တောင်ပိုင်းကယ်လီဖိုးနီးယားမှာ မျိုးဗီဇပြောင်းကိုဗစ်ပိုး ကူးစက်မှုဖြစ်နေ

ကယ်လီဖိုးနီးယားပြည်နယ် Los Angeles မြို့မှာ ကိုဗစ်ရောဂါ စစ်ဆေးဖို့ တန်းစီနေတဲ့ လူတချို့။ (ဒီဇင်ဘာ ၀၇၊ ၂၀၂၀)

အမေရိကန်ပြည်ထောင်စုမှာ ကူးစက်မှု အမြင့်မားဆုံးဖြစ်နေတဲ့ ကယ်လီဖိုးနီးယားတောင်ပိုင်းမှာ ကူးစက်မြန်မျိုးဗီဇပြောင်း ကိုရိုနာဗိုင်းရပ်စ်ပိုးသစ်တမျိုး တွေ့ရှိတယ်လို့ ဆေးသုတေသန ပညာရှင်တွေကပြောဆိုလိုက်ပါတယ်။ Los Angeles ဆေးရုံက ပိုးတွေ့လူနာပေါင်း ၁၉၂ ယောက်ရဲ့ နမူနာတွေနဲ့ တောင်ပိုင်းကယ်လီဖိုးနီးယားမှာ ပြီးခဲ့တဲ့ နိုဝင်ဘာနဲ့ ဒီဇင်ဘာလမှာဖြစ်ပွားခဲ့တဲ့ ပိုးတွေ့နမူနာပေါင်း ၄,၀၀၀ ကျော်ကို စမ်းသပ်စစ်ဆေးပြီးတဲ့နောက်မှာ တွေ့ရှိတာလို့ အမေရိကန်မှာ အကြီးဆုံး ဆေးပညာဆိုင်ရာ စင်တာတခုဖြစ်တဲ့ Cedars-Sinai က ထုတ်ပြန်လိုက်တာပါ။

ဒီဗီဇပြောင်း ပိုးမျိုးစိတ်သစ်ကို Los Angeles က နမူနာ ၃၅ ရာခိုင်နှုန်းမှာ တွေ့ရှိသလို ဒေသတခုလုံးအတိုင်းအတာနဲ့ နမူနာတွေထဲက ၂၄ ရာခိုင်နှုန်းမှာ တွေ့ရှိတာဖြစ်ပါတယ်။ ဒီလေ့လာတွေ့ရှိချက်ကို ထုတ်ပြန်သူတွေရဲ့အဆိုအရ ဒီအသွင်ပြောင်းပိုး မျိုးဗီဇသစ်ဟာ ပြီးခဲ့တဲ့ ဇူလိုင်လတုန်းက ပိုးတွေ့ရှိမှု တခုမှာကတည်းက စတင်တွေ့ရှိခဲ့တာဖြစ်ပေမဲ့ အောက်တိုဘာလအထိတော့ တောင်ကယ်လီဖိုးနီးယားမှာ ထပ်မတွေ့ခဲ့ပါဘူး။ သုတေသီတွေက “CAL.20C” လို့ အမည်ပေးထားတဲ့ ဒီပိုးမျိုးစိတ်သစ် ပေါ်လာချိန်နဲ့ တောင်ပိုင်းကယ်လီဖိုနီးယားမှာ ဒီနှစ်လအတွင်း ကိုဗစ်ကူးစက်မှုတွေ တိုးလာချိန်ကလည်း တိုက်ဆိုင်နေပါတယ်။

အမေရိကန်ပြည်ထောင်စုမှာ ရှာဖွေတွေ့ရှိခဲ့တဲ့ ဗြိတိန်မှာဖြစ်ပွားနေတဲ့ အသွင်ပြောင်းဗိုင်းရပ်စ်လို ပိုးမျိုးစိတ်ဗီဇသစ်ဟာ တခြားတွေ့ရှိနေတဲ့ မျိုးဗီဇသစ်လိုမျိုး သေဆုံးမှုနှုန်းတော့မများနိုင်ပေမဲ့ ခပ်မြန်မြန်ကူးစက်မှုနှုန်း မြင့်မားနိုင်ခြေ ရှိတယ်လို့ Cedars-Sinai ဆေးသုတေသနစင်တာက ပြောပါတယ်။ အခုတွေ့ရှိတဲ့ ဒီကိုရိုနာဗိုင်းရပ်စ်ပျိုး မျိုးဗီဇသစ်ဟာ တောင်ကယ်လီဖိုးနီးယား၊ နယူးယောက်နဲ့ ဝါရှင်တန်ဒီစီမြို့တော်မှာလည်း တွေ့ရှိတယ်လို့ ဆေးသုတေသနပညာရှင်တွေကပြောပါတယ်။ လွန်ခဲ့တဲ့ ၂လလောက်တုန်းက တရက်ကို ပိုးတွေ့လူနာ ၃,၀၀၀ ဝန်းကျင်ရှိခဲ့တဲ့ Los Angeles County မှာ ပြီးခဲ့တဲ့သီတင်းပတ်တုန်းအတွင်း တရက်တည်းမှာကို ပိုးတွေ့လူနာပေါင်း ၁၃,၀၀၀ ကျော် အထိဖြစ်ပွားနေပြီဖြစ်ပါတယ်။ အခုဆိုရင်တော့ အမေရိကန်ပြည်ထောင်စုအတွင်း ကိုဗစ်ကူးစက်သူရော၊ ကိုဗစ်ကြောင့် သေဆုံးသူရော အရေအတွက် တိုးလာနေပြီး ကပ်ရောဂါကာလအတွင်း အဆိုးဆုံးအချိန်ကို ရောက်နေပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/cali-covid-los-angeles/5743088.html

တောင်ပိုင်းကယ်လီဖိုးနီးယားမှာ မျိုးဗီဇပြောင်းကိုဗစ်ပိုး ကူးစက်မှုဖြစ်နေ တောင်ပိုင်းကယ်လီဖိုးနီးယားမှာ မျိုးဗီဇပြောင်းကိုဗစ်ပိုး ကူးစက်မှုဖြစ်နေ Reviewed by THITHTOOLWIN on 23:23 Rating: 5

No comments:

Powered by Blogger.