ရန်ကုန်ဆန္ဒပြပွဲ သေဆုံးသူ ဆယ်ဂဏန်းရှိ



Share/Bookmark
ဦးခေါင်းကျည်ထိသေဆုံးသူတဦးရဲ့ မိသားစုဝင်များ။ (မတ်လ ၂၇၊ ၂၀၂၁)

ဖတ်ဆစ်တော်လှန်ရေးနေ့အဖြစ် စစ်အာဏာရှင်ဆန့်ကျင်ရေးဆန္ဒပြလှုပ်ရှားမှုတွေကို စစ်တပ်နဲ့ရဲက ပစ်ခတ်တာကြောင့် ရန်ကုန်မြို့မှာလည်း ထိခိုက်သေဆုံးမှုတွေရှိနေပါတယ်။ အင်းစိန်မြို့နယ်တခုတည်းမှာပဲ ၅ ဦးထက်မနည်းသေဆုံးတာပါ။ ရန်ကုန်ကရတဲ့ သတင်းကို ကိုရန်နိုင် ပြောပြပါမယ်။

ဒီကနေ့ တော်လှန်ရေးနေ့မှာ ရန်ကုန်တိုင်း နေရာအနှံ့ စစ်ကောင်စီတပ်ဖွဲ့တွေက

လိုက်လံနှိပ်ကွပ် ပစ်သတ်ဖြိုခွင်းနေပြီး ဆယ်ဂဏန်းအထိ သေဆုံးမှုတွေရှိနေပါတယ်။

အင်းစိန်မြို့နယ်မှာတော့ ပြည်သူတွေဘက်က ဆန္ဒပြသပိတ်အတွက် အတားအဆီးတွေကို နံနက် ၂ နာရီခွဲ လောက်ကစပြီး ကာရံခဲ့ကြတာပါ။ အတားအဆီးတွေ ကာရံပြီး သိပ်မကြာခင်မှာ ရဲနဲ့စစ်တပ်ကရောက်လာပြီး ပြည်သူတွေဘက်က ပြန်လည်ခုခံခဲ့ကြပါတယ်။ မနက်အစောပိုင်း ၆နာရီလောက်မှာ လှိုင်သာယာဘက်ကနေရောက်လာတဲ့ ရဲနဲ့စစ်တပ်အင်အား ၂၀၀ ဝန်းကျင်လောက်ရှိလို့ ပြည်သူတွေက လူစုခွဲပြီး လမ်းကြားတွေထဲ ကနေ ပြောက်ကျားစနစ်နဲ့ သပိတ်ပြန်စခဲ့ပါတယ်။

ညဥ့်သန်းခေါင်အချိန်ကတည်းက ပစ်ခတ်မှုတွေရှိခဲ့တဲ့ အင်းစိန်မြို့နယ်မှာ ဒီကနေ့ ညနေ ၅ နာရီဝန်းကျင် အထိ ရရှိထားတဲ့စာရင်းအရ သေဆုံးသူ ၅ဦးနဲ့ကျည်ထိပြီး ဒဏ်ရာပြင်းထန်သူ ၃ ဦး ရှိထားပါတယ်။ သေဆုံးသူ ၅ ဦးဟာ အင်းစိန် ရွာမဘက်က ၂ ဦး၊ ဖော့ကန်ဘက်က ၁ ဦးနဲ့ အင်းစိန် က၊ ခ ရပ်ကွက်က ၂ ဦး ဖြစ်တယ်လို့ မြေပြင်မှာရှိနေသူတဦးက ဗွီအိုအေကို အတည်ပြုထားပါတယ်။

