မြန်မာနိုင်ငံမှာ ဒီနေ့ ကိုရိုနာဗိုင်းရပ်စ်ပိုး ကူးစက်သူ ၅၉၀ ယောက် ထပ်အတည်ပြုခဲ့တာကြောင့် ကူးစက်သူစုစုပေါင်း ၁၂၆,၉၃၅ ရှိသွားပါပြီ။
ကျန်းမာရေးနဲ့ အားကစားဝန်ကြီးဌာနက ဇန်နဝါရီ ၄ ရက် ညထုတ်ပြန်ချက်အရ၊ ဓာတ်ခွဲနမူနာပေါင်း ၁၆,၉၉၀ ခု စစ်ခဲ့ကာ၊ ပိုးတွေ့နှုန်း ၃.၅% အဖြစ်၊ ၄% အောက်၊ မနေ့ကလွဲလို့၊ အရင်ရက်ပိုင်းတွေလို ဆက်ကျပြီး တန်းနေပါတယ်။
ပြီးခဲ့တဲ့ ၂၄ နာရီအတွင်း COVID-19 ကြောင့် သေဆုံးသူ ၁၆ ယောက်ရှိတာကြောင့်၊ သေဆုံးသူစုစုပေါင်းကလည်း ၂,၇၄၄ ယောက်ရှိလာပြီလို့ ဆိုပါတယ်။
ဒါ့အပြင် ဒီနေ့သေဆုံးသူတွေထဲမှာ ရောဂါအခံရှိတဲ့သူက အများစုအဖြစ် ၁၄ ယောက် ရှိခဲ့တယ်လို့၊ ဒီဝန်ကြီးဌာန ည ၈ နာရီထုတ်ပြန်ချက်ထဲမှာဖော်ပြထားပါတယ်။
မြန်မာနိုင်ငံမှာ ဒီရောဂါစတွေ့ခဲ့တဲ့ မတ်လကနေ အခုထိ ဓာတ်ခွဲနာမူနာပေါင်း ၁,၈၈၄,၀၀၀ ကျော် စစ်ဆေးပြီးခဲ့ပြီး၊ အတည်ပြုလူနာတွေထဲ ပြန်ကျန်းမာလာသူက ၁၁၀,၀၀၀ ကျော်အထိအဖြစ် ၈၇% နီးပါးရှိလာနေပါပြီ။
ဒီကိုဗစ်ပိုးစတွေ့တဲ့ မတ်လကနေ၊ အခု မနေ့ကအထိ စုစုပေါင်းပိုးတွေ့မူကို တိုင်းဒေသကြီးနဲ့ပြည်နယ်အပြင် မြို့လိုက်ပါ ဒီနေ့ည ၇:၄၅ မှာ၊ ထုတ်ပြန်ခဲ့ရာမှာ၊ အများဆုံးဖြစ်တဲ့ ရန်ကုန်တိုင်းမှာ ၈၃,၅၀၀ ကျော်ရှိပါတယ်။
ရန်ကုန်မှာမှ အများဆုံးမြို့နယ်အဖြစ် မင်္ဂလာဒုံက ၅,၈၆၀ ကျော်၊ ဒုတိယအများဆုံး မြောက်ဥက္ကလာမှာ ၅,၇၀၀ ကျော်နဲ့ တတိယအများဆုံး လှိုင်သာယာမှာ ၄,၇၀၀ ကျော်ရှိနေပြီး၊ မကြာခင်က အိမ်မှာနေဖို့အမိန့်ကို၊ ရွာတချို့မှာဖြေလျော့ပေးခဲ့တဲ့ ရန်ကုန်တောင်ပိုင်းမြို့တွေမှာတော့၊ စုစုပေါင်း ကူးစက်သူက ရာဂဏန်းအဆင့်သာ ရှိပါတယ်။
ရန်ကုန်ပြီးလျှင် ဒုတိယအများဆုံးဖြစ်တဲ့ မန္တလေးတိုင်းမှာတော့၊ အခုချိန်ထိ စုစုပေါင်း ကူးစက်သူ ၁၄,၀၉၄ ယောက်ရှိလာပြီး၊ အများဆုံးမြို့နယ်တွေအဖြစ် ချမ်းမြေ့သာဇံ၊ မဟာအောင်မြေနဲ့ အောင်မြေသာဇံမြို့တွေမှာ ၂,၀၀၀ ကျော်ရှိကာ၊ အမရပူရနဲ့ ချမ်းမြေ့သာစည်မှာ ၁,၀၀၀ ကျော်ရှိပြီး၊ ကျန်မြို့နယ်တွေမှာတော စုစုပေါင်း ရာဂဏန်းနဲ့ ဆယ်ဂဏန်းသာရှိနေပါတယ်။
တတိယအများဆုံးဖြစ်ပြီး မကြာခင်ကထောင်တွင်းကူးစက်မှုများခဲ့တဲ့ ပဲခူးမှာတော့၊ အခုအချိန်ထိ စုစုပေါင်း ၈,၀၀၀ နီးပါးမှာ ပိုးတွေ့ထားပြီး၊ အများဆုံးအဖြစ် ပဲခူးမြို့ပေါ်မှာ ၁,၇၉၇ ဦး ရှိပေမဲ့ အခြားမြို့နယ်အားလုံးမှာတော့ ရာဂဏန်းအဆင့်သာရှိနေပါတယ်။
ဗွီအိုအေ (မြန်မာပိုင်း)
https://burmese.voanews.com/a/myanmar-covid-cases/5723867.html
Reviewed by THITHTOOLWIN
on
23:09
Rating:
No comments:
Post a Comment