အကြမ်းဖက်ပစ်ခတ်ခံရမှု ရန်ကုန်ဆန္ဒပြသူ တချို့သေဆုံး၊ ဒဏ်ရာရ



Share/Bookmark

စစ်တပ်က အာဏာသိမ်းတာကို ဆန့်ကျင်ဆန္ဒပြသူတွေအပေါ်စစ်တပ်နဲ့ရဲဘက်က လက်နက်ကိုင်အင်အားသုံး အကြမ်းဖက် ပစ်ခတ်မှုတွေကြောင့် ဒီကနေ့မှာလည်း ရန်ကုန်မြို့မှာ သေဆုံးသူတွေ ပြင်းထန်တဲ့ ဒဏ်ရာရသူတွေ ရှိပါတယ်။ အကြမ်းဖက်နှိမ်နင်းမှုတွေကြားက ရန်ကုန်မြို့ရဲ့ဆန္ဒပြသပိတ်တွေရဲ့ အခြေအနေအကြောင်း ရန်ကုန်က လာတဲ့သတင်းကို မဆုမွန်က ပြောပြသွားပါမယ်။

ပြီးခဲ့တဲ့ရွေးကောက်ပွဲမှာ မဲအပြတ်အသတ်နဲ့ အနိုင်ရခဲ့တဲ့ အရပ်သားအစိုးရကို ဖြုတ်ချပြီး စစ်တပ်က အာဏာသိမ်းလိုက်တာဟာ ရက်ပေါင်း ၅၇ ရက် ရှိခဲ့ပါပြီ။ ရန်ကုန်မြို့က မြို့နယ်အသီးသီးမှာ ပြုလုပ်နေတဲ့ ဆန္ဒပြသပိတ်တွေကို စစ်တပ်နဲ့ ရဲတွေဘက်က အကြမ်းဖက်ဖြိုခွဲတာတွေ ဆက်လုပ်နေပါတယ်။ ဒီကနေ့မှာတော့ တောင်ဒဂုံမြို့နယ်ထဲမှာ ဆန္ဒပြပြည်သူတွေကို မနက်အစောပိုင်းက စပြီး အင်အားသုံးဖြိုခွဲတာတွေကြောင့် သေဆုံးသူတွေနဲ့ ဒဏ်ရာရသူတွေလည်း တိုးလာနေပါတယ်။ သေဆုံးသွားသူတွေကို သယ်ဆောင်ဖို့နဲ့ ဒဏ်ရာပြင်းထန်သူတွေကို ကယ်ဆယ်နိုင်ဖို့အတွက် ပစ်ခတ်မှုတွေကြားထဲမှာ အခက်အခဲတွေရှိနေတယ်လို့ မြေပြင်မှာ ရှိနေတဲ့ လူငယ်တဦးက ဗွီအိုအေကိုပြောပါတယ်။

"သူတို့က ဝိုင်းထားတာက မနက်ပိုင်းကတည်းက... ဝိုင်းထားပြီးတော့ မွန်းလွဲလောက်ကစပြီးတော့ တောက်လျှောက်ပစ်တာ။ တပ်အင်အားစုပြီးတော့ ပတ်ပတ်လည်ပေါ့။ သံချပ်ကာတွေရော၊ အမြှောက်ကားတွေရော အကုန်ပါလာပြီးတော့ သူတို့တပ်အင်အားပြည့်ကာမှ ဝင်ပစ်တာ။ သူတို့က RPG နဲ့လည်း ကျနော်တို့ သဲအိတ် banker ကို ပစ်လိုက်တော့ ၅၆ ဘက်ခြမ်းမှာဆို လူဦးရေ ၂ ဦးတော့ စတေးထားရတယ်။ လက်ပစ်ဗုံးနဲ့ ပစ်လိုက်တဲ့နေရာမှာတော့ လူအများကြီးထိသွားပြီးတော့ လူတွေလွင့်ထွက်ကုန်တဲ့အထိ ရှိတယ်။

