မြန်မာကုန်တင်ကားများ ဝင်ထွက်ခဲ့တဲ့ ထိုင်း-မြန်မာနယ်စပ် မဲဆောက်မြို့ ထုံထောင်းရပ်ကွက်အတွင်းမှာ ကိုဗစ်ကပ်ရောဂါပိုးတွေ့သူ ၅ ဦးတွေ့ရှိတာကြောင့် စစ်တပ်စစ်ဆေးရေးဂိတ်တွေ ချလိုက်ပါတယ်။ အပြည့်အစုံကို ထိုင်းအခြေစိုက် ဗွီအိုအေမြန်မာပိုင်း သတင်းထောက် မအေးအေးမာ တင်ပြပေးထားပါတယ်။
ပြီးခဲ့တဲ့ရက်ပိုင်းအတွင်း မြဝတီမြို့ကနေ မဲဆောက်ကို ဝင်ရောက်လာတဲ့ ကုန်တင်ကားမောင်းသူ ၃ ဦးမှာ ကိုဗစ်ရောဂါပိုး တွေ့ခဲ့ရာက ဒီလူနာတွေ ဝင်ထွက်သွားလာတဲ့နေရာကို ထိုင်းကျန်းမာရေးဌာနက လူအုပ်စုလိုက် ဆေးစစ်မှုတွေ ပြုလုပ်ခဲ့ရာမှာ ဒီကနေ့မှာဆိုရင် COVID-19 ပိုးတွေ့လူနာ ၅ ဦးရှိကြောင်း ထိုင်းကျန်းမာရေးဌာနက တာဝန်ရှိသူတွေကို ကိုးကားပြီး ထိုင်းသတင်းတွေမှာ ဖော်ပြခဲ့ပါတယ်။
အောက်တိုဘာလ ၁၇ ရက်နေ့ မနက်ကစပြီး ထုံထောင်းရပ်ကွက် ၆ နေရာကို လဝကဝန်ထမ်းတွေနဲ့ စစ်တပ်ဂိတ်တွေ ချထားပြီး ရပ်ကွက်အတွင်း အဝင်အထွက် ပြုလုပ်တာတွေ ခွင့်မပြုတော့ဘဲ ကန့်သတ်ပိတ်ဆို့ထားပါတယ်။
ထုံထောင်းရပ်ကွက်အတွင်း နေထိုင်တဲ့ ရွှေ့ပြောင်းစာသင်ကျောင်းက ကျောင်းဆရာတဦးဖြစ်တဲ့ ကိုလင်းလင်းထွန်းနောင်ကတော့ အခုလိုပြောပါတယ်။
“အခြေအနေကတော့ ကျနော်တို့ ထုံထောင်းကနေ မြို့ထဲကိုသွားမယ့် ဝင်ပေါက်ထွက်ပေါက်ကို ပိတ်လိုက်တယ်။ သူက ဆီမီး Lockdown အဆင့်ပဲ ရှိဦးမယ်။ အကုန်လုံး Lockdown ဆိုရင်တော့ အဝင်အထွက် မရတော့ဘူးပေါ့။ အဲဒီအဆင့်တော့ မဟုတ်သေးဘူး။ အရေးတကြီးသွားရမယ့် ကိစ္စတွေကိုတော့ ပေးသွားသေးတယ်။ အဲဒီမှာ လဝကတွေပါတော့ လက်မှတ်အထောက်အထား မရှိတဲ့သူတွေ မသွားကြဖို့ ပြောတယ်။”
သောကြာနေ့ကတော့ ထိုင်းအထောက်အထား ကိုင်ဆောင်ထားတဲ့ အနေကြာတဲ့ မြန်မာနိုင်ငံသား ၂ ဦးကို ကိုဗစ်ကပ်ရောဂါပိုး တွေ့ရှိကြောင်း ထုတ်ဖော်ပြောဆိုခဲ့ပြီး စနေနေ့မှာပဲ သူတို့နဲ့ ဆက်စပ်သူ နောက်ထပ် ၃ ဦးမှာ ပိုးတွေ့ရှိခဲ့တာကြောင့် ထုံထောင်းရပ်ကွက်ကို စနေနေ့မနက်က စတင်ပြီး ကန့်သတ်မှုတွေ လုပ်လာတာဖြစ်ပါတယ်။
ထိုင်းမှာအနေကြာတဲ့ မြန်မာနိုင်ငံသား မိသားစုမှာ စတင်ဖြစ်ပွားခဲ့ပြီးနောက် လူနာတွေကိုတော့ မဲဆောက်ဆေးရုံကြီးမှာ ဆေးကုသပေးနေပါတယ်။ မဲဆောက်မြို့ပိုင်ကတော့ မဲဆောက်မြို့ခံ ပြည်သူတွေအနေနဲ့ စိုးရိမ်ပူပန်မှုတွေ ဖြစ်မနေကြဘဲ သက်ဆိုင်ရာ အာဏာပိုင်တွေရဲ့ ညွှန်ကြားချက်တွေအတိုင်း လိုက်နာလုပ်ဆောင်သွားကြပါလို့ တိုက်တွန်းထားပါတယ်။
ထုံထောင်းရပ်ကွက်မှာ မြန်မာနိုင်ငံသားတွေ ထောင်ဂဏန်းလောက် နေထိုင်နေကြတာဖြစ်ပြီး ပြီးခဲ့တဲ့ရက်ကတော့ ထုံထောင်း မဒီနာ အစ္စလာမ်များ နေထိုင်ရာ နေရာမှာ ကိုဗစ်ကပ်ရောပိုး စစ်ဆေးမှုကို လူ ၁,၀၀၀ ကျော် စစ်ဆေးပေးခဲ့တာ ဖြစ်ပါတယ်။ အဲဒီထဲက အခုဆိုရင် ၅ ယောက်ရဲ့အဖြေမှာ ကိုဗစ်ကပ်ရောဂါပိုး တွေ့ရှိခဲ့တာဖြစ်ပါတယ်။
မအေးအေးမာ/VOA (Burmese)
https://burmese.voanews.com/a/covid-thai-myanmar-border-maesod/5625292.html
No comments:
Post a Comment