ဒေါ်အောင်ဆန်းစုကြည်ကို အဂတိလိုက်စားမှုနဲ့ စစ်ကောင်စီစွပ်စွဲ



နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ရန်ကုန်တိုင်းဝန်ကြီးချုပ် ဦးဖြိုးမင်းသိန်းက အမေရိကန်ဒေါ်လာ ၆ သိန်းနဲ့ အကယ်ဒမီ ရွှေ ၇ ပိဿာ ပေးအပ်ခဲ့ကြောင်းနဲ့၊ ဒါဟာ အဂတိလိုက်စားမှုနဲ့ ငြိစွန်းနေတဲ့အတွက် စုံစမ်းစစ်ဆေးနေတယ်လို့ အာဏာသိမ်းစစ်ကောင်စီက ဒီနေ့ နေပြည်တော်မှာ ကျင်းပတဲ့ သတင်းစာ ရှင်းလင်းပွဲမှာ စွပ်စွဲပြောဆိုလိုက်ပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပတ်သက်ပြီး အဂတိလိုက်စားမှုဥပဒေနဲ့ ငြိစွန်းတယ် လို့ သံသယရှိတဲ့အတွက် စစ်ဆေးနေတယ်လို့ အာဏာသိမ်းစစ်ကောင်စီ၊ ပြန်ကြားရေး ဒုဝန်ကြီး ဗိုလ်မှူးချုပ် ဇော်မင်းထွန်းက စွပ်စွဲပြောဆိုပါတယ်။

“ဒေါ်အောင်ဆန်းစုကြည်နဲ့ ပတ်သက်ပြီး ယခင်ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ၂၀၁၇ ခုနှစ် ဒီဇင်ဘာလမှ ၂၀၁၈ ခုနှစ် မတ်လအကြား ငွေသား အမေရိကန်ဒေါ်လာ ၆ သိန်းနဲ့ အကယ်ဒမီရွှေ ၇ ပိဿာကို ကိုယ်တိုင်ကိုယ်ကျပေးအပ်ခဲ့တယ်လို့ အခိုင်အမာပြောဆိုခဲ့ပါတယ်၊ အခိုင်အမာထွက်ဆို ချက်များမှ သိရှိရပါတယ်၊ ဒေါ်အောင်ဆန်းစုကြည်အနေနဲ့လည်း အဲဒီအမေရိကန်ဒေါ်လာ ၆ သိန်းနဲ့ အကယ်ဒမီရွှေ ၇ ပိဿာကို ကိုယ်တိုင်ကိုယ်ကျ လက်ခံယူခဲ့ကြောင်း သိရှိရတဲ့အတွက် ဆက်လက်စုံစမ်း စစ်ဆေးနိုင်ရေးအတွက် အဂတိလိုက်စားမှုတိုက်ဖျက်ရေးကော်မရှင်မှ ဆက်လက်စစ်ဆေးဖေါ်ထုတ် လျက်ရှိပါတယ်။”

တဆက်တည်းမှာပဲ နိုင်ငံတော်သမ္မတ ဦးဝင်းမြင့်နဲ့ ဇနီး၊ မန္တလေးတိုင်းဝန်ကြီးချုပ် ဒေါက်တာ ဇော်မြင့်မောင်၊ မွန်ပြည်နယ်ဝန်ကြီးချုပ် ဒေါက်တာ အေးဇံ စတဲ့ NLD ပါတီခေါင်းဆောင်ပိုင်းကိုလည်း အဂတိလိုက်စားမူနဲ့ ငြိစွန်းတယ်ဆိုပြီး စစ်ဆေးနေတယ်လို့ ဒီနေ့ သတင်းစာရှင်းလင်းပွဲမှာ စစ်ကောင်စီက စွပ်စွဲသွားပါတယ်။

“တပ်မတော်ဟာ အမြဲတမ်း လိမ်ညာပြောနေတဲ့အတွက် ဒေါ်အောင်ဆန်းစုကြည်နဲ့ သမ္မတဦးဝင်းမြင့် အပေါ် စွပ်စွဲချက်တွေကိုလည်း ဘယ်သူကမှ ယုံကြည်မှာ မဟုတ်ဘူး” လို့ အမျိုးသားဒီမိုကရေစီအဖွဲ့ချုပ် NLD ပဲခူးတိုင်း သနပ်ပင်မြို့နယ် ပြည်သူ့လွှတ်တော်ကိုယ်စားလှယ် ဦးမြင့်ဦးက တုံ့ပြန်ပါတယ်။

"ဒါကတော့ သူတို့က ယုတ္တိယုတ္တံမရှိတဲ့ စွပ်စွဲချက်တွေလို့ အန်ကယ် ယူဆတယ်လေ၊ သူတို့က ဒီလို ဗြောင်လိမ်ဗြောင်စားလုပ်နေတာပဲ၊ အခု ဒီနေ့ လူထုကို ဒီလို အကြမ်းဖက်ဖြိုခွင်းနေတာတွေတောင်မှ သူတို့က ပြောင်းပြန် ပြန်ပြီးတော့ ပြောနေတာပဲ၊ ငြင်းဆိုနေတာပဲ၊ တကယ်တမ်းကျတော့ ပစ်ခတ်မှု တွေကလည်း လူတွေရဲ့ ခေါင်းတွေချည်းပစ်တာ၊ ဒါတောင်မှ အကြမ်းဖက်လို့ ပစ်ရပါတယ်လို့ အပ်တို တစ်ချောင်းမှ မပါတဲ့လူထုကို ဒီလိုဗြောင်လိမ်ဗြောင်းစားလုပ်တာ တစ်ကမ္ဘာလုံးကို သူတို့ ဒီလိုလှည့်ပတ်ပြီး လိမ်နေကြပဲ၊ သူတို့မလုပ်တဲ့ မပြောတဲ့ဟာ ဘာမှမရှိတော့ဘူး ဒါကြောင့်မို့လို့ ဒီကိစ္စနဲ့ပတ်သက်ပြီးတော့ ဘယ်သူကမှလည်း ယုံကြည်မှာ မဟုတ်ဘူး"

