လှိုင်သာယာ အခြေအနေ မျက်မြင်သက်သေ ပြောပြချက်



Share/Bookmark
စစ်အာဏာသိမ်းမှုဆန့်ကျင်တဲ့ ဆန္ဒပြပွဲတွေကို အကြမ်းဖက် ဖြိုခွင်းမှုတွေ အရှိန်မြင့် လုပ်ဆောင်လာနေတာမှာ အခု ရက်ပိုင်းအတွင်း အဆိုးရွားဆုံး ဖြိုခွင်းခံရတဲ့နေရာတခုကတော့ ရန်ကုန်တိုင်း၊ လှိုင်သာယာမြို့နယ် ဖြစ်ပါတယ်။ မနေ့ညက ရပ်ကွက်တွေထဲ လက်နက်ကိုင် တပ်ဖွဲ့တွေက ဝင်ရောက်ပစ်ခတ်တာ၊ လူငယ်တွေကို ဖမ်းဆီးတာတွေ လုပ်နေတယ်လို့ လှိုင်သာယာမှာရှိတဲ့ လူမှုကူညီရေးအသင်း တာဝန်ရှိသူတဦးက ပြောပါတယ်။ လှိုင်သာယာက နောက်ဆုံးအခြေအနေတွေကို သိရှိနိုင်ဖို့ ကိုဇော်ဝင်းလှိုင်က ဆက်သွယ် မေးမြန်းတာမှာ မနေ့ အင်္ဂါနေ့က ဖိနပ်စက်ရုံတခုမီးလောင်ပြီး လူ ၂ ဦးသေဆုံးခဲ့တဲ့ အခြေအနေတွေနဲ့ အစချီပြီး ပြောပြပါတယ်။

လှိုင်သာယာမှာ မနက်ပိုင်းကတော့ ငြိမ်သက်နေတယ်။ နေ့ခင်းပိုင်းလောက်မှာတော့ ဖိနပ်စက်ရုံတရုံ မီးလောင်တယ်။ ဖိနပ်စက်ရုံတရုံ မီးလောင်တဲ့နေရာမှာ ပစ်ခတ်မှုတွေ ရှိတယ်။ အဲဒီမှာ ၂ ယောက် ယောကျင်္ားလေးတယောက် ၊ မိန်းကလေးတယောက်ထိတယ်ပေါ့နော် ကျနော်တို့သိရသလောက်ကတော့ ။ ကျနော်တို့လည်း အနားကပ်လို့မရဘူးဆိုတော့လေ။ အဲဒီအလောင်းတွေလည်း အခုအထိ ထုတ်လို့မရသေးဘူးခင်ဗျ။

မေး။ ။ မီးလောင်သွားတဲ့စက်ရုံက တရုတ်စက်ရုံပဲလား ဒီနေ့လောင်သွားတာ။

ဖြေ။ ။ဟုတ်ကဲ့အကို ကျနော်တို့ သိရတာက ဖိနပ်စက်ရုံတရုံ မီးလောင်တယ် မီးသတ်ကားတွေက မငြိမ်းရဲတော့ သူတို့ တပ်က ကားတွေနဲ့ ဝင်ပြီးလာတယ်။ တပ်က ကားတွေလည်းပါတယ် မီးသတ်ကားတွေအပြင် ကိုပေါ့နော်။

မေး။ ။ အဲဒီမှာတော့ ၂ ယောက်သေတယ်ပေါ့နော် မီးလောင်မှု ဖြစ်တဲ့နေရာမှာပဲ

ဖြေ။ ။ဟုတ်ကဲ့အကို ကျနော်တို့ သတင်းရတာကတော့ ယောကျင်္ားလေးတယောက် ၊ မိန်းကလေးတယောက်ပါခင်ဗျ ။

