စစ်အာဏာရှင်ဆန့်ကျင်ရေး မန္တလေးဆန္ဒပြပွဲ လူ ၁၀ ဦးမနည်းသေဆုံး

မတ်လ ၂၇ ရက်၊ စစ်အုပ်ချုပ်ရေးဆန့်ကျင်ကန့်ကွက်နေရင်း ဒဏ်ရာရသွားသူတဦးကို တွဲခေါ်လာစဉ်။

ဖက်ဆစ်တော်လှန်ရေးနေ့အဖြစ် မြန်မာနိုင်ငံတဝှမ်းပြုလုပ်နေကြတဲ့ စစ်အာဏာရှင်ဆန့်ကျင်ရေးဆန္ဒပြမှုတွေကို စစ်တပ်နဲ့ရဲက ပစ်ခတ်နှိမ်နင်းရာမှာ မန္တလေးတမြို့တည်းမှာပဲ လူ ၁၀ ဦးထက်မနည်း သေဆုံးမှုရှိခဲ့ပါတယ်။ ဒီအကြောင်း မန္တလေးကရတဲ့သတင်းကို ကိုသားညွန့်ဦး ပြောပြပါမယ်။

ဒီကနေ့ မတ်လ ၂၇ ရက်နေ့ မြန်မာနိုင်ငံတဝှမ်း မြို့ကြီးတွေမှာ ဆန္ဒထုတ်ဖော်သူတွေကို စစ်တပ်ရဲ့ ရဲတပ်ဖွဲ့က ပစ်ခတ်ဖြိုခွင်းတာကြောင့် လူသေဆုံးတာတွေ ဖြစ်ပေါ်ခဲ့ပါတယ်။

မြန်မာနိုင်ငံရဲ့ ဒုတိယမြို့ကြီးတမြို့ဖြစ်တဲ့ မန္တလေးမြို့မှာတော ၁၀ ဦးထက် မနည်းသေဆုံးခဲ့ပြီး ဒဏ်ရာရသူ အများအပြားရှိသလို လူအသွားအလာမရှိသလောက်ဖြစ်နေတယ်လို့ မန္တလေး မြို့ခံတစ်ဦးက ပြောပါတယ်။

“အခြေအနေက ၂ နာရီလောက်ထိ ၁၀ ဦးလို့ ကြားသိရတယ်။ ဒဏ်ရာရတာက အခုချိန်ထိတော့ confirm တော့ မဖြစ်သေးဘူး။ အရေအတွက်က ဘယ်လောက်မှန်းလည်းမသိဘူး။ ကျွန်တော်တို့နားမှာက တော်တော် များများ ထိသွားတယ်ခင်ဗျ။ Machine Gun နဲ့ကို ဆွဲတယ်ပြောတယ်။ ရင်ဘတ်မှန်တာတွေရှိတယ်။ ဗိုက်မှန်တာတွေ ရှိတယ်။ ခြေထောက် အများဆုံးမှန်ကြတယ်ပေါ့ဗျာ။ မန်းလေးရဲ့ လက်ရှိ အနေအထားကတော့ လမ်းတွေပေါ်မှာတော့ တိတ်ဆိတ်နေတယ်။ လမ်းတိုင်းလမ်းတိုင်းမှာတော့ တာယာပုံတွေ မီးလောင်နေတာတွေ လမ်းပိတ်ဆို့တားမှုတွေ အခုချိန်ထိ ရှိသေးတယ်ခင်ဗျ။ လမ်းပေါ်မှာတော့ သွားလာနေတဲ့သူတွေ တယောက်မှ တော့ မရှိတော့ဘူး။”

ဒါ့အပြင် ဆန္ဒထုတ်ပစ်ခတ်ဖြိုခွင်းမှုတွေကို သတင်းရယူနေတဲ့ မန္တလေးမြို့ခံ သတင်းသမားတစ်ဦး လက်ခုံကို ကျည်ဆံထိမှန် ဖောက်ဝင်သွားပြီး ဆေးကုသမှု ခံယူခဲ့ရပါတယ်။

ဒါ့အပြင် မန္တလေးတိုင်းဒေသကြီး ကျောက်ပန်းတောင်းမြို့မှာလည်း ပစ်ခတ်တာကြောင့် ၂ ယောက်သေဆုံး သွားပြီး သေဆုံးသူတွေထဲ ကလေးငယ်တစ်ဦးပါဝင်တယ်လို့ ကျောက်ပန်းတောင်းဒေသခံတဦးကပြောပါတယ်။

“ထိခိုက်မှုကတော့ လောလောဆယ် ၄ ယောက်ထိတယ်။ ၂ ယောက်ကတော့ သေသွားတယ်။ ၂ ယောက် ကတော့ ဆေးကုသမှု ခံယူနေရတယ်။ အဲ့အနား ကပ်လို့မရဘူး။ အဲ့နားနဲ့ အနီးဆုံးမှာ ကြည့်နေတယ်။ ကျတာ အမျိုးသားတွေ။ တယောက်ကတော့ ကလေး၊Headshot ။ နောက်တယောက်ကတော့ လည်ပင်းနားထိတာ။ အဲ့ဒါကတော့ လူကြီးပိုင်းပေါ့။ ပိတ်မိနေသူတွေလည်း ရှိတယ်။ ဖမ်းသွားသူတွေလည်း ရှိတယ်။ ဖြစ်တာက ကျောက်ပန်းတောင်းမြို့လယ်နား ဘူတာရုံလမ်းဘက်ပေါ့။ ထိခိုက်ဒဏ်ရာရတဲ့သူများမယ်။ သိတော့ မသိရသေးဘူး။”

