COVID-19 ကပ်ရောဂါအရေးနဲ့ ပတ်သက်တဲ့ အထူးအစည်းအဝေးတရပ်ကို ကုလသမဂ္ဂမှာ ကြာသပတေးနေ့က စတင်ကျင်းပါနေပါတယ်။ ကုလသမဂ္ဂအဖွဲ့ဝင်နိုင်ငံတွေအနေနဲ့ COVID-19 ကပ်ရောဂါတိုက်ဖျက်ရေးမှာ ညီညွှတ်စွာ ပူးပေါင်းဆောင်ရွက်ဖို့ ညီလာခံဥက္ကဋ္ဌက အစည်းအဝေးဖွင့်ပွဲမှာ တိုက်တွန်းသွားပါတယ်။
"ဒီခန်းမကြီးဟာ နိုင်ငံပေါင်းစုံရဲ့ စည်းလုံးညီညွှတ်မှုပေါ်ထွန်းရာနေရာဖြစ်ပါတယ်။ အထွေထွေညီလာခံဟာ လူသားမျိုးနွယ်တွေရဲ့ အသံ၊ စိတ်ဆန္ဒနဲ့ အကောင်းအကျိုး ခွဲခြားသိမြင်စိတ်တွေပေါ်ထွက်ရာနေရာလည်းဖြစ်ပါတယ်။ ဒီကနေ့ တကမ္ဘာလုံးရင်ဆိုင်နေရတဲ့ အကြီးမားဆုံးစိန်ခေါ်ချက်ကို ဘယ်လိုဦးဆောင်လုပ်ကိုင်မလဲဆိုတာ တကမ္ဘာလုံးကစောင့်ကြည့်နေပါတယ်။ ဒီအကြပ်အတည်းကြီးကို ကိုင်တယ်ဖြေရှင်းတဲ့အပေါ်မူတည်ပြီး ကုလသမဂ္ဂအပေါ် ယုံကြည်ချက်တွေပြန်ပြီးဆောင်ကြည်းလာနိုင်ပါလိမ့်မယ်။" လို့ ညီလာခံဥက္ကဋ္ဌ Volkan Bozkir ကပြောပါတယ်။
ညီလာခံအဖွင့်မှာပဲ COVID-19 ကြောင့် အသက်ဆုံးရှုံးခဲ့ရသူတွေကိုအောက်မေ့ဂုဏ်ပြုတဲ့အနေနဲ့ အဖွဲ့ဝင်နိုင်ငံတွေက ကိုယ်စားလှယ်တွေ တမိနစ်ကြာ မတ်တပ်ရပ် ငြိမ်သက်ခဲ့ကြပါတယ်။ ကပ်ရောဂါကြောင့် လူထုကျန်းမာရေးကိုသာမက စီးပွါးရေးနဲ့လူမှုဖွံ့ဖြိုးမှုအပေါ်မှာပါ ကြီးမားတဲ့ သက်ရောက်မှုတွေ ရှိခဲ့တယ်လို့လည်း ညီလာခံဥက္ကဋ္ဌကပြောပါတယ်။ ကပ်ရောဂါကြောင့် ဆင်းရဲချမ်းသာ ကွာဟချက်ပိုကြီးမားလာသလို ဆင်းရဲတဲ့တိုင်းပြည်တွေမှာ ပိုပြီးထိခိုက်နေရပေမယ့် ဒီအချိန်ဟာ လက်ညှိုးထိုးအပြစ်တင်နေရမယ့်အချိန်မဟုတ်ဘဲ စုပေါင်းအားနဲ့ လုပ်ကိုင်ရမယ့်ကာလဖြစ်တယ်လို့လည်း ညီလာခံဥက္ကဋ္ဌ Bozkir ကပြောပါတယ်။
ကုလအတွင်းရေးမှူးချုပ် Antonio Guterres ကလည်း ကပ်ရောဂါတိုက်ဖျက်ရေး နိုင်ငံစုံ ပူးပေါင်းလုပ်ကိုင်ဖို့တိုက်တွန်းသွားသလို ကမ္ဘာ့ကျန်းမာရေးအဖွဲ့ (WHO) ရဲ့ ကပ်ရောဂါထိန်းချုပ်ရေးဆိုင်ရာ လမ်းညွှန်ချက်ကို မလိုက်နာတဲ့နိုင်ငံတချို့ကိုလည်း ဝေဖန်ခဲ့တာပါ။ အဖွဲ့ဝင်နိုင်ငံခေါင်းဆောင်တွေ၊ လေ့လာသုံးသပ်သူတွေနဲ့ နိုင်ငံရေးအရထင်ရှားသူတွေကလည်း ကပ်ရောဂါထိန်းချုပ်ရေးနဲ့ စီးပွါးရေးပြန်ဦးမော့လာနိုင်အောင် ကုလသမဂ္ဂနဲ့ WHO ဘက်က ဘယ်လိုကူညီနိုင်မလဲဆိုတာနဲ့ အနာဂတ်မှာ ကပ်ရောဂါတွေကို ကာကွယ်နိုင်မယ့်နည်းလမ်းတွေကို အွန်လိုင်းကနေ အသီးသီးတင်ပြကြမှာဖြစ်ပါတယ်။
ဗွီအိုအေ (မြန်မာပိုင်း)
Reviewed by THITHTOOLWIN
on
22:48
Rating:
No comments:
Post a Comment