မြန်မာနဲ့ ငွေကြေးဆက်ဆံမှု မပြုဖို့ စင်ကာပူသံရုံးမှာ ဘဏ်ဝန်ထမ်းတွေ ဆန္ဒပြတောင်းဆို

ရန်ကုန်မြို့ရှိ တရုတ်သံရုံးရှေ့ ဆန္ဒပြမြင်ကွင်း။ (ဖေဖော်ဝါရီ ၁၁၊ ၂၀၂၁။ ဓာတ်ပုံ-စည်သူနိုင်)

မြန်မာနိုင်ငံအပေါ် စင်ကာပူအနေနဲ့ ငွေကြေးအရွှေ့အပြောင်း လုပ်တာတွေကို မကူညီဖို့ ပုဂ္ဂလိကဘဏ်တွေမှာ အလုပ်လုပ်နေကြသူ ရာနဲ့ချီ စနေနေ့က စင်ကာပူသံရုံးရှေ့သွားပြီး တောင်းဆိုခဲ့ပါတယ်။ မြန်မာနိုင်ငံမှာ အာဏာသိမ်းယူထားတဲ့ စစ်တပ်အကြီးအကဲတွေနဲ့ သူတို့ရဲ့ စီးပွားရေး အကျိုးစီးပွားတွေအပေါ် အမေရိကန်ပြည်ထောင်စုက ပစ်မှတ်ထား ဒဏ်ခတ်ပိတ်ဆို့မှုတွေ လုပ်နေချိန်မှာ စင်ကာပူက အရင်စစ်အစိုးရအတွက် ဘဏ္ဍာရေး အရွှေ့အပြောင်းတွေ ကြားခံဆောင်ရွက်ပေးတာမျိုး မလုပ်ဖို့ တောင်းဆိုနေကြတာပါ။ အပြည့်အစုံကို မစုမြတ်မွန် တင်ပြထားပါတယ်။

မြန်မာနိုင်ငံမှာ အရပ်သားအစိုးရဆီကနေ ကာကွယ်ရေးဦးစီးချုပ် အာဏာသိမ်းယူထားတာကို ကန့်ကွက်တဲ့အနေနဲ့ CDM လှုပ်ရှားမှုမှာ ပါဝင်နေကြတဲ့ ပုဂ္ဂလိကဘဏ်တွေနဲ့ ဘဏ္ဍာရေးလုပ်ငန်းတွေက ဝန်ထမ်းတွေ စင်ကာပူသံရုံးရှေ့မှာ ဖေဖော်ဝါရီ ၁၃ ရက် စနေနေ့မှာ စတင်တောင်းဆို ဆန္ဒပြကြတာပါ။

စင်ကာပူနိုင်ငံရဲ့ ဗဟိုဘဏ်ဖြစ်တဲ့ MAS နဲ့ မြန်မာနိုင်ငံမှာ လိုင်စင်ယူ လုပ်ကိုင်နေတဲ့ United Oversea Bank - UOB ဘဏ်တွေအနေနဲ့ စစ်အာဏာသိမ်းထားတဲ့ မြန်မာနိုင်ငံကို အကူအညီမပေးဖို့ အဓိက တောင်းဆိုကြတာ ဖြစ်ပါတယ်။ အရင် နဝတအစိုးရလက်ထက် မြန်မာနိုင်ငံအပေါ် အမေရိကန်က ဒဏ်ခတ်ပိတ်ဆို့ခဲ့ချိန် ကာလတလျှောက်လုံး စင်ကာပူ ဘဏ္ဍာရေးလုပ်ငန်းတွေက အမေရိကန်ရဲ့ ဘဏ္ဍာရေးဆိုင်ရာ ပိတ်ဆို့မှုတွေကို ရှောင်ရှားပြီး ငွေကြေး Transcation အရွှေ့အပြောင်းတွေ လုပ်ပေးခဲ့တာမို့ အခုတခေါက် မလုပ်အောင် တောင်းဆိုတာဖြစ်တယ်လို့ ဆန္ဒပြသူတွေက ပြောပါတယ်။

မြန်မာစစ်အာဏာပိုင်တွေ ရေရှည်ရပ်တည်ဖို့ ခက်ခဲအောင် စင်ကာပူနိုင်ငံအနေနဲ့ ပြည်သူတွေဘက်က ရပ်တည်ဖို့လိုတယ်လို့ ဆန္ဒပြသူတယောက်ဖြစ်တဲ့ မ GG က ရှင်းပြပါတယ်။ သူကတော့ ပုဂ္ဂလိက ဘဏ်ဝန်ထမ်းဟောင်းတယောက် ဖြစ်သလို နိုင်ငံတကာ ဘဏ္ဍာရေးလုပ်ငန်းတခုမှာ လက်ရှိ အလုပ်လုပ်နေသူ ဖြစ်ပါတယ်။

