ဆန္ဒပြပွဲများအကြမ်းဖက်ပစ်ခတ်ခံရ၊ နိုင်ငံတဝန်း ၁၀ ဦးထက်မနည်း သေဆုံး

မတ်လ ၃ ရက်နေ့ ဖြိုခွင်းခံခဲ့ရတဲ့ မန္တလေးမြို့မြင်ကွင်း။ (မတ် ၃၊ ၂၀၂၁)

မြန်မာနိုင်ငံတွင်း ငြိမ်းချမ်းစွာ ဆန္ဒပြပွဲတွေကို ရဲနဲ့ စစ်တပ်က ဒီကနေ့မှာလည်း အကြမ်းဖက်ဖြိုခွဲတာကြောင့် သေဆုံး ဒဏ်ရာရသူ အများအပြားရှိခဲ့ပါတယ်။

သေဆုံးသူတွေထဲမှာ လူငယ်အများစု ပါဝင်ပြီး ဦးခေါင်းကို တည့်တည့်ပစ်ခံရလို့ သေဆုံးသွားသူတွေရဲ့ ရုပ်ပုံတွေ၊ ဗီဒီယိုတွေကို လူမှုကွန်ယက်မှာ တွေ့ရပါတယ်။

အခုချိန်ထိရထားသမ ျှ အတည်ပြုစာရင်းတွေအရ မုံရွာမှာ ငါး ဦး၊ မန္တလေးမှာ နှစ် ဦး၊ မြင်းခြံမှာ တစ် ဦး၊ စလင်းမှာ တစ် ဦး၊ ရန်ကုန်မှာ တစ် ဦး စုစုပေါင်း သေဆုံးသူ ၁၀ ဦးထက်မနည်း ရှိပါတယ်။ တခြားဒေသတွေမှာလည်း သေဆုံးသူတွေ ရှိတယ်ဆိုတဲ့ သတင်းတွေ ထွက်ထားပေမဲ့ အတည်မပြုနိုင်သေးပါဘူး။ ဒဏ်ရာရသူအများအပြား ရှိပြီး အရေအတွက် အတိအကျကို မသိရသေးပါဘူး။ ဒဏ်ရာရသူတွေထဲမှာ အခြေအနေစိုးရိမ်ရသူတွေ အများအပြားရှိတယ်လို့ ဗွီအိုအေက ဆက်သွယ် မေးမြန်းခဲ့သမ ျှ ဒေသခံတွေက ပြောပါတယ်။

မန္တလေးက ဒဏ်ရာရသူတွေထဲမှာ ဗွီအိုအေသတင်းထောက်လည်း ပါဝင်ပြီး ခန္ဓာကိုယ် ဘယ်ဘက်ခြမ်းမှာ ရာဘာကျည်နှစ်ချက် ထိထားပြီးတော့ စိုးရိမ်ရတဲ့အခြေအနေတော့ မရှိပါဘူး။

မန္တလေးမြို့ကပဲ နောက်တစ်နေရာမှာတော့ ပစ်ခတ်သံတွေနဲ့အတူ ရဲတွေ၊ စစ်သားတွေက အိမ်တလုံးရဲ့ရှေ့ကနေ လေးခွတွေနဲ့ ပစ်နေတာကို အိမ်ထဲကနေ ရိုက်ယူထားတဲ့ ဗီဒီယိုမှာ တွေ့ရပါတယ်။

ရန်ကုန်နဲ့ မန္တလေးအပါအဝင် နေရာအတော်များများက ဆန္ဒပြသူတွေဟာ မီးသတ်ဆေးဘူးနဲ့ ဓာတ်ငွေ့တွေဖြန်းထုတ်ပြီး အကာအကွယ်ရဖို့ ကြိုးစားခဲ့ကြပါတယ်။

