အကြမ်းဖက်နှိပ်ကွပ်မှု ရပ်ဆိုင်းဖို့ ကုလဆက်လက်တောင်းဆို

ကုလသမဂ္ဂ ပြောခွင့်ရ Farhan Haq

မြန်မာ့ စစ်အာဏာသိမ်းမှု ဆန့်ကျင် ဆန္ဒပြမှုတွေ အတွင်း လုံခြုံရေး တပ်ဖွဲ့ဝင်တွေ လက်ချက်နဲ့ သေဆုံးသူ အနည်းဆုံး ၂၂၄ ဦး ရှိပြီ ဖြစ်ကြောင်း ကုလသမဂ္ဂ လူ့အခွင့်အရေးရုံးက ပြောဆိုထားပါတယ်။

"ဖမ်းဆီးစဉ် သေဆုံးရသူတွေ အပါအဝင် လုံခြုံရေး တပ်ဖွဲ့တွေ လက်ချက်နဲ့ သေဆုံးရသူ အရပ်သား အနည်းဆုံး ၂၂၄ ယောက် ရှိတယ်လို့ ကုလသမဂ္ဂ လူ့အခွင့်အရေးရုံးက ထုတ်ပြန်ထားကြောင်း" ပြောခွင့်ရ Farhan Haq က တနလာင်္နေ့ သတင်းစာ ရှင်းလင်းပွဲမှာ ပြောဆိုခဲ့တာပါ။

အမှန်တကယ် အရပ်သား သေဆုံးရမှုက ၂၅၀ နဲ့ အထက် ရှိနိုင်တယ်လို့ ကုလသမဂ္ဂက ယူဆထားပါတယ်။ နိုင်ငံရေး အကျဉ်းသားများ ကူညီစောင့်ရှောက်ရေး အသင်း AAPP ရဲ့ မတ်လ ၂၂ ရက်နေ့ အတည်ပြုချက် အရ အရပ်သား သေဆုံးသူ၂၆၁ ဦး ရှိပြီး အမှန်တကယ် သေဆုံးသူက ဒီထက် ပိုများကြောင်း၊ ဆက်လက် အတည်ပြုချက် ရယူ စုဆောင်းနေကြောင်း ဖော်ပြပါတယ်။ ဆန္ဒပြပွဲတွေ အပေါ် အကြမ်းဖက် တိုက်ခိုက်မှုကြောင့် အမျိုးသမီးနဲ့ ကလေးငယ်တွေ အပါအဝင် ဒဏ်ရာရသူ ရာနဲ့ချီ ရှိနေပါတယ်။

ငြိမ်းချမ်းစွာ ဆန္ဒပြသူတွေကို စစ်တပ်ဘက်က အင်အားသုံး နှိမ်နင်းမှု ရပ်ဖို့ မြန်မာနိုင်ငံဆိုင်ရာ ကုလသမဂ္ဂရုံးက တစိုက်မတ်မတ် တောင်းဆိုထားပါတယ်။ မြန်မာ စစ်တပ်က ဖမ်းထားတဲ့ သတင်းထောက် အနည်းဆုံး ၄၀ ရှိနေကြောင်း၊ လွတ်လပ်တဲ့ သတင်းမီဒီယာတွေကို နှိပ်ကွပ်လာပြီး လွတ်လွတ်လပ်လပ် ထုတ်ဖော်ခွင့် မရအောင် လုပ်လာတဲ့ အပေါ် ကုလသမဂ္ဂဘက်က အထူးစိုးရိမ်ကြောင်းလည်း ပြောဆိုထားပါတယ်။

ဖေဖော်ဝါရီလ ၁ ရက်နေ့မှာ မြန်မာ စစ်တပ်က အာဏာသိမ်းပြီးနောက် သတင်းထောက်တွေကို ပစ်မှတ်ထား ဖမ်းဆီးမှု၊ သတင်းမီဒီယာ ထုတ်ဝေခွင့်တွေ ရုပ်သံ လွှင့်ထုတ်မှုတွေကို ပိတ်ပင်ထားပြီး နိုင်ငံတွင်း အင်တာနက် ဆက်သွယ်မှုတွေကိုလည်း အာဏာသုံး ဖြတ်တောက်နေပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/un-on-myanmar-current-situation-/5824421.html

အကြမ်းဖက်နှိပ်ကွပ်မှု ရပ်ဆိုင်းဖို့ ကုလဆက်လက်တောင်းဆို အကြမ်းဖက်နှိပ်ကွပ်မှု ရပ်ဆိုင်းဖို့ ကုလဆက်လက်တောင်းဆို Reviewed by THITHTOOLWIN on 06:53 Rating: 5

No comments:

Powered by Blogger.