မုံရွာ၊မတ်-၁၈
စစ်ကိုင်းတိုင်း ရွှေဘိုခရိုင် ဒီပဲယင်းမြို့နယ် ဖုတ္ထန်းတောရွာအနီးတွင် ယနေ့ နံနက်ပိုင်းက ရဲနှင့် ဒေသခံအချို့တွေ့ဆုံရာ ရဲနှစ်ဦးသေဆုံးကြောင်း သတင်းရရှိသည်။
သေဆုံးသော ရဲနှစ်ဦးအလောင်းမှာ ဆည်မြောင်းမူးဆုံလမ်းမပေါ်တွင်ရှိနေရာ ညနေပိုင်းတွင် ရဲနှင့်စစ်တပ်မှ အခင်းဖြစ်ရာအနီး တည်တောရွာသို့ ဝိုင်းကာ ပစ်ခတ်ဖမ်းဆီးမှုများလုပ်ကြောင်း ဒေသခံများက ပြောသည်။
"ဒီပဲယင်းကိုဆန္ဒပြပြီး ကားတွေက အပြန်မှာဖြစ်တာ။သေတဲ့ရဲတွေက လမ်းပေါ်မှာရှိတယ်။ရွာကို စစ်ကားတွေလာပြီး သေနတ်တွေဖောက်တယ်။ခြောက်ယောက်ဖမ်းသွားတယ်။အိမ်နှစ်လုံးကိုဖျက်ပြီး ဆန်နဲ့ပစ္စည်းတွေယူသွားတယ်"ဟု တည်တောရွာခံ ကပြောသည်။
ဖြစ်စဉ်ကို မြန်မာ့အသံမှယနေ့ည ၈နာရီသတင်းထုတ်ပြန်ကြေညာရာတွင် ယနေ့ ၁၁ နာရီခန့်က မူးကမ်းရွာ ရဲစခန်းတာဝန်ခံနှင့်တပ်ဖွဲ့ဝင် နှစ်ဦးသည် ရဲအမှုတွဲများ ဒီပဲယင်းမြို့တရားရုံးသို့ ဥပဒေအကြံတောင်းရန်နှင့်စခန်းဖြုတ်သိမ်းခွင့်တောင်းရန်သွားစဉ် ဖုတ္ထန်းတောရွာအနီး လူ၁၀၀ခန့်နှင့်တွေ့ဆုံကြောင်း ထုတ်ပြန်သည်။
၎င်းလူထုမှာ ရဲများကို ကားပေါ်မှ ဆွဲချရိုက်နှက်ထိုးခုတ်ရာ ရဲနှစ်ဦးသေဆုံးပြီး စခန်းတာဝန်ခံမှာ ဓားဒဏ်ရာ ၇ချက်ဖြင့် နယ်မြေခံတပ်ဆေးရုံ၌ ကုသမှုခံနေသည်ဟု ထုတ်ပြန်ထားသည်။
လက်ရှိတွင် အခင်းဖြစ်ရာ မူးဆုံလမ်း ကျေးရွာများဖြစ်သော ဖုတ္ထန်းတော၊သရက်ကန်၊ညောင်လှ၊တည်တော ကျေးရွာများပတ်လည် ရဲနှင့်စစ်တပ်တို့ ချထားကြောင်း ဒေသခံများကပြောသည်။
Monywa Gazette
Reviewed by THITHTOOLWIN
on
21:36
Rating:
No comments:
Post a Comment