မြန်မာနိုင်ငံမှာ ပြီးခဲ့တဲ့ ၂၄ နာရီအတွင်း COVID-19 ရောဂါအတွက် ဓာတ်ခွဲနမူနာပေါင်း ၁၅,၅၃၄ ခုကို စစ်ဆေးခဲ့တာမှာ နောက်ထပ် ရောဂါကူးစက်သူ ၁,၂၁၂ ဦး ထပ်တိုးတာကြောင့် စုစုပေါင်း ကူးစက်သူအရေအတွက် ၆၄,၄၅၃ ဦး ရှိသွားပြီဖြစ်ပါတယ်။
သေဆုံးသူက ၁၉ ဦး ထပ်တိုးပြီး စုစုပေါင်း ၁,၄၈၀ ဦးရှိသွားပြီလို့ ကျန်းမာရေးနဲ့အားကစားဝန်ကြီးဌာနရဲ့ ဒီကနေ့ည ၈ နာရီထုတ်ပြန်ချက်မှာ ဖော်ပြထားပါတယ်။ အခုထပ်တိုးတဲ့ သေဆုံးသူတွေထဲမှာ ၁၅ ဦးက ရောဂါအခံရှိသူတွေဖြစ်တယ်လို့ ကျန်းမာရေးဌာနကပြောပါတယ်။
အခုချိန်ထိ စစ်ဆေးပြီးသမ ျှ ဓာတ်ခွဲနမူနာပေါင်းကတော့ ၈၃၆,၆၉၇ ခု ရှိသွားပါပြီ။
ဒီကနေ့ညထုတ်ပြန်ချက်မှာ ဆေးရုံကဆင်းခွင့်ရသူ ၁,၁၂၁ ဦးထပ်တိုးတာကြောင့် ဆေးရုံကဆင်းသွားသူပေါင်း ၄၈,၅၃၂ ဦး ရှိသွားပြီဖြစ်ပါတယ်။
ဒီကနေ့ အရေအတွက်ထဲမှာ ပိုးတွေနှုန်း ၇.၈ ရာခိုင်နှုန်း၊ ပြန်ကောင်းသွားတဲ့နှုန်း ၇၅.၃ ရာခိုင်နှုန်းနဲ့ သေဆုံးနှုန်းက ၂.၃ ရာခိုင်နှုန်း ရှိတယ်လို့ ကျန်းမာရေးနဲ့ အားကစားဝန်ကြီးဌာန၊ သတင်းထုတ်ပြန်ရေးအဖွဲ့ဝင်၊ ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက သူ့ရဲ့ ဖေ့စ်ဘုတ်မှာ မကြာသေးခင် အချိန်ပိုင်းအတွင်းက ရေးထားပါတယ်။
ဒီနှုန်းထားတွေအရဆိုရင် ရောဂါကူးစက်နှုန်းနဲ့ သေဆုံးနှုန်းဟာ လျော့ကျသွားတဲ့ ပုံမရှိသေးတဲ့အပြင် တရက်အတွင်း ဆေးရုံက ဆင်းခွင့်ရသူအရေအတွက်ထက် ရောဂါကူးစက်သူ အရေအတွက်ကလည်း ပိုတိုးလာနေပါတယ်။
ရွေးကောက်ပွဲနေ့ပြီးတဲ့နောက် ဆန္ဒမဲရလဒ်တွေ ထွက်လာချိန်မှာ လူစုလူဝေးနဲ့ အောင်ပွဲခံသူတွေထဲကနေ ရန်ကုန်ဘက်မှာ ရောဂါပိုးကူးစက်သူတွေ တွေ့ခဲ့ရတာကြောင့်လည်း ကျန်းမာရေးတာဝန်ရှိသူတွေ စိုးရိမ်နေကြပါတယ်။
ဒါကြောင့် ကျန်းမာရေးဌာနက အရေးယူမယ့်သတိပေးချက် ထပ်မံထုတ်ပြန်ထားသလို အာဏာရ အမျိုးသားဒီမိုကရေစီအဖွဲ့ချုပ်ကလည်း လူစုလူဝေးနဲ့ အောင်ပွဲခံတာတွေ မလုပ်ကြဖို့ ပန်ကြားထားပါတယ်။
ဗွီအိုအေ (မြန်မာပိုင်း)
https://burmese.voanews.com/a/myanmar-covid-cases/5656630.html
Reviewed by THITHTOOLWIN
on
23:44
Rating:
No comments:
Post a Comment