ဗီဇပြောင်း ကိုရိုနာဗိုင်းရပ်မျိုးစိတ်သစ်ကြောင့် ရောဂါစမ်းသပ်မှု ပုံစံပြောင်းလဲစရာ မလိုသေး

WHO ကမ္ဘာ့ ကျန်းမာရေး အဖွဲ့သတင်းစာရှင်းလင်းပွဲ

ဗြိတိန်နိုင်ငံမှာ နောက်ဆုံး တွေ့ရှိခဲ့တဲ့ ဗီဇဖွဲ့စည်းပုံဆင့်ကဲပြောင်းလဲလာတဲ့ ကိုရိုနာဗိုင်းရပ်စ်မျိုးစိတ်က လက်ရှိ အသုံးပြုနေတဲ့COVID 19 ရောဂါ စမ်းသပ် စစ်ဆေးမှု၊ ဆေးဝါး ကုသမှုနဲ့ ကာကွယ်ဆေးတွေအပေါ်မှာ သိသိသာသာ အပြောင်းအလဲဖြစ်လောက်အောင်သက်ရောက်မှု မရှိဘူးလို့ ကမ္ဘာ့ ကျန်းမာရေး အဖွဲ့(WHO) က ပြောပါတယ်။

တစ်ချို့ ဗီဇဖွဲ့စည်းပုံဆင့်ကဲပြောင်းလဲမှုတွေက ပရိုတိန်းလက်တံမှာ ဖြစ်တာပါ။ အခု လက်ရှိ အသုံးပြုနေတဲ့ စမ်းသပ် ကိရိယာ တော်တော် များများက ရောဂါ ဖြစ်နိုင်ခြေရှိတဲ့ အချက်အလက် မျိုးစုံကို ပစ်မှတ်ထားပြီး ရှာဖွေစမ်းသပ်တာ ဖြစ်ပါတယ်။

ဒါကြောင့် ရောဂါ ဖြစ်နိုင်ခြေ မျိုးစုံကို ရှာဖွေစမ်းသပ်တဲ့ ကိရိယာတွေအပေါ်မှာ သိသိသာသာ သက်ရာက်မှုမရှိပါဘူး။

ရောဂါ ဖြစ်နိုင်ခြေတစ်ခုလောက် အပေါ်မှာပဲ ကြည့်တဲ့စမ်းသပ် ကိရိယာတွေအပေါ်မှာတော့သက်ရောက်မှု ရှိနိုင်ပါတယ်လို့WHO က နည်းပညာဆိုင်ရာ ညွှန်ကြားရေးမှူးMaria van Kokhov ကပြောပါတယ်။

WHO သိပ္ပံပညာရှင်အဖွဲ့ ခေါင်းဆောင်Dr. Soumya Swaminathanကလည်း အခုအချိန်အထိ ဗိုင်းရပ်စ်ဗီဇဆင့်ကဲပြောင်းလဲမှုတွေ တော်တော် များများ တွေ့ရပြီးဖြစ်ပေမယ့် ပြောင်းလဲသွားတဲ့ ဗီဇမျိုးစိတ်တွေက လက်ရှိ စမ်းသပ်မှု၊ ဆေးကုထုံးနဲ့ ကာကွယ်ဆေးတွေအပေါ် သက်ရောက် မှုကြီးကြီးမားမား မရှိကြောင်း၊COVID 19 ကို ဖြစ်စေတဲ့ ဗိုင်းရပ်စ်က ပုံမှန် တုပ်ကွေး ဗိုင်းရပ်စ် ထက် ပိုမိုနှေးကွေးတဲ့နှုန်းနဲ့ ဗီဇမျိုးစိတ် ပြောင်း လဲကြောင်း၊ ဒါကြောင့် ဒီဗိုင်းရပ်စ်အပေါ် ဆက်လက် လေ့လာ စောင့်ကြည့်သွားဖို့ လိုကြောင်း ပြောပါတယ်။

ဗြိတိန်နိုင်ငံမှာ နောက်ဆုံးတွေ့ရှိခဲ့တဲ့ ကူးစက်မှု ပိုပြီး မြန်ဆန်တဲ့ ဗီဇပြောင်း ကိုရိုနာဗိုင်းရပ်စ်ကိစ္စ ဆွေးနွေးဖို့WHO အဖွဲ့ဝင်နိုင်ငံတွေအကြား အစည်းအဝေး တစ်ရပ် ဗုဒ္ဓဟူးနေ့မှာ ကျင်းပဖို့ ရှိပါတယ်။

အဖွဲ့ဝင် နိုင်ငံတွေအကြား သတင်းအချက်အလက်တွေ မျှဝေနိုင်ဖို့အတွက် ဒီအစည်း အဝေးကို ကျင်းပမှာလို့လည်းWHO ပြောခွင့်ရက ပြောပါတယ်။

အခုလို ဗိုင်းရပ်စ် ဗီဇဖွဲ့စည်းပုံ ဆင့်ကဲ ပြောင်းလဲမှုက ကပ်ရောဂါ အဆင့်ဆင့် ဖြစ်ပေါ်ပြောင်းလဲမှုရဲ့ ပုံမှန် အစိတ်အပိုင်းတစ်ရပ်သာ ဖြစ်တာကြောင့် မစိုးရိမ်ကြဖို့WHO အဖွဲ့ကပြောသလို ဒီ ဗီဇပြောင်းဗိုင်းရပ်စ်မျိုးစိတ်ကို ထုတ်ဖော် တွေ့ရှိတဲ့ ဗြိတိန်နိုင်ငံကိုလည်း ချီးကျူးထားပါတယ်။

လောလောဆယ်မှာတော့BioNTechနဲ့Modernaဆေးကုမ္ပဏီတွေက သူတို့ ထုတ်လုပ်ထားတဲ့ ကိုဗစ် ကာကွယ်ဆေးက ဗိုင်းရပ်စ် မျိုးစိတ်သစ် အပေါ် ထိရောက်မှု ရှိမရှိ အဆောတလျင် စမ်းသပ်နေကြပါတယ်။

ဒီ ကိုရိုနာ ဗိုင်းရပ်စ် မျိုးစိတ်သစ်က ကာကွယ်ဆေးအပေါ် သက်ရောက်မှု ရှိမရှိ သိရှိရဖို့ လုံလောက် တဲ့ သတင်းအချက်အလက် မရသေးဘူးလို့လည်း WHOက ထပ်တလဲလဲ ပြောဆိုထားပါတယ်။

ဗွီအိုအေ (မြန်မာပိုင်း)

https://burmese.voanews.com/a/new-coronavirus-strain-not-to-affect-most-diagnostic-tests-who/5709891.html