မြန်မာကိုဗစ် ဓါတ်ခွဲအတည်ပြုစုစုပေါင်း ၁၂၃,၄၇၀ ဦး၊ သေဆုံး ၂,၆၆၄ ဦး

ရန်ကုန်တိုင်း မြောက်ဥက္ကလာပြည်သူ့ဆေးရုံကြီးမှာ ကိုဗစ်-၁၉ ရောဂါအထူးကြပ်မတ်ကုသဆောင် (ICU) မှာ ရောဂါပြင်းထန်စွာခံစားရနေသူများကို ကုသစောင့်ရှောက်ပေးနေတဲ့ ကျန်းမာရေးဝန်ထမ်းများ။ (ဓာတ်ပုံ -Ministry of Health and Sports, Myanmar - ဒီဇင်ဘာ ၂၄၊ ၂၀၂၀)

မြန်မာနိုင်ငံမှာ ပြီးခဲ့တဲ့ ၂၄ နာရီအတွင်း COVID-19 ရောဂါကူးစက်သူ ၅၈၇ ယောက် ထပ်တိုးပြီး သေဆုံးသူက ၂၇ ယောက် ထပ်တိုးတဲ့အကြောင်း ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ည ၈ နာရီ ထုတ်ပြန်ချက်မှာ ဖော်ပြထားပါတယ်။

သေဆုံးသူတွေထဲမှာ ၉ ယောက်က ရောဂါအခံမရှိသူတွေဖြစ်တယ်ဆိုတာ ထုတ်ပြန်ချက်မှာ တွေ့ရပါတယ်။

ဓာတ်ခွဲနမူနာပေါင်း ၁၇,၀၁၀ ခုကို စစ်ဆေးခဲ့တဲ့ထဲက အခုလို နောက်ထပ် ရောဂါပိုးကူးစက်ထားသူတွေ တွေ့ရတာဖြစ်ပြီး ဒီကနေ့အထိဆိုရင် စစ်ဆေးခဲ့တဲ့ ဓာတ်ခွဲနမူနာပေါင်း ၁,၇၉၄,၂၅၃ ခု ရှိသွားပြီဖြစ်ပါတယ်။

သေဆုံးသူအရေအတွက်က ၂,၆၆၄ ယောက်ရှိပြီဖြစ်ပြီး ရောဂါပိုး ကူးစက်သူပေါင်းကတော့ ၁၂၃,၄၇၀ ယောက် ရှိသွားပါပြီ။

ဒီကနေ့ညထုတ်ပြန်ချက်မှာ ဆေးရုံဆင်းခွင့်ရရှိသူအရေအတွက် ၈၄၂ ယောက်ရှိတယ်လို့ ဖော်ပြထားတာကြောင့် ရောဂါပျောက်ကင်းသွားသူပေါင်း ၁၀၆,၁၂၁ ယောက် ရှိသွားပြီဖြစ်ပါတယ်။

ကျန်းမာရေးနဲ့ အားကစားဝန်ကြီးဌာန၊ သတင်းထုတ်ပြန်ရေးအဖွဲ့ဝင်၊ ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက သူ့ရဲ့ဖေ့စ်ဘုတ်မှာ မကြာသေးခင် အချိန်ပိုင်းအတွင်းက ရေးထားတာအရဆိုရင် ဒီကနေ့ ဓာတ်ခွဲစစ်ဆေးတဲ့ နမူနာအရေအတွက် စုစုပေါင်းထဲမှာ ပိုးတွေ့သူ ၃.၄၅% ရှိပြီး ပြန်ကောင်းလာသူ ၈၅.၉% ၊ သေဆုံးနှုန်းက ၂.၁၆% ရှိပါတယ်။

သေဆုံးသူတွေထဲမှာ နောက်ခံရောဂါရှိသူက ၆၆.၇% ရှိတယ်လို့လည်း ဒေါက်တာခင်ခင်ကြီးက ရေးထားပါတယ်။

အခုဆိုရင် ပိုးတွေ့နှုန်း ၄% အောက် ကျဆင်းလာတာ ရက်အနည်းငယ်ရှိလာပြီ ဖြစ်ပေမဲ့ သေဆုံးနှုန်း လျော့မသွားသေးသလို အဲဒီထဲမှာနောက်ခံရောဂါမရှိသူ သေဆုံးနှုန်းကလည်း များများနေတာ တွေ့ရပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-covid-cases/5718607.html

AstraZeneca ကိုဗစ်ကာကွယ်ဆေးအရေးပေါ်သုံးဖို့ ဗြိတိန်ခွင့်ပြု

AstraZeneca ကိုဗစ်ကာကွယ်ဆေးပုလင်းများ။ (စက်တင်ဘာ ၀၉၊ ၂၀၂၀)

Oxford တက္ကသိုလ်နဲ့ ယူကေအခြေစိုက် AstraZeneca ကုမ္ပဏီတို့ ပူးတွဲ သုတေသနပြုထုတ်လုပ်တဲ့ COVID-19 ရောဂါကာကွယ်ဆေးကို အရေးပေါ်အသုံးပြုဖို့ ဗြိတိန်နိုင်ငံက ဒီကနေ့ ခွင့်ပြုလိုက်ပါပြီ။

ဒါဟာဖြင့် ဗြိတိန်နိုင်ငံအနေနဲ့ ဒုတိယမြောက် ကိုဗစ်ရောဂါကာကွယ်ဆေးကို ခွင့်ပြုတာဖြစ်ပြီး Oxford-AstraZeneca ကာကွယ်ဆေးကိုသုံးဖို့ ပထမဆုံး အတည်ပြုတဲ့နိုင်ငံလည်းဖြစ်ပါတယ်။

အခုလို ခွင့်ပြုလိုက်တဲ့အပေါ် ဗြိတိန်ဝန်ကြီးချုပ် Boris Johnson က Twitter မှာ ချီးကျူးရေးသားခဲ့ပါတယ်။ "တကယ့်သတင်းကောင်းဖြစ်ပြီး ဗြိတိသ ျှသိပ္ပံပညာအတွက် အောင်မြင်မှုတခုပါပဲ။ အခုဆိုရင် လူအရေအတွက် များနိုင်သမ ျှ များများကို မြန်နိုင်သမ ျှမြန်မြန် ကာကွယ်ဆေးထိုးပေးနိုင်တော့မှာဖြစ်ပါတယ်။" လို့ ဝန်ကြီးချုပ် Johnson က ဒီကနေ့ Twitter မှာရေးခဲ့တာပါ။

အခုကာကွယ်ဆေးဟာ ပထမအတည်ပြုထားတဲ့ အမေရိကန်ကုမ္ပဏီ Pfizer နဲ့ BioNTech ဂျာမန်ကုမ္ပဏီတို့ရဲ့ ကာကွယ်ဆေးထက် ထိန်းသိမ်းသိုလှောင်ပို့ဆောင်ရတာ လွယ်ကူပြီး "ကမ္ဘာ့ကာကွယ်ဆေး" ဖြစ်လာဖို့ ထုတ်လုပ်သူတွေက မေ ျှာ်မှန်းထားပါတယ်။

Oxford-AstraZeneca ကာကွယ်ဆေး အလုံးရေ သန်း ၁၀၀ ကို ဗြိတိန်နိုင်ငံက ဝယ်ယူထားပြီး ရက်ပိုင်းအတွင်း ကာကွယ်ဆေးထိုးပေးဖို့ စီစဉ်ထားပါတယ်။ Pfizer-BioNTech ကာကွယ်ဆေးကိုတော့ ဗြိတိန်က လူသိန်းပေါင်းများစွာအတွက် ထိုးပေးပြီးပါပြီ။

Oxford-AstraZeneca ကာကွယ်ဆေးကို ဗြိတိန်၊ ဘရာဇီးလ်နဲ့ တောင်အာဖရိကနိုင်ငံတွေမှာ လူပေါင်း ၂၄,၀၀၀ နီးပါးနဲ့ စမ်းသပ်ခဲ့တဲ့ ရလဒ်တွေအရ ဒီဆေးဟာ ဘေးအန္တရာယ်ကင်းပြီး ကိုရိုနာဗိုင်းရပ်စ် ကူးစက်မှုကို ၇၀% နီးပါး ကာကွယ်ပေးနိုင်တယ်ဆိုတာ တွေ့ထားပါတယ်။


 ဗွီအိုအေ (မြန်မာပိုင်း)

https://burmese.voanews.com/a/astrazeneca-covid-vaccine/5718443.html

 

ရွေးကောက်ပွဲလုပ်ငန်းစဉ် ပျက်ပြားအောင် မလုပ်ဖို့ တပ်မတော်ကို ကော်မရှင် တုံ့ပြန်

ရွေးကောက်ပွဲလုပ်ငန်းစဉ် ပျက်ပြားအောင် မလုပ်ဖို့ တပ်မတော်ကို ကော်မရှင် တုံ့ပြန် နေပြည်တော် ဇေယျာသီရိမြို့နယ်က မဲရုံမှာ မဲပေးဖို့ စောင့်ဆိုင်းနေတဲ့ ဗိုလ်ချုပ်မှူးကြီး မင်းအောင်လှိုင်ကို ၂၀၂၀ နိုဝင်ဘာ ၈ ရက်နေ့က တွေ့ရစဉ်

Photo: Thiha Tun/RFA

တပ်မတော်က စွပ်စွဲပြောဆိုနေတဲ့ မဲသမာမှုဖြစ်စဉ်တွေဟာ နိုဝင်ဘာလ ၈ ရက်နေ့က မဲပေးတဲ့ နောက်ဆုံးမဲစာရင်းတွေကို အခြေခံ စိစစ်ထားတာ မဟုတ်ဘဲ အစောပိုင်းက ထုတ်ပြန်ထားတဲ့ စာရင်းတွေကို အခြေခံထားတာလို့ ပြည်ထောင်စု ရွေးကောက်ပွဲ ကော်မရှင် (UEC) က ဒီကနေ့ ကြေညာချက် ထုတ်ပြန်ပြောဆိုလိုက်ပါတယ်။

နေပြည်တော်မှာ ဒီကနေ့ ပြုလုပ်တဲ့ တပ်မတော် သတင်းစာရှင်းလင်းပွဲအပြီး နာရီပိုင်းအတွင်းမှာပဲ ရွေးကောက်ပွဲကော်မရှင်က ကြေညာချက်ထုတ်ပြန် ပြောကြားလိုက်တာပါ။ အစောပိုင်းက ထုတ်ပြန်ထားတဲ့ မပြည့်မစုံမဲစာရင်းတွေကို မဲဆန္ဒရှင်တွရဲ့ ပြင်ဆင်ချက်လျှောက်လွှာတွေနဲ့ ပြန်လည်ပြင်ဆင်ခဲ့ပြီးမှ ရွေးကောက်ပွဲနေ့မှာ အသုံးပြုခဲ့တာလို့ ဆိုပါတယ်။

နိုဝင်ဘာလ ၈ ရက်နေ့က ကျင်းပပြီးစီးခဲ့တဲ့ ရွေးကောက်ပွဲ တရားမျှတမှု ရှိ၊ မရှိသိနိုင်ဖို့အတွက် ကော်မရှင်က ထုတ်ပြန်တဲ့ မဲစာရင်းအားလုံးကို အခြေခံပြီး တပ်မတော်ဘက်က စစ်ဆေးခဲ့တယ်လို့ တပ်မတော် ပြောခွင့်ရသူ ဗိုလ်ချုပ် ဇော်မင်းထွန်းက ဒီကနေ့ သတင်းစာ ရှင်းလင်းပွဲမှာ ပြောခဲ့ပါတယ်။

ရွေးကောက်ပွဲမှာ အသက် ၁၈ နှစ်မပြည့်သူတွေ၊ နိုင်ငံသားစိစစ်ရေးကတ်ပြား မရှိသူတွေနဲ့ တစ်ကြိမ်ထက်ပိုပြီး မဲပေးခဲ့တဲ့ မဲသမာမှု အဖြစ်အပျက်ပေါင်း နှစ်သိန်းနီးပါးရှိတယ်လို့ တပ်မတော်က ထုတ်ပြန်ထားပါတယ်။ တပ်မိသားစုဝင်တွေ အများစု မဲပေးခဲ့တဲ့ မြို့နယ် (၂၁၈) မြို့နယ်က ရွေးကောက်ပွဲဖြစ်စဉ်တွေကို တပ်မတော်ဘက်က ပြန်စိစစ်နေတာဖြစ်ပြီး လတ်တလောမှာ မြို့နယ် ၁၁ မြို့နယ်က မဲသမာမှုတွေကို တွေ့ရှိထားတာလို့လည်း ဆိုပါတယ်။

ရွေးကောက်ပွဲ မဲသမာမှုတွေနဲ့ ပတ်သက်ပြီး ဥပဒေအတိုင်း ဆက်လက်လုပ်ဆောင်သွားမယ်လို့လည်း ပြောပါတယ်။ ဘယ်လို ဆက်လုပ်မလဲလို့ သတင်းထောက်တွေက မေးမြန်းကြပေမယ့် ဗိုလ်ချုပ် ဇော်မင်းထွန်းက တိတိကျကျ ဖြေဆိုတာ မရှိပါဘူး။

ဒီနေ့ တပ်မတော် သတင်းစာရှင်းလင်းပွဲအပြီးမှာ ပြည်ထောင်စု ရွေးကောက်ပွဲကော်မရှင်က ချက်ခြင်း ကြေညာချက် ထုတ်ပြန်လိုက်ရာမှာ ရွေးကောက်ပွဲဟာ မဲဆန္ဒရှင် ၇၀ ရာခိုင်နှုန်းကျော် လာရောက်မဲပေးခဲ့တဲ့ ရွေးကောက်ပွဲဖြစ်သလို နိုင်ငံတကာ လေ့လာသူတွေ၊ မဲရုံစောင့် အဖွဲ့ဝင်တွေ၊ ကိုယ်စားလှယ်လောင်းတွေနဲ့ သူတို့ရဲ့ မဲရုံကိုယ်စားလှယ်တွေ ရှေ့မှောက်မှာ ကျင်းပခဲ့တဲ့ ရွေးကောက်ပွဲဖြစ်တယ်လို့ ကော်မရှင်က ပြောပါတယ်။

လက်ရှိအချိန်ဟာ ရွေးကောက်ပွဲလုပ်ငန်းစဉ်တွေနဲ့ ပတ်သက်ပြီး တိုင်ကြားထားတဲ့ ရဲအရေးပိုင်မှုတွေကို စစ်ဆေးနေတဲ့ကာလဖြစ်ပြီး ရွေးကောက်ပွဲလုပ်ငန်းစဉ်တွေ ပျက်ပြားအောင်၊ ရွေးကောက်ပွဲရလဒ်ကို လက်မခံတဲ့သဘော သက်ရောက်စေတဲ့ ဆောင်ရွက်ချက်တွေ မလုပ်ကြဖို့လည်း ကော်မရှင်က သတိပေးထားပါတယ်။

နိုဝင်ဘာလ ၈ ရက်နေ့ ရွေးကောက်ပွဲနဲ့ ပတ်သက်လို့ တပ်မတော်နည်းတူပဲ အင်အားကြီး အတိုက်အခံပါတီဖြစ်တဲ့ ကြံ့ခိုင်ဖွံ့ဖြိုးရေးပါတီကလည်း မဲသမာမှုပေါင်း တစ်ထောင်ကျော်ကို တိုင်ကြားထားပါတယ်။


RFA Burmese

https://www.rfa.org/burmese/news/uec-statement-12302020072157.html

မန္တလေးက ဈေးတွေမှာ ဗိုင်းရပ်စ်တားဆီးရေး တင်းကျပ်ဆောင်ရွက်နေ

မန္တလေးက ဈေးတွေမှာ ဗိုင်းရပ်စ်တားဆီးရေး တင်းကျပ်ဆောင်ရွက်နေ မန္တလေးမြို့ ချမ်း​အေးစည်သာစျေးမှာ စျေးလာဝယ်သူများကို ၂၀၂၀ ဒီဇင်ဘာ ၃၀ ရက်နေ့က ကျန်းမာရေးစစ်ဆေးနေစဉ်

Photo: Khaymani Win / RFA

ကပ်ရောဂါစတင်ပြန့်ပွားခဲ့တဲ့ အခုနှစ် ဧပြီလကစပြီး မန္တလေးမြို့ စည်ပင်သာယာနယ်နမိတ်အတွင်းက ဈေးတွေမှာ နှာခေါင်းစည်းမတပ်တဲ့ ဈေးသည်၊ ဈေးဝယ်တွေကို ဒဏ်ရိုက်ခဲ့တာ ငွေကျပ် သိန်းတစ်ရာခန့် ရရှိထားပြီး ဖြစ်တယ်လို့  မန္တလေးစည်ပင်၊ ဈေးနဲ့သားသတ်ဌာနက ခေတ္တဌာနမှူး ဦးတင်စိုး ကပြောပါတယ်။

နှာခေါင်းစည်း နှစ်ခုကို ငွေကျပ် တစ်ထောင်နှုန်းနဲ့ ဒဏ်ရိုက်ရောင်းချခဲ့ပြီး နောက်ပိုင်းမှာ နှာခေါင်းစည်းနှစ်ခုကို ငွေကျပ် သုံးထောင်နှုန်းနဲ့ ဒဏ်ရိုက်ရောင်းချခဲ့တာပါ။

တစ်ဘက်မှာလည်း ဈေးသည်တွေ စည်းကမ်းနဲ့အညီ ဈေးမရောင်းချရင် ပထမအကြိမ်မှာ ဈေးရောင်းချခွင့် သုံးရက်၊ ဒုတိယအကြိမ်မှာ နှစ်ရက်နဲ့ တတိယအကြိမ်မှာ တစ်လပိတ်သိမ်းတဲ့ အရေးယူမှုတွေ လုပ်ဆောင်ခဲ့ပါတယ်။

မန္တလေးမြို့တော်စည်ပင်သာယာရေးနယ်နိမိတ်အတွင်းမှာ ဈေးပေါင်း ၄၃ ဈေးရှိပါတယ်။

ဒီနေ့မှာ ချမ်းအေးသာစံ မြို့နယ်က ချမ်းအေးစည်သာဈေးနဲ့ အောင်မြေသာစံမြို့နယ်က မန်းမြို့ဈေးတွေမှာ စည်ပင်သာယာရေးကော်မတီနဲ့ တိုင်းကျန်းမာရေးဦးစီးဌာနတို့ ပေါင်းပြီး နှာခေါင်းစည်းဝေဌတဲ့ ကမ်ပိန်းပြုလုပ်ခဲ့ပါတယ်။

မန္တလေးမြို့စည်ပင်သာယာရေး နယ်နမိတ်အတွင်းက ဈေးတွေမှာ ကိုရိုနာဗိုင်းရပ်စ်ပြန့်ပွားမှုကို တားဆီးဖို့  ဈေးသည်တွေနဲ့ ဈေးဝယ်တွေ အားလုံးကို နှားခေါင်းစည်းတပ်ပြီး ရောင်းဝယ်ဖို့ စည်ပင်က တင်းတင်းကျပ်ကျပ် ဆောင်ရွက်နေပါတယ်။

မန္တလေးခရိုင်အတွင်းက မြို့နယ် ခုနစ်မြို့နယ်မှာ ဒီဇင်ဘာ၂၇ ရက်နေ့ကစတင်ပြီး နေအိမ်နေထိုင်ရေးကာလအဖြစ် ကျန်းမာရေးဝန်ကြီးဌာနက သတ်မှတ်ထားပါတယ်။


RFA Burmese

https://www.rfa.org/burmese/news/strict-rules-in-mdy-market-12302020031535.html

 

Sinopharm ကိုဗစ်ကာကွယ်ဆေး ၇၉% ကျော်ထိရောက်

ဘေဂျင်းမြို့မှာ COVID-19 ကာကွယ်ဆေး နမူနာတချို့။ (စက်တင်ဘာ ၄၊ ၂၀၂၀)

တရုတ်နိုင်ငံ၊ Sinopharm ဆေးကုမ္ပဏီက သူတို့စမ်းသပ်နေတဲ့ COVID-19 ရောဂါကာကွယ်ဆေးဟာ ၇၉.၃% ထိရောက်မှု ရှိတယ်လို့ ဒီကနေ့ပြောပါတယ်။ နောက်ဆုံးအဆင့် စမ်းသပ်မှုကနေ ထွက်လာတဲ့ ကနဦးရလဒ်တွေအပေါ် အခြေခံပြောဆိုတာဖြစ်ပြီး ဒါဟာဖြင့် တခြားဖွံ့ဖြိုးဆဲနိုင်ငံတွေကို ကာကွယ်ဆေး အကူအညီပေးမယ်လို့ တရုတ်အစိုးရက ကတိပေးထားတာ ပြည့်မီစေဖို့ ပိုပြီး နီးသွားတဲ့သဘောပါပဲ။

Sinopharm ကုမ္ပဏီရဲ့ ကာကွယ်ဆေး စမ်းသပ်မှုဆိုင်ရာ အချက်အလက်တွေဟာ ကာကွယ်ဆေး နောက်ဆုံးအဆင့် စမ်းသပ်နေတဲ့ တရုတ်ကုမ္ပဏီတွေကြား ပထမဆုံး တရားဝင်ထုတ်ပြန်ချက်ဖြစ်ပါတယ်။

ထိရောက်မှု ၉၄% ရှိတဲ့ Moderna ကာကွယ်ဆေးနဲ့ ၉၅% ထိရောက်မှုရှိတဲ့ Pfizer/BioNTech ကာကွယ်ဆေးတွေထက်တော့ Sinopharm ကာကွယ်ဆေးရဲ့ ထိရောက်မှုရာခိုင်နှုန်းက နည်းပါတယ်။

ဒါပေမဲ့လည်း နောက်ထပ် အချက်အလက်တွေကို Sinopharm ကုမ္ပဏီက မထုတ်ပြန်ဘဲ ကာကွယ်ဆေးရဲ့ ထိရောက်မှုဆိုင်ရာ နောက်ဆုံးအတည်ပြုချက်ဟာ သိပ္ပံစမ်းသပ်မှုဆိုင်ရာ အချက်အလက်တွေ အပြည့်အစုံ ထုတ်ပြန်တဲ့အပေါ် မူတည်နေပါတယ်။

COVID-19 ကာကွယ်ဆေးတွေဟာ ယေဘုယျအားဖြင့် ၅၀% ပတ်ဝန်းကျင်ပဲ ထိရောက်မှုရှိတဲ့ တုပ်ကွေးရောဂါ ကာကွယ်ဆေးလောက်ပဲ ထိရောက်မှုရှိနိုင်မယ်လို့ သိပ္ပံပညာရှင်တွေက သတိပေးထားပါတယ်။

တရုတ်အစိုးရပိုင် Sinopharm ကုမ္ပဏီဟာ ကိုဗစ်ကာကွယ်ဆေး သုတေသနပြု စမ်းသပ်နေတဲ့ တရုတ်ကုမ္ပဏီ ငါးခုထက်မနည်းထဲမှာ တစ်ခုအပါအဝင်ဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/sinopharm-covid/5718471.html

စင်ကာပူမှာ ကိုဗစ်ကာကွယ်ဆေး ပထမဆုံးထိုးနှံ

စင်္ကာပူ သူနာပြုဆရာမကြီး Sarah Lim ကိုဗစ်ကာကွယ်ဆေးထိုးနှံနေတဲ့ မြင်ကွင်း။ (ဒီဇင်ဘာ ၃၀၊ ၂၀၂၀)

စင်္ကာပူနိုင်ငံမှာ ဒီကနေ့ ဗုဒ္ဓဟူးနေ့ကစပြီး ကျန်းမာရေးဝန်ထမ်းတွေကို Pfizer နဲ့ BioNTec ကုမ္ပဏီထုတ် COVID 19 ကာကွယ်ဆေးတွေ စတင် ထိုးပေးနေပြီ ဖြစ်ပါတယ်။ တကမ္ဘာလုံးအတိုင်းအတာနဲ့ လူပေါင်း ၁.၇ သန်း သေဆုံးခဲ့ရပြီဖြစ်တဲ့ ကပ်ရောဂါကြီးကို တိုက်ဖျက်ဖို့ စင်္ကာပူနိုင်ငံကကာကွယ် ဆေးစတင် ထိုးနှံပေးတဲ့ ပထမဆုံး အာရှနိုင်ငံ ဖြစ်လာပါတယ်။ စင်္ကာပူ သူနာပြုဆရာမကြီး Sarah Lim က ပထမဆုံး ကာကွယ်ဆေး ထိုးခံသူ ဖြစ်ပါတယ်။

"ပထမဆုံးအကြိမ် ကာကွယ်ဆေးထိုးရသူ ဖြစ်ရလို့ သိပ်ကို ကျေးဇူးတင်မိကြောင်း၊ ကိုဗစ်ရန်ကနေ ကာကွယ်နိုင်ဖို့ တခြားလူတွေ ကာကွယ် ဆေးထိုးဖို့ကို စိတ်အားတက်အောင် လုပ်ပေးနိုင်လိမ့်မယ်လို့လည်း မျှော်လင့်ပါတယ်။" လို့ သူနာပြု ဆရာမကြီး Sarah Lim ကပြောပါတယ်။

အသက် ၄၆ နှစ်အရွယ် သူနာပြုဆရာမ Sarah Lim နဲ့ အသက် ၄၃ နှစ်အရွယ် ကူးစက်ရောဂါဆရာဝန် Kalisvar Marimuthu တို့က စင်္ကာပူ အမျိုးသား ကူးစက်ရောဂါဗဟိုဌာနမှာ ပထမဆုံးဆေးထိုးခံသူ အယောက် ၃၀ ထဲ ပါဝင်ပါတယ်။ သူတို့တတွေအားလုံး ဇန်နဝါရီလ ၂၀ ရက်နေ့မှာ နောက်ထပ် ဆေးတစ်လုံးထပ်ထိုးကြရမယ်လို့ စင်္ကာပူ ကျန်းမာရေးဌာနက ပြောပါတယ်။

စင်္ကာပူနိုင်ငံက အာရှမှာ Pfizer နဲ့ BioNTec ကုမ္ပဏီထုတ် COVID 19 ကာကွယ်ဆေး သုံးစွဲဖို့ အတည်ပြု ခွင့်ပြုချက်ပေးတဲ့ ပထမဆုံး နိုင်ငံ ဖြစ်ပါတယ်။ ကြိုတင်စာချုပ်ချုပ်ဆိုပြီး ကာကွယ်ဆေးတွေမှာယူထားသလို ကြိုတင်ငွေပေးပြီး Moderna နဲ့ Sonovac ကာကွယ်ဆေးတွေ အပါအဝင် အလားအလာ ရှိတဲ့ ကာကွယ်ဆေးတွေကို ဝယ်ယူထားပါတယ်။

၂၀၂၁ ခုနှစ်တတိယသုံးလပတ်အရောက်မှာ နိုင်ငံ့လူဦးရေ ၅.၇ သန်းအတွက် လုံလောက်တဲ့ ကာကွယ်ဆေးတွေ ရနိုင်မယ်လို့ ခန့်မှန်းထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/singapore-covid-vaccine/5718435.html

