မြန်မာနိုင်ငံ အဖမ်းအဆီးများပြားလာမှု ကုလအထူးစိုးရိမ်

ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရသူ Stephane Dujarric

မြန်မာနိုင်ငံမှာ စစ်တပ်က အာဏာသိမ်းတာကို ဆန့်ကျင်တဲ့ ဆန္ဒပြလှုပ်ရှားမှုတွေနဲ့ ဆက်နွယ်ပြီး ဖမ်းဆီးခံရမှုတွေ တိုးလာနေတဲ့အပေါ် စိုးရိမ်ကြောင်း ကုလသမဂ္ဂက ပြောဆိုလိုက်ပါတယ်။

မြန်မာနိုင်ငံမှာ ဖမ်းဆီးထိန်းသိမ်းခံရသူဦးရေ တိုးလာနေတဲ့အပေါ် အလွန်အမင်း စိုးရိမ်ကြောင်းနဲ့ ဖေဖော်ဝါရီလ ၂၂ ရက်နေ့က နေပြည်တော်မှာတင် တရက်တည်းနဲ့ လူ ၁၅၀ ထက်မနည်း ဖမ်းဆီးခံခဲ့ရကြောင်း မြန်မာနိုင်ငံက ကုလသမဂ္ဂ တာဝန်ရှိသူတွေကို ကိုးကားပြီး ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရသူ Stephane Dujarric က နယူးယောက် ကုလသမဂ္ဂ ရုံးချုပ်မှာ ကြာသပတေးနေ့ သတင်းစာရှင်းလင်းပွဲအတွင်း ပြောဆိုလိုက်တာပါ။

နိုင်ငံရေးသမားတွေ၊ အစိုးရ တာဝန်ရှိသူတွေ၊ တက်ကြွလှုပ်ရှားသူတွေနဲ့ သတင်းမီဒီယာသမားတွေ၊ သံဃာတော်တွေနဲ့ ကျောင်းသားတွေ အပါအဝင် အရပ်ဖက်အဖွဲ့အစည်းက စုစုပေါင်း ထိန်းသိမ်းခံထားရသူ ၉၀၀ ကျော် နဲ့ ပတ်သက်လို့ ကုလသမဂ္ဂ တာဝန်ရှိသူတွေ စုံစမ်းနေတယ်လို့လည်း ပြောပါတယ်။ ဖမ်းဆီးထိန်းသိမ်းထားသူတွေ အားလုံးကို ချက်ခြင်း ပြန်လွှတ်ပေးဖို့လည်း တောင်းဆိုခဲ့တာပါ။

ကုလသမဂ္ဂ အဖွဲ့ဝင်နိုင်ငံတချို့ရဲ့ တိုက်တွန်းချက်အရ ဒီကနေ့ သောကြာနေ့မှာပဲ အထွေထွေ ညီလာခံမှာ အလွတ်သဘော ဆွေးနွေးပွဲကျင်းပဖို့ စီစဉ်ထားပြီး ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ် Christine Schraner Burgener က အစီရင်ခံ တင်ပြမှာဖြစ်ပါတယ်။

တချိန်တည်းမှာပဲ မြန်မာနိုင်ငံအဝန်းက ဆန္ဒပြလှုပ်ရှားမှုတွေမှာ ဦးဆောင်နေတဲ့ Generation Z အဖွဲ့ကတော့ ကုလသမဂ္ဂ အပါအဝင် နိုင်ငံတကာ အသိုင်းအဝန်းအနေနဲ့ သဘောထား ထုတ်ပြန်ချက်တွေထက် ထိရောက်တဲ့ အရေးယူမှုတွေနဲ့ တုံ့ပြန်ဖို့လည်း ဖေ့စ်ဘွတ်လူမှုကွန်ရက်ကနေ အိတ်ဖွင့်ပေးစာထုတ်ပြန် တိုက်တွန်းထားပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-police-arresting-the-protestors-un-concern-/5792938.html