သေဆုံးမှုက အဲဒီဘက်မှာ ရေတွက်လို့မရသေးဘူး။ အခု လက်ပစ်ဗုံးတွေရော၊ RPG တွေရော သူတို့ဝင်ပစ်နေတုန်းပဲ။ ကျဆုံးသူတွေကို သွားကောက်လို့မရဘူး... တောက်လျှောက်ပစ်နေတာ...။ ဒီအခြေအနေတခုမှာ ကျနော်တို့ဘက်က ပြည်သူမှာတော့ သူတို့ကို ပြန်ခုခံနိုင်သလောက် ခုခံရမှာပဲ။ ဒါပေမဲ့ သူတို့က ပတ်ပတ်လည် ဝိုင်းထားတာဖြစ်တဲ့အတွက် အန္တရာယ်ကတော့ အရမ်းများတာပေါ့။"

ဒါကတော့ တောင်ဒဂုံမြို့နယ်တွင်းက ညနေ ၅ နာရီဝန်းကျင် အခြေအနေဖြစ်ပါတယ်။ သူပြောခဲ့သလို လက်ပစ်ဗုံးတွေ၊ ပုခုံးထမ်းလောင်ချာ RPG တွေနဲ့ ပစ်တယ်လို့ပြောပေမဲ့ ဒါကို သီးခြားအတည်ပြုလိုတော့ မရသေးပါဘူး။ ဗီဒီယိုတွေထဲမှာ မြင်ရတာတော့ တော်တော်လေး အားပြင်းတဲ့ လက်နက်နဲ့ ပစ်ခတ်ပုံရပါတယ်။

ခုလို အင်အားသုံးဖြိုခွဲနေတာကြောင့် အခုညနေစောင်းချိန်အထိ အခြေအနေတွေ တင်းမာနေတယ်လို့ သိရပါတယ်။ တောင်ဒဂုံမြို့နယ်ထဲမှာ ပစ်ခတ်မှုတွေကြောင့် ဒီနေ့တရက်ထဲမှာ သေဆုံးသူ ၁၀ ယောက်လောက်ရှိနေပြီလို ဒေသခံတွေက ပြောပါတယ်။ အခုအချိန်အထိ အလောင်းတွေ ကောက်လို့ မရတာတွေ ရှိနေသေးတာကြောင့် အတိအကျ အတည်ပြုနိုင်ဖို့ မလွယ်သေးပါဘူး။

သာကေတမြို့နယ် သုမနလမ်းဘက်မှာလည်း ဆန္ဒပြသူတွေကိုလည်း ဒီနေ့ အစောပိုင်းက လက်နက်တွေနဲ့ ပစ်ခတ်တာတွေကြောင့် သေဆုံးသူ တဦးနဲ့ ဒဏ်ရာရသူတွေ ရှိခဲ့ပါတယ်။

"အခုလည်း ရပ်ကွက်တွေမှာ သူတို့က ဝင်မွှေနေကြတာပဲ။ အတိုက်အခိုက်ကတော့ ပြည်သူတွေက ခံရတဲ့ဘက်ကပေါ့ဗျာ ဘာမှမှ မရှိတာ...။ သူတို့ဝင်လာရင် လမ်းမှာတွေ့သမျှသူ အကုန်လုံးကို ပစ်တာပဲ။ ဘယ်သူရယ်လို့လည်း မဟုတ်ဘူး၊ ကြုံတဲ့သူ ထိမိတာပဲ။ ဒါပေမဲ့ သိရသလောက်ကတော့ ထိလိုက်ရင် ခန္ဓာကိုယ်အပေါ်ဘက်ခြမ်းတွေ၊ ခေါင်းတွေ၊ လက်တွေဆိုတော့ အဲ့ဒီနားမှာတင် သေရင်သေ၊ မသေရင်လည်း နည်းနည်းအချိန်ကြာရင် သေသွားတာ များပါတယ်။ နေ့တိုင်းလည်း အဲဒီလိုမျိုးဖြစ်နေတာ။