"အဲမှာ သူတို့က လမ်းကြားတွေထဲဝင်ပြီးတော့ ရမ်းပြီးတော့ ပစ်နေတာ။ ရွာမဘက်တွေဆိုရင်လည်း သပိတ်နဲ့ တောင် အဝေးကြီးပဲ မဆိုင်ဘူး၊ အဲဒါကို လှမ်းပစ်သွားတာ။ လှမ်းပစ်တော့ ကလေးတွေရော၊ လမ်းဘေးက လူတွေရော တော်တော်များများ ထိကြတာပေါ့။ လောလောဆယ်ကတော့ ဆေးရုံမှာ ဒဏ်ရာပြင်းထန်တာက ၃ ယောက်၊ ကျဆုံးက ၅ ယောက်ပေါ့။ သူတို့က ရပ်ကွက်ထဲမှာ တချို့နေရာတွေမှာ တပ်စွဲထားတဲ့ နေရာတွေ လည်း ရှိတယ်။ ရပ်ကွက်တွေထဲ ဝင်တယ်၊ ထွက်တယ်၊ ပြန်သွားတယ်။ ပြီးတော့ ရပ်ကွက်လမ်းမတန်းကြီးတွေ၊ လှိုင်မြစ်လမ်းတွေ၊ ဘုရင့်နောင်လမ်းမကြီးတွေကို ပတ်နေတယ်။ ခုနကဆို ပေါက်တောဝမှာလည်း ဆိုင်ကယ်တွေ၊ ကားတွေကို မီးပွိုင့်မှာ ရမ်းကားပစ်သွားတယ်။ ကားပေါ်ကနေပြီးတော့ အဲဒီလိုပစ်သွားတာ တွေလည်း ရှိတယ်ဗျ။ အဲဒါတွေကို ကျနော်ဓာတ်ပုံတော့ မရိုက်ဘူး၊ ဒါပေမဲ့ သေချာတယ်ဗျ။ အခုတော့ လမ်းတွေပေါ်မှာကားတွေ၊ ဆိုင်ကယ်တွေလည်း သိပ်မတွေ့တော့ဘူးဗျ၊ သူတို့တွေပဲ ပတ်နေတယ်။"

သင်္ဃန်းကျွန်း ၁၆ ရပ်ကွက်မှာ စစ်တပ်နဲ့ရဲတပ်ဖွဲ့ရဲ့ ဝင်ရောက် ပစ်ခတ်မှုကြောင့် တစ်ဦး သေဆုံးတယ်လို့ မျက်မြင်တစ်ဦးက ဗွီအိုအေကိုပြောကြားခဲ့ပါတယ်။

“ကျနော်တို့ သင်္ဃန်းကျွန်း ၁၆ ရပ်ကွက်မှာ တစ်ယောက်သွားပြီး၊ သင်္ဃန်းကျွန်း ၁၆ ရပ်ကွက် ဟိုဘုရားလမ်း အကျော် ဟိုဘက်ခြမ်းပေါ့၊ နောက်တယောက် ထပ်ထိတာကျတော့ သေလား မသေလား မပြောတတ်နိုင် သေးဘူး၊ ပြီးတော့ အခု သံသုမာလမ်းမကြီး တောက်လျှောက်လည်း အဲ့လိုမျိုး ဟိုတင်တွေ လုပ်နေတယ်။ ဘိုဒိုဇာနဲ့ အဲ့ဒီဟာတွေ လိုက်ဖြိုတယ်။ ရဲကားတွေ စစ်ကားတွေ ဖွက်ပြီးတော့ လမ်းကြားတွေမှာ ထား ထားတယ်ဗျာ။ အင်အားတော်တော်များတယ်။”

စမ်းချောင်းမြို့နယ် ဗဟိုလမ်းမှာ ဆန့်ကျင်ဆန္ဒပြနေလူငယ်တွေကို အသံဗုံး၊ မျက်ရည်ယိုဗုံးသုံး အကြိမ်ကြိမ် ဖြိုခွင်းကာ လူနေတိုက်အထပ်အမြင့်ကို လောက်ခွ၊ တုတ်တွေနဲ့ ပစ်နေပါတယ်။

အလားတူပဲ၊ ဒီကနေ့ ရန်ကုန်မှာ ဆန့်ကျင်ဆန္ဒပြသူတွေကို လက်နက်ကိုင်တွေဘက်က လိုက်လံနှိပ်နင်း ပစ်ခတ်မှုကြောင့် စမ်းချောင်းမြို့နယ် ရန်ကြီးအောင်လမ်းမှာတစ်ဦးနဲ့ ရန်ကင်း ရန်ရှင်းလမ်းမှာ တစ်ဦး၊ ဒဂုံဆိပ်ကမ်း ယုဇနဥယျာဉ်မြို့တော်မှာတစ်ဦး ကျည်ထိမှန်သေဆုံးတယ်လို့ ပြည်တွင်း သတင်းတွေ မှာ ဖော်ပြထားပါတယ်။

မနေ့ညက ဒလမြို့နယ်မှာ ဖမ်းဆီးခံရတဲ့ အမျိုးသမီး နှစ်ဦးကို ပြန်လွှတ်ပေးဖို့ တောင်းဆိုနေကြတဲ့ လူထုကို စစ်တပ်နဲ့ ရဲတပ်ဖွဲ့က ကျည်အစစ်သုံး ပစ်ခတ်ဖြိုခွင်းမှုမှာ လူ ၈ ဦးသေဆုံး၊ ၂၂ ဦးထိခိုက်ဒဏ်ရာ ရရှိခဲ့တယ်လို့ ပစ်ခတ်တဲ့အချိန် ထွက်ပြေးခဲ့ရတဲ့ တက်ကြွလှုပ်ရှားသူတစ်ဦးက ဒီနေ့မနက်ပိုင်းမှာ ဗွီအိုအေကို ပြောခဲ့ပါတယ်။

