ပါရီရောက် အမ်မလီ Emily in Paris မြူးကြွ ပျော်ရွှင်စရာဇာတ်လမ်းတွဲကို နက်ဖလစ် Netflix မှာ ကြည့်ဖူးပြီးတဲ့သူတွေ ရှိသလို မကြည့်ရသေးတဲ့သူတွေလည်း ရှိမှာပါ။
ဒီကားက ဇာတ်လမ်းနာမည်အတိုင်း အမ်မလီဆိုတဲ့ မိန်းကလေးတစ်ဦး ပါရီကို ပြောင်းလာတဲ့ ဇာတ်လမ်းဖြစ်ပါတယ်။
အသက် ၂၀ ကျော်ရွယ် မိန်းကလေး အမ်မလီ အဖြစ် သရုပ်ဆောင်ထားသူက လီလီကောလင်းစ်ပါ။ အမ်မလီဟာ စျေးကွက်မြှင့်တင်ရေးအလုပ်နဲ့ အမေရိကန် ရှီကာဂိုကနေ ပြင်သစ်နိုင်ငံ ပါရီကို ပြောင်းလာတာပါ။
စိတ်ကူးယဉ်လို့ အင်မတန်ကောင်းတဲ့ ကြည်နူးဖွယ်ရာ ပါရီ အငွေ့အသက်ကို ရိုက်ကူးပြတဲ့ အခါမှာ ဝေဖန်သံတွေ ညံခဲ့လို့ ဖန်တီးတင်ပြသူ ဒယ်ရင် စတားကတော့ ကာကွယ် ပြောကြားခဲ့ပါတယ်။
ဇာတ်လမ်းထဲမှာ တရားသေ အယူအဆတွေနဲ့ ပုံဖော်ထားတာတွေ ဘယ်လောက်များ ပါနေလို့လဲ။ ဒါကို လတ်တလော ပါရီကို ရောက်လာသူတွေကို မေးကြည့်ထားပါတယ်။
ဝေဖန်သူတွေရဲ့ အမြင်
ပထမအပိုင်းတွေ ပြသွားတဲ့ အထဲမှာ ဇာတ်ညွှန်းရေးသူတွေ တွေးမိသမျှ ပါရီအကြောင်းကို တရားသေအယူအဆတွေနဲ့ ဖန်တရာတေနေတာတွေ အကုန် သွန်ချထားတာ ဖြစ်တယ်လို့ ဆောင်းပါးရှင် ရေဘက်ကာ နီကိုလ်ဆင် က ဂါးဒီးယန်း သတင်းစာ မှာ ရေးထားပါတယ်။
မူလန်းရုချ် ကပွဲ၊ ချမ်းသာတဲ့ အမျိုးသမီးတွေဟာ ဖက်ရှင်ကျတဲ့ ဝတ်စုံတွေ နဲ့ ခွေးပေါက်စ လေးတွေနဲ့ လမ်းလျှောက် ထွက်တဲ့ အခါမှာ လမ်းဘေးမှာ အညစ်အကြေး စွန့်ခွင့်ပေးပုံတွေ၊ အသားကို ကင်တယ်ဆိုရုံ စားပုံ နဲ့ စီးကရက်ကို မီးကူးပြီး ဆက်တိုက်ဖွာတာတွေ၊ မနက်စာမှာ ဝိုင်အရက် ထည့်သောက်ပုံ၊ အမျိုးသားတွေ ဆိုရင်လည်း အဖိုးတန် ဝတ်စုံတွေ ဝတ်ထားရင်း လိင်ကိစ္စ ကို လွတ်လွတ်လပ်လပ် ပြောကြတာတွေ၊ အစာသွပ်မုန့် ပေစတြီ တွေကို အကျအန စားကြပုံတွေဟာ အမေရိကန် ယဉ်ကျေးမှု အရ မနှစ်သက်စရာအဖြစ် ရေဘက်ကာ နီကိုလ်ဆင်က ရေးထားတာပါ။
ဇာတ်လမ်းတွဲ ဖန်တီးသူ ဒယ်ရင်စတားဟာ Sex and the City ဇာတ်လမ်းတွဲကိုလည်း ရိုက်ကူး တင်ဆက်ခဲ့သူ ဖြစ်ပါတယ်။ သူက ဟောလိဝုဒ် သတင်းထောက် စာစောင် ကို ပြောခဲ့ရာမှာတော့ သူဟာ ပျော်ရွှင်ကြည်နူးစရာ ပုံစံ နဲ့ Emily in Paris ကို တင်ပြချင်တာဖြစ်ပြီး ပါရီ သို့ ပေးတဲ့ ရည်းစားစာ အနေနဲ့ ရည်ရွယ်ဖန်တီးခဲ့တယ်လို့ ဆိုခဲ့ပါတယ်။
