ ရေးထားတာက သံရုံးမပိတ်ဘူးလို့ ရေးထားပါတယ်ဆိုတော့ သူက ဒီဟာပေါ့နော် သံတမန်ရေးရာအရ သူ့ဘက်က တတ်နိုင်သလောက် ကြိုးစားပြီးတော့ အမေစုနဲ့ သမ္မတကြီး ဦးဝင်းမြင့် လွှတ်မြောက်ဖို့အရေး ကို လုပ်ပါမယ်လို့ သူရေးထားပါတယ်ခင်ဗျ။

မအင်ကြင်းနိုင်။ ။ ဆိုတော့ ဒီလိုမျိုး ကြေညာချက်ထုတ်ဖို့လည်း ဗြိတိန်အစိုးရနဲ့ ညှိနှိုင်းဆောင်ရွက်တာတွေ ဆွေးနွေးတာတွေလည်း ရှိတယ်လို့ သိရတဲ့အခါကျတော့ ဒီလို သံအမတ်ကြီးရဲ့ အခုလို ကြေညာချက်နဲ့ ပတ်သက်ပြီးတော့ ဗြိတိန်အစိုးရဘက်က ဘယ်လို တုံ့ပြန်မယ်လို့ မြင်သလဲရှင့်။

ဒေါက်တာ သက်ကိုကို။ ။ အခုက သူတရားဝင်ရေးထားတယ်လေ သောကြာနေ့ကတခါတွေ့တယ်၊ ဒီနေ့တခါတွေ့တယ်လို့ သူရေးထားတယ်။ အဲဒါကိုကြည့်ခြင်းအားဖြင့် သူတို့က သဘောတူညီမှု တခုခု ရထားတယ်လို့ ကျနော်ယူဆပါတယ်ခင်ဗျ။ ကျနော်အတိအကျတော့ မသိဘူးပေါ့နော် မနက်ဖြန်ကျရင်တော့ ဘာကြေညာမလဲဆိုတာ ကျနော်တို့ စောင့်ကြည့်ရပါလိမ့်မယ်။ အင်္ဂလိပ်အစိုးရ ဗြိတိသျှအစိုးရကလည်း ဘာကြေညာမလဲဆိုတာ ကျနော်တို့ စောင့်ကြည့်ရမယ်ပေါ့နော်။ မနက်ဖြန်ကျရင် မြန်မာသံရုံးက ကြေညာချက်လည်း ထုတ်နိုင်ပါတယ်။ UK အစိုးရကလည်း ကြေညာချက်လည်း ထုတ်နိုင်ပါတယ် ကျနော်တို့ စောင့်ကြည့်ရမယ်။ အခု DominicRaab ကတော့ သူ့ twitter မှာ tweet လုပ်လိုက်ပြီ သူသံအမတ်ကြီးကို ချီးကျူးကြောင်း သံအမတ်ကြီးရဲ့ courage ကို ဂုဏ်ယူကြောင်း သူရေးထားတယ်။

မအင်ကြင်းနိုင်။ ။ အဲဒီတော့ သံအမတ်ကြီးရဲ့ ကြေညာချက် အပေါ်မှာ အင်္ဂလန်မှာ ရှိတဲ့ မြန်မာအသိုင်းအဝိုင်းပေါ့နော် ဒေါက်တာ သက်ကိုကိုတို့ရဲ့ တုံ့ပြန်ချက်က ဘယ်လိုရှိပါသလဲ။

ဒေါက်တာ သက်ကိုကို။ ။ ကျနော်တို့ကတော့ အရမ်းဝမ်းသာတာပေါ့နော် သံအမတ် အဆက်ဆက်မှာ ကျနော်တို့ ဘယ်သူနဲ့မှ မခင်ခဲ့ကြဘူးပေါ့နော် အခုမှ မြန်မာသံအမတ်ကြီး ဦးကျော်စွာမင်းက ကျနေ်ာတို့ မြန်မာ Community နဲ့ အမေစု လက်ထက်မှာ ကျနော်တို့ကို အရမ်း ဂရုစိုက်တယ်ပေါ့နော်။ ဒါပေမယ့် နည်းနည်း စိတ်ဝမ်းကွဲစရာလေးတွေလည်း ပထမပိုင်းမှာ ဖြစ်တယ်ပေါ့နော် ဘာလို့လဲဆိုတော့ အာဏာသိမ်းပြီးတဲ့အခါမှာ ပြည်သူလူထုကတော့ သူ့ဆီကနေ မျှော်လင့်တာ ချက်ချင်း ပြည်သူဘက်က ရပ်တယ်ပေါ့နော် ချက်ချင်းပြောတာကို ကျနော်တို့ မျှော်လင့်ခဲ့တယ်။ ဒါပေမယ့် အဲဒီမှာ တချို့တွေလည်း ဒေါသထွက်တာတွေ ၊ upset ဖြစ်တာတွေ ၊ မယုံမကြည်တွေ ဖြစ်တယ်ပေါ့နော်။ ဒါပေမယ့်လည်း ဘာပဲပြောပြော ကျနော်တို့ကတော့ တိုက်ပွဲဝင်တဲ့အခါမှာ ကိုယ့်ဘက်က လူများသင့်သလောက်များပြီးတော့ အရေးပါတဲ့လူတွေ ပါလာဖို့အရေးက ကျနော်တို့အတွက် အရေးကြီးပါတယ်။ အဲဒီတော့ ပြီးခဲ့တဲ့ ဖြစ်ခဲ့တာတွေကို မေ့လိုက်ပါ။ ရွေးကောက်ပွဲ မတိုင်ခင်အဆက်ဆက် ဒေါ်အောင်ဆန်းစုကြည် အစိုးရလက်ထက် အဆက်ဆက်မှာ UK ရောက်မြန်မာပြည်သူလူထုနဲ့ မြန်မာသံရုံးက တော်တော်ကို နီးကပ်ခဲ့ပါတယ်။ ဆိုတော့ အဲဒီ သမိုင်းကြောင်းလေးတွေ အတိတ်ကို ပြန်သွားပြီးတော့ ကြားထဲက နားလည်မှုလွဲခဲ့တဲ့ အတိတ်ကို မေ့လိုက်ပြီးတော့ ရှေ့ရှောက်အတူလက်တွဲပြီးတော့ ဆောင်ရွက်ကြဖို့ ကျနော်အားလုံးကို အကြံပေးချင်ပါတယ်။

ဗြိတိန်နိုင်ငံ မြန်မာအသိုင်းအဝိုင်းက CDM လှုပ်ရှားမှုကို တက်တက်ကြွကြွအကူအညီပေးနေသူလည်းဖြစ်၊ သံရုံးနဲ့ ညှိုနှိုင်းဆောင်ရွက်နေသူလည်းဖြစ်တဲ့ မြန်မာဆရာဝန် ဒေါက်တာသက်ကိုကို ကို မအင်ကြင်းနိုင်က ဆက်သွယ်မေးမြန်းခဲ့တာပါ။


အင်ကြင်းနိုင်/ VOA Burmese

https://burmese.voanews.com/a/myanmar-uk-ambassador-statement-/5806647.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