မေး။ ။ အဲဒီမီးလောင်တဲ့ နားမှာပေါ့နော်။

ဖြေ။ ။ဟုတ်တယ်အကို သူတို့ ပစ်ရင်းနဲ့ ၂ ယောက်ကျသွားတယ် အဲဒီ ၂ ယောက်ကိုလည်း ရပ်ကွက်က ထုတ်ချင်တာတောင် လုံးဝ ထုတ်လို့မရဘူးပေါ့နော်။ ကူညီလို့လည်းမရ ဘာမှ လုပ်လို့မရဘူး ။ အဲဒီ ၂ ယောက်ကတော့ သေတာတော့ သေသွားပြီ ။ ကျနော်တို့ ပြည်သူတွေလည်း အလောင်းပြန်လိုချင်တာပေါ့ဗျာ ။ ဒါပေမယ့် သူတို့တွေက လုံးဝ မပေးဘူး ။ ညပိုင်းမှာလည်း ရပ်ကွက်တွေထဲကို ဝင်ပြီးတော့ ပစ်တာခတ်တာတွေ ရှိတယ် ။ နောက်ပြီးတော့ လူငယ်တွေကိုလည်း ဖမ်းဆီးတာတွေကို လုပ်နေသလို အခုရပ်ကွက်ကလည်း ကျနော်တို့ကို လှမ်းအကူအညီတောင်းတယ်။ မနေ့ညကလည်း တပင်ရွှေထီးလမ်းမှာ ပစ်ခတ်မှုက တော်တော်လေးဆိုးတယ်ခင်ဗျ အိမ်ထဲမှာနေတဲ့ ကလေးတွေတောင်ထိတယ်။

မေး။ ။ မနေ့က တော်တော်များများလည်း ထွက်သွားကြပြီ တခြားနေရာကို ပြောင်းတယ် ၊ ပုန်းကြတယ်၊ ပြေးကြတယ်ဆိုတာတွေကြားရတော့လေ လူတော်တော်နည်းသွားသလားမသိဘူး အကို သိရသလောက်။

ဖြေ။ ။ကျနော် သိရသလောက်က အခု လှိုင်သာယာထဲက လူတွေမှာ ဧရာဝတီတိုင်းကလူတွေ များမယ်ခင်ဗျ။ ကျနော်လည်း မနက်မှ သိတယ်။ ဧရာဝတီတိုင်းကလူတွေက ရန်ကုန်မှာ အလုပ်လာလုပ်တဲ့သူတွေပေါ့ အများဆုံးအားဖြင့် လှိုင်သာယာထဲက ချောင်တွေမှာ နေတဲ့ လူတွေများပါတယ်။ သူတို့တွေက မိမိရပ်ရွာတွေကို ကြုံရာတွေနဲ့ ပြန်ကြတယ်။ အကုန်လုံးတော့ ရပ်ကွက်ထဲမှာ လူထုက နည်းလာပြီပေါ့။

မေး။ ။ အကိုတို့လို လူမှုရေးကူညီမှု အသင်းတွေအနေနဲ့လည်း တခုခု စောစောက အကိုပြောသလို ပစ်တယ်ခတ်တယ်၊ ဒဏ်ရာရတယ် ကူပါဦးဆိုရင်လည်း သွားမကူနိုင်တဲ့ အနေအထား ဖြစ်နေတာလားခင်ဗျ။