ကိုဗစ်- အောက်စဖို့ဒ် ကိုဗစ်ကာကွယ်ဆေးကို ယူကေ အတည်ပြု


လက်ရှိ ကမ္ဘာ့နိုင်ငံတချို့မှာ စတင်ထိုးနှံနေပြီ ဖြစ်တဲ့ အမေရိကန် ဖိုင်ဇာ-ဘိုင်အွန်တက်ဆေးထက် စျေးသက်သာပြီး သိုလှောင်ပို့ဆောင်ရပိုလွယ်ကူတဲ့ အောက်စဖို့ဒ်ကိုဗစ်ကာကွယ်ဆေးကို ယူကေနိုင်ငံမှာ အသုံးပြုဖို့ အတည်ပြုလိုက်ပါပြီ။

ဒီဆေးဟာ အိန္ဒိယနိုင်ငံကလည်း ထုတ်လုပ်ဖို့ သဘောတူထားတဲ့ ဆေးဖြစ်ပြီး မြန်မာနိုင်ငံက အိန္ဒိယကနေ ဝယ်ယူဖို့ ပြင်ဆင်နေတဲ့ဆေးလည်း ဖြစ်ပါတယ်။

ကိုဗစ်ကာကွယ်ဆေး ၁၅ သန်း အိန္ဒိယကနေ ဝယ်မယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောထားပါတယ်။

လက်ရှိ အမေရိကန်က အတည်ပြုထားတဲ့ ဖိုင်ဇာနဲ့ မက်ဒါးနားဆေးတွေက အနည်းဆုံး ဒေါ်လာ ၂၀နဲ့ ၃၀ ဝန်းကျင်ရှိပြီး ဒီဆေးက ၄ ဒေါ်လာ တန်ဖိုးရှိပါတယ်။

ယူကေမှာ ကိုရိုနာဗိုင်းရပ်စ် ကူးစက်မှုတွေ မြင့်တက်လာနေချိန်မှာပဲ အောက်စဖို့ဒ်-အက်စထရာဇန်နကာ ကိုဗစ်ကာကွယ်ဆေးကို ခွင့်ပြုလိုက်တာပြီဖြစ်ပြီး ပထမဆုံးဆေးကို တနင်္လာနေ့မှာ စတင်ထိုးနှံမှာ ဖြစ်ပါတယ်။

နှစ်ကြိမ်ထိုးနှံရမယ့် ဒီဆေးကို လူသန်း ၅၀ ထိုးနှံဖို့အတွက် ဆေး သန်း ၁၀၀ ယူကေက မှာ ထားပါတယ်။

အမေရိကန်ထုတ် ဖိုင်ဇာ-ဘိုင်အွန်တက်ကိုလည်း ယူကေက မှာယူထားတာမို့ အခုမှာထားတဲ့ ပမာဏနဲ့ဆိုရင် တစ်နိုင်ငံလုံး ဆေးထိုးဖို့ လုံလောက်မယ်လို့ ကျန်းမာရေးဝန်ကြီး မတ်ဟန်းကော့က ပြောပါတယ်။

ဒီဆေးကို ၂၀၂၀ ပြည့်နှစ် အစပိုင်းလတွေမှာ စတင် စမ်းသပ်ရှာဖွေခဲ့ပြီး ဧပြီလမှာ ပထမဆုံး စေတနာ့ ဝန်ထမ်း တစ်ယောက်နဲ့ စတင်ထိုးနှံ စမ်းသပ်ခဲ့ပါတယ်။ နောက်တော့ လူထောင်ပေါင်းများစွာမှာ ဆက်ပြီး စမ်းသပ်ခဲ့တာ ဖြစ်ပါတယ်။


ဒီဆေးထက်အရင် ဒီဇင်ဘာလမှာ ဖိုင်ဇာ-ဘိုင်အွန်တက်ဆေးကို ယူကေက အတည်ပြုခဲ့တာမို့ ဒါက ဒုတိယမြောက် အတည်ပြုခဲ့တာ ဖြစ်ပါတယ်။

စျေးပိုသက်သာပြီး အများအပြားထုတ်လုပ်ဖြန့်ချိဖို့ ပိုလွယ်ကူတဲ့ ဒီဆေးကို အတည်ပြုလိုက်တာဟာ ကိုဗစ်ကပ်ရောဂါကို ရင်ဆိုင်ဖို့ ကြီးမားတဲ့ အပြောင်းအလဲအဖြစ် မှတ်တမ်းတင်စရာ ဖြစ်ပါတယ်။

အဓိကက ဒီဆေးဟာ သာမန်ရေခဲသေတ္တာ အအေးခန်းမှာ ထားရှိနိုင်တာမို့ အနုတ် ၇၀ ဒီဂရီလောက်ထိ အင်မတန်အေးတဲ့ အခြေအနေမှာ ထားရတဲ့ ဖိုင်ဇာဆေးထက် ထိန်းသိမ်းသယ်ယူပို့ဆောင်မှုမှာ အများကြီး လွယ်ကူတာ ဖြစ်ပါတယ်။

ဒီဆေးရဲ့ ဆေးစွမ်းကို တစ်ကြိမ်တည်းထိုးနှံတာနဲ့ နှစ်ကြိမ်အပြည့်ထိုးနှံတာ အပေါ် စမ်းသပ်မှုတွေအရ ထိုးနှံသူတွေ ၆၂၊ ၇၀ နဲ့ ၉၀ ရာခိုင်နှုန်းကို ကာကွယ်နိုင်တယ်လို့ စစ်တမ်းထုတ်ပြန်မှုတွေအရ သိရပါတယ်။

လက်ရှိအချိန်မှာ ဗီဇပြောင်း ကိုရိုနာဗိုင်းရပ်စ်သစ် ထွက်ပေါ်လာနေပေမဲ့ လက်ရှိကာကွယ်ဆေးတွေက ဒီဗိုင်းရပ်စ်မျိုးကွဲသစ်ကို ကာကွယ်ပေးနိုင်မယ်လို့ ပညာရှင်တွေက မျှော်လင့်ထားပါတယ်။


BBC Burmese

https://www.bbc.com/burmese/55484736

တပ်မတော်ကဖမ်းပြီး ပျောက်ဆုံးနေတယ်ဆိုတဲ့ ရခိုင်ရွာသား ၁၈ ဦးကိစ္စ စတင်စစ်ဆေး

ကျေက်တော် တင်းမရွာသားတွေ ၂၀၂၀ မတ်လကတည်းက ဖမ်းဆီးခံရတာဖြစ်

ရခိုင်ပြည်နယ် ကျောက်တော်မြို့နယ် တင်းမကြီးနဲ့ တင်းမရွာသစ် ကျေးရွာနှစ်ရွာက ရွာသား ၁၈ ဦး ပျောက်ဆုံးနေမှုနဲ့ ပတ်သက်လို့ မိသားစုဝင်တွေကို မြောက်ဦးခရိုင်ရဲတပ်ဖွဲ့ကနေ ဒီဇင်ဘာ ၂၉ ရက် နေ့က ခေါ်ယူစစ်ဆေးမှုတွေ ပြုလုပ်ခဲ့တယ်လို့ မိသားစုဝင်တွေက ပြောဆိုကြပါတယ်။

တပ်မတော်ရဲ့ ဖမ်းဆီးခြင်းခံလိုက်ရတယ်ဆိုတဲ့ ပျောက်ဆုံးသွားခဲ့တဲ့ ကျေးရွာသား ၁၈ ဦးကိစ္စနဲ့ ပတ်သက်လို့ နိုင်ငံတော်သမ္မတရုံးရဲ့ ညွှန်ကြားချက်အရ ခရိုင်ရဲတပ်ဖွဲ့က မိသားစုတွေကို ခေါ်ယူစစ်ဆေးမှုတွေ ပြုလုပ်ခဲ့တာဖြစ်တယ်လို့ ကျောက်တော်မြို့နယ် ပြည်သူ့လွှတ်တော်ကိုယ်စားလှယ် ဦးဦးထွန်းဝင်းက ပြောပါတယ်။

အဲ့ဒီ ကျေးရွာသား ၁၈ ဦး ကတော့ တင်းမကြီးကျေးရွာက ၁၀ ဦးနဲ့ တင်းမရွာသစ်က ၈ ဦး တို့ဖြစ်ကာ ဖမ်းဆီးခံလိုက်ရပြီး ၉ လကျော်ကြာမှ အမှုနဲ့ပတ်သက်လို့ ပထမဆုံးအကြိမ် စစ်ဆေးမှု ပြုလုပ်တာလည်း ဖြစ်ပါတယ်။

တင်းမကြီးရွာသား ၁၈ ဦးကို တပ်မတော်က ဖမ်းဆီးထားတယ်ဆိုတာနဲ့ ပတ်သက်လို့ ဒီဇင်ဘာလ ၃၀ ရက်နေ့က နေပြည်တော်မှာကျင်းပတဲ့ သတင်းစာရှင်းလင်းပွဲမှာ ဒီဖြစ်စဥ်နဲ့ ပတ်သက်ပြီး တပ်မတော်အနေနဲ့ မသိရှိသေးကြောင်းနဲ့ အထောက်အထား ခိုင်ခိုင်လုံလုံရှိရင် လွတ်လပ်စွာ တိုင်ကြားနိုင်ကြောင်း တပ်မတော် သတင်းမှန်ပြန်ကြား‌ရေးအဖွဲ့ဥက္ကဋ္ဌ ဗိုလ်ချုပ်ဇော်မင်းထွန်းက ပြောပါတယ်။

မိသားစုဝင်တွေကို ရဲတပ်ဖွဲ့က ခေါ်ယူစစ်ဆေး

ပျောက်ဆုံးနေသူတွေရဲ့ မိသားစုတွေကို စစ်ဆေးဖို့ ခရိုင်ရဲတပ်ဖွဲ့က ခေါ်ယူတဲ့အခါမှာ တင်းမကြီး ကျေးရွာက မိသားစု ၄ စု၊ တင်းမရွာသစ်က မိသားစု ၈ စု၊ စုစုပေါင်း မိသားစု ၁၂ စုသာ သွားရောက်စစ်ဆေးခံခဲ့ပြီး ကျန်မိသားစုတွေကတော့ ဖမ်းဆီးခံရမလားဆိုတဲ့ စိုးရိမ်စိတ်နဲ့ စစ်ဆေးမှု မခံယူခဲ့ဘူးလို့ သိရပါတယ်။

သွားရောက်စစ်ဆေးခံခဲ့ကြတဲ့ မိသားစုတွေကိုတော့ သူတို့ရဲ့ မိသားစုဝင်တွေ ဖမ်းဆီးခံလိုက်ရတာ မှန်ကန်မှုရှိမရှိ၊ မိသားစုတွေရဲ့ စီးပွားရေးအလုပ်အကိုင်တွေနဲ့ အဲ့ဒီနေ့က တပ်မတော်က ကျေးရွာကို ဝင်ရောက်ဖမ်းဆီးစဉ်မှာ ကိုယ်တိုင်ကြုံတွေ့ခဲ့တဲ့ မျက်မြင်သက်သေ ကျေးရွာသားသုံးဦးတို့ကိုပါ စစ်ဆေးခဲ့တယ်လို့ ကိုယ်တိုင်သွားရောက် စစ်ဆေးခံခဲ့တဲ့ ဒေါ်ဦးသန်းရီက ပြောပါတယ်။

"မေးတာက ကျွန်မတို့ကို သားသမီးလင်သားတွေ ပါသွားလား၊ ဘယ်သူပါသွားလဲဆိုတာမေးတယ်၊ကျွန်မမှာက သားအကြီးဆုံးပါသွားတယ်၊စကားလည်းမပြောတတ်ဘူး၊ နားလည်းမကြားဘူးလို့ ပြောခဲ့ပါတယ်။ ဘာလုပ်စားလဲ၊ တပ်က လူပေါင်းဘယ်လောက်လာလဲ မေးပါတယ်၊ ဘယ်ကိုခေါ်သွားလဲလို့ မေးတယ်။ သမ္မတဆီက စာရောက်လို့ ခေါ်စစ်တာလို့ ဒုခရိုင်ရဲတပ်ဖွဲ့မှူးက ပြောပါတယ်။"လို့ ဖမ်းဆီးခံလိုက်ရတဲ့ ဆွံ့အနားမကြားသူ ကိုဦးဝင်းမောင်ရဲ့ အမေ ဒေါ်ဦးသန်းရီက စစ်ဆေးခံခဲ့ရတာနဲ့ပတ်သက်လို့ ပြောပြပါတယ်။

အခုလို ကျေးရွာသား ၁၈ ဦး ဖမ်းဆီးခံလိုက်ရပြီး တပ်မတော်လက်ထဲမှာ ပျောက်ဆုံးနေတဲ့အတွက် မိသားစုတွေက ကျောက်တော်မြို့မရဲစခန်းမှာ တိုင်ကြားထားပေမဲ့ အဲ့ဒီအမှုနဲ့ ပတ်သက်လို့ အကျိုးအကြောင်း တစ်စုံတစ်ရာ မသိခဲ့ရဘူးလို့ ကာယကံရှင်မိသားစုတွေက ပြောဆိုကြပါတယ်။

ဒီရွာသားတွေကို တပ်ကဖမ်းဆီးသွားတယ်ဆိုပြီး တစ်ဖက်သက် စွပ်စွဲလို့မရကြောင်း အဲ့ဒီအချိန်ကဒေသမှာ အခြေအနေတွေရှုပ်ထွေးနေပြီးတော့ လူသတ်မှုတွေ ဖြစ်ခဲ့တာရှိကြောင်းနဲ့ အဲ့ဒီ့အချိန်က အဲ့ဒီဒေသမှာ စျေးအလယ်ကောင်မှာ ခေါင်းဖြတ်သတ်ဖြတ်မှု တွေရှိခဲ့ကြောင်းနဲ့ ဒီကိစ္စကို သက်သေအထောက်အထား ခိုင်ခိုင်မာမာနဲ့ တိုင်းစစ်ဌာနချုပ်တွေမှာ တိုင်ကြားလို့ရကြောင်း တပ်မတော် သတင်းမှန်ပြန်ကြား‌ရေးအဖွဲ့ဥက္ကဋ္ဌ ဗိုလ်ချုပ်ဇော်မင်းထွန်းက ပြောပါတယ်။

ကျောက်တော်ကို စစ်ဘေးရှောင်ဖို့ ရောက်နေခဲ့တဲ့ ကုလားတန်မြစ်နားက ရွာသားတွေ

ကျောက်တော်မြို့နယ်အတွင်းမှာ တင်းမ၊ တင်းမကြီး၊ တင်းမရွာသစ်ဆိုပြီးတော့ သုံးရွာရှိပြီး တင်းမကြီးကျေးရွာနဲ့ တစ်ဖာလုံ လောက်အကွာ တောင်ရှည်တောင်မှာတပ်စွဲထားတဲ့ တပ်မတော်တပ်စခန်းက ကျေးရွာအတွင်းကိုဝင်ရောက်လာပြီး ရွာထဲတွေ့တဲ့အမျိုးသား လူကြီးလူငယ်တွေကို ဖမ်းဆီးခေါ်ဆောင်သွားခဲ့တာဖြစ်တယ်လို့ ရွာသားတွေရဲ့ ပြောပြချက်အရ သိရပါတယ်။

ပြီးခဲ့တဲ့ မတ်လ ၁၃ ရက်နေ့မှာ တင်းမရွာသစ်ကို တပ်မတော်စစ်ကြောင်းတစ်ခု ဝင်ရောက်လာခဲ့ပြီး ရွာသား ၈ ဦးကို ဖမ်းဆီးခေါ်ဆောင်သွားခဲ့တာ ဖြစ်ပါတယ်။ မတ်လ ၁၆ ရက်နေ့မှာတော့ တင်းမကြီးကျေးရွာကို ဝင်ရောက်လာခဲ့တဲ့ စစ်ကြောင်းက ရွာအတွင်းတွေ့တဲ့ အမျိုးသား ၅၀ ခန့်ကို လက်ပြန်ကြိုးတုပ်ပြီး ခေါ်ဆောင်သွားကာ စခန်းချထားတဲ့ တောင်ရှည်တောင်ခြေရင်းကို အရောက်မှာ အသက်ကြီးပိုင်းတွေကို ပြန်လွှတ်ပေးခဲ့ပြီး ၁၀ ဦးကို နောက်တစ်နေ့မနက်မှာ ပြန်လွှတ်ပေးမယ်ဆိုပြီးတော့ တောင်ပေါ်ကို ခေါ်ဆောင်သွားခဲ့တာလို့ ရွာသားတွေရဲ့ ပြောပြချက်အရ သိရပါတယ်။

အဲ့ဒီကျေးရွာသားတွေ ဖမ်းဆီးခံလိုက်ရတဲ့နေ့စပြီး ၉ လကျော် ကြာတဲ့အထိ ပြန်လွှတ်ပေးခြင်း မရှိသလို တရားစွဲဆိုပြီး ရဲစခန်းမှာ အပ်နှံပေးတာလည်းမရှိဘဲ သတင်းအစအနမရဘဲ ပျောက်ဆုံးသွားခဲ့တာ ဖြစ်တယ်လို့ လွှတ်တော်ကိုယ်စားလှယ် ဦးဦးထွန်းဝင်းက ပြောပါတယ်။

တပ်မတော်က ဖမ်းဆီးခံလိုက်ရပြီး ကျေးရွာသားတွေပျောက်ဆုံးသွားတဲ့ကိစ္စကို စိစစ် အရေးယူဆောင်ရွက်ပေးဖို့အတွက် မိသားစုဝင်တွေနဲ့ မျက်မြင်သက်သေ ၅၀ ကျော်တို့က လက်မှတ်ရေးထိုးပြီး ဒီဇင်ဘာ ၁ ရက်နေ့က နိုင်ငံတော်သမ္မတနဲ့ နိုင်ငံတော်အတိုင်ပင်ခံပုဂ္ဂိုလ် တို့ဆီကို တိုင်ကြားစာ ပေးပို့ခဲ့ကြပါတယ်။

"ကျောက်တော်မှာ ဖြစ်ပျက်တဲ့အဖြစ်ပျက်တွေကို ကျွန်တော်တို့ နိုင်ငံတော်အဆင့်နဲ့ အမျိုးသားလူ့အခွင့်အရေးကော်မရှင် တွေကို တင်ပြခဲ့တယ်။ တည်ငြိမ်နေတဲ့အခြေအနေမှာ ဒီကိစ္စတွေကို အလေးထားဆောင်ရွက်တာတွေ ကိုမြင်လာရတဲ့အတွက် ကြိုဆိုပါတယ်"လို့ လွှတ်တော်ကိုယ်စားလှယ် ဦးဦးထွန်းဝင်းက ပြောပါတယ်။


အဲ့ဒီအချိန်ဟာ ကုလားတန်မြစ်ကြောင်းအတွင်းမှာ တိုက်ပွဲတွေ အပြင်းအထန် ဖြစ်ပွားနေတဲ့အချိန်ဖြစ်ပြီး ကျေးရွာသားတွေ ဖမ်းဆီးခံနေရသလို ကျေးရွာအတွင်းကို လက်နက်ကြီးကျည်တွေ ကျရောက်ပေါက်ကွဲမှုတွေလည်း ဆက်တိုက်ကြုံလာရတဲ့ အတွက် မတ်လ ၂၀ ရက်နေ့ဝန်းကျင်မှာ ရွာလုံးကျွတ် ကျောက်တော်မြို့ပေါ်ကို ထွက်ပြေးလာခဲ့ ကြတာ ဖြစ်ပါတယ်။

ကျေးရွာသားတွေ ထွက်ပြေးလာနေကြတဲ့ မတ်လ ၂၀ ရက်ကျော်မှာ ကုလားတန်မြစ်အတွင်း အလောင်းတစ်လောင်းမျောနေတာကို တွေ့ခဲ့ရပြီး အဲ့ဒီအလောင်းဟာ တင်းမကြီးကျေးရွာက ဖမ်းဆီးခံလိုက်ရတဲ့ ၁၀ ဦးထဲက ဦးမောင်ဝင်းဆိုသူရဲ့ အလောင်းဖြစ်တယ်လို့ ဇနီးဖြစ်သူက အတည်ပြုပြောဆိုကြောင်း လွှတ်တော်ကိုယ်စားလှယ် ဦးဦးထွန်းဝင်းက ပြောပါတယ်။

ကျေးရွာသားတွေ စွန့်ခွာခဲ့ကြတဲ့ တင်းမကြီးကျေးရွာဟာ မတ်လ ၂၃ ရက်နေ့မှာ တစ်ရွာလုံး မီးရှို့ခံလိုက်ရပြီး အိမ်ခြေ ၅၂၈ ဆောင် မီးလောင်ပျက်စီးခဲ့ရတာဖြစ်ပါတယ်။

မိသားစုဝင်တွေနဲ့ ကျေးရွာသားတွေ ဖမ်းဆီးခံလိုက်ရပြီး သတင်းအစအနမရဘဲ ပျောက်ဆုံးနေတာနဲ့ ပတ်သက်လို့ နိုင်ငံတော် တာဝန်ရှိသူတွေအနေနဲ့ အမြန်ဆုံးဖော်ထုတ်ပေးဖို့ အကူအညီပေးကြဖို့အတွက် တောင်းဆိုကြောင်း မိသားစုဝင်တွေက ပြောပါတယ်။


BBC Burmese

https://www.bbc.com/burmese/burma-55485942

ပိုးကူးစက်မှု လျော့လာပေမယ့် ကုသရေးပုံစံ ပြောင်းလဲဖို့ အစီအစဉ်မရှိသေး


ကိုရိုနာဗိုင်းရပ်စ် ကူးစက်ခံရသူအားလုံး ဆေးရုံတက်ကုသစေတဲ့ ပုံစံမျိုးမဟုတ်ဘဲ တကယ်လိုအပ်မှ ဆေးရုံတက်စေဖို့ ပုံစံပြောင်းဆောင်ရွက်မယ်ဆိုပြီး ဖေ့စ်ဘွတ်ခ် လူမှုကွန်ရက် စာမျက်နှာတွေမှာ  ပျံ့နှံ့နေတာဟာ ဝန်ကြီးဌာနရဲ့ သဘောထားမဟုတ်ဘူးလို့ ကျန်းမာရေးဝန်ကြီးဌာနက ပြောရေးဆိုခွင့်ရှိသူက ပြောပါတယ်။

ဗိုင်းရပ်စ် ကူးစက်ခံရတဲ့လူနာတွေကို ကုသရာမှာ အဆင့် ၅ ဆင့် သတ်မှတ်ပြီး တစ်ဆင့်ချင်းစီ ဆုတ်ခွာတဲ့ ပုံစံနဲ့ ပြောင်းလဲကုသမယ်လို့ ဖေ့စ်ဘွတ်ခ် လူမှုကွန်ရက်စာမျက်နှာတွေမှာ ကျန်းမာရေးဝန်ထမ်း တချို့က ဒီရက်ပိုင်းထဲ ရေးသားထားတာကို လူအများက တဆင့်ပြန်လည် မျှဝေနေကြရာကနေ ဒီလိုသတင်းတွေ ပျံ့နှံ့လာတာ ဖြစ်ပါတယ်။

အဆင့် ၅ ဆင့်ဆိုရာမှာ ပိုးကူးစက်ခံရသူတိုင်းကို ဆေးရုံတက်ကုသတာ၊  ပိုးကူးခံရသူတွေထဲကမှ အသက်အရွယ် ကြီးရင့်သူတွေကိုသာ ဦးစားပေးအနေနဲ့ ဆေးရုံတက်ကုသခွင့်ပြုတာ၊ အသက် ၆၀ အထက်တွေကိုသာ ဦးစားပေးကုသတာ၊ ဖျားရင် အိမ်မှာပဲနေထိုင် ဆေးသောက်ကုသဖို့ လမ်းညွှန်ချက်ပေးပြီး၊ ဆေးရုံတက်ဖို့ လိုအပ်မှ ဥပမာအားဖြင့် အသက်ရှူကြပ်လာတာလိုဖြစ်မှ ဆေးရုံကိုခေါ်ယူကုသတာ၊ ပြန်ကောင်းနိုင်ခြေ မရှိသူတွေကို ကုသမှုမပေးတော့တာ စသဖြင့် အခြေအနေအရ အဆင့်ဆင့် ကုသမှုကို လျှော့ချသွားဖို့ စီစဉ်နေတယ်ဆိုပြီး ရေးသားနေကြတာပါ။ 

ဒါဟာ ဆရာဝန်ကြီးတစ်ဦးရဲ့ ရေးသားချက်ဖြစ်ပြီး ကူးစက်မှု လုံးဝမနိုင်တော့ရင် အဲဒီလို လျှော့ချလို့ရနိုင်တယ်ဆိုတာမျိုး ဆိုလိုတာလို့ ရန်ကုန်မြို့က အထွေထွေရောဂါကုဆရာဝန် ဒေါက်တာ ဥက္ကာကြည်ဝင်းက ပြောပါတယ်။

" စပြီးသတင်းထွက်လာတာက မြို့ကြီးတစ်မြို့ရဲ့ ဆရာဝန်ကြီးတစ်ယောက်ကရေးတာ သူတို့ရဲ့ ဝန်ကြီးချုပ်က အဲလိုပုံစံသွားချင်တယ်ဆိုတော့ သူက ပညာရှင်အနေအထားနဲ့ သွားချင်ရင် တိုက်ရိုက်သွားလို့မရဘူး အဲလိုအဆင့်တွေနဲ့ သွားလို့ရတယ်ဆိုပြီး သူ့ဖေ့ဘုတ်မှာ ရေးလိုက်တာ ဒါ MOHS ရဲ့တရားဝင်လမ်းညွှန်ချက်မဟုတ်ဘူး။ သူ့ဖေ့စ်ဘွတ်ခ်ပေ့ချ်မှာရေးတာကို ရှဲလ်ရင်းနဲ့ ပြန့်သွားတာ ဆရာဝန်တော်တော်များများက အဲဒါကို လက်ခံတဲ့သဘောပေါ့"

ဒီလိုပြောဆိုချက်တွေဟာ ကျန်းမာရေးဝန်ကြီးဌာနရဲ့ မူဝါဒမဟုတ်ဘဲ တစ်ဦးချင်းစီရဲ့ သဘောထားသာ ဖြစ်တယ်လို့ ကျန်းမာရေးဝန်ကြီးဌာန ဗဟိုကူးစက်ရောဂါတိုက်ဖျက်ရေးဌာန ညွှန်ကြားရေးမှုး ဒေါက်တာ ခင်ခင်ကြီးက တုံ့ပြန်ပါတယ်။ 

