မြောက်ပိုင်းမဟာမိတ်သုံးဖွဲ့ ငြိမ်းချမ်းရေးဆွေးနွေးပွဲ မျှော်လင့်



Share/Bookmark
၂၀၁၈ ခုနှစ်က ကျင်းပခဲ့တဲ့ FPNCC အဖွဲ့ဝင်တွေဖြစ်တဲ့ KIA, SSPP/SSA,AA,TNLA,MNDAA နဲ့ NDAA တို့ ဆွေးနွေးပွဲ။

မြန်မာ့တပ်မတော်နဲ့ စစ်ရေးပဋိပက္ခဖြစ်နေဆဲ မြောက်ပိုင်းညီနောင်မဟာမိတ် ၃ ဖွဲ့ကနေ NLD အစိုးရ၊ တပ်မတော်တို့နဲ့ တပြည်လုံး အတိုင်းအတာ အပစ်အခတ်ရပ်စဲရေး ငြိမ်းချမ်းရေးလုပ်ငန်းတွေ ဖော်ဆောင်ဖို့ တွေ့ဆုံဆွေးနွေးဖို့ မျှော်လင့်နေကြပါတယ်။ အပြည့်အစုံကို နိုင်ကွန်းအိန် တင်ပြပေးထားပါတယ်။

မကြာသေးမီက ကျင်းပပြီးစီးခဲ့တဲ့ ၂၀၂၀ အထွေထွေရွေးကောက်ပွဲမှာ အမျိုးသားဒီမိုကရေစီအဖွဲ့ချုပ် (NLD) ကနေ တပြည်လုံးအတိုင်းအတာ အောင်မြင်ခဲ့မှုအပေါ် ကြိုဆိုကြောင်း မြောက်ပိုင်းညီနောင်မဟာမိတ် ၃ ဖွဲ့က နိုဝင်ဘာလ ၂၀ ရက်နေ့ ရက်စွဲနဲ့ သဘောထား ထုတ်ပြန်ကြေညာခဲ့ပါတယ်။

အထူးသဖြင့် အစိုးရနဲ့ တပ်မတော်တို့ရဲ့ အပြုသဘောဆောင်တဲ့ ထုတ်ပြန်ချက်ကို ကြိုဆိုကြောင်း မြောက်ပိုင်းညီနောင်မဟာမိတ် ၃ ဖွဲ့ရဲ့ ပြောခွင့်ရ ဗိုလ်မှူးတာအိုက်ကျော်က အခုလိုပြောပါတယ်။

“ကျနော်တို့ ညီနောင်မဟာမိတ် ၃ ဖွဲ့ပေါ့နော်။ Online ပေါ်မှာ အစည်းအဝေး လုပ်လိုက်တယ်။ ဒီလက်ရှိတပ်ဘက်ရော အစိုးရဘက်ရော ဒီ ငြိမ်းချမ်းရေးနဲ့ ပတ်သက်ပြီးမှ အသီးသီး ကြေညာချက်ထုတ်ထားတယ်ပေါ့နော်။ သူတို့ရဲ့ ငြိမ်းချမ်းရေးအပေါ် ထုတ်ပြန်ချက် သဘောထားတွေကို ကျနော်တို့က အပြုသဘောအနေနဲ့ ရှုမြင်တယ်ပေါ့နော်။ ငြိမ်းချမ်းရေးအတွက် အပြုသဘောဆောင်တယ်လို့ အဲဒီလိုမျိုးမြင်တယ်။ အဲဒီထုတ်ပြန်ချက်ကို ကျနော်တို့ ကြိုဆိုတယ်။”

ရွေးကောက်ပွဲမှာ အများစုနဲ့ အနိုင်ရထားတဲ့ NLD အမျိုးသားဒီမိုကရေစီအဖွဲ့ချုပ်ကလည်း ဒီမိုကရေစီ ဖက်ဒရယ်ပြည်ထောင်စု ပေါ်ပေါက်ရေး ရွေးကောက်ပွဲမှာ ပါဝင်ခဲ့ကြတဲ့ တိုင်းရင်းသား နိုင်ငံရေးပါတီတွေနဲ့ လက်တွဲဖို့ ဆန္ဒရှိကြောင်း နိုဝင်ဘာ ၁၂ ရက်နေ့မှာ ကမ်းလှမ်းခဲ့ပါတယ်။