ဖြေ။ ။ဟုတ်ကဲ့ခင်ဗျ အဲလိုမျိုးကို ဖြစ်နေတာ လူနာတင်ဆိုရင် အမှန်တကယ်ဆိုလို့ရှိရင် နိုင်ငံတကာမှာ စစ်ဖြစ်နေတာတောင် လူနာတင်၊ လူနာလာကောက်တယ်၊ အလံဖြူထောင်ထားတယ်ဆိုရင် ဘယ်သူမှ ပစ်တာ ကျနော်တို့ မကြားဖူးပါဘူး ။ ဒါပေမယ့် ကျနော်တို့ လှိုင်သာယာမှာ ၊ လှိုင်သာယာလို့မဟုတ်ဘူး အခု မြန်မာနိုင်ငံမှာ ဖြစ်နေတာက ဟိုရက်တွေကလည်း ဖြစ်တယ်ခင်ဗျ မြောက်ဥက္ကလာမှာ လူနာတင်၊ လူနာလာကောက်တဲ့လူတွေကိုလည်း ပစ်တာခတ်တာရှိတယ်။ သူတို့ ရှေ့မှာ ကောက်တာ တွေ့ရင်လည်း လူမှုကွန်ယက်စာမျက်နှာတွေမှာ အကိုတို့လည်း ဟိုရက်တွေက တွေ့မှာပါ ၊ ကျနော်တို့ ပရဟိတ သမားတွေကို သူတို့ ဘလိုင်းကြီး သေနတ်တွေနဲ့ လွှဲရိုက်တဲ့အထိကို လုပ်တာ။ လှိုင်သာယာမှာတော့ အဲလိုဖြစ်လိုက်တာမရှိဘူး ဒါပေမယ့် အခုလူနာ သွားကောက်တယ် သူတို့ မြင်ရင် အကုန်ပစ်တာပဲအကို ဘာမှ မရှောင်ဘူး။ ကျနော်တို့လည်း လုံခြုံမှုမရှိတော့ လူနာကောက်ဖို့ကလည်း အခက်အခဲဖြစ်တယ်။ ပြီးတော့ ဆက်သွယ်လာတဲ့အပေါ်မှာလည်း မကူနိုင်ဘူးပေ့ါဗျာ ၊ စိတ်မကောင်းတာကလွဲလို့ ဘာမှ လုပ်လို့မရတော့ဘူး ။ အဲဒီမှာ ပြည်သူကလည်း ဘယ်လို မြင်သလဲဆိုတော့ လူမှုကူညီရေး အသင်းတွေကနေပြီးတော့ ပြည်သူတွေ ဒီလို ထိခိုက်နေတာကို လာမကူကြတော့ဘူး .. ကျနော်တို့ဘက်ကိုပဲ လှည့်မဲလာတဲ့ အပိုင်းတွေ အများကြီးရှိတယ်။ အခု ကျနော်တို့ဆိုရင် ဘယ်လို လုပ်ထားရသလဲဆိုတော့ ကျနော်တို့ ကားတွေကို မီးတန်းတွေဖြုတ် ၊ စတစ်ကာတွေ ခွာပြီး လုံးဝကို ထိုးရပ်ထားပြီးတော့ နီးစပ်ရာ လက်လှမ်းမီသလောက် လိုက်ပြီး ကူညီလို့ရတဲ့ အနေအထားလောက်ပဲ လုပ်လို့ရတော့တယ်။ ဘယ်လိုပြောမလဲ ကားတွေတောင် ၀ှက်ထားရတဲ့ အဆင့်တွေအထိတောင်ရောက်လာတယ်ခင်ဗျ။ နေ့ခင်းက မီးလောင်တဲ့နေရာမှာ ရှိတဲ့ အလောင်း ၂ လောင်းဆိုရင် ကောက်ချင်တဲ့ အသင်းက အဲဒီအနီးကပ်မှာ ရှိတယ်၊ အခု သူတို့ ဇုံ ၁ မှာရှိတဲ့ အသင်းက ရှိတယ် ဒါပေမယ့် သူတို့သတင်းက ရထားပြီးသား ဒါတောင် ဝင်ကောက်လို့မရဘူးဖြစ်နေတယ်။ သိတယ်မလား အဲဒီလို အဲအလောင်းတွေကို ပေးမထုတ်တဲ့ သဘော။


ကိုဇော်ဝင်းလှိုင်/ VOA Burmese

https://burmese.voanews.com/a/hlaing-thar-yar-situation-interview-/5817122.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