" ခွာစစ်တွေဘာတွေ လိုင်းပေါ်မှာရှိနေတာ MOHS ရဲ့ အာဘော်မဟုတ်ဘူး MOHS အနေနဲ့ ရောဂါရှာဖွေရေးကို တိုးချဲ့လုပ်နေတယ်။ ထိရောက်စွာကုသမှုပေးနေတယ်။ သူတို့ရဲ့ ကွန်တက်တွေကို ရှာဖွေတယ်။ ဒါက ရေးတဲ့သူတစ်ဦးချင်းစီရဲ့ သဘောထားဖြစ်ပါတယ်။ MOHS အာဘော်မဟုတ်ပါဘူး။ ဒါကိုအတည်ယူလို့မရပါဘူး။"

လက်ရှိမှာ ပိုးတွေ့လူနာ လျော့ကျလာတဲ့အတွက် စောင့်ကြည့်စင်တာတွေကို ပိတ်သိမ်းနေတယ်၊ ကုသရေးစင်တာတွေကိုတော့ နဂိုအတိုင်းထားရှိပြီး ကုသရေးကို ပုံမှန် ဆောင်ရွက်နေတယ်လို့ ပြောပါတယ်။ 

ပြီးခဲ့တဲ့ နိုဝင်ဘာလတုန်းကဆိုရင် ပိုးကူးစက်ခံရသူဟာ နေ့စဉ် တစ်ထောင်ကျော်ရှိခဲ့ပြီး ဒီဇင်ဘာလ အလယ်ပိုင်းအထိ နေ့စဉ် ၉၀၀ ဝန်းကျင် ရှိနေခဲ့တာပါ။ 

ဒီဇင်ဘာလကုန်ပိုင်း ဒီရက်ပိုင်းမှာ ပိုးကူးခံရသူ အရေအတွက် သိသိသာသာ လျော့ကျလာနေပြီး အတည်ပြုလူနာဟာ တစ်ရက်ကို ၆၀၀ နဲ့ ၇၀၀ ဝန်းကျင်သာ ရှိပါတော့တယ်။

ရန်ကုန်မှာ ကုသရေးစင်တာအနေနဲ့ ဖောင်ကြီး၊ ဧရာဝတီ၊ ဝေဘာဂီ၊ တောင်ဥက္ကလာ၊ မြောက်ဥက္ကလာနဲ့ ရန်ကုန်ဆေးရုံကြီး တွေရှိနေတာပါ။

တစ်ဖက်မှာလည်း ပိုးတွေ့လူနာတွေ့ရှိမှုက အရင်ကထက် သုံးပုံတစ်ပုံသာ ကျန်တော့တာကြောင့် စင်တာတွေ ပိတ်သိမ်းတယ်ဆိုပေမယ့် တတိယလှိုင်းအတွက်လဲ ကြိုတင်ပြင်ဆင်နေတယ်လို့ ရန်ကုန်ဆေးရုံကြီး အရေးပေါ်ဆေးကုဌာန ပါမောက္ခ ဒေါက်တာမော်မော်ဦးက ပြောပါတယ်။

"တိုင်းဒေသကြီးဝန်ကြီးချုပ်ကလည်း တတိယလှိုင်းအတွက် ကြိုပြင်နေတယ်။ စင်တာတွေကို ဖြုတ်သိမ်းတယ်ဆိုတာ အကုန်ဖျက်ပစ်တာမဟုတ်ဘူး ဝန်ထမ်းတွေကိုနားရအောင် ဗော်လံဒီယာတွေကို အနားပေးဖို့ စင်တာတွေပေါင်းလိုက်တာ။ ကုသမှုရှိတဲ့စင်တာတွေကို တောက်လျှောက်ဖွင့်ထားမှာ လူနာအရေအတွက် နည်းသွားပေမယ့် ရောဂါဆိုးဝါးတဲ့လူနာတွေက တောက်လျှောက်လာနေဆဲပဲ။ ပိုးတွေ့လူနာကနည်းသွားတယ် အခုဆို နဂိုကထက် သုံးပုံတစ်ပုံလောက်ပဲရှိတော့တယ်။"

မြန်မာတစ်နိုင်ငံလုံးမှာ ကျန်းမာရေးဝန်ကြီးဌာနက ဒီဇင်ဘာလ ၂၉ ရက်နေ့ ည ၈ နာရီ နောက်ဆုံးထုတ်ပြန်ထားချက်အရ ပိုးတွေ့လူနာသစ် ၆၁၉ ဦး၊ ပိုးကူးစက်ခံရသူ စုစုပေါင်း တစ်သိန်းနှစ်သောင်းသုံးထောင်ကျော်၊ ဆေးရုံဆင်းခွင့်ရရှိသူ တစ်သိန်းငါးထောင်ကျော် ရှိနေပြီဖြစ်ပြီး သေဆုံးလူနာက ၂၆၃၇ ဦးရှိပြီဖြစ်ပါတယ်။    

ဒီလိုအခြေအနေကိုရောက်ဖို့ သုံးလကြာတိုက်ထုတ်ခဲ့ရပြီး ဒီအခြေအနေကို ထိန်းသိမ်းနိုင်ဖို့ ကုသရေးတွေနဲ့ ထိန်းချုပ်ရေးတွေကို မလျှော့ဘဲ ဆက်ပြီးဆောင်ရွက်သွားဖို့လိုတယ်လို့ ဖောင်ကြီးကျန်းမာရေးစင်တာမှာ ကုသရေးပိုင်းကို ဆောင်ရွက်ပေးနေတဲ့ ဆေးတက္ကသိုလ် (၁) ပါမောက္ခချုပ် ဒေါက်တာဇော်ဝေစိုးက ဒီဇင်ဘာ ၂၄ ရက်နေ့မှာ ပြောထားပါတယ်။ 

"နယူးနော်မယ်လိုက်ဖ်မှာနေထိုင်ရင်း ဆထက်တစ်မပိုးကြိုးစားသွားရမှာပါ။ ရောဂါပိုးရှိနိုင်သူ၊ သယ်ဆောင်လာနိုင်သူတွေကို ရှာဖွေ၊ ကာကွယ်၊ထိန်းသိမ်း၊ ကုသ ၊ ဖေးမကူညီစောင့်ရှောက်တာတွေကို မလျှော့ပဲ အသိသတိနဲ့ ထာဝရ စက္ကန့်မလပ် နာရီမလပ် အားစိုက်ဆောက်ရွက်ကြရဦးမှာဖြစ်ပါတယ်။"

ကိုရိုနာဗိုင်းရပ်စ်ဟာ ကမ္ဘာပေါ်ကနေ ပျောက်ကွယ်သွားမှာမဟုတ်ဘဲ နှစ်ပေါင်းများစွာ ရာသီတုပ်ကွေးရောဂါလို ဆက်လက်ရှိနေမှာဖြစ်တယ်လို့ ကျန်းမာရေးဝန်ကြီးဌာနက အသိပေးထားပါတယ်။

ရောဂါကာကွယ်ဆေးကလည်း စမ်းသပ် ထိုးနှံနေဆဲဖြစ်ပြီး ဗိုင်းရပ်စ် ကူးစက်မခံရအောင် နေ့စဉ် လူနေမှုဘဝတွေမှာ နှာခေါင်းစည်းကို တပ်ဆင်ဖို့၊ တစ်ဦးနဲ့တစ်ဦး ခြောက်ပေအခွာနေကြဖို့၊ လက်ကို မကြာခဏ ဆေးဖို့၊ ရောဂါကာကွယ်ရေး နည်းလမ်းတွေကို စနစ်တကျ လိုက်နာကြဖို့ အမြဲမပြတ် တိုက်တွန်းနေပါတယ်။ 


RFA Burmese

https://www.rfa.org/burmese/news/covid-treatment-not-changing-12302020041709.html

ဧရာဝတီမှာ အကျဉ်းသားနဲ့ အချုပ်သား ၁၃၇ ဦးမှာ ကိုရိုနာဗိုင်းရပ်စ် ပိုးတွေ့

ဧရာဝတီမှာ အကျဉ်းသားနဲ့ အချုပ်သား ၁၃၇ ဦးမှာ ကိုရိုနာဗိုင်းရပ်စ် ပိုးတွေ့ ပုသိမ်အကျဉ်းထောင်ကို ၂၀၂၀ အောက်တိုဘာ ၂၉ ရက်နေ့က တွေ့ရစဉ် / Photo: Soe Thine/RFA

ဧရာဝတီတိုင်းထဲမှာ အကျဉ်းသားနဲ့ အချုပ်သား ၈၂၅ ဦးကို ကိုရိုနာဗိုင်းရပ်စ်ပိုး ရှိ၊ မရှိ စစ်ဆေးခဲ့ရာမှာ အကျဉ်းသားနဲ့ အချုပ်သား ၁၃၇ ဦးမှာ ကိုရိုနာဗိုင်းရပ်စ် ပိုးတွေ့ရှိခဲ့တယ်လို့ ဧရာဝတီတိုင်း ပြည်သူ့ကျန်းမာရေးဦးစီးဌာန၊ ဒုတိုင်းဦးစီးမှူး ဒေါက်တာသီဟအောင် က ပြောပါတယ်။

“အခုအချိန်အထိ စာရင်း ပြောရမယ် ဆိုလို့ရှိရင် အကျဉ်းသားနဲ့ အချုပ်သား စစ်ဆေးမှု အားလုံးပေါင်း ၈၂၅ ဦး ရှိပြီးတော့ လက်ရှိအချိန်အထိ စုစုပေါင်း ၁၃၇ ဦး ပိုးကူးစက်ခံရတာတွေ့ရှိထားပါတယ်။ ကျန်တဲ့ အကျဉ်းထောင်တွေက လွတ်တဲ့လူပေါ့။ လွတ်တဲ့လူတွေကို စစ်တဲ့အခါမှာ မြောင်းမြက တစ်ယောက်ပါမယ်။ အခုထပ်တွေ့တာက ဘိုကလေးမှာက ၂၈ ရက်၊ ၁၂ လမှာ ၂၈ ယောက် ထပ်တွေ့ပါတယ်”

အကျဉ်းသားသစ်တွေနဲ့ အချုပ်သားသစ်တွေနဲ့ ထောင်က လွတ်မယ့်လူတွေ အချုပ်သားသစ်တွေကို စစ်ဆေးတာဖြစ်ပါတယ်။

မအူပင်အကျဉ်းထောင်မှာ အောက်တိုဘာလ ၂၄ ရက်နေ့မှာ ပိုးကူးစက်ခံရသူ အကျဉ်းသား ၁၀၆ ယောက်နဲ့ ဒီဇင်ဘာလ ၂၈ ရက်နေ့မှာ ဘိုကလေးမြို့နယ်က အချုပ်သား ၂၈ ဦးတို့ ပါဝင်ပါတယ်။

ဘိုကလေးမြို့နယ်မှာ တွေ့ရှိတဲ့ အချုပ်သား ၂၈ ဦးကတော့ ကုသဆဲဖြစ်တယ်လို့ ဒေါက်တာသီဟအောင် က ပြောပါတယ်။

ဧရာဝတီတိုင်းမှာ ခရိုင်အဆင့် အကျဉ်းထောင် ငါးခုနဲ့ အကျဉ်းစခန်း လေးခု စုစုပေါင်း ၉ ခု ရှိပါတယ်။

ဧရာဝတီတိုင်းအတွင်း ကပ်ရောဂါ ကာကွယ်ထိန်းချုပ်ကုသနိုင်ဖို့ ပြည်သူ့ကျန်းမာရေးဌာနတွေက လှူဒါန်းမှုတွေ လိုအပ်နေတယ်လို့ ဧရာဝတီတိုင်း ပြည်သူ့ကျန်းမာရေးဦးစီးဌာနမှူး ဒေါက်တာသန်းထွန်းအောင် က ပြောပါတယ်။

“အားတော့ အားနာပါတယ်။ ပြည်သူတွေက လှူဒါန်းဖို့က ဆေးရုံတွေကိုတော့ လှူပါတယ်။ မဆိုးဘူးပေါ့ ။ ပြည်သူ့ကျန်းမာကျတော့လည်း Swab စစ်တဲ့လူတွေကို ကျနော် ကြည့်နေတာ၊ သူတို့က ငွေရေးကြေးရေး မပြည့်စုံဘူး။ ကားနဲ့ မသွားနိုင်ဘူး၊ လမ်းလျှောက်လာရတယ်။ ဆိုင်ကယ် Taxi ဖိုး ဆီမရှိဘူး။ အဲဒါတွေက ပန်တိုင်ဂိတ်ဆိုလည်း ဒီအတိုင်းပါပဲ၊ ကူးစက်မှုကလည်း ခံရဖို့ အန္တရာယ်လည်းရှိတယ် နောက်ပြီးတော့ မပြည့်စုံဘူး။ ဒါလေးတွေကြောင့် တတ်နိုင်သလောက် ပြည်သူ့ကျန်းမာဘက်ကိုလည်း လှူစေချင်တယ်“

ဒီဇင်ဘာလ ၃၀ ရက်နေ့ မနက်ပိုင်းအထိ ဧရာဝတီတိုင်းထဲမှာ အတည်ပြုလူနာ ၄၄၆၉ ဦးရှိနေပြီး ကုသဆဲလူနာ က ၅၂၇ ဦး နဲ့ သေဆုံးသူ ၃၈ ဦးရှိနေပါပြီ။


RFA Burmese

https://www.rfa.org/burmese/news/corona-in-irrawaddy-division-12302020051057.html

နောက်ထပ် ကိုဗစ်ကာကွယ်ဆေးတွေ အရေးပေါ်သုံးနိုင်ဖို့ ကန်သုံးသပ်

COVID-19 ကာကွယ်ဆေးပုလင်း။ (ဒီဇင်ဘာ ၀၈၊ ၂၀၂၀)

အမေရိကန်ပြည်ထောင်စုမှာ COVID-19 ကာကွယ်ဆေး ထိုးနှံပေးတဲ့ အစီအစဉ်စတင်နေတာနဲ့ အတူ နောက်ထပ်အလားလာရှိတဲ့ COVID-19 ကာကွယ်ဆေးတွေကိုလည်း အရေးပေါ် အသုံးပြုခွင့်ပေးနိုင်ဖို့ သုံးသပ်နေပြီဖြစ်ပါတယ်။

အခု လက်ရှိ အမေရိကန်မှာ Pfizer နဲ့ ဂျာမန် BioNTech ဆေးကုမ္ပဏီ ကာကွယ်ဆေးအပြင် Moderna ရဲ့ ကာကွယ်ဆေးကို အရေးပေါ် အသုံးပြုခွင့်ပေးထားပေမဲ့ တနိုင်ငံလုံးနဲ့ တကမ္ဘာလုံးကို ဖြန့်ဖြူးဖို့ ဆေးအလုံအလောက်မရရှိမှာကို စိုးရိမ်မှုတွေရှိနေကြပါတယ်

အမေရိကန် Novavax ဆေးကုမ္ပဏီက စမ်းသပ်နေတဲ့ အလားအလာရှိတဲ့ COVID-19 ကာကွယ်ဆေးက အခု စမ်းသပ်မှု နောက်ဆုံးအဆင့်တွေကို ပြုလုပ်နေတဲ့ ပ ဉ္စမမြောက်ဆေးကုမ္ပဏီလည်း ဖြစ်ပါတယ်။

နိုင်ငံတွင်း ကာကွယ်ဆေးထိုးလိုတဲ့ သူအားလုံးအတွက် ဆေးအလုံအလောက်ရှိဖို့ဆိုရင် ဆေးကုမ္ပဏီ ၂ ခုထက် ပိုပြီးလိုအပ်တယ်လို့ အမေရိကန် ကူးစက်ရောဂါ ထိပ်တန်း ကျွမ်းကျင်ပညာရှင် Dr. Anthony Fauci က AP သတင်းကို တနင်္လာနေ့ကပြောပါတယ်။

Johnson & Johnson ကုမ္ပဏီကလည်း သူ ထုတ်လုပ်နေတဲ့ ကာကွယ်ဆေးကို တစ်ကြိမ်တည်း ထိုးနှံတာ လုံလောက်မှု ရှိ-မရှိကို နောက်လထဲ သိရှိနိုင်လိမ့်မယ်လို့ ခန့်မှန်းထားပါတယ်။

အခု ထိ COVID-19 ကြောင့် အမေရိကန်နိုင်ငံတွင်း သေဆုံးသူက ၃၃၀,၀၀၀ ကျော်အပါအဝင် တကမ္ဘာလုံး သေဆုံးသူ ၁.၈ သန်းရှိပါတယ်။

အမေရိကန်မှာ ဒီဇင်ဘာ တလထဲမှာ COVID-19 ကြောင့် သေဆုံးသူက ၆၅,၀၀၀ လောက်ရှိပြီး ပြီးခဲ့တဲ့ သီတင်း ငါးပတ်မှာ တရက်ကို ပျှမ်းမျှသေဆုံးသူ ၃,၀၀၀ လောက်ရှိနေတာပါ။ ဇန်နဝါရီလ ပထမပတ်အတွင်း Pfizer နဲ့ Moderna ကာကွယ်ဆေး သန်း ၂၀ လောက်ကို ပြည်နယ်တွေကို စပြီး ဖြန့်ဖြူးပေးသွားမယ်လို့ သမ္မတ Trump အစိုးရ ကာကွယ်ဆေးဖြန့်ဖြူးပေးရေး အဖွဲ့က မျှော်မှန်းထားပါတယ်။

ဘဲလာရုစ်နိုင်ငံမှာ ရုရှားနိုင်ငံထုတ် Sputnik V ကာကွယ်ဆေးကို စပြီးထိုးနှံပေးလိုက်ပါတယ်။ ရုရှားနိုင်ငံပြင်ပ ဒီ Sputnik V ကာကွယ်ဆေးကို ဘဲလာရုစ်နိုင်ငံ က ပထမဆုံး အသုံးပြုခွင့်ပေးလိုက်တာဖြစ်ပါတယ်။

လူဦးရေ ၉.၅ သန်းလောက်ရှိတဲ့ ဘဲလာရုစ်နိုင်ငံမှာ COVID-19 ကူးစက်သူ ၁၈၈,၀၀၀ နဲ့ သေဆုံးသူ ၁,၄၀၀ နီးပါးရှိပါတယ်။


ဗွီအိုအေ (မြန်မာပိုင်း)

https://burmese.voanews.com/a/covid-vaccine/5717066.html

ဗီဇပြောင်း ကိုရိုနာပိုးတွေ့ရှိမှု ပုံမှန်ဖြစ်စဉ်ဟု WHO ရှင်းလင်း

တောင်ကိုရီးယားနိုင်ငံ Incheon လေဆိပ်မှာတွေ့ရတဲ့ မြင်ကွင်း။ (ဒီဇင်ဘာ ၂၉၊ ၂၀၂၀)

ကိုရိုနာဗိုင်းရပ်စ် မျိုးဗီဇဖွဲ့စည်းပုံ ဆင့်ကဲ ပြောင်းလဲတာက ပုံမှန် ဖြစ်စဉ်တစ်ခုဖြစ်ပြီး အနာဂတ်မှာ ဗီဇပြောင်း ကိုရိုနာဗိုင်းရပ်စ်တွေကို ပိုပြီး တွေ့လာမှာ ဖြစ်တယ်လို့ ကမ္ဘာ့ကျန်းမာရေးအဖွဲ့ WHO က ပြောပါတယ်။

ယူကေနဲ့ တောင်အာဖရိကနိုင်ငံတွေမှာ တွေ့ရတဲ့ ဗိုင်းရပ်စ်က တစ်ချိန်တည်းမှာ ပေါ်လာတဲ့ မတူညီတဲ့ ဗီဇပြောင်း ဗိုင်းရပ်စ်တွေ ဖြစ်ကြောင်း၊ အဲဒီ ဗိုင်းရပ်စ် နှစ်မျိုးစလုံး ဗိုင်းရပ်စ်ရဲ့ ပရိုတိန်း လက်တံမှာ ဗီဇဆင့်ကဲပြောင်းလဲသွားတာ ဖြစ်လို့ မတူညီတဲ့ မျိုးစိတ်ကွဲ ဗိုင်းရပ်စ်တွေ ဖြစ်လာကြောင်း WHO ရဲ့ အရေးပေါ် အစီအစဉ် နည်းပညာဆိုင်ရာ အကြီးအကဲ Maria Van Kerkhove က တနင်္လာနေ့က သတင်းစာ ရှင်းလင်းပွဲမှာ ပြောသွားတာ ဖြစ်ပါတယ်။

ဒါ့အပြင်၊ အဲဒီ မျိုးဗီဇပြောင်းဗိုင်းရပ်စ်မျိုးစိတ်ကွဲ နှစ်မျိုးစလုံးနဲ့ ပတ်သက်ပြီး ဆေးရုံတက်ရတဲ့ လူအရေအတွက်နဲ့ သေဆုံးမှုနှုန်းတွေကို ၂၈ ရက်အတွင်း လေ့လာချက်အရ မူလ ကိုရိုနာဗိုင်းရပ်စ်နဲ့ ကွာခြားမှု မရှိကြောင်းနဲ့ အနာဂတ်မှာ အဲဒီလို မျိုးဗီဇပြောင်း ဗိုင်းရပ်စ်တွေ ပိုပြီး တွေ့ လာနိုင်မှာ ဖြစ်ပေမယ့် လက်ရှိ ဗိုင်းရပ်စ်တွေနဲ့ မကွာခြားဘူးလို့လည်း Maria Van Kerkhove က ပြောပါတယ်။

WHO အရေးပေါ် ကျန်းမာရေး အစီအစဉ်ရဲ့ အမှုဆောင် ညွှန်ကြားရေးမှူး Michael Ryan ကလည်း ကိုရိုနာဗိုင်းရပ်စ်ဟာ အနာဂတ်မှာ ကမ္ဘာ့ ကပ်ရောဂါ အဆင့်ကနေ ဒေသတွင်း ကူးစက်ရောဂါ အဆင့်ကို ရောက်ရှိသွားမှာ ဖြစ်ကြောင်း၊ ကာကွယ်ဆေးက ဗိုင်းရပ်စ်ကြောင့် နေထိုင်မကောင်း ဖြစ်တာနဲ့ အသက်ဆုံးရှုံးတာတွေကို လျော့နည်းကျဆင်းသွားစေလိမ့်မယ်လို့လည်း ပြောပါတယ်။ ကျန်းမာရေး ဝန်ထမ်းတွေနဲ့ ဗိုင်းရပ်စ်တားဆီးရေး ရှေ့တန်းက ပါဝင်နေတဲ့သူတွေကို ကာကွယ်ဆေးထိုးပေးရင်း ကပ်ရောဂါကို အားနည်းသွားအောင် လုပ်ဆောင်နိုင်မယ်လို့ Michael Ryan က ပြောပါတယ်။

မျိုးဗီဇပြောင်းကိုရိုနာဗိုင်းရပ်စ် ကူးစက်နေမှုကို ယူကေနိုင်ငံမှာ ပထမဦးဆုံး တွေ့ရှိခဲ့တာ ဖြစ်ပြီး အဲဒီနောက် တောင်အာဖရိက၊ ဂျပန်၊ ကနေဒါနဲ့ တောင်ကိုရီးယားနိုင်ငံတွေမှာ ထပ်မံ တွေ့ရှိခဲ့လို့ ကူးစက်မှု ပိုမြန်တဲ့ ဗိုင်းရပ်စ်မျိုးစိတ်နဲ့ ပတ်သက်လို့ ကမ္ဘာတစ်ဝှမ်း လူထုကျန်းမာရေးဆိုင်ရာ စိုးရိမ်ပူပန်မှုတွေ ထွက်ပေါ်လာနေတာဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/covid-mutation/5717090.html

ကမ္ဘာတစ်ဝန်းကို ပျံ့နှံ့နေတဲ့ ဗီဇပြောင်းကိုရိုနာဗိုင်းရပ်စ်

ဗြိတိန်ပြန်ခရီးသွားတွေက တဆင့် အိန္ဒိယကို ဗီဇပြောင်းမျိုးကွဲသစ်ရောက်လာပြီဖြစ်

ဗြိတိန်မှာ ပထမဦးဆုံး တွေ့ခဲ့ရတဲ့ ဗီဇပြောင်း ကိုရိုနာဗိုင်းရပ်စ်မျိုးကွဲသစ်ကို ကူးစက်ခံထားရတဲ့ လူနာ အိန္ဒိယမှာ အနည်းဆုံး ၆ ယောက်ရှိနေပါတယ်။

အဲဒီသူတွေဟာ ဗြိတိန်ကနေပြန်လာခဲ့ကြတဲ့သူတွေဖြစ်ပြီး သူတို့ကို သီးသန့်ခွဲထားပေးထားတယ်လို့ အိန္ဒိယ အရာရှိတွေက အင်္ဂါနေ့က ပြောပါတယ်။

ဒီဗိုင်းရပ်စ်မျိုးကွဲသစ်ဟာ အရင်တုန်းက မျိုးကွဲတွေထက် ပိုကူးစက်မြန်ပြီး၊ အခုတော့ ကမ္ဘာမှာ ကိုရိုနာဗိုင်းရပ်စ် ကူးစက်ခံရသူ ဒုတိယအများဆုံးလည်းဖြစ်၊ မြန်မာနဲ့ အိမ်နီးချင်းနိုင်ငံ တစ်နိုင်ငံလည်းဖြစ်တဲ့ အိန္ဒိယနိုင်ငံဆီကို ရောက်ရှိလာပါပြီ။

ကျန်းမာရေးပညာရှင်တွေက ဒီမျိုးကွဲသစ်ဟာ ပိုပြီးကူးစက်တာမြန်ပေမယ့် ပိုပြီးအန္တရာယ်များတာတော့ မဟုတ်ဘူးလို့ ဆိုပါတယ်။

ဗြိတိန်ကလာတဲ့ လေကြောင်းခရီးစဉ်တွေကို လွန်ခဲ့တဲ့ သီတင်းပတ်ကစလို့ ပိတ်ထားတဲ့ နိုင်ငံတွေ အများအပြားရှိပြီး အိန္ဒိယကလည်း ပိတ်လိုက်ပါပြီ။

ကမ္ဘာမှာ အတည်ပြုထားတဲ့ ကိုရိုနာဗိုင်းရပ်စ်ကူးစက်ခံထားရသူပေါင်း ၁၀ သန်းကျော်ရှိနေပြီး အိန္ဒိယဟာ ကူးစက်ခံရသူ ဒုတိယအများဆုံးရှိနေတဲ့ နိုင်ငံပါ။ ကူးစက်ခံရသူ အများဆုံး နိုင်ငံကတော့ အမေရိကန်နိုင်ငံပါ။

အိန္ဒိယအစိုးရအရာရှိတွေက အဲဒီမျိုးကွဲသစ်ကူးစက်ခံထားရတဲ့ လူ ၆ ယောက်နဲ့ ထိတွေ့မိသူတွေ၊ မိသားစုဝင်တွေဆီကို ကွင်းဆက်လိုက်ပြီး စောင့်ကြည့်တာတွေ၊ ဆေးစစ်တာတွေ လုပ်ဆောင်နေပါတယ်။

