တပ်မတော်ထောက်ခံပွဲတွေ ရန်ကုန်မှာ ဆက်တိုက်လုပ်လာ၊

ဇန်နဝါရီလ ၃၀ ရက်နေ့ တပ်မတော်ထောက်ခံပွဲ

ရန်ကုန်မြို့ရွေတိဂုံဘုရားအရှေ့ဘက်မုခ်က ကြေးသွန်းဘုရားရှေ့မှာ တပ်မတော်ထောက်ခံပွဲ ရွေးကောက်ပွဲကော်မရှင် UEC နဲ့ ပြည်ပဝင်ရောက်စွက်ဖက်မှု ကန့်ကွက်ပွဲတွေကို သုံးရက်မြောက်နေ့ အဖြစ် ဇန်နဝါရီလ ၃၁ ရက်နေ့မှာ ဆက်ပြီး ပြုလုပ်ခဲ့ကြပါတယ်။

ဒီပွဲကို လာရောက်သတင်းယူမယ့် သတင်းထောက်အချို့ကို ခြိမ်းခြောက်ပြောဆိုမှုတွေရှိခဲ့ပေမယ့် ဒီနေ့မှာ သတင်းထောက်တွေ တိုက်ခိုက်ခံရတာ မရှိဘူးလို့ ရန်ကုန်အခြေစိုက် 7 day news သတင်းစာက အယ်ဒီတာတစ်ဦးက ဘီဘီစီကို ပြောပါတယ်။

ဇန်နဝါရီလ ၃၁ ရက်နေ့ ညနေပိုင်းက ကြွေးကြော်သံတွေနဲ့ ကြေးသွန်းဘုရားဘက်ကို ချီတက်လာတဲ့လူအုပ်ထဲက လူအချို့ဟာ ရွှေဂုံတိုင် လမ်းဆုံအနီးက အိမ်ရှေ့မှာချိတ်ထားတဲ့ NLD ပါတီအလံလို့ ယူဆရတဲ့ အလံတစ်ခုကို လုယူသွားပြီး မီးရှို့ကာထွက်ပြေးသွားခဲ့တဲ့ ဗီဒီယိုဖိုင်တစ်ခု လူမှုကွန်ရက်မှာ ပျံ့နှံ့နေပြီး ကိုယ်တွေ့ကြုံတဲ့ သတင်းထောက်တွေက လည်းဘီဘီစီကို ဒီလိုဖြစ်ခဲ့တာ မှန်ကန်ကြောင်း အတည်ပြုပါတယ်။

ပြီးခဲ့တဲ့ ဇန်နဝါရီလ ၃၀ ရက်နေ့က ဗဟန်းမြို့နယ် ကြေးသွန်းဘုရားအနီးမှာ တပ်မတော်ထောက်ခံပွဲနဲ့ UEC နဲ့ ပြည်ပစွက်ဖက်မှုတွေကို ကန့်ကွက်ပွဲမှာ ဆန္ဒပြသူတွေနဲ့ လမ်းသွားလမ်းလာအချို့အကြား ရုန်းရင်းဆန်ခတ် ဖြစ်ပွားခဲ့ပြီး လမ်းသွားလမ်းလာ အချို့ ရိုက်နှက်ခံရလို့ ဒဏ်ရာရသွားခဲ့ပါတယ်။ ဒါ့အပြင် သတင်းရယူနေတဲ့ သတင်းထောက်အချို့လည်း ရန်ပြုခံရတာတွေ ရှိခဲ့ပါတယ်။

ဇန်နဝါရီ ၃၀ ရက်နေ့ဆန္ဒပြသူတွေနဲ့ လမ်းသွားလမ်းလာအချို့အကြား ရုန်းရင်းဆန်ခတ်ဖြစ်ပွားခဲ့ပြီး လမ်းသွားလမ်းလာ အချို့ရိုက်နှက်ခံရလို့ ဒဏ်ရာရသွားခဲ့

တပ်မတော်ထောက်ခံပွဲတွေ အခုလို ဆက်တိုက်လုပ်နေသလို ၂၀၂၀ အထွေထွေရွေးကောက်ပွဲမှာ မဲရလဒ်၈၀ ရာခိုင်နှုန်းကျော်နဲ့ အနိုင်ရှိခဲ့တဲ့ အမျိုးသားဒီမိုကရေစီအဖွဲ့ချုပ် (NLD) ပါတီက ဖွဲ့စည်းမယ့် အစိုးရအဖွဲ့ကို ထောက်ခံကြောင်း ဗီနိုင်း ပိုစတာတွေကို ရန်ကုန်မြို့က နေအိမ်အချို့နဲ လမ်းအချို့မှာ ထောက်ခံသူတွေက ချိတ်ဆွဲတာတွေကိုလည်း တွေ့လာရပါတယ်။

မြန်မာ့တပ်မတော်ကို ထောက်ခံကြောင်းကို လူအုပ်စုများနဲ့ ရန်ကုန်မြို့မှာ ခပ်စိပ်စိပ် ဆန္ဒပြကြသလို ဇန်နဝါရီလ ၃၁ ရက်နေ့မှာလည်း အစိုးရအသစ်ကို ထောက်ခံကြောင်း ပိုစတာတွေသာမက နေအိမ်များပါ NLD ပါတီအလံတွေ ချိတ်ဆွဲလာကြတာကို တွေ့ရတာဖြစ်ပါတယ်။

ပြီးခဲ့တဲ့၂၀၂၀ ရွေးကောက်ပွဲမှာ မသမာမှုဖြစ်နိုင်တဲ့ မဲစာရင်းစုစုပေါင်း ၁၀ သန်းကျော် ရှိနိုင်တယ်ဆိုပြီး တပ်မတော်ရဲ့ ထုတ်ပြန်ချက်အပေါ်အခြေပြုကာ ပြည်ထောင်စုရွေးကောက်ပွဲကော်မရှင်က ပြန်လည် ဖြေရှင်းပေးဖို့ တပ်ဘက်က တောင်းဆိုနေသလို အမျိုးသားရေးလှုပ်ရှားသူတွေကလည်း တပ်ထောက်ခံပွဲတွေလုပ်ပြီး တောင်းဆိုနေကြတာဖြစ်ပါတယ်။

ပြီးခဲ့တဲ့ ဇန်နဝါရီလ၂၆ ရက် နေ့က အမျိုးသားကဇာတ်ရုံအနီးမှာ ပြုလုပ်တဲ့ တပ်ထောက်ခံပွဲ ဆန္ဒထုတ်ဖော်ပွဲမှာ ရဲတပ်ဖွဲ့နဲ့ ရုန်းရင်းဆန်ခတ်ဖြစ်ခဲ့ပြီး ဆန္ဒထုတ်ဖော်သူတွေဘက်က တိုက်ခိုက်တာတွေ၊ ခဲနဲ့ပေါက်တာတွေကြောင့် ရဲတပ်ဖွဲ့ဝင်အချို့ ဒဏ်ရာရခဲ့ပါတယ်။

အစိုးရအသစ်ကိုထောက်ခံကြောင်း ပိုစတာချိတ်ဆွဲသူတစ်ဦး

ဇန်နဝါရီ ၃၀ ရက်နေ့က သတင်းထောက်တွေနဲ့ ရပ်ကွက်နေပြည်သူတွေ တိုက်ခိုက်ခံရတာနဲ့ ကိုဗစ်ကာလ လူစုလူဝေးနဲ့ ဆန္ဒပြတာတွေကို ရဲတပ်ဖွဲ့ဘက်ကတာဆီးပေးတာ အရေးယူတာမျိုးတွေ မတွေ့ရကြောင်းနဲ့ ဆန္ဒပြပွဲ အပြီမှာ ရဲကားတွေရောက်လာတာ တွေ့ရကြောင်း ရန်ကုန်အခြေစိုက် သတင်းထောက်တွေကတစ်ဆင့် သိရပါတယ်။

ရန်ကုန်မှာ ဇန်နဝါရီ ၃၀ ရက်နေ့က အမျိုးသားရေးလှုပ်ရှားသူတွေဦးဆောင်တဲ့ ဆန္ဒပြပွဲမှာတော့ ဆန္ဒပြသူအချို့ရဲ့ ရိုက်နှက်မှုကြောင့် အမျိုးသား နှစ်ဦး ထိခိုက်ဒဏ်ရာရပြီး ဆေးကုသမှုခံခဲ့ရသလို သတင်း ရယူနေတဲ့သတင်းသမားအချို့လည်း ရန်ပြု ပြောဆိုတိုက်ခိုက်ခံရတ‌တွေရှိခဲ့တယ်လို့ ကာယကံရှင်အချို့က ဘီဘီစီ ကိုပြောပါတယ်။

ဇန်နဝါရီ ၃၀ ရက်နေ့က ဆန္ဒပြပွဲမှာ သတင်းယူရာက ရန်ပြုခံခဲ့ရတဲ့ ဧရာဝတီသတင်းဌာနက အမျိုးသမီး သတင်းထောက်တစ်ဦးဖြစ်တဲ့ မဝေနှင်းထွဋ်က သူ့ကိုရန်ပြုတိုက်ခိုက်သူဟာ ဆန္ဒပြလူအုပ်ထဲက ဖြစ်တယ်လို့ ဘီဘီစီကို ပြောပါတယ်။

ဒီလိုရန်ပြုခံရတာတွေအပြင် အမျိုးသားရေးလှုပ်ရှားသူတွေရဲ့ လူမှုကွန်ရက် စာမျက်နှာတွေကနေ မီဒီယာအချို့ကို နာမည်တပ်ပြီး ရိုက်ပွဲကျင်းပမယ်လို့ ရေးသား လှုံ့ဆော်တာတွေလည်း ရှိနေပါတယ်။

အခုလို ဆန္ဒပြသူတွေအနေနဲ့ လမ်းသွားလမ်းလာတွေနဲ့ မီဒီယာတွေကို ရန်ပြုတဲ့ဖြစ်စဥ်နဲ့ ပတ်သက်ပြီး ဇန်နဝါရီ ၃၀ ရက်နေ့က ဆန္ဒထုတ်ဖော်ပွဲမှာ ဦးဆောင်သံဃာတစ်ပါးဖြစ်တဲ့ ဦးတေဇဝန္တကတော့ သတင်းမီဒီယာတွေဘက်က ဆန္ဒပြသူတွေကို လူဆိုးလူမိုက် ဆိုပြီး ဖော်ပြတာတွေရှိပြီး အောက်ခြေက ပါဝင်သူအချို့က ဒါကိုမကျေနပ်လို့ ပြန်လည် တိုက်ခိုက်တယ်လို့ ယူဆရကြောင်း ဦးဆောင်သူတွေဘက်က အခုလို တိုက်ခိုက်ဖို့ မူဝါဒ ချထားတာ မရှိဘူးလို့လည်း ဘီဘီစီကို ပြောပါတယ်။

ဆန္ဒထုတ်ဖော်ပွဲတွေကို သတင်းရယူရေးသားရာက ရေးသားဖော်ပြချက်တွေအပေါ် သဘော မကျတာကြောင့် သတင်းသမားတွေအနေနဲ့ အန္တရာယ်ပြုခံရတာ၊ခြိမ်းခြောက်ခံရတာတွေ ရှိလာတဲ့အပေါ် သက်ဆိုင်ရာ လုံခြုံရေး အဖွဲ့အစည်းတွေကို တိုင်ကြားသွားမှာဖြစ်သလို သတင်းသမားတွေအနေနဲ့လည်း သတင်းမီဒီယာ ကျင့်ဝတ်တွေကို လိုက်နာရေးသားကြဖို့ကိုလည်း မြန်မာသတင်းမီဒီယာကောင်စီက ဇန်နဝါရီ ၃၁ ရက်နေ့ ရက်စွဲနဲ့ ထုတ်ပြန်ထားပါတယ်။

NLD ပါတီ ဗဟိုအလုပ်အမှု ဆောင်အဖွဲ့ဝင် မရမ်းကုန်းမြို့နယ် ပြည်သူ့လွှတ်တော် ကိုယ်စားလှယ် ဒေါက်တာမေဝင်းမြင့်က လက်ရှိအခြေအနေ အရ မည်သို့သော စိန်ခေါ်မှုများရှိစေ လွှတ်တော်ကိုယ်စားလှယ်တွေဟာ ဖေဖော်ဝါရီလ ၁ ရက်နေ့ စတင်ကျင်းပမယ့် တတိယအကြိမ် ပြည်သူ့လွှတ်တော်ကို တက်ရောက်ဖို့ရှိနေပြီး မဲဆန္ဒရှင်ပြည်သူတွေ အနေနဲ့ မိမိတို့နေအိမ်တွင်း နေထိုင်ပြီး မေတ္တာပို့သ ထောက်ခံအားပေးကြဖို့ လမ်းပေါ်ထွက်ပြီး မည်သည့် ထောက်ခံအားပေးတဲ့ကိစ္စရပ်မျိုးကိုမှ မပြုလုပ်ကြဖို့ လူမှုကွန်ရက် စာမျက်နှာက တစ်ဆင့် ဇန်နဝါရီ ၂၉ရက်က မေတ္တာ ရပ်ခံထားပါတယ်။

ပြီးခဲ့တဲ့ ဇန်နဝါရီ ၂၆ရက်က တပ်မတော်ရဲ့ သတင်းစာရှင်းလင်းပွဲမှာ အာဏာမသိမ်းဟု မှတ်ယူ၍မရကြောင်း တပ်မတော်ဘက်က ပြောဆိုခဲ့ပြီးနောက်ပိုင်း တပ်မတော်ထောက်ခံတဲ့ ဆန္ဒထုတ်ဖော်မှုတွေ ပိုစိပ်လာပြီး ဇန်နဝါရီ ၂၇ရက်ကနေ ၃၀ရက်နေ့အထိ အဓိကမြို့ကြီးတွေဖြစ်တဲ့ ရန်ကုန်နဲ့ နေပြည်တော်တို့မှာ ဆက်တိုက် တွေ့လာရပါတယ်။

ပြီးခဲ့တဲ့ ရက်ပိုင်းကလည်း နေပြည်တော်မှာ ရာနဲ့ချီတဲ့ တပ်မတော်ထောက်ခံသူတွေက စုဝေးပြီး အင်အားပြမှုပြုလုပ်ခဲ့ပါသေးတယ်။

တပ်မတော်က သတင်းစာရှင်းလင်းပွဲမှာ တပ်မတော်ထောက်ခံပွဲတွေနဲ့ ပတ်သက်ပြီး စပွန်ဆာ ပေးတာမရှိဘူးလို့ ပြန်လည်ပြောဆိုခဲ့ပြီး အဖွဲ့အစည်းတိုင်းမှာတော့ ဝန်းရံသူတွေ ရှိနိုင်တယ်လို့ ပြန်လည်ပြောဆိုခဲ့ပါတယ်။

အခုလိုတပ်ထောက်ခံပွဲ လှုပ်ရှားမှုတွေမှာ ဦးဆောင်သူတစ်ဦးဖြစ်တဲ့ မိုက်ကယ်ကျော်မြင့် နဲ့ပတ်သက်လို့ ပြည်ထောင်စုကြံ့ခိုင်ဖွံ့ဖြိုးရေးပါတီက ထိန်းသိမ်းထားပေးတယ်၊ကာကွယ်ထားပေးတယ်ဆိုတာလည်း လုံးဝမဟုတ်ကြောင်းနဲ့ ပါတီက ဥပဒေနဲ့အညီ သွားနေတာကို ဥပဒေနဲ့မညီတဲ့ စွပ်စွဲပြောဆိုနေတာတွေကို ဥပဒေနဲ့အညီ အရေးယူဆောင်ရွက်သွားမယ်လို့ ပြည်ထောင်စုကြံ့ခိုင်ဖွံ့ဖြိုးရေး ပါတီက ပြောခွင့်ရသူ ဒေါက်တာနန္ဒာလှမြင့်ကပြောဆိုခဲ့ပါတယ်။

လာမယ့် ဖေဖော်ဝါရီလ ၁ ရက်နေ့မှာတော့ တတိယအကြိမ်ပြည်သူလွှတ်တော် အစည်းအဝေးတွေ ကျင်းပဖို့ရှိပြီး ပြည်သူလွှတ်တော်ဥက္ကဋ္ဌနဲ့ ဒုတိယဥက္ကဋ္ဌ တို့ကို ရွေးဖို့လည်းရှိနေပါတယ်။


BBC Burmese

https://www.bbc.com/burmese/burma-55879417

ဆေးသယ်တာ အခက်အခဲရှိလို့ ပလက်ဝမှာ ကိုဗစ်ကာကွယ်ဆေးမထိုးနိုင်သေး

ဇန်နဝါရီ ၂၇ ရက်မှာ ကျန်းမာရေးဝန်ထမ်းတွေကို စတင်ထိုးပေး

ချင်းပြည်နယ်တောင်ပိုင်း ပလက်ဝမြို့နယ်မှာ ကျန်းမာရေးဝန်းထမ်းတွေကို ကိုဗစ် ကာကွယ်ဆေး မထိုးပေးနိုင်သေးဘူးလို့ မြို့နယ်ဆရာဝန်ကြီးနဲ့ ချင်းပြည်နယ်အစိုးရအဖွဲ့တို့က ဘီဘီစီကို အတည်ပြုပြောဆိုပါတယ်။

ကိုဗစ်ကာကွယ်ဆေးကို အခုလ ၂၇ ရက်နေ့ကနေ တစ်နိုင်ငံလုံးအတိုင်းအတာမှာရှိတဲ့ ကျန်းမာရေးဝန်ထမ်းတွေကို သက်ဆိုင်ရာမြို့နယ်တွေမှာ ပထမဆုံးအသုတ်အနေနဲ့ ထိုးပေးနေပြီလည်းဖြစ်ပါတယ်။

ပလက်ဝမြို့နယ်မှာ အခုလို ကိုဗစ်ကာကွယ်ဆေး မထိုးနိုင်သေးတာဟာ ဆေးတွေကို ပို့ဆောင်ရတဲ့အခါမှာ သယ်ယူရေး အခက်အခဲဖြစ်နေတဲ့ အတွက်ကြောင့် ဆေးမရောက်နိုင်သေးတဲ့အတွက် ကြန့်ကြာနေရတာ ဖြစ်တယ်လို့ ပလက်ဝမြို့နယ် ဆရာဝန်ကြီး ဒေါက်တာစိုးသက်ဝင်းက ဆိုပါတယ်။

ချင်းပြည်နယ် ပလက်ဝမြို့နယ်ဟာ ရခိုင်ပြည်နယ် မြောက်ပိုင်းဒေသ ကျောက်တော်မြို့နယ်နဲ့ နယ်စပ်ချင်းဆက်စပ်နေတဲ့ မြို့နယ်တစ်ခုဖြစ်ကာ ကုန်းလမ်းဆက်သွယ်ရေးခက်ခဲပြီး ကုလားတန်မြစ်ကြောင်း တစ်ခုတည်းကိုပဲ ရေလမ်းခရီးအဖြစ် အသုံးပြုသွားလာနေရတဲ့ မြို့နယ်တစ်ခုဖြစ်ပါတယ်။

ပလက်ဝ မြို့နယ်ထဲမှာ တိုက်ပွဲတွေ ဖြစ်ပွားခဲ့

ပြီးခဲ့တဲ့ ၂နှစ်တာအတွင်း တပ်မတော်နဲ့ ရက္ခိုင့်တပ်တော် အေအေတို့အကြား တိုက်ပွဲတွေအပြင်းအထန် ဖြစ်ပွားနေခဲ့တဲ့ အတွက် ပလက်ဝမြို့နယ်နဲ့ အဓိက ဆက်သွယ်ရေးလမ်းကြောင်းတစ်ခုဖြစ်တဲ့ ကုလားတန်မြစ်ကြောင်း သွားလာရေးကို စစ်ရေးအခြေအနေအရ ပိတ်ထားခဲ့ပါတယ်။

လက်ရှိမှာတော့ အဲ့ဒီမြို့နယ်အတွင်းမှာ တာဝန်ထမ်းဆောင်နေကြတဲ့ ကျန်းမာရေးဝန်ထမ်းတွေကို ကိုဗစ်ကာကွယ်ဆေးထိုး ပေးနိုင်ရေးအတွက် လိုအပ်တဲ့ကာကွယ်ဆေးတွေကို ပခုက္ကူမြို့နယ်က တစ်ဆင့် ကုန်းလမ်းဆက်သွယ်ရေးနဲ့ ပို့ဆောင်ထားပြီးဖြစ်ကာ မကြာခင် ရက်ပိုင်းအတွင်းမှာ ထိုးပေးနိုင်တော့မယ်လို့ ဆရာဝန်ကြီး ဒေါက်တာ စိုးသက်ဝင်းက ပြောပါတယ်။

"ကျွန်တော်တို့ဘက်ကတော့ ဒေသဝေးတော့ သယ်ယူပို့ဆောင်ရေးအခြေအနေကြောင့် နည်းနည်းကြာတယ်။ နောက်ကျတာပေါ့။ အခုရက်ပိုင်းအတွင်းထိုးမှာပါ။ နီးနီးနားနား လေယာဉ်ကွင်းတွေလည်းမရှိတော့ အနီးဆုံးကျွန်တော်တို့ဆီကို ပုခုက္ကူ ကနေ ပို့ရပါတယ်"လို့ ဒေါက်တာ စိုးသက်ဝင်းက ပြောပါတယ်။

အဲ့ဒီဆေးတွေကို ပို့ဆောင်တဲ့အခါမှာတော့ တခြား ပြည်နယ်နဲ့ တိုင်းဒေသကြီးတွေကို ပို့ဆောင်ပေးသလို အအေးပုံးတွေနဲ့ ထည့်ပြီး ပုံမှန်အတိုင်းပဲ သယ်ယူလာမှာ ဖြစ်ပေမယ့် ပလက်ဝကိုတော့ လုံခြုံရေးတွေနဲ့ သယ်ယူရမှာဖြစ်တယ်လို့သိရပါတယ်။

မန္တလေးမြို့မှာ ဇန်နဝါရီ ၂၇ ရက်က ကာကွယ်ဆေးစတင်ထိုးစဥ်

လောလောဆယ်ကတော့ လမ်းခရီးအခြေအနေ လုံခြုံရေးကြောင့် ဘယ်ကနေ ဘယ်လို သယ်ယူမယ်ဆိုတာ ပြောလို့မရသေးဘူးလို့ တာဝန်ရှိသူတွေက ပြောပါတယ်။

ပလက်ဝမြို့နယ်အတွင်း လက်ရှိတာဝန်ထမ်းဆောင်နေတဲ့ ကျန်းမာရေးဝန်ထမ်း အရေအတွက်က ၂၂၀ ရှိပြီး အဲ့ဒီဝန်ထမ်းအရေအတွက် အတိုင်း ဆေးရရှိမှာဖြစ်တယ်လို့ ဒေါက်တာစိုးသက်ဝင်းက ပြောပါတယ်။

ပလက်ဝမြို့နယ်က ကျန်းမာရေးဝန်ထမ်းတွေကို ထိုးပေးမယ့် ကိုဗစ် ကာကွယ်ဆေးတွေကို ပို့ဆောင်ဖို့ ဇန်နဝါရီ ၃၀ ရက်နေ့မှာ မတူပီမြို့ကနေ ထွက်သွားပြီဖြစ်ပေမယ့် လမ်းကြောင်း အခြေအနေအရ ဆမီးမြို့မှာ ကြန့်ကြာနေတယ်လို့ ယူဆရကြောင်း ချင်းပြည်နယ်အစိုးရအဖွဲ့ စည်ပင်သာယာရေးဝန်ကြီး ဦးစိုးထက်က ပြောပါတယ်။

ချင်းပြည်နယ်ဟာ တောင်တန်းတွေပေါများပြီး တောင်ပိုင်းနဲ့ မြောက်ပိုင်းမြို့နယ်တွေဟာ အလှမ်းကွာဝေးပြီး ပို့ဆောင်ပေးရတာ မလွယ်ကူတဲ့အတွက် တောင်ပိုင်းမြို့နယ်တွေအတွက် ရန်ကုန်ကနေ ပို့လိုက်တဲ့ဆေးတွေကို ပခုက္ကူကို ပို့ဆောင်ပေးရပြီး အဲ့ဒီကနေတစ်ဆင့် မင်းတပ်၊ မတူပီ၊ ဆမီး၊ ပလက်ဝလမ်းကြောင်းကနေ သယ်ယူနေရတာ ဖြစ်တယ်လို့ ဝန်ကြီးကဆိုပါတယ်။


ကိုဗစ်ကာကွယ်ဆေးတွေကို ပို့ဆောင်ပေးမှု ကြန့်ကြာနေတာဟာ လမ်းပန်းဆက်သွယ်ရေးကြောင့်သာဖြစ်ပြီး စစ်ရေးအခြေအနေတွေနဲ့ သက်ဆိုင်မှုမရှိဘူးလို့ ဝန်ကြီးဦးစိုးထက်က ပြောပါတယ်။

"အခုက လမ်းကြောင်းကတော့ အရေးကြီးတဲ့ဆေးတွေနဲ့ အရေးကြီးတဲ့ကိစ္စတွေဆိုတော့ တပ်က သွားလာခွင့်တော့ ပေးထားပါတယ်။ အခုက Ambulance နှစ်စီးနဲ့ သယ်တာပါခင်ဗျား၊ စစ်ရေးကြောင့် မဟုတ်ပါဘူး၊ လမ်းခရီးက အဆင့်ဆင့် သယ်ရ တယ်ဆိုတော့ အဲ့ဒါတွေကြောင့် ကြန့်ကြာတာပေါ့ခင်ဗျား"လို့ ဦးစိုးထက်က ပြောပါတယ်။