အလားတူ တပ်မတော်ကနေ နိုဝင်ဘာ ၉ ရက်က ထုတ်ပြန်ခဲ့တဲ့ ပစ်ခတ်တိုက်ခိုက်မှု ရပ်စဲရေးနဲ့ ထာဝရငြိမ်းချမ်းရေးအတွက် ထုတ်ပြန်ချက်နဲ့အတူ ထပ်မံပြင်ဆင်ဖွဲ့စည်း တာဝန်ပေးအပ်လိုက်တဲ့ ဆွေးနွေးမှုကော်မတီကို ငြိမ်းချမ်းရေးနဲ့ အပစ်ရပ်ရေးအတွက် အပြုသဘောဆောင်တဲ့ ခြေလှမ်းအဖြစ် ကြိုဆိုကြောင်း ညီနောင် ၃ ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

မြောက်ပိုင်းညီနောင်မဟာမိတ် ၃ ဖွဲ့ကတော့ အစိုးရ၊ တပ်မတော်တို့နဲ့ တွေ့ဆုံဆွေးနွေးဖို့ မျှော်လင့်နေတယ်လို့ ဗိုလ်မှူးတာအိုက်ကျော်က ပြောပါတယ်။

“တပ်ရော အစိုးရဘက် ပြီးလို့ရှိရင် ကမ်းလှမ်းလာခဲ့ရင် ကျနော်တို့ဘက်ကတော့ အမြဲတမ်း အသင့်ပြင်ရှိတယ်ပေါ့။ ကျနော်တို့အဖွဲ့လည်း ဒီ FPNCC ဦးဆောင်မှုနဲ့အတူ ငြိမ်းချမ်းရေးလုပ်ငန်းကို အောင်မြင်ဖို့အတွက်ပေါ့နော်။ ကျနော်တို့ ၃ ဖွဲ့အနေနဲ့ ဆက်ပြီးမှ ဆွေးနွေးပွဲ ပြုလုပ်သွားဖို့ပေါ့။”

ပဏာမအပစ်ရပ် သဘောတူညီချက် လက်မှတ်ရေးထိုးမယ်ဆိုရင် မြောက်ပိုင်းမဟာမိတ်အဖွဲ့နဲ့အတူ လက်မှတ်ရေးထိုးသွားမှာဖြစ်ပြီး နိုင်ငံရေး ဆွေးနွေးမှုတွေကိုတော့ UWSA ဝတပ်ဖွဲ့ဦးဆောင်တဲ့ ပြည်ထောင်စု နိုင်ငံရေး ဆွေးနွေးညှိနှိုင်းရေးကော်မတီ FPNCC အဖွဲ့ဝင် ၇ ဖွဲ့လုံးနှင့်အတူ လုပ်ဆောင်သွားမယ်လို့ ဆိုပါတယ်။

မြောက်ပိုင်းညီနောင်သုံးဖွဲ့ဖြစ်တဲ့ တအာင်းပလောင်အဖွဲ့ (TNLA)၊ ရခိုင်လက်နက်ကိုင် (AA) နဲ့ မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA)၊ ကိုးကန့်အဖွဲ့တို့ဟာ တပ်မတော်နဲ့ စစ်ရေးတင်းမာမှုတွေရှိတဲ့ အဖွဲ့တွေဖြစ်ပါတယ်။

လက်ရှိ ရှမ်းပြည်နယ်မြောက်ပိုင်းဒေသမှာ မြန်မာတပ်မတော်ရော မြောက်ပိုင်းညီနောင် ၃ ဖွဲ့ကပါ အပစ်ရပ်ကြောင်း ကြေညာထားပေမယ့် TNLA တအာင်းပလောင်အဖွဲ့၊ KIO ကချင်လွတ်လပ်ရေးအဖွဲ့တို့နဲ့ ဒီရက်ပိုင်း တိုက်ပွဲဖြစ်ပွားတာ ရှိပေမယ့် အရင်ကထက် လျော့ပါးလာနေတယ်လို့ ဗိုလ်မှူးတာအိုက်ကျော်က ပြောပါတယ်။

