နေပြည်တော်ဆန္ဒပြပွဲ ပစ်ခတ်မှုကြောင့် နှစ်ဦး အပြင်းအထန်ဒဏ်ရာရရှိ

နေပြည်တော် ဆန္ဒပြပွဲမှာ တွေ့ရတဲ့ ရဲတပ်ဖွဲ့ဝင်များ။ (ဖေဖော်ဝါရီ ၀၈၊ ၂၀၂၁)

နေပြည်တော်ဆန္ဒပြပွဲမှာ လုံခြုံရေးတပ်ဖွဲ့တွေဘက်က ပစ်ခတ်နှိမ်နင်းတာကြောင့် အသက် ၂၀ ကျော်အရွယ် အမျိုးသမီးတဦးနဲ့ ၂၃ နှစ်အရွယ် အမျိုးသားတဦးတို့ ပြင်းပြင်းထန်ထန်ဒဏ်ရာရပြီး စိုးရိမ်ရတဲ့အနေအထားမှာ ရှိတယ်လို့သိရပါတယ်။ ထိခိုက်ဒဏ်ရရသူပေါင်း ၂၀ လောက် ရှိတယ်လို့လည်း သိရပါတယ်။ ဒဏ်ရာရ လူနာတွေကို ကုသပေးနေတဲ့ ဆရာဝန်တဦးကို ဗွီအိုအေ မြန်မာပိုင်းသတင်းထောက် မမေခ ဆက်သွယ်မေးမြန်းထားတာပါ။

ဆရာဝန်။ ။ အခုထက်ထိကို လူနှစ်ယောက်လုံးက မသေသေဘူး ခင်ဗျ။ ခေါင်းကို ကျည်ထိတဲ့တယောက်ကတော့ အခုထက်ထိ အသက်ရှင်သေးတယ်။ သူ့ကို သေပြီဆိုပြီးတော့ အပြင်မှာ ပြန့်နေတာ။ ဒါပေမဲ့ အနေအထားကတော့ ရှင်းရှင်းပြောလို့ရှိရင်တော့ သေပြီလို့ ပြောလို့ရတဲ့အနေအထားပဲ။ ကျနော်တို့က အသက်ရှုပိုက်တပ်ထားပေးရတာ။

မမေခ။ ။ အဲဒါဆို ဘယ်သူမှ မသေသေးဘူးပေါ့နော်။

ဆရာဝန်။ ။ ဟုတ်တယ်။ ဘယ်သူမှ မသေသေးဘူး။ အပြင်မှာကျတော့ အဲဒီလိုမျိုး ပြန့်နေတာ။

မမေခ။ ။ နောက်တခုက ထိခိုက်ဒဏ်ရာရတဲ့ ဦးရေ စုစုပေါင်းက ဘယ်လောက်လောက်များရှီပါသလဲ ဆရာတို့ တွေ့ခဲ့ရတာ။

ဆရာဝန်။ ။ အခုလောလောဆယ်တော့ ၂၀ လောက်ရှိတယ်ခင်ဗျ။

မမေခ။ ။ စိုးရိမ်ရတဲ့ အနေအထားကရော ဘယ်လောက်လောက်ရှိပါသလဲရှင့်။

ဆရာဝန်။ ။ ဒီနှစ်ယောက်ပဲ ခင်ဗျ။ စိုးရိမ်ရတဲ့အနေအထားကတော့။

မမေခ။ ။ တယောက်ကခေါင်းထိတယ်။ နောက်တယောက်ကရော။

ဆရာဝန်။ ။ ရင်ဘက်ကို ထုတ်ချင်းပေါက်သွားတာပါ။

မမေခ။ ။ အဲဒီတော့ နှစ်ယောက်စလုံးမှာ အမျိုးသားလား၊ အမျိုးသမီးလားရှင့်။

ဆရာဝန်။ ။ တယောက်က အမျိုးသား၊ တယောက်က အမျိုးသမီး။ ရင်ဘတ်ကို ထိတာက အမျိုးသား၊ အခု ဦးခေါင်းကို ထိပြီး အသက်အန္တရာယ်စိုးရိမ်နေရတာ အမျိုးသမီးပါ။

မမေခ။ ။ ဒီထိခိုက် ဒဏ်ရာက ကျည်ဆံက၊ ရာဘာကျည်ဆံနဲ့ ပစ်တယ်လို့လည်း ပြောတယ်ရှင့်။

ဆရာဝန်။ ။ ကျနော်တို့ကတော့ အခုအနေအထားကတော့ ရာဘာကျည်ဆံနဲ့ ဆိုရင် ဒီလောက်ထိ ထိခိုက်ဒဏ်ရာမရနိုင်ဘူးလို့ ကျနော်တို့ ထင်ပါတယ်။ ဒါပေမဲ့ ပြောလို့တော့ မရသေးဘူးခင်ဗျ။ ဦးခေါင်းကို ထိတဲ့ကျည်ဆံက ဦးခေါင်းခွံ့ထဲမှာပဲ ရှိနေသေးတယ်လို့ ကျနော်တို့ကထင်ပါတယ်။ ဒါက ခေါင်းဓာတ်မှန်တွေအရလေ။

မမေခ။ ။ အယောက် ၂၀ လောက်ဖြစ်တာက ဒီကျည်ဆံထိလို့ ဖြစ်တာလား၊ ဒီရေပိုက်ကြောင့် ဖြစ်တာလား။ ဘယ်လိုကြောင့်ပါလဲရှင့်။

ဆရာဝန်။ ။ ရေပိုက်ကြောင့်တော့အများစုပါ။ ရှပ်ထိတဲ့သူ တယောက်စ၊ နှစ်ယောက်စတော့ ရှိပါတယ်။ ဒါပေမဲ့ အဲ့ဒီလူတွေအကုန်လုံးက မရောက်လာဘူးခင်ဗျ။ Medical Team က အပြင်မှာ ကျနော်တို့ လုပ်ပေးနေတာဆိုတော့လေ။ ကျနော်တို့ လူဦးရေအတိအကျတော့ confirm မပေးနိုင်သေးပါဘူး။

ေမခ/ VOA Burmese

https://burmese.voanews.com/a/myanmar-military-coup-naypyitaw/5771095.html