ချင်းပြည်နယ်အတွင်း တာဝန်ထမ်းဆောင်နေတဲ့ ကျန်းမာရေးဝန်ထမ်းပေါင်း သုံးထောင်အထက်ရှိပြီး တောင်ပိုင်းဒေသက ပလက်ဝမြို့နယ်တစ်ခုတည်းမှာသာ ဆေးမထိုးရသေးတာဖြစ်တယ်လို့ သိရပါတယ်။

အဲ့ဒီဆေးတွေကိုပလက်ဝကို အမြန်ရောက်ရှိနိုင်ရေးအတွက် သက်ဆိုင်ရာ မြို့နယ်အုပ်ချုပ်ရေးမှူးတွေကို အကူအညီပေးဖို့ ညွှန်ကြားထားတယ်လို့လည်းသိရပါတယ်။

ဆမီးမြို့မှာ တာဝန်ထမ်းဆောင်နေတဲ့ တိုက်နယ်ဆေးရုံက ဝန်ထမ်းတွေဟာလည်း ပလက်ဝမြို့မှာပဲ ထိုးကြရမှာဖြစ်တဲ့ အတွက် ဆေးတွေကို ပို့ဆောင်ရာမှာ ဆမီးက ဝန်ထမ်းတွေကိုသယ်ဖို့ လူနာတင်ယာဉ်နှစ်စီးနဲ့ စီစဉ်ပေးထားတာဖြစ်တယ်လို့ ဝန်ကြီးက ပြောပါတယ်။

ဆေးတွေကို သယ်ယူလာတဲ့အခါမှာ ပခုက္ကူကနေ မင်းတပ်ကို မိုင်၂၀၀ ကျော်၊ မင်းတပ်ကနေ မတူပီကို ၁၀၂ မိုင်၊ မတူပီကနေ ပလက်ဝထိ ၁၃၅ မိုင်ခန့် ရှည်လျားပြီး အဆင့်ဆင့် သယ်ယူနေရတာဖြစ်သလို လမ်းမကောင်းတဲ့အတွက်ကြောင့် ကားတွေကိုလည်း ပုံမှန်မောင်းနှင်လို့မရဘဲ ဖြေးဖြေးခြင်းသွားနေရတယ်လို့ သိရပါတယ်။


BBC Burmese

https://www.bbc.com/burmese/burma-55879418

 

မြန်မာကိုဗစ်ဓာတ်ခွဲ အတည်ပြု စုစုပေါင်း ၁၄၀,၁၄၅ ဦး၊ သေဆုံး ၃,၁၃၁ ဦး

ရန်ကုန် ဧရာဝတီ ကိုဗစ်စင်တာမှာ ကျန်းမာရေးဝန်ထမ်းတွေကို ကိုဗစ်ကာကွယ်ဆေး ထိုးနှံပေးနေတဲ့မြင်ကွင်း။ (ဇန်နဝါရီ ၂၇၊ ၂၀၂၁)

မြန်မာနိုင်ငံမှာ ဒီကနေ့ ကိုရိုနာဗိုင်းရပ်စ်ပိုး ကူးစက်သူ ၂၈၁ ယောက်ထပ်ပြီး အတည်ပြုလိုက်တဲ့အတွက် အခုထိ ကူးစက်သူ စုစုပေါင်း ၁၄၀,၁၄၅ ယောက်ရှိပြီ ဖြစ်ပါတယ်။ ပြီးခဲ့တဲ့ ၂၄ နာရီအတွင်း COVID-19 ကြောင့် သေဆုံးသူက ၆ ဦး ရှိတာကြောင့် အခုထိ သေဆုံးသူ စုစုပေါင်း ၃,၁၃၁ ယောက် ရှိပါတယ်။

ဇန်နဝါရီလ ၃၁ ရက်နေ့အတွက် ဓာတ်ခွဲနာမူနာပေါင်း ၁၆,၂၇၉ ခု စစ်ဆေးခဲ့တာပါ။ ပြီးခဲ့တဲ့မတ်လကနေ အခုထိ ဓာတ်ခွဲနာမူနာပေါင်း ၂,၃၉၀,၃၄၇ ခု စစ်ဆေးပြီးခဲ့ပြီဖြစ်ပြီး အတည်ပြုလူနာတွေထဲ ပြန်ပြီးကျန်းမာလာသူက ၁၂၅,၀၇၂ ယောက် ရှိပါတယ်။

မြန်မာနိုင်ငံမှာ ပြီးခဲ့တဲ့နှစ် မတ်လ ၂၃ ရက်နေ့ကနေ ဇန်နဝါရီလ ၃၀ ရက်နေ့အထိ တွေ့ရတဲ့ အတည်ပြုလူနာစာရင်းတွေအရ ရန်ကုန်တိုင်းအတွင်း ကူးစက်သူ ၈၇,၁၄၇ ယောက်နဲ့ အများဆုံးဖြစ်ပြီး မန္တလေးတိုင်းအတွင်း ရောဂါကူးစက်သူ ၁၇,၃၈၅ ယောက်နဲ့ ကူးစက်မှုနှုန်း ဒုတိယအများဆုံး ဖြစ်ပါတယ်။

ဇန်နဝါရီလကုန် သီတင်းပတ်တွေအတွင်း မြန်မာနိုင်ငံမှာ COVID-19 ရောဂါ ကူးစက်မှုနဲ့ သေဆုံးမှုနှုန်းက သိသိသာသာ ကျဆင်းလာသလို အတည်ပြုလူနာတွေထဲ ပြန်ပြီးကျန်းမာလာသူကလည်း ၈၉ ရာခိုင်နှုန်းဝန်းကျင် ရှိတယ်လို့ ကျန်းမာရေးနဲ့ အားကစားဝန်ကြီးဌာန သတင်းထုတ်ပြန်ရေးအဖွဲ့ဝင် ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက ဗွီအိုအေမြန်မာပိုင်းကို ပြောပြပါတယ်။

COVID-19 ကာကွယ်ဆေးထိုးနှံပေးတဲ့ အစီအစဉ်တွေကိုလည်း ဆက်လက်လုပ်ဆောင်နေပြီး ဒီကနေ့ ဇန်နဝါရီလ ၃၁ ရက်နေ့အထိ စာရင်းတွေအရ ကျန်းမာရေးဝန်ထမ်းနဲ့ စေတနာ့ဝန်ထမ်း ၃,၄၅၃ ယောက်ကို ကာကွယ်ဆေးထိုးနှံပေးခဲ့တယ်လို့ ကျန်းမာရေးနဲ့ အားကစားဝန်ကြီးဌာနက ကြေညာချက် ထုတ်ပြန်ထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-covid-update-jan31/5758585.html

ပြည်သူ့လွှတ်တော်ဥက္ကဋ္ဌသစ် ရွေးချယ်တင်မြှောက်မည်

ပြည်သူ့လွှတ်တော်။

၂၀၂၀ ရွေးကောက်ပွဲရလဒ်အရ ခေါ်ယူတဲ့ တတိယအကြိမ် ပြည်သူ့လွှတ်တော် မနက်ဖြန်မှာ စတင်ကျင်းပတော့မှာ ဖြစ်ပါတယ်။ ပြည်သူ့လွှတ်တော်ဥက္ကဋ္ဌသစ် တင်မြှောက်ခြင်းနဲ့ ပြည်သူ့လွှတ်တော် ကိုယ်စားလှယ်တွေ ကတိသစ္စာ ခံယူကြမယ့် ပြည်သူ့လွှတ်တော်ကျင်းပရေး COVID-19 စည်းကမ်းချက်နဲ့အညီ ပြင်ဆင်နေတဲ့ အခြေအနေကို ဗွီအိုအေမြန်မာပိုင်း သတင်းထောက် မဆုမွန် မေးမြန်းတင်ပြထားပါတယ်။

၂၀၂၀ ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲကနေ ပြည်သူအများရဲ့ မဲဆန္ဒနဲ့ ရွေးကောက်တင်မြှောက်ခံလိုက်ရတဲ့ ပြည်သူ့လွှတ်တော် ကိုယ်စားလှယ် စုစုပေါင်း ၃၁၅ ဦးမှာ NLD အမျိုးသားဒီမိုကရေစီအဖွဲ့ချုပ် ပါတီက ပြည်သူ့လွှတ်တော်ကိုယ်စားလှယ် ၂၅၈ နေရာရရှိပြီး ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက ပြည်သူ့လွှတ်တော်ကိုယ်စားလှယ် ၂၆ နေရာ ရရှိပါတယ်။ နောက် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) က ၁၃ နေရာ၊ ရခိုင်အမျိုးသားပါတီ (ANP) က ၄ နေရာ စသဖြင့်လည်း အသီးသီး ပြည်သူ့လွှတ်တော် ကိုယ်စားလှယ်တွေအဖြစ် ရွေးချယ်ခံခဲ့ရတာ ဖြစ်ပါတယ်။

၂၀၂၁ ခုနှစ် ဖေဖော်ဝါရီလ ၁ ရက်နေ့ တနင်္လာနေ့မှာတော့ လွှတ်တော်အသီးသီးအနက် ပြည်သူ့လွှတ်တော်ကို ပထမဆုံး ခေါ်ယူကျင်းပတာ ဖြစ်ပါတယ်။ မနက် ၁၀ နာရီက စတင်ကျင်းပမယ့် တတိယအကြိမ် ပြည်သူ့လွှတ်တော် ပထမ ပုံမှန်အစည်းအဝေးမှာတော့ ပြည်သူ့လွှတ်တော်ဥက္ကဋ္ဌ၊ ဒုဥက္ကဋ္ဌ ရွေးချယ်တင်မြှောက်ပြီး ပြည်သူ့လွှတ်တော် ကိုယ်စားလှယ်သစ်တွေ လွှတ်တော်ရှေ့မှောက် ကတိသစ္စာပြုကြမှာ ဖြစ်ပါတယ်။

ရန်ကုန်တိုင်း သင်္ဃန်းကျွန်းမြို့နယ် မဲဆန္ဒနယ်က ရွေးကောက်ခံ ပြည်သူ့လွှတ်တော် ကိုယ်စားလှယ် ဒေါက်တာကျော်စွာဦးက မနက်ဖြန် ပြည်သူ့လွှတ်တော် ကျင်းပမယ့် အစီအစဉ်တွေ ဗွီအိုအေကို ပြောပြပါတယ်။

"ကျနော်တို့တွေ မနက်ဖြန်မှာ လွှတ်တော်စတက်ရမှာပေါ့။ အဲ့လို စတက်ကြဖို့ကို စီစဉ်ထားတဲ့အတိုင်း ကျနော်တို့က ယာဉ်တန်းနဲ့အတူ ပြည်သူ့လွှတ်တော်ကို သွားရမှာပေါ့နော်။ အားလုံး ကျနော်တို့ မနက် ၉ နာရီ ၄၅ မိနစ်လောက်မှာ နေရာယူပြီးသား ဖြစ်ဖို့တော့ သိထားပါတယ်။ အားလုံး စုရပ်မှာ မနက် ၈ နာရီကနေ ၈ ခွဲဆိုလို့ရှိရင် စုရပ်ကနေ ကားတွေ တန်းစီပြီး ထွက်မှာပေါ့နော်။ သူတို့စီစဉ်ထားတဲ့ ယာဉ်တန်းနဲ့ ထွက်မှာပေါ့နော်။ အခုသိထားတဲ့ အစီအစဉ်တွေအတိုင်းပဲ ဆက်လက်ပြီးတော့ ကျင်းပမှာပေါ့နော်။ လွှတ်တော်ဥက္ကဋ္ဌ ဒုဥက္ကဋ္ဌတွေ ရွေးချယ်မယ်။ အခုလို ပြည်သူ့လွှတ်တော် ကိုယ်စားလှယ်အဖြစ်နဲ့ အဲ့ဒီ့အတွက် ကျနော် စိတ်လှုပ်ရှားပါတယ်၊ ဂုဏ်လည်း ဂုဏ်ယူပါတယ်။ ဒါက ပထမဆုံး ကိုယ့်အတွေ့အကြုံလည်းဖြစ်လို့ ဝမ်းလည်း ဝမ်းသာပါတယ်။ မိဘပြည်သူတွေကနေ မဲပေးရွေးချယ်လိုက်တဲ့အတွက် အထူးပဲ ကျေးဇူးတင်ပါတယ်။ နောက် မကြာခင်သော ကာလမှာ အစိုးရဖွဲ့တဲ့အခါမှာလည်း ပါဝင်ခွင့်ရမှာဖြစ်လို့ ဝမ်းသာဂုဏ်ယူမိပါတယ်။ အမျိုးသားဒီမိုကရေစီအဖွဲ့ချုပ်ရဲ့ ရွေးကောက်ပွဲ ကြေညာစာတမ်းအတိုင်း ကဏ္ဍအသီးသီးကို အတတ်နိုင်ဆုံး ကြိုးစားဆောင်ရွက်သွားဖို့ ရှိပါတယ်။"

နိုင်ငံမှာ ကပ်ရောဂါ COVID-19 ဖြစ်ပွားနေဆဲကာလ ကျန်းမာရေးဝန်ကြီးဌာနရဲ့ COVID-19 ကူးစက်ပြန့်ပွားမှု ကာကွယ်ရေး စည်းမျဉ်းစည်းကမ်းချက်တွေနဲ့ အညီ လွှတ်တော်ကို ကျင်းပမှာ ဖြစ်ပါတယ်။ တက်ရောက်မယ့် လွှတ်တော်ကိုယ်စားလှယ်တိုင်း၊ တပ်မတော်သား ကိုယ်စားလှယ်တွေ အပါအဝင် ကိုဗစ်ပိုးရှိမရှိ နှစ်ကြိမ်စစ်ပြီး ကာကွယ်ဆေးတွေ ထိုးနှံပေးထားတယ်လို့လည်း ရွေးကောက်ခံ ပြည်သူ့လွှတ်တော်ကိုယ်စားလှယ် ဒေါက်တာကျော်စွာဦးက ပြောပြပါတယ်။

"မကျင်းပခင် လတွေကတည်းက ပြည်ထောင်စုလွှတ်တော် နာယကကြီး အပါအဝင် ကျင်းပရေး ဗဟိုကော်မတီဖွဲ့ပြီးတော့ သေချာ သူတို့ ပြင်ဆင်ထားတာကို သိရပါတယ်။ ရွေးကောက်ခံ ပြည်သူ့လွှတ်တော် ကိုယ်စားလှယ်၊ အမျိုးသားလွှတ်တော်ကိုယ်စားလှယ်၊ တပ်မတော်သား လွှတ်တော်ကိုယ်စားလှယ်တွေ အားလုံးကို ပိုးနှစ်ကြိမ်စစ်တယ်။ နဂ္ဂတစ်ဖြစ်ပြီဆိုတော့ ပထမဆုံးအကြိမ် ကာကွယ်ဆေးထိုးပေးတယ်။ နောက်တကြိမ်ကတော့ ဖေဖော်ဝါရီလကုန်လောက်မှာ ကျနော်တို့ကို နောက်တကြိမ် ထပ်ထိုးပေးမှာပေါ့။

“အဲ့တော့ ကျနော်တို့ လွှတ်တော်ကိုယ်စားလှယ်တွေကို ကျန်းမာရေးနဲ့ ညီညွတ်အောင် တတ်နိုင်သလောက် သူတို့ စီစဉ်ပေးထားပါတယ်။ ကျနော်တို့ Social Distancing ခပ်ခွာခွာနေလို့ရအောင် စားပွဲဝိုင်းတွေကအစ သေချာလေး စနစ်တကျ စီစဉ်ထားတာကိုလည်း တွေ့ရပါတယ်။ ကျနော်တို့ကိုလည်း Mask တွေ Face Shield တွေ သေချာပေးထားပြီးတော့ အပြည့်အစုံ တပ်ဖို့ပေါ့နော်၊ အဲ့ဒါလေးတွေ စီစဉ်ထားတယ်။ နောက်တခုက လွှတ်တော်ခန်းမကြီးကလည်း ကြီးတဲ့အတွက်ကြောင့်မို့လို့ Social Distancing အတွက် ကောင်းကောင်း စီစဉ်ထားမယ်လို့ ယူဆပါတယ်။ ကျန်းမာရေးဝန်ကြီးဌာနရဲ့ စံချိန်စံညွှန်းတွေနဲ့အညီ လွှတ်တော်ကျင်းပမယ်လို့ ယုံကြည်ပါတယ်။”

အခုလို နေပြည်တော်မှာ လွှတ်တော်တွေ ကျင်းပဖို့ စီစဉ်နေချိန်မှာပဲ ၂၀၂၀ ရွေးကောက်ပွဲ ရလဒ်အဖြေနဲ့ ပတ်သက်ပြီး ကျေနပ်လက်ခံနိုင်ခြင်း မရှိတာကြောင့်ဆိုပြီး ဒီကနေ့ စနေနေ့အထိ ရန်ကုန်မြို့ ရွှေတိဂုံစေတီတော်အနီးမှာ တပ်မတော်ထောက်ခံသူတွေ စုဝေး ဆန္ဒပြခဲ့ကြပါတယ်။

အဓိက အတိုက်အခံပါတီ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ အပါအဝင် နိုင်ငံရေးပါတီတချို့နဲ့ တပ်မတော်ဘက်က ပြည်ထောင်စုရွေးကောက်ပွဲ ကော်မရှင်ကို မဲရလဒ်အဖြေနဲ့ မဲစာရင်းတွေ ပြန်တိုက်ပြီး စစ်ဆေးဖြေရှင်းပေးဖို့လည်း တောင်းဆိုနေတာပါ။ ဒီအတွက် အခု လွှတ်တော်သစ်မခေါ်ခင် လွှတ်တော်ဟောင်းခေါ်ပြီး အထူးအစည်းအဝေး ကျင်းပဖို့ တောင်းဆိုခဲ့ကြပါတယ်။

ဒါပေမယ့်လည်း ဥပဒေအရဆိုရင် လွှတ်တော်ဟောင်းက ဒီကနေ့ဆိုရင် ပျက်ပြယ်သွားပြီဖြစ်ပြီး နောက်ဆုံး ၂၀၂၀ ရွေးကောက်ပွဲရလဒ်အရ လွှတ်တော်သစ်ကိုပဲ ခေါ်ယူရမှာဖြစ်ပါတယ်။ တချိန်တည်းမှာလည်း တပ်မတော်ဘက်က အာဏာသိမ်းနိုင်ခြေ ရှိတယ်ဆိုတဲ့ ခန့်မှန်းချက်တွေကြောင့် ဒီ တတိယအကြိမ်လွှတ်တော် ခေါ်ယူမှုကို ထိခိုက်မလား စိုးရိမ်မှုတွေလည်း ရှိနေပါတယ်။


မဆုမွန်/ VOA Burmese

https://burmese.voanews.com/a/myanmar-pyithu-hluttaw/5758500.html

 

တိုင်းရင်းသားလက်နက်ကိုင် ၃ ဖွဲ့ဆီမှာ ဖမ်းဆီးခံထားရသူတွေ လွတ်မြောက်ဖို့တောင်းဆို

တိုင်းရင်းသားလက်နက်ကိုင် ၃ ဖွဲ့ဆီမှာ ဖမ်းဆီးခံထားရသူတွေ လွတ်မြောက်ဖို့တောင်းဆို စစ်ကိုင်းတိုင်း ဆားလင်းကြီးမြို့နယ်က ဒေသခံ ၁၁ ယောက်ကို ပြန်လွှတ်ပေးဖို့ မိသားစုဝင်တွေ ၂၀၂၁ ဇန်နဝါရီ ၃၁ ရက်နေ့က သတင်းစာရှင်းလင်းခဲ့စဉ် / ဓာတ်ပုံ - ကျော်ဆန်းဝင်း

တိုင်းရင်းသားလက်နက်ကိုင်တပ်ဖွဲ့ ၃ ဖွဲ့တွေဆီမှာ ဖမ်းဆီးခံထားရတဲ့ စစ်ကိုင်းတိုင်း ဆားလင်းကြီးမြို့နယ်က ဒေသခံ ၁၁ ယောက်ကို ပြန်လွှတ်ပေးဖို့ မိသားစုဝင်တွေက ဒီကနေ့ တောင်းဆိုလိုက်ပါတယ်။

စစ်ကိုင်းတိုင်း မုံရွာမြို့ နန္ဒဝန်ရပ်ကွက်က မန်ကျည်းအုပ်တောရကျောင်းတိုက်မှာ သတင်းစာရှင်းလင်းပွဲလုပ်ပြီး တောင်းဆိုလိုက်တာပါ။

စစ်ကိုင်းတိုင်း ယင်းမာပင်ခရိုင်၊ ဆားလင်းကြီးမြို့နယ်၊ ဆင်ဖြူချီရွာသား ငါးယောက်၊ ကံကြီးရွာသား ငါးယောက်နဲ့ ငွေသာရွာသား တစ်ယောက် စုစုပေါင်း ၁၁ ယောက်တို့ကို ၂၀၁၃ ခုနှစ်၊ ၂၀၁၈ ခုနှစ်နဲ့ ၂၀၁၉ ခုနှစ်တွေမှာ ရှမ်းပြည်နယ်မြောက်ပိုင်းနဲ့ ကချင်ပြည်တွေမှာ ကချင်လွတ်မြောက်ရေးတပ်မတော် (KIA)၊ တအာင်းအမျိုးသားလွတ်မြောက်ရေးတပ်မတော် (TNLA) နဲ့ ရှမ်း ပြည်ပြန်လည်ထူထောင်ရေး ကောင်စီ (RCSS/SSA) အဖွဲ့တွေက တပ်သားသစ်အဖြစ် ဖမ်းဆီးခေါ်ဆောင်သွားတာလို့ မိသားစုဝင်တွေက ပြောပါတယ်။

အဖမ်းခံရသူတွေဟာ အသက် ၁၇ နှစ်ကနေ အသက် ၃၆ နှစ် အတွင်း အရွယ်တွေဖြစ်ကာ ဒေသထွက် စောင်၊ ခြင်ထောင်၊ မွေ့ရာ၊ ကောဇောနဲ့ ကုန်ပစ္စည်းတွေကို ဆိုင်ကယ်နဲ့ လိုက်လံရောင်းချရင်း ဖမ်းဆီးခံခဲ့ရတာဖြစ်ပြီး ဒီနေ့အချိန်အထိ အဆက်အသွယ်လည်းမရဘူးလို့ မိသားစုဝင်တွေကိုယ်စား ငွေသာရွာသား ဦးကျော်ဆန်းဝင်း က RFA ကို ပြောပါတယ်။

မိသားစုဝင်တွေရဲ့ ပြောပြချက်အရ ဆင်ဖြူချီကျေးရွာသား ငါးယောက်ဟာ ၂၀၁၃ ခုနှစ်ကတည်းက ဖမ်းဆီးခံ ရတာဖြစ်ပြီး ငွေသာရွာသား တစ်ယောက်က ၂၀၁၇ ခုနှစ်မှာ အဖမ်းခံရတာပါ။ ကံကြီးရွာသား ငါးယောက်က တော့ ၂၀၁၉ ခုနှစ်မှာ အဖမ်းခံရတာလို့ ဆိုပါတယ်။

ရှမ်းပြည်ပြန်လည်ထူထောင်ရေးကောင်စီ RCSS/SSA က ဒု-ဗိုလ်မှူးကြီး အွမ်ခေးကို RFA က ဆက်သွယ် မေးမြန်းရာမှာတော့ စစ်ကိုင်းတိုင်းက ဒေသခံရွာသားတွေကိစ္စ သူ မသိသေးကြောင်းနဲ့ အဖွဲ့အစည်းအတွင်း ပြန်ပြီးစုံစမ်းကြည့်ပါဦးမယ်လို့ ပြောပါတယ်။

KIA နဲ့ TNLA အဖွဲ့က ပြောရေးဆိုခွင့်ရှိသူတွေဆီ RFA က ဒီကနေ့ ဆက်သွယ်ခဲ့ပေမယ့်လည်း တာဝန်ရှိသူတွေ ဖုန်းမကိုင်ကြလို့ ဆက်သွယ်လို့မရခဲ့ပါဘူး။

မိသားစုဝင်တွေက တပ်သားသစ်အဖြစ် ဖမ်းဆီးခံထားရသူတွေ လွတ်မြောက်ဖို့ ဖမ်းဆီးခေါ်ဆောင်သွားတဲ့ တိုင်းရင်းသားလက်နက်ကိုင်အဖွဲ့တွေကို တောင်းဆိုတဲ့အပြင် အစိုးရ ဌာနဆိုင်ရာ အဖွဲ့အစည်းတွေနဲ့ အကူအညီပေးနိုင်တဲ့ တခြားအဖွဲ့အစည်းတွေကိုပါ ဒီနေ့ သတင်းစာရှင်းလင်းပွဲမှာ မေတ္တာရပ်ခံလိုက်ပါတယ်။


RFA Burmese

https://www.rfa.org/burmese/news/three-ethnic-armed-groups-arrest-sagaing-villagers-01312021044735.html

မီဒီယာတွေကို ဆန္ဒပြသူတွေက ခြိမ်းခြောက်နေတယ်လို့ မီဒီယာကောင်စီထုတ်ပြန်

မီဒီယာတွေကို ဆန္ဒပြသူတွေက ခြိမ်းခြောက်နေတယ်လို့ မီဒီယာကောင်စီထုတ်ပြန် ရန်ကုန်မြို့ ဗဟန်းမြို့နယ် ကြေးသွန်းဘုရားရှေ့မှာ UECကို ကန့်ကွက်ပြီး တပ်မတော်ကို ထောက်ခံကြောင်း ၂၀၂၁ ဇန်နဝါရီ ၃၀ရက်နေ့က ဆန္ဒပြစဉ်။ Photo: Aung Thain Kha / RFA

ဆန္ဒပြသတင်းတွေကို ဖော်ပြရေးသားနေတဲ့ သတင်းမီဒီယာဌာနတချို့နဲ့ သတင်းထောက်တွေကို ဆန္ဒပြ သူတွေက မကျေနပ်ဘဲ ခြိမ်းခြောက်နေတာတွေကြောင့် ရန်ကုန်တိုင်းဒေသကြီး ရဲတပ်ဖွဲ့က ကာကွယ်ပေးဖို့ အတွက် မြန်မာနိုင်ငံ သတင်းမီဒီယာ ကောင်စီက အသိပေးအကြောင်းကြားထားပါတယ်။