တပ်မတော်အနေနဲ့ကတော့ မြန်မာအစိုးရနဲ့ NCA တနိုင်ငံလုံး အပစ်အခတ်ရပ်စဲရေး သဘောတူညီချက်ကို လက်မှတ်ရေးထိုးပြီးသား လက်နက်ကိုင်အဖွဲ့တွေနဲ့ရော မထိုးရသေးတဲ့ အဖွဲ့တွေနဲ့ပါ ငြိမ်းချမ်းရေးရအောင် ကြိုးပမ်းသွားဖို့ အမြဲတမ်းကော်မတီတခုကို ဖွဲ့စည်းခဲ့တာလို့ တပ်မတော်ဘက်က ဗွီအိုအေကို ပြောဆိုခဲ့ပါတယ်။

စစ်ရေးတင်းမာနေတဲ့ ရခိုင်ပြည်နယ်ဘက်မှာလည်း AA ရခိုင်လက်နက်ကိုင်အဖွဲ့နဲ့ မြန်မာစစ်တပ်တို့အကြား ဒီရက်ပိုင်းတွေအတွင်း တိုက်ပွဲတွေ ရပ်တန့်နေပါတယ်။

AA ရခိုင်လက်နက်ကိုင်အဖွဲ့ အနေနဲ့ နိုဝင်ဘာလက ကျင်းပခဲ့တဲ့ အထွေထွေရွေးကောက်ပွဲမှာ NLD ပါတီအနေနဲ့ ထပ်မံအနိုင်ရတဲ့အပေါ် ချီးကျူးဂုဏ်ပြုကြောင်း၊ ၎င်းတို့ ဖမ်းဆီးထိန်းသိမ်းထားတဲ့ တောင်ကုတ်မြို့နယ်က NLD ပါတီဝင် ၃ ဦးကို မည်သည့်နှိပ်စက်ခြင်းမှ မရှိဘဲ ကောင်းမွန်စွာ ထိန်းသိမ်းထားပြီး နှစ်ဦးနှစ်ဖက် ညှိနှိုင်းအဆင်ပြေပြီး အပြန်အလှန် နားလည်မှုရှိတဲ့ အခြေအနေမှာ အမြန်ဆုံး ပြန်လွှတ်ပေးမယ်လို့ AA ဘက်က နိုဝင်ဘာ ၂၁ ရက်နေ့ ရက်စွဲနဲ့ ထုတ်ပြန်ထားပါတယ်။

ဒီထုတ်ပြန်ချက်မှာ မရေရာတဲ့ စွပ်စွဲချက်တွေနဲ့ ထောင်သွင်းအကျဉ်းချခံနေရတဲ့ ရခိုင်ဒေသခံ တိုင်းရင်းသားတွေနဲ့ ရခိုင်နိုင်ငံရေးသမားတွေ၊ မတရားဖမ်းဆီးခြင်း ခံနေရတဲ့ ULA အဖွဲ့ဝင် ဆွေမျိုးသားချင်းတွေ ငြိမ်းချမ်းရေးအတွက် တောင်းဆိုဆန္ဒပြလို့ ဖမ်းဆီးခံထားရတဲ့ မြန်မာပြည်အနှံ့မှ တက္ကသိုလ်ကျောင်းသားတွေကို ခြွင်းချက်မရှိ အမြန်ဆုံး ပြန်လည်လွှတ်ပေးဖို့ကိုလည်း အလေးအနက်တောင်းဆိုကြောင်း AA ရဲ့ ထုတ်ပြန်ချက်မှာ ဖော်ပြထားပါတယ်။


နိုင်ကွန်းအိန်/VOA (Burmese)

https://burmese.voanews.com/a/tnla-aa-mndaa-peace-talk/5671306.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