တနိုင်ငံလုံးမှာ ဖမ်းဆီးခံရသူ ရာပေါင်းများစွာရှိနိုင်ပြီး ရန်ကုန်၊ တာမွေနဲ့ ကျောက်မြောင်းအရပ်မှာတင် အဖမ်းခံရသူ ၃၀၀ ကျော်ရှိနိုင်တယ်လို့ မျက်မြင်တွေ့သူတွေက ဗွီအိုအေကိုပြောပါတယ်။

ဒဏ်ရာရသူတွေကို ပရဟိတ အရေးပေါ် ကူညီကယ်ဆယ်ရေးလုပ်သားတွေက ပြုစုကုသပေးကြပေမယ့်လည်း စစ်တပ်နဲ့ရဲဟာ အဲဒီလူတွေကိုပါ ရန်ပြု ဖမ်းဆီးပါတယ်။

ရန်ကုန်၊ မြောက်ဥက္ကလာပမှာ ပရဟိတ အရေးပေါ်ကားတစ်စီးကို တားပြီးတော့ ပရဟိတလုပ်သားတွေကို ရဲက သေနတ်နဲ့ချိန်ပြီး ဆင်းခိုင်းပါတယ်။ အဲဒီနောက် ကားဘေးမှာ ထိုင်ခိုင်းထားပြီး ရဲ ၇ ယောက်ထက်မနည်းက ကန်ကျောက်တဲ့အပြင် ခေါင်းကိုပါ သေနတ်ဒင်တွေနဲ့ ဝိုင်းရိုက်တာကို အနီးက CCTV ကင်မရာကနေ ရိုက်ယူထားတဲ့ ဗီဒီယိုထဲမှာ တွေ့ရပါတယ်။ ခနအကြာမှာ သွေးထွက်သံယိုနဲ့ ပရဟိတလုပ်သားတွေကို ခေါ်ထုတ်သွားတာ တွေ့ရပြီး လက်ရှိအချိန်ထိ ဖမ်းခံထားရဆဲပဲလို့ တခြား ပရဟိတ ကျန်းမာရေးလုပ်သားတွေကပြောပါတယ်။

ဒါ့အပြင် မြောက်ဥက္ကလာဘက်မှာပဲ စစ်သားနဲ့ ရဲတွေဟာ ရပ်ကွက်အတွင်းပိုင်းတွေထဲထိ ဝင်ရောက်ပြီး ပုန်းခိုနေတဲ့ ဆန္ဒပြသူတွေကို လိုက်ရှာတာမှာ အိမ်တံခါးတွေကို ရိုက်ချိုးဖျက်ဆီးတာ၊ အိမ်ထဲကို မျက်ရည်ယိုဗုံးနဲ့ ပစ်ခတ်တာတွေ ရှိတယ်လို့ ကိုယ်တိုင်မြင်တွေ့သူတွေက ဗွီအိုအေကို ပြောပါတယ်။

အဲဒီလို နည်းမျိုးစုံနဲ့ အပြင်းအထန် အကြမ်းဖက် နှိမ်နင်းဖြိုခွဲတဲ့ကြားမှာပဲ ဆန္ဒပြသူတွေဟာ အင်အားပြန်ပြ်စုပြီး သီချင်းဆို အော်ဟစ်ကြွေးကျော် ဆန္ဒပြခဲ့ကြပါတယ်။

ဒီညနေပိုင်းမှာ မြောက်ဥက္ကလာက ဆန္ဒပြသူတွေ နောက်တစ်ကြိမ်စုဝေးပြီး ဆန္ဒပြကြတာကို စစ်တပ်နဲ့ ရဲက ထပ်ပြီး ပစ်ခတ်ဖြိုခွဲတာကြောင့် သေဆုံး ဒဏ်ရာရသူတွေ ရှိတယ်လို့ ဒေသခံတစ်ဦးက ဗွီအိုအေကိုပြောပေမဲ့ အရေအတွက် အတိအကျကိုတော့ အတည်မပြုနိုင်သေးပါဘူး။

ဗွီအိုအေ (မြန်မာပိုင်း)

https://burmese.voanews.com/a/myanmar-protest-crackdown/5799792.html