မလေးရှားရောက် မြန်မာထိန်းသိမ်းခံ ၁၀၀ ကျော် ၂နိုင်ငံ ကုန်သည်ကြီးများက ဌာနေပြန်ပို့

ထိန်းသိမ်းရေးစခန်းကနေ နေရပ်ပြန်ပို့ခံရတဲ့မြန်မာများ ( မြန်မာလူမူ့ကူူညီရေးအသင်း (မလေးရှား)

ကိုဗစ်ကပ်ဘေးကာလ မလေးရှားနိုင်ငံမှာ ထိန်းသိမ်းခံထားရတဲ့ မြန်မာအကျဉ်းသား ၁၂၀ကို ဇန်နဝါ၇ီလ ၈ ရက်နေ့ကမြန်မာမလေးရှားကုန်သည်ကြီးများအသင်းကစီစဉ်တဲ့ စင်းလုံးဌားလေယာဉ်နဲ့ မြန်မာပြည်ကို ပြန်ပို့ခဲ့တဲ့အကြောင်း ပြောပြပါမယ်။ ဗွီအိုအေမြန်မာပိုင်းသတင်းထောက် မအေးအေးမာက ပြောပြပေးပါမယ်။

ကိုဗစ်ကပ်ရောဂါကာလ မလေးရှားနိုင်ငံထဲမှာ ထိန်းသိမ်းခံထားရတဲ့ မြန်မာနိုင်ငံသားတွေကို မြန်မာ မလေးရှားကုန်သည်ကြီးများအသင်းအစီစဉ်နဲ့ နေရပ်ပြန်ပို့နေရာမှာ နောက်ထပ်အယောက် ၁၂၀ကို နေရပ်ပြန်ပို့ခဲ့တာပါ။

ဒါဟာ ထိန်းသိမ်းစခန်း ၂ခုက အကျဉ်းကျနေသူတွေကို အစုလိုက် အပြုံလိုက် နေရပ်ပြန်ပို့ခဲ့တာဖြစ်ကြောင်း မလေးရှားနိုင်ငံအခြေစိုက် မြန်မာလူမူကူညီရေးအသင်းဥက္ကဌ ဦးစန်းဝင်းက ပြောပါတယ်။

“မလေးရှားနိုင်ငံမှာအကြောင်း အမျိုးမျိုးကြောင့် အဖမ်းခံရတဲ့လူ ၁၂၀ပါဝင်တယ်။ ၁၂၀ထဲမှာက မြန်မာနိုင်ငံကို အောက်လမ်းကနေ( တရားမဝင်လမ်း)ပြန်သွားတဲ့ ရခိုင်အမျိုးသမီးလေး ကိုယ်ဝန်နဲ့ ပါသွားတယ် ။ ထိန်းသိမ်းစခန်းထဲမှာပဲ ကလေးမီးဖွားတယ် ။ အမွှာလေး ယောက်ကျားလေးတယောက် မိန်းကလေးတယောက်မွေးတယ် ရခိုင်ပြည်နယ်မြောက်ဦးမြို့က လာတဲ့သူပါ။

သံအမတ်ကြီးဦးအောင်စိုးဝင်း၊ ဒုသံအမတ်ကြီးဦးသန်းဌေးတို့ ဦးဆောင်ပြီး ပြန်တဲ့သူတွေကို ကျန်းမာရေးကိစ္စတွေနဲ့ အားပေးစကားလာပြောကြတယ် ။ အလျုရှင်တွေက အဝတ်အစား၊ အသုံးအဆောင်အစားအသောက်တွေလှူဒါန်းပါတယ်။ အမွှာပူးမွေးတဲ့ မိသားစုက ၈ လကျော်၊ တနှစ်လောက်ထောင်ထဲမှာ နေခဲ့ရတယ် နယ်စပ်စခန်းမှာပေါ့ ကျန်တဲ့သူတွေကတော့ တနှစ်ကျော် နေတဲ့သူကျန်တဲ့သူတွေက ၈ လနေတဲ့သူ ၆ လနေတဲ့သူတွေရှိတယ်။”

နေရပ်ပြန်ခွင့်ရသူတွေထဲက တချို့ဟာ မလေးရှားနိုင်ငံကို ထိုင်းနယ်စပ်ကတဆင့် တရားမဝင် ဝင်ရောက်လာသူတွေဖြစ်ကြပြီး ကပ်ရောဂါကာလ အထောက်အထားမဲ့ နေထိုင်သူတွေကို အာဏာပိုင်တွေ စစ်ဆေးရာမှာ ဖမ်းဆီးခံခဲ့ရတာပါ။

မြန်မာနိုင်ငံသားတွေအနေနဲ့ တရားဝင်နေရပ်ပြန်ကြဖို့တရားမဝင်တဲ့ နည်းနဲ့ နေရပ်ပြန်တာတွေ မလုပ်ကြဖို့ ထိန်းသိမ်းစခန်းတွေထဲမှာ ကိုယ်ဝန်ဆောင်အမျိုးသမီးတွေ အခက်အခဲတွေ့ကြုံရတယ် လို့လည်း ဦးစန်းဝင်းက ပြောပြခဲ့ပါတယ်။

ကပ်ရောဂါကာလမှာ မလေးရှားနိုင်ငံက ထိန်းသိမ်းရေးစခန်း ၁၃ ခုမှာရှိတဲ့ မြန်မာတထောင်ကျော်ကို နိုဝင်ဘာကစ နေရပ်ပြန်ခွင့်ပြုခဲ့တာပါ။ အခု နေရပ်ပြန်သူ ၁၂၀ ကတော့ ထိန်းသိမ်းရေးစခန်း ၂ခုက အကျဉ်းကျပြီးလွတ်ရက်စေ့သူတွေဖြစ်ပါတယ်။

ခန့်မှန်းခြေ မြန်မာနိုင်ငံသား ၅ သိန်းခွဲလောက် အလုပ်လုပ်ကိုင်နေတဲ့မလေးရှားမှာ ကိုဗစ်ကပ်ရောဂါ ကာလအတွင်း စားဝတ်နေရေးနဲ့ အလုပ်အကိုင် အခက်အခဲတွေကြောင့့် နေရပ်ပြန်ဖို့မြန်မာသံရုံးမှာ စာရင်းပေးသွင်းထားသူ တသောင်းကျော်ရှိနေပါတယ်။ ဒီလူတွေကို ကယ်ဆယ်ရေးလေယာဉ်တွေနဲ့ ကျန်းမာရေးမကောင်းသူတွေကို ဦးစားပေးပြီးနေရပ်ပြန်ပို့နေတာပါ။

ကိုဗစ်ကပ်ရောဂါကြောင့် သေဆုံးသူ ငါးရာကျော်နဲ့ ကူးစက်သူ တသိန်းနှစ်သောင်း ရှစ်ထောင်ကျော် ရှိနေတဲ့ မလေးရှားနိုင်ငံမှာ ဒီရက်ပိုင်းအတွင်း နောက်ထပ် ကူးစက်မှုတွေကြောင့် သောင်းဂဏန်း လောက် ထိ တိုးလာနေချိန်မှာပဲ မြန်မာနိုင်ငံသားအကျဉ်းသားတွေကို နေရပ်ပြန်ပို့ခဲ့တာပါ။

မအေးအေးမာ/VOA (Burmese)

https://burmese.voanews.com/a/malaysia-myanmar-release-/5730988.html