ဇန်နဝါရီ ၃၀ရက် မနေ့က ရွှေတိဂုံစေတီတော် အရှေ့ဖက်မုခ် ကြေးသွန်းဘုရားအနီးမှာ တပ်မတော် ထောက်ခံတဲ့ ဆန္ဒပြပွဲကို သတင်းယူတဲ့ သတင်းထောက် အမျိုးသမီးတစ်ယောက် ဆံပင်ဆွဲခံရပြီး ညနေပိုင်းမှာ သတင်းဖော်ပြတဲ့ သတင်းဌာနတချို့နဲ့ သတင်းသမားတွေကို ခြိမ်းခြောက်တဲ့စာသားတွေ လူမှုကွန်ရက်မှာ ပျံ့နှံ့လာပါတယ်။

အဲဒီသတင်းတွေကိုဖော်ပြနေတဲ့ သတင်းမီဒီယာဌာနတွေနဲ့ သတင်းသမားတချို့ကို ဆန္ဒပြသူတွေက မကျေနပ်ကြလို့ ဇန်နဝါရီ ၃၀ ရက်နေ့က လူမှုကွန်ရက်စာမျက်နှာကနေ ခြိမ်းခြောက်ရေးသားနေတာတွေ ပျံ့နှံ့နေပါတယ်။

ဒါနဲ့ပတ်သက်ပြီး ရန်ကုန်တိုင်းဒေသကြီးရဲတပ်ဖွဲ့က သတင်းဌာနတွေနဲ့ သတင်းထောက်တွေကို ကာကွယ်ပေးဖို့ အသိပေး အကြောင်းကြားထားတယ်လို့ မြန်မာနိုင်ငံ သတင်းမီဒီယာကောင်စီက ဒီနေ့ ဇန်နဝါရီ ၃၁ ရက်နေ့ ဒီကနေ့ရက်စွဲနဲ့ ထုတ်ပြန်ထားတာဖြစ်ပါတယ်။

အဲဒီအခြေအနေတွေဟာ သတင်းသမားတွေကို ပစ်မှတ်ထားလာတဲ့သဘော ဖြစ်လာတဲ့အတွက် သတိထား ရတော့မှာ ဖြစ်တဲ့အကြောင်း၊ အဲဒီစာသားတွေကိုလည်း Facebook Teamက ဖယ်ထား ရှားထားလိုက်တာကို သိရတဲ့အကြောင်း မြန်မာနိုင်ငံ သတင်းမီဒီယာကောင်စီက ဦးမြင့်ကျော်က ပြောပါတယ်။

အခုလို ခြိမ်းခြောက်တာတွေ ရှိနေတဲ့အတွက် သတင်းသွားယူမယ့် သတင်းသမားတွေကလည်း တစ်ဦး တစ်ယောက်ချင်း ခွဲမနေဘဲ အဖွဲ့လိုက် အတူရှိပြီး တစ်ယောက်နဲ့တစ်ယောက် စောင့်ကြည့်ဖို့လည်း လိုအပ်တဲ့အကြောင်း မှတ်ချက်ပေးပါတယ်။

ကိုဗစ်ကပ်ဘေးကာလအတွင်း လူစုလူဝေးတွေ မလုပ်ကြဖို့ အစိုးရက ထုတ်ပြန် ကြေညာထားတာတွေ ရှိပေမယ့်လည်း အခုလိုဆန္ဒပြပွဲတွေကို ဇန်နဝါရီလအတွင်း ရန်ကုန်၊ နေပြည်တော်၊ မန္တလေး၊ ပုသိမ်နဲ့ မြို့ကြီး တချို့တို့မှာ လုပ်ခဲ့ကြပြီး ဒီရက်ပိုင်းအတွင်း ရန်ကုန်မြို့မှာ နေ့စဉ်ဆက်တိုက် ဆန္ဒပြခဲ့ကြပါတယ်။


RFA Burmese

https://www.rfa.org/burmese/news/protesters-threaten-media-01312021025501.html

ကျိုင်းတုံမြို့နယ်၌ ကားတစ်စီး အရှိန်မထိန်းနိုင်ဘဲ တိမ်းမှောက်ရာ သုံး ဦး သေဆုံး

ကျိုင်းတုံ ဇန်နဝါရီ ၃၁

ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်၊ မိုင်းခွန်ကျေးရွာအုပ်စု၊ သာယာကုန်းကျေးရွာနှင့် ဝမ်အိုင်ကျေးရွာအကြား (၈)မိုင်လမ်းဆုံ အဆင်းတွင် ဇန်နဝါရီ ၃၁ ရက် ကမော်တော်ယာဉ်တစ်စီး အရှိန်မထိန်းနိုင်ဘဲ တိမ်းမှာက်ခဲ့ကြောင်းသိရသည်။

  ကျိုင်းတုံမြို့နယ်၊ နမ့်အင်းကျေးရွာအုပ်စု အာမောဒေကျေးရွာအနီးရှိ (၁၉)မိုင် သဘာဝတရားရိပ်သာ မှ ကျိုင်းတုံမြို့သို့ ယာဉ်မောင်း စိုင်းရီကျောက်(၃၅)နှစ် ကျိုင်းတုံမြို့နေသူမောင်းနှင်သည့် အာရဖတ်(အဖြူရောင်) ကား သည် မိုင်းခွန်ကျေးရွာအုပ်စု၊ သာယာကုန်းကျေးရွာနှင့် ဝမ်အိုင်ကျေးရွာအကြား (၈)မိုင်လမ်းဆုံ အဆင်းတွင် အရှိန်မထိနိုင်ဘဲ လမ်းဘေးသို့ တိမ်းမှာက်ခဲ့ရာ ကားပေါ်တွင် ယာဉ်မောင်းနှင့် ယာဉ်ပေါ်ပါ(၉)ဦးတို့အနက် အမျိုးသမီး သုံး ဦး သေဆုံးခဲ့ပြီး ယာဉ်မောင်းမှာ ထိခိုက်ဒဏ်ရမရရှိဘဲ ကျန် ခြောက်ဦးမှာ ထိခိုက်ဒဏ်ရာများရရှိခဲ့သည်။

ဖြစ်စဉ်နှင့် ပတ်သက်၍ ယာဉ်မောင်း စိုင်းရီကျောက်အား အမှတ်(၁၉)ယာဉ်ထိန်းတပ်ဖွဲ့စု(ကျိုင်းတုံ)မှ အမှုဖွင့်အရေးယူရန် စီစဉ်လျက်ရှိကြောင်း သိရသည်။


အောင်ဇင်မြင့်(ပြန်/ဆက်)

Myanmaalinn

https://www.facebook.com/MYANMAALINNNEWS

Johnson & Johnson ကိုဗစ်ကာကွယ်ဆေး မကြာခင်ထုတ်နိုင်တော့မည်

Johnson & Johnson ထုတ် COVID-19 ကာကွယ်ဆေးအားပြသထားစဉ် (ဓာတ်ပုံ-AP)

အမေရိကန် ဆေးနဲ့ဆေးပစ္စည်းထုတ်လုပ်တဲ့ ကုမ္ပဏီ Johnson & Johnson က ကမ္ဘာတလွှား စမ်းသပ်မှုတွေ လုပ်ခဲ့တဲ့နောက်မှာ COVID-19 ရောဂါကူးစက်မှုအတွက် ၆၆ ရာခိုင်နှုန်း ကာကွယ်နိုင်စွမ်းရှိတဲ့ ဆေးကို သူတို့ထုတ်နိုင်ပြီဖြစ်ကြောင်း ပြောကြားလိုက်ပါတယ်။

တကြိမ်သာထိုးဖို့ လိုအပ်တဲ့ သူတို့ရဲ့ ကာကွယ်ဆေးကို သူတို့ကုမ္ပဏီပိုင် Belgian အခြေစိုက် Janssen ဆေးကုမ္ပဏီမှာ ထုတ်လုပ်တာ ဖြစ်ပြီး ဒီဆေးဟာ အသည်းအသန်နာမကျန်းဖြစ်မှုကို ၈၅ % အထိ ထိရောက်စွာ ကာကွယ်ပေးနိုင်တဲ့အပြင် တောင်အာဖရိက ဗီဇပြောင်း ပိုးသစ်ကိုပါ ခုခံနိုင်စွမ်း ရှိပါတယ်။ ဒီဆေးကို အမေရိကန်ပြည်ထောင်စု၊ တောင်အာဖရိကနဲ့ ဘရာဇီးလ် နိုင်ငံတွေမှာ လူပေါင်း ၄၄,၀၀၀ နဲ့စမ်းသပ်ရာမှာ ဒီဆေးထိုးထားသူ တယောက်မှ သေဆုံးတာမျိုး မရှိဘူးလို့လည်း ကုမ္ပဏီက ပြောပါတယ်။

ဒီကာကွယ်ဆေးကို တကြိမ်ထိုးရုံနဲ့ ရောဂါပြင်းထန်မှု သိသိသာ လျော့ကျနိုင်တာနဲ့ ခံနိုင်ရည် ကောာင်းကောင်းရှိတာ တွေ့ရတဲ့အတွက် ဒါဟာ ကမ္ဘာ့လူထုကျန်းမာရေးဆိုင်ရာ တုံ့ပြန်ဆောင်ရွက်မှုမှာ သိပ်ကို အရေးပါတဲ့ အရာတခု ဖြစ်ကြောင်း Johnson & Johnson က သိပ္ပွံပညာရှင်အကြီးအကဲ Paul Stoffels ကပြောပါတယ်။ ဒါ့အပြင် တကြိမ်သာထိုးဖို့ လိုအပ်တဲ့ ဒီကာကွယ်ဆေးဟာ ဒီကပ်ရောဂါဆိုင်ရာအတွက် အကောင်းဆုံးရွေးချယ်စရာတခု အဖြစ် WHO က စဉ်းစားဖို့ရှိကြောင်းလည်း ပြောပါတယ်။

ဒီကာကွယ်ဆေး အလုံးပေါင်း သန်းတရာ ဝယ်ယူဖို့ အမေရိကန်နိုင်ငံက သဘောတူပြီးဖြစ်သလို နောက်ထပ် အလုံးပေါင်း သန်း ၂၀၀ ထပ်ဝယ်ဖို့ပါ ရှိနေတယ်လို့လည်း ပြောပါတယ်။ ကိုရိုနာဗိုင်းရပ်စ် ကပ်ရောဂါတိုက်ဖျက်ရေးအတွက် အတည်ပြုပေးခဲ့ပြီး ဖြစ်တဲ့ကာကွယ်ဆေးတွေထဲမှာ Johnson & Johnson က စတုတ္ထမြောက်ဖြစ်ပါတယ်။

သောကြာနေ့အထိဆို ဒီရောဂါအကူးစက်ခံရသူဟာ ကမ္ဘာတလွှားမှာ ၁၀၁ သန်းကျော်နေပြီဖြစ်ကြောင်း Johns Hopkins တက္ကသိုလ် စစ်တမ်းမှာ ဖေါ်ပြထားပါတယ်။ အမေရိကန်မှာ ကူးစက်သူ ၂၅ သန်းကျော်နဲ့ အများဆုံး ဖြစ်ပြီး အိန္ဒိယက ၁၀ သန်းခွဲကျော်နဲ့ ဒုတိယ အများဆုံး၊ ဘရာဇီးလ်က ကူးစက်သူ ၉ သန်းနဲ့ တတိယအများဆုံး ဖြစ်ပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/Johnson-covid19-vaccine-janssen-who-/5757652.html

AstraZeneca ကိုဗစ်ကာကွယ်ဆေး ဥရောပတိုက်မှာ အသုံးပြုဖို့ အီးယူခွင့်ပြု

Oxford တက္ကသိုလ်ထုတ် AstraZeneca ကိုဗစ်ကာကွယ်ဆေး (ဓာတ်ပုံ-AP)

အီးယူ ဥရောပသမဂ္ဂ ဆေးဘက်ဆိုင်ရာ စည်းမျဉ်းစည်းကမ်း ချမှတ်သူတွေက သောကြာနေ့မှာ AstraZeneca Covid 19 ကာကွယ်ဆေးကို အရေးပေါ် အသုံးပြုခွင့်ပေးလိုက်ပါပြီ။ ဒါဟာ ဥရောပဒေသအတွက် တတိယမြောက်အတည်ပြုပေးတဲ့ ကိုဗစ်ကာကွယ်ဆေး ဖြစ်ပါတယ်။

အီးယူဟာ ဒေသတွင်း နေထိုင်သူတွေအတွက် ကာကွယ်ဆေးထိုးပေးရေး လုပ်ဆောင်ဖို့ နှေးကွေးနေတယ်လို့ အဝေဖန်ခံနေရတာပါ။ အခုတော့ အသက် ၅၅ နှစ်အထက်တွေအတွက် ဒီဆေးရဲ့ ထိရောက်မှုနဲ့ပတ်သက်တဲ့ အချက်လက် အပြည့်အစုံမရတာကို စိုးရိမ်နေတဲ့ကြားကပဲ ဒီဆေးကို လူကြီးပိုင်းတွေ အတွက်ပါ ထိုးပေးဖို့ EMA ဥရောပဆေးဘက်ဆိုင်ရာအဖွဲ့ ကျွမ်းကျင်သူများကော်မတီက တညီတညွတ်ထဲ အကြံပေးခဲ့ကြတာပါ။

ကိုရိုနာဗိုင်းရပ်စ်အတွက် ဒီဆေးရဲ့ ထိရောက်မှုဟာ ရာခိုင်နှုန်း ၆၀ လောက် ရှိကြောင်း လူနဲ့ စမ်းသပ်မှုတွေမှာ တွေ့ရတာကြောင့် ဒီဆေးကို အခြေနေအရ ဒါမှမဟုတ် အရေးပေါ်အသုံးပြုခွင့် ချပေးတာဖြစ်ကြောင်း EMA အကြီးအကဲ Emer Cooke က သတင်းထောက်တွေကို ပြောပါတယ်။ အရင်အတည်ပြုပေးခဲ့တဲ့ Pfizer-BioNTech နဲ့ Moderna ကာကွယ်ဆေး တွေကတော့ ထိရောက်မှု ရာခိုင်နှုန်း ၉၀ ဝန်းကျင်မှာ ရှိနေတာပါ။

ဒီဆေးဟာ Pfizer-BioNTech ဆေးလို အဆမတန်အေးတဲ့ အနေထားမှာ သိုလှောင်ဖို့မလိုသလို စျေးနှုန်းအားဖြင့်လည်း အတော်သက်သာတဲ့အတွက် အီးယူ ကျန်းမာရေးအရာရှိ အများအပြားက ဒီ AstraZeneca ကာကွယ်ဆေးအတည်ပြုရေး ပါဝင် လုပ်ဆောင်လာကြပါတယ်။

ဒီဆေးကို အသက် ၁၈ နှစ်နဲ့ ၅၅ နှစ်ကြား လုပ်အားပေးတွေနဲ့ စမ်းသပ်မှုပေါ် အခြေခံပြီး ခံနိုင်ရည် ရှိမရှိ စမ်းသပ်ထားတာ ဖြစ်ပေမယ့် သက် ၅၅ နှစ်အထက်တွေလည်း ကာကွယ်ဆေးရ ဖို့ EMA ကျွမ်းကျင်သူတွေက ဆုံးဖြတ်ကြောင်းလည်း Emer ကပြောပါတယ်။

AstraZeneca ကာကွယ်ဆေးကို ဗြိတိန်နဲ့ တခြား နိုင်ငံအများအပြားက အသုံးပြုခွင့် အတည်ပြုပေးထားတာ ဖြစ်ပြီး အမေရိကန် အစားအသောက်နဲ့ ဆေးဝါးစီမံခန့်ခွဲရေးဌာန FDA ကတော့ အရေးပေါ်အသုံးပြုခွင့် ချပေးဖို့ AstraZeneca ရဲ့ လေ ျှာက်ထားချက်ကို စဉ်းစားနေဆဲ ဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/EU-AstraZeneca-vaccine-FDA-Pfizer-emergency-/5757364.html

ကိုဗစ်ကာကွယ်ဆေး ထိုးပြီးသူတွေ ဘေးထွက်ဆိုးကျိုး ခံစားရသူနည်းပါး

 
ကိုဗစ် ၁၉ ကာကွယ်ဆေး ထိုးပြီးနောက်ပိုင်း ဘေးထွက်ဆိုးကျိုး ဆိုးဆိုးဝါးဝါး ခံစားရတာ မရှိဘူးလို့ ကာကွယ်ဆေးထိုးပြီးတဲ့သူတချို့က ပြောကြပါတယ်။

ကိုရိုနာဗိုင်းရပ်စ် ကာကွယ်ဆေးကို မြန်မာနိုင်ငံမှာ ဇန်နဝါရီ ၂၇ ရက်နေ့က ကျန်းမာရေးဝန်ထမ်းတွေနဲ့ စေတနာ့ဝန်ထမ်းတွေကို စတင်ထိုးပေးခဲ့ပါတယ်။ အဲဒီနောက်ပိုင်း ဆေးရဲ့ဘေးထွက်ဆိုးကျိုးအနေနဲ့ သာမန်ကိုက်ခဲတဲ့ ဝေဒနာခံစားခဲ့သူတွေ ရှိပါတယ်။

ဆေးထိုးပြီး ၁၂ နာရီလောက်အကြာမှာ ကိုက်ခဲလာတဲ့အတွက် ဆေးဝယ် သောက်လိုက်ကြပြီးနောက်ပိုင်း သက်သာသွားတယ်လို့ ပဲခူးမြို့က သကျနွယ်နာမှုနဲ့ လူမှုကူညီရေးအသင်း အတွင်းရေးမှူး ကိုဖြိုးမင်းဗိုလ်က ပြောပါတယ်။

ပဲခူးတိုင်း ပဲခူးမြို့က သကျနွယ်နာမှုနဲ့ လူမှုကူညီရေးအသင်းက စေတနာ့ဝန်ထမ်း ၁၅ ယောက်လည်း ကိုဗစ်ကာကွယ်ဆေးထိုးခဲ့ကြတာပါ။

ကိုဗစ် ၁၉ ရောဂါဖြစ်ပွားမှု နောက်ဆုံးအခြေအနေနဲ့ ပတ်သက်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဇန်နဝါရီ ၂၈ ရက်နေ့က မိန့်ခွန်းပြောရာမှာ တချို့က သာမန်တုပ်ကွေး လက္ခဏာလောက်သာ ခံစားရပြီး ဆိုးဆိုး ဝါးဝါးခံစားရတာ မရှိဘူးလို့ ပြောခဲ့ပါတယ်။

ဆေးထိုးပြီးတဲ့ ကျန်းမာရေးဝန်ထမ်းနဲ့ စေတနာ့ဝန်ထမ်း သုံးပုံ နှစ်ပုံလောက်ပဲ ကိုက်ခဲတာ၊ ချမ်းတာ၊ အဖျားရှိသလို ဖြစ်တာတွေ ရှိခဲ့တယ်လို့ ဒေါ်အောင်ဆန်းစုကြည်က ပြောခဲ့တာပါ။

ကာကွယ်ဆေးထိုးပြီးချိန်မှာ ဆေးထိုးတဲ့နေရာနာတာ၊ နီတာ၊ ရောင်တာ၊ ခေါင်းကိုက်တာ၊ ကိုယ်လက် ကိုက်ခဲတာ၊ နုံးချိပြီး မအီမသာ ဖြစ်တာတွေကတော့ လူ ၁၀ ယောက်မှာ တစ်ယောက်ထက်ပိုပြီး ခံစားရ နိုင်ခြေရှိပြီး ဆေးထိုးထားတဲ့နေရာမှာ အကျိတ်ဖြစ်တာ၊ ဖျားတာ၊ အန်တာ၊ ရာသီတုပ်ကွေး သာမာန် လက္ခဏာတွေ ပေါ်တာတွေက လူ ၁၀ ယောက်မှာ တစ်ယောက်လောက်သာ ခံစားရနိုင်ခြေရှိတဲ့အကြောင်း၊ မူးဝေတာ၊ ယားယံတာ၊ ချွေးထွက်လွန်တာ၊ အစားစားချင်စိတ်လျော့တာ၊ ဗိုက်အောင့်တာ၊ ပြန်ရည်ကျိတ်များ ကြီးတာတွေက လူ အယောက် ၁၀၀မှာ တစ်ယောက်သာ ခံစားရနိုင်ခြေရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။

ကာကွယ်ဆေးကို ဇန်နဝါရီ ၂၉ မှာ ပြည်သူ့လွှတ်တော်ကိုယ်စားလှယ်တွေ၊ ဇန်နဝါရီ ၃၀ ဒီကနေ့ မှာလည်း အမျိုးသားလွှတ်တော်ကိုယ်စားလှယ်တွေနဲ့ တပ်မတော်သား ကိုယ်စားလှယ်တွေကို ထိုးပေးနေပါတယ်။

ဒီနေ့ ဇန်နဝါရီ ၃၀မှာ ဆေးထိုးပြီး နာရီဝက်အကြာ ခဏနားနေတဲ့ အမျိုးသားလွှတ်တော် ကိုယ်စားလှယ် တစ်ယောက်ဖြစ်သူ ဦးစောမိုးမြင့်က ဆေးထိုးချိန်မှာ ဘာမှ ထူးထူးခြားခြား ခံစားရတာ မရှိပေမယ့် နောက်ပိုင်းမှာ ကိုက်ခဲတာ၊ ယားယံတာတွေ ဖြစ်လာရင် သောက်ဖို့ ဆေးတွေပါ ပေးထားတယ်လို့ ပြောပါတယ်။

အိန္ဒိယနိုင်ငံကနေ လက်ဆောင်အဖြစ်ပေးတဲ့ ကိုဗစ်ကာကွယ်ဆေး တစ်သန်းခွဲ ဇန်နဝါရီ ၂၂ ရက်နေ့က မြန်မာနိုင်ငံကို ရောက်လာတာပါ။ နောက်ထပ်လည်း ကာကွယ်ဆေး သန်း ၃၀ကို အိန္ဒိယနိုင်ငံကနေ မြန်မာအစိုးရက ဝယ်ယူထားပြီး အဲဒီ အထဲက ကာကွယ်ဆေး နှစ်သန်းဟာ အခုလာမယ့် ဖေဖော်ဝါရီ ပထမပတ်ထဲမှာ ရာက်လာဖို့ရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။

တစ်နိုင်ငံလုံးအတိုင်းအတာနဲ့ ဖေဖော်ဝါရီ ၅ ရက်မှာ ပြည်ထောင်စုအဆင့်၊ တိုင်းဒေသ ကြီး/ပြည်နယ်အဆင့် အစိုးရအဖွဲ့ဝင်တွေနဲ့ ပြည်သူတွေကို စထိုးမှာဖြစ်ပါတယ်။

အဲဒီလို ထိုးတဲ့အခါမှာ မိမိအိမ်မှာနေထိုင်ရေးအစီစဉ် Stay at Home မှာရှိနေတဲ့ မြို့နယ်တွေက အသက်ကြီး သူတွေ၊ ရောဂါအခံရှိသူတွေနဲ့ ရောဂါရရှိဖို့လွယ်သူတွေကို ဦးစားပေးမှာပါ။

ကာကွယ်ဆေးရရှိတဲ့ အခြေအနေပေါ်မူတည်ပြီး Stay at home မြို့နယ်တွေထဲက ကူးစက်မှုများတဲ့ မြို့နယ်၊ နေရာဒေသတွေကို ဦးစားပေးသွားမှာဖြစ်ပြီး နောက်ထပ်ကာကွယ်ဆေး ရလာတဲ့ အရေအတွက်အပေါ် မူတည်ပြီးတော့လည်း ကျန်တဲ့အုပ်စုတွေကို ဦးစားပေးအစီအစဉ် အလိုက် ဆက်တိုက် ထိုးပေးသွားမှာ ဖြစ်တယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။


RFA Burmese

https://www.rfa.org/burmese/news/covid-shield-vaccine-less-side-effects-01302021063632.html

ကန့်ကွက်ခံရတဲ့ တွံတေးက ဓါတ်မြေသြဇာစက်ရုံ ပိတ်ဖို့ တိုင်းဝန်ကြီးချုပ်ညွှန်ကြား

ကန့်ကွက်ခံရတဲ့ တွံတေးက ဓါတ်မြေသြဇာစက်ရုံ ပိတ်ဖို့ တိုင်းဝန်ကြီးချုပ်ညွှန်ကြား တွံတေး-မအူပင်ကားလမ်းဘေးက မြန်မာ့ရွှေနဂါးဓာတ်မြေသြဇာစက်ရုံကို ၂၀၂၀ ဒီဇင်ဘာ ၂၉ရက်နေ့က တွေ့ရစဉ် / Photo: Ye Win Htut Facebook

အနံ့ဆိုး၊ ရေဆိုးနဲ့ အမှုန်တွေကြောင့် ကျန်းမာရေးထိခိုက်နေလို့ အရေးယူပေးဖို့ ဒေသခံတွေ တောင်းဆိုနေတဲ့ ရန်ကုန်တိုင်း၊ တွံတေးနဲ့ မအူပင်ကားလမ်းမပေါ်က ရွှေနဂါး ဓါတ်မြေသြဇာ စက်ရုံကို ဇန်နဝါ ရီလ ၂၉ ရက် မနေ့ကစပြီး ပိတ်ထားဖို့ ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ညွှန်ကြားလိုက်ပါတယ်။