“လုံခြုံရေးတပ်တွေပစ်တာ အရပ်သား ၈ ယောက်ကျသွားပြီ။ ဒဏ်ရာရထားတာ ၂၂ ယောက်။ သူတို့ဆွဲ သွားတာကတော့ ၅ ယောက်လောက်ရှိတယ်ဗျ။ သူတို့ဆွဲသွားတာ ဆန္ဒပြတဲ့အထဲ အပစ်ခံရတဲ့သူ ထိသွား တယ်။ သူသွားတဲ့လူကို ဆွဲသွားတာ၊ တချို့လူက ခေါင်းဒဏ်ရာ တချို့လူကတော့ကျတော့ ရင်ဘတ် ဖောက်ထွက် ဒဏ်ရာတွေ။ တချို့ကကျတော့ ခြေထောက်ကျိုးသွားတာတွေ ခြေထောက်ထိလို့ ကျိုးသွားတာတွေ။ အဲ့လိုမျိုးသွေးထွက်ပြီးတော့ ဆုံးသွားတာတွေပေါ့ အဲ့လိုဒဏ်ရာတွေ။ နောက်ဆီးခုံ ပေါက်ထွက် ဒဏ်ရာတွေ များတယ်ဗျ ရင်ဘတ်ဒဏ်ရာတို့၊ ခေါင်းဒဏ်ရာတို့ ဆီးခုံပေါက်ထွက် ဒဏ်ရာတွေ အဲ့လိုမျိုးဖြစ်တာ။ အဲ့လူတော်တော်များများဆုံးသွားတာပေါ့ အဲ့ ၈ ယောက်ထဲမှာ၊ ၂၀ နဲ့ ၂ ယောက်ကတော့ တင်ပါးတို့ ပေါင်တို့ မျက်နှာတို့ အဲ့လိုမျိုးထိတာ။”

ဒလမြို့နယ်မှာ ဖမ်းဆီးခံရတဲ့ အမျိုးသမီး နှစ်ဦးကို ပြန်လွှတ်ပေးဖို့ ရဲစခန်းကို ဝိုင်းပြီးတောင်းဆိုရာ မနေ့က ည ၁၂ နာရီလောက်မှာ စစ်တပ်နဲ့ ရဲတွေရဲ့ ပစ်ခတ်မှုကြောင့် အရပ်သား ၈ ဦးသေဆုံး၊ ၂၂ ဦး ကျည်ထိမှန် ထိခိုက်ဒဏ်ရာရှိခဲ့တာပါ။ လူသေအလောင်းနဲ့ ဒဏ်ရာရထားသူတချို့ကိုလည်း စစ်တပ်က ဆွဲယူသွားတယ်လို့ ပြောပါတယ်။

စစ်တပ်နဲ့ ရဲတပ်ဖွဲ့က အင်အားအလုံးအရင်းသုံးပြီး သေနတ်ကျည်အစစ်၊ ရာဘာကျည်၊ အသံမိုင်းတွေနဲ့ သောကြာနေ့ ည ၁၂ နာရီကျော်ကနေ မနက် ၂ နာရီအထိ ဆက်တိုက် တရစပ် ပစ်ခတ်ခဲ့ပါတယ်။ စစ်အာဏာသိမ်းဆန့်ကျင်လှုပ်ရှာမှုတွေကို ရန်ကုန် အပါအဝင် တခြား ဒေသအသီးသီးက မြို့နယ်၊ ရပ်ကွက် ကျေးရွာတွေမှာ သေနတ်ကျည်အစစ်တွေနဲ့ ပစ်သတ်ဖြိုခွင်း ရိုက်နှက်ဖမ်းဆီးမှုတွေလုပ်ဆောင်နေပါတယ်။ VOA က ရရှိတဲ့သတင်းတွေအရ မွန်းလွဲပိုင်းအထိကို ဒီကနေ့ တနေ့တည်း မြန်မာနိုင်ငံအဝှမ်း သေနက်ကျည်ကြောင့် သေဆုံးသူ ၉၀ ဦးထက် မနည်းရှိသွားပါပြီ။


ရန်နိုင်/ VOA Burmese

https://burmese.voanews.com/a/military-coup-protests-armed-forced-day-yangon-dead-toll-10-/5830718.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