“ကျမအတွေ့အကြုံအရ သိခဲ့ရတာက ဟိုးအရင်တုန်းကတည်းက၊ ဟိုတုန်းကတော့ စစ်အစိုးရပေါ့လေ၊ အဲဒီတုန်းကတည်းက နိုင်ငံတကာပေးခဲ့တဲ့ Sanction တွေ ရှိခဲ့တယ်။ အဲဒီ Sanction တွေရှိခဲ့တဲ့ အချိန်ကတည်းက အခုချိန်ထိ ရုပ်မပျက်ဘူး၊ အေးအေးဆေးဆေး သူတို့ ရှေ့ဆက်နိုင်ခဲ့တယ်။ သူတို့ အဲဒီလို ရှေ့ဆက်နိုင်ဖို့ အတွက်ကို အထောက်အပံ့၊ အကူအညီပေါ့နော်၊ ဒီ International Transaction တွေကို အဓိက ကူညီအားပေးနေတာတော့ UOB ဘဏ် ဆိုတာကို သိရတယ်။ OCBC တို့ DBS တို့လည်း ပါတယ်။ UOB ကတော့ အများဆုံးပေါ့။ အဓိကပြောရမယ်ဆိုရင် ၂၆ နှစ်ရှိပြီပေါ့၊ တောက်လျှောက် ကူညီပေးနေတယ် ဆိုတဲ့ဟာလေးကိုတော့ ကျမတို့ သိရတယ်။ ဆိုတော့ ပြီးခဲ့တာပြီးပြီ။ အခုဆိုရင် သူတို့တွေ ထပ်ပြီး အာဏာသိမ်းတယ်။ ငွေရေးကြေးရေး အခက်အခဲတွေ ရှိနေတာကို သိတယ်။ အဲတော့ ကျမတို့ ပြည်သူတွေအနေနဲ့ လက်မခံနိုင်ဘူးလေ။ အဲတော့ သူတို့ ဒီလိုဖြစ်နေတဲ့အချိန်မှာ ဘဏ်တွေက ထပ်ပြီးတော့ လက်ရှိ အာဏာသိမ်း စစ်အစိုးရကို မကူညီနိုင်ဘူးလို့ ကျမတို့ မပြောရဲတဲ့အတွက် သူတို့ကို ဒီအစိုးရကို ထပ်ပြီးတော့ အကူအညီမပေးဖို့ ဆန္ဒသွားပြတာပေါ့လေ။”

မစုမြတ်မွန် - စောစောက အမလည်းပြောပါတယ်။ လွန်ခဲ့တဲ့ နဝတစစ်အစိုးရလက်ထက် တလျှောက်လုံးပေါ့လေ၊ အမေရိကန်ဘက်က Sanction တွေ ချထားတဲ့အချိန်မှာ စင်ကာပူဘက်က ဘဏ္ဍာရေး အရွှေ့အပြောင်းတွေ အပြောင်းအလဲတွေ Transaction တွေလုပ်တယ်၊ တဆင့်ခံလုပ်တယ်။ ဆိုတော့ ဘယ်လိုမျိုးလုပ်သလဲဆိုတာ အမကိုယ်တိုင်လည်း ဘဏ်မှာ အနီးကပ်လုပ်ခဲ့ဖူးတဲ့ လူတယောက်အနေနဲ့ နည်းနည်းရှင်းပြပါလား။

မGG - “အမျိုးမျိုးရှောင်ပြီး တိမ်းပြီးတော့ Cooperate အကောင့်တွေ၊ ကုမ္ပဏီအကောင့်ပေါ့လေ၊ ကုမ္ပဏီအကောင့်ကလည်း တခုတည်းလည်း မဟုတ်ဘဲနဲ့ အမည်ပြောင်းပြီးတော့ လုပ်ပေးတယ်။ စစ်အာဏာရှင် အစိုးရကို အကောင့်ပြောင်းတွေပေါ့ တမျိုးတမျိုး ပြောင်းလဲပြီးတော့ သူတို့လုပ်ပေးတယ်။ ပြီးတော့ Personal အကောင့်တွေလည်း လုပ်ပြီးတော့ ငွေအလဲအလှယ် Transaction တွေ လုပ်ပေးခဲ့တယ်။ အခုလည်း သူတို့တွေက Personal အကောင့်တွေနဲ့ Transaction တွေလုပ်မယ်လို့ သိရတယ်။ အဲဒီလို သိရတဲ့အတွက် အဲဒါတွေ မလုပ်စေချင်လို့ မလုပ်ပေးဖို့အတွက်ကို အမတို့က အကူအညီတောင်းတာပါ။”