ဇန်နဝါရီလ ၂၉ ရက် မနေ့က ဝန်ကြီးချုပ်ကိုယ်တိုင် ကွင်းဆင်းစစ်ဆေးပြီးနောက် စက်ရုံပိတ်ထားဖို့နဲ့၊ စက်ရုံထဲက ပစ္စည်းတွေကိုလည်း ရွှေလင်ပန်းစက်မှုဇုန်မှာရှိတဲ့ ကုမ္ပဏီပိုင်နေရာကို ရွှေ့ပြောင်းဖို့ ညွှန်ကြားခဲ့ပြီး ထပ်မံလည်ပတ်မှုရှိ/မရှိ စက်ရုံကို လုံခြုံရေးနဲ့ ၂၄ နာရီ စောင့်ကြည့်စေခိုင်းခဲ့တယ်လို့ ကန်ပတ်ရိုးရွာသား ပြည်သူ့ပါတီရဲ့ ရန်ကုန်တိုင်းအတွင်းရေးမှူး ဦးရဲဝင်းထွဋ်က RFA ကို ဒီကနေ့ ပြောပါ တယ်။

ထိခိုက်ပျက်စီးသွားတဲ့ ပတ်ဝန်းကျင်အနေအထားကို လေ့လာဆန်းစစ်ပြီး ပြန်လည် ပြင်ဆင်နိုင်ဖို့ အစိုးရဘက်က ပညာရှင်တွေပါဝင်တဲ့ အဖွဲ့တစ်ဖွဲ့ စေလွှတ်ပေးမယ့်အပြင် စက်ရုံကိုအရေးယူဖို့လည်း တည်ဆဲဥပဒေတွေအတိုင်း လုပ်ဆောင်သွားမယ်လို့ ဝန်ကြီးချုပ်က ပြောခဲ့ကြောင်း ဦးရဲဝင်းထွဋ်က ပြောပါတယ်။

ရွှေနဂါးဓာတ်မြေသြဇာစက်ရုံ လူ့စွမ်းအားအရင်းအမြစ်ဌာနရဲ့ စီမံခန့်ခွဲရေးမှူး ဦးစန်းထွန်းဦးကလည်း ဝန်ကြီးချုပ်ကွင်းဆင်းစစ်ဆေးပြီးနောက် စက်ရုံကို ပိတ်ခိုင်းထားတာ မှန်ကန်ကြောင်းနဲ့ ဒေသခံတွေနဲ့ ပတ်ဝန်းကျင်အတွက် ထိခိုက်နေတာတွေကို ပညာရှင်တွေနဲ့ ဆွေးနွေးပြီး ညွှန်ကြားချက်တွေအတိုင်း ဆက် လက်လုပ်ဆောင်သွားမယ်လို့ RFA ကို ဒီကနေ့ပြောပါတယ်။

ဓာတ်မြေသြဇာစက်ရုံကထွက်တဲ့ အနံ့ဆိုးတွေကြောင့် ရွာသူ/ရွာသားတွေ ခေါင်းမူး၊ ခေါင်းကိုက်၊ မျက်စိစပ် စတဲ့ ဝေဒနာတွေ ခံစားနေရတဲ့အပြင် စက်ရုံကထွက်တဲ့ ရေဆိုးတွေဝင်လို့ ရွာရေကန်တွေလည်း ပျက်စီးတာတွေရှိတယ်လို့ ဒေသခံတွေက ပြောပါတယ်။

အဲဒီစက်ရုံကြောင့် ဒေသခံတွေ ကျန်းမာရေးထိခိုက်နေတဲ့အတွက် အရေးယူပေးဖို့ ပြီးခဲ့တဲ့နှစ် ဒီဇင်ဘာ လကုန်ကတည်းက ရန်ကုန်တိုင်းဝန်ကြီးချုပ်ထံ တိုင်ကြားထားပေမယ့် ထူးခြားမှုမရှိလို့ဆိုပြီး ဇန်နဝါရီလ ၂၆ ရက်နေ့မှာ ဒေသခံ ၃၀ လောက်က ဝန်ကြီးချုပ်နဲ့ တွေ့ဆုံခွင့်ရဖို့ တိုင်းအစိုးရရုံးရှေ့မှာ သွားရောက် တောင်းဆိုခဲ့တာပါ။

မြန်မာနိုင်ငံသားပိုင် ရွှေနဂါးဓာတ်မြေသြဇာစက်ရုံဟာ ဓာတ်မြေသြဇာတွေ တင်ချတာနဲ့ သိုလှောင်ဖို့ တစ်ခုထဲအတွက် ငှားရမ်းထားပေမယ့် ဓာတ်မြေသြဇာထုတ်တဲ့ လုပ်ငန်းစဉ်တွေဖြစ်တဲ့ ဓာတ်မြေသြဇာ ရောစပ်တာ၊ ကြိတ်ခွဲထုတ်ပိုးတာတွေကို လုပ်ဆောင်နေတာကြောင့် လုပ်ငန်းတွေရပ်ထားဖို့ ရေအရင်းအမြစ်နဲ့ မြစ်ချောင်းများဖွံ့ဖြိုးတိုးတက်ရေး ဦးစီးဌာနက အခုလ ၁၅ ရက်နေ့ကတည်းက အကြောင်းကြားထားတဲ့ စက်ရုံလည်းဖြစ်ပါတယ်။


RFA Burmese

https://www.rfa.org/burmese/news/shwe-nagar-fertilizer-factory-close-01302021042301.html

အခြေခံဥပဒေကို ကာကွယ်မယ်လို့ တပ်မတော်ပြော၊ NLD သဘောထားတုံ့ပြန်

ဓာတ်ပုံ ရင်းမြစ်, Myanmar State Counsellor Office

တပ်မတော်က အာဏာသိမ်းယူရေး အယူအဆ ရှိနေသလားဆိုတဲ့ စိုးရိမ်ပူပန်မှုတွေ ဖြစ်ပေါ်နေချိန်မှာပဲ တပ်မတော်အနေနဲ့ အခြေခံ ဥပဒေကို ကာကွယ်စောင့်ရှောက်မှာ ဖြစ်ကြောင်းနဲ့ ပြဋ္ဌာန်း ဥပဒေနဲ့အညီဆောင်ရွက်မယ်လို့ ထုတ်ပြန်လိုက်ပါတယ်။

ပြီးခဲ့တဲ့ရက်ပိုင်းက တပ်ချုပ်က တပ်မတော်အရာရှိကြီးတွေကို ပြောခဲ့တဲ့ မိန့်ခွန်းမှာ အခြေခံ ဥပဒေကို လေးစားလိုက်နာမှု မရှိရင် ဖျက်ပစ်ရမယ်လို့ ပြောခဲ့ပြီးတဲ့နောက် စိုးရိမ်ပူပန်မှုတွေ ဖြစ်ပေါ်လာခဲ့တာ ဖြစ်ပါတယ်။

ဒါပေမဲ့ ဒီကနေ့ ဇန်နဝါရီ ၃၀ ရက် ရက်စွဲနဲ့ ထုတ်ပြန်ချက်မှာတော့ အဲဒီမိန့်ခွန်းမှာ ပြောကြားချက်ဟာ အခြေခံဥပဒေရဲ့ သဘောသဘာဝကို နားလည်သဘောပေါက်အောင် ဆွေးနွေးခဲ့ခြင်း ဖြစ်တယ်လို့ ဆိုပါတယ်။

ဒါ့အပြင် အဲဒီ ဇန်နဝါရီ ၂၇ ရက် မိန့်ခွန်းက ပြောကြားချက်ကို တချို့အဖွဲ့အစည်းတွေနဲ့ မီဒီယာတွေက တပ်မတော်က အခြေခံဥပဒေကို ဖျက်သိမ်းလိမ့်မယ်လို့ လိုရာဆွဲ ပြောဆိုရေးသားနေတယ်လို့လည်း ဆိုပါတယ်။

တပ်မတော်ရဲ့ အခုလို ကြေညာချက် မထွက်ခင် တစ်ရက်မှာတော့ ပြည်သူတွေ စိုးရိမ်ပူပန်မှုတွေ ရှိနေကြောင်းနဲ့ နိုင်ငံအကျိုး ရှေးရှုပြီး အစိုးရနဲ့ တပ်မတော်တို့ ညှိနှိုင်း အဖြေရှာပါလို့ သံဃာအကြီးအကဲတွေက ထုတ်ပြန်ချက်ကြေညာ မေတ္တာရပ်ခံခဲ့ပါတယ်။

၂၀၂၀ ရွေးကောက်ပွဲ မဲစာရင်း အငြင်းပွားမှုတွေကို ဖြေရှင်းပေးဖို့ တပ်မတော်ရဲ့ တောင်းဆိုမှုတွေ မပြေမလည် ဖြစ်ခဲ့ပြီးနောက် အခုလို အခြေအနေတွေ ဖြစ်ပေါ်လာခဲ့တာပါ။

ကရင်တိုင်းရင်းသား အစည်းအရုံး KNU ကလည်း ဒီအခြေအနေတွေကို ဖြေရှင်းနိုင်ဖို့ အားလုံးပါဝင်နိုင်တဲ့ အရေးပေါ် ဆွေနွေးပွဲ တစ်ရပ်ခေါ်ယူဖို့ တောင်းဆိုခဲ့ပါတယ်။

NLD ဘက်က တုံပြန်မှု

ရွေးကောက်ပွဲမှာ မဲအများစု အနိုင်ရထားတဲ့ အမျိုးသားဒီမိုကရေစီအဖွဲ့ချုပ် ပါတီ NLD က ပြောခွင့်ရ ဒေါက်တာမျိုးညွန့်က "သူတို့က လက်နက်ကိုင် အဖွဲ့အစည်း ဖြစ်တယ်လေ။ အကယ်၍ ဥပဒေကို အလေးမထားတော့ဘူးဆိုရင် ဘယ်အချိန်ပဲဖြစ်ဖြစ် အာဏာသိမ်းလို့ရပါတယ်။…လက်ရှိအခြေခံဥပဒေကို ဖျက်သိမ်းမှာ မဟုတ်ဘူး၊ ဥပဒေအတိုင်းပဲ ဆောင်ရွက်မယ်၊ ဆွေးနွေးညှိနှိုင်းမယ်ဆိုတာကတော့ ကြိုဆိုပါတယ် " လို့ ပြောပါတယ်။

"ဒါပေမဲ့ ရွေးကောက်ပွဲ ကော်မရှင်က ထုတ်ပြန်ထားသလိုပဲ မဲဆန္ဒရှင် ပြည်သူတွေရဲ့ ဆန္ဒနဲ့ ရလဒ်ကိုတော့ အပေးအယူ ညှိနှိုင်းလို့ မရပါဘူး။ ဥပဒေဘောင်ကျော်တဲ့ ကိစ္စတွေကိုတော့ လိုက်လျောလို့ မရပါဘူး"လို့ ဆိုပါတယ်။

"ဥပဒေအရဆိုရင် လွှတ်တော်ကို ရွေးကောက်ပွဲအပြီး ရက်ပေါင်း ၉၀ မှာ ကျင်းပရမယ်။ မကျင်းပရင် ဒီ ရွေးကောက်ပွဲ ရလဒ်က ပျက်ပြယ်သွားမှာ။ အဲတော့ ဒါကို ကျော်လွန်ပြီး ဘယ်ဥပဒေ၊ ဘယ်အချက်အလက်အရ ရွှေ့ဆိုင်းနိုင်တယ်ဆိုတာကိုတော့ ပြောဖို့သင့်ပါတယ်။ တောင်းဆိုမှု သက်သက်ရှိတိုင်းတော့ ဥပဒေကို ကျော်လွန်ပြီး လိုက်လျောလို့ မရဘူးဆိုတာ ပြောထားပြီးပါပြီ" လို့ ပြောပါတယ်။

တင်းမာမှု ဖြေရှင်းရေး

တပ်မတော်ရဲ့ ဒီကနေ့ ထုတ်ပြန်ချက်ကြောင့် တင်းမာတဲ့ အနေအထားကနေ လျော့ကျသွားတယ်လို့ နိုင်ငံရေးပါတီတွေ၊ အရပ်ဘက်အဖွဲ့အစည်းတွေက မှတ်ယူခဲ့ကြပါတယ်။

KNU အထွေထွေအတွင်းရေးမှူး ပဒိုစောတာဒိုမှူးက မတူကွဲပြားမှုတွေရှိတဲ့ လူ့အဖွဲ့အစည်းမှာ အာဏာ တစ်ခုတည်းနဲ့ဒီနိုင်ငံကို ထိန်းချုပ်လို့ မရဘူး၊ ရန်ဘက်အသွင် ဆန့်ကျင်ဘက် ဖြစ်နေတာတွေအတွက် အမျိုးသားပြန်လည်သင့်မြတ်ရေးကို မလုပ်လို့ မရဘူး၊ အမျိုးသားပြန်လည် သင့်မြတ်ရေးအတွက် နာကျင်မှုတွေကို ဝေမျှခံစား အသိအမှတ်ပြုပြီး ဘုံရည်မှန်းချက် ချပြီး သွားမှ နိုင်ငံ အနာဂတ် လှပမယ်လို့ ပြောပါတယ်။

နိုင်ငံရေးအကြပ်အတည်းလို့ ယူဆပြီး ဖြစ်ပေါ်လာတဲ့ တင်းမာမှုတွေအပေါ် သိက္ခာရှိရှိ ရပ်တည်ဖြေရှင်းဖို့ လိုတယ်လို့လည်း ရွေးကောက်ပွဲတွေကို စောင့်ကြည့်လေ့လာခဲ့ကြတဲ့ အဖွဲ့တွေထဲက တစ်ခုဖြစ်တဲ့ဖန်တီး အိမ်ရဲ့ အမှုဆောင်ဒါရိုက်တာ ဒေါ်ခင်လေးငယ်က ဘီဘီစီကိုပြောပါတယ်။

မြန်မာနိုင်ငံဆိုင်ရာ ရုရှားသံအမတ်ကြီး Nikolay Listopadov က မြန်မာနိုင်ငံမှာ ဖြစ်ပေါ်နေတဲ့ အခြေအနေတွေကို ချစ်စကိုရှည်စေ မုန်းစကိုတိုစေဆိုတဲ့အတိုင်းနဲ့ လက်ရှိ အခြေအနေကို ညှိနှိုင်းဆွေးနွေးပြီး ငြိမ်းချမ်းစွာ အဖြေရှာနိုင်ပါစေလို့ ဇန်နဝါရီ ၃၀ ရက်မှာ ဗီဒီယိုကနေတဆင့် မြန်မာဘာသာနဲ့ ပြောဆိုပါတယ်။

ရွေးကောက်ပွဲစောင့်ကြည့်ခဲ့ကြတဲ့ ပြည်တွင်းအရပ်ဘက် အဖွဲ့အစည်း ၁၂ခုတို့ကလည်း ရွေးကောက်ပွဲ ကော်မရှင်မှာ အားနည်းချက်တွေရှိခဲ့ပေမယ့် ရွေးကောက်ပွဲရလဒ်တွေကတော့ မဲဆန္ဒရှင်အများစု သဘော ထားနဲ့ အညီရရှိထားတဲ့ ရွေးကောက်ပွဲရလဒ်ဖြစ်လို့ ရလဒ်ကိုလက်ခံပြီး တပ်မတော်အပါအဝင် သက်ဆိုင်ရာ နိုင်ငံရေးပါတီတွေကနိုင်ငံတည်ငြိမ်ရေးကို ထိန်းသိမ်းပြီး အာဏာလွှဲပြောင်းရေးလုပ်ငန်းချောမွေ့ရေးဝိုင်းဝန်း ဆောင်ရွက်ဖို့ မနေ့ကပဲ ထုတ်ပြန်တိုက်တွန်းထားပါတယ်။

အစိုးရကတော့ နေပြည်တော်မှာ ရွေးကောက်ပွဲ အနိုင်ရ ကိုယ်စားလှယ်အသစ်တွေနဲ့ ကျင်းပမယ့် လွှတ်တော်တွေကို ဖေဖော်ဝါရီ ၁ ရက်က စပြီး ကျင်းပဖို့ရှိပါတယ်။


BBC Burmese

https://www.bbc.com/burmese/55872369

ကုလအတွင်းရေးမှူးချုပ် နယူးယောက်မှာ ကိုဗစ်ကာကွယ်ဆေးထိုး

Guterres ကိုဗစ်ကာကွယ်ဆေးထိုးစဉ် (ဓာတ်ပုံ-UN)

ကုလသမဂ္ဂ အတွင်းရေးမှုးချုပ် Antonio Guterres ဟာ နယူးရောက် Bronx မှာ ရှိတဲ့ Adlai E Stevenson အထက်တန်းကျောင်းမှာ ဖွင့်ထားတဲ့ ကာကွယ်ဆေးထိုးစင်တာကို ကြာသပတေးနေ့က သွားရောက်ပြီး ၂ ကြိမ်ထိုးဖို့လိုအပ်တဲ့ COVID-19 ကာကွယ်ဆေးကို ပထမအကြိမ်ထိုးခဲ့ပါတယ်။

“ကာကွယ်ဆေးရလာပြီဖြစ်တဲ့ အခွင့်အလမ်းကို အသုံးချပြီး တတ်နိုင်သမျှ အမြန်ဆုံး ဆေးထိုးကြဖို့ အားလုံးကို တိုက်တွန်းလိုပါတယ်” လို့ ပြောသွားတာပါ။ ကုလသမဂ္ဂ ဝန်ထမ်းတွေနဲ့ သံတမန်တွေကိုပါ ကာကွယ်ဆေးထိုးတဲ့ အစီအစဉ်ထဲမှာ ထည့်သွင်းပေးတဲ့ နယူးယောက် တာဝန်ရှိသူတွေ ကိုလည်း ကျေးဇူးတင်ကြောင်း ပြောပါတယ်။

ဒါ့အပြင် ဒီရောဂါ ကာကွယ်ဆေးကို နေရာတိုင်းက လူတိုင်း ထိုးနိုင်အောင် လုပ်ရမှာ ဖြစ်ကြောင်းလည်း သူ့ ရဲ့ တွစ်တာကနေ ရေးပါတယ်။ ဒီကပ်ရောဂါအတွက် လူတိုင်းစိတ်ချရတဲ့ အနေထား မရောက်မချင်း ဘယ်သူမှ စိတ်ချလက်ချ နေနိုင်မှာ မဟုတ်ကြောင်းလည်း ပြောပါတယ်။

နယူးရောက်မှာ နေထိုင်သူ အသက် ၆၅ နှစ် အထက်ရှိသူတွေကို ဆေးထိုးပေးတဲ့ အစီအစဉ်လုပ်ဆောင်နေချိန် ဖြစ်တဲ့အတွက် အသက် ၇၁ နှစ် ရှိပြီဖြစ်ပြီဖြစ်တဲ့ အတွင်းရေးမှူးချုပ် Guterres လည်း ဆေးထိုးခွင့်ရခဲ့တာ ဖြစ်ပါတယ်။ အခု အသုတ် ဆေးထိုးဖို့ အကျံူးဝင်သူတွေက အသက် ၆၅ နှစ် အထက်လူကြီးပိုင်းတွေ၊ ကျောင်းဝန်ထမ်းတွေ၊ အရေးပေါ်ဆေးဝန်ထမ်းတွေ၊ သယ်ယူပို့ဆောင်ရေး ဝန်ထမ်းတွေနဲ့ ကုန်စုံဆိုင်ဝန်ထမ်းတွေ ပါဝင်ပါတယ်။

ကာကွယ်ဆေးကို အများပြည်သူရှေ့မှာ ထိုးနှံမှာ ဖြစ်ကြောင်း အတွင်းရေးမှူးချုပ်က ဒီဇင်ဘာလမှာ ကြေညာခဲ့တာပါ။

အခုလို ကာကွယ်ဆေး ထိုးတာဟာ လူ့ကျင့်ဝတ်အရ လုပ်ဆောင်ရမယ့် အလုပ်တခု အဖြစ် ခံယူထားတဲ့ အတွင်းရေးမှူးချုပ်က ဒီရောဂါဟာ ကူးစက်မှု အန္တရာယ်ရှိနေတဲ့အတွက် လူ့အသိုင်းဝိုင်း တခုလုံး အန္တရာယ်ကင်းအောင် လူတိုင်း ပါဝင် လုပ်ဆောင်ရမှာ ဖြစ်ကြောင်းလည်း အတွင်းရေးမှူးချုပ်က ပြောပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/united-nations-secretary-general-vaccine-new-York-/5757350.html

ဖွဲ့စည်းပုံ အခြေခံဥပဒေကို ကာကွယ်စောင့်ရှောက်မယ်လို့ တပ်မတော်ထုတ်ပြန်

ဖွဲ့စည်းပုံ အခြေခံဥပဒေကို ကာကွယ်စောင့်ရှောက်မယ်လို့ တပ်မတော်ထုတ်ပြန် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က နိုင်ငံတော်ကာကွယ်ရေး တက္ကသိုလ်က သင်တန်းအရာရှိတွေကို ဗီဒီယိုအွန်လိုင်းစနစ်နဲ့ ၂၀၂၁ ဇန်နဝါရီ ၂၇ရက်နေ့က အမှာစကားပြောကြားစဉ် / တပ်မတော်သတင်းမှန် ပြန်ကြားရေးအဖွဲ့

(၂၀၀၈) ဖွဲ့စည်းပုံအခြေခံ ဥကဒေကို ကာကွယ်စောင့်ရှောက်မယ်လို့ တပ်မတော်က ဒီကနေ့ နေ့လည်ပိုင်းမှာ ထုတ်ပြန်ကြေညာလိုက်ပါတယ်။

ဥပဒေတွေကို မလိုက်နာနိုင်ရင် ဖွဲ့စည်းပုံအခြေခံ ဥပဒေဆိုရင်တောင် ဖျက်ပစ်ရမယ်လို့ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်ရဲ့ ဇန်နဝါရီလ (၂၇) ရက်နေ့က ပြောဆိုချက်ကို သတင်းမီဒီယာတွေမှာ ဖော်ပြပြီး နောက်ပိုင်း တပ်မတော်ဘက်က အခုလို ကြေညာချက်ထုတ်ပြန် ဖြေရှင်းတာဖြစ်ပါတယ်။

ဖွဲ့စည်းပုံ အခြေခံဥပဒေကို ဖျက်သိမ်းမယ်လို့ ရေးသားပြောဆိုချက်တွေဟာ လိုရာဆွဲပြီး ရေးသားပြောဆိုနေကြတာလို့လည်း တပ်မတော်သတင်းမှန်ပြန်ကြားရေးအဖွဲ့ရဲ့ ထုတ်ပြန်ချက်မှာပြောထားပါတယ်။

တပ်မတော်က တည်ဆဲ ၂၀၀၈ ဖွဲ့စည်းပုံအခြေခံဥပဒေကို ကာကွယ်စောင့်ရှောက်ပြီး ဥပဒေဘောင်အတွင်းကနေ ဥပဒေနဲ့အညီ ဆောင်ရွက်သွားမယ်လို့ဆိုပါတယ်။

၂၀၀၈ ဖွဲ့စည်းပုံအခြေခံ ဥပဒေကို လိုက်နာမှုမရှိရင် ဖျက်ပစ်ရမယ်လို့ တပ်မတော် ကာကွယ်ရေးဦးစီးချုပ် ဗိုလ်ချုပ်မှုးကြီး မင်းအောင်လှိုင်က ဇန်နဝါရီ ၂၇ နေ့က နိုင်ငံတော်ကာကွယ်ရေး တက္ကသိုလ်က သင်တန်းအရာရှိတွေကို ဗီဒီယိုအွန်လိုင်းစနစ်နဲ့ တွေ့ဆုံချိန်မှာပြောခဲ့တာဖြစ်ပါတယ်။

နိုင်ငံရေးလေ့လာသူ ပြည်သူ့လွှတ်တော်ကိုယ်စားလှယ်ဟောင်း ဦးရဲထွန်းကတော့ "တပ်က ဒီလိုမျိုး ထုတ်ပြန်လိုက်တာက မှားသွားတာလဲ ဖြစ်ကောင်းဖြစ်နိုင်တယ် ဒါမှမဟုတ်ရင် NLD နဲ့ ရွေးကောက်ပွဲကော်မရှင် ပြဿနာဖြေရှင်းဖို့ ညှိနှိုင်းတာ အဖြေတစ်ခုခု ရသွားလို့လား သို့မဟုတ် နဂိုထဲက ဗိုလ်ချုပ် ဇော်မင်းထွန်း ပြောထားတဲ့အတိုင်းပဲ ဆက်သွားဖို့ ရည်ရွယ်ထားတာလားဆိုတာ စောင့်ကြည့်ရဦးမှာပေါ့ မပြီးသေးဘူး။ ဗိုလ်ချုပ် ဇော်မင်းထွန်းက တစ်လျှောက်လုံးပြောလာတာ အခြေခံဥပဒေကိုကာကွယ်ဖို့ အခြေခံဥပဒေပါ ပြဌာန်းချက်တွေအတိုင်း လုပ်ဆောင်မယ်လို့ ပြောလာနေခဲ့တာ။ ဆူဆူပူပူဖြစ်လာရင် အခန်း ၁၁ မှာပြဌာန်းထားတဲ့ အရေးပေါ်ပြဌာန်းချက် ဥပဒေနဲ့အညီ အာဏာကို လွဲယူနိုင်တယ်ဆိုပေမယ့် ကြိုက်သလို အဓိပ္ပာယ်ဖွင့်ဆိုပြီး လုပ်လိမ့်မယ်လို့ ထင်ခဲ့ကြတာ" လို့ သုံးသပ်ပါတယ်။