ဒေါ်အောင်ဆန်းစုကြည်ဟာ အမြဲ မှန်ကန်ဖြောင့်မတ်သူဖြစ်ပြီး အသက်အရွယ်လည်း ၈၀ နားနီးနေပြီဖြစ် တာကြောင့် ဒေါ်လာတွေ ရွှေတွေကို လာဘ်ယူတယ်ဆိုတဲ့ကိစ္စဟာ ဘယ်လိုမှ မဖြစ်နိုင်ဘူးလို့လည်း ဦးမြင့်ဦးက ဖြည့်စွက်ပြောဆိုသွားပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် သမ္မတဦးဝင်းမြင့် စတဲ့ ခေါင်းဆောင်တွေကို အမှုမဖွင့်ဘဲ အမှုနဲ့ ပတ်သက်တဲ့ အကြောင်းအရာတွေကို ထုတ်ဖော်ပြောဆိုတာဟာ ကျင့်ဝတ် ဥပဒတွေနဲ့ မညီဘဲ စွပ်စွဲတာဖြစ်တယ်လို့ တရားလွှတ်တော်ရှေ့နေ ဦးကြီးမြင့်က ပြောပါတယ်။

"လွတ်လပ်တဲ့ သဘောတူညီချက်တွေ ပြောဆိုချက်တွေ မဟုတ်ဘူး၊ နောက်တခါ အမှုမဖွင့်ဘဲနဲ့ ဒီအမှု အကြောင်းအရာတွေကို အသေးစိတ် ထုတ်ဖော်ပြောဆိုနေခြင်းဟာ ဒါကျင့်ဝတ်ဖောက်ဖျက်တာပဲ၊ နိုင်ငံ အစိုးရတစ်ရပ်ရဲ့ ကျင့်ဝတ်နဲ့ မညီဘူး ဥပဒေနဲ့လည်း မညီဘူး ဒါက တစ်အချက်၊ နှစ်အချက်အနေနဲ့က တော့ သူတို့က အပြတ်ပြောလိုက်ပြီ၊ ဘယ်စေ့စပ်ဆွေးနွေးမှု ဘယ်နိုင်ငံကမှ လာပြောမနေနဲ့တော့ မစေ့စပ်တော့ဘူး၊ ဒီအတိုင်းပဲ ဆက်သွားတော့မယ်လို့ ပြောတယ် ဒါအချုပ်ပဲဗျာ။"

သာသနာရေးဝန်ကြီး သူရဦးအောင်ကို ကိုလည်း လာဘ်ပေး လာဘ်ယူလုပ်တာတွေရှိတဲ့အတွက် အဂတိ လိုက်စားမှု ဥပဒေနဲ့ အရေးယူဆောင်ရွက်နေတယ်၊ ဒေါ်ခင်ကြည်ဖောင်ဒေးရှင်းရဲ့ ငွေကြေး အဝင်အထွက် သုံးစွဲမှုကိုလည်း စစ်ဆေးနေတယ်လို့ ဆိုပါတယ်။

ပြည်ထောင်စုလွှတ်တော် ကိုယ်စားပြုကော်မတီ CRPH ဟာ Generation z မျိုးဆက် လူငယ်တွေကို သွေးထိုးလှုံ့ဆော်ပြီး အလုံးစုံ ပျက်သုဉ်းရေးလမ်းစဉ်ကို လုပ်နေတယ်လို့လည် စွပ်စွဲခဲ့ပါတယ်။

ဒါ့အပြင် CRPH နဲ့ တချို့သူတွေ တောင်းဆိုနေတဲ့ R2P ကနေ နိုင်ငံတကာာတပ်တွေ ဝင်ရောက်ဖို့ အခြေအနေ မရှိဘူးလို့လည်း ဗိုလ်ချုပ် ဇော်မင်းထွန်း က ဆိုပါတယ်။

နေပြည်တော်မှာ အသက် ၂၀ နှစ်အရွယ် မမြသွဲ့သွဲ့ခိုင်နဲ့ မန္တလေးက အသက် ၁၉ နှစ်အရွယ် မကြယ်စင်တို့ သေဆုံးခဲ့တာဟာ စစ်တပ်နဲ့ ရဲတို့ အသုံးပြုတဲ့ လက်နက်ကျည် အမျိုးအစား မဟုတ်ဘဲ ဒေသန္တရ လက်လုပ် ကျည် အမျိုးအစား ဒါမှမဟုတ် နိုင်ငံခြားကလုပ်တဲ့ သေနတ်အမျိုးအစား ဖြစ်တယ်လို့ ထပ်မံငြင်းဆိုသွား ပါတယ်။

RFA Burmese



ဒေါ်အောင်ဆန်းစုကြည်ကို အဂတိလိုက်စားမှုနဲ့ စစ်ကောင်စီစွပ်စွဲ ဒေါ်အောင်ဆန်းစုကြည်ကို အဂတိလိုက်စားမှုနဲ့ စစ်ကောင်စီစွပ်စွဲ Reviewed by THITHTOOLWIN on 21:44 Rating: 5

No comments:

Powered by Blogger.