မြန်မာနိုင်ငံ ဆန္ဒပြပွဲတွေအတွင်း ပိုလန်သတင်းထောက်တဦး ဖမ်းဆီးခံရ

ဆန္ဒပြပွဲအား စစ်တပ်မှ ဖြိုခွဲစဉ် (ဓာတ်ပုံ- Reuters)

ပိုလန်သတင်းထောက် တဦးဟာ မြန်မာနိုင်ငံမှာ အဖမ်းခံနေရတယ်လို့ ပိုလန်နိုင်ငံခြားရေးဝန်ကြီးဌာနက သောကြာနေ့မှာ ပြောပါတယ်။ ဒါဟာ မြန်မာနိုင်ငံမှာ ဖေဖေါ်ဝါရီလ တရက်နေ့ စစ်တပ်က အာဏာသိမ်းပြီးချိန်ကစပြီး ဒုတိယမြောက် အဖမ်းခံရတဲ့ နိုင်ငံခြားသတင်းထောက် ဖြစ်ပါတယ်။

ပိုလန်ကောင်စစ်ရုံံးက ဆက်သွယ်ဖို့ ကြိုးစားနေတဲ့ အပြင် သူ့ရဲ့ ကျန်းမာရေးနဲ့ တရားရေးအခြေနေဆိုင်ရာ အချက်လက်တွေ ရဖို့ ကြိုးစားနေကြာင်းနဲ့ ဒီအဖမ်းခံနေရတဲ့ ပိုလန်နိုင်ငံသားကို ကူညီဖို့ ဆောင်ရွက်နေကြောင်း ပိုလန်နိုင်ငံခြားရေးရုံးက ကြေညာချက် ထုတ်ပြန် ပြောဆိုပါတယ်။

ပိုလန် သတင်းမီဒီယာ တွေမှာတော့ အဖမ်းခံနေရတဲ့ သတင်းထောက်ဟာ ရောဘတ် ဘူဂျီ (Robert Bociag) ဖြစ်ကြောင်း ဖေါ်ပြနေပေမယ့် ပိုလန်နိုင်ငံခြားရေးဝန်ကြီး ဌာန ကတော့ အတည်မပြုပေး သေးကြောင်း ရိုက်တာသတင်းမှာ ဖေါ်ပြထားပါတယ်။

အရပ်သားအစိုးရကို ဖမ်းဆီးဖယ်ရှားပြီး ဖေဖေါ်ဝါရီ (၁)နေ့ကစလို့ အာဏာရယူခဲ့တဲ့ နိုင်ငံတော် စီမံအုပ်ချုပ်ရေးကောင်စီဟာ ပြည်သူတွေနဲ့ သတင်းသမားတွေရဲ့ နဂိုရှိရင်းစွဲ လွတ်လပ်ခွင့်ကို ထိန်းချုပ်နိုင်ဖို့ တင်းကြပ်တဲ့ ညွှန်ကြားချက်တွေ၊ ဥပဒေပုဒ်မတချို့ ပြင်ဆင်ဖြည့်စွက်တာတွေလုပ်ခဲ့သလို သတင်းထောက်တွေကို ရိုက်နှက်ဖမ်းဆီးတာတွေ လုပ်ခဲ့တာပါ။

အမေရိကန်သံရုံးကတော့ သောကြာနေ့က ရန်ကုန်မှာအဖမ်းခံနေရတဲ့ သတင်းထောက် ၅ ဦးအတွက် တရားရုံးတခုကို သံရုံးအရာရှိ သွားရောက်ခဲ့ကြောင်း နဲ့ မီဒီယာဟာ ပြည်သူတွေ ဆုံးဖြတ်ချက် ချရေးအတွက် အသိကြွယ်စေတာကြောင့် အရေးပါတဲ့အပြင် သတင်းမီဒီယာကို နှုတ်ပိတ်ပြီး အာဏာသိမ်း စစ်ဘက်အရာရှိတွေရဲ့ စက်ဆုပ်ဖွယ် လုပ်ရပ်တွေအတွက် ကမ္ဘာကရော မြန်မာပြည်သူတွေကပါ မေ့အောင် လုပ်လို့ မရကြောင်း မြန်မာနိုင်ငံဆိုင်ရာ အမေရိကန်သံရုံးပြောခွင့်ရ Aryani Manring က ဗွီအိုအေကိုပြောပါတယ်။

စစ်တပ်က အာဏာသိမ်းပြီးနောက် အကြမ်းဖက်နှိမ်နင်းခံရတဲ့အထဲမှာ သတင်းရယူနေချိန် ဖမ်းဆီးခံရတဲ့ သတင်းထောက် ၄၀ ကျော် ရှိနေပါတယ်။ ပြန်လွတ်လာသူ တချို့ ရှိပေမယ့် အမှုဖွင့်ခံထားရသူတွေ ရှိသလို၊ ဖမ်းဆီးခံရပြီးချိန်ကစ မိသားစုနဲ့ တွေ့ခွင့်မရတော့ဘဲ ချုပ်နှောင်ခံထားရသူတွေလည်း ရှိပါတယ်။

ဗွီအိုအေ (မြန်မာပိုင်း)

https://burmese.voanews.com/a/journalist-Poland-arrests-media-freedom-military-coup-/5812545.html