တပ်မတော်က လက်နက်ကိုင် အဖွဲ့အစည်းဖြစ်တဲ့အတွက် အခြေခံဥပဒေကို လေးစားလိုက်နာဖို့ လိုအပ်ကြောင်း၊ တပ်မတော်သားတွေအနေနဲ့ ဖွဲ့စည်းပုံ အခြေခံဥပဒေကို ကျော်လွန်ခြင်းမရှိဘဲ တည်ဆဲ ဥပဒေတွေကိုလည်း လေးစားလိုက်နာရမှာဖြစ်ကြောင်း၊ ၂၀၀၈ ဖွဲ့စည်းပုံအခြေခံဥပဒေဟာ ပင်မဥပဒေ ဖြစ်တဲ့အတွက် တပ်မတော်သားတွေက လေးစားလိုက်နာဖို့လိုအပ်ပြီး၊ ဥပဒေကို မလေးစား မလိုက်နာရင် အဲဒီဥပဒေကို အသုံးပြုဖို့ မလိုအပ်တော့တဲ့အတွက် ဖျက်ပစ်ရမှာ ဖြစ်တဲ့အကြောင်း အခြေခံဥပဒေရဲ့ သဘောသဘာဝကို နားလည်အောင် ပြောကြားခဲ့ခြင်းဖြစ်ကြောင်း ဒီနေ့ ထုတ်ပြန်ချက်မှာ ဖော်ပြထားပါတယ်။

တချို့အဖွဲ့အစည်းတွေနဲ့ သတင်းမီဒီယာတွေက လိုရာဆွဲပြီး အဓိပ္ပာယ်ဖွင့်ဆိုကာ ထုတ်ပြန်ချက်တွေ၊ သတင်းသုံးသပ်ချက်တွေ လုပ်နေတယ်လို့လည်း တပ်မတော်က ဆိုပါတယ်။

တပ်မတော်က တစိုက်မတ်မတ် ထုတ်ပြန်ကြေညာနေတဲ့ ရွေးကောက်ပွဲ မဲမသမာမှု ဖြစ်စေနိုင်တဲ့ မဲစာရင်းတွေနဲ့ပတ်သက်လို့ ဇန်နဝါရီ ၂၆ ရက်နေ့က သတင်းစာရှင်းလင်းပွဲ ပြုလုပ်ခဲ့ရာမှာ တပ်မတော်က အာဏာမသိမ်းဘူးလို့ မမှတ်ယူနိုင်ကြောင်း တပ်ပြောခွင့်ရှိသူ ဗိုလ်ချုပ် ဇော်မင်းထွန်းက ပြောဆိုခဲ့သလို ၂၇ ရက်နေ့မှာတော့ ဗိုလ်ချုပ်မှူးကြီး မင်းအောင်လှိုင်က ဖွဲ့စည်းပုံအခြေခံဥပဒေကို မလိုက်နာရင် ဖျက်ပစ်ရမယ်လို့ ပြောဆိုချက်တွေ ထွက်ပေါ်လာခဲ့တဲ့နောက် တပ်မတော် အာဏာသိမ်းတော့မလားလို့ ပြည်တွင်းမှာ စိုးရိမ်မှုတွေ ရှိလာခဲ့ပါတယ်။

မြန်မာ့နိုင်ငံရေးကို နိုင်ငံတကာကပါ စိုးရိမ်ပြီး ကုလသမဂ္ဂနဲ့ သံတမန်အဖွဲ့အစည်းတွေကပါ မြန်မာ့ဒီမိုကရက်တစ် အသွင်ကူးပြောင်းရေးကို ကြန့်ကြာစေမယ့် ကြိုးပမ်းအားထုတ်မှုတွေကို ဆန့်ကျင်ကန့်ကွက်တယ်လို့ ကြေညာခဲ့ကြပြီး ဖေဖော်ဝါရီ ၁ ရက်နေ့မှာ ကျင်းပမယ့် လွှတ်တော်သစ် စတင်ရေးနဲ့ သမ္မတသစ်ရွေးချယ်ရေး လုပ်ငန်းတွေကို ငြိမ်းငြိမ်းချမ်းချမ်း ဆောင်ရွက်ဖို့ မျှော်လင့်တယ်လို့လည်း တိုက်တွန်းခဲ့ကြတာပါ။


RFA Burmese

https://www.rfa.org/burmese/news/constitution-repeal-01302021045911.html

တပ်မတော်ကို သံဃမဟာနာယကနဲ့ နိုင်ငံတကာသံရုံးတွေ ဝေဖန်တိုက်တွန်း

မြန်မာနိုင်ငံရှိ သံရုံးတွေက မြန်မာ့တပ်မတော်နဲ့ တခြားအဖွဲ့အားလုံး ဒီမိုကရေစီစံနှုန်းတွေကိုလိုက်နာဖို့ ဇန်နဝါရီလ ၂၉ ရက် မနေ့က ကြေညာချက်ထုတ်ပြန်ခဲ့သလို တရက်တည်းမှာပဲ နိုင်ငံတော် သံဃမဟာနာယကအဖွဲ့ကလည်း တပ်မတော်နဲ့ ပါတီတွေအနေနဲ့ လက်ရှိပြဿနာတွေကို ငြိမ်းချမ်းစွာ အဖြေရှာကြဖို့ မေတ္တာရပ်ခံခဲ့ပါတယ်။

နိုင်ငံတော်သံဃမဟာနာယက အဖွဲ့ကြီးက လက်ရှိပြဿနာတွေကြောင့် ရဟန်းရှင်လူတွေ စိုးရိမ်စိတ်နဲ့ နှလုံးစိတ်ဝမ်း မအေးချမ်းဘဲ ရှိနေကြတဲ့အတွက် အစိုးရ၊ တပ်မတော်နဲ့ နိုင်ငံရေး ပါတီတွေ မငြင်းမခုန်ဘဲ ဥပဒေနဲ့အညီ ညှိနှိုင်းအဖြေရှာဖို့ ဇန်နဝါရီလ ၂၉ ရက် မနေ့ကမေတ္တာရပ်ခံခဲ့ပါတယ်။

မန္တလေးမြို့ရှိ မြဝတီမင်းကြီးဆရာတော် အရှင်အရိယာဘိဝံသက ဆရာတော်ကြီးတွေရဲ့ ထုတ်ပြန်ချက်ဟာ မိမိတို့ နိုင်ငံသားအားလုံးအတွက် အချိန်အခါနဲ့ ကိုက်ညီလှပါတယ်လို့ RFA ကို မိန့်ကြားပါတယ်။

“အခု နိုင်ငံတော်သံဃမဟာနာယကအဖွဲ့က ထောက်ပြတာက အငြင်းပွားမှု ဒီလိုလုပ်နေကြရင် ဒုက္ခရောက်ကုန်ကြမယ်ဆိုတာ ပြောတာ။ အငြင်းပွားခဲ့ရင် ဥပဒေနဲ့ဘဲ စကားပြောရတယ်။ ဥပဒေဘောင်ကျော်ပြီး မပြောရဘူး။ မပြောဘူးဆိုရင် မညီညွတ်စရာအကြောင်းမရှိဘူး အငြင်းပွားစရာ မရှိတော့ဘူး။ အခုတော့ ဥပဒေကို ဖျက်ပစ်ဆိုတာမျိုး ပြောတာကတော့ တော်တော်တော့ မကောင်းတာပဲ။ ပြင်သင့်ရင် ပြင်ကြ။ ပြင်ဖို့ရာ အဆိုပြုကြ ဒီလိုစည်းနဲ့ ဘောင်နဲ့ လုပ်ကြမှ ကောင်းလိမ့်မယ်လို့ မြင်တယ်။ ဥပဒေကို မလိုက်နာရင် တိုင်းပြည်က ပြန်ဆုတ်သွားမှာ။ ဒါကြောင့်လည်း နိုင်ငံတကာက လက်မခံတာ။ နိုင်ငံတော် သံဃမဟာနာယကက ဒီလိုထုတ်ပြန်ကြေညာတာ အရမ်းကို ကျေးဇူးတင်စရာလဲ ကောင်းတယ်၊ အင်မတန်သင့်လျော်တဲ့ အကြံပြုချက်လည်း ဖြစ်တယ်။ လိုက်နာရင် တိုင်းပြည် အေးချမ်းမှာပါ။”

ဒီအတောအတွင်း မြန်မာနိုင်ငံမှာရှိတဲ့ အမေရိကန်၊ သြစတေးလျ၊ နယူးဇီလန်၊ ကနေဒါ၊ ဗြိတိန်နဲ့ တခြား ဥရောပနိုင်ငံ သံရုံးတွေ စုပေါင်းပြီး မနေ့က ထုတ်ပြန်ခဲ့တဲ့ကြေညာချက်မှာတော့ လွှတ်တော်အသစ် စတင်ရေး နဲ့ သမ္မတရွေးချယ်ရေး လုပ်ငန်းစဉ်တွေ အောင်မြင်ရေးအတွက် မျှော်လင့်ကြောင်း၊ တပ်မတော်နဲ့ တခြားအဖွဲ့အစည်းတွေအနေနဲ့ ဒီမိုကရေစီစံနှုန်းတွေကို လိုက်နာဖို့ တိုက်တွန်းကြောင်း၊ ရွေးကောက်ပွဲရလဒ် ကို ပြောင်းလဲရန် သို့မဟုတ် အသွင်ကူးပြောင်းရေးကြန့်ကြာရန် ကြိုးပမ်းမှုမှန်သမျှကို ဆန့်ကျင်ပြီး ဒီမိုကရေစီရေးလုပ်ဆောင်သူအားလုံးကို ထောက်ခံကြောင်း ဖော်ပြထားပါတယ်။

မြန်မာ့နိုင်ငံရေးလေ့လာသူ ဦးသန်းစိုးနိုင်က ဒါဟာ မြန်မာပြည်ဒီမိုကရေစီ အသွင်ကူးပြောင်းမှုကို ဆန့်ကျင်မယ်ဆိုရင် အဲဒီ အင်အားစုတွေကို ရန်သူအဖြစ် သတ်မှတ်မယ်ဆိုတာ ကမ္ဘာ့ဒီမိုကရေစီနိုင်ငံတွေက အတိအလင်း သတိပေးလိုက်တာပဲလို့ ပြောပါတယ်။

“ကျနော်တို့ တိုင်းပြည်ရဲ့ လက်ရှိဖြစ်နေတဲ့ ပြဿနာနဲ့ ကျနော်တို့ကို တိုက်ရိုက်ထောက်ခံတဲ့ သတင်း ထုတ်ပြန်ချက် ဖြစ်ပါတယ်။ သူက တပ်မတော်အနေနဲ့ ဆိုတဲ့ စကားလုံးကို ပီပီပြင်ပြင်သုံးပါတယ်။ တပ်မတော်အနေနဲ့၊ နောက်တပ်မတော်ကို လိုလားတဲ့သူတွေအနေနဲ့ မြန်မာပြည်မှာ ကျင်းပခဲ့တဲ့ ၂ဝ၂ဝ ရွေးကောက်ပွဲရဲ့ ရလဒ်တွေကို ပြောင်းလဲဖို့အတွက် ကြိုးစားမယ်။ ဖိအားပေးမယ်ဆိုတဲ့ လှုပ်ရှားမှုတွေ လုပ်လာခဲ့မယ်ဆိုရင် အနောက်ကမ္ဘာက ဥရောပနိုင်ငံတွေအားလုံးက အဲဒါကို လက်မခံဘူး ရှုံ့ချမယ် နောက်ပြီးတော့ အဲဒီလှုပ်ရှားမှုကို ကျနော်တို့ လုံးဝတားဆီးကာကွယ်သွားမယ်လို့ ထည့်သွင်း ပြောဆိုသွားတဲ့အတွက် ၈၈ နဲ့ မတူဘူးဆိုတာ အဲဒီအခြေအနေတွေက ဖော်ပြလိုက်တာပဲ။ ဒါကြောင့်မို့ ဒီ ဒီမိုကရေစီလိုလားတဲ့ တိုင်းပြည်တွေအားလုံးကို ခုလိုထောက်ခံပံ့ပိုးမှုတွေအတွက် ကျနော်တို့က ကြိုဆိုကြောင်း၊ ဝမ်းမြောက်ကြောင်း ဆက်ပြီးတော့လဲ ကျနော်တို့ကို ထောက်ခံအားပေးသွားဖို့ မေတ္တာရပ်ခံကြောင်း ကျနော်ပြောချင်ပါတယ်”

နော်ဝေနိုင်ငံအခြေစိုက် မြန်မာ့အရေးလေ့လာသူ ဒေါက်တာမောင်မောင်မြင့်ကလည်း -

“ဟိုးအရင်တုန်းကလိုမျိုး အာဏာသိမ်းပြီးမှ ထုတ်တဲ့သဘောမဟုတ်ဘူး။ အာဏာသိမ်းမှာကို ကြိုပြီး တားတဲ့သဘောနဲ့ သူတို့ထုတ်တာ။ ဘာပဲပြောပြော အဲဒီအချက်က တကမ္ဘာလုံးက သဘောမတူဘူးဆိုတာကို အခုထဲက ကြိုပြီး ပြထားတဲ့ အနေအထားရှိတယ်။ တကယ်လို့သာ တပ်မတော်က အာဏာသိမ်းမှုထပ်ပြီး ဖြစ်လာမယ်ဆိုရင် နိုင်ငံတကာရဲ့တုံ့ပြန်မှု အထူးသဖြင့် ဒီမိုကရေစီနိုင်ငံတွေ အနောက်နိုင်ငံတွေ နောက်ပြီး ဂျပန်တို့ သြစတေးလျ တို့ စသဖြင့် သူတို့တွေလည်း ပါလာနိုင်တာပေါ့။ အရင်တုန်းက ရှိခဲ့ဖူးတဲ့ စီးပွားရေး ပိတ်ဆို့မှုတွေနဲ့ စစ်လက်နက်ပစ္စည်းရောင်းချမှု ပိတ်ဆို့တာတွေ ဖြစ်လာမယ်။ စီးပွားရေး ပိတ်ဆို့တာနဲ့ အတူ ဘဏ်တွေကနေ မြန်မာပြည်က စီးပွားရေးအကြီးကြီးတွေကို ပိတ်ဆို့လာနိုင်တယ်။ စီးပွားရေးလုပ်ငန်း အကြီးကြီးတွေကို ပိတ်ဆို့ပြီဆိုရင် အဲဒီစီးပွားရေးလုပ်ငန်း အကြီးကြီးတွေမှာ မြှုပ်နှံထားတဲ့ ဦးပိုင်က စပြီးတော့ သူတို့ စစ်ဗိုလ်ချုပ်တွေ နဲ့ တကိုယ်တော်ရင်းနှီးမြှုပ်နှံမှုတွေ ရှိတယ်။ အဲဒါတွေလည်း သွားပြီး ထိခိုက်လာလိမ့်မယ်။ နာမှာကတော့ တိုင်းပြည်က အနာဆုံးပဲ”

ဒီအတောအတွင်း အစိုးရကိုယ်စားလှယ် နှစ်ဦးက တပ်မတော်ခေါင်းဆောင်တချို့ကို ၂၈ ရက်နေ့က သွားရောက်တွေ့ဆုံခဲ့ရာမှာ တပ်မတော်ဘက်က တောင်းဆိုချက်တွေနဲ့ ပတ်သက်ပြီး သဘောတူညီချက် မရရှိခဲ့ဘူးလို့ သတင်းရပါတယ်။ ဒါပေမယ့် ဒီသတင်းကို အစိုးရနဲ့ တပ်မတော်နှစ်ဖက်လုံးက အတည်ပြု ထုတ်ဖော်ပြောဆိုခြင်း မရှိသေးပါဘူး။


RFA Burmese

https://www.rfa.org/burmese/news/statements-and-views-over-military-stages-a-coup-01292021172115.html

ဟားခါး-ထန်တလန် လမ်းတွင် မော်တော်ယာဉ်တစ်စီး အရှိန်မထိန်းနိုင်ဘဲ ချောက်ထဲ ထိုးကျတိမ်းမှောက်၍ လူ(၂)ဦး သေဆုံး


ဟားခါး ဇန်နဝါရီ ၃၀

 ချင်းပြည်နယ် ဟားခါးမြို့မှ (၄)မိုင်ခန့်အကွာ ဟားခါး-ထန်တလန်လမ်းတွင် ထန်တလန်မှ ဟားခါးသို့ ထွက်ခွာလာသော ယာဉ်အမှတ် 6E----- PRATO အိမ်စီးကား (၄)ဘီး ယာဉ်သည် ဇန်နဝါရီ ၃၀ ရက် ညနေ ၂ နာရီ မိနစ် ၂၀ ခန့်က အရှိန်မထိန်းနိုင်ဘဲ    ပေ ၅၀၀ ခန့် ချောက်ထဲသို့ ထိုးကျတိမ်းမှောက်၍ အခင်းဖြစ်ပွားရာနေရာ၌ ယာဉ်မောင်းနှင့် ယာဉ်မောင်း သမီးဖြစ်သူတို့  သေဆုံးခဲ့ကြောင်း သိရသည်။ 

ဖြစ်စဉ်မှာ ထန်တလန်မှ ဟားခါးသို့ ထွက်ခွာလာသော ယာဉ်မောင်း ဉီးချွမ်းလိန်း အသက် (၅၅) နှစ်  မောင်းနှင်လာသည့် ယာဉ်အမှတ် 6E----- PRATO  ယာဉ်သည် အရှိန်မထိန်းနိုင်ဘဲ  ပေ(၅၀၀)ခန့် ချောက်ထဲသို့ ထိုးကျကာ တိမ်းမှောက်ခဲ့ခြင်းဖြစ်ကြောင်း ၊ အဆိုပါ ယာဉ်တိမ်းမှောက်သည့် နေရာသို့ မြို့နယ်မီးသတ်ဉီးစီးမှူး ဉီးသျှန်နွန်မောင် ဉီးဆောင်သော မီးသတ်တပ်ဖွဲ့ဝင်များနှင့်  သူနာတင်ယာဉ်(၁)စီးဖြင့် ရှာဖွေကယ်ဆယ်ရေး ဆောင်ရွက်ခဲ့ရာ ယာဉ်မောင်း ဉီးချွမ်းလိန်းနှင့် သမီးဖြစ်သူ မဗန်ပါရ်အဲမ်အသက်(၁၃)နှစ်သည် အခင်းဖြစ်ပွားသည့်နေရာတွင် သေဆုံးခဲ့ကြောင်း၊ အဆိုပါသေဆုံးသူ(၂)ဦးတို့အား  ဟားခါးမြို့  ပြည်သူ့ဆေးရုံကြီးသို့ ပို့ဆောင်ခဲ့ကြောင်း မြို့နယ်မီးသတ်ဉီးစီးဌာနထံမှ သိရသည်။

အဆိုပါ ယာဉ်တိမ်းမှောက်မှုကြောင့် ယာဉ်မောင်း ဉီးချွမ်းလိန်းအား ဟားခါးမြို့မရဲစခန်းမှ   အရေးယူဆောင်ရွက်လျက်ရှိကြောင်း သိရသည်။


Myanmaalinn

https://www.facebook.com/MYANMAALINNNEWS

နာဂတွင် တောင်ယာရှို့မီးအတွင်း လူလေးဦး ပိတ်မိသေဆုံး

နန်းယွန်း၊ ဇန်နဝါရီ – ၃၀

နာဂဒေသ၊ လဟယ်မြို့နယ်၊ ထန်ခေါ်နောက်ကုန်းကျေးရွာ၌ တောင်ယာရှို့မီးဝိုင်းအတွင်း လူလေးဦး ပိတ်မိ၍ မီးလောင်သေဆုံးခဲ့ကြောင်း မြို့နယ်မီးသတ်ဦးစီးမှူး ဦးစိုးပိုင်က ပြောသည်။

ဒေသခံလေးဦးသည် ဇန်နဝါရီလ ၂၉ ရက်နေ့က အိန္ဒိယနယ်စပ်သို့ ဆန်ဝယ်သွားပြီး အပြန် ရွှေ့ပြောင်းတောင်ယာ စိုက်ပျိုးရန်ရှို့ထားသော တောမီးအတွင်း ရောက်သွား၍ ထွက်ပေါက်မတွေ့ဘဲ မီးလောင်သေဆုံးခြင်းဖြစ်ကြောင်း မီးသတ်ဌာနက သုံးသပ်ထားသည်။

“တောင်ပေါ်ဒေသက စုပေါင်းတောင်ယာ မီးရှို့ကြတာ။ တောင်ပေါ်ဓလေ့ထုံးစံအရ မီးရှို့ကြတာထဲမှာ ပါသွားတာ”ဟု ပြောသည်။

တောင်ယာမီးရှို့သော သံသယရှိသူ ဒေသခံ ၈ ဦးအား စစ်ဆေးနေသည်ဟု သိရသည်။

အဆိုပါမီးထဲတွင် ပိတ်မိသေဆုံးသွားသောလေးဦးသည် အမျိုးသမီး ၃ဦး၊ အမျိုးသား ၁ဦးဖြစ်သည်။

ထန်ခေါ်နောက်ကုန်းရွာသည် လဟယ်မြို့နှင့် ၃၈မိုင်ကွာဝေးပြီး ဆိုင်ကယ်ခရီး၊ ခြေလျင်ခရီးတို့ဖြင့် သွားရ၍ လမ်းပန်းဆက်သွယ်ရေးခက်ခဲသည်။

နာဂဒေသည် တောင်တန်းဒေသဖြစ်သောကြောင့် အများစုသည် ရွှေ့ပြောင်းတောင်ယာကိုသာ အဓိကလုပ်ကိုင်စားသောက်ကြခြင်း ဖြစ်သည်။

အဆိုပါ ရွှေ့ပြောင်းတောင်ယာများကို တစ်နှစ်တစ်ကြိမ်သာ ခုတ်ကြလေ့ရှိပြီး စိုက်ပျိုးရန် မီးရှို့လေ့ရှိကြသည်။


နွမ်းနွမ်း

Monywa Gazette

https://www.facebook.com/monywagazette

မြိတ်တွင် အရွယ်မရောက်သေးတဲ့ကလေးအချို့ လမ်းမှားရောက်နေ


မြိတ်မြို့၊အလယ်ကျွန်းနယ်မြေတွင် ဇန်နဝါရီလ ၃၀ ရက်၊ ညနေပိုင်းက  ကလေး ၃ ဦး ကော်ရူနေတာကို ဖမ်းဆီးမိတယ်လို့သိရပါတယ်။

အလယ်ကျွန်းရပ်၊ ပန်ယားဝပ်ရှော့ဟောင်းခြံဝင်းအတွင်း မိန်းကလေး ၁ ဦး နှင့် ယောက်ျားလေး ၂ ဦးက ကော်ရှူနေတာကို ခြံဝင်းပိုင်ရှင်ကတွေ့ရှိပြီးထိန်းသိမ်းထားကာ နယ်မြေအုပ်ချုပ်ရေးအဖွဲ့အား ဆက်သွယ်အပ်နှံပေမယ့် အုပ်ချုပ်ရေးအဖွဲ့က လာရောက်ခြင်းမရှိဘူးလို့သိရပါတယ်။

"ကလေး ၃ ယောက်က ခြံဝင်းထဲမှာ ကော်လာရှူနေတာတွေ့လို့ ထိန်းသိမ်းထားပြီး ကလေးတွေကို ဘယ်ရပ်ကွက်ကလဲလို့မေးတော့ ကျွန်တော့်ကို ပြန်ပြီးရန်ရှာတယ် ။  အုပ်ချုပ်ရေးအဖွဲ့ကိုဖုန်းဆက်အကြောင်းကြားတယ်။ အကြောင်းပြချက်တွေပေးပြီး ရောက်မလာကြဘူး။ တကယ်ဆို သူတို့လာပြီး ကလေးတွေကို ဆုံးမပြီး မိဘတွေဆီပြန်အပ်ပေးသင့်တယ် ""လို့  ခြံပိုင်ရှင်ကပြောပါတယ်။

အရွယ်မရောက်သေးတဲ့ ကလေးအချို့ အုပ်ထိန်းသူတွေရဲ့မျက်ကွယ်မှာ လမ်းမှားရောက်နေတာကို တာဝန်ရှိသူတွေက ကြပ်မတ်ပေးစေချင်ကြောင်း ၎င်းပတ်ဝန်းကျင်ကပြည်သူတွေလိုလားနေကြပါတယ်။


မြတ်ထွဋ် (မြိတ်)

https://www.facebook.com/Myat-Htut-Myeik-222869948053294

Novavax ကုမ္ပဏီရဲ့ ကိုဗစ်ကာကွယ်ဆေး ထိရောက်မှုမြင့်မားကြောင်း ကုမ္ပဏီထုတ်ပြန်

Novavax ဆေးကုမ္ပဏီရဲ့ ကိုဗစ်ကာကွယ်ဆေးပုလင်း။ (အောက်တိုဘာ ၃၀၊ ၂၀၂၀)

အမေရိကန်အခြေစိုက် Novavax ဆေးကုမ္ပဏီက တီထွင်နေတဲ့ ဆေးကို ဗြိတိန်နိုင်ငံမှာ လေ့လာစမ်းသပ်တာ အစောပိုင်းရလဒ်တွေအရ ၈၉% ထိရောက်ပုံရတယ်လို့ Novavax ကုမ္ပဏီကပြောပါတယ်။

ဗြိတိန်နဲ့ တောင်အာဖရိကနိုင်ငံတို့မှာ ကူးစက်နေတဲ့ ဗီဇပြောင်း ကိုဗစ်ပိုးသစ်ကို Novavax ကိုဗစ်ဆေးက ကာကွယ်နိုင်ပေမဲ့ ၈၉% အထိတော့ မထိရောက်ဘူးလို့ ပြောပါတယ်။ ပိုပြီးကူးစက်လွယ်၊ ပိုပြီး ရောဂါပြင်းထန်ပုံရတဲ့ ဗီဇပြောင်း ကိုဗစ်ပိုးသစ်တွေအပေါ် နိုင်ငံတော်တော်များများမှာ ထိုးပေးနေကြတဲ့ ကိုဗစ်ကာကွယ်ဆေးတွေက ထိထိရောက်ရောက် ကာကွယ်နိုင်ပါ့မလားဆိုတဲ့ စိုးရိမ်မှုတွေ ရှိနေချိန်မှာ Novavax က သူတို့ဆေးအကြောင်း ကြာသပတေးနေ့က ထုတ်ပြန်ခဲ့တာဖြစ်ပါတယ်။