ဘယ်လိုပဲ ဖြစ်ပါစေ ဒီကားကို နက်ဖလစ်မှာ တင်လိုက်စဥ်ကစပြီး လူကြည့် အများဆုံး ဆန်ကာတင် ဆယ်ကားထဲမှာ ပါတဲ့ ဇာတ်လမ်းတွဲ ဖြစ်ခဲ့ပါတယ်။
ပါရီရောက် လူငယ်တွေရဲ့ အမြင်
ဒီဇာတ်လမ်းတွဲဟာ ပါရီကို စိတ်ကူးယဉ်လို့ အင်မတန်ကောင်းတဲ့ ဆွတ်ပျံ့ဖွယ်မြို့လို့ ပုံဖော်ထားတယ်လို့ လို့ ဘက်သနီ အီဗီက ဘီဘီစီ Radio 1 ကို ပြောပြပါတယ်။
လှပတဲ့ အခင်းအကျင်းနဲ့ တိကျတဲ့ အကြောင်းအရာတွေပါ ရောနှောပြထားပေမဲ့ တကယ့်အပြင်က ဘဝတွေ အတိုင်းတော့ မဟုတ်ဘူးလို့ ဆိုပါတယ်။
ဘက်သနီ ဟာ ယူကေနိုင်ငံ ဘာမင်ဂန်မြို့ ကနေ ပါရီမြို့တော်ဆီကို လအနည်းငယ်အကြာက ကလေးထိန်း အလုပ်လုပ်ဖို့ ရောက်လာတဲ့ ၂၄ နှစ် အရွယ် အမျိုးသမီးပါ။
သူက ဇာတ်လမ်းကို ကြိုက်နှစ်သက်ပေမဲ့ ဒီကားက ပါရီမြို့တော်ရဲ့ မနှစ်မြို့ဖွယ်ရာတွေကိုတော့ မထင်ဟပ်စေခဲ့ဘူးလို့ ပြောပါတယ်။
ဥပမာ အားဖြင့် လူမျိုး၊ အသားအရောင် ခွဲခြားတာတွေ၊ ဘာသာရေး အခြေခံတဲ့ တိုက်ခိုက်မှုတွေ၊ မွတ်ဆလင်တွေ ခံရပုံတွေကို ပြောပြပါတယ်။
လတ်တလော ပြင်သစ်နိုင်ငံ မှာ အစ္စလာမ်မစ် အကြမ်းဖက်မှုတွေကို အစိုးရက တုံ့ပြန်ရာမှာ တင်းမာမှု တွေ ပေါ်ပေါက်တာရယ်၊ အကြမ်းဖက်သူတွေကြောင့် ပြင်သစ်နေ မွတ်ဆလင် တချို့ ဖိအားပေး ခံရတာတွေရယ်ကိုလည်း ဘက်သနီက ပြောပါတယ်။
ဒါ့အပြင် ဆင်းရဲတဲ့ ဒဏ်ခံနေရသူတွေ အများအပြား နဲ့ အိုးအိမ်မဲ့နေသူတွေလည်း နေရာတိုင်းမှာ ရှိနေတယ်လို့ ပြောပါတယ်။
အသက်၂၃ နှစ် အရွယ် ကရီနာ အာချေးဗားကတော့ နိုင်ငံတကာ ကျောင်းသား ဖလှယ်ရေး အစီအစဉ်အရ စီးပွားရေးပညာရပ် သင်ယူရအောင် ရုရှားကနေ ပါရီကို ရောက်လာသူပါ။
သူ့အဖို့တော့ ဇာတ်လမ်းထဲက အမ်မလီ လိုပဲ ရောက်ရောက်ချင်း ရက်ပိုင်းတွေမှာ လှပတဲ့ ပါရီ ရဲ့ ကြော့မော့တဲ့ဟန်ပန်ကို ကြည့်ရင်း စိတ်တက်ကြွခဲ့ရပုံ အထူးသဖြင့် အီဖယ်တာဝါ မျှော်စင်ကြီးရဲ့ ညရှုခင်းကို ကြည့်မဝ ဖြစ်ခဲ့ပုံတွေ ပြောပါတယ်။
