AA ကို အကြမ်းဖက်အဖွဲ့အစည်းမှ ပယ်ဖျက်ပေးဖို့ ရခိုင်လွှတ်တော်ဆုံးဖြတ်



Share/Bookmark
AA တပ်ဖွဲ့ဝင်တဦး။ (မှတ်တမ်း ဓာတ်ပုံ - arakanarmy website)

ရခိုင်လက်နက်ကိုင် AA အဖွဲ့ကို အကြမ်းဖက်အဖွဲ့အဖြစ် သတ်မှတ်ထားတာကို အစိုးရက ရုပ်သိမ်းပေးရေး အဆိုကို ရခိုင်ပြည်နယ် လွှတ်တော်မှာ ဒီကနေ့ တင်သွင်းရာမှာ တခဲနက် ထောက်ခံခဲ့ကြတဲ့အကြောင်းကို ဗွီအိုအေမြန်မာပိုင်း သတင်းထောက် ကိုနိုင်ကွန်းအိန်က ပြောပြပါမယ်။

AA အဖွဲ့ကို အကြမ်းဖက်အဖွဲ့အစည်းအဖြစ် သတ်မှတ်ထားတာကို ပယ်ဖျက်ပေးဖို့ ရခိုင်ပြည်နယ်အစိုးကတဆင့် ပြည်ထောင်စုအစိုးကို တိုက်တွန်းတဲ့အဆိုကို ဒီကနေ့ ကျင်းပတဲ့ ရခိုင်ပြည်နယ်လွှတ်တော်မှာ တင်သွင်းရာမှာ ကန့်ကွက်သူ မရှိခဲ့ဘူးလို့ ကျောက်တော်မြို့နယ် ပြည်နယ် လွှတ်တော်ကိုယ်စားလှယ် မောင်သန်းစိန်က ပြောပါတယ်။

“ဦးထွန်းသာစိန်က အဆိုတင်လိုက်တဲ့အခါ လွှတ်တော်မှာ တပ်မတော်သားကိုယ်စားလှယ်ရော၊ NLD ကိုယ်စားလှယ်တွေရော တယောက်မှ ကန့်ကွက်တဲ့သူတွေ မရှိပါဘူး။”

အဆိုကို ကန့်ကွက်သူမရှိလို့ လာမယ့် လွှတ်တော်အစည်းအဝေးမှာ ဆွေးနွေးသွားမှာဖြစ်ပြီး ဆွေးနွေးလိုတဲ့ပုဂ္ဂိုလ်တွေ ဇန်နဝါရီ ၁၃ ရက်နေ့မှာ နောက်ဆုံးထား စာရင်းပေးသွင်းရမှာ ဖြစ်ပါတယ်။

မြန်မာတပ်မတော်နဲ့ ရခိုင်လက်နက်ကိုင် AA အဖွဲ့တို့ကြား ပြီးခဲ့တဲ့နှစ်ကုန်ပိုင်းကစ ပစ်ခတ်တိုက်ခိုက်မှု ရပ်စဲနေတာကြောင့် ငြိမ်းချမ်းရေးလုပ်ငန်းစဉ်တွေ တိုးတက်မှုရအောင် အကြမ်းဖက်အဖွဲ့အဖြစ်ကနေ ရုပ်သိမ်းပေးရေးအဆိုကို တင်သွင်းရတာဖြစ်ကြောင်း အဆိုတင်သွင်းသူ ပြည်နယ်လွှတ်တော်ကိုယ်စားလှယ်ဦးထွန်းသာစိန်က ဗွီအိုအေကိုပြောပါတယ်။

“အဆိုတင်ရတာကတော့ဗျာ။ လက်တွေ့မြေပြင်အခြေအနေမှာ တပ်မတော်နဲ့ ULA/AA က အပစ်အခတ်လည်း မရှိတော့ဘူး တိုက်ပွဲလည်း မရှိတော့ဘူး။ ဒါတွေဟာ အမှန်တကယ်မှာ ယာယီအပစ်ခတ်ရပ်စဲထားတဲ့ ဖြစ်ပျက်နေတဲ့ ငြိမ်းချမ်းရေး အလားအလာပဲ ဖြစ်တယ်။ ၂ လတာ ကာလထဲမှာ တပ်မတော်နဲ့ ရခိုင်တပ်တော် AA ကလည်းပဲ နှစ်ကြိမ်။ On Line မှာ တကြိမ်ပေါ့နော်၊ ပန်ဆန်းမှာ တကြိမ်တွေ့ဆုံမှုတွေ ရှိတယ်။ တွေ့ဆုံမှုတွေအရလည်းပဲ ဒီပစ်ခတ်သံတွေတိတ်သွားတယ်။ ဆိုတော့ ဒီနေရာမှာ တဘက်နဲ့ တဘက် တွေ့ဖို့၊ ဆုံဖို့ စကားပြောဖို့အတွက် အဟန့်အတားဖြစ်နေတာကတော့ အကြမ်းဖက်ဆိုတဲ့ ပုဒ်မ၊ အကြမ်းဖက်ဆိုတဲ့ မတရားအသင်းဆိုတဲ့ ကိစ္စတွေပါပဲ။ တကယ်တမ်း ထာဝရငြိမ်းချမ်းရေးကိုလိုလားရင် ထာဝရငြိမ်းချမ်းရေးကို တည်ဆောက်မယ်ဆိုလို့ရှိရင် အကြမ်းဖက်လို့ ထုတ်ပြန်ထားတဲ့ အဖွဲ့အစည်းကိုယ်တိုင်က မိမိရဲ့ ထုတ်ပြန်ချက်ကို ပြန်လည်ရုပ်သိမ်းဖို့လိုတဲ့အတွက် အဲဒီအဆိုကို တင်ရတာဖြစ်ပါတယ်။”