ရှမ်းပြည်နယ်၊ လားရှိုးမြို့မှာတော့ စစ်တပ်နဲ့ရဲတပ်ဖွဲ့က ပစ်ခတ်လို့ ၃ ဦးသေဆုံးခဲ့တယ်လို့ ဒေသခံတစ်ဦးကပြောပါတယ်။

“ဒီကနေ့ ကျမတို့ ၇ နာရီမထိုးခင်မှာ လားရှိုးရပ်ကွက် ၇ ရွှေညောင်ပင်မှာ။ အဲ့မှာ ကျမတို့တွေချိန်းထားကြတယ်။ စစ်ကားတွေအများကြီးလာဖြိုခွဲနေပြီ၊ သွားဖြိုခွဲနေပြီတဲ့။ အစပဲရှိသေးတာကို သူတို့က အင်အားသုံးပြီး ဖြိုခွင်းတာ။ အဲ့မှာယောက်ကျားလေး ၂ ယောက်၊ မိန်းကလေး ၁ ယောက်ကတော့ သေနတ်ကျည်ထိတယ်။ ၃ ယောက်ကျတယ်။ မိန်းကလေးအလောင်းကိုကျတော့ စစ်တပ်က ကောက်သွားလိုက်တယ်။ ယောက်ကျားလေး တယေက်ကတော့ ဒီကနေ့ ရန်တိုင်းအောင်ဘက်မှာ သင်္ဂြိုဟ်မယ်။”

စစ်တပ်နဲ့ရဲတပ်ဖွဲ့ယူဆောင်သွားတဲ့အလောင်းကိုတော့ သူတို့မပစ်ကြောင်း မိသားစုက သိရှိနားလည်ကြောင်း လက်မှတ်ထိုးပြီးမှ ထုတ်ပေးမယ်လို့ ဆိုပါတယ်။

ဧရာတီတိုင်းဒေသကြီး ပုသိမ်မြို့မှာတော့ သေဆုံး ၂ သူ ၂ ဦးရှိတယ်လို့ ဒေသခံ ၁ ဦးက အတည်ပြုပြောပါတယ်။

“အခုလောလောဆယ် ရာမညမှာတော့ တယောက်က ပေါင်မှာထိသွားတယ်။ ဆုံးသွားတယ်။ ဆေးရုံ တင်ကားတွေ ဝင်လို့မရဘူး။ သွေးထွက်လွန်ပြီး သေသွားတယ်။ ဧရာမင်းမှာက ဗိုက်ကို တယောက် ထိသွားတယ်။ ဆုံးသွားတယ်။ လောလောဆယ်တော့ ၂ ယောက်ပေါ့။ ပထမက သူတို့က ဆန္ဒပြတဲ့ စစ်ကြောင်းဘက်မှာ ရဲ ၁၀ ယောက်လောက်က လာစောင့်နေတယ်။ ပြည်သူတွေကလည်း ဒီဘက်မှာ ဆန္ဒမပြဘဲ အခြေအနေ စောင့်ကြည့်နေကြတယ်။ စောင့်ကြည့်နေတဲ့အချိန်မှာပဲ သူတို့က အင်အားထပ် ခေါ် လာပြီးတော့၊ကားတွေ ထပ်ရောက်လာပြီးတော့ စတင်ပစ်ခတ် ဖြိုခွင်းတောတာပဲ။”

ဒီကနေ့ ဖက်ဆစ်တော်လှန်ရေးနေ့မှာ မြန်မာနိုင်ငံအနှံ့ ဆန္ဒထုတ်ဖော်မှုတွေ ပြုလုပ်တာကို စစ်တပ်နဲ့ ရဲတပ်ဖွဲ့က ပစ်ခတ်ဖြိုခွင်းခဲ့တာပါ။ ဒါ့အပြင် မိုးကုတ်၊ ရွှေဘို၊ စစ်ကိုင်း၊ ဒိုက်ဦး၊ ဟိုပင်၊ မူဆယ် စတဲ့ မြို့တွေမှာလည်း စစ်တပ်နဲ့ရဲက ပစ်ခတ်တာကြောင့် လူသေဆုံးတာတွေဖြစ်ခဲ့ပါတယ်။ သေဆုံးဒဏ်ရာရသူတွေထဲမှာ အသက်မ ပြည့်သေးတဲ့ ကလေးငယ်တွေပါ ပါဝင်ပါတယ်။ VOA က နောက်ဆုံးရရှိတဲ့သတင်းအရ ဒီကနေ့ မွန်းလွဲပိုင်း အထိ ဒီနေ့တနေ့တည်း သေနက်ကျည်ကြောင့် သေဆုံးသူ ၉၀ ထက်မနည်း ရှိသွားပြီလို့ သိရပါတယ်။

ပစ်ခတ်ဖြိုခွင်းတာတွေကြောင့် လူသေဆုံး ဒဏ်ရာရရှိတာတွေရှိပေမယ့် မြန်မာနိုင်ငံတဝှမ်းမှာ စစ်ဆန့်ကျင်ရေး လှုပ်ရှားမှုတွေက အားကောင်းနေဆဲပါ။


သားၫြန္႔ဦး/ VOA Burmese

https://burmese.voanews.com/a/myanmar-mandalay-coup-march-27-whathappening-in-myanmar-/5830680.html

စစ်အာဏာရှင်ဆန့်ကျင်ရေး မန္တလေးဆန္ဒပြပွဲ လူ ၁၀ ဦးမနည်းသေဆုံး စစ်အာဏာရှင်ဆန့်ကျင်ရေး မန္တလေးဆန္ဒပြပွဲ လူ ၁၀ ဦးမနည်းသေဆုံး Reviewed by THITHTOOLWIN on 22:30 Rating: 5

No comments:

Powered by Blogger.