ဒါပေမယ့် သူလည်းပဲ ဘက်သနီလိုပဲ ဒီဇာတ်လမ်းဟာ သရုပ်မှန်ကို အရောင်မခြယ်နိုင်ခဲ့ဘူးလို့ ပြောပါတယ်။ အမ်မလီကတော့ သူ့ဇာတ်လမ်း မှာ မိတ်ဆွေ ဖွဲ့ရတာ အင်မတန် လွယ်ကူနေပေမဲ့ အပြင်မှာ ဒီလို မဟုတ်တဲ့ အကြောင်း၊ သူ့လို နိုင်ငံတကာ ကျောင်းသားတွေနဲ့ ပြင်သစ်ကျောင်းသားတွေကြားမှာ ခွဲခြား ဆက်ဆံမှုတွေ ရှိကြောင်း ပြောပါတယ်။
တချို့ ပြင်သစ်လူမျိုးတွေ ကိုယ်တိုင် ဒီဇာတ်လမ်း ကို မကြိုက်တဲ့ အကြောင်းကတော့ တရားသေ ပုံဖော်ထားတွေကြောင့် ဖြစ်တယ်လို့ ပြောပါတယ်။
ဒါ့အပြင် ပါရီက လူတွေ ဟာ အယ်မလီ ပြောသလို ရိုင်းတယ် ဆိုတာ မဟုတ်တဲ့အကြောင်း၊ ဇာတ်လမ်းထဲမှာ ပုံဖော်ထားသလို အလုပ်ကို နောက်ကျရောက်ပြီး အရက်ကို တွင်တွင်သောက်တယ်ဆိုတာတွေကလည်း မမှန်လို့ ဒီစီးရီးကြည့်သူ တချို့က မကြိုက်ဘူးလို့ ပြောကြပါတယ်။
အသက် ၂၁ နှစ် ရွယ် ပြင်သစ်သူ စီလီယာ ပင်ညဲရိုးကတော့ ပြီးခဲ့တဲ့ လပိုင်းက ပါရီကို ပြောင်းလာပြီး ဘွဲ့လွန် မဟာသင်တန်း တက်ဖို့ ရောက်လာတာပါ။
သူကလည်း ပါရီကလူတိုင်း မရိုင်းပြကြဘူး ဒါပေမဲ့ အန္တရာယ် ရှိတဲ့ နေရာဆိုတာကို အပြင်မှာ ခံစားနိုင်ပေမဲ့ ဇာတ်လမ်းတွဲ ထဲမှာ ဒါကို မတင်ပြနိုင်ခဲ့ဘူးလို့ စီလီယာက ပြောပါတယ်။
သိပ်လည်းအလေးအနက် မထားကြပါနဲ့
စီလီယာက ပြင်သစ်တောင်ပိုင်းကနေ ပြောင်းလာသူ ဖြစ်လို့ သူ့အရပ်မှာ ရာသီဥတု ပိုကောင်းတယ်လို့ ပြောပါတယ်။
ပါရီမှာ မိုးက အမြဲလိုလို ရွာနေတတ်ပေမယ့် သူအနှစ်သက်ဆုံး အရာတွေကတော့ ဗိသုကာ လက်ရာတွေပါလို့ ဆိုပါတယ်။
ဇာတ်လမ်းထဲမှာ အရိုးစွဲနေတဲ့ တရားသေ ပုံဖော်မှုတွေ အများကြီးပါပြီး အပြင်မှာတော့ အဲဒီလို မဟုတ်ဘူးလို့ ပြောပါတယ်။
ကရီနာကလည်း ဒါကို သဘောတူပါတယ်။
ဒီဇာတ်လမ်းတွဲကို စိတ်လက် ပေါ့ပါးအောင် လောကကြီးကို ခဏမေ့နိုင်အောင် ကြည့်တာဖြစ်လို့ အပြင်နဲ့ ရာနှုန်းပြည့် မတူတာကလည်း ကောင်းပါတယ်လို့ ပြောပါတယ်။
BBC Burmese
Reviewed by THITHTOOLWIN
on
00:35
Rating:
No comments:
Post a Comment