မြန်မာအထည်ချုပ်အလုပ်သမားတွေကို EU ကပ်ဘေးအထောက်အပံ့ဆက်ပေးမည်

အထည်ချုပ် စက်ရုံ တခုရဲ့ မြင်ကွင်း။ (ဓာတ်ပုံ - European Union Myanmar Facebook - ဇူလိုင် ၀၄၊ ၂၀၂၀)

ကိုဗစ်ကပ်ရောဂါကာလ မြန်မာနိုင်ငံမှာ အခက်အခဲကြုံနေရတဲ့ အထည်ချုပ်လုပ်ငန်းက အလုပ်သမားတွေကို ဥရောပသမဂ္ဂ EU က ဒီနှစ်မှာ ယူရိုငွေ ၅,၀၀၀,၀၀၀ ဆက်လက် ထောက်ပံ့မယ့်အကြောင်း တင်ဆက်ပေးမှာပါ။ ဗွီအိုအေမြန်မာပိုင်းသတင်းထောက် ကိုဇော်ထက်က သတင်းပေးပို့ထားပါတယ်။

မြန်မာနိုင်ငံက အထည်အလိပ်နဲ့ အထည်ချုပ်ကဏ္ဍက လိုအပ်ချက်ရှိနေတဲ့ လုပ်သားတွေကို EU က ဒီနှစ် ၂၀၂၁ ခုနှစ်မှာ မြန်မာကျပ်ငွေ ၈ ဘီလီယံ တန်ဖိုးရှိတဲ့ ယူရိုငွေ ၅,၀၀၀,၀၀၀ ထပ်မံထောက်ပံ့သွားမှာဖြစ်ကြောင်း စီမံကိန်းတာဝန်ရှိသူတွေက ပြောပါတယ်။ ပြီးခဲ့တဲ့ ၂၀၂၀ ပြည့်နှစ်မှာ ယူရိုငွေ ၅,၀၀၀,၀၀၀ ထောက်ပံ့ခဲ့ပြီးနောက် ဒီနှစ်မှာလည်း ဆက်လက် ထောက်ပံ့သွားဖို့ စီစဉ်နေတာလို့လည်း EU ရဲ့ “မြန်ကူ” လို့ အမည်ပေးထားတဲ့ အကူအညီပေးရေး အစီအစဉ်က Project Manager ဒေါ်စုမွန်က ပြောပါတယ်။

“မြန်ကူ က EU က ၂၀၂၁ အတွက် ထပ်ပြီးတော့ ယူရိုငွေ ၅,၀၀၀,၀၀၀ ဆက်လက်ပြီးတော့ ကူညီဆောင်ရွက် ပေးသွားမယ်ပေါ့။ partnet အဖွဲ့အစည်းတွေနဲ့ ပူးပေါင်းပြီးတော့။ ဒီနှစ်မှာ လူမှုဖူလုံရေး အဖွဲ့အစည်းတွေနဲ့ ထပ်မံပြီးတော့ ပူးပေါင်းပြီးတော့ ဆွေးနွေးမှုတွေ လုပ်ပြီးတော့ စာရင်းသွင်းချင်တဲ့ အဖွဲ့အစည်းမှာ စာရင်းသွင်းချင်တဲ့ စက်ရုံတွေ၊ အသေးစား၊ အလတ်စားပေါ့နော်။ ဒီစက်ရုံတွေနဲ့ စက်ရုံအလုပ်သမားတွေ အတွက်ကိုလည်း “မြန်ကူ” က စာရင်းသွင်းတဲ့နေရာမှာ အဆင်ပြေဖို့အတွက်ကို ထောက်ပံ့ကြေးပေးတာမျိုးကို ဆက်လက်ပြီးတော့ ဆောင်ရွက်သွားမှာပါ။ ဒါ အစိုးရအဖွဲ့နဲ့ ပူးပေါင်း ဆောက်ရွက်မယ့် ထပ်မံပြီးတော့လုပ်ဆောင်မယ့် ကိစ္စတခုပါပဲ။”

မြန်မာနိုင်ငံမှာ ကိုဗစ်ကပ်ရောဂါ ကြုံခဲ့ရပြီးနောက် ပြီးခဲ့တဲ့နှစ် မေကလစပြီး အထည်ချုပ်၊ အထည်အလိပ်၊ အိပ်နဲ့ ဖိနပ်ထုတ်လုပ်ရေး ကဏ္ဍတွေက ကိုယ်ဝန်ဆောင် အမျိုးသမီး ၉၀၀ လောက် အပါအဝင် အလုပ်အကိုင် အခက်အခဲကြံုနေရတဲ့ အလုပ်သမား ၆၀,၀၀၀ ကျော်အတွက်ယူရိုငွေ ၅,၀၀၀,၀၀၀ သုံးစွဲခဲ့တာပါ။ ဒီတကြိမ် ထောက်ပံ့ငွေကိုလည်း မြန်ကူအဖွဲ့ထံ တိုက်ရိုက် လျှောက်ထားနိုင်သလို မိတ်ဖက် အလုပ်သမားသမဂ္ဂတွေကနေ တဆင့်လည်း လျှောက်ထားနိုင်ကြောင်း စီမံကိန်းတာဝန်ရှိသူ ဒေါ်စုမွန်က ပြောပါတယ်။