ပြီးခဲ့တဲ့လအတွင်းက ဗြိတိန်ကနေ အိန္ဒိယကို ပြန်လာတဲ့ ခရီးသည်ပေါင်း ၃၃၀၀၀ လောက် ရှိပါတယ်။ အဲဒီထဲက ၁၁၄ ယောက်မှာ ကိုရိုနာဗိုင်းရပ်စ်ပိုးတွေ့ရှိခဲ့ပါတယ်၊ သူတို့ဆီက ဓာတ်ခွဲခန်းဆိုင်ရာ နမူနာတွေယူပြီး မျိုးကွဲသစ်ကူးစက်ခံထားရသလား ဆိုတာကို စစ်ဆေးနေကြပါကြောင်း အိန္ဒိယအစိုးရရဲ့ ထုတ်ပြန်ချက်ထဲမှာ ဖော်ပြထားပါတယ်။

ဗြိတိန်ကနေ တောင်ကိုရီးယားကို ပြန်လာတဲ့ ခရီးသည်တွေထဲမှာ ဗိုင်းရပ်စ်မျိုးကွဲသစ်ကူးစက်ခံရသူတွေကို တနင်းလာနေ့က တွေ့ခဲ့ရ

ဗြိတိန်မှာစတင်တွေ့ရတဲ့ ဗိုင်းရပ်စ်မျိုးကွဲသစ်မျိုးကို တခြားနိုင်ငံတွေမှာလည်း တွေ့ရှိနေပြီ ဖြစ်ပါတယ်။

ဥရောပမှာ နယ်သာလန်၊ ဒိန်းမတ်၊ ပြင်သစ်၊ အီတလီ၊ စပိန်၊ ဆွစ်ဇာလန်၊ ဆွီဒင်၊ ဖင်လန်၊ အိုင်ယာလန်၊ ဂျာမနီ၊ အိုက်စလန်၊ ဘယ်လဂျီယံ၊မြောက်အမေရိကမှာ ကနေဒါ ၊ အာရှဘက်မှာ အိန္ဒိယ၊ ဂျပန်၊ စင်ကာပူ၊ ဟောင်ကောင်၊ တောင်ကိုရီးယား၊ သြစတြေးလျ ၊အရှေ့အလယ်ပိုင်းမှာ အစ္စရေး၊ လက်ဘနွန် စတဲ့ကမ္ဘာ့နိုင်ငံတွေမှာ ဗိုင်းရပ်စ်မျိုးကွဲသစ်ကို တွေ့ရှိ နေပါပြီ။

ဗြိတိန်မှာလည်း ကိုဗစ်ကူးစက်နှုန်းက အလွန်မြင့်တက်နေတဲ့အတွက် စိုးရိမ်စရာတွေ ပိုတိုး နေတယ်လို့ ကျန်းမာရေး အရာရှိတွေက သတိပေးနေပါတယ်။ တနင်္လာနေ့က ကူးစက်ခံရသူ လူနာအသစ် ၄၁၃၈၅ ယောက်ရှိခဲ့ကာ ဒါဟာ ဗြိတိန်မှာ စံချိန်တင် အမြင့်ဆုံး ကူးစက်နှုန်းလည်း ဖြစ်ပါတယ်။


BBC Burmese

https://www.bbc.com/burmese/world-55475609

အမ်းမှာ စစ်ဘေးရှောင်ရွာ မီးလောင်၊ လူမနေတဲ့အိမ် ၇ လုံးလောင်ကျွမ်း

ကျေးရွာသားအများစုတို့ဟာ စစ်ဘေးရှောင်အဖြစ်နဲ့ အမ်းမြို့ပေါ်ကို ရောက်ရှိခိုလှုံ နေကြ

ရခိုင်ပြည်နယ် အလယ်ပိုင်းဒေသ အမ်းမြို့နယ်အတွင်းက ကျေးရွာတစ်ရွာမှာ ဒီဇင်ဘာ ၂၈ ရက် ည ၁၁ နာရီလောက်မှာ မီးလောင်မှုဖြစ်ပွားခဲ့ပြီး နေအိမ် ၆ လုံး နဲ့ အဆောက်အအုံတစ်ခု မီးလောင်ဆုံးရှုံးခဲ့တယ်လို့ အမ်းမြို့နယ်မီးသတ်ဦးစီးဌာနက အတည်ပြုပြောဆိုပါတယ်။

အဲ့ဒီကျေးရွာဟာ အမ်းမြို့နယ်အနောက်ဘက် မိုင်လေးဆယ်ခန့်အကွာမှာရှိတဲ့ ဒါးလက်ချောင်းအတွင်းက ဒါးလက်ကျေး ရွာအုပ်စု ရှမ်းကုန်းကျေးရွာဖြစ်ပြီး အဲ့ဒီကျေးရွာသားအများစုတို့ဟာ စစ်ဘေးရှောင်အဖြစ်နဲ့ အမ်းမြို့ပေါ်ကို ရောက်ရှိခိုလှုံ နေကြတာ ဖြစ်ပါတယ်။

မီးလောင်မှုကြောင့်ပျက်စီးသွားခဲ့တဲ့ နေအိမ်အဆောက်အအုံတွေမှာ ပျဉ်စီပျဉ်ထောင်၊ သွပ်မိုး၊ ကွန်ကရစ်ခင်း နှစ်ထပ်အိမ် ခြောက်လုံး နဲ့ လောင်းတူစာပေနှင့်ယဉ်ကျေးမှုရုံးတို့ဖြစ်တယ်လို့ မီးလောင်ခံလိုက်ရတဲ့ နေအိမ်ပိုင်ရှင် ကျေးရွာရာအိမ်မှူး ဟောင်း ဦးမောင်မောင်လတ်က ပြောပါတယ်။

မီးလောင်မှု ဘာကြောင့်ဖြစ်ပွားခဲ့တယ်ဆိုတာ စုံစမ်းဆဲဖြစ်ပြီး ဆုံးရှုံးမှုတန်ဖိုး ကျပ် ၄၅ သိန်းလောက်ရှိမယ်လို့ ခန့်မှန်းထားတယ်ကြောင်း အမ်းမြို့နယ် မီးသတ်ဦးစီးမှူး ဦးအောင်သန်းဌေးကပြောပါတယ်။

ကျေးရွာအတွင်း အိမ်ခြေ ၂၀ ကျော်လောက်မှာသာ လူတွေနေထိုင်လျက်ရှိကာ အခုမီးလောင်သွားခဲ့တဲ့နေရာတွေမှာ လူတွေမနေထိုင်တော့ဘူးလို့ လောင်းတူ ချင်းစာပေနဲ့ယဉ်ကျေးမှုအသင်းက ပြောပါတယ်။

အမ်းမှာ စစ်ဘေးရှောင်ရွာ မီးလောင်၊ လူမနေတဲ့အိမ် ၇ လုံးလောင်ကျွမ်း

"ကျွန်တော်တို့က အခုအမ်းမှာရောက်နေတယ်။ မနေ့ကသတင်းကြားရတာက အကုန်လုံးပြာကျပြီးမှ သိရတာ။ အဲ့ဒီအိမ်တွေက တောင်ပေါ်မှာရှိတာ။ တောင်ပေါ်နဲ့တောင်အောက်မှာနေကြတာ။ တိုက်ပွဲတွေကြောင့် တောင်ပေါ်မှာ မနေရဲလို့ အောက်မှာ အိမ်ငှားနေကြတယ်။ ဘယ်သူတွေရှို့တယ်ဆိုတာကိုလည်း မသိဘူး"လို့ လောင်းတူစာပေနှင့်ယဉ်ကျေးမှုအသင်းက ဦးသာညွန့်က ပြောပါတယ်။

ရှမ်းကုန်းကျေးရွာဟာ ချင်းလူမျိုးတွေနေထိုင်တဲ့ ကျေးရွာတစ်ရွာဖြစ်ပြီး ရွာသားတွေ နေရပ်မစွန့်ခွာမီက အိမ်ခြေပေါင်း ၁၅၄ အိမ်ရှိခဲ့တယ်လို့ ဆိုပါတယ်။

ဒါးလက်ချောင်းအတွင်း အခုနှစ်စပိုင်းမှာ တပ်မတော်နဲ့ ရက္ခိုင့်တပ်တော် အေအေတို့အကြား တိုက်ပွဲတွေဖြစ်ပွားခဲ့တဲ့အတွက် ဒေသခံကျေးရွာသားတွေဟာ အမ်းမြို့ပေါ်နဲ့ မကွေးတိုင်းဒေသကြီးတို့မှာ ထွက်ပြေးခိုလှုံနေကြတာဖြစ်တယ်လို့ အမ်းမြို့ခံ တစ်ဦးက ပြောပါတယ်။

အဲ့ဒီကျေးရွာသားတွေဟာ ပြီးခဲ့တဲ့ ၁၀ လခန့်ကနေ နေရပ်စွန့်ခွာလာခဲ့ကြတာဖြစ်ပြီး ဒါးလက်ချောင်းအတွင်းမှာ ယခင်က ကျေးရွာပေါင်း ၄၈ ရွာရှိတဲ့အနက် နေရပ်စွန့်ခွာလာခဲ့ကြတဲ့ ကျေးရွာပေါင်း ၂၀ ကျော် ပျက်စီးသွားခဲ့ပြီဖြစ်တယ်လို့ ဒေသခံတွေဆီက သိရပါတယ်။

တိုက်ပွဲတွေဖြစ်ပွားနေတဲ့အချိန်က ဒါးလက်ချောင်းအတွင်းမှာ လက်နက်ကြီးပစ်ခတ်မှုတွေကြောင့် ဒေသခံတွေ ထိခိုက်သေ ဆုံးမှုတွေရှိခဲ့ပေမယ့် အခုအပစ်ခတ်ရပ်စဲထားတဲ့အချိန်တွေမှာတော့ တိုက်ပွဲဖြစ်ပွားတာတွေ မရှိဘူးလို့ ဒေသခံတွေက ပြောဆိုကြပါတယ်။ 


BBC Burmese

https://www.bbc.com/burmese/burma-55476851

ကချင်နဲ့ မွန်ပါတီတွေကို NLD ပါတီ စတင်တွေ့ဆုံမည်


အမျိုးသားဒီမိုကရေစီအဖွဲ့ချုပ် NLD က တိုင်းရင်းသားနိုင်ငံရေးပါတီတွေနဲ့ တွေ့မယ့်အဖွဲ့ဟာ မနက်ဖြန်ကစပြီး ကချင်နဲ့ မွန်က တိုင်းရင်းသားပါတီတွေနဲ့ စတင် တွေ့ဆုံဆွေးနွေးဖို့ ပါတီ ဗဟိုအလုပ်အမှုဆောင်ကော်မတီက ဆုံးဖြတ်လိုက်ပါတယ်။ တချို့တိုင်းရင်းသားပါတီတွေက NLD နဲ့ တွေ့ဆုံမယ်လို့ အကြောင်းပြန်ကြပေမယ့် အကြောင်းမပြန်တဲ့ ပါတီတွေလည်းရှိနေပါတယ်။

၂၀၂၀ ရွေးကောက်ပွဲအနိုင်ရ NLD ပါတီက အစိုးရသစ်မဖွဲ့စည်းခင် တိုင်းရင်းသားပါတီတွေနဲ့ တွေ့ဆုံဆွေးနွေးမှု တွေကို မနက်ဖြန် စတင်မယ်လို့ ဒီနေ့ ပြည်တော်မှာ ပြုလုပ်တဲ့ ပါတီဗဟိုအလုပ်အမှုဆောင် အစည်းအဝေးကနေ ဆုံးဖြတ်ခဲ့တာပါ။

တိုင်းရင်းသားပါတီတွေနဲ့တွေ့မယ့် ကိုယ်စားလှယ်သုံးဦးက တိုင်းရင်းသားပါတီတွေဘက်က လိုလားတဲ့ တောင်းဆိုတဲ့ အချက်တွေကို ပါတီ ဗဟိုအလုပ်အမှုဆောင် အဖွဲ့ကို ပြန်လည်တင်ပြရမှာ ဖြစ်တယ်လို့ ဒေါက်တာဇော်မြင့်မောင်က ပြောပါတယ်။

"ကချင်ကိုသွားတွေ့မယ်ဆိုတာ၊ ကျွန်တော်တို့ ကချင်ပြည်နယ်က အားကောင်းတယ်လေ၊ ကူညီပေးတဲ့ အဖွဲ့တွေကလည်း အားကောင်းတဲ့အခါကျတော့ ကချင်ကို အရင်သွားတာ၊ ရောက်တာတော့ ကျန်တဲ့ နေရာတွေ အကုန်ရောက်မှာပါ၊ ပြည်နယ် ဒေသခံတွေက သူတို့ဆီမှာရှိတဲ့ တိုင်းရင်းသားပါတီတွေ အကြောင်း သူတို့ပဲ ကောင်းကောင်းသိမှာပေါ့၊ ပြီးတဲ့အခါ အနိုင်ရလွှတ်တော်ကိုယ်စားလှယ်တွေနဲ့ တွေ့မှာပေါ့၊ အဲဒါတွေကို မူတည်ပြီးမှ ကိုယ်စားလှယ်တွေရဲ့ အကြံပြုချက်တွေ သုံးသပ်ပြီးတော့မှ ဒေသခံ တိုင်းရင်းသားပါတီတွေနဲ့ စကားပြောကြမှာပါ၊ ရှေ့ပြေးအဖွဲ့အနေနဲ့ လွှတ်လိုက်တာပါ၊ ဒီအပေါ်မှာမူတည်ပြီးတော့ ကျွန်တော်တို့က စဉ်းစားကြမှာပါ"

တိုင်းရင်းသားပါတီတွေနဲ့ တွေ့ဆုံဆွေးနွေးဖို့ မကွေးတိုင်း ဝန်ကြီးချုပ် ဒေါက်တာအောင်မိုးညို၊ ကရင်ပြည်နယ် ဝန်ကြီးချုပ် ဒေါ်နန်းခင်ထွေးမြင့်နဲ့ ဦးအင်ထုံးခါးနော်ဆန်တို့ကို ပြီးခဲ့တဲ့ ဒီဇင်ဘာလ ၁၂ ရက်နေ့က ပါတီ ဗဟိုအလုပ်အမှုဆောင် အစည်းအဝေးမှာ တာဝန်ပေးခဲ့တာဖြစ်ပါတယ်။

တိုင်းရင်းသားပါတီတွေနဲ့ တွေ့ဆုံဖို့ တာဝန်ပေးထားတဲ့ သုံးဦးဟာ မနက်ဖြန် ဒီဇင်ဘာလ ၃၀ ရက်နေ့မှာ ကချင်ပြည်နယ်ကို သွားမှာဖြစ်ပြီး ကချင်ခရီးစဉ် ပြီးတဲ့နောက် မွန်ပြည်နယ်ကို ဆက်သွားမှာဖြစ်ပါတယ်။

ကချင်ပြည်နယ်ပြည့်သူပါတီ KSPP နဲ့ မွန်ညီညွတ်ရေးပါတီ MUP တို့ကတော့ NLD ပါတီက သူတို့နဲ့ တွေ့ဆုံမယ့်ရက်ကို အကြောင်းကြားတာ မရှိသေးဘူးလို့ ပြောပါတယ်။

မွန်ညီညွတ်ရေးပါတီ တွဲဘက်အထွေထွေအတွင်းရေးမှူး (၁) နိုင်လယီတမ က NLD ပါတီနဲ့တွေ့ရင် ဆွေးနွေးမယ့် အကြောင်းအရာတွေ ပြင်ဆင်ထားတာတွေ ရှိပေမယ့် လောလောဆယ် ထုတ်မပြောနိုင်သေးဘူးလို့ ပြောပါတယ်။

"တွေ့မှပဲ သေချာပြောနိုင်မယ်လေ၊ ကျနော်တို့ဘက်က ဆွေးနွေးဖို့ ပြင်ဆင်ထားတာတွေတော့ ရှိပါတယ်၊ သို့သော်အဲဒါကို တွေ့ဆုံပြီးခါမှ သူတို့က ကိစ္စရပ်တွေကို ဆွေးနွေးတင်ပြတဲ့အခါမှပဲ အသေးစိတ် ပြောနိုင်မယ်လေ၊ လောလောဆယ်က ဘာဆွေးနွေးမလည်းဆိုတာ သူတို့ဘက်က ကျနော်တို့ အရင်နားထောင်ဖို့ လိုသေးတယ်လေ"

ကချင်ပြည်နယ်ပြည်သူ့ပါတီ KSPP က NLD ပါတီဘက်က ဒီရက်ပိုင်းအတွင်း တွေ့ဖို့ တရားဝင် အကြောင်းကြားတာ မရှိသေးပေမယ့် KSPP ကတော့ NLD ပါတီ ကိုယ်စားလှယ်တွေနဲ့ တွေ့ဆုံဖို့ KSPP နဲ့ မဟာမိတ်ဖွဲ့ထားတဲ့ ကရင်၊ မွန်၊ ချင်း၊ ကယား၊ ၀ စတဲ့ တိုင်းရင်းသားပါတီတွေနဲ့ ဆွေးနွေးသွားမယ်လို့ ဆိုပါတယ်။

ပင်လုံစာချုပ်အတိုင်း လက်တွေ့အကောင်အထည်ဖော်ရေးကို အဓိကထားပြီး‌ဆွေးနွေးမယ်လို့ ကချင်ပြည်နယ်ပြည့်သူပါတီ KSPP ပြောရေးဆိုခွင့်ရှိသူ ဦးကွမ်ဂေါင်အောင်ခမ်းက ပြောပါတယ်။

"ကျနော်တို့ ကချင်ပြည်နယ်ပြည့်သူပါတီအနေနဲ့ ၁၉၄၇ ပင်လုံစာချုပ်အပေါ်မှာဘဲ နောင်အနာဂတ်မှာ လုပ်သွားမယ်ကိစ္စကို ဆွေးနွေးသွားမယ်၊ လက်တွေ့ အကောင်ထည်ဖော်ဖို့ပဲ လိုပါတယ်၊ စကားနဲ့ပြောတာ၊ စာနဲ့ပြောတာထက် လက်တွေ့အကောင်ထည်ဖော်ဖို့ပဲ လိုတယ်ဆိုတာကို ပြောလိုပါတယ်"

ကချင်ပြည်နယ်ပြည်သူ့ပါတီ၊ ကယားပြည်နယ်ဒီမိုကရက်တစ်ပါတီ၊ ကရင်အမျိုးသားဒီမိုကရက်တစ်ပါတီ၊ ချင်းအမျိုးသားဒီမိုကရေစီအဖွဲ့ချုပ်၊ မွန်ညီညွတ်ရေးပါတီ နဲ့ ၀ အမျိုးသားပါတီတို့က မဟာမိတ်ဖွဲ့ထားတာ ဖြစ်ပါတယ်။

၂၀၂၀ ရွေးကောက်ပွဲပြီးနောက် အမျိုးသားဒီမိုကရေစီအဖွဲ့ချုပ် NLD ပါတီက တိုင်းရင်းသားလူမျိုးစုတွေရဲ့ ဆန္ဒတွေကို အလေးထား ဆောင်ရွက်မှာဖြစ်ပြီး တိုင်းရင်းသားပါတီတွေအနေနဲ့လည်း ဒီမိုကရေစီ ဖက်ဒရယ်ပြည်ထောင်စု တည်ဆောက်ရေးကို တက်တက်ကြွကြွ ပူးပေါင်းပါဝင်ကြလိမ့်မယ်လို့ မျှော်လင့်တယ်လို့ တိုင်းရင်းသား နိုင်ငံရေးပါတီ ၄၈ ပါတီကို အကြောင်းကြားခဲ့ပါတယ်။

ဒီလို တိုင်းရင်းသားတွေနဲ့ တွေ့ဆုံဖို့ ကမ်းလှမ်းခဲ့ရာမှာ ပါတီ ၁၂ ခုက အကြောင်းပြန်ခဲ့ပေမယ့် ရခိုင်အမျိုးသားပါတီ၊ ရှမ်းတိုင်းရင်းသားများဒီမိုကရေစီအဖွဲ့ချုပ်၊ မွန်ညီညွှတ်ရေးပါတီ စတဲ့ပါတီတွေကတော့ အကြောင်းပြန်ကြားတာမရှိခဲ့ပါဘူး။

ရခိုင်အမျိုးသားပါတီကတော့ တိုင်းရင်းသားပါတီတွေနဲ့ တွေ့ဆုံဖို့ဖွဲ့စည်းထားတဲ့ NLD ကိုယ်စားလှယ်အဖွဲ့နဲ့ တွေ့ဆုံဖို့ဆန္ဒရှိတယ်လို့ ပါတီ ဗဟိုအလုပ်မှုဆောင်အဖွဲ့ဝင် ဦးဖေသန်းကပြောပါတယ်။

"တိုင်းရင်းသားပါတီတွေ အနေနဲ့ကတော့ ကိုယ်ပြည်နယ်ထဲမှာဘဲ ပြည်နယ်အစိုးရမှာ ပါဝင်ခွင့်၊ ဖြစ်နိုင်ရင် ပြည်နယ်အကြီးကဲရပိုင်ခွင့်၊ ကိုယ်လွှတ်တော်ကို ထိန်းချုပ်ပိုင်ခွင့်၊ အဲဒါမျိုးကိုဘဲ ကျနော်တို့က လိုချင်ဆန္ဒ ရှိပါတယ်၊ ကိုယ်ပြည်နယ်ကံကြမ္မာကို စီမံခန့်ခွဲချင်တဲ့ ဆန္ဒတွေရှိတယ်၊ ဗဟိုအစိုးရရဲ့အောက်မှာ ညွှန်ကြားတိုင်းကို လိုက်လုပ်နေတဲ့ ပြည်နယ်အစိုးရမျိုး မဖြစ်စေချင်ဘူး၊ ဒါကြောင့် ကျနော်တို့က ကိုယ်ပြည်နယ်ကို ရည်ရွယ်တယ်"

ပြည်ထောင်စုအဆင့်မှာ ဝန်ကြီးနေရာပေးတာ၊ လွှတ်တော်မှာ နေရာပေးတာတွေဟာ တိုင်းရင်းသားပါတီတွေ အတွက် အရေးမကြီးဘူးလို့လည်း ဦးဖေသန်းက ပြောပါတယ်။ ပြီးခဲ့တဲ့၂၀၁၅ မှာလည်း ရခိုင်ပါတီက ပြည်နယ်အစိုးရကို ဦးဆောင်ဖွဲ့စည်းခွင့်ပေးဖို့ တောင်းဆိုခဲ့ပေမယ့် NLD ဘက်က မလိုက်လျောတာကြောင့် ရခိုင်အမျိုးသားပါတီက အတိုက်အခံအဖြစ် ရပ်တည်ခဲ့ပါတယ်။ လာမယ့် အစိုးရသက်တမ်းမှာလည်း NLD ပါတီနဲ့ ညှိနှိုင်းသွားမယ်လို့ ဦးဖေသန်းက ပြောပါတယ်။

ရှမ်းတိုင်းရင်းသားများဒီမိုကရေစီအဖွဲ့ချုပ် SNLD ကလည်း NLD ဘက်က တရားဝင်ဖိတ်လာရင် တွေ့ဆုံဆွေးနွေးဖို့ စီစဉ်ထားပါတယ်။

"ဖိတ်စာရောက်လာရင်တော့ တွေ့မှာပါဘဲ၊ ဘယ်လိုမှ မှတ်ချက်ပေးလို့မရသေးဘူး၊ ကျနော်တို့ဘက်ကတော့ တကယ်လို့ ဖိတ်ကြားလာမယ်ဆိုရင်တော့ ပြန်ဆွေးနွေးဖို့ တာဝန်ပေးထားတဲ့သူတွေရှိပါတယ်၊ ထွေထွေထူးထူး ပြင်ဆင်ထားတာမရှိဘဲ အထူးသဖြင့် နိုင်ငံရေးသဘောတူညီချက်ရအောင် အဲဒီ အပိုင်းတွေတော့ ရှိမယ်"

SNLD ဒုဥက္ကဋ္ဌ စိုင်းညွန့်လွင် ပြောသွားတာပါ။

NLD ကိုယ်စားလှယ်အဖွဲ့နဲ့တွေ့တဲ့အခါ ပြည်နယ်အစိုးရဦးဆောင်ပိုင်ခွင့်၊ ပြည်နယ်လွှတ်တော် ဦးဆောင်ခွင့်တွေကိစ္စ ဆွေးနွေးဖို့ရှိမလားလို့ မေးမြန်းရာမှာတော့ လောလောဆယ်မရှိသေးဘူးလို့ ဦးစိုင်းညွန့်လွင်ကပြောပါတယ်။

၂၀၁၅ ရွေးကောက်ပွဲနောက်ပိုင်း တိုင်းရင်းသားပါတီတွေနဲ့ NLD ဆက်ဆံရေး အလှမ်းဝေးသွားတယ်လို့ လေ့လာသူတွေက သုံးသပ်ခဲ့ကြပါတယ်။ ၂၀၂၀ ရွေးကောက်ပွဲအပြီး NLD ပါတီရဲ့ အခုလိုလုပ်ဆောင်ချက်တွေက ကောင်းမွန်တဲ့ ခြေလှမ်းဖြစ်ပြီး ကောင်းမွန်တဲ့ရလဒ် ထွက်စေချင်တယ်လို့ ဖက်ဒရယ် ဒီမိုကရက်တစ်အင်အားစုက ဦးမြအေးက တိုက်တွန်းပါတယ်။

"တိုင်းရင်းသားပါတီတွေကို သွားတွေ့မယ်၊ တွေ့ပြီးသဘောထားတွေ ကောက်ခံမယ်၊ တိုင်းရင်းသားတွေရဲ့ အသံတွေကို နားထောင်မယ် ဆိုတာကတော့ အခြေခံအားဖြင့်တော့ ကောင်းမွန်တဲ့ ပထမခြေလှမ်းလို့ ကျနော်မြင်တယ်၊ ပါတီတစ်ခုရဲ့သူကိုပေးလိုက်တဲ့ သူရဲ့တာဝန်ကိုလုပ်ပြီး ပါတီ CEC တင်ရမယ်ဆိုတာက ဒါကတော့ သူအလုပ်ဘဲလေ၊ သို့သော်လည်း ကျနော်တို့က ရလဒ်တစ်ခု ထွက်စေချင်တယ်၊ တိုင်းရင်းသားဒေသတွေမှာ တိုင်းရင်းသားတွေ ကိုယ်တိုင်ကိုယ်ကျ ဦးစီးဦးဆောင်ပြုလုပ်နိုင်တဲ့ အခြေအနေတစ်ခုကို NLD အစိုးရအနေနဲ့ ဖန်တီးပေးနိုင်ရင်တော့ အကောင်းဆုံးလို့မြင်တယ်၊ တစ်ဆင့်ခြင်း တစ်ဆင့်ခြင်း ဆွေးနွေးသွားရမယ်လို့ မြင်ပါတယ်"