ဗြိတိန်နိုင်ငံမှာ Novavax ကိုဗစ်ဆေး အသုံးပြုခွင့် မလေ ျှာက်ထားခင် စမ်းသပ်မှုဆိုင်ရာ နောက်ထပ်အချက်အလက်တွေ လိုအပ်နေသေးတယ်လို့ ကုမ္ပဏီက ပြောပါတယ်။

Novavax ကိုဗစ် ကာကွယ်ဆေးကို ဗြိတိန်မှာ လူပေါင်း ၁၅,၀၀၀ နဲ့ စမ်းသပ်နေဆဲဖြစ်ပါတယ်။ စမ်းသပ်မှုဆိုင်ရာ ကနဦးသုံးသပ်ချက်အရ မူလ ကိုဗစ်ရောဂါပိုးကို Novavax ကိုဗစ် ကာကွယ်ဆေးက ၉၀% နီးပါး ကာကွယ်နိုင်ပြီး ဗြိတိန်မှာ တွေ့ရတဲ့ ဗီဇပြောင်း ကိုဗစ်ရောဂါပိုးသစ်ကို ၈၆% ကာကွယ်နိုင်တာ တွေ့ရတယ်လို့ ပြောပါတယ်။


 ဗွီအိုအေ (မြန်မာပိုင်း)

https://burmese.voanews.com/a/novavax-covid-vaccine/5756498.html

ဥရောပ နဲ့ ဗြိတိန် ကိုဗစ်ကာကွယ်ဆေး စစ်ပွဲ

Oxford University/AstraZeneca ကိုဗစ်ကာကွယ်ဆေး

ဗြိတိန်က သူ့နိုင်ငံသားတွေအတွက် ဖယ်ထားတဲ့ သန်းပေါင်း ဆယ်ဂဏန်းချီ တဲ့ AstraZeneca ကိုဗစ် ၁၉ ကာကွယ်ဆေးတွေကို သူတို့ကို ပေးဖို့ အီးယူဥရောပ သမဂ္ဂရဲ့ တောင်းဆိုမှုကနေ ဗြိတိန်နဲ့ အီးယူကြား ကာကွယ်ဆေးဆိုင်ရာ စစ်ပွဲ စတင်ခဲ့ပါတယ်။ ဒီလို ဗြိတိန်က သူ့နိုင်ငံအတွက် ဖယ်ထားတာကြောင့် AstraZeneca ဆေးကုမ္ပဏီက အီးယူဥရောပသမဂ္ဂကို ပို့ပေးဖို့ ကတိပေးထားတဲ့ ဆေးပမာဏအတိုင်း မပေးနိုင်ဖြစ်နေတာ လို့လည်း အီးယူက ပြောပါတယ်။

ဒီရောဂါ ကာကွယ်ဆေးကို ကိုယ့်နိုင်ငံအတွက်ပဲ ကိုယ့်ကြည့်တာဟာ အန္တရာယ်ကြီးတယ်လို့ ထောက်ပြနေကြချိန်မှာ အခုလို ပြဿနာပေါ်လာတာလည်း ဖြစ်ပါတယ်။

AstraZeneca ကုမ္ပဏီ က မတ်လ မကုန်ခင်မှာ အီးယူကို ကာကွယ်ဆေး သန်း ၈၀ ပေးရမှာ ဖြစ်ပေမယ့် အခု ၃၁ သန်းပဲ ပေးနိုင်တော့မယ်လို့ ကြေညာခဲ့တာပါ။

AstraZeneca က သူတို့ရဲ့ ကတိအတိုင်း ဆေးပို့မပေးနိုင်တာဟာ စတင်ကတည်းက အဆင်မပြေမှုတွေနဲ့ ကြုံနေရတဲ့ အီးယူရဲ့ ကာကွယ်ဆေးထိုးတဲ့ အစီအစဉ်အတွက် အခြေနေပိုဆိုးလာစေပြီး အမေရိကန် ၁၀၀ မှာ ၇ ယောက်၊ ဗြိတိန်က ၁၁ ယောက် ကို ဆေးထိုးပေးနိုင်ချိန်မှာ ဥရောပမှာတော့ လူတရာမှာ ၂ ယောက်နှုန်းသာ ဆေးထိုး ပေးနိုင်တဲ့ အနေထား ဖြစ်နေတာပါ။

ဆေးကုမ္ပဏီနဲ့ အီးယူတို့ကြား ဖြစ်ပွါးနေတဲ့ ပြဿနာဟာ ကြာသပတေးနေ့မှာတော့ အီးယူရဲ့ တောင်းဆိုမှုနဲ့ အတူ နိုင်ငံရေး အသွင်ဆောင်လာခဲ့တာ ဖြစ်ပါတယ်။

တချိန်ထဲမှာပဲ အသက် ၆၅ နှစ် အထက်တွေကို AstraZeneca ရဲ့ကာကွယ်ဆေးထိုးမပေးသင့်ဘူးလို့ ဂျာမဏီနိုင်ငံက ပြောကြားခဲ့တာ ဖြစ်ပြီး ဒါကိုတော့ ဗြိတိန်ဝန်ကြီးချုပ် Boris Johnson ကလက်မခံ ပယ်ချခဲ့ပါတယ်။

ဗြိတိန် MHRA ရဲ့ ဆေးဘက်ဆိုင်ရာ စည်းမျဉ်းစည်ကမ်း သတ်မှတ်သူတွေက Oxford – AstraZeneca ကာကွယ်ဆေးဟာ ပထမ တကြိမ်ထိုးပြီးချိန်မှာတင် ထိထိရောက်ရောက် အကာကွယ်ပေးနိုင်စွမ်းရှိပြီး ဒုတိယအကြိမ်ထိုးပြီးရင်တော့ ပိုပြီးတော့တောင် ကောင်းတယ် ဆိုတာကို ရှင်းရှင်းလင်းလင်း ပြောထားပြီးသား ဖြစ်ကြောင်း ပြောသွားတာပါ။ ဒါ့အပြင် အသက် အလိုက်စမ်းသပ်မှုတွေကို ကြည့်ပြီး ဒီကာကွယ်ဆေးဟာ အုပ်စုအားလုံး အတွက် ထိရောက်ပြီး ခုခံနိုင်စွမ်းကောင်းကောင်းရစေတာ တွေ့ရတဲ့အတွက် ဂျာမဏီရဲ့ ပြောကြားချက်ကို သူလက်မခံကြောင်း ပြောကြားခဲ့ပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/5755811.html

၂၀၂၀ မြန်မာရွေးကောက်ပွဲ - အငြင်းပွားမှုတွေနဲ့ စာချွန်တော်မှု ဂယက်

ရွေးကောက်ပွဲကော်မရှင်နှင့် အစိုးရကို ကန့်ကွက်ဆန္ဒပြမှု ရန်ကုန်မြို့ ဗဟန်းမြို့နယ်မှာ ဇန်နဝါရီ ၂၉ ရက်နေ့ မွန်းလွဲပိုင်းမှာ ပြုလုပ်

၂၀၂၀ အထွေထွေရွေးကောက်ပွဲမှာ မဲမသမာမှုတွေ ရှိတယ်ဆိုပြီး ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌဦးလှသိန်း အပါအဝင် ၁၅ ဦးကို စာချွန်တော်အမိန့် ထုတ်ဆင့်ပေးဖို့ အတိုက်အခံပါတီတွေရဲ့ လျှောက်ထားမှုတွေကို လက်ခံ စစ်ဆေးသင့်မသင့် နောက်သီတင်းပတ် ၂ ပတ်အကြာမှာ ဆုံးဖြတ်မယ်လို့ ပြည်ထောင်စု တရားလွှတ်တော်ရုံးချုပ်က သတ်မှတ်လိုက်ပါတယ်။

ဒီကနေ့ ကြားနာမှုနဲ့ ပတ်သက်လို့ ကြံခိုင်ရေးပါတီ ပြောခွင့်ရပုဂ္ဂိုလ် ဒေါက်တာနန္ဒာလှမြင့်က အခုလို ပြောပါတယ်။

“ဒီကနေ့ တရားလွှတ်တော်ချုပ်က (တရားသူကြီး) သုံးပါးထိုင်နဲ့ ကျွန်တော်တို့ပါတီက တင်ထားတဲ့ စာချွန်တော်ကိုပမာဏအဆင့် ကြားနာတာပေါ့။ ဒါကို သူတို့အကြောင်းပြန်မယ်။ လက်ခံမခံဆိုတာ သူတို့ ထုတ်လိမ့်မယ်။ ကြားနာတဲ့အဆင့်ပဲ။ ဘာမှ လျှောက်လဲချက်တွေ ဘာတွေ ပေးစရာမလိုဘူး။ ကျွန်တော်တို့ စာချွန်တော်တင်တဲ့ဟာကို ရှေ့နေက လျှောက်လဲတယ်။ တရားသူကြီးများက ကြားနာတယ်။ ပြီးတော့မှ သူတို့ တစုံတခု လက်ခံမယ် လက်မခံဘူး အကြောင်းပြန်လိမ့်မယ်ခင်ဗျ” လို့ ဆိုပါတယ်။

တရားသူကြီးတွေဘက်က ဒီတိုင်ကြားချက်တွေနဲ့ ပတ်သက်လို့ ကြားနာတာသာဖြစ်ပြီး တစုံတရာ မှတ်ချက်ပေးမေးမြန်းတာမျိုး မရှိဘူးလို့လည်း ဒေါက်တာ နန္ဒာလှမြင့်က ပြောပါတယ်။

ပြည်ထောင်စု ရွေးကောက်ပွဲကော်မရှင် ဥက္ကဋ္ဌ ဦးလှသိန်းအပါအဝင် ၁၅ ဦးကို အာဏာပေးစာချွန်တော် (သို့မဟုတ်) အာဏာပိုင်မေးစာချွန်တော် အမိန့်နဲ့ ထုတ်ဆင့်ပေးဖို့ ပြည်ထောင်စု ကြံ့ခိုင်ဖွံဖြိုးရေးပါတီ နဲ့ အရင် သမ္မတရုံး ဝန်ကြီးဟောင်းအဖြစ် တာဝန်ထမ်းဆောင်ခဲ့ဖူးသူလည်းဖြစ်၊ အမျိုးသား နိုင်ငံရေး ဒီမိုကရက်တစ်ပါတီ ဥက္ကဋ္ဌလည်းဖြစ်တဲ့ ဦးစိုးမောင်တို့က လျှောက်ထားခဲ့တာ ဖြစ်ပါတယ်။

ဒီအမှုတွေကို ကနဦးအဆင့် လက်ခံကြားနာဖို့ သင့်မသင့် ဇန်နဝါရီလ ၂၉ ရက်နေ့မှာ ပြည်ထောင်စု တရားရုံးချုပ်တရားသူကြီး သုံးဦးက ဗီဒီယိုကနေတဆင့် ကြားနာခဲ့တာ ဖြစ်ပါတယ်။

နေပြည်တော်မှာ ဇန်နဝါရီ ၂၉ ရက်မှာ ဆန္ဒပြသူတွေ

၂၀၂၀ ရွေးကောက်ပွဲအပြီး အငြင်းပွားမှုတွေ၊ မဲမသမာမှုတွေနဲ့ မဲစာရင်းမှားယွင်းမှုတွေနဲ့ ပတ်သက်လို့ စိစစ်ပေးဖို့ရွေးကောက်ပွဲ ကော်မရှင်ကိုရော သမ္မတတကိုပါ တောင်းဆိုခဲ့ပေမယ့် တစုံတရာ အရေးယူ ဆောင်ရွက်တာ မရှိတဲ့အတွက် စာချွန်တော်အမိန့် ထုတ်ဆင့်ဖို့ လျှောက်ထားရတာ ဖြစ်တယ်လို့ ဇန်နဝါရီလ အစောပိုင်းမှာ ပြုလုပ်ခဲ့တဲ့ သတင်းစာရှင်းလင်းပွဲမှာ ကြံခိုင်ရေးပါတီ ဒုဥက္ကဋ္ဌ ဦးခင်ရီက ပြောဆိုထားပါတယ်။

ဝန်ကြီးဟောင်း ဦးစိုးမောင်ရဲ့ အမျိုးသားနိုင်ငံရေးဒီမိုကရက်တစ်ပါတီကလည်း ပြည်ထောင်စု ရွေးကောက်ပွဲ ကော်မရှင်အနေနဲ့ ဥပဒေနဲ့အညီ ဆောင်ရွက်ရမယ့် တာဝန်တွေ ပျက်ကွက်ခဲ့တယ်လို့ ထောက်ပြပြီး သက်ဆိုင်ရာ ရွေးကောက်ပွဲကော်မရှင်အဖွဲ့ခွဲတွေကို တရားစွဲမယ်လို့ ကြေညာချက် ထုတ်ပြန်ခဲ့ပါတယ်။

တခါ သမ္မတ ဦးဝင်းမြင့် အပါအဝင် လူ ၄ ဦးကို အာဏာပိုင်မေးစာချွန်တော်အမိန့်နဲ့ ထုတ်ဆင့်ပေးဖို့ မန္တလေးကဦးဇော်ဝိတ်ကလည်း တရားရုံးချုပ်ကို လျှောက်လဲထားပါတယ်။

ဒီတိုင်ကြားချက်ကို ကြားနာဖို့ ပြည်ထောင်စုတရားလွှတ်တော်ရုံးချုပ်ရဲ့ အမှုခေါ်စာရင်းမှာ ဇန်နဝါရီလ ၂၉ ရက်နေ့ရက်စွဲနဲ့ ဖော်ပြထားပေမယ့် ကြားနာစစ်ဆေးတာ ရှိမရှိကိုတော့ ဘီဘီစီက သီးခြားအတည်မပြုနိုင်သေးပါဘူး။

ကြံ့ခိုင်ရေးပါတီက လျှောက်လဲထားတဲ့ စာချွန်တော်အမှု ကြားနာတဲ့နေ့မှာပဲ ကြံ့ခိုင်ရေးပါတီ ဝန်းရံသူတချို့ဟာ ပြည်ထောင်စု တရားလွှတ်တော်ချုပ်နဲ့ ပြည်ထောင်စုရွေးကောက်ပွဲ ကော်မရှင်ရုံးဘက်ကို ကားအစီး ၃၀ လောက်နဲ့ စုဝေးအင်အားပြဖို့ ကြိုးစားခဲ့ပေမယ့် ရဲတပ်ဖွဲ့ရဲ့ တားဆီးမှုကြောင့် လှည့်ပြန်သွားခဲ့ကြတယ်လို့ နေပြည်တော်မှာရှိတဲ့ ဘီဘီစီ သတင်းထောက်က ပြောပါတယ်။

ဒါပေမဲ့ ကြံခိုင်ရေးပါတီ ဝန်းရံသူတွေဟာ နေပြည်တော် မြို့မဈေးကို သွားရောက်ပြီး ဆန္ဒပြခဲ့တယ်လို့ ဆိုပါတယ်။

သမ္မတ ဦးဝင်းမြင့် အပါအဝင် ၄ ဦး၊ ပြည်ထောင်စု ရွေးကောက်ပွဲကော်မရှင် ဥက္ကဋ္ဌ အပါအဝင် ၁၅ ဦးကို စာချွန်တော်အမိန့်နဲ့ ထုတ်ဆင့်ပေးဖို့ လျှောက်ထားချက်တွေကို လက်ခံစစ်ဆေးဖို့ ရှိမရှိ တတိယအကြိမ် လွှတ်တော်အစည်းအဝေးတွေ မစတင်ခင် ဇန်နဝါရီလ ၂၉ ရက်နေ့မှာ ဆုံးဖြတ်နိုင်တယ်လို့ နိုင်ငံရေးလေ့လာသုံးသပ်သူတွေက အစောပိုင်းမှာ ယူဆခဲ့ကြပါတယ်။

ဒါပေမဲ့ လက်ရှိ မြန်မာနိုင်ငံရေးအခြေအနေအရ ချက်ချင်း မဆုံးဖြတ်ဘဲ နောက်နှစ်ပတ်ကို ရွှေ့ဆိုင်းတာ ဖြစ်နိုင်တယ်လို့လည်း သုံးသပ်ပြောဆိုနေကြပါတယ်။


ဇန်နဝါရီ ၂၉ ရက်မှာ နေပြည်တော် ပြည်ထောင်စု တရားလွှတ်တော်ချုပ်သွားရာလမ်း အပါအဝင် နေပြည်တော်က နေရာတချို့မှာ လုံခြုံရေးတင်းကျပ်စွာ ချထား

အာဏာပေးစာချွန်တော်အမိန့်၊ အာဏာပိုင်မေးစာချွန်တော်အမိန့် ဆိုတာ ဘာလဲ

အာဏာပေးစာချွန်တော်အမိန့်ဆိုတာကတော့ တရားဝင်အခွင့်အာဏာရှိသူ တဦးဦး သို့မဟုတ် အဖွဲ့အစည်း တခုခုကဖြစ်စေ၊ အစိုးရဌာန တခုခုက ဖြစ်စေ အပ်နှင်းထားတဲ့ လုပ်ပိုင်ခွင့်နဲ့အညီ လိုက်နာဆောင်ရွက်ဖို့ ပျက်ကွက်မှုကို ဥပဒေနဲ့အညီ လိုက်နာဆောင်ရွက်စေဖို့ ရေးသားထုတ်ပြန်တဲ့ အမိန့်စာကို ဆိုလိုတာ ဖြစ်တယ်လို့ ၂၀၁၄ ခုနှစ်ပြည်ထောင်စု လွှတ်တော်မှာ ပြဋ္ဌာန်းခဲ့တဲ့ စာချွန်တော်အမိန့် လျှောက်ထားမှုဆိုင်ရာ ဥပဒေမှာ ဖော်ပြထားပါတယ်။

အာဏာပိုင်မေးစာချွန်တော်အမိန့်ဆိုတာကတော့ အစိုးရဌာန တခုခု သို့မဟုတ် အခွင့်အာဏာ အပ်နှင်းထားတဲ့ အဖွဲ့အစည်း တခုခုဟာ တဦးတယောက် သို့မဟုတ် အများအပေါ်မှာ ထုတ်ပြန်ထားတဲ့ ဥပဒေ၊ နည်းဥပဒေ၊ စည်းမျဉ်းစည်းကမ်း၊ လုပ်ထုံးလုပ်နည်း၊ အမိန့်၊ အမိန့်ကြေညာစာ၊ ညွှန်ကြားချက်တွေနဲ့အညီ ဆောင်ရွက်ထားတာ ရှိမရှိ စိစစ်ကြားနာပြီး ဥပဒေနဲ့ ညီညွတ်ခြင်း ရှိမရှိ ရေးထားထုတ်တဲ့ အမိန့်စာကို ဆိုလိုတာ ဖြစ်ပါတယ်။

တရားမအထွေထွေ လျှောက်ထားမှု (စာချွန်တော်အမိန့်) လျှောက်ထားသူရဲ့ လျှောက်ထားလွှာနဲ့အတူ လိုအပ်တဲ့စာရွက်စာတမ်းတွေ ပြည့်စုံတယ်ဆိုရင်တော့ ဒီစာချွန်တော်အမိန့်တွေကို ထုတ်ဆင့်နိုင်ဖို့အတွက် ကနဦး ကြားနာဆုံးဖြတ်ရေးအဖွဲ့နဲ့ အပြီးသတ် ကြားနာဆုံးဖြတ်ရေးအဖွဲ့ကို တရားသူကြီး သုံးဦးနဲ့ ဖွဲ့စည်းရမှာ ဖြစ်ပါတယ်။

ကနဦးကြားနာဆုံးဖြတ်ရေးအဖွဲ့ တရားသူကြီးတွေဟာ စာချွန်တော်အမိန့်တွေကို လက်ခံကြားနာဖို့ ဆုံးဖြတ်လိုက်မယ်ဆိုရင် အပြီးသတ် ကြားနာဆုံးဖြတ်ရေးအဖွဲ့က လွှဲပြောင်း စိစစ်ကြားနာပြီး အမိန့်ချမှတ်ရမှာ ဖြစ်ပါတယ်။

ပြည်ထောင်စု တရားသူကြီးချုပ်ဟာ ဒီအဖွဲ့ ၂ ဖွဲ့လုံးမှာ ပါဝင်ခွင့်ရှိပြီး စာချွန်တော်အမှုတိုင်းမှာ ပြည်ထောင်စု တရားလွှတ်တော်ချုပ်ရဲ့ အဆုံးအဖြတ်ကသာ အပြီးသတ် အတည်ဖြစ်တယ်လို့ ဥပဒေမှာ ပြဋ္ဌာန်းထားပါတယ်။


BBC Burmese

https://www.bbc.com/burmese/burma-55859576

မြန်မာနိုင်ငံမှာ ဖြစ်နေတာတွေနဲ့ ပတ်သက်ပြီး ကုလသမဂ္ဂနဲ့ အနောက်နိုင်ငံ သံရုံးတွေက စိုးရိမ်ကြောင်းပြော

ကုလသမဂ္ဂ အတွင်းရေးမှူးချုပ် အန်တိုနီယို ဂူတားရက်စ်

မြန်မာနိုင်ငံမှာ လတ်တလောဖြစ်ပေါ်နေတဲ့အခြေအနေတွေနဲ့ ပတ်သက်ပြီး အလွန် စိုးရိမ်မကင်းဖြစ်ရတယ်လို့ ကုလသမဂ္ဂအထွေထွေအတွင်းရေးမှူးချုပ် မစ္စတာ အန်တိုနီယို ဂူတားရက်စ်က ပြောပါတယ်။

အထွေထွေအတွင်းရေးမှူးချုပ်ရဲ့ ပြောခွင့်ရပုဂ္ဂိုလ်က ဇန်နဝါရီလ ၂၈ ရက်မှာ ထုတ်ပြန်တဲ့ ကြေညာချက်ထဲမှာ မစ္စတာ အန်တိုနီယိုဂူတာရက်စ်က သက်ဆိုင်သူတွေ အားလုံးအနေနဲ့ လှုံ့ဆော်တာတွေ၊ ဒေါသ အမျက်ထွက်အောင် တိုက်တွန်း အားပေးတာတွေကို မပြုလုပ်ကြဖို့၊ ခေါင်းဆောင်ပီသမှုကိုပြသကြဖို့၊ ဒီမိုကရေစီ စံချိန်စံညွှန်းတွေကို လိုက်နာစောင့်ထိန်းဖို့နဲ့ ၂၀၂၀ အထွေထွေ ရွေးကောက်ပွဲရလဒ်ကို လေးစားကြဖို့ တိုက်တွန်းကြောင်းလည်း ရေးသားထားပါတယ်။

ရွေးကောက်ပွဲဆိုင်ရာ အငြင်းပွားမှုတွေကို တရားဝင်တည်ရှိနေတဲ့ တရားစီရင်ရေး ယန္တရားတွေနဲ့ ဆုံးဖြတ်သင့်တယ်လို့လည်း မစ္စတာ ဂူတားရက်စ်က ဆိုပါတယ်။

မြန်မာနိုင်ငံမှာ မဲစာရင်းတွေလွဲမှားနေတယ်လို့ ထောက်ပြပြီး ရွေးကောက်ပွဲ မဲမသမာတာတွေ ရှိတယ်လို့ တပ်မတော်က စွပ်စွဲနေကာ၊ တပ်မတော်က အာဏာသိမ်းရင် ရတယ်ဆိုတဲ့ သဘောမျိုး ရည်ညွှန်းပြောဆိုတာတွေကို တပ်မတော်ထိပ်တန်းအရာရှိကြီးတွေက ပြောလာခဲ့တဲ့နောက် မြန်မာပြည်နိုင်ငံရေး အခြေအနေနဲ့ ပတ်သက်လို့ နိုင်ငံတဝန်းမှာ စိုးရိမ်ပူပန်တာတွေ ဖြစ်ပေါ်နေပါတယ်။

ဇန်နဝါရီ ၂၉ ရက်မှာ သမ္မတကို တရားစွဲတဲ့ စာချွန်တော်အမိန့်လက်ခံဖို့သင့်မသင့်ကြားနာဖို့ရှိနေပြီး နေပြည်တော်က အစိုးရရုံးတွေ သွားရာလမ်းတွေမှာ လုံခြုံရေးထူထပ်စွာချထား

ဒီလိုကာလမှာ ကုလသမဂ္ဂရဲ့ တိုက်တွန်းချက်ထွက်ပေါ်လာသလို မြန်မာနိုင်ငံအခြေစိုက် သံတမန်အဖွဲ့အစည်းတွေကလည်း တပ်မတော်နဲ့ တခြားလူပုဂ္ဂိုလ်အဖွဲ့အစည်းအားလုံး ဒီမိုကရေစီစံနှုန်းတွေကို လိုက်နာစောင့်ထိန်းဖို့ တိုက်တွန်းခဲ့ပါတယ်။

အမေရိကန်၊ ဗြိတိန်၊ ဥရောပသမဂ္ဂအဖွဲ့ဝင်နိုင်ငံတွေ အပါအဝင် မြန်မာနိုင်ငံဆိုင်ရာ အနောက်နိုင်ငံတွေရဲ့ သံရုံးတွေက ဇန်နဝါရီ ၂၉ ရက်က ပူးတွဲထုတ်ပြန်တဲ့ ကြေညာချက်ထဲမှာ "ရွေးကောက်ပွဲရလဒ်ကိုပြောင်းလဲရန် သို့မဟုတ် မြန်မာ့ ဒီမိုကရက်တစ်အသွင်ကူးပြောင်းမှုကို ကြန့်ကြာစေရန်အလို့ငှာ မည်သို့သော ကြိုးပမ်းအားထုတ်မှုမျိုးကိုမဆို မိမိတို့ ဆန့်ကျင်ကန့်ကွက်ပါသည်။ မြန်မာ နိုင်ငံသားများအတွက် ပိုမိုကောင်းမွန်သော ဒီမိုကရက်တစ်လွတ်လပ်မှု၊ အဓွန့်ရှည် တည်တံ့သောငြိမ်းချမ်းမှု နှင့် အားလုံးပါဝင်သော သာယာဝပြောမှု အတွက်ရှေ့ရှု လုပ်ဆောင်နေကြသူအားလုံးကို မိမိတို့ အားပေး ထောက်ခံ ပါသည်" လို့ ဖော်ပြ ထားပါတယ်။