အခုလောလောဆယ်ကတော့ ပြည်သူတွေရဲ့ရင်ထဲကို သူတို့ထည့်ပေးနေတာ အကြောက်တရားတွေ။ ပြီးတော့ လမ်းမတွေပေါ် တွေ့တဲ့သူတိုင်း လူဟုတ်ဟုတ်၊ မဟုတ်ဟုတ်၊ မဲမဲမြင်ရာ လျှောက်ပစ်နေတော့ ဘာပဲဖြစ်ဖြစ် သာကေတသားတယောက် အနေနဲ့ကတော့ တော်တော်ကြီးကို စိတ်မကောင်းဖြစ်မိတယ်။ ဒီလိုမျိုးကြီး လုပ်လိမ့်မယ်လို့ တခါမှလည်း မထင်ထားဘူးဗျ။ သတ်သတ်ကြီးကို ရက်စက်ယုတ်မာနေတဲ့ ပုံစံမျိုးကြီး။"

မတ်လ ၂၇ ရက် စနေနေ့တုန်းက သေဆုံးသူ ၅ ဦးထက်မနည်း ရှိခဲ့တဲ့ အင်းစိန်မြို့နယ်မှာလည်း မတ်လ ၂၈ ရက် တနင်္ဂနွေနေ့ ညပိုင်းကစပြီး ဒီကနေ့မနက်အထိ ပြည်သူ ၉ ဦးကို စစ်တပ်နဲ့ရဲတွေဘက်က အကြမ်းဖက် ဖမ်းဆီးတာတွေ ရှိခဲ့တယ်လို့ အင်းစိန်မြို့နယ်အခြေစိုက် သတင်းဌာနက ပြောထားပါတယ်။

ခုလို တပ်တွေဘက်က အင်အားသုံး အကြမ်းဖက်ပစ်ခတ်နေပေမဲ့ ကျဆုံးသွားသူတွေအတွက် ဆူးလေဘုရားအနီးမှာ ပြည်သူတွေက ဒီနေ့ ဆုတောင်းပွဲပြုလုပ်ပေးခဲ့ပါတယ်။ နွေဦးတော်လှန်ရေးတိုက်ပွဲမှာ အသက်ပေးခဲ့ကြတဲ့ သူရဲကောင်း အာဇာနည်တွေအတွက် ဆုတောင်းပွဲဆိုပြီး ကားလမ်းမပေါ်မှာ ပြုလုပ်ခဲ့ကြတာပါ။

နိုင်ငံရေးအကျဉ်းသားများ ကူညီစောင့်ရှောက်ရေး အသင်း AAPPB ရဲ့ မတ်လ ၂၈ ရက်အထိ စာရင်းတွေအရ စစ်အာဏာရှင်တော်လှန်ရေး ကာလအတွင်း ကျဆုံးခဲ့သူပေါင်း ၄၅၉ ဦးအထိ ရှိပါတယ်။ ဒီအရေအတွက်ဟာ AAPPB က ကောက်ယူရရှိထားတဲ့ သေဆုံးသူအရေအတွက် ဖြစ်ပြီး၊ စစ်တပ်နဲ့ ရဲတွေဘက်က အင်အားသုံးအကြမ်းဖက်လို့ သေဆုံးခဲ့ရသူတွေဟာ ဒီထက်မက ရှိနိုင်တယ်လို့လည်း ထုတ်ပြန်ထားပါတယ်။ ၂ လနီးပါးကြာ အာဏာသိမ်းကာလအတွင်း ရာနဲ့ချီ သေဆုံးသူတွေထဲမှာ လူမျိုးဘာသာပေါင်းစုံနဲ့ အရွယ်မရောက်သေးတဲ့ ကလေးငယ်တွေလည်း ပါဝင်ပါတယ်။ 


မဆုမွန်/ VOA Burmese

https://burmese.voanews.com/a/yangon-myanmar-military-coup/5832391.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