တိုင်းရင်းသားပါတီတွေနဲ့ NLD ဟာ စစ်အစိုးရလက်ထက် တစ်လျှောက်လုံး အတူတကွ လက်တွဲလာခဲ့တဲ့ မဟာမိတ်တွေဖြစ်ပြီး NLD အစိုးရလက်ထက် ရောက်မှသာ တိုင်းရင်းသားပါတီတွေ၊ တိုင်းရင်းသားခေါင်းဆောင်တွေနဲ့ NLD အကြား သဘောထား ကွဲလွဲလာတာ၊ ဆက်ဆံရေးတွေ ဝေးသွားတာကြောင့် NLD အနေနဲ့ ပြန်လည်ကုစားဖို့ လိုတယ်လို့ ဦးမြအေးက အကြံပြုပါတယ်။

နိုင်ငံရေးလေ့လာသူ ဒေါက်တာရန်မျိုးသိမ်းကတော့ NLD ကိုယ်စားလှယ်အဖွဲ့ဟာ တိုင်းရင်းသားပါတီတွေရဲ့ ဆန္ဒသဘောထားတွေကို နားထောင်ရုံသက်သက် မဟုတ်ဘဲ ဆွေးနွေးဆုံးဖြတ်နိုင်မှသာ ထိရောက်မယ်လို့ ထောက်ပြပါတယ်။

"တိုင်းရင်းသားပါတီတွေ ဆွေးနွေးမယ့် ကိုယ်စားလှယ်အဖွဲ့ဟာ တိုင်းရင်းသားတွေ အသံနားထောင်ရုံ သက်သက်ဆိုရင်တော့ ထင်သလောက် အလုပ် မဖြစ်နိုင်ဘူးလို့ ကျနော်မြင်တယ်၊ တိုင်းရင်းသားပါတီတွေအနေနဲ့ အပြန်အလှန် ဆွေးနွေးတဲ့သဘောမျိုးကို ပိုပြီးတော့ လိုလားမယ်၊ နောက်ပြီးတော့ အာဏာရပါတီ ကိုယ်စားလှယ်တွေကလည်း တာဝန်ယူမှု တာဝန်ခံမှုရှိရှိနဲ့ အပြန်အလှန်ဆွေးနွေးနိုင်တဲ့ ပုဂ္ဂိုလ်တွေဖြစ်ဖို့လိုအပ်သလို တိုင်းရင်းသား ပါတီတွေ ဘက်က မေးမြန်းတဲ့မေးခွန်းတွေ တင်ပြချက်တွေကို အတိုင်းအတာတစ်ခုအထိ ဆုံးဖြတ်ပြီးတော့ ဆွေးနွေးနိုင်တဲ့ ပုဂ္ဂိုလ်မျိုးဖြစ်သင့်တယ်၊ အဲဒါမှာသာ ၂၀၂၁ အစိုးရဖွဲ့စည်းတဲ့ကိစ္စ မတိုင်ခင်မှာ အာဏာရပါတီနဲ့ တိုင်းရင်းသားပါတီတွေကြားမှာ ထိရောက်အလုပ်ဖြစ်မယ်လို့မြင်တယ်"

NLD ပါတီရဲ့ တိုင်းရင်းသားပါတီတွေနဲ့ တွေ့ဆုံမယ်ဆိုတဲ့ ကြေညာချက်ကို တိုင်းရင်းသားပါတီတွေ ဘက်ကတော့ သတိနဲ့ ကြိုဆိုခဲ့ကြပြီး ဒီမိုကရေစီနဲ့ ဖက်ဒရယ်ပြည်ထောင်စု တည်ဆောက်ရေး၊ ကိုယ်ပိုင်ပြဌာန်းခွင့်တွေ ရရှိရေးကို NLD ဘက်က ယေဘုယျ သဘောထုတ်ပြန်တာ မဟုတ်ဘဲ အမှန်တကယ်လက်တွေ့ ဖြစ်မြောက်အောင် အကောင်အထည် ဖော်စေချင်တဲ့ သဘောထားတွေ ရှိနေပါတယ်။


RFA Burmese

https://www.rfa.org/burmese/news/nld-meets-with-kachin-mon-parties-12292020053923.html

ကူးစက်မှုကျသွားတဲ့ ရန်ကုန်မှာ ကိုဗစ်စင်တာနှစ်ခု ယာယီပိတ်

 

ရန်ကုန်တိုင်းအတွင်း ကိုရိုနာဗိုင်းရပ်စ် ကူးစက်ခံရသူတွေ့ရှိနှုန်း ကျဆင်းလာတာကြောင့် ကုသရေးစင်တာတွေထဲက တောင်ဒဂုံ ယဉ်ကျေးမှုတက္ကသိုလ်က ကိုဗစ်စင်တာနဲ့ ရန်ကင်း ပညာရေးကောလိပ် ကိုဗစ်စင်တာတွေကို ယာယီပိတ်သိမ်းလိုက်တာလို့ ပြည်သူ့ကျန်းမာရေးဦးစီးဌာန ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာ ခင်ခင်ကြီးက ပြောပါတယ်။

"အသွားအလာ ကန့်သတ်ထားသူတွေရဲ့ ရာခိုင်နှုန်း အတော်များများကလည်း ရန်ကုန်က ဖြစ်ပါတယ်။ ပိုးတွေ့လူနာနည်းလာရင် ကွာရာတင်းဝင်တဲ့သူတွေ နည်းလာတာဖြစ်တဲ့အတွက် လက်ရှိကတော့ အသွားအလာ ကန့်သတ်စင်တာနှစ်ခုကတော့ စပြီးတော့ stan by ( ယာယီပိတ်သိမ်း ) အနေနဲ့ထားတယ်။ လိုအပ်ရင်သုံးဖို့အတွက်တော့ အဆင်သင့်ရှိနေအောင် လုပ်ထားတယ်။ အဓိကတော့ ရန်ကုန်ပဲ ဖြစ်တဲ့အတွက် ရန်ကုန် အသွားအလာ ကန့်သတ်စင်တာမှာ အစိုးရအစီအစဉ်နဲ့ အသွားအလာ ကန့်သတ်စောင့်ကြည့် ထားတဲ့ အကြီးနှစ်ခုကတော့ လောလောဆယ် ခဏမလိုအပ်သေးတဲ့အတွက် ယာယီအနေနဲ့ ပိတ်တာဖြစ်ပါတယ်။"

သက်ဆိုင်ရာ တိုင်းနဲ့ပြည်နယ်တွေမှာလည်း အသွားအလာ ကန့်သတ်ထားတဲ့သူရှိမရှိ အနည်းအများပေါ် မူတည်ပြီးတော့ သက်ဆိုင်ရာ တိုင်းနဲ့ပြည်နယ် ကိုဗစ်ကုသရေး ကော်မတီရဲ့ အစီအမံအတိုင်း အသွားအလာ ကန့်သတ်စောင့်ကြည့်မှု စင်တာ (Facility Quarantine) တွေ လျှော့တာတို့ ယာယီ လောလောဆယ် ပိတ်သိမ်းတာတို့ ဆောင်ရွက်သွားမှာဖြစ်တယ်လို့ ဒေါက်တာ ခင်ခင်ကြီးက ပြောပါတယ်။  

ရောဂါ ထိန်းချုပ်လာနိုင်တာနဲ့အမျှ ကိုဗစ်စင်တာတွေရဲ့လုပ်အား စေတနာ့ဝန်ထမ်းအင်အားနဲ့ ငွေအားတွေကို ဖြည်းဖြည်းချင်း လျှော့သွားမယ့် သဘောဖြစ်တယ်လို့ ဒေါက်တာ ခင်ခင်ကြီးက ပြောပါတယ်။

မြန်မာတစ်နိုင်ငံလုံး အတိုင်းအတာနဲ့ ဖွင့်ထားတဲ့ ကိုဗစ်စင်တာ စုစုပေါင်း ၆၇၀၀ ခန့်ရှိပြီး ကိုဗစ်စင်တာမှာရှိတဲ့ အသွားအလာ ကန့်သတ် ခံထားရသူတွေကလည်း ခြောက်သောင်းခွဲခန့်ရှိပါတယ်။ ပိုးတွေ့လူနာတွေရဲ့ တစ်ဝက်ခန့်က ရန်ကုန်ကဖြစ်ပြီး သေဆုံးမှုရဲ့ ၈၉ ရာခိုင်နှုန်းကလည်း ရန်ကုန်က ဖြစ်နေတာပါ။

ရန်ကုန်မှာ ကျန်းမာရေးနဲ့ အားကစားဝန်ကြီးဌာန လက်အောက်ကနေ ကုသရေးစင်တာ အနေနဲ့က ဖောင်ကြီးကိုဗစ်ကုသရေးစင်တာ ရှိပါတယ်။ ကျန်တဲ့ ဧရာဝတီစင်တာ၊ ရိုးမအိမ်ယာ၊ အောင်မြင့်မိုရ်နဲ့ အင်းလျားလိတ်စင်တာ စတာတွေကတော့ သက်ဆိုင်ရာ လုပ်ငန်းရှင် တွေနဲ့ စေတနာရှင်တွေက ဝိုင်းဝန်းလုပ်ဆောင်ပေးတဲ့ စင်တာတွေပါ။ ရန်ကုန်တိုင်းမှာ ကိုဗစ်ကုသရေးစင်တာ ၁၄ ခုရှိတဲ့ထဲက နှစ်ခုကို ပိတ်လိုက်တာဖြစ်ပါတယ်။

ဒီဇင်ဘာ ၁၉ ရက်နေ့က စတင်ပြီး တစ်နိုင်ငံလုံးအတိုင်းအတာနဲ့ ပိုးတွေ့လူနာ တွေ့ရှိမှုနှုန်းက တပတ်ကျော်အတွင်း ၄ ရာခိုင်နှုန်းအောက် ကို ကျဆင်းလာပါတယ်။ ပိုးကူးစက်မှု ကျဆင်းသွားတာဟာ ပြည်သူတွေ စည်းကမ်းလိုက်နာမှုအားကောင်းလာတာကြောင့်ဖြစ်နိုင် ကြောင်း သင်္ဃန်းကျွန်းမြို့နယ် ကိုဗစ်ကာကွယ်ရေး၊ ကုသရေးနှင့် ထိန်းချုပ်ရေးကော်မတီဝင် ဒေါက်တာ ကျော်စွာဦးက ပြောပါတယ်။

ရန်ကုန်တိုင်းအတွင်းမှာလည်း ပိုးတွေ့ရှိနှုန်းက တဖြည်းဖြည်း ကျဆင်းလာပြီး ပိုးတွေ့လူနာ ၄၀၀ အောက်ကို ရောက်လာတဲ့အတွက် တဖြည်းဖြည်း ထိန်းချုပ်လာနိုင်တဲ့ အနေအထား တွေ့နေရတယ်လို့ ဒေါက်တာ ကျော်စွာဦးက ပြောပါတယ်။

 "ထိန်းချုပ်လာနိုင်တဲ့ မျှော်လင့်ချက်လေး တစ်ခုလို့ ကျွန်တော်ကတော့ မြင်ပါတယ်။ ရန်ကုန်တိုင်းတင်မကဘူး။ အဖြစ်များခဲ့တဲ့ မန္တလေးတိုင်းတို့ ဧရာဝတီတိုင်းတို့ ပဲခူးတိုင်းတို့ စသဖြင့် ရခိုင်ပြည်နယ်မှာဆိုရင် တော်တော်များများ မတွေ့သလောက်ကို နည်းလာ ပြီ။ တစ်နိုင်ငံလုံး အတိုင်းအတာမှာ တွေ့ရှိမှုကတော့ လျော့တော့လျော့လာတယ်။ ဒါကိုတော့ မပေါ့ဆဘဲ သက်ဆိုင်ရာ တာဝန်ရှိ သူတွေ ဆရာဝန်ကြီးတွေက ထိန်းချုပ်တဲ့ဟာနဲ့ လျှော့သင့်တာလျှော့ တင်းသင့်တာ တင်းပြီးတော့ သွားမယ့် သဘောမှာရှိတယ်လို့ ထင်မြင်ယူဆပါတယ်။ “

လူနာသစ်တွေ့ရှိမှု ကျဆင်းလာတာဟာ ရောဂါတားဆီးမှု ထိန်းချုပ်နိုင်သွားတာ မဟုတ်သေးဘဲ လျော့လာတာမျိုးဖြစ်တဲ့အတွက် ပေါ့ဆလို့တော့ မရသေးဘူးလို့ ရန်ကုန်တိုင်း လူမှုကူညီကယ်ဆယ်ရေးအဖွဲ့ ဥက္ကဋ္ဌ ဦးထွန်းထွန်းဦးက ဆိုပါတယ်။

“ အခုကကျဆင်းသွားတယ်လို့ ပြောလို့ရပေမယ့် စိတ်ချရတဲ့ အနေအထားမဟုတ်သေးဘူး။ အရင်ကတော့ တိုက်ခန်းနေ လူတန်း စားတွေမှာ တွေ့ရတာများတယ်။ အခုနောက်ပိုင်းမှာ အခြေခံလူတန်းစားတွေမှာ တွေ့ရတာ ပိုများတယ်။ ဥပမာ - စက်ရုံဝန်ထမ်း၊ သူတို့မိသားစု၊ ရန်ကုန်မြို့ အစွန်အဖျားမှာရှိတဲ့ မြို့နယ်တွေမှာ ဖြစ်တာပိုများတယ်။ အဓိကကတော့ အခြေခံလူတန်းစားတွေမှာ ဖြစ်တာ ပိုများတယ်လို့ ပြောလို့ရတယ်။ အိမ်ထဲမှာ ကျဉ်းကျဉ်းကျပ်ကျပ်မှာ အခန်းနဲ့မတန်တဲ့ လူဦးရေ နေရတာမျိုးတွေက အဖြစ်များတာ ရှိတယ်။ “

ကိုရိုနာဗိုင်းရပ်စ် ကူးစက်ပြန့်ပွားမှုကို ရန်ကုန်တိုင်းအပြင် တခြား တိုင်းနဲ့ပြည်နယ်တွေမှာလည်း ထိန်းချုပ်လာနိုင်တာ တွေ့ရပါတယ်။ ကျန်းမာရေးဝန်ကြီးဌာနက ဒီဇင်ဘာ  ၂၈  ရက် မနေ့ကညပိုင်းမှာ ကိုရိုနာဗိုင်းရပ်စ် ကူးစက်ခံရတဲ့ ထပ်တိုးလူနာ ၆၄၈ ဦး၊ သေဆုံးလူနာ ၁၇ ဦးရှိပြီလို့ ထုတ်ပြန်တာကြောင့် မြန်မာနိုင်ငံမှာ COVID-19 ကမ္ဘာ့ကပ်ရောဂါကူးစက်ခံရသူ တစ်သိန်းနှစ်သောင်းကျော်လာပါပြီ။

လက်ရှိအချိန်မှာ ရောဂါထိန်းချုပ် ကုသရေးပိုင်းမှာ နိုင်နိုင်နင်းနင်းရှိနေတာကြောင့် ရောဂါရှိသူတွေကို သူတို့နေအိမ်မှာပဲထားရှိတာ ကတော့ ဆောင်ရွက်ဖို့ မလိုသေးဘူးလို့ ကိုဗစ် ၁၉ ကာကွယ်ထိန်းချုပ်ကုသရေး ပေါင်းစပ်ညှိနှိုင်းရေးကော်မတီ ဒုဥက္ကဋ္ဌ ပါမောက္ခ ဒေါက်တာဇော်ဝေစိုးက ဒီဇင်ဘာ ၂၄ ရက်မှာ ပြောခဲ့ပါတယ်။ မကြာခင်မှာ ရောက်ရှိမယ့် နှစ်သစ်ကူးညကိုလည်း ကိုဗစ် ကန့်သတ် ချက်နဲ့အညီ ဆင်နွှဲကြဖို့  ကျန်းမာရေးဆိုင်ရာ ဆောင်ရွက်နေသူတွေက သတိပေးနေကြပါတယ်။


RFA Burmese

https://www.rfa.org/burmese/news/two-covid-center-closed-in-ygn-12292020042519.html

မြန်မာကိုဗစ် ဓါတ်ခွဲအတည်ပြုစုစုပေါင်း ၁၂၃,၁၅၃ ဦး၊ သေဆုံး ၂,၆၃၇ ဦး

မြောက်ဥက္ကလာပပြည်သူ့ဆေးရုံကြီး၊ ကိုဗစ်-၁၉ ရောဂါအထူးကြပ်မတ်ကုသဆောင် (ICU) က ကိုဗစ်လူနာများကို ကုသပေးနေတဲ့ ကျန်းမာရေးဝန်ထမ်းများ။ (ဓာတ်ပုံ - Ministry of Health and Sports, Myanmar - ဒီဇင်ဘာ ၂၄၊ ၂၀၂၀)

မြန်မာနိုင်ငံမှာ ဒီကနေ့ ကိုရိုနာဗိုင်းရပ်စ်ပိုးကူးစက်သူ ၆၁၉ ယောက်ထပ်ပြီး အတည်ပြုလိုက်တဲ့အတွက်အခုထိ ကူးစက်သူ စုစုပေါင်း ၁၂၃,၁၅၃ ယောက်ရှိပြီ ဖြစ်ပါတယ်။ ပြီးခဲ့တဲ့ ၂၄ နာရီအတွင်း COVID - 19 ကြောင့် သေဆုံးသူက ၁၉ ယောက်ရှိတာကြောင့် အခုထိသေဆုံးသူ စုစုပေါင်း ၂,၆၃၇ ယောက်ရှိပြီဖြစ်ပါတယ်။ သေဆုံးသူ ၁၉ ယောက်မှာ ရောဂါအခံရှိသူ ၁၁ ယောက်ရှိတယ်လို့ ကျန်းမာရေးနဲ့ အားကစားဝန်ကြီးဌာန ကြေညာချက်မှာဖော်ပြထားပါတယ်။

ဒီဇင်ဘာလ ၂၉ ရက်နေ့အတွက် ဓာတ်ခွဲနာမူနာပေါင်း ၁၈,၀၉၈ ခု စစ်ဆေးခဲ့တာဖြစ်ပြီး ပြီးခဲ့တဲ့မတ်လကနေ အခုထိ ဓာတ်ခွဲနာမူနာပေါင်း ၁.၇ သန်းကျော် စစ်ဆေးပြီးခဲ့ပြီဖြစ်ပါတယ်။ အတည်ပြုလူနာတွေထဲ ပြန်ပြီးကျန်းမာလာသူက ၁၀၅,၂၇၉ ယောက်ရှိပါတယ်။

ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားတဲ့ စာရင်းတွေအရ ရန်ကုန်တိုင်းအတွင်း ကူးစက်မှုနှုန်း အများဆုံးဖြစ်နေပြီး မန္တလေးတိုင်းက ကူးစက်မှုနှုန်း ဒုတိယနေရာမှာရှိပါတယ်။

ကမ္ဘာ့ကျန်းမာရေးအဖွဲ့ WHO ရဲ့ ဒီဇင်ဘာလ ၂၈ ရက်နေ့ထုတ်ပြန်ချက်မှာတော့ ကမ္ဘာ့နိုင်ငံ အသီးသီးရဲ့COVID - 19 ရောဂါဖြစ်ပွါး သေဆုံးမှု စာရင်းမှာ မြန်မာနိုင်ငံက အဆင့် ၆၈ နေရာမှာရှိပါတယ်။ အရှေ့တောင်အာရှမှာ ကူးစက်မှုနှုန်း အများဆုံးဖြစ်တဲ့ အင်ဒိုနီးရှားက အဆင့် ၂၀ မှာရှိပါတယ်။

ကပ်ရောဂါကြောင့် မတ်လကတည်းက ပျံသန်းခွင့်ပိတ်ထားတဲ့ ပြည်ပခရီးစဉ်တွေကို လာမယ့် ၂၀၂၁ ခုနှစ်၊ နှစ်ဆန်းကစပြီး ပြန်လည်ခွင့်ပြုဖို့ တာဝန်ရှိသူတွေ ပြင်ဆင်နေပြီလည်း ဖြစ်ပါတယ်။ ပြည်ပလေကြောင်းခရီးစဉ်တွေနဲ့ လိုက်ပါမယ့်သူတွေအတွက် ကျန်းမာရေး လမ်းညွှန်ချက်တွေကို မကြာခင်ထုတ်ပြန်ပေးမှာဖြစ်ကြောင်း ကျန်းမာရေးနဲ့ အားကစားဝန်ကြီးဌာနက သတင်းထုတ်ပြန်ထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-covid-cases/5717259.html

ဒေသတွင်း ၄ နိုင်ငံနဲ့ နိုင်ငံတကာလေကြောင်းခရီးစဉ် ပြန်စမည်

ရန်ကုန်မြို့ရှိ အပြည်ပြည်ဆိုင်ရာလေဆိပ်မှာ တွေ့ရတဲ့ လေယာဉ်တစီး။ (ဓာတ်ပုံ - Myanmar Airways International)

မြန်မာနိုင်ငံမှာ ကိုဗစ်ကပ်ရောဂါကူးစက်မှုတွေကို ထိန်းချုပ်ဖို့ လနဲ့ချီ ပိတ်ထားတဲ့ ပြည်ပလေကြောင်းခရီးစဉ်တွေကို မကြာခင်ပြန်လည် ခွင့်ပြုတဲ့အခါ နိုင်ငံ ၄ နိုင်ငံနဲ့ စတင်ဖို့ ပြင်ဆင်နေတဲ့အကြောင်းကို ဗွီအိုအေမြန်မာပိုင်း သတင်းထောက် မမေခက ပြောပြပါမယ်။

ကပ်ရောဂါကြောင့် မတ်လကစလို့ ပျံသန်းခွင့်ပိတ်ထားတဲ့ ပြည်ပခရီးစဉ်တွေကို လာမယ့်နှစ်ဆန်းကစလို့ ပြန်လည်ခွင့်ပြုဖို့ မြန်မာအစိုးရ တာဝန်ရှိသူတွေ ပြင်ဆင်နေတာ ဖြစ်ပါတယ်။ ကပ်ရောဂါကာကွယ်ရေး စည်းမျဉ်းတွေနဲ့အညီ ပြန်လည်ခွင့်ပြုရာမှာ ဒေသတွင်း ၄ နိုင်ငံနဲ့ စတင်ဖို့ စီစဉ်ထားကြောင်းလည်း ပို့ဆောင်ရေးနဲ့ ဆက်သွယ်ရေးဝန်ကြီးဌာန ဒုတိယအမြဲတမ်းအတွင်းဝန် ဦးမျိုးမင်းဦးက ဗွီအိုအေကို ပြောပါတယ်။

"တရုတ်ရယ်၊ ဂျပန်ရယ်၊ ကိုရီးယား၊ စင်္ကာပူရယ် ပြေးဆွဲဖို့ကြိုတင်ပြင်ဆင်တာက international ဆွဲဖို့ကို သက်ဆိုင်ရာဝန်ကြီးဌာနတွေ အကုန်လုံးနဲ့ ညှိပြီးတော့ လက်ရှိက လုပ်နေကြတုန်း ရှိတယ်။ SOP မူကြမ်းထွက်လို့ ဗဟိုကော်မတီတင်လို့ တင်ပြီးရင် ဗဟိုကော်မတီက ခွင့်ပြုရင်တော့ လာမယ့် ၁ ရက်နေ့ဆွဲနိုင်မှာပေါ့။ ကျနော်တို့ကတော့ခုက ၁ ရက်နေ့က စနိုင်ပါ့မလားပေါ့... ကျနော့်အထင်ပါ။ SOP က ခုမှလုပ်နေကြတုန်းရှိသေးတယ်။"

ပြည်ပလေကြောင်းခရီးစဉ်တွေနဲ့ လိုက်ပါမယ့်သူတွေအတွက် ကျန်းမာရေး လမ်းညွှန်ချက်တွေကို မကြာခင်ထုတ်ပြန်ပေးမှာဖြစ်ကြောင်းလည်း ကျန်းမာရေးနဲ့ အားကစားဝန်ကြီးဌာနက သတင်းထုတ်ပြန်ထားပါတယ်။

ကပ်ရောဂါကြောင့် အထိနာခဲ့ရတဲ့ လေကြောင်းလုပ်ငန်းတွေ အပါအဝင် ခရီးသွား လုပ်ငန်းတွေကို ပြန်လည်နာလန်ထူလာအောင် စီစဉ်နေတယ်လို့လည်း တာဝန်ရှိသူတွေက ပြောပါတယ်။ နိုင်ငံတကာ လေကြောင်းခရီးစဉ်တွေ ပြန်လည်ခွင့်ပြုတဲ့ တချိန်တည်းမှာပဲ ဟိုတယ်နဲ့ ခရီးသွားလုပ်ငန်းတွေကိုပါ ပြန်လည်အားကောင်းလာအောင် စီစဉ်နေတယ်လို့လည်း ဟိုတယ်နဲ့ ခရီးသွားလုပ်ငန်း ဝန်ကြီးဌာန၊ ဒုတိယညွှန်ကြားရေးမှူးချုပ် ဦးအောင်အေးဟန် က ဗွီအိုအေကို ပြောပါတယ်။

"ခရီးသွားဧည့်သည်တွေအားလုံး ကျန်းမာရေးအရ ဘေးကင်းလုံခြုံမှုရှိတဲ့ ခရီးသွား လုပ်ငန်းဖြစ်အောင်လို့ ကျနော်တို့ ရည်ရွယ်ပြီးတော့မှ လုပ်ဆောင်ခဲ့တာဖြစ်ပါတယ်။ ဒီနေရာမှာ ဘာတွေအကျံုးဝင်မလဲဆိုတာကတော့ စားသောက်ဆိုင်လုပ်ငန်းတွေ၊ ဟော်တယ်လုပ်ငန်းတွေ၊ ပို့ဆောင်ရေးလုပ်ငန်းတွေ၊ လက်ဆောင်ပစ္စည်းအရောင်းဆိုင်တွေ၊ ခရီးသွားလုပ်ငန်းနဲ့ ဆက်စပ်တဲ့နေရာတွေမှာရှိတဲ့ လူတွေကို ဘေးကင်းလုံခြံုမှုရှိတဲ့ ဝန်ဆောင်မှု ပေးနိုင်အောင်လို့ လေ့ကျင့်သင်ကြားပေးသွားမှာ ဖြစ်ပါတယ်။ ပြည်နယ်နဲ့တိုင်းတခုစီကနေ နှစ်ယောက်စီ ရွေးလိုက်ပါတယ်။ ဒီလူတွေကနေတဆင့် ပြီးတော့မှ သက်ဆိုင်ရာ လုပ်ငန်းနယ်ပယ်တွေမှာ ရှိတဲ့ ဝန်ထမ်းတွေကို လေ့ကျင့်သင်ကြားပေးဖို့ ဆောင်ရွက်နေတာ ဖြစ်ပါတယ်။ ဒီလို ခရီးသွားလုပ်ငန်ကော်မတီတွေ ရှိပါတယ် ခင်ဗျာ။ ပြည်နယ်နဲ့ တိုင်းတွေကနေပြီးတော့မှ စစ်ဆေးပြီးတော့မှ အားလုံးကို ဖွင့်လှစ်ခွင့် ပြုသွားမှာဖြစ်ပါတယ်။ ဒီအတွက်ကိုလည်း ကျနော်တို့က tourism national guidelines ဆိုပြီးတော့ ထုတ်ပြန်ကြေငြာထားတာတွေရှိပါတယ်။ ဒီ national guideline နဲ့ အညီ စီမံဆောင်ရွက်ထားသော လုပ်ငန်းတွေကို ဖွင့်လှစ်ခွင့်ပြုဖို့အတွက်ကို ဒေသအလိုက် ဆောင်ရွက်မှာ ဖြစ်ပါတယ်။"

