ဗုဒ္ဓဟူးနေ့တုန်းက အမေရိကန်ပြည်ထောင်စု လွှတ်တော်ထဲ အတင်းဝင်ဖျက်ဆီးကြသူတွေအပေါ် တရားဥပဒေ စိုးမိုးရေးတာဝန်ရှိသူတွေ ရာဇဝတ်မှုဖွင့် စုံစမ်းနေပါပြီ။ အဓိကရုဏ်းထဲပါတဲ့ Trump လိုလားသူ ရာနဲ့ချီရဲ့ စာရင်းကိုထုတ်ပြန်ပြီး ဖော်ထုတ်ဖမ်းဆီးသွားမယ်လို့ ကြာသပတေးနေ့က ကြေညာပါတယ်။ အဓိကရုဏ်းထဲ ပါဝင်သူ ၁၅ ယောက်ကို ဝါရှင်တန်မြို့တော်က ပြည်ထောင်စုတရားရုံးမှာ ကြာသပတေးနေ့က အမှုဖွင့်ထားတယ်လို့ D.C ခရိုင် ယာယီရှေ့နေ Michael Sherwin ကပြောပါတယ်။
နောက်ထပ် အယောက် ၄၀ ကိုလည်း ခရိုင် အထက်တရားရုံးမှာ အမှုဖွင့်ထားပါတယ်။ အများစုက လွှတ်တော်ပုရဝုဏ်ထဲကို တရားမဝင် ဝင်ရောက်မှုနဲ့ဖြစ်တယ်လို့ ရှေ့နေ Sherwin ကပြောပါတယ်။
ပြည်ထောင်စုအမှုတွေနဲ့ တရားစွဲထားတဲ့ထဲမှာ အစိုးရအဆောက်အဦးထဲက ပစ္စည်းတွေ ခိုးယူမှု၊ လက်နက်ဆိုင်ရာ ဥပဒေချိုးဖောက်မှုတို့ ပါဝင်ပါတယ်။ လွှတ်တော် အဆောက်အဦးနားမှာ ဖမ်းမိသူ ၁ ယောက်ကိုတော့ မောင်းပြန်သေနတ်ကိုင်ဆောင်မှု၊ လက်လုပ် လောင်စာဆီဗုံး ၁၁ ခု ပိုင်ဆိုင်မှုတို့နဲ့ ဖမ်းဆီးထားပါတယ်။
တရားဥပဒေချိုးဖောက်ခဲ့သူတွေကို ဥပဒေနဲ့အညီ ဖမ်းဆီးအရေးယူနိုင်ဖို့ လနဲ့ချီ အချိန်ကြာနိုင်ပေမဲ့ အသေအချာ စုံစမ်းအရေးယူသွားမယ်လို့ D.C ခရိုင်ယာယီရှေ့နေက ပြောပါတယ်။ လုံခြုံရေးကင်မရာတွေက ရိုက်ကူးထားတဲ့ ဗီဒီယိုတွေ၊ လူမှုကွန်ယက်ပေါ်တင်တဲ့ ဗီဒီယိုတွေကနေ ဥပဒေချိုးဖောက်ခဲ့သူတွေကို ပိုက်စိတ်တိုက် ရှာဖွေ ဖော်ထုတ်သွားမယ်လို့ ပြောပါတယ်။
ဗွီအိုအေ (မြန်မာပိုင်း)
https://burmese.voanews.com/a/capitol-hill-protest-assault/5729824.html
Reviewed by THITHTOOLWIN
on
18:09
Rating:
No comments:
Post a Comment