မြန်မာနိုင်ငံမှာ COVID-19 ရောဂါကူးစက်သူ ၁,၂၁၀ ဦး ထပ်တိုးပြီး သေဆုံးသူ ၁၈ ဦး ထပ်တိုးတဲ့အကြောင်း ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ည ၈ နာရီ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ၂၄ နာရီအတွင်း စစ်ဆေးခဲ့တဲ့ ဓာတ်ခွဲနမူနာပေါင်း ၁၂,၁၇၀ ခုထဲမှာ အခုလို နောက်ထပ် ပိုးကူးစက်သူတွေ တွေ့ရတာဖြစ်ပြီး လက်ရှိအချိန်ထိ စစ်ဆေးပြီးသမျှ ဓာတ်ခွဲနမူနာပေါင်း ၆၈၈,၁၅၉ ခုထဲမှာ ဗိုင်းရပ်စ်ပိုးကူးစက်သူ စုစုပေါင်း ၅၂,၇၀၆ ဦးရှိတယ်ဆိုတာ အတည်ပြု ထုတ်ပြန်ထားပါတယ်။ သေဆုံးသူကတော့ စုစုပေါင်း ၁,၂၃၇ ဦးရှိပါပြီ။
ဒီကနေ့ညထုတ်ပြန်တဲ့ သေဆုံးသူတွေထဲမှာ ၁၃ ဦးဟာ ရောဂါအခံရှိသူတွေဖြစ်တယ်လို့ ကျန်းမာရေးဌာန ထုတ်ပြန်ချက်မှာ ဖော်ပြထားပါတယ်။
ဆေးရုံဆင်းခွင့်ရရှိသူက ၁,၄၄၄ ဦး ထပ်တိုးတာကြောင့် ဆေးရုံက ဆင်းသွားသူပေါင်း ၃၂,၇၇၄ ဦး ရှိသွားပါပြီ။ ဆေးရုံက ဆင်းသွားသူ အရေအတွက်ထက် ပိုးတွေ့သူအရေအတွက်က အခုရက်ပိုင်းတွေအတွင်း ဆက်တိုက်လို ပိုလျော့လာနေတာ တွေ့ရပါတယ်။
ဒီကနေ့ထုတ်ပြန်တဲ့ ဆေးရုံက ဆင်းသွားသူတွေထဲမှာ ရန်ကုန် COVID-19 ရောဂါ ကုသရေးဌာနတွေကနေ ဆင်းသွားသူက ၁,၁၅၃ ဦး ပါပါတယ်။
ဒီကနေ့ အရေအတွက်ထဲမှာ ပိုးတွေ့နှုန်း ၉.၉၄ ရာခိုင်နှုန်း၊ ပြန်ကောင်းသွားတဲ့နှုန်း ၆၂.၂ ရာခိုင်နှုန်းနဲ့ သေဆုံးနှုန်းက ၂.၃၅ ရာခိုင်နှုန်း ရှိတယ်လို့ ကျန်းမာရေးနဲ့ အားကစားဝန်ကြီးဌာန၊ သတင်းထုတ်ပြန်ရေးအဖွဲ့ဝင် ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက သူ့ရဲ့ ဖေ့စ်ဘုတ်မှာ မကြာသေးခင် အချိန်ပိုင်းအတွင်းက ရေးထားပါတယ်။
ဒီအချက်အလက်တွေအရဆိုရင် မနေ့ကထက် ဒီနေ့မှာ ပိုးတွေ့နှုန်း ပိုများသလို ပြန်ကောင်းတဲ့နှုန်းကလည်း ပိုများပြီးတော့ သေဆုံးနှုန်းက အနည်းငယ် လျော့ကျသွားတာ တွေ့ရပါတယ်။
ဗွီအိုအေ (မြန်မာပိုင်း)
https://burmese.voanews.com/a/myanmar-covid-update-oct-31/5643193.html
Reviewed by THITHTOOLWIN
on
00:31
Rating:
No comments:
Post a Comment