ကပ်ရောဂါ တကျော့ပြန် ကူးစက်မှုတွေ ကြုံရပြီးနောက် မြန်မာနိုင်ငံမှာ ပြည်တွင်းလေကြောင်း ခရီးစဉ်တွေကိုလည်း စက်တင်ဘာကစလို့ ပိတ်ခဲ့ရပေမဲ့ ၃ လအကြာ ဒီလထဲမှာပဲ ပြန်ဖွင့်ပေးခဲ့ပါတယ်။

မြန်မာနိုင်ငံမှာ နိုင်ငံတကာ လေကြောင်းလိုင်းတွေက ရရှိတဲ့ ဝင်ငွေဟာ ပြီးခဲ့တဲ့နှစ်ထဲ အမေရိကန်ဒေါ်လာ သန်း ၉၀၀ ကျော် ရှိခဲ့ပေမဲ့ ဒီနှစ်မှာတော့ ကပ်ရောဂါကြုံခဲ့ရတာကြောင့် ၁၇၃ သန်းကျော်သာ ရှိခဲ့တဲ့အတွက် ၈၀ ရာခိုင်နှုန်းကျော် ကျဆင်းသွားခဲ့ကြောင်းလည်း မြန်မာနိုင်ငံ ဟိုတယ်နဲ့ ခရီးသွားလုပ်ငန်း ဝန်ကြီးဌာနက COVID-19 ကြောင့် မြန်မာ့ခရီးသွားလုပ်ငန်းအပေါ် သက်ရောက်မှု စစ်တမ်းမှာ ဖော်ပြထားပါတယ်။ 


ေမခ/VOA (Burmese)

https://burmese.voanews.com/a/myanmar-international-flight/5717029.html

မြန်မာတသိန်းကျော် နေထိုင်တဲ့ ထိုင်းနိုင်ငံ မဲဆောက်မြို့ကို အဝင်အထွက်ပိတ်ပင်

မြန်မာတသိန်းကျော် နေထိုင်တဲ့ ထိုင်းနိုင်ငံ မဲဆောက်မြို့ကို အဝင်အထွက်ပိတ်ပင် မဲဆောက်မြို့ ထုံထောင်းရပ်ကွက်မှာ အသွားအလာကန့်သတ်ထားတဲ့နေရာကို တွေ့ရစဉ်

မြန်မာရွှေ့ပြောင်းလုပ်သား ၁ သိန်းကျော် နေထိုင်နေတဲ့ ကရင်ပြည်နယ် မြဝတီမြို့ တဖက်ကမ်းက တာ့ခ်ခရိုင် မဲဆောက်မြို့ကို ဒီဇင်ဘာလ ၂၉ ရက်နေ့ကစပြီး အဝင်အထွက် ပိတ်ပင်လိုက်တယ်လို့ ထိုင်းအာဏာပိုင်တွေက အမိန့်ထုတ်ပြန်လိုက်ပါတယ်။ မဲဆောက်မြို့ အပါအဝင် တာ့ခ် ခရိုင်အတွင်း ခရီးသွားလာမှုတွေကို ပိတ်ပင်ထားပြီး ဒီကန့်သတ်ချက်တွေကို မလိုက်နာသူတွေဟာ ဒဏ်ငွေအဖြစ် ထိုင်းဘတ်ငွေ လေးသောင်း ဒါမှမဟုတ် ထောင်ဒဏ် ၂ နှစ် ဒါမှမဟုတ် ၂ မျိုးလုံး ကျခံရမှာ ဖြစ်တယ်လို့ ဆိုပါတယ်။

ကိုဗစ်-၁၉ ရောဂါ ကူးစက်ပြန့်ပွားမှု ထိန်းချုပ်တဲ့အနေနဲ့ ခရိုင်အုပ်ချုပ်ရေးမှူးက အခုလို ကန့်သတ်မှုတွေ ထုတ်ပြန်လိုက်တာလို့ မဲဆောက်မြို့ မြန်မာပြည်သားအရေး ပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးက ပြောပါတယ်။

"ဒီနေ့ ဒီဇင်ဘာလ ၂၉ ရက်နေ့ကစပြီးတော့ ထိုင်း-မြန်မာနယ်စပ် မဲဆောက်မြို့က မဲဆောက်အပါအဝင် တာ့ခ် ခရိုင်အတွင်းမှာ နေထိုင်ကြတဲ့ ထိုင်းရော မြန်မာရော၊ အားလုံးသော လူတွေက တာ့ခ်ခရိုင် အုပ်ချုပ်ရေး အမိန့်နဲ့ ခရိုင်နယ်မြေကို ပိတ်ဆို့လိုက်ပါတယ်။ အချိန်နဲ့တပြေးညီ ကာကွယ်ထိန်းချုပ်မှုတွေ ပြုလုပ်မယ်ဆိုတော့ အခု လိုအပ်ချက် ရှိလာလို့ပေါ့။ ထိုင်း-မြန်မာနယ်စပ်အနေနဲ့ ဟိုတလော ရက်ပိုင်းအတွင်းမှာဘဲ အမှတ် ၃ စစ်တိုင်းမှူး ကွင်းဆင်းကြည့်ရှုတယ်လေ။ လုံခြုံရေးဆိုင်ရာ၊ ကျန်းမာရေးဆိုင်ရာ အကုန်သုံးသပ်ပြီးတော့မှ အခုလို လော့ဒ်ဒေါင်းချလိုက်တာ ဖြစ်တယ်”

ဒီအမိန့်ထုတ်ပြန်ချက်အရ အငှားယာဉ်မောင်းနှင်မှုတွေ အားလုံး ရပ်နားထားရမှာ ဖြစ်သလို လူ ၂၀ ထက် ပိုမစုရ၊ စားသောက်ဆိုင်မှာ မစားရဆိုတဲ့ အချက်တွေ ပါဝင်ပါတယ်။ ဈေးတွေကိုလည်း သတ်မှတ်ထားတဲ့ ရက်တွေမှာပဲ အလှည့်ကျ ဖွင့်ရမှာဖြစ်ပါတယ်။ ဒီအသွားအလာ ကန့်သတ်မှုဟာ လာမယ့်၂၀၂၁ ခုနှစ် ဇန်နဝါရီလ ၃ ရက်နေ့ထိ ကနဦး အကျုံးဝင်မှာ ဖြစ်ပါတယ်။

မဲဆောက်မြို့မှာ မကြာသေးခင်က မြန်မာယာဉ်မောင်း ၄ ဦးနဲ့ ထိုင်း တဦးမှာ ကိုဗစ်ရောဂါပိုး ကူးစက်ခံရတာ ပထမဆုံးတွေ့ရခဲ့ပြီး အခုဆိုရင် လူ ၄၀ ကနေ ၅၀ ကြား ကိုဗစ်ရောဂါပိုး ကူးစက်ခံထားရတယ်လို့ ဦးမိုးကြိုးက ပြောပါတယ်။

ဒါကြောင့် ထိုင်းနိုင်ငံရောက် မြန်မာရွှေ့ပြောင်းလုပ်သားတွေ နေရပ်ပြန်ရေးကိုလည်း ဒီဇင်ဘာလ ၂၉ ရက်နေ့ ကစပြီး ၂၀၂၁ ခုနှစ် ဇန်နဝါရီလ ၃ ရက်နေ့ထိ ရပ်ဆိုင်းထားမှာ ဖြစ်တယ်လို့ သူက ပြောပါတယ်။ ထိုင်းနိုင်ငံမှာ တာ့ခ်ခရိုင် မဲဆောက်မြို့ဟာ အသွားအလာ ကန့်သတ်ဖို့ အမိန့်ထုတ်လိုက်တဲ့ ဒုတိယနေရာဖြစ်ပြီး ပထမဆုံး အသွားအလာ ကန့်သတ်လိုက်တာကတော့ စမွတ်ဆာခွန်ခရိုင် ဖြစ်ပါတယ်။

အဲဒီ စမွတ်ဆာခွန်ခရိုင်၊ မဟာချိုင်မှာ ကိုဗစ်-၁၉ ရောဂါ ဒုတိယလှိုင်းကာလအတွင်း ရောဂါပိုးရှိသူ တထောင် ကျော်ရှိခဲ့ပြီး အဲဒီအထဲမှာ မြန်မာရွှေ့ပြောင်းလုပ်သားတွေ အများဆုံး ပါဝင်ခဲ့ပါတယ်။ ပိုးကူးစက်ခံရတဲ့ မြန်မာရွှေ့ပြောင်း လုပ်သား ငါးရာကျော် ပြန်လည်သက်သာလာပြီလို့ ကျန်းမာရေးဝန်ကြီးက ဒီဇင်ဘာလ ၂၈ ရက် နေ့က ထိုင်းဒေသတွင်း သတင်းထောက်တွေကို ပြောဆိုခဲ့ပါတယ်။ ဒီရောဂါ ပျောက်ကင်းသွားသူတွေကို ရောဂါပျောက်ကင်းကြောင်း ထောက်ခံစာတွေ ထုတ်ပေးသွားမှာ ဖြစ်တယ်လို့လည်း ထည့်သွင်း ပြောဆိုထားပါတယ်။

ထိုင်းကျန်းမာရေးဝန်ကြီးဌာနက ရွှေ့ပြောင်းလုပ်သားတွေ ငါးရာလောက် ရောဂါပျောက်ကင်းပြီ ဆိုပေမယ့် ရွှေ့ပြောင်းလုပ်သားတွေရဲ့ ကျန်းမာရေး အခြေအနေကို အသေးစိတ် မသိရဘူးလို့ မဟာချိုင်မြို့က ရွှေ့ပြောင်းအလုပ်သမား အခွင့်အရေးကွန်ရက် (MWRN)က ဦးအောင်ကျော်က ပြောပါတယ်။

“မနေ့က ကျန်းမာရေးဝန်ကြီးဌာနကတော့ ကူးစက်ခံထားရတဲ့ ရွှေ့ပြောင်းအလုပ်သမားတွေထဲက လူ ငါးရာ လောက်က ကျန်းမာရေး ကောင်းမွန်သွားပြီလို့ ကြေညာလိုက်တယ်။ နောက်ပိုင်းကာလထဲက မြင့်တက် နေတာက ဒီလော့ဒ်ဒေါင်းချထားတဲ့ ဧရိယာထဲမှာပဲ စားဆေးလေးတွေ ပေးပြီးထားထားတာ။ သူတို့ အခြေအနေကောင်းတာကို စိတ်ဝင်စားနေတာ။ သို့သော် မနေ့ကလည်း မြန်မာသံရုံးက သံမှူးကြီးနဲ့ စကားပြောဖြစ်တယ်။ ကလေးတွေအတွက် ကျန်းမာရေးကောင်းတယ်လို့ ပြောကြတယ်။ နောက်တော်တော် များများပြောတာက ရွှေ့ပြောင်း အလုပ်သမားတွေက အသက် အရွယ်အပိုင်းအခြားအားဖြင့် ငယ်ရွယ်နုပျိုတဲ့ အပိုင်းဆိုတော့ ကြားခဲ့ရတယ်။ ဘယ်လောက်ထိ ကျန်းမာရေး အခြေအနေကောင်းတယ်ဆိုတာက အတိအကျတော့ မသိနိုင်ဘူးပေါ့နော်”

မဟာချိုင်က ရွှေ့ပြောင်းလုပ်သား ကိုထွန်းဝင်းအောင်ကလည်း ရောဂါပိုးရှိသူနဲ့ မရှိသူ အတူထားတာ ဖြစ်လို့ ဘယ်သူတွေက ပျောက်ကင်းသွားတယ်ဆိုတာ မသိဘူးလို့ ပြောပါတယ်။

“ရွှေ့ပြောင်းလုပ်သား အယောက်ငါးရာက ရောဂါပျောက်ကင်းသွားပြီလို့ ပြောတယ်။ အဲဒီရောဂါ ပျောက်ကင်းသွားတဲ့ ငါးရာအတွက်ကိုလည်း အပြင်သွားခွင့်ရဖို့ စာရွက် ထုတ်ပေးမယ်လို့ ပြောထားပါတယ်။ အဲဒီငါးရာက ဘယ်ကဆိုတာလည်း ကျနော်တို့ကို တိတိကျကျအတိက ပြောထားတာမရှိဘူး။ မနေ့က လူ ၁၁ ယောက်ကို တော့ ကျန်းမာရေး ထောက်ခံစာ လာပေးသွားတယ်။ ဒါပေမဲ့ ကျန်တဲ့လူတွေက ဘယ်သူတွေက မသိရသေးဘူး ။ ဘယ်သူတွေက ရောဂါရှိပြီးတော့ ဘယ်သူတွေက ပျောက်ကင်းတယ် ဆိုတာကို မရှိသေးဘူး။ အကုန်လုံးကတော့ ဒီတလန်ကွန့်ဈေးထဲမှာပဲ အတူနေနေကြတယ်”

ဒီဇင်ဘာလ ၂၉ ရက်နေ့မှာလည်း မဟာချိုင်မြို့ က ပုဇွန်ဈေးအနီးတဝိုက်က ရွှေ့ပြောင်းလုပ်သားတွေကို ကိုဗစ်-၁၉ ရောဂါပိုး ရှိမရှိ စစ်ဆေးသလို၊ စစ်ပြီးသား လူတွေ ကိုလည်း ဒုတိယတကြိမ် စစ်ဆေးပေးပါတယ်။ ပိုးမတွေ့ဘူးဆိုရင် အပြင်ထွက်ခွင့် ကျန်းမာရေးအာမခံလက်မှတ် ထုတ်ပေးမယ်လို့ ပြောတယ်လို့ ကိုထွန်းဝင်း အောင်က ပြောပါတယ်။

ထိုင်းနိုင်ငံမှာ ခရိုင်ပေါင်း ၇၇ ခုထဲက ခရိုင် ၄၀ ကျော်မှာ ကိုဗစ် ၁၉ ရောဂါပိုး ကူးစက်ပျံ့နှံ့နေပြီး ဒီဇင်ဘာလ ၂၉ ရက်နေ့မှာ ကိုဗစ်ရောဂါပိုးတွေ့ရှိသူ လူနာသစ် ၁၅၅ ဦးရှိပါတယ်။ အဲဒီထဲက ၁၃၅ ဦးက ပြည်တွင်း ကူးစက်မှုဖြစ်ပြီး အဲဒီအထဲမှာ ရွှေ့ပြောင်းလုပ်သား ၁၁ ဦး ပါဝင်ပါတယ်။


RFA Burmese

https://www.rfa.org/burmese/news/maesot-lockdown-12292020091418.html

မြန်မာယာဉ်မောင်း ၂၃ ဦးကို တရုတ် ကိုဗစ်ကာကွယ်ဆေးထိုးပေး

မြန်မာယာဉ်မောင်း ၂၃ ဦးကို တရုတ် ကိုဗစ်ကာကွယ်ဆေးထိုးပေး လားရှိုးမြို့အဝင်မှာ ကုန်တင်ယာဉ်မောင်းနဲ့ နောက်လိုက်တွေကို ၂၀၂၀ အောက်တိုဘာ ၂ ရက်နေ့ ကျန်းမာရေးစစ်ဆေးနေစဉ်

Photo : Kan Thar / RFA

ကိုရိုနာဗိုင်းရပ်စ်ကူးစက်မှုတွေ ထိန်းချုပ်ဖို့ နယ်စပ်ဂိတ်တွေပိတ်ထားချိန်မှာ တရုတ်-မြန်မာနယ်စပ်ဖြစ်တဲ့ မူဆယ်ကုန်သွယ်ရေးဂိတ်ကနေ တရုတ်နိုင်ငံဘက်အခြမ်းကို ကုန်စည်တွေ ခေါက်တိုပြေးဆွဲခွင့်ရထားတဲ့ မြန်မာနိုင်ငံသား ယာဉ်မောင်း ၂၃ ယောက်ကို တရုတ်နိုင်ငံ ဝမ်တိန်မြို့ ကျန်းမာရေးဌာနက ဒီဇင်ဘာ ၂၈ ရက်နေ့ မနေ့ကပဲ ကိုဗစ်ရောဂါကာကွယ်ဆေး ထိုးပေးခဲ့ပါတယ်။

ကျင်စန်းကျော့ဂိတ်က မြန်မာယာဉ်မောင်း ၂၉ ယောက်ကို မနေ့က ဝမ်တိန်ကျန်းမာရေးဌာနဆီ ခေါ်သွားပြီး ၂၃ ယောက်ကို ကိုဗစ်ကာကွယ်ဆေးထိုးပေးခဲ့တာလို့ စိုင်းမြင့်ဗိုလ် သစ်သီးပွဲရုံပိုင်ရှင် နန်းခန်းခင်က RFA ကို ပြောပါတယ်။

ကျန်တဲ့ ၆ ယောက်ကတော့ ဆီးချို၊ သွေးချိုရောဂါရှိပြီး အရက်ဘီယာ သောက်ထားသူတွေဖြစ်လို့ ထိုးခွင့်မရခဲ့တာလို့ ဆိုပါတယ်။ အခုဆေးထိုးခွင့်ရတဲ့ မြန်မာနိုင်ငံသား ယာဉ်မောင်းတွေကတော့ ၁၄ ရက်ပြည့်ရင် နောက်ထပ်တစ်ကြိမ် ကိုဗစ်ကာကွယ်ဆေး ထပ်မံထိုးရမှာဖြစ်တယ်လို့လည်း နန်းခန်းခင်က ပြောပါတယ်။

ထိုးပေးတာကတော့ တရုတ်နိုင်ငံထုတ် ကိုဗစ်ကာကွယ်ဆေးလို့သိရပြီး နောက်ထပ် ယာဉ်မောင်းတွေကိုလည်း ထပ်ပြီးထိုးပေးမယ့် အစီအစဉ်ရှိနိုင်တယ်လို့ နန်းခန်းခင်က ဆိုပါတယ်။

ကိုရိုနာဗိုင်းရပ်စ်ကြောင့် နယ်စပ်ကုန်သွယ်ဂိတ်တွေကို တရုတ်ဘက်က ပိတ်ထားပြီး ကုန်စည်စီးဆင်းမှုအတွက် မြန်မာဘက်အခြမ်းကနေ တရုတ်ဘက်အခြမ်းအထိ ခေါက်တိုပြေးဆွဲဖို့ ခွင့်ပြုထားတဲ့ ဝမ်တိန်ဂိတ်၊ ကျင်စန်းကျော့ဂိတ်နဲ့ မန်ဝိန်းဂိတ် စတဲ့ဂိတ် သုံးဂိတ်မှာ မြန်မာယာဉ်မောင်း ၅၀ နီးပါးရှိပါတယ်။

တရုတ်ကုန်သွယ်ရေးရုံး အစီအစဉ်နဲ့ မြန်မာယာဉ်မောင်းတွေကို ကိုဗစ်ကာကွယ်ဆေး ထိုးပေးခဲ့တာဖြစ်ပြီး မြန်မာနိုင်ငံမှာ ပထမဆုံး ကိုဗစ်ကာကွယ်ဆေးထိုးခွင့်ရသူတွေအဖြစ် မှတ်တမ်းဝင်နိုင်ကြောင်းလည်း မူဆယ်- နမ့်ခမ်း နယ်စပ်ကုန်သွယ်ရေး ကုန်သည်များအသင်း အလုပ်အမှုဆောင် ဦးစိုင်းခင်မောင်က သူ့ရဲ့ လူမှုကွန်ရက်စာမျက်နှာ ရေးသားထားပါတယ်။

မြန်မာ-တရုတ်နယ်စပ်မှာ နှစ်နိုင်ငံကုန်သွယ်ဖို့အတွက် ကျင်စန်းကျော့ဂိတ်၊ ဝမ်တိန်ဂိတ်၊ မန်ဝန်းဂိတ်၊ ဆင်ဖြူဂိတ်နဲ့ နန်းတော်ဂိတ်ဆိုပြီး ဂိတ် ၅ ဂိတ်ရှိပေမယ့် ကိုဗစ် - ၁၉ ကြောင့် တရုတ်ဘက်ကဂိတ်ထားချိန်မှာ ခေါက်တိုအစားထိုးယာဉ်မောင်းတွေနဲ့သာ တရုတ်ဘက်က အချိန်နဲ့ ဝင်ခွင့်ပြုထားတာဖြစ်ပါတယ်။


RFA Burmese

https://www.rfa.org/burmese/news/23-burmese-drivers-vaccinated-in-china-12292020031017.html

မိုင်းဖြတ်၌ လင်မယားချင်း စကားများ၍ တူမီးသေနတ်ဖြင့် ပစ်ခတ်သဖြင့် ဇနီးဖြစ်သူ သေဆုံး


မိုင်းဖြတ်    ဒီဇင်ဘာ  ၂၉  

 ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ မိုင်းဖြတ်မြို့နယ်၊ နမ့်ယွန်းကျေးရွာတွင် ဒီဇင်ဘာ  ၂၈ ရက်၊ နံနက် ၈ နာရီ  ခန့်က လင်မယားချင်းစကားများရာမှ ခင်းပွန်းဖြစ်သူက ဇနီးဖြစ်သူကို ဒေသလုပ်  တူမီးသေနတ်ဖြင့် ပစ်ခဲ့ရာ ဇနီးဖြစ်သူ အခင်းဖြစ်ပွားရာနေရာ၌ သေဆုံးခဲ့ကြောင်း သိရသည်။

 ဖြစ်စဉ်နှင့်ပတ်သတ်၍ ညီမဖြစ်သူ နာမီးကို သေသည်အထိ တူမီးသေနတ်ဖြင့် ပစ်ခတ်သူ ကျဖေ့ (၃၅) နှစ်အား နာမီး၏ အကိုဖြစ်သူ ဦးကျစောမှ ဥပဒေအရ အရေးယူဆောင်ရွက်ပေးနိုင်ပါရန် တိုင်တန်းသဖြင့် မိုင်းဖြတ်မြို့မရဲစခန်းက အရေးယူဆောင် ရွက်လျက်ရှိကြောင်း သိရသည်။


မြို့နယ် (ပြန်/ဆက်)

Myanmaalinn

https://www.facebook.com/MYANMAALINNNEWS

ကိုဗစ်အထောက်အပံ့နဲ့ အစိုးရအသုံးစရိတ်မူကြမ်း သမ္မတ Trump လက်မှတ်ထိုး

သမၼတ Donald Trump

အမေရိကန်ပြည်ထောင်စုမှာ ကိုဗစ်ကပ်ရောဂါကြောင့် ထိခိုက်နေသူတွေကို အထောက်အပံ့ပေးဖို့ ဒေါ်လာ ၉၀၀ ဘီလီယံ အသုံးစရိတ်နဲ့ အစိုးရလုပ်ငန်းတွေ စက်တင်ဘာလအထိ လည်ပါတ်နိုင်နိုင်ရေးအသုံးစရိတ် ၁.၄ trillion ပါဝင်တဲ့ စုစုပေါင်း အစိုးရ အသုံးစရိတ် ၂.၃ ထရီလီယံကို သမ္မတ Donald Trump တနင်္ဂနွေနေ့က လက်မှတ်ထိုးအတည်ပြုလိုက်ပါတယ်။

သမ္မတ အတည်ပြုလိုက်တာမို့ အသုံးစရိတ်ပြတ်ပြီး အစိုးရလုပ်ငန်းတွေ လည်ပတ်မှု အင်္ဂါနေ့ကစပြီး ယာယီရပ်ဆိုင်းရမယ့် အခြေအနေကို ရှောင်ရှားလိုက်နိုင်ပါတယ်။ အထက်နဲ့ အောက်လွှတ်တော်တွေမှာ ပြီးခဲ့တဲ့ သီတင်းပတ်က အတည်ပြုထားတဲ့ အသုံးစရိတ်မူကြမ်းဟာ ရှက်စရာကြီးဖြစ်တယ်လို့ သမ္မတက အရင်ကပြောပြီး လက်မှတ်ထိုးဖို့ ငြင်းဆန်နေခဲ့တာပါ။ ပြည်သူတဦးစီအတွက်ပေးမယ့် ထောက်ပံ့ငွေ ဒေါ်လာ ၆၀၀ ဟာ သိပ်နည်းတဲ့အတွက် ဒေါ်လာ ၂,၀၀၀ အထိ တိုးပေးဖို့ သမ္မတက လွှတ်တော်အမတ်တွေကို တောင်းဆိုခဲ့ပါတယ်။ ဒါပေမဲ့ ဘဏ္ဍာရေးဝန်ကြီးနဲ့ Republican နဲ့ Democrat လွှတ်တော်အမတ်တွေကြား အကြိတ်အနယ်ဆွေးနွေး သဘောတူပြီး လွှတ်တော် ၂ ရပ်လုံးက ထောက်ခံထားတဲ့ အသုံးစရိတ်မူကြမ်းကို သမ္မတ လက်မှတ်ထိုး အတည်ပြု ပြဌာန်းဖို့ ပါတီ ၂ ခုလုံးရဲ့ ခေါင်းဆောင်တွေက သမ္မတကို တိုက်တွန်းခဲ့ကြပါတယ်။

ကိုဗစ်ကပ်ရောဂါကာလ အလုပ်လက်မဲ့ဖြစ်သူတွေအတွက် ပြည်ထောင်စုအစိုးရ ထောက်ပံ့ကြေးပေးတဲ့အစီအစဉ် တနင်္ဂနွေနေ့ အစောပိုင်း အဆုံးသတ်ခဲ့သလို၊ အိမ်လခမပေးနိုင်သူတွေကို အိမ်ရှင်က နှင်မချအောင် အကာအကွယ်ပေးမှုကလည်း ဒီဇင်ဘာ ၃၁ ရက်မှာ အဆုံးသတ်တော့မှာပါ။

သမ္မတက အသုံးစရိတ်ကို လက်မှတ်ထိုးပေးလိုက်တဲ့အတွက် အလုပ်လက်မဲ့ ထောက်ပံ့ကြေးအပေါ် မှီတည်နေရသူ အမေရိကန် ၁၄ သန်းအတွက် သတင်းကောင်းဖြစ်တယ်လို့ အောက်လွှတ်တော် ဥက္ကဋ္ဌ Nancy Pelosi က တနင်္ဂနွေနေ့ နှောင်းပိုင်းက ကြေညာချက်ထုတ်ပြန်ပါတယ်။ အစိုးရလုပ်ငန်းတွေ ရပ်ဆိုင်းလို့မသင့်တဲ့ အခြေအနေမျိုးမှာ ဒီအခြေအနေကို သမ္မတက ရှောင်ရှားလိုက်တဲ့အပေါ် အထက်လွှတ်တော်လူများစုခေါင်းဆောင် Mitch McConnell ကသမ္မတကို ချီးကျူးခဲ့ပါတယ်။