ဓာတ်ပုံ ရင်းမြစ်, U.S. Embassy Rangoon

ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက ဗဟိုအလုပ်အမှုဆောင်တစ်ဦးဖြစ်တဲ့ ဦးသောင်းအေးက တိုင်းပြည်ကို ဒီမိုကရေစီ လမ်းကြောင်းအမှန်ပေါ်ရှိစေချင်လို့ လုပ်ဆောင်နေတာ ဖြစ်ပြီး အခုလို ပြောဆိုနေတာတွေက တစ်ဖက်သတ်ဆန်လွန်းတယ်လို့ ဒီထုတ်ပြန်ချက်တွေနဲ့ ပတ်သက်ပြီး ပြောဆိုပါတယ်။

လက်ရှိ မြန်မာနိုင်ငံ အခြေအနေကို ပြည်သူ့လွှတ်တော်ကိုယ်စားလှယ် ဦးဦးလှစောက ညှိနှိုင်းအဖြေရှာသင့်တယ်၊ ကာကွယ်ရေးနဲ့လုံခြုံရေးကောင်စီက တစ်ဆင့်အဖြရှာတာ ဒါမှမဟုတ် နိုင်ငံတော်အတိုင်ပင်ခံနဲ့ တပ်မတော် ခေါင်းဆောင်တို့ ညှိနှိုင်းပြီး ထွက်ပေါက်ရှာတာတွေကို လုပ်ဆောင်သင့်တယ်လို့ ဆိုပြီး အဲဒီအစား ပြင်ပက ပြောဆိုတာမျိုးကို မကြိုက်နှစ်သက်ဘူးလို့လည်း ပြောပါတယ်။

အာဏာရပါတီလည်းဖြစ်၊ ၂၀၂၀ရွေးကောက်ပွဲမှာ အများဆုံးအနိုင်ရထားတဲ့ အမျိုးသားဒီမိုကရေစီအဖွဲ့ချုပ်ကတော့ ဖွဲ့စည်းပုံအခြေခံဥပဒေ၊ တည်ဆဲဥပဒေတွေအတိုင်း ဖေဖော်ဝါရီ ၁ရက်နေ့မှာ လွှတ်တော်တွေခေါ်ဖို့ ပြင်ဆင်လုပ်ဆောင်နေတယ်လို့ ပါတီရဲ့ဒုဥက္ကဌဒေါက်တာဇော်မြင့်မောင်က မီဒီယာတွေကို ပြောထားပါ တယ်။


BBC Burmese

https://www.bbc.com/burmese/burma-55857860

မြန်မာ့နိုင်ငံရေးတင်းမာနေချိန် ဆန္ဒပြပွဲတွေဖြစ်ပြီး စစ်ကားတွေလည်း တွေ့လာနေရ



 နိုင်ငံတော်အလံတွေ ကိုင်ပြီး ရွေးကောက်ပွဲ ကော်မရှင်ကို ကန့်ကွက်ဆန္ဒပြသူတွေကို ရန်ကုန်မြို့မှာ တွေ့ရ။ (ဇန်နဝါရီ ၂၉၊ ၂၀၂၁)

မကြာသေးခင်ရက်တွေက စလို့ နိုင်ငံရေးအရ တင်းမာမှုတွေ ပေါ်ပေါက်နေချိန်မှာပဲ မြန်မာနိုင်ငံက မြို့ကြီးတချို့မှာ လုံခြုံရေး စိုးရိမ်မှုတွေ ထွက်ပေါ်ခဲ့တဲ့အကြောင်း ပြောပြပါမယ်။ ဗွီအိုအေမြန်မာပိုင်း သတင်းထောက် မမေခက သတင်းပေးပို့ထားပါတယ်။

ရွေးကောက်ပွဲ လုပ်ငန်းစဉ်နဲ့ ပတ်သက်လို့ NLD အမျိုးသားဒီမိုကရေစီအဖွဲ့ချုပ် ဦးဆောင်တဲ့ အစိုးရနဲ့ တပ်မတော်ကြား တင်းမာမှုတွေ ထွက်ပေါ်နေချိန်မှာပဲ လုံခြုံရေး တင်းကြပ်တဲ့ သတင်းတွေလည်း ထွက်ပေါ်ခဲ့တာပါ။ နိုင်ငံရေးတင်းမာမှု သတင်းတွေနဲ့အတူ အစိုးရရုံးစိုက်ရာ နေပြည်တော်မှာလည်း ပြီးခဲ့တဲ့ ရက်ကပဲ လုံခြုံရေး တိုးမြှင့်လိုက်တာတွေ ရှိပေမဲ့အကြောင်းရင်းကိုတော့ မသိရဘူးလို့လည်း မြို့ခံံ တဦးဖြစ်တဲ့ ဦးစိုးနိုင်ကပြောပါတယ်။

"လောလောဆယ် ဒီဘက်ကနေ... နေပြည်တော်ကနေ အပြင်ထွက်မယ့်သူတောင်မှ ထောက်ခံစာနဲ့တောင်မှ အဆင်မပြေဘူးလို့ ပြောတယ်။ နေပြည်တော်ကနေလည်း အဝင်မခံဘူး။ နှစ် ရက်၊ သုံး ရက်လောက်တော့ ရှိသွားပြီ။"

ရန်ကုန်မြို့က ဆန္ဒပြမြင်ကွင်း။ (ဇန်နဝါရီ ၂၉၊ ၂၀၂၁)

သမ္မတနဲ့ ပြည်ထောင်စုရွေးကောက်ပွဲ ကော်မရှင်အဖွဲ့ဝင်တွေကို ရွေးကောက်ပွဲဥပဒေ ချိုးဖောက်မှုနဲ့ အရေးယူဖို့ အတိုက်အခံ ပြည်ထောင်စုနဲ့ ကြံ့ခိုင်ဖွံ့ဖြိုးရေးပါတီနဲ့ မိတ်ဖက်ပါတီတွေရဲ့ စာချွန်တော်အမိန့်လျှောက်ထားမှုကို ပြည်ထောင်စု တရားလွှတ်တော်က လက်ခံသင့်၊ မသင့် ကြားနာခဲ့တဲ့ ဒီနေ့မှာပဲ နေပြည်တော်မှာ ရာဂဏန်းရှိတဲ့ အတိုက်အခံထောက်ခံသူ အင်အားစုတွေ မော်တော်ကားအစီး ၆၀ လောက်နဲ့ စုဝေးဆန္ဒပြခဲ့တဲ့ အတွက်လည်း လုံခြုံရေးကို တိုးမြှင့်ခဲ့ရပါတယ်။

ရွေးကောက်ပွဲအပြီး အစိုးရသစ်နဲ့ လွှတ်တော်တွေ စတင်မယ့် အချိန်မှာပဲ နိုင်ငံရေးအကြပ်အတည်းတွေလည်း ပေါ်ပေါက်နေတာပါ။ လွှတ်တော်တက်မယ့် ကိုယ်စားလှယ်တွေနေထိုင်နေကြတဲ့ နေပြည်တော် စည်ပင်ရိပ်သာနေရာ တဝိုက်မှာလည်း လုံခြုံရေးတိုးမြှင့်ထားတဲ့ သတင်းတွေ ထွက်ပေါ်နေပေမဲ့ အခြေအနေတွေ တည်တည်ငြိမ်ငြိမ် ရှိနေတယ်လို့လည်း ANP ရခိုင်အမျိုးသားပါတီက အမျိုးသားလွှတ်တော်ကိုယ်စားလှယ် ဦးထွန်းအောင်ကျော်ကပြောပါတယ်

"ဒီမှာတော့ သိပ်ပြီးတော့ ထူးထူးခြားခြား အပြောင်းအလဲတော့ ဘာမှမရှိဘူး။ ဒီနေ့လည်း ပုံမှန်အတိုင်းပဲ။ ပုံမှန်လေးသွားနေတာပဲ။ ဒီကလုံခြုံရေးကတော့ ကျနော်တို့လာကတည်းက ပုံမှန်အတိုင်းထားထားတာပဲ။ ထူးထူးခြားခြား ပိုပြီးတော့ လုပ်တာတော့မဟုတ်ပါဘူး။"

လတ်တလော အခြေအနေတွေနဲ့ ပတ်သက်လို့ တပ်မတော်ပြောခွင့်ရသူအပြင် နေပြည်တော်က လုံခြုံရေးတာဝန်ရှိသူတွေနဲ့ အာဏာပိုင်တွေကို ဆက်သွယ်မေးမြန်းဖို့ ကြိုးစားခဲ့ပေမဲ့ မရခဲ့ပါဘူး။ ကိုဗစ်ရောဂါ ထိန်းချုပ်ရေးအတွက် လုံခြုံရေး တိုးမြှင့်မယ်လို့ သတင်းထုတ်ပြန်ထားတဲ့ နေပြည်တော်ကောင်စီက တာဝန်ရှိသူတဦးဖြစ်တဲ့ ဦးတင်ထွန်းကို ဆက်သွယ်မေးမြန်းရာမှာတော့ လုံခြုံရေးပိုင်းနဲ့ ပတ်သတ်လို့ မပြောနိုင်ကြောင်း ဗွီအိုအေကိုပြောပါတယ်။ နေပြည်တော်က သမ္မတရုံးမှာ လကုန်ရက် သောကြာနေ့တွေမှာ ပုံမှန်ကျင်းပလေ့ရှိတဲ့ သတင်းစာရှင်းလင်းပွဲကိုလည်း ဒီတပတ်မှာ ကျင်းပတာ မတွေ့ရပါဘူး။

ဒီနေ့ညနေပိုင်းမှာပဲ ရန်ကုန်တိုင်း ဗဟန်းမြို့နယ်က ရွေးကောက်ပွဲ ကော်မရှင်ရုံးအနီး တပ်မတော်ထောက်ခံသူ အင်အားရာချီ ဆန္ဒပြခဲ့ပြီး ကော်မရှင်ကို ကန့်ကွက်ဝေဖန်ခဲ့ကြပါတယ်။

မန္တလေးမြို့မှာလည်း ဒီကနေ့မနက်ပိုင်းက တရားလွှတ်တော်ရုံးအနီး ဆန္ဒပြဖို့ စီစဉ်ထားတယ်ဆိုတဲ့ သတင်းတွေကြောင့် လုံခြုံရေးတိုးမြှင့်ထားခဲ့ရတယ်လို့ မြို့ခံတဦးဖြစ်တဲ့ ဦးသိန်းအောင်မြင့်က ဗွီအိုအေကို ပြောပါတယ်။

"တရားလွှတ်တော်ရုံးကို လာပြီးတော့ ဆန္ဒပြမယ်လို့ အသံကြားလို့ဆိုပြီး လုံခြုံရေးတွေချထားတာ တွေ့ခဲ့တာပဲခင်ဗျ။ မနက်ကတည်းကနေချထားတာ နေ့လယ်လောက်မှ ဘာသတင်းထပ်ရလို့လည်း မသိဘူး။ ပြန်ပြီးတော့ လူစုခွဲလိုက်တာတွေ့တယ်။ ဟိုနားကပဲ ပြမလိုလို၊ ဒီနားကပဲ ပြတော့မလိုလို.... အသံတွေကတော့ ကောလဟာလတွေကတော့ ထွက်နေတာပဲပေါ့နော်။"

နိုဝင်ဘာလ ၈ ရက်နေ့မှာ ကျင်းပခဲ့တဲ့ ရွေးကောက်ပွဲမှာ မဲမသာမှုတွေ ဖြစ်နိုင်ခြေရှိတယ်ဆိုပြီး တပ်မတော်က ပြောဆိုနေသလို အတိုက်အခံ နိုင်ငံရေးအင်အားစုတွေကလည်း ရွေးကောက်ပွဲရလဒ်အပေါ် ကန့်ကွက်မှုတွေ ရှိနေရာက နိုင်ငံရေးတင်းမာမှုတွေ ကြီးထွားလာနေတာ ဖြစ်ပါတယ်။ တပ်မတော်ရဲ့ သတင်းစာရှင်းလင်းပွဲအတွင်း တိုင်းပြည်အာဏာသိမ်းနိုင်ခြေ ရှိ၊ မရှိ သတင်းထောက်တွေရဲ့ အမေးကို ယတိပြတ် မငြင်းခဲ့သလို ကာကွယ်ရေးဦးစီးချုပ်ကလည်း ဖွဲ့စည်းပုံကို မလိုက်နာရင် ဖျက်ပစ်ဖို့အထိ ပြင်းပြင်းထန်ထန် ပြောဆိုခဲ့တာပါ။ ဒီတပတ်ထဲမှာပဲ ရန်ကုန်နဲ့ နေရာတချို့မှာ တပ်မတော်က သံချပ်ကာယာဉ်တွေ ဖြတ်သန်းမောင်းနှင်တာလို သတင်းတွေလည်း ထွက်ပေါ်ခဲ့တာကြောင့် စိုးရိမ်မှုတွေလည်း ရှိနေပါတယ်။

မြန်မာသတင်းသမားတဦးဖြစ်တဲ့ ဦးသီဟသွေးကတော့ ရွေးကောက်ပွဲနောက်ပိုင်း နိုင်ငံရေးအားပြိုင်မှုတွေရဲ့ ရလဒ်အဖြစ် သုံးသပ်ပါတယ်။

"ဒီအားပြိုင်ပွဲမှာ ပြီးခဲ့တဲ့ ၂၀၂၀ ရွေးကောက်ပွဲမှာ ဖြစ်ပေါ်လာတဲ့ ရလဒ်ကို အကြောင်းပြုပြီးတော့ နိုင်ငံရေး ဂုဏ်သိက္ခာအရပဲ ဖြစ်ဖြစ်၊ ရသင့်ရထိုက်တဲ့ဝေစုပဲဖြစ်ဖြစ် စသည်ဖြစ်ပေါ့နော်... အဲဒါတွေအားလုံးကို ပစ်မှတ်ထားပြီးတော့ ရည်ရွယ်ပြီးတော့ ကစားနေတဲ့ နိုင်ငံရေးအခင်းအကျင်းတွေလို့ မြင်ပါတယ်။"

မကြာခင် အစိုးရသစ်နဲ့ လွှတ်တော်တွေ ထွက်ပေါ်လာတော့မယ့် အချိန်မှာပဲ နိုင်ငံရေး တင်းမာမှုတွေ ပေါ်ပေါက်လာနေတဲ့အပေါ် စိုးရိမ်ကြောင်း ဒီကနေ့ပဲ မြန်မာနိုင်ငံအခြေစိုက် အနောက်နိုင်ငံသံရုံးတွေက ပူးတွဲကြေညာချက် ထုတ်ပြန်ခဲ့ကြပါတယ်။ အမေရိကန်နိုင်ငံခြားရေးဝန်ကြီးဌာနကတော့ ရွေးကောက်ပွဲရလဒ်ကို အင်အားသုံးခြိမ်းခြောက်တဲ့ လုပ်ရပ်မျိုးကို လက်ခံမှာ မဟုတ်ကြောင်း ဗွီအိုအေကို ပြောဆိုခဲ့သလို၊ ကုလသမဂ္ဂ အတွင်းရေးမှူးချုပ်ကလည်း ရွေးကောက်ပွဲ ရလဒ်ကို လေးစားဖို့ သွေးထိုးလှုံ့ဆော်ပြီး တည်ငြိမ်မှုပျက်ပြားအောင် မလုပ်ဖို့ မနေ့တုန်းကပဲ သတိပေးထားပါတယ်။


ေမခ/ VOA Burmese

https://burmese.voanews.com/a/myanmar-election-2020-tatmataw/5756702.html

တစ်နှစ်အတွင်း လူဦးရေထက်ဝက် ကိုဗစ်ကာကွယ်ဆေးထိုးဖို့ မြန်မာ့ကျန်းမာရေး ရည်မှန်းထား

မန္တလေးတိုင်းဒေသကြီး၊ မန္တလေးမြို့တော်ခန်းမမှာ ကျန်းမာရေးဝန်ထမ်းများကို ကိုဗစ်ကာကွယ်ဆေး ထိုးနှံပေးနေတဲ့ မြင်ကွင်း။ (ဓာတ်ပုံ -Ministry of Health and Sports, Myanmar - ဇန်နဝါရီ ၂၇၊ ၂၀၂၁)

ကိုဗစ်ကပ်ရောဂါ ကာကွယ်ဆေးတွေကို မြန်မာနိုင်ငံ လူဦးရေ ထက်ဝက်လောက်ကို တနှစ်အတွင်း ထိုးပေးဖို့ ရည်မှန်းထားကြောင်း ကျန်းမာရေးနဲ့ အားကစားဝန်ကြီးဌာန တာဝန်ရှိသူက ပြောဆိုလိုက်တဲ့သတင်းကို တင်ဆက်ပေးပါမယ်။ ဗွီအိုအေမြန်မာပိုင်းသတင်းထောက် မစုစုက သတင်းပေးပို့ထားပါတယ်။

အိန္ဒိယနိုင်ငံထုတ် ကိုဗစ်ရောဂါကာကွယ်ဆေး Covishield ၁,၅၀၀,၀၀၀ ကို ဇန်နဝါရီလ ၂၇ ရက်နေ့ကစပြီး ကျန်းမာရေးဝန်ထမ်းတွေနဲ့ စေတနာရှင်ဝန်ထမ်းတွေကို ပထမအသုတ်အနေနဲ့ စတင်ထိုးနှံပေးနေတာပါ။ ကာကွယ်ဆေးပထမဆုံး ထိုးနှံပေးနေတဲ့ နှစ် ရက်တာကာလအတွင်းမှာ လူဦးရေ ၆၈,၀၀၀ ကျော်ကို ထိုးနှံပေးခဲ့ပြီးဖြစ်ပါတယ်။ အိန္ဒိယနိုင်ငံက နှစ်နိုင်ငံအစိုးရကြား ချစ်ကြည်ရေးလက်ဆောင်အဖြစ် ပေးထားတဲ့ ဒီကာကွယ်ဆေးတွေကို ဖေဖော်ဝါရီ ၅ ရက်နေ့ကစပြီး ဦးစားပေးအဆင့်လိုက် ပြည်သူတွေကိုစတင် ထိုးနှံပေးသွားဖြစ်ပြီး တနှစ်အတွင်း လူဦးရေထက်ဝက်လောက်ကို ထိုးနှံပေးနိုင်ဖို့ မျှော်လင့်ကြောင်းလည်း ကျန်းမာရေးနဲ့ အားကစားဝန်ကြီးဌာနပြောခွင့်ရ၊ ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက ပြောပါတယ်။

“ကျမတို့ အခုလက်ရှိမှာ ကာကွယ်ဆေးတွေသည် အိန္ဒိယကနေ Covishield သန်း ၃၀ ဝယ်ပါတယ်။ သန်း ၃၀ သည် ကျမတို့ စုစုပေါင်း လူဦးရေရဲ့ ၂၆၊ ၂၇ ရာခိုင်နှုန်းလောက်ရှိပါတယ်။ WHO ရဲ့ COVAX အဖွဲ့အစည်းကနေပြီးတော့ ရနိုင်တာက ကျမတို့ လူဦးရေရဲ့ ၂၀ ရာခိုင်နှုန်းရမှာဖြစ်ပါတယ်။ အဲဒီတော့ ၂၀ နဲ့ ၂၆ နဲ့ပေါင်းရင် ၄၆ ရာခိုင်နှုန်းလောက်ကတော့ ၂၀၂၁ အတွင်းမှာ ဒါခြုံငုံမိနိုင်တယ်၊ ထိုးနှံနိုင်တယ်လို့ တွေးလို့ရပါတယ်။”

အိန္ဒိယကနေ ဝယ်ယူထားတဲ့ ကာကွယ်ဆေးတွေထဲက ဆေးအလုံးရေ ၂,၀၀၀,၀၀၀ ကို ဖေဖော်ဝါရီလအစောပိုင်းမှာ ရောက်ဖို့ရှိနေပြီး COVAX အဖွဲ့ဝင်နိုင်ငံတွေဆီ ပေးပို့မယ့် ကာကွယ်ဆေးတွေကိုလည်း မြန်မာနိုင်ငံအနေနဲ့ မတ်လအတွင်းမှာ ရရှိနိုင်ဖို့ မျှော်မှန်းထားပါတယ်။ ပြည်တွင်းမှာ အသုံးပြုသွားမယ့် ကာကွယ်ဆေးတွေနဲ့ ပတ်သက်လို့ ဒေါက်တာခင်ခင်ကြီးက …

“အခုကာကွယ်ဆေးတွေနဲ့ ပတ်သက်လို့ရှိရင် အိန္ဒိယကာကွယ်ဆေးကို သုံးတယ်။ WHO ရဲ့COVAX ကနေ လာတဲ့ ကာကွယ်ဆေးတွေ သုံးမယ်။ ဒါ့အပြင် တရုတ်နိုင်ငံခြားရေး ဝန်ကြီးနဲ့ နိုင်ငံတော်ကောင်စစ်ဝန် မစ္စတာဝမ်ယိလာတုန်းကလည်း ကာကွယ်ဆေး ၃၀၀,၀၀၀ လှူဒါန်းမယ်ဆိုပြီးတော့ ပြောထားတာရှိပါတယ်။ တရုတ်ရဲ့ ဘယ်ကာကွယ်ဆေးပေးမလဲတော့ မသိပါဘူး။ လက်ရှိအနေအထားအရတော့ တရုတ်ရဲ့ကာကွယ်ဆေး ၄ မျိုးဟာဆိုရင် Early or Limited Use စာရင်း ၈ ခုထဲမှာ သူတို့ ၄ ခုပါပါတယ်။ ရုရှားကာကွယ်ဆေး ၂ ခုပါပါတယ်။ အောက်စ်ဖို့ ၁ ခုဖြစ်ပါတယ်။ ပြီးရင် Bharat Biotech က ၁ ခု ဖြစ်ပါတယ်။ ဒါကတော့ ခုဏကပြောသလို Early or Limited Use ထဲမှာပါတဲ့ ၈ ခုဖြစ်ပါတယ်။ ၈ ခုမှာမှ တရုတ်က ၄ ခုထဲမှာ ဘယ်ကာကွယ်ဆေးရရှိမလဲ... ဒါနဲ့ပတ်သက်ရင်တော့ မသိသေးပါဘူး။ သက်ဆိုင်ရာအဖွဲ့တွေက ဒါညှိနှိုင်းပေါင်းစပ်ပြီးတော့ ဆောင်ရွက်နေဦးမှာဖြစ်ပါတယ်။”

ကိုယ်ဝန်ဆောင်အမျိုးသမီးတွေ၊ နို့တိုက်မိခင်တွေနဲ့ ကိုဗစ်ရောဂါကူးစက်ခံနေရသူတွေအပါအဝင် ရောဂါပျောက်ကင်းတာ ၁၄ ရက်မပြည့်သေးသူတွေအပြင် အသက် ၁၈ နှစ်အောက်ရှိသူတွေက လွဲလို့ ရောဂါကာကွယ်ဆေး ထိုးနှံနိုင်တယ်လို့ ကျန်းမာရေးဌာနက ထုတ်ပြန်ထားပါတယ်။ ကာကွယ်ဆေးနဲ့ ပတ်သက်ပြီး သတင်းအချက်အလက်အမှားတွေကို မယုံကြဖို့ကိုလည်း ဒေါက်တာခင်ခင်ကြီးက သတိပေးထားပါတယ်။

“နောက်ထပ် ဘယ်ကာကွယ်ဆေးတွေ ဝယ်မလဲဆိုတာကတော့ လက်ရှိကာကွယ်ဆေးတွေရဲ့ သူ့ရဲ့စိတ်ချရမှု၊ ဘေးကင်းလုံခြုံမှုက ထပ်ထပ်ပြီးတော့ ထွက်လာနိုင်ပါတယ်။ အချုပ်အားဖြင့်ပြောချင်တာကတော့ ကျမတို့မြန်မာနိုင်ငံသူ နိုင်ငံသားတွေအတွက် အာနိသင်ကောင်းမွန်တဲ့ စိတ်ချရတဲ့ကာကွယ်ဆေးကိုသာ ထိုးနှံပေးနေတာဖြစ်တဲ့အတွက်ကြောင့်မို့ သတင်းမှားတွေကို မယုံပါနဲ့၊ သတင်းမှားတွေကို မ share ပါနဲ့။ အသေးစိတ်သိချင်တာရှိရင်လည်း 2019 ကိုမေးပါ။ ”

နိုင်ငံတွင်း ရောဂါကာကွယ်ဆေး စတင်ထိုးနှံပေးနေချိန်မှာပဲ အတည်ပြုလူနာ တနေ့ကိုပျမ်းမျှ ၃၀၀ ကျော် လောက်ရှိနေပါတယ်။ ကျန်းမာရေးနဲ့ အားကစားဝန်ကြီးဌာနရဲ့ ဇန်နဝါရီလ ၂၈ ရက်နေ့အထိ ထုတ်ပြန်ထားတဲ့စာရင်းအရ ပြည်တွင်းမှာကပ်ရောဂါကြောင့် သေဆုံးသူ ၃,၁၀၀ ကျော်နဲ့ ရောဂါကူးစက်ခံရသူပေါင်းက ၁၃၉,၀၀၀ ကျော်ရှိနေပါတယ်။


