အမေရိကန် ရွေးကောက်ခံသမ္မတ Joe Biden လက်ထက်မှာ အမေရိကန်နိုင်ငံခြားရေးဝန်ကြီးအဖြစ်ခန့်အပ်ဖို့ လျာထားတဲ့ Antony Blinken ဟာ ဆယ်စုနှစ်နဲ့ချီ နိုင်ငံခြားရေးမူဝါဒဆိုင်ရာအတွေ့အကြုံရှိသူဖြစ်ပြီး နိုင်ငံတကာ ပူးပေါင်းဆောင်ရွက်ရေးနဲ့ လူ့အခွင့်အရေးကိုထောက်ခံသူအဖြစ် လူသိများပါတယ်။
မစ္စတာဘိုင်ဒန်နဲ့ ရင်းနှီးတဲ့ဆက်ဆံရေးရှိသူ Blinken ဟာ အမေရိကန် သမ္မတဟောင်းတွေဖြစ်တဲ့ Clinton နဲ့ Obama အစိုးရတွေလက်ထက်မှာလည်း နိုင်ငံခြားရေးမူဝါဒဆိုင်ရာ အရေးပါတဲ့ ရာထူးတာဝန်တွေ ယူခဲ့သူဖြစ်ပါတယ်။ နိုင်ငံခြားရေးဝန်ကြီးအဖြစ် အမေရိကန်အထက်လွှတ်တော်က အတည်ပြုခဲ့မယ်ဆိုရင်တော့ Blinken ဟာ အမေရိကန်မဟာမိတ်တွေနဲ့ ဆက်ဆံရေးတွေ ပြန်လည်တည်ဆောက်ဖို့ ဘိုင်ဒန်အစိုးရအဖွဲ့ကို ဦးဆောင်ပေးမယ့် သံတမန်တဦးဖြစ်လာမှာဖြစ်ပါတယ်။
သမ္မတ Donlad Trump ကတော့ အမေရိကန်မဟာမိတ်တွေရဲ့ အခန်းကဏ္ဍကို ရေရှည်မေးခွန်းထုတ်လာသူဖြစ်ပါတယ်။ ကမ္ဘာ့စင်မြင့်ပေါ်မှာ အမေရိကန်က ပြန်ပြီး ဦးဆောင်လာနိုင်ရေး ကိစ္စမှာလည်း မစ္စတာဘိုင်ဒန်နဲ့ Blinken တို့ သဘောတူညီမှု ရှိကြတယ်ဆိုတဲ့ သတင်းတွေထွက်လာပါတယ်။
သမ္မတ Trump လက်ထက်မှာ အမေရိကန်သာ ပဓာနဆိုတဲ့မူဝါဒကြောင့် အမေရိကန်ရဲ့ရေရှည်မဟာမိတ်နိုင်ငံတွေနဲ့ ဆက်ဆံရေး ပုံမှန်မဟုတ်တဲ့အနေအထားမှာရှိနေတာဖြစ်ပါတယ်။ နိုင်ငံတကာအရေးစိတ်ဝင်စားတဲ့ မစ္စတာ Blinken ဟာ ဘင်္ဂလားဒေ့ရှ်မှာ ခိုလှုံနေတဲ့ ရိုဟင်ဂျာဒုက္ခသည်တွေရဲ့ ငြိမ်းချမ်းရေး၊ လုံခြုံရေးနဲ့မြန်မာနိုင်ငံသားတွေနဲ့တန်းတူ အခွင့်အရေးရဖို့ ဘိုင်ဒန်အစိုးရက မနားမနေ အားပေးလုပ်ကိုင်ပါလိမ့်မယ်လို့ ရိုဟင်ဂျာတွေ နေရပ်စွန့်ခွါထွက်ပြေးတဲ့ ၃ နှစ်မြောက်နှစ်ပတ်လည် သြဂုတ်လ ၂၅ ရက်နေ့က တွစ်တာကနေ ရေးသားခဲ့ပါသေးတယ်။
ရိုဟင်ဂျာဆိုတဲ့အသုံးကို လက်မခံတဲ့မြန်မာအစိုးရကတော့ နိုင်ငံတကာက စွပ်စွဲနေသလောက် လူ့အခွင့်အရေးချိုးဖောက်မှုတွေ မရှိဘူးလို့ ပြောဆိုထားပါတယ်။
မစ္စတာ Blinken ဟာ ၂၀၁၆ ခုနှစ် ဇန်နဝါရီလက ဒုတိယနိုင်ငံခြားရေးဝန်ကြီးအဖြစ်နဲ့ မြန်မာနိုင်ငံကို လာရောက်ခဲ့ဖူးပြီး အဲဒီအချိန်ကသမ္မတ ဦးသိန်းစိန်နဲ့ရော ၂၀၁၅ နိုဝင်ဘာရွေးကောက်ပွဲမှာ အနိုင်ရခဲ့တဲ့ အမျိုးသားဒီမိုကရေစီအဖွဲ့ချုပ် (NLD) ပါတီခေါင်းဆောင် ဒေါ်အောင်ဆန်းစုကြည်နဲ့ပါ တွေ့ဆုံခဲ့ပါတယ်။
ဗွီအိုအေ (မြန်မာပိုင်း)
Reviewed by THITHTOOLWIN
on
02:06
Rating:
No comments:
Post a Comment