ဗွီအိုအေ (မြန်မာပိုင်း)

https://burmese.voanews.com/a/covid-trump/5715704.html

ကိုဗစ်ကာကွယ်ဆေးနောက်နှစ်ထဲထိုးနိုင်ဖို့ မြန်မာတာဝန်ရှိသူတွေ ညှိနှိုင်းဆောင်ရွက်

 

မန္တလေးတိုင်းဒေသကြီး၊ မန္တလေးမြို့၊ ဧရာစင်တာ ကိုဗစ်-၁၉ ရောဂါအထူးကြပ်မတ်ကုသဆောင် (ICU) မှာ ကိုဗစ် လူနာများကို ကုသပေးနေတဲ့ ကျန်းမာရေးဝန်ထမ်းများ။ (ဓာတ်ပုံ - Ministry of Health and Sports, Myanmar၊ ဒီဇင်ဘာ ၂၄၊ ၂၀၂၀)

ကိုဗစ်ကပ်ရောဂါကူးစက်မှုတွေ ကြုံနေရတဲ့ မြန်မာနိုင်ငံမှာ ရောဂါထိန်းချုပ်ရေးအတွက် ကာကွယ်ဆေးထိုးမယ့် အစီအစဉ်ကို အစောဆုံး ရှေ့နှစ်ထဲ စတင်နိုင်ဖို့ ပြင်ဆင်နေပါတယ်။ အိန္ဒိယနိုင်ငံက အဓိက ဝယ်ယူမယ့် ကိုဗစ်ကာကွယ်ဆေးကိုတော့ ဦးစားပေး အစီအစဉ်တွေနဲ့ သုံးစွဲသွားဖို့လည်း စီစဉ်နေတာပါ။ အပြည့်အစုံကိုတော့ ဗွီအိုအေ မြန်မာပိုင်း သတင်းထောက် မအိမ့်သန္တာထွန်းက ပြောပြပါမယ်။

မြန်မာနိုင်ငံမှာ ကိုဗစ်ကပ်ရောဂါ ထိန်းချုပ်ဖို့ အိန္ဒိယနိုင်ငံ Serum Institute Of India ကာကွယ်ဆေးထုတ်လုပ်ရေး လုပ်ငန်းကနေ လူ ၁၅ သန်းအတွက် ထိုးဆေးတွေ ဝယ်ယူဖို့လည်း ၂ နိုင်ငံ သဘောတူညီချက် ရရှိထားပါတယ်။

ကာကွယ်ဆေးတွေ မကြာခင်ရရှိဖို့မျှော်လင့်ထားကြောင်းလည်း တစ်ပတ်အတွင်းကိုဗစ်ကူးစက်မှု အခြေအနေကို တင်ပြတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ပြီးခဲ့တဲ့ သီတင်းပတ်က မိန်ခွန်းမှာ ထည့်သွင်းပြောကြားသွားပါတယ်။

“ကာကွယ်ဆေးကို လူ ၁၅ သန်းစာ ဝယ်ယူဖို့အတွက် အခု ကျမတို့ ကိုယ်စားလှယ်အဖွဲ့တခုက အိန္ဒိယနိုင်ငံမှာ ရောက်နေပါတယ်။ ဒီကာကွယ်ဆေး ဝယ်ယူတဲ့ကိစ္စနဲ့ ပတ်သက်ရင် နောက်တပတ်လောက်အတွင်းမှာ တိတိကျကျ ပိုပြီး သိရပါလိမ့်မယ်။ ကာကွယ်ဆေးဝယ်ယူဖို့ လက်မှတ်ထိုးပြီးပြီ၊ အားလုံး အဆင်သင့်ဖြစ်ပြီ ဆိုတာနဲ့ မကြာခင်ကာလမှာ ကာကွယ်ဆေးထိုးဖို့ အစီအစဉ်တွေ စဖို့ကိုလည်း ကျမတို့ စီစဉ်ထားပြီးပါပြီ။ တတိုင်းပြည်လုံးမှာပေါ့နော်... ဥပမာအားဖြင့်ဆိုရင် ပထမဦးစားပေးကတော့ ရှေ့တန်းက ကျန်းမာရေးဝန်ထမ်းတွေပေါ့။ အဲဒါပြီးတော့မှ နောက် ကျမတို့အနေနဲ့ နိုင်ငံအတွက်ရော၊ ပြည်သူတွေအတွက်ရော လိုအပ်ချက်အရ ကျမတို့ တဆင့်ပြီးတဆင့် လုပ်သွားမှာဖြစ်ပါတယ်။”

မြန်မာနိုင်ငံမှာ ကပ်ရောဂါကူးစက်မှုတွေ ရှိနေဆဲ ဖြစ်တာကြောင့် ကာကွယ်ဆေးကို အားကိုးပြီး ပေါ့ပေါ့ဆဆ မနေကြဖို့နဲ့ ကျန်းမာရေးဝန်ကြီးဌာနက သတ်မှတ်ထားတဲ့ ကျန်းမာရေးလမ်းညွှန်ချက်တွေကို တိတိကျကျ လိုက်နာနေထိုင်ကြဖို့လည်း ဒေါ်အောင်ဆန်းစုကြည်က သတိပေးပြောကြားခဲ့ပါတယ်။

အမေရိကန် အပါအဝင် အနောက်နိုင်ငံတွေမှာ စတင်အသုံးပြုနေတဲ့ Pfizer နှင့် Moderna ကိုဗစ်ကာကွယ်ဆေးတွေကို လတ်တလော မြန်မာနိုင်ငံ အနေနဲ့ လက်လှမ်းမမှီနိုင်သေးတာကြောင့် အိန္ဒိယနိုင်ငံကဆေးကို ဝယ်ယူအသုံးပြုဖို့ မြန်မာကျန်းမာရေး တာဝန်ရှိသူတွေ ဆုံးဖြတ်ခဲ့ကြတာပါ။ မြန်မာနိုင်ငံ အမျိုးသားအဆင့် ကာကွယ်ဆေးထိုး လုပ်ငန်းဆိုင်ရာ အကြံပေးအဖွဲ့ ဒုတိယ ဥက္ကဋ္ဌလည်းဖြစ် ကမ္ဘာ့ကျန်းမာရေးအဖွဲ့ WHO အရှေ့တောင်အာရှ ဒေသကြီး ကာကွယ်ဆေးထိုးဆိုင်ရာ နည်းပညာ အကြံပေးအဖွဲ့ဝင်တစ်ဦးဖြစ်တဲ့ အငြိမ်းစားပါမောက္ခ ဒေါက်တာ စောဝင်းကတော့ ကာကွယ်ဆေး ထုတ်လုပ်မှုမှာ အတွေ့အကြုံရှိတဲ့ အိန္ဒိယနိုင်ငံက ဝယ်ယူမယ့် အစီအစဉ်နဲ့ ပတ်သက်လို့ မြန်မာနိုင်ငံ နိုင်ငံခြားသတင်းထောက်အသင်းရဲ့ အွန်လိုင်းဆွေးနွေးပွဲမှာ ရှင်းပြသွားပါတယ်။

“ကျနော်တို့နဲ့ လက်လှမ်းမီနိုင်တာဆိုရင်တော့ AstraZeneca ပေါ့နော်။ သူကတော့ ဘာလဲဆိုတော့ Covax Facility ထဲမှာပါတယ်။ အစောကြီးကတည်းက Covax Facility ထဲဝင်ထားတယ်။ နောက်ပြီးတော့ သူက 2 to 8 degree Centigrade မှာလည်း Store လုပ်လို့ရတယ်။ အဲ့တော့ ဆရာတို့အတွက် Cold Chain problem မရှိဘူး။ နောက်တစ်ခု သူက ဘာလည်းဆိုတော့ production capacity ကလည်း များတယ်ပေါ့။ ကမ္ဘာပေါ်မှာ Vaccine အများဆုံးထုတ်တာက အင်္ဂလန်လည်း မဟုတ်ဘူး၊ အမေရိကလည်း မဟုတ်ဘူး။ အိန္ဒိယ More of the vaccine is produce in India အဲ့ဒီတော့ သူတို့ရဲ့ vaccine production capacity က အရမ်း High ဖြစ်တော့ volume များများထွက်နိုင်တယ်။ နောက်တစ်ခုက ဘာလည်းဆိုတော့ price ကလည်း တော်တော်လည်း reasonable ဖြစ်တယ်။ အဲ့ဒီတော့ ကျနော်တို့ Covax ကလာလို့ရှိရင်လည်း သူလာဖို့များတယ်ပေါ့။”

အိန္ဒိယနိုင်ငံက ထုတ်လုပ်မယ့် ကိုဗစ်ကာကွယ်ဆေးကိုတော့ AstraZeneca ဆေးကုမ္ပဏီနဲ့ ဗြိတိန်နိုင်ငံ Oxford တက္ကသိုလ်တို့က ပူးတွဲသုတေသနလုပ်ထားပြီး WHO ကမ္ဘာ့ကျန်းမာရေး အဖွဲ့ကြီးကလည်း အသိအမှတ်ပြုထားပါတယ်။

အိန္ဒိယနိုင်ငံထုတ် ကာကွယ်ဆေးနဲ့ မြန်မာနိုင်ငံမှာ ရှေ့နှစ်ထဲ စတင်မယ့် ကိုဗစ်ကာကွယ်ဆေးထိုးရေး အစီအစဉ်မှာ နိုင်ငံလူဦးရေ အများစု ပါဝင်လိမ့်မယ်လို့ မျှော်လင့်ကြောင်းလည်း ပါမောက္ခ ဒေါက်တာစောဝင်းက ပြောပါတယ်။

“ကျနော်တို့ မှန်းထားတာတော့ ကျနော့် personal view ဆိုရင် ဒီနှစ်ကုန်ရင် ၆၀ ရာခိုင်နှုန်းလောက်အထိ ထိုးလို့ရမယ်လို့ထင်တယ်။ ၆၀ ရာခိုင်နှုန်းထိုးလို့ရမယ်ဆိုတာက ၆၀ ရာခိုင်နှုန်းဆိုရင်သူက ၁၀၀ ရာခိုင်နှုန်းလောက်ဖြစ်သွားတယ် ဘာလို့ဆို 33% of our population က under 18 အဲ့ဒီတော့ သူတို့တွေက ကာကွယ်ဆေးမလိုဘူးပေါ့။ အဲ့ဒီကျ ၆၇ ရာခိုင်နှုန်းဆိုတော့ ၂၀၂၁ နှစ်ကုန်မှာ ကျနော်တို့ Cover ဖြစ်လောက်တယ်လို့ ထင်တယ်ပေါ့နော်။ ဒါကတော့ ကျနော်ရဲ့ သုံးသပ်ချက် အမြင်ပေါ့။”

မြန်မာနိုင်ငံအတွက် ကိုဗစ်ကပ်ရောဂါကာကွယ်ဆေး ဝယ်ယူအသုံးပြုနိုင်ဖို့ အမေရိကန်ဒေါ်လာသန်း ၉၅၀ ကျော် ရရှိရေး ကမ္ဘာ့ဘဏ်၊ အာရှဖွံ့ဖြိုးရေးဘဏ်၊ အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) တို့နဲ့ ဆွေးနွေးမှုတွေလည်း ရှိနေပါတယ်။

ကျန်းမာရေးနဲ့ အားကစားဝန်ကြီးဌာနရဲ့ ထုတ်ပြန်ချက်အရ မြန်မာနိုင်ငံမှာ ကိုဗစ်ရောဂါကူးစက်မှုကြောင့် သေဆုံးသူ ၂,၆၀၀ ကျော်နဲ့ ကူးစက်သူ အတည်ပြုလူနာကတော့ ၁၂၀,၀၀၀ ကျော်ရှိနေပါတယ်။ 


အိမ့်သန္တာထွန်း/VOA (Burmese)

https://burmese.voanews.com/a/covid-vaccine-myanmar/5715764.html

ဝူဟန်မှာ ဖြစ်ပျက်သမျှတွေကို တင်ခဲ့သူ အမျိုးသမီး ထောင်လေးနှစ်ကျ

မစ္စဂျန်ဂျန်းဟာ မေလမှာ ထိန်းသိမ်းခံခဲ့ရပါတယ်။

တရုတ်မှာ ကိုရိုနာဗိုင်းရပ်စ် စတင်ဖြစ်ပွားခဲ့တဲ့ ဝူဟန်မြို့က အဖြစ်အပျက်တွေကို သတင်းအဖြစ်တင်ပြ ရေးသားဖော်ပြခဲ့တဲ့ လူထုသတင်းသမား အမျိုးသမီးတစ်ယောက်ကို အာဏာပိုင်တွေက ထောင်ဒဏ်လေးနှစ်ချလိုက်ပါတယ်။

ဂျန်ဂျန်းဟာ "လူတွေကြားခိုက်ရန်ဖြစ်ပွားအောင်နဲ့ ရန်စပြုမူခဲ့မှုတွေအတွက်" အပြစ်ရှိကြောင်းတွေ့ရတယ်လို့ စီရင်ချက်မှာ ဖော်ပြခဲ့ပါတယ်။ ဒီစွပ်စွဲချက်ဟာ တက်ကြွလှုပ်ရှားသူတွေအပေါ် အာဏာပိုင်တွေ မကြာမကြာသုံးတတ်တဲ့ စွဲချက်တစ်ခုဖြစ်ပါတယ်။

အရင်က ရှေ့နေလုပ်ခဲ့ဖူးတဲ့ အသက် ၃၇ နှစ်ရှိပြီဖြစ်တဲ့ ဂျန်ဂျန်းဟာ မေလကတည်းက ထိန်းသိမ်းခံထားရတာပါ။ သူ ဖမ်းခံထားရတုန်း အစာအငတ်ခံ ဆန္ဒပြနေခဲ့တာလည်း လတော်တော်ကြာပြီလို့ သိရပါတယ်။ အခုဆို သူ့ ကျန်းမာရေးက မကောင်းလှဘူးလို့ သူ့ ရှေ့နေတွေက ပြောပါတယ်။

မစ္စဂျန်လိုပဲ ဝူဟန်အကြောင်းသတင်းတွေ တင်ခဲ့တဲ့ တခြား လူထုသတင်းသမား အတော်များများကိုလည်း တရုတ်အာဏာပိုင်တွေက ဖမ်းဆီးထားပါတယ်။

တရုတ်မှာက လွတ်လပ်တဲ့ သတင်းမီဒီယာမရှိပါဘူး၊ ကိုရိုနာကပ်ရောဂါဖြစ်လာတော့ အစိုးရရဲ့ ကိုင်တွယ်ဆောင်ရွက်ပုံတွေကို ဝေဖန်ရေးသားသူ၊ ထုတ်ဖော်ဖွင့်ချသူလို့ ယူဆခံရသူတွေကို အာဏာပိုင်တွေက လိုက်ရှာနှိမ်နင်းခဲ့ပါတယ်။

ဝူဟန်မှာ ဘာတွေ ဘယ်လို ပြောင်းလဲသွားပြီလဲ

"စီရင်ချက်ကို ကြားလိုက်ရတဲ့အချိန်မှာ ဂျန်ဂျန်းအတော်လေး စိတ်ထိခိုက်သွားတယ်" လို့ သူ့ ရှေ့နေတစ်ယောက်ဖြစ်တဲ့ ရန်ကွမ်နူးက အေအက်ဖ်ပီသတင်းဌာနကို ပြောပါတယ်။ တရားရုံးမှာ စီရင်ချက်ကို လာနားထောင်နေတဲ့ မစ္စဂျန်းရဲ့ အမေကလည်း အော်ဟစ်ငိုကြွေးခဲ့တယ်လို့ သူက ဆက်ပြောပြပါတယ်။

'တော်လှန်ချင်စိတ်ရှိသူ'

သူအဖမ်းမခံရခင် ရုပ်သံမှတ်တမ်းသမားတစ်ယောက်ကို ပေးခဲ့တဲ့ အင်တာဗျူးမှာ မစ္စဂျန်းက ဝူဟန်မြို့ခံတစ်ယောက်ရေးတဲ့ ကပ်ရောဂါကာလအတွင်း မြို့ထဲမှာ ဖြစ်နေပုံ၊ သူတို့နေရပုံတွေအကြောင်း ပို့စ်တစ်ခုကို ဖတ်ရအပြီးမှာ ဖေဖေါ်ဝါရီလမှာပဲ ဝူဟန်ကို သွားဖို့ သူဆုံးဖြတ်ခဲ့တယ်လို့ ပြောပြခဲ့ပါတယ်။

အဲဒီကို ရောက်တဲ့အခါ မြို့ထဲက လမ်းတွေပေါ်မှာ တွေ့ရတာတွေ၊ ဆေးရုံတွေမှာ ဖြစ်ပျက်နေတာတွေကို ဂျန်ဂျန်းက မှတ်တမ်းတင်ပြီး စာတွေရေး၊ ဗီဒီယိုတွေ လိုက်ဖ်လွှင့်တာတွေ လုပ်ခဲ့ပါတယ်။ အာဏာပိုင်တွေက ခြိမ်းခြောက်ပေမဲ့ သူ နောက်မဆုတ်ခဲ့ပါဘူး။ သူတင်တဲ့ သတင်းတွေ၊ ဗီဒီယိုတွေကို ဆိုရှယ်မီဒီယာမှာ လူတွေ အများကြီး ဆက်ပြီး ဖြန့်ကြပါတယ်။

တရုတ်က လူ့အခွင့်အရေးကာကွယ်သူများကွန်ရက်အဖွဲ့ကတော့ ဂျန်ဂျန်းရဲ့ တင်ပြချက်တွေထဲမှာ တခြား လွတ်လပ်တဲ့သတင်းသမားတွေအဖမ်းရတာတွေ၊ ဗိုင်းရပ်စ်နဲ့ အသက်ဆုံးခဲ့ရသူတွေရဲ့ မိသားစုတွေက အာဏာပိုင်တွေကို တာဝန်ခံခိုင်းရင် အဲဒီမိသားစုတွေ ဖိနှိပ် နှောက်ယှက်ခံရတဲ့အကြောင်းတွေ ပါတယ်လို့ ဆိုပါတယ်။

"ကျွန်မက တော်လှန်ချင်တဲ့စိတ်ရှိသူ ဖြစ်နိုင်ပါတယ်၊ ကျွန်မက အမှန်တရားကို မှတ်တမ်းတင်တာပဲလေ၊ အမှန်တရားကို ဘာလို့ ထုတ်ပြလို့ မရရမှာလဲ။" လို့ အင်တာဗျူးထဲမှာ ဂျန်ဂျန်းပြောခဲ့တဲ့ အပိုင်းလေးကို ဘီဘီစီက တွေ့ရပါတယ်။

"ကျွန်မအခုလုပ်နေတာတွေကို ရပ်မှာမဟုတ်ပါဘူး။ ဒီနိုင်ငံဟာ နောက်ပြန်လှည့် သွားလို့ မရပါဘူး" လို့လည်း သူက ပြောခဲ့ပါတယ်။

လူ့အခွင့်အရေးကာကွယ်သူများအဖွဲ့ရဲ့ အဆိုအရ မစ္စဂျန်ဂျန်းဟာ မေလ ၁၄ ရက်နေ့ကစလို့ ပျောက်သွားတာလို့ ဆိုပါတယ်။ နောက်တစ်နေ့မှာတော့ သူ့ကို မိုင် ၄၀၀ ကျော်ကွာဝေးတဲ့ ရှန်ဟိုင်းမြို့မှာ ဖမ်းထားကြောင်း သိလာရပါတယ်။

သူ့ကို တရားဝင်အမှုစွဲတင်တာကိုတော့ နိုဝင်ဘာလဆန်းမှာ လုပ်ခဲ့ပါတယ်။ စွဲချက်တွေထဲမှာ မစ္စဂျန်ဂျန်းဟာ "သတင်းမှားတွေကို စာသား၊ ဗီဒီယို တခြားမီဒီယာပုံစံတွေနဲ့ ဝီချက်၊ တွစ်တာ၊ ယူကျုတို့က တစ်ဆင့်ပေးပို့ထုတ်ပြန်ခဲ့တယ်" လို့ ရေးထားပါတယ်။

နောက်တစ်ခါ သူဟာ နိုင်ငံခြား မီဒီယာတွေကိုလည်း အင်တာဗျူးတွေပေးခဲ့ပြီး ဝူဟန်က ဗိုင်းရပ်စ်အကြောင်း သတင်းတွေကို "မလိုမုန်းထားစိတ်နဲ့ မမှန်မကန်ဖြန့်ဝေခဲ့တယ်" လို့လည်း စွပ်စွဲချက်ထဲမှာ ဖော်ပြထားပါတယ်။ ဒါကြောင့် သူ့ကို ထောင်ဒဏ် လေးနှစ်ကနေ ငါးနှစ်အထိ ချမှတ်ဖို့လည်း တရားစွဲဘက်က တောင်းဆိုထားပါတယ်။

လာရောက်လေ့လာမှုတိုင်းကို လမ်းဖွင့်ပေးထားတယ်လို့ ဝူဟန်ဓာတ်ခွဲခန်းက သုတေသီ တုံ့ပြန်

'ထိတ်လန့်စရာ ပြစ်ဒဏ်'

သူ့ကို အခုလို ဖမ်းဆီးတာကို ကန့်ကွက်တဲ့အနေနဲ့ မစ္စဂျန်းက အစာငတ်ခံဆန္ဒပြခဲ့ပြီး သူ့ကျန်းမာရေးဟာ အတော်လေးဆိုးဝါးနေတယ်လို့ ဆိုပါတယ်။

သူ့ရှေ့နေတစ်ယောက်ကတော့ မစ္စဂျန်းဆီ ဒီဇင်ဘာအစောပိုင်းက သူသွားတွေ့တုန်းမှာ အာဏာပိုင်တွေက သူ့ကို အစာပိုက်ကတစ်ဆင့် အတင်းအဓမ္မ အစားအစာတွေထည့်ကျွေးနေတယ်လို့ မစ္စဂျန်းက ပြန်ပြောပြခဲ့တယ်လို့ စီရင်ချက်ချအပြီးမှာ ထုတ်ပြန်ချက်ကို ဖတ်ပြခဲ့ပါတယ်။ မစ္စဂျန်းဟာ ခေါင်းကိုက်တာ၊ မူးဝေတာ၊ ဗိုက်အောင့်တာ စတဲ့ ဝေဒနာတွေ ခံစားနေရတယ်လို့လည်း ရှေ့နေက ပြောပါတယ်။

"၂၄ နာရီပတ်လုံး ချုပ်နှောင်ခံထားရလို့ မစ္စဂျန်းဟာ ရေချိုးခန်းသွားဖို့ တခြားလူရဲ့ အကူအညီလိုတယ်၊ အိပ်ရင်လည်း အိပ်မပျော်ဘဲ ဟိုဘက်လှိမ့်လိုက် ဒီဘက်လှိမ့်လိုက် ဖြစ်နေတယ်" လို့ ရှေ့နေ ဂျန်ကေကေက ပြောပါတယ်။ မစ္စဂျန်းဟာ "စိတ်ပိုင်းဆိုင်ရာအရ အရမ်း ပင်ပန်းနွမ်းနယ်နေပြီး နေ့တိုင်းဟာ သူ့အတွက် အနှိပ်စက်ခံနေရသလိုပါပဲ" လို့ သူက ဆက်ပြောပါတယ်။

မစ္စဂျန်းရဲ့ ကျန်းမာရေးအခြေအနေကြောင့် အမှုစီရင်တာကို ရက်ရွှေ့ပေးဖို့ သူ့ရှေ့နေတွေက တောင်းဆိုခဲ့ပါတယ်။

မစ္စဂျန်းဟာ ဟောင်ကောင်က ဆန္ဒပြသူတွေကို ထောက်ခံကြောင်း ထုတ်ပြောခဲ့တာကြောင့် ၂၀၁၉ ခုနှစ်တုန်းကလည်း ထိန်းသိမ်းခံခဲ့ရပါသေးတယ်။

တရုတ် လူ့အခွင့်အရေးကာကွယ်သူများကွန်ရက်အဖွဲ့က လီယိုလန်ကတော့ မစ္စဂျန်းကို အခုချမှတ်လိုက်တဲ့ ပြစ်ဒဏ်ဟာ "ထိတ်လန့်စရာကောင်းတယ်" လို့ ဆိုပါတယ်။

"ပြစ်ဒဏ်က ပြင်းထန်လွန်းပါတယ်။ တရုတ်အစိုးရက သူ့ကိုလည်း အသံတိတ်သွားအောင်လုပ်ချင်တယ်၊ ဝူဟန်မှာ ဘာဖြစ်ခဲ့သလဲဆိုတာကို ဖော်ထုတ်ဖို့ ကြိုးစားခဲ့ကြတဲ့ တခြားပြည်သူတွေကိုလည်း ကြောက်သွားအောင်လုပ်ဖို့ စိတ်ပိုင်းဖြတ်ထားပုံရပါတယ်" လို့ လီယိုလန်က ဘီဘီစီကို ပြောပါတယ်။

"ကပ်ရောဂါအကြောင်း သတင်းတွေကို ထုတ်ဖော်ရေးသားပြီး အခု အဖမ်းခံထားရတဲ့ တခြားသူတွေရဲ့ ကံကြမ္မာနဲ့ပတ်သက်ပြီးလည်း ကျွန်တော် စိုးရိမ်ပါတယ်" လို့ သူက ဆက်ပြောပါတယ်။

ဝူဟန်ကနေ သတင်းတွေ ရေးပြီးတင်ခဲ့ကြတဲ့ တခြား လူထုသတင်းသမားတွေဖြစ်ကြတဲ့ လီဂျေဟွား၊ ချန်ကျူရှီ နဲ့ ဖန်ဘင်းတို့လည်း ဒီနှစ်အစောပိုင်းတုန်းက ရုတ်တရက် ပျောက်သွားကြပါတယ်။နောက်ပြီးမှာ လီက ပြန်ပေါ်လာပြီး သူ့ကို အာဏာပိုင်တွေက အတင်းအကျပ် ကွာရန်တင်းဝင်ခိုင်းခဲ့တယ်လို့ ဆိုပါတယ်။ ချန်ကတော့ အစိုးရက စောင့်ကြည့်ခံနေရပြီး မိသားစုနဲ့အတူပြန် နေနေတယ်လို့ သိရပါတယ်။ ဖန်ဘင်းကတော့ အခုအထိ ဘယ်ရောက်နေတယ်ဆိုတာ မသိရပါဘူး။ 