ပြီးခဲ့တဲ့၂၀၂၀ ခုနှစ် မတ်လ ၂၃ ရက်နေ့က မြန်မာအစိုးရကနေ AA ရခိုင်လက်နက်ကိုင်တပ်ဖွဲ့ကို မတရားအသင်းနဲ့ အကြမ်းဖက်အုပ်စုအဖြစ် ကြေငြာထားတာ ဖြစ်ပါတယ်။

ရခိုင်ပြည်နယ်စစ်ရေးပဋိပက္ခကာလအတွင်း ဒေသခံတွေအနေနဲ့ AA အဖွဲ့နဲ့ ဆက်စပ်တယ်ဆိုပြီး အကြမ်းဖက်ဥပဒေနဲ့ ဖမ်းဆီးထိန်းသိမ်း တရားစွဲဆိုခံနေရတာတွေ များပြားနေတာပါ။ ဒီအခြေအနေကို ရခိုင်တိုင်းရင်းသားမျိုးနွယ်များ အစည်းအရုံးအတွင်းရေးမှူး ကိုဇော်ဇော်ထွန်းက အခုလိုပြောပါတယ်။

“အကြမ်းဖက်ဥပဒေ ၅၀ ကကြီး၊ ဂငယ်၊ ဃကြီးတို့နဲ့ပေါ့။ ဒီဟာတွေနဲ့ စွဲဆိုတင်ထားတဲ့သူတွေဘယ်လောက် ရှိပြီး ဘယ်လောက်ပြန်လွှတ်လာတယ်ဆိုတာကိုတော့ ကျနော်တို့ လက်လှန်းမီသလောက်က ၂၄၀ ကျော်ကျော်လောက် ရှိမယ် ထင်ပါတယ်ဗျ။”

စစ်ရေး ပဋိပက္ခကာလအတွင်း AA အဖွဲ့နဲ့ ဆက်စပ်တယ်ဆိုပြီး ဒေသခံတွေ အဖမ်းဆီးခံရတာ တရားစွဲဆိုခံရတာ များပြားပြီး သက်သေမခိုင်လုံလို့ ပြန်လွှတ်ပေးတာတွေလည်း ရှိနေတယ်လို့ ကိုဇော်ဇော်ထွန်းကပြောပါတယ်။

ရခိုင်လက်နက်ကိုင် AA အဖွဲ့ကို အကြမ်းဖက်အဖွဲ့အဖြစ် ရုပ်သိမ်းပေးရေးကိစ္စနဲ့ ပတ်သက်ပြီး တပ်မတော်ဘက်ကတော့ ငြိမ်းချမ်းရေးလုပ်ဆောင်ချက်အပေါ် မူတည်ပြီး ပယ်ဖျက်သွားတဲ့ သာဓကရှိခဲ့တယ်လို့ ဗိုလ်ချုပ်ဇော်မင်းထွန်းက တပ်မတော် သတင်းစာရှင်းလင်းပွဲမှာပြောဆိုခဲ့ပါတယ်။

ရခိုင်ပြည်နယ်မှာ ရွေးကောက်ပွဲ ကျင်းပနိုင်မယ့် အခြေအနေတွေ ဖန်တီးဖို့ AA ရခိုင်လက်နက်ကိုင်အဖွဲ့ရဲ့ ကမ်းလှမ်းချက်ကို တပ်မတော်က လက်ခံခဲ့ပြီးနောက်ပိုင်း ရခိုင်ပြည်နယ်မှာ တိုက်ပွဲတွေ ရပ်ဆိုင်းနေတာ ၂ လလောက်ရှိနေပြီဖြစ်ပါတယ်။

စစ်ပွဲကာလအတွင်း နေရပ်ကနေ တိမ်းရှောင်လာကြတဲ့ စစ်ရှောင်တွေအနက်က ၈၀,၀၀၀ လောက်နေရပ်ပြန်နေကြပြီး ၁၀၀,၀၀၀ လောက် လုံခြုံရေးအခြေအနေအရ နေရပ်မပြန်နိုင်သေးဘူးလို့လည်း ပြီးခဲ့တဲ့သောကြာနေ့က နေပြည်တော် သတင်းစာရှင်းလင်းပွဲမှာ သမ္မတရုံး ပြောခွင့်ရဦးဇော်ဌေးက ပြောဆိုခဲ့ပါတယ်။ 


ကိုနိုင်ကွန်းအိန်/VOA (Burmese)

https://burmese.voanews.com/a/aa-rakhine/5732690.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