မစုမြတ်မွန် - မြန်မာနိုင်ငံကနေ ငွေကြေး အရွှေ့အပြောင်းတွေ အထုတ်အသွင်းတွေ လုပ်တဲ့ဟာကို စင်ကာပူဘဏ်တွေကနေတဆင့် သွားတယ်ဆိုတော့ အဲဒီဟာတွေကိုရော အမတို့အနေနဲ့ ဘယ်လိုမျိုး စောင့်ကြည့်ပြီးတော့ ဒါတွေကို မလုပ်ပေးနဲ့ဆိုပြီးတော့ စင်ကာပူဘဏ်တွေဘက်ကို တောင်းဆိုလို့ ရနိုင်မလဲရှင့်။

မGG - “အမတို့မှာ အတိအကျပြောမယ်ဆိုရင် Confidential ဆိုတော့ အမတို့မှာ စာရွက်အထောက်အထား Document အထောက်အထားတော့ မရှိဘူးပေါ့။ ဒါပေမယ့် ဒီဘဏ်မှာလည်း လုပ်ခဲ့တယ်၊ Closely လုပ်ခဲ့တဲ့အခါမှာ အဲဒါတွေကို သိနေတဲ့အခါကြတော့ အခုချိန်မှာ အထူးသဖြင့် ထပ်မလုပ်ဖို့ မြန်မာဘဏ်တွေက တဆင့် သူတို့ International Transaction တွေ လုပ်တဲ့ဟာကို အခုလောလောဆယ် မလုပ်ဘဲနဲ့ လုံးဝရပ်ထားဖို့ ကျမတို့ ပြည်သူတွေနဲ့ပဲ ပူးပေါင်း ပါဝင်ပေးဖို့ အဓိက တောင်းဆိုတာ အဲဒါပါပဲ။ ပြီးတော့ Channel News Asia သူတို့ကလည်း သတင်းတွေကိုတော့ ဖော်ပြတယ်။ သူတို့ရဲ့ သတင်းတွေကို ကြည့်လိုက်တိုင်း တကယ်တော့ တကွက်နှစ်ကွက်လေးပဲ ပုံမှန်သတင်းလောက်ပဲ ပြသွားပြီးတော့ တကယ့်ကို မြေပြင်မှာဖြစ်နေတဲ့ အနေအထားတွေ တကယ့်ကို တကမ္ဘာလုံးသိနေတဲ့ဟာကို သူတို့က သေသေချာချာ မပြဘူးပေါ့နော်။ သူတို့သည် အိမ်နီးချင်းနိုင်ငံ အာဆီယံနိုင်ငံလည်း ဖြစ်တယ်။ အာဆီယံမှာ စင်ကာပူက နံပါတ်တစ်ပဲလေ။ သူတို့အနေနဲ့ Support ပေးခဲ့မယ်ဆိုရင် အမတို့အနေနဲ့ အားအများကြီး ရှိမှာပေါ့။ ဒါပေမယ့် သူတို့က အမတို့ပြည်သူတွေကို Support မပေးဘဲနဲ့ ဒီစစ်အစိုးရကို Support ပေးမယ်ဟေ့ဆိုရင် အဲဒါကို အမတို့ လက်မခံနိုင်ဘူးပေါ့။ အဲဒါကြောင့် သွားပြီးတော့ အကူအညီ တောင်းတာပါ။ ဆန္ဒပြတယ်လို့လည်း အမ တကယ်တော့ မသုံးချင်ပါဘူး။”

စစ်အာဏာသိမ်းခံထားရတဲ့ မြန်မာနိုင်ငံမှာ ကမ္ဘောဇဘဏ်ကလွဲလို့ ကျန်တဲ့ ပုဂ္ဂလိကဘဏ်လုပ်ငန်းတွေ အားလုံး လောလောဆယ် CDM လှုပ်ရှားမှုမှာ ပါဝင်နေကြတယ်လို့လည်း မ GG က ပြောပါတယ်။ မြန်မာနိုင်ငံ ဗဟိုဘဏ်ဝန်ထမ်းတွေ CDM မှာ ပါဝင်လာဖို့လည်း သူတို့က တောင်းဆိုနေကြပါတယ်။

စုမြတ်မွန်/ VOA Burmese

https://burmese.voanews.com/a/protests-singapore-embassy-in-yangon/5777656.html