စုစု/ VOA Burmese

https://burmese.voanews.com/a/mhos-health-vaccine/5756631.html

ရွေးကောက်ပွဲရလဒ် ပြောင်းလဲဖို့ ကြိုးစားမှု သံတမန်အဖွဲ့အစည်းတွေ ကန့်ကွက်


ရွေးကောက်ပွဲရလဒ်ကို ပြောင်းလဲဖို့ ဒါမှမဟုတ် မြန်မာ့ဒီမိုကရက်တစ် အသွင်ကူးပြောင်းရေးကို ကြန့်ကြာစေ မယ့် ကြိုးပမ်းအားထုတ်မှုတွေကို ဆန့်ကျင်ကန့်ကွက်တယ်လို့ မြန်မာနိုင်ငံဆိုင်ရာ ဥရောပသမဂ္ဂသံရုံးနဲ့ ဥရောပသမဂ္ဂအဖွဲ့ဝင်နိုင်ငံတွေက ဒီကနေ့ ကြေညာလိုက်ပါတယ်။

ဒီရက်ပိုင်းအတွင်း တပ်မတော်ဘက်က အာဏာမသိမ်းဘူးလို့ မမှတ်ယူနိုင်ကြောင်း၊ ဖွဲ့စည်းပုံအခြေခံဥပဒေကို ဖျက်ပစ်လို့ရကြောင်း ပြောဆိုမှုတွေ ထွက်ပေါ်နေချိန်မှာပဲ သြစတြေးလျ၊ ကနေဒါ၊ မြန်မာနိုင်ငံဆိုင်ရာ ဥရောပ သမဂ္ဂသံရုံးနဲ့ ဥရောပသမဂ္ဂအဖွဲ့ဝင် နိုင်ငံသံရုံးတွေ၊ ဒိန်းမတ်၊ ချက်သမ္မတနိုင်ငံ၊ ဖင်လန်၊ ဆွစ်ဇာလန်၊ ပြင်သစ်၊ ဂျာမနီ၊ အီတလီ၊ နယ်သာလန်၊ စပိန်၊ ဆွီဒင်၊ ယူကေ၊ အမေရိကန်၊ နော်ဝေနဲ့ နယူးဇီလန်နိုင်ငံဆိုင်ရာ သံရုံးတွေက ဒီမိုကရေစီစံနှုန်းတွေကို လိုက်နာစောင့်ထိန်းကြဖို့ တပ်မတော်နဲ့ လူပုဂ္ဂိုလ်အဖွဲ့အစည်းတွေကို တိုက်တွန်းလိုက်တာပါ။

ကုလသမဂ္ဂ အထွေထွေအတွင်းရေးမှူးချုပ် မစ္စတာ အန်တိုနီဂူတာရက်စ်ကလည်း ၂၀၂၀ နိုဝင်ဘာ ၈ရက်နေ့မှာ ကျင်းပတဲ့ မြန်မာနိုင်ငံရဲ့ ရွေးကောက်ပွဲရလဒ်ကို လေးစားဖို့ ဇန်နဝါရီ ၂၈ ရက်နေ့က တိုက်တွန်းလိုက်ပါတယ်။

လက်ရှိဖြစ်ပေါ်နေတဲ့ နိုင်ငံရေးအကျပ်အတည်းတွေကို ဖြေရှင်းနိုင်ဖို့ တပ်မတော်ဘက်က အရာရှိနှစ်ဦးနဲ့ အစိုးရဘက်က ထိပ်ပိုင်းခေါင်းဆောင်တွေ မနေ့က တွေ့ဆုံခဲ့ကြပြီး တပ်မတော်ဘက်က တတိယအကြိမ် လွှတ်တော်အစည်းအဝေးကို ရွှေ့ဆိုင်းပေးဖို့ တောင်းဆိုခဲ့တာကြောင့် တွေ့ဆုံပွဲ အဆင်မပြေဖြစ်ခဲ့တယ်လို့ သတင်းတွေ ထွက်ပေါ်နေပါတယ်။

အဲဒီတွေ့ဆုံပွဲနဲ့ပတ်သက်ပြီး အတည်ပြုလို့ မရသေးပေမယ့် လက်ရှိနိုင်ငံရေး အခက်အခဲတွေနဲ့ ပတ်သက်လို့ နိုင်ငံတကာအဖွဲ့အစည်းတွေရဲ့ တိုက်တွန်းမှုကြောင့် တစ်နည်းတစ်ဖုံ ပြေလည်အောင် နည်းလမ်း ရှာနိုင်လိမ့်မယ်လို့ အာဏာရပါတီ အမျိုးသားဒီမိုကရေစီအဖွဲ့ချုပ် NLD ပါတီရဲ့ ဗဟိုပြန်ကြားရေးအဖွဲ့ အတွင်းရေးမှူး မုံရွာအောင်ရှင်က ပြောပါတယ်။

“မပြေလည်ဘူးပေါ့လေ၊ အဆင်မပြေဘူး ညှိနှိုင်းတာ အဆင်မပြေဘူးဆိုတာတွေလည်း ပါလာတယ်ပေါ့။ အဲဒီဟာ သိပ်ပြီး Confirm မဖြစ်ဘူးလို့ပဲ ကျွန်တော်ပြောချင်ပါတယ်။ နောက်တစ်ခါ ဒီ EU ကလည်း ဒီကိစ္စအပေါ်မှာ ကန့်ကွက်တယ်၊ အမေရိကန်ကလည်း ကန့်ကွက်တယ်၊ ရွေးကော်ပွဲရလဒ်ကို ထောက်ခံ တာမျိုးလုပ်တယ်။ အဲဒါမျိုးတွေ ရှိလာတဲ့အခါကြတော့ ကျွန်တော်ထင်တာတော့ အခု အလတ်တလော ဖြစ်ပေါ်နေတဲ့ ကိစ္စတွေကတော့ ဘယ်လိုနည်းနဲ့ ပြေလည်ကြမလဲတော့မသိဘူး။ တစ်နည်းတစ်ဖုံ ပြေလည်အောင်တော့ နည်းလမ်းရှာနေကြလိမ့်မယ်တော့ ကျွန်တော်အဲလိုပဲထင်ပါတယ်။”

အစိုးရနဲ့ တပ်မတော် ထိပ်ပိုင်းခေါင်းဆောင်တွေ မနေ့က တွေ့ဆုံခဲ့တယ်ဆိုတဲ့ သတင်းတွေနဲ့ ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့ ဗိုလ်ချုပ်ဇော်မင်းထွန်းကို RFA က ဆက်သွယ်မေးမြန်းပေမယ့် ဖုန်းလက်ခံဖြေကြားတာ မရှိပါဘူး။

ရွေးကောက်ပွဲအငြင်းပွားနေတဲ့ ကိစ္စရပ်တွေကို NLD အစိုးရက ဖြေရှင်းမပေးဘူးဆိုရင်၊ တပ်မတော်ဘက်က အာဏာမသိမ်းနိုင်ဘူးလို့ မမှတ်ယူနိုင်ကြောင်း တပ်မတော် သတင်းမှန်ပြန်ကြားရေးအဖွဲ့ ဥက္ကဋ္ဌ ဗိုလ်ချုပ် ဇော်မင်းထွန်းက ဇန်နဝါရီ ၂၇ ရက်နေ့ သတင်းစာရှင်းလင်းပွဲမှာ ပြောခဲ့ပါတယ်။ အဲဒီနောက်ပိုင်း တပ်မတော် ကာကွယ်ရေးဦးစီးချုပ်ကလည်း ဥပဒေကို မလိုက်နာရင် ဖွဲ့စည်းပုံ အခြေခံဥပဒေဆိုရင်တောင် ဖျက်သိမ်း ရမယ်လို့ ပြောဆိုလာပါတယ်။

အဲဒီလို ပြောဆိုချက်တွေရှိနေတဲ့ တစ်ပြိုင်တည်းမှာပဲ ရန်ကုန်တိုင်း၊ မန္တလေးတိုင်း၊ စစ်ကိုင်းတိုင်းနဲ့ မြို့အချို့မှာ သံချပ်ကာကားတွေ တင့်ကားတွေ လမ်းပေါ်ထွက်လာတာနဲ့ ပတ်သက်လို့ ပြည်သူတွေကြားမှာ တပ်မတော် အာဏာသိမ်းတော့မလားဆိုတဲ့ စိုးရိမ်မှုတွေ၊ ဝေဖန်မှုတွေလည်း ရှိနေပါတယ်။

ပြည်ထောင်စု ရွေးကောက်ပွဲကော်မရှင်က ပြီးခဲ့တဲ့ ၂၀၂၀ ပြည့်နှစ် ရွေးကောက်ပွဲမှာ မဲစာရင်း မှားယွင်း တာတွေရှိခဲ့ပေမယ့် တပ်မတော်ဘက်က စွပ်စွဲထားသလို မဲမသမာမှုတွေ မရှိခဲ့ဘူးလို့ မနေ့က တုံ့ပြန် ထားပါတယ်။

အစိုးရနဲ့ တပ်မတော်ကြား နိုင်ငံရေးတင်းမာမှုတွေကြောင့် ပြည်သူတွေကြားမှာ စိုးရိမ်မှုတွေ၊ ဝေဖန်မှုတွေ မြင့်တက်လာသလို နိုင်ငံတကာ အဖွဲ့အစည်းတွေကလည်း ထုတ်ဖော်ပြောလာရတဲ့အထိ ဖြစ်လာပါတယ်။

လက်ရှိ အကျပ်အတည်းအရ တပ်မတော်က အာဏာသိမ်းမယ့်အခြေအနေ ပိုပြီးများနေတယ်လို့ ဖက်ဒရယ် ဒီမိုကရက်တစ်အင်အားစုက ဦးမြအေးက သုံးသပ်ပါတယ်။

“နောက်ဆုံး အခြေအနေအရ ကျွန်တော်တို့ သိသလောက်ဆိုရင်တော့ အစိုးရနဲ့ တပ်ဘက်နဲ့ ဆွေးနွေးတာ မပြေလည်ဘူးလို့လည်း သိရတယ်။ တပ်ဘက်ကလည်း ပြောစရာစကားတွေက တော်တော်ကုန်အောင် ပြောထားတယ်ဆိုတဲ့ အခါကြတော့ သူ့ဘက်ကလည်း ထွက်ပေါက်ပိတ်နေတယ်၊ ဒီအစိုးရဘက်ကလည်း အကျပ်အတည်း ထွက်ပေါက်နည်းနေတယ်လို့ ကျွန်တော်မြင်တယ်။ နှစ်ဖက်လုံးပေါ့နော်။ အခု အခြေအနေက ကျွန်တော်အမြင်အရ အာဏာသိမ်းတာကိုတော့ မူအရရော ဘယ်လိုမှ လက်ခံနိုင်စရာ မရှိဘူးဗျာ။ ဒါတိုင်းပြည်က ပိုဆိုးသွားလိမ့်မယ်။ သို့သော် လက်ရှိဖြစ်ပျက်နေတဲ့ အခြေအနေအရကြတော့ အာဏာသိမ်းဖို့ဘက်ကို ပိုပြီးတော့ အလားသဏ္ဍန်များတယ်လို့ ကျွန်တော်ကတော့ သုံးသပ်တယ်။”

အာဏာသိမ်းသည်ဖြစ်စေ မသိမ်းသည်ဖြစ်စေ အရပ်ဘက်၊ စစ်ဘက် ဆက်ဆံရေး မပြေလည်ဘူးဆိုရင် ရှေ့အနာဂတ်အလားအလာ မကောင်းနိုင်သလို လူထုကို အကျပ်အတည်းဖြစ်အောင် နိုင်ငံရေး နည်းလမ်းဟောင်းတွေသုံးပြီး မလုပ်စေချင်ဘူးလို့ ဦးမြအေးက တိုက်တွန်းပါတယ်။

လူ့ဘောင်သစ် ဒီမိုကရက်တစ်ပါတီရဲ့ ဥက္ကဋ္ဌ ဦးအောင်မိုးဇော်ကတော့ လက်ရှိနိုင်ငံရဲ့ အနေအထားဟာ အာဏာသိမ်းရမယ့် အနေအထား၊ အခြေအနေ မဟုတ်ဘူးလို့ ယူဆကြောင်းနဲ့ အစိုးရနဲ့ တပ်မတော် ဖြေရှင်းလို့ရတဲ့ အနေအထားတွေရှိပေမယ့် အခုလို အခြေအနေတွေဖြစ်လာတာဟာ တိုင်းပြည်အတွက် မကောင်းသလို ဒီမိုကရေစီရေးအတွက် စိုးရိမ်စရာဖြစ်တယ်လို့ ပြောပါတယ်။

“ဒီနေ့တိုင်းပြည်ရဲ့အနေအထားက အာဏာသိမ်းရမယ့် အနေအထား၊ အာဏာသိမ်းရမယ့် အခြေအနေ မဟုတ်ဘူးလို့ ကျွန်တော်အနေနဲ့ ယူဆတယ်။ အဲဒီလိုလည်း ဖြစ်လာနိုင်ဖို့အတွက်က နဲနဲနည်းတယ်လို့ ကျွန်တော်ထင်ပါတယ်။ ဒါကျွန်တော့် ထင်မြင်ချက်ပါ။ ဒီအခြေအနေကို အစိုးရနဲ့ တပ်မတော်ကြားမှာ ဆက်ဆံရေးတွေရှိနေတာပဲ အဲလိုဖြေရှင်းသွားလို့ရတဲ့ အခြေအနေတွေ ရှိရဲ့သားနဲ့ အခုလို အုတ်အော်သောင်းနင်း ဖြစ်လာတဲ့ အနေအထားတွေက တိုင်းပြည်အတွက် အတော်မကောင်းဘူး ဖြစ်တယ်။ တစ်ပြိုင်နက်တည်းမှာပဲ ကနေ့သွားနေတဲ့ ဒီမိုကရေစီရေး ဖြစ်စဉ်အတွက် စိုးရိမ်စရာ ဖြစ်တာတော့ အမှန်ပါပဲ”

ပြည်သူ့ပါတီ အထွေထွေအတွင်းရေးမှူး ဦးရဲနိုင်အောင်ကလည်း အခုအကျပ်အတည်းကို ဖြေရှင်းတဲ့အခါ သက်ဆိုင်ရာ အင်အားစုတွေက ဒီမိုကရေစီ နောက်မဆုတ်တဲ့ နည်းလမ်းအရ ဖြေရှင်းနိုင်ဖို့လိုတယ်လို့ ပြောပါတယ်။

“ကျွန်တော်တို့ သဘောထားကတော့ အာဏာသိမ်းတာကို လုံးဝ လုံးဝ ကန့်ကွက်တယ်၊ ဆန့်ကျင်တယ်။ ဒီမိုကရေစီ ပြုပြင်ပြောင်းလဲမှုကို နှောင့်နှေးစေတဲ့ နောက်ဆုတ်စေတဲ့ ဘယ်လိုလုပ်ရပ်မျိုးကိုမဆို ကျွန်တော်တို့အနေနဲ့ ကန့်ကွက်တယ်။ လက်ရှိ အကျပ်အတည်းကတော့ ၂၀၀၈ ဖွဲ့စည်းပုံအခြေခံဥပဒေကို မူတည်ပြီးတော့ အကြောင်းပြုပြီးဖြစ်တဲ့ အကျပ်အတည်းပေါ့နော်။ ဒီအကျပ်အတည်းကို ဖြေရှင်းနိုင်ဖို့ ဆိုရင် သက်ဆိုင်တဲ့ အင်အားစုအားလုံးအနေနဲ့ တိုင်းပြည်နဲ့လူမျိုးမျက်နှာကို ထောက်ထားပြီးတော့ နိုင်ငံရေးနည်းလမ်းအရ တည်တည်ငြိမ်ငြိမ်ပေါ့ ဒီမိုကရေစီနည်းလမ်းကို နောက်မဆုတ်တဲ့ နည်းလမ်းနဲ့ ဖြေရှင်းနိုင်ဖို့ တိုက်တွန်းပန်ကြားလိုတယ်။”

ဆွီဒင်နိုင်ငံမှာ နေထိုင်တဲ့ ဥပဒေပညာရှင် ရှေ့နေ ဦးအောင်ထူးက ၂၀၀၈ ဖွဲ့စည်းပုံ အခြေခံဥပဒေအရ အလွယ်တကူ အာဏာသိမ်းလို့ မရဘူးလို့ ယူဆပါတယ်။

“အာဏာအလွယ်တကူ သိမ်းလို့ရတာမဟုတ်ဘူး။ တိုင်းပြည်ရဲ့ အခြေအနေ တည်ငြိမ်ပျက်ပြားအောင် ဘာညာ ကန့်သတ်ချက်တွေရှိတယ်။ အဲဒီကန့်သတ်ချက်နဲ့အညီ စစ်အုပ်ချုပ်ရေး လိုချင်တာတောင်မှ လုပ်ထုံးလုပ်နည်းအညီ သွားရမယ်။ လုပ်ထုံးလုပ်နည်းနဲ့အညီဆိုတာ အရေးပေါ်အခြေအနေ ပြဌာန်းချက်မှာ ဖော်ပြထားတဲ့ ကန့်သတ်ချက်မျိုး အဲလိုအခြေအနေမျိုး ရောက်မှသာလျှင် သမ္မတက လွှဲပေးမှ စစ်အုပ်ချုပ်ရေး လုပ်ပိုင်ခွင့်ရှိတာ။ အဲဒါမျိုးကို ဗိုလ်ချုပ် ဇော်မင်းထွန်းက ပြောနေပုံရှိတယ်။ ၂၀၀၈ ဖွဲ့စည်းပုံအခြေခံဥပဒေ အောက်မှာပဲ လုပ်မယ့်ဟာမျိုး ပြောနေတာ။ ၂၀၀၈ ဖွဲ့စည်းပုံအခြေခံဥပဒေ လိုအပ်ရင် ဖျက်မယ်တို့ ကာချုပ်က ပြောတယ်ဆိုတာမျိုးတွေကတော့ ကျွန်တော့်စိတ်အထင် ခြိမ်းခြောက် တာပဲ။ ၂၀၀၈ ဖွဲ့စည်းပုံအခြေခံဥပဒေ ဖျက်လိုက်လဲ ပြီးတာပဲ ဘာလို့လဲဆိုတော့ ဖွဲ့စည်းပုံအခြေခံဥပဒေနဲ့ အညီ အာဏာသိမ်းခွင့်ရထားတာကိုက တိုင်းပြည်အခြေအနေက ပိုဆိုးနေတာ။ ဒီလိုမျိုး အာဏာသိမ်း နိုင်တဲ့ ဖွဲ့စည်းပုံအခြေခံဥပေဒ မရှိတော့ဘူးဆိုရင် နိုင်ငံရေး လမ်းကြောင်းသစ် ပေါ်လာနိုင်မှာပဲ ကျွန်တော်တော့ အဲလိုယူဆတယ်။ ”

၂၀၀၈ ဖွဲ့စည်းပုံ အခြေခံဥပဒေနဲ့အညီ တပ်မတော်က အာဏာသိမ်းထားပြီးဖြစ်တာကြောင့် မလိုလားအပ်ဘဲ စိုးရိမ်မှုလွန်ကဲနေတယ်လို့ ဥပဒေပညာရှင် ဦးအောင်ထူးက ထောက်ပြပါတယ်။

“ပြီးခဲ့တဲ့ ၂၀၁၅၊ ၂၀၂၀ အုပ်ချုပ်သွားတဲ့ ဖြစ်စဉ်ကို ပြန်ကြည့်ပါ။ တကယ်တမ်း အရေးကြီးတဲ့ ပြဿနာတွေ တက်လာပြီဆိုရင် လက်ရှိ ဒေါ်အောင်ဆန်းစုကြည် ခေါင်းဆောင်တဲ့ အရပ်သားအစိုးရမှာ ဘာအာဏာ ဘာလုပ်ပိုင်ခွင့်မှ မရှိဘူး။ ဥပမာ ရခိုင်မှာဖြစ်ခဲ့တဲ့ ကိစ္စတွေကိုပဲကြည့်၊ အခုလောလာဆယ် ကရင်ပြည်နယ် ဖြစ်တဲ့ ကိစ္စတွေကိုကြည့် တစ်ပြည်လုံးမှာ သူကြေညာချင်တဲ့အခါ တစ်နိုင်ငံလုံး ပစ်ခတ်တိုက်ခိုက် ရပ်စဲရေးကြေညာတယ်၊ မကြေညာချင်တဲ့ ပြည်နယ်ချန်ထားခဲ့တယ်။ လုပ်ချင်သလို လုပ်နေကြတာ ဒီဖွဲ့စည်းပုံ အခြေခံဥပဒေအောက်မှာ ဖြစ်နေတဲ့ အခြေအနေကိုပြောတာ။ အဲတော့ တိုင်းပြည်ရဲ့ တကယ်တိုးတက်ဖွံ့ဖြိုးမှု၊ တည်ငြိမ်မှု၊ ငြိမ်းချမ်းမှုကို လုပ်နိုင်တဲ့ဟာ အရပ်သားအစိုးရဆီမှာ ရှိကိုမရှိဘူး။ ပြောချင်တာက ၂၀၀၈ ဖွဲ့စည်းပုံအခြေခံဥပဒေနဲ့ အညီကို စစ်တပ်က အာဏာ သိမ်းထားပြီးသား။ အဲဒါကို အာဏာသိမ်းမှာ ကြောက်တယ်ဆိုတာကိုက လူထုရဲ့ ထင်မြင်ယူဆချက်က မလိုလားအပ်ဘဲ စိုးရိမ်လွန်ကဲနေတာဖြစ်တယ်။”

အခုလို နိုင်ငံတကာက ထောက်ပြတာကို ကြိုဆိုပေမယ့် နောင်ရွေးကောက်ပွဲတွေ အလားတူ ပြဿနာမျိုး ပေါ်မလာနိုင်အောင် ဘယ်လိုအခြေခံ အုတ်မြစ်မျိုးချမယ်ဆိုတာမျိုး ဖိအားပေးသင့်တယ်လို့ တိုက်တွန်းပါတယ်။

ကချင်လွတ်မြောက်ရေးအဖွဲ့ KIO သတင်းနှင့်ပြန်ကြားရေးတာဝန်ခံ ဗိုလ်မှူးကြီး နော်ဘူကတော့ ဒီအကျပ်အတည်းကို ဖြေရှင်းတာက အကောင်းဆုံးဖြစ်ကြောင်းနဲ့ စစ်တပ်က အုပ်ချုပ်မယ်ဆိုရင် ပြည်သူလူထု အတွက် အခက်အခဲအများကြီးရှိမယ်လို့ ယူဆကြောင်း ပြောပါတယ်။

“အကြောင်းတရားတွေကို ရှာပြီးမှာ ဖြေရှင်းတာကတော့ အကောင်းဆုံးဖြစ်မယ်လို့ ကျွန်တော် ထင်ပါတယ်။ မြန်မာနိုင်ငံက နှစ်ပေါင်း ၇၀ ကျော်ပေါ့နော် စစ်တပ်က အုပ်ချုပ်တဲ့ နိုင်ငံဖြစ်ပါတယ်။ ဆက်ပြီးမှပဲ တပ်မတော်ပဲ အုပ်ချုပ်မယ်ဆိုရင်တော့ ပြည်သူလူထုအတွက် အခက်အခဲတွေ အများကြီး ရှိမယ်လို့ ကျွန်တော်ယူဆမိပါတယ်။ အဲဒါကြောင့် အာဏာသိမ်းတာတွေ မသိမ်းတာတွေ အဲကိစ္စတွေ ကတော့ ညှိရင်လည်း ရပါတယ်။ အခြေခံဥပဒေကိုလည်း ပြင်လို့မရရင် အသစ်ပြန်ဆွဲလိုက်ပေါ့ ကျွန်တော်ကတော့ အဲလိုပဲ ပြောလိုပါတယ်။”

KIO အနေနဲ့ အစကတည်းက ရွေးကောက်ပွဲကို အနှောင့်အယှက် မပေးသလို အားပေးမှုလည်း မရှိတာကြောင့် မဲမသမာမှုတွေ၊ မတရားမှုတွေနဲ့ ပတ်သက်ပြီး ထဲထဲဝင်ဝင် မှတ်ချက်ပေး ပြောဆိုစရာမရှိဘူးလို့ ဆိုပါတယ်။

ဖေဖော်ဝါရီ ၁ ရက်နေ့မှာ ကျင်းပမယ့် လွှတ်တော်သစ်စတင်ရေးနဲ့ သမ္မတသစ် ရွေးချယ်ရေး လုပ်ငန်းတွေကို ငြိမ်းငြိမ်းချမ်းချမ်းဆောင်ရွက်ဖို့ မျှော်လင့်တယ်လို့ နိုင်ငံတကာ သံရုံးတွေက ကြေညာချက်မှာ ဖော်ပြ ထားပါတယ်။

လက်ရှိနိုင်ငံရေးအခြေအနေ တင်းမာနေတာကို နိုင်ငံတကာက စိုးရိမ်မှုတွေရှိနေသလို အိမ်နီးချင်း တရုတ်နိုင်ငံ အနေနဲ့ ဘယ်လိုအမြင်သဘောထားရှိလည်းဆိုတာ မြန်မာနိုင်ငံဆိုင်ရာ တရုတ်သံရုံးကို RFA က Email က ဆက်သွယ်မေးမြန်းထားပေမယ့် တစ်စုံတစ်ရာတုံ့ပြန်ပြောဆိုခြင်း မရှိသေးပါဘူး။

အစိုးရနဲ့ တပ်မတော်ကြား ပိုပြီးတင်းမာလာမလား ဆိုတာနဲ့ ဘယ်လိုအဖြေရှာပြီး ဒီအကျပ်အတည်းကနေ ရုန်းထွက်နိုင်မလဲဆိုတော့ စောင့်ကြည့်ရမှာဖြစ်ပါတယ်။


RFA Burmese

https://www.rfa.org/burmese/news/diplomatic-joint-statement-myanmar-election-democratic-transition-01292021013005.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