ကိုဗစ်ကပ်ရောဂါကာလမှာ အထည်ချုပ်လုပ်သား အများစုအပါအဝင် စက်မှုဇုန်တွေက လုပ်သား ၁၀၀,၀၀၀ ကျော် အလုပ်ကနေ ယာယီရပ်နားခံထားရကြောင်း အစိုးရရဲ့ တရားဝင်စာရင်းတွေက ဖော်ပြထားပြီး အလုပ်သမားသမဂ္ဂတွေကတော့ လက်တွေ့မှာ ဒီထက်ပိုများလိမ့်မယ်လို့ ခန့်မှန်းထားပါတယ်။

အထည်ချုပ်လုပ်သားတွေ အပါအဝင် ကပ်ရောဂါကာလ အခက်အခဲ ကြုံရတဲ့ အလုပ်သမားတွေအတွက် အလုပ်အကိုင် အခွင့်အလမ်းတွေ ဖန်တီးနိုင်ဖို့ လိုအပ်ချက်တွေ ရှိနေတယ်လို့လည်း မြန်မာနိုင်ငံလုံးဆိုင်ရာ အလုပ်သမားများအဖွဲ့ချုပ် CTUM ရဲ့ ဥက္ကဋ္ဌ ဦးမောင်မောင်က ပြောပါတယ်။

“အထူးသဖြင့် အထည်ချုပ်လုပ်ငန်းပေါ့ ကျနော်တို့ ရန်ကုန်မှာမြင်နေရတဲ့ အထည်ချုပ်လုပ်ငန်းတွေ ကျနော်တို့ လှိုင်သာယာ၊ မင်္ဂလာဒုံ၊ ရွှေပြည်သာ ဆိုတဲ့နေရာတွေမှာ ရှိတာကတော့ တော်တော်လေး သက်ရောက်မှု ရှိပါတယ်။ အများစုသည် မြန်မာနိုင်ငံအတွင်းမှာ ရွှေ့ပြောင်းလာပြီး အလုပ်လုပ်တဲ့သူတွေ ဖြစ်တော့ ဒီလူငယ်တွေဟာ သူတို့မိဘတွေ ပါလာတာလည်းရှိတယ်။ အဲဒီတော့ လုပ်ငန်းမလုပ်ရတဲ့အချိန်မှာ ပံ့ပိုးမှု အနည်းငယ် ရရှိသော်လည်း သူတို့အနေနဲ့ ဒါကိုဆက်လက်ပြီးတော့ လည်ပတ်ဖို့ဆိုတာက မျှော်လင့်ချက် တော်တော်နည်းနေတယ်။ ဒါကြောင့်မို့ ကျနော်အလုပ်အကိုင် ပြန်လည်ရရှိရေး ဆိုတဲ့နေရာမှာ အလုပ်အကိုင်ကိုလည်း ပြောင်းလုပ်ဖို့ဆိုတာကို လိုတယ်ဆိုတဲ့ကိစ္စကတော့ ပထမဦးဆုံး ဖြေချင်ပါတယ်။”

မြန်မာနိုင်ငံရဲ့ အထည်ချုပ်လုပ်ငန်းတွေမှာ အမျိုးသမီးအများစု လုပ်ကိုင်နေပြီး အရေအတွက်အားဖြင့်တော့ ၇၀၀,၀၀၀ လောက်ရှိပါတယ်။

ကိုဗစ်ကပ်ရောဂါကြောင့် စီးပွားရေး အသုံးစရိတ်နည်းအောင် ယှဉ်ပြိုင်လာမယ့် အန္တရာယ်ကြောင့် အာရှက အထည်ချုပ်လုပ်သား သန်းပေါင်းများစွာ ဝင်ငွေပိုနိမ့်ကျပြီး အမျိုးသမီးတွေ ပိုအခက်အခဲကြုံနိုင်တယ်လို့ နိုင်ငံတကာအလုပ်သမားအဖွဲ့ ILO က ပြီးခဲ့တဲ့ အောက်တိုဘာလက ထုတ်ပြန်တဲ့ အစီရင်ခံစာမှာ သတိပေးထားပါတယ်။ အလုပ်လက်မဲ့ဖြစ်သွားတဲ့ ကမ္ဘာ့လုပ်သားထုရဲ့ ၄၀ ရာခိုင်နှုန်းဟာ အလုပ်ခွင် ပြန်မဝင်နိုင်ကြသေးသလို၊ ပြန်ဝင်ခွင့်ရမယ်ဆိုရင်တောင်မှ အခွင့်အရေးတွေ ဆုံးရှုံးမယ့်အန္တရာယ် ရှိနေတယ်လို့လည်း အစီရင်ခံစာမှာ ဖော်ပြထားပါတယ်။ 


ဇော်ထက်/VOA (Burmese)

https://burmese.voanews.com/a/myanmar-eu-aid-germant-factory-assistance/5743100.html

မြန်မာအထည်ချုပ်အလုပ်သမားတွေကို EU ကပ်ဘေးအထောက်အပံ့ဆက်ပေးမည် မြန်မာအထည်ချုပ်အလုပ်သမားတွေကို EU ကပ်ဘေးအထောက်အပံ့ဆက်ပေးမည် Reviewed by THITHTOOLWIN on 22:42 Rating: 5

No comments:

Powered by Blogger.