BBC Burmese

https://www.bbc.com/burmese/world-55446672

ဘူးလက်ဦးလှဆွေ ဘာလို့ အဖမ်းခံတာလဲ


နိုင်ငံတော်အကြည်ညိုပျက်စေမှုနဲ့ ဖမ်းဝရမ်း အထုတ်ခံထားရပြီး တစ်နှစ်ကျော်ကြာ ထွက်ပြေးတိမ်းရှောင်နေတဲ့ ပြည်ခိုင်ဖြိုး ပါတီ လွှတ်တော် ကိုယ်စားလှယ်ဟောင်း ဦးလှဆွေ (ခေါ်) ဘူးလက်ဦးလှဆွေဟာ လာရောက်အဖမ်းခံခဲ့ပြီး ရန်ကုန် အနောက်ပိုင်းခရိုင်တရားရုံးကို ဒီဇင်ဘာလ ၂၈ ရက် နေ့လယ်ပိုင်းက ရောက်လာခဲ့တယ်လို့ မျက်မြင်တွေ့ရှိတဲ့ ပြည်တွင်း သတင်းထောက်တစ်ဦးက ဘီဘီစီကိုပြောပါတယ်။

ဘူးလက်ဦးလှဆွေဟာ နှာခေါင်းစည်းတပ်ထားပြီး ရဲကားပေါ်မှာ လိုက်ပါသွားတာကို တွေ့ရတယ်လို့ သူကပြောပါတယ်။

ရန်ကုန် အနောက်ပိုင်းခရိုင် တရားရုံးမှာ သူ့ကို ရမန် နှစ်ပတ်ယူခဲ့ပြီး လာမယ့် ဇန်နဝါရီလ ၁၁ ရက်နေ့မှာ ရုံးထုတ်ဖို့လည်း ရှိနေပါတယ်။

ပြီးခဲ့တဲ့ ၂၀၁၉ ခုနှစ်၊ သြဂုတ်လ ၃ ရက်နေ့မှာ ရန်ကုန်မြို့၊ မြို့တော်ခန်းမရှေ့မှာ ပြုလုပ်ခဲ့တဲ့ ဆန္ဒပြပွဲမှာ ဦးလှဆွေဟာ သူ့ရဲ့ ပြောဆိုချက်တွေကြောင့် ကျောက်တံတားမြို့နယ် ဒုတိယအထွေထွေအုပ်ချုပ်ရေးမှူး ဦးမျိုးမြင့် က အနောက်ပိုင်းခရိုင်တရားရုံးမှာ နိုင်ငံတော်အကြည်ညိုပျက်စေမှု ပုဒ်မ ၁၂၄(က) နဲ့ တရားလိုပြု တရားစွဲဆိုခဲ့ပြီး ဖမ်းဝရမ်းထုတ်ခဲ့တာဖြစ်ပါတယ်။

အနောက်ပိုင်းခရိုင်တရားရုံးကနေ အင်းစိန်ထောင်ကိုပို့

နိုင်ငံတော်အကြည်ညိုပျက်စေမှု ပုဒ်မ ၁၂၄ (က) က ပြစ်မှုထင်ရှားပါက အမြင့်ဆုံး ထောင်ဒဏ်တစ်သက်တစ်ကျွန်း (နှစ် ၂၀ ထိ) အပြင် ငွေဒဏ်ပါ ချမှတ်နိုင်တဲ့ ပုဒ်မဖြစ်ပါတယ်။

ဦးလှဆွေ အဖမ်းမခံမီမှာ တွေ့ရတဲ့ လူမှုကွန်ရက်ပေါ်က ရုပ်သံမှတ်တမ်း အင်တာဗျုးတစ်ခုမှာတော့ သူ့ကိုစွဲထားတဲ့ ပုဒ်မနဲ့ လုပ်ခဲ့တဲ့လုပ်ရပ်ဟာ ထိုက်တန်မှု မရှိလို့ ရှောင်နေတာပါလို့ သူက ပြောဆိုခဲ့ပါတယ်။

အဲ့ဒီ ရုပ်သံအင်တာဗျုးမှာ တွေ့ရတာကတော့ ဦးလှဆွေဟာ ဆံပင်တွေဟာ ပုခုံးပေါ်ကျတဲ့ အထိ ရှည်နေတာ တွေ့ရပြီး နေကာ မျက်မှန်တပ်ထားကာ အနောက်တိုင်းဝတ်စုံ အဖြူရောင်ကို ဝတ်ထားတာလည်း တွေ့ရပါတယ်။

ဦးလှဆွေက ပြီးခဲ့တဲ့ရွေးကောက်ပွဲမှာ မဲမသမာမှုတွေရှိခဲ့ပြီး ရိုးသားတဲ့ မဲပေးသူတွေဘက်က ရပ်တည်ချင်လို့ ပြန်ထွက်လာခဲ့တာပါလို့လည်း သူကပြောဆိုခဲ့ပါတယ်။

ရွေးကောက်ပွဲကော်မရှင်ရဲ့ ပြီးခဲ့တဲ့ ရွေးကောက်ပွဲ အငြင်းပွားမှုတွေ ကိုင်တွယ်ခဲ့တာနဲ့ ပတ်သက်လို့လည်း ဝေဖန်ခဲ့ပြီးတော့ ရွေးကောက်ပွဲကော်မရှင်ကို ကန့်ကွက်လွှာ တင်သွင်းတဲ့လမ်းကြောင်းကလည်း ဘက်လိုက်မှုတွေ ရှိနေတယ်လို့ ပြောသွားခဲ့ပါတယ်။

ရန်ကုန် အနောက်ပိုင်းခရိုင်တရားရုံး

၂၀၁၉ သြဂုတ် ၃ ရက်က မဟာဗန္ဓုလပန်းခြံရှေ့မှာ ပြုလုပ်တဲ့ "အမေရိကန်နိုင်ငံမှ မြန်မာ့ တပ်မတော် ထိပ်တန်းအရာရှိများ အပေါ်အရေးယူပိတ်ဆို့မှုများ အားဆန့်ကျင်ရှုတ်ချပွဲ' မှာ အစိုးရနဲ့ ဒေါ်အောင်ဆန်းစုကြည် လုပ်ဆောင်ချက်တွေအပေါ် သွယ်ဝိုက်ပြစ်တင်ရှုတ်ချ ပြောဆိုမှုတွေရှိခဲ့ပြီး အဲ့ဒီအတွက် ဦးလှဆွေ ဘူးလက်ကို နိုင်ငံတော် အကြည်ညိုပျက်စေမှုနဲ့ အစိုးရက တရားစွဲခဲ့တာဖြစ်ပါတယ် ။

ဒါ့အပြင် ရန်ကုန်မြို့လယ် လူထုဟောပြောပွဲမှာ အစ္စလာမ် ဘာသာအပေါ် ပုတ်ခတ်ဟောပြောဆိုခဲ့တယ် ဆိုပြီး လွှတ်တော်ကိုယ်စားလှယ်ဟောင်း ဦးလှဆွေကို သာသနာညိုးနွမ်းစေမှု ပုဒ်မ ၂၉၅(က)နဲ့ အရေးယူပေးဖို့ တရားလို အစ္စလာမ် ဘာသာရေးဆရာ ဦးစန်းအောင်က ၂၀၁၉ သြဂုတ်လ ၇ ရက်နေ့က ကျောက်တံတား တရားရုံးမှာ လျှောက်ထားခဲ့ပါသေးတယ်။

ဦးလှဆွေကို စွဲဆိုထားတဲ့ ပုဒ်မ ၁၂၄ (က)ဟာ ပြီးခဲ့တဲ့ ၂၀၂၀ နိုဝင်ဘာလ ၂ ရက်နေ့က လာရောက် အဖမ်းခံခဲ့တဲ့ အမျိုးသားရေး ဆရာတော် ဦးဝီရသူ ကို စွဲဆိုထားတဲ့ ပုဒ်မနဲ့ အတူတူ ဖြစ်ပါတယ်။

ဦးဝီရသူ နိုဝင်ဘာလက လာရောက် အဖမ်းခံခဲ့သလို ရှေ့နေ့ ဦးကိုနီကို လုပ်ကြံသတ်ဖြတ်မှု တရားခံ ကြည်လင်းရုံးချိန်းမှာ "မင်းတို့ ထမင်းဝအောင်စားထား" ဆိုပြီး တီရှပ်တွေဝတ်ကာ လာရောက်ဝန်းရံမှုကြောင့် အမှုဖွင့်ခံထားရသူ နှစ်ဦးလည်း ထွက်ပြေးတိမ်းရှောင်နေရာကနေ အောက်တိုဘာလကုန်ပိုင်းက လာရောက် အဖမ်းခံခဲ့ပါတယ်။


BBC Burmese

https://www.bbc.com/burmese/burma-55469314

ဒီဇင်ဘာလကုန်ပိုင်း လေးရက်အတွင်း တပ်မတော်သား ၁၄၀ ကျော် ကိုဗစ်ပိုးတွေ့

ဒီဇင်ဘာလကုန်ပိုင်း လေးရက်အတွင်း တပ်မတော်သား ၁၄၀ ကျော် ကိုဗစ်ပိုးတွေ့ တပ်မတော်သားလွှတ်တော်ကိုယ်စားလှယ်တွေ ၂၀၂၀၊ မေလဆန်းပိုင်းက နေပြည်တော်မှာ ကိုရိုနာဗိုင်းရပ် ရှိ၊ မရှိ စစ်ဆေးမှု ခံယူနေစဉ် / ဓာတ်ပုံ - တပ်မတော်သတင်းမှန် ပြန်ကြားရေးအဖွဲ့

တပ်မတော်ကာကွယ်ရေးဦးစီးချုပ်ရုံးအခြေစိုက်ရာ နေပြည်တော် ဇေယျာသီရိမြို့နယ်မှာရှိတဲ့ စစ်ဆေးရုံရဲ့ စာရင်းအရ ကိုရိုနာဗိုင်းရပ်စ်ပိုး ကူးစက်ခံရတဲ့ တပ်မတော်သားနဲ့ တပ်မိသားစုဝင်တွေ ၄ ရက်အတွင်း ၁၄၁ ဦးထိ ရှိလာတယ်လို့ နေပြည်တော် ပြည်သူ့ကျန်းမာရေးဦးစီးဌာန ဒုတိယညွှန်ကြားရေးမှူးချုပ် ဒေါက်တာ မြတ်ဝဏ္ဏစိုးက RFA ကိုပြောပါတယ်။

တပ်မတော်အတွင်း ပိုးတွေ့အတည်ပြုလူနာဦးရေဟာ ဒီဇင်ဘာ ၂၅ ရက်နေ့မှာ ၄၄ ယောက်၊ ၂၆ ရက်နေ့မှာ ၅၅ ယောက်၊ ၂၇ ရက်နေ့မှာ ၂၈ယောက်၊ ၂၈ ရက်နေ့မှာ ၁၄ ယောက် စုစုပေါင်း ၁၄၁ ယောက် ရှိလာတာဖြစ်တယ်လို့ နေပြည်တော် ပြည်သူ့ကျန်းမာရေးဦးစီးဌာနရဲ့ စာရင်းတွေအရ သိရပါတယ်။

အတည်ပြုလူနာတွေကို နေပြည်တော် ဇေယျာသီရိမြို့နယ်မှာရှိတဲ့ တပ်မတော်ဆေးရုံမှာပဲ ဆေးကုသ ပေးနေပြီး တပ်မတော်အနေနဲ့ ကျန်းမာရေးဝန်ကြီးဌာနကို လူနာအမည်စာရင်းနဲ့ ကျား၊ မ အရေအတွက်ကိုသာ ပေးပို့တာဖြစ်လို့ ပိုးကူးစက်ခံရမှုဖြစ်စဉ် အသေးစိတ်နဲ့ ကူးစက်ခံရတဲ့ တပ်မတော်သားရဲ့ ရာထူးနဲ့ ဘယ်တပ်က ဆိုတာမျိုးကိုတော့ မသိရကြောင်း ဒေါက်တာ မြတ်ဝဏ္ဏစိုး ကပြောပါတယ်။

တပ်အတွင်း ပိုးတွေ့အတည်ပြုလူနာတွေ များပြားလာတာနဲ့ ပတ်သက်လို့ တပ်မတော်အနေနဲ့ အခုချိန်ထိ သတင်း တစ်စုံတစ်ရာ ထုတ်ပြန်တာမျိုး မရှိသေးပါဘူး။

တပ်မတော်သတင်းမှန်ပြန်ကြားရေးအဖွဲ့ ဥက္ကဋ္ဌ ဗိုလ်ချုပ် ဇော်မင်းထွန်းကို မေးမြန်းဖို့ RFA က ဖုန်းနဲ့ ဆက်သွယ်ခဲ့ပေမယ့်လည်း ဆက်သွယ်လို့မရသေးပါဘူး။

နေပြည်တော် ၈ မြို့နယ်အတွင်း ဒီဇင်ဘာ ၂၇ ရက်နေ့ထိ ပိုးတွေ့လူနာ ၈၂၇ ဦးရှိပါတယ်။ အဲ့ဒီထဲမှာ အစိုးရဝန်ထမ်းအများဆုံးရှိတဲ့ ဇမ္ဗူသီရိမြို့နယ်က ပိုးတွေ့လူနာ အများဆုံးဖြစ်ပြီး၊ တပ်မတော်သားနဲ့ တပ်မိသားစုဝင်တွေ အများဆုံးရှိတဲ့ ဇေယျာသီရိမြို့နယ်က ပိုးတွေ့လူနာ ဒုတိယ အများဆုံးဖြစ်ပါတယ်။

ဒီဇင်ဘာလ ၂၇ ရက်နေ့အထိ ပိုးတွေ့လူနာ ၈၀၀ ကျော်အနက် ရောဂါသက်သာလို့ ဆေးရုံက ဆင်းခွင့်ရသူ ၅၀၀ ကျော်ရှိပြီး ဆေးရုံတက်လူနာ ၂၀၀ ကျော်ရှိနေပါသေးတယ်။

တစ်နိုင်ငံလုံးမှာတော့ ဒီဇင်ဘာလ ၂၇ ရက်နေ့ ည ၈ နာရီနောက်ဆုံးထုတ်ပြန်ချက်အရ အတည်ပြုလူနာ တစ်သိန်းနှစ်သောင်းကျော်၊ ဆေးရုံဆင်းခွင့်ရသူ တစ်သိန်းကျော်နဲ့ သေဆုံးလူနာ ၂၆၀၁ ဦးရှိနေပြီဖြစ်ပါတယ်။


RFA Burmese

https://www.rfa.org/burmese/news/morethan-140soldiers-are-corona-positive-12282020050144.html

ဝရမ်းပြေး ဦးလှဆွေ ရဲစခန်းကို သွားရောက် အဖမ်းခံ


ဦးလှဆွေဟာ ရန်ကုန်မြို့ အနောက်ပိုင်း ခရိုင်ရဲတပ်ဖွဲ့ရုံးမှာ (ဒီဇင်ဘာ ၂၈ ရက်နေ့) ဒီနေ့ မနက်က လာရောက် အဖမ်းခံခဲ့တယ်လို့ မြန်မာနိုင်ငံရဲတပ်ဖွဲ့ ပြောရေးဆိုခွင့်ရှိသူ ရဲမှူးကြီး ကျော်သီဟက အတည်ပြုပြောပါတယ်။

အမျိုးသားရေးတက်ကြွလှုပ်ရှားသူတစ်ဦးဖြစ်တဲ့ ကိုဝင်းကိုကိုလတ်က ရဲစခန်းမှာ သွားရောက်အဖမ်းခံခဲ့ပြီး ရမန်ပေးလိုက်လို့ သိရကြောင်းဆိုပါတယ်။

"ခရိုင်ရဲစခန်းမှာ သွားရောက်အဖမ်းခံတယ်။ အဲကနေ သက်ဆိုင်ရာ အနောက်ပိုင်းခရိုင်ရုံးကိုသွားပြီး ရမန်ပေးတယ်လို့ ကြားတယ်။ ဦးလှဆွေက ဘာလို့ အဖမ်းခံတာလဲတော့ မသိဘူး။"

ဦးလှဆွေကို ဒီနေ့ နေ့လယ်မှာ အင်းစိန်ထောင်ကိုပို့လိုက်ပြီလို့ သိရကြောင်းနဲ့ ဇန်နဝါရီ ၁၁ ရက်နေ့ကို ရုံးချိန်းထပ်မံချိန်းလိုက်တယ်လို့ သိရကြောင်း ကိုဝင်းကိုကိုလတ်က ပြောပါတယ်။

သွားရောက် အဖမ်းခံခဲ့တဲ့ ဦးလှဆွေကတော့ တပ်ထားတဲ့ ပုဒ်မနဲ့ သူကျူးလွန်ခဲ့တာ ထိုက်တန်မှုမရှိလို့ ရှောင်နေရတာဖြစ်တယ်လို့ Myanmar Hard Talk ဆိုတဲ့ အွန်လိုင်းစာမျက်နှာက ဆက်သွယ်မေးမြန်းခန်းမှာ အဖမ်းမခံခင် ဖြေကြားထားပါတယ်။ ပြီးခဲ့တဲ့ ‌ရွေးကောက်ပွဲမှာ တရားမျှတမှု မရှိတာတွေကို ထုတ်ဖော် ပြောဆိုချင်လို့ အခုလို ပြန်လာတာလို့လည်း ဦးလှဆွေက ဆိုပါတယ်။

Myanmar Hard Talk ဆိုတဲ့ အွန်လိုင်းစာမျက်နှာကို ဒီဇင်ဘာ ၂၄ ရက်နေ့ကမှ ဖွင့်လိုက်တာဖြစ်ပြီး ပထမဆုံး ဆက်သွယ်မေးမြန်းချက်အနေနဲ့ ဦးလှဆွေနဲ့ ပြောဆိုတင်ဆက်ထားတာပါ။

၂၀၁၉ ခုနှစ် သြဂုတ် ၃ ရက်က ရန်ကုန်မြို့၊ မဟာဗန္ဓုလပန်းခြံရှေ့မှာ ကျင်းပခဲ့တဲ့ ‘ မြန်မာ့တပ်မတော် ထိပ်တန်းအရာရှိများအပေါ် အမေရိကန်နိုင်ငံမှ အရေးယူပိတ်ဆို့မှုများအား ဆန့်ကျင်ရှုတ်ချပွဲ’ မှာ အစိုးရကို ထိခိုက်တဲ့ ဟောပြောမှုလုပ်ဆောင်ခဲ့လို့ ဆိုပြီး ဦးလှဆွေကို ကျောက်တံတားမြို့နယ် ဒုတိယ အထွေထွေ အုပ်ချုပ်ရေးမှူး ဦးမျိုးမြင့်က ပြီးခဲ့တဲ့ ၂၀၁၉ သြဂုတ် ၆ ရက်နေ့မှာ နိုင်ငံတော် အကြည်ညိုပျက်စေမှု ပုဒ်မ ၁၂၄ (က) နဲ့ အနောက်ပိုင်းခရိုင်တရားရုံးကို တိုင်ကြားထားတာဖြစ်ပါတယ်။

တရားလို ဦးမျိုးမြင့်ကို RFA က မေးမြန်းပေမယ့် ဒီအမှုနဲ့ပတ်သက်လို့ တရားရုံး ပြန်ကြားရေးဌာနကိုပဲ မေးဖို့နဲ့ သူ့အနေနဲ့ မဖြေလိုဘူးလို့ ပြောပါတယ်။ အနောက်ပိုင်းခရိုင် တရားရုံး ပြန်ကြားရေးဌာနကို မေးမြန်းဖို့ ကြိုးစားခဲ့ပေမယ့် ဆက်သွယ်လို့ မရခဲ့ပါဘူး။

အခုချိန်မှ ဦးလှဆွေ လာရောက် အဖမ်းခံတာဟာ နိုင်ငံရေးသမား တစ်ယောက်အတွက် သိက္ခာကျတယ်လို့ မြင်ကြောင်း ပြန်ကြားရေးဝန်ကြီးဟောင်းလည်းဖြစ်၊ နိုင်ငံရေးလေ့လာသုံးသပ်နေသူ လည်းဖြစ်တဲ့ ဦးရဲထွဋ်က ပြောပါတယ်။

"ကျွန်တော့်အမြင်ကတော့ ဒါက အစတည်းက ဦးလှဆွေ အနေနဲ့ ထွက်ပြေးတိမ်းရှောင်နေဖို့ မသင့်ဘူး။ ကိုယ်ပြောခဲ့တဲ့စကားကို ကိုယ်တာဝန်ယူရမှာ။ တရားရုံးရှေ့မှာ ခုခံကာကွယ်ဖို့ တာဝန်ရှိတယ်လို့ မြင်တယ်။ ဒါကြောင့် ထွက်ပြေးတိမ်းရှောင်နေပြီး အခုအချိန်ကျမှ လာပြီး အဖမ်းခံတာကတော့ နိုင်ငံရေးသမားတစ်ယောက်အနေနဲ့ နိုင်ငံရေးသိက္ခာကျတယ်လို့ မြင်တယ်။"

ဦးလှဆွေဟာ ၂၀၁၀ ရွေးကောက်ပွဲမှာ အနိုင်ရခဲ့ပြီး ပထမအကြိမ် လွှတ်တော်သက်တမ်းမှာ ပြည်တောင်စု ကြံ့ခိုင်ဖွံ့ဖြိုးရေးပါတီ USDP ရဲ့ ဂန့်ဂေါမြို့နယ် အမျိုးသားလွှတ်တော် ကိုယ်စားလှယ် တစ်ဦးအဖြစ် တာဝန်ထမ်းဆောင်ခဲ့ပါတယ်။ ဒုတိယအကြိမ် လွှတ်တော်သက်တမ်းအတွက် USDP ပါတီကနေ ထပ်မံ ဝင်ရောက်ယှဉ်ပြိုင်ခဲ့ပေမယ့် ရှုံးနိမ့်ခဲ့ပါတယ်။

အသက် ၆၀ ရှိပြီဖြစ်ပြီး ဒုတိယ ဗိုလ်မှူးကြီး တာဝန်ထမ်းဆောင်ခဲ့သူ တပ်မတော်အရာရှိဟောင်း ဦးလှဆွေ ဟာ မြန်မာ့အသံနဲ့ ရုပ်မြင်သံကြားမှာ ညွှန်ကြားရေးမှူးအဖြစ်လည်း တာဝန်ထမ်းဆောင်ခဲ့ပါတယ်။

ဦးလှဆွေဟာ အမျိုးသားရေးလှုပ်ရှားမှုတွေမှာ ဟောပြောလေ့ရှိသလို အမျိုးသားရေး ဆရာတော်လို့ သူသိများတဲ့ ဆရာတော် ဦးဝီရသူလည်း ပါဝင်ဟောပြောလေ့ရှိပါတယ်။

ပြီးခဲ့တဲ့ နိုဝင်ဘာ ၂ ရက်နေ့ကလည်း ဦးလှဆွေနဲ့ ပုဒ်မတူ နိုင်ငံတော် အကြည်ညိုပျက်စေမှုပုဒ်မ ၁၂၄ (က) နဲ့ ဝရမ်းထုတ်ခံထားရတဲ့ အမျိုးသားရေး ဆရာတော် ဦးဝီရသူဟာ အနောက်ပိုင်းခရိုင် ရဲတပ်ဖွဲ့ ရုံးမှာပဲ လာရောက်အဖမ်းခံခဲ့ပါတယ်။

သူတို့နှစ်ဦး လာရောက်အဖမ်းခံတယ်ဆိုတာ တရားရင်ဆိုင်လိုက်မှ ဖြေရှင်းလို့ရမယ့် ပုဒ်မတွေဖြစ်တဲ့အတွက် လာရောက်တရားရင်ဆိုင်ရာလို့မြင်ကြောင်း အမျိုးသားရေးလှုပ်ရှားမှုကြောင့် တရားစွဲခံရသူတွေကို ကူညီပေးနေတဲ့ ရှေ့နေ ဦးအေးပိုင်က သုံးသပ်ပြောပါတယ်။

"ရာဇဝတ်မှုတွေမှာ ကျင့်ထုံးပုဒ်မ ၅၁၂ အရ တရားခံပြေးအဖြစ် ဝရမ်းပြေးအဖြစ် ကြေညာခံထားရရင် တရားရုံးမှာ ရင်ဆိုင်ဖြေရှင်းတာမရှိရင် အမှုက မပြီးပါဘူး။ ဒါကြောင့် တရားရုံးမှာ ရင်ဆိုင်ဖြေရှင်းဖို့ ဆုံးဖြတ်လိုက်တယ်လို့ ထင်ပါတယ်။ သူတို့ကို စွဲဆိုထားတဲ့ပုဒ်မက ထောင်ဒဏ် တစ်သက်တစ်ကျွန်းအထိ ချနိုင်တယ်။ တရားရုံးကလည်း ခရိုင်တရားရုံးဆိုတော့ ထောင်ဒဏ်တစ်သက်တစ်ကျွန်းအထိ ချလို့ရတယ်။ အမှုပေါ်ပေါက်ချက်အရ တရားရုံးတွေရဲ့ ဆင်ခြင်တုံ တရားနဲ့ ဆုံးဖြတ်မယ်လို့ နားလည်ထားပါတယ်။"

ပုဒ်မ ၁၂၄ (က) ဟာ ပြစ်မှုထင်ရှားရင် အမြင့်ဆုံး ထောင်ဒဏ် တစ်သက်တစ်ကျွန်းအထိ ပြစ်ဒဏ်ချမှတ်နိုင်တဲ့ ပုဒ်မ ဖြစ်ပါတယ်။

အမျိုးသားရေး တက်ကြွလှုပ်ရှားရာမှာ ထင်ရှားသူ ၂ ဦး အခုလို လာရောက်အဖမ်းခံတဲ့အပေါ် NLD ပါတီ ဗဟိုပြန်ကြားရေးကော်မတီ အတွင်းရေးမှူး မုံရွာအောင်ရှင်ကတော့ သူတို့ကို ဝန်းရံသူတွေနဲ့ ပတ်သက်ပြီး သိချင်တာလည်း ပါနိုင်တယ်လို့ သုံးသပ်ပါတယ်။

"နံပါတ် ၁ က သူတို့စိတ်ထဲမှာ ဝရမ်းပြေးပဲဆိုပါစို့။ တိမ်းရှောင်နေတာထက်စာရင် တရားဝင် တရားဥပဒေနဲ့ ရင်ဆိုင်မယ်ဆိုပြီး လာတာဖြစ်မယ်ပေါ့။ နောက်တစ်ချက်က သူတို့အဖမ်းခံရင် သူတို့ကို ဝန်းရံသူ၊ ထောက်ခံသူတွေရဲ့ ထောက်ခံမှု၊ ဝန်းရံမှု၊ ဆန္ဒပြမှုတွေကို သိချင်တာလဲ ဖြစ်နိုင်တယ်။ အဲဒီ နှစ်ချက်တွေ့တယ်။"

ဆရာတော် ဦးဝီရသူကိုလည်း အင်းစိန်အကျဉ်းထောင်မှာ ဖမ်းဆီးထိန်းသိမ်းထားပြီး ကိုဗစ် ကပ်ဘေးအန္တရာယ် ကြောင့် တရားရုံးချိန်းကို ဗီဒီယိုကတဆင့် ဆောင်ရွက်နေပါတယ်။


RFA Burmese

https://www.rfa.org/burmese/news/hla-swe-arrested-12282020005443.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