ဒဏ်ခတ်အရေးယူမှု ကျင့်သားရနေပြီလို့ စစ်ဘက်အုပ်ချုပ်ရေးကောင်စီ တုံ့ပြန်

နေပြည်တော်ရှိ လမ်းတခုပေါ်တွင် တွေ့ရတဲ့ မြန်မာစစ်တပ် တပ်ဖွဲ့ဝင်များ။ (ဖေဖော်ဝါရီ ၁၇၊ ၂၀၂၁)

စစ်တပ်က အာဏာသိမ်းယူ အုပ်ချုပ်နေတဲ့အပေါ် အမေရိကန်အပါအဝင် အနောက်နိုင်ငံတချို့က ပစ်မှတ်ထားဒဏ်ခတ်မှုတွေ လုပ်နေချိန်မှာပဲ ဒီဒဏ်ခတ်မှုတွေကို မမှုတဲ့ပုံစစ်တပ်က တုံ့ပြန်ခဲ့တယ်လို့ ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးသံတမန် Christine Schraner Burgener ကပြောကြားပါတယ်။ မြန်မာစစ်တပ်နဲ့ ဆွေးနွေးခဲ့တဲ့အကြောင်း ဗုဒ္ဓဟူးနေ့က လုပ်တဲ့ သတင်းစာရှင်းပွဲမှာ သူကပြောပြခဲ့တာဖြစ်ပါတယ်။

"စစ်တပ်နဲ့ ဆွေးနွေးခဲ့စဉ်က ကုလသမဂ္ဂအဖွဲ့ဝင်နိုင်ငံတွေနဲ့ လုံခြုံရေးကောင်စီက ကြီးမား ပြင်းထန်တဲ့ အရေးယူမှုတွေ လုပ်နိုင်တယ်လို့ သတိပေးခဲ့ပါတယ်။ သူတို့ဘက်က ပြန်ပြောတာကတော့ ဒဏ်ခတ်ပိတ်ဆို့မှုတွေ လုပ်ခံရတာ ကျင့်သားရနေပြီ။ အရင်က ဒဏ်ခတ်အရေးယူမှုတွေ လုပ်ခဲ့ပေမဲ့ လွန်မြောက် ကျော်လွှားနိုင်ခဲ့တယ်ဆိုပြီး တုံ့ပြန်တယ်။" လို့ မြန်မာနိုင်ငံဆိုင်ရာ ကုလအထူးသံတမန်က ပြောပြတာပါ။

မြန်မာနိုင်ငံ တနိုင်ငံထဲ အထီးကျန်ဖြစ်မယ်လို့ သူက ထပ်ပြီး သတိပေးတဲ့အခါမှာလည်း ရှိတဲ့ မိတ်ဆွေအနည်းငယ်နဲ့ အလုပ်ဖြစ်အောင် ပေါင်းသင်းဆက်ဆံသွားရမှာဖြစ်တယ်လို့ စစ်တပ်ဘက်က သူ့ကို တုံ့ပြန်ခဲ့တယ်လို့ ပြောပါတယ်။

ဒါကြောင့် ကုလသမဂ္ဂအဖွဲ့ဝင်နိုင်ငံတွေအနေနဲ့ တော်တော်လေးပြင်းထန်တဲ့ ဆောင်ရွက်မှုတွေလုပ်ဖို့ လိုအပ်တယ်လို့ သူထင်မြင်ကြောင်း မနေ့ကလုပ်တဲ့ သတင်းစာရှင်းပွဲမှာ မြန်မာနိုင်ငံဆိုင်ရာ အထူးသံတမန် Christine Schraner Burgener က ပြောကြားခဲ့ပါတယ်။ မြန်မာနိုင်ငံမှာဖြစ်နေတဲ့ အခြေအနေတွေ ရပ်သွားအောင် ဆွေးနွေးမှုကနေပဲ အဖြေရှာနိုင်မယ်လို့ ထင်တဲ့အတွက် သူ့အနေနဲ့ စစ်တပ်နဲ့ ဆက်ပြီး ဆွေးနွေးသွားမယ်လို့လည်း ပြောကြားခဲ့ပါတယ်။

ဗွီအိုအေ (မြန်မာပိုင်း)

https://burmese.voanews.com/a/un-special-envoy-to-myanmar/5801375.html