ကပ်ရောဂါကြောင့် မဲရုံမသွားနိုင်သူတွေ ကြိုတင်မဲပေးနိုင်ဖို့ စီစဉ်

၂၀၁၅ ခုနှစ်ရွေးကောက်ပွဲတုန်းက ရန်ကုန်မြို့ရှိ မဲရုံတခုမှာ မဲများ ကို ရေတွက်နေတဲ့ မြင်ကွင်း။ (နိုဝင်ဘာ ၀၈၊ ၂၀၁၅)

ကိုဗစ်ကပ်ရောဂါကာလ မကြာခင်ကျင်းပမယ့် ရွေးကောက်ပွဲမှာ မဲပေးဖို့ အခက်အခဲရှိသူတွေ ကြိုတင်မဲပေးနိုင်အောင် ပြင်ဆင်ထားတဲ့ အခြေအနေကို ပြောပြပါမယ်။ ဗွီအိုအေမြန်မာပိုင်းသတင်းထောက် မအိမ့်သန္တာထွန်းက ပြောပြပါမယ်။

ကပ်ရောဂါကူးစက်မှု အများဆုံးကြုံနေရာတာကြောင့် အိမ်ပြင်မထွက်ရ အမိန့်ထုတ်ထားတဲ့ ရန်ကုန်တိုင်း အပါအဝင် နိုင်ငံအဝန်းမှာ ကြိုတင်ဆန္ဒမဲ ပေးနိုင်အောင် စီစဉ်နေတယ်လို့ ကော်မရှင် တာဝန်ရှိသူတွေက ပြောပါတယ်။ ကြိုတင်မဲတွေကိုတော့ လာမယ့်ကြာသပတေးနေ့ကစလို့ ရွေးကောက်ပွဲမတိုင်ခင် ၁ ရက်အလို နိုဝင်ဘာလ ၇ ရက်နေ့အထိ ခွင့်ပြုသွားမှာ ဖြစ်တယ်လို့လည်း ကော်မရှင် တာဝန်ရှိသူတွေက ပြောပါတယ်။

ကပ်ရောဂါကြောင့် အိမ်မှာပဲ ကြိုတင်မဲပေးခွင့်ပြုထားတဲ့ အသက် ၆၀ နဲ့အထက် သက်ကြီးပိုင်းတွေ၊ နာမကျန်းသူတွေအပြင်၊ ကိုဗစ်သံသယနဲ့ Quarantine ဝင်နေရသူ ခန့်မှန်းခြေ ၂ သောင်း ဝန်းကျင်လောက်ကို ကျန်းမာရေး လမ်းညွှန်ချက်တွေနဲ့အညီ ကြိုတင်မဲတွေ ကောက်ယူဖို့ စီစဉ်ထားတယ်လို့လည်း ရန်ကုန်တိုင်း၊ တောင်ပိုင်းခရိုင်ကော်မရှင်ဥက္ကဋ္ဌ ဦးသိန်းလှိုင်က ပြောပါတယ်။

“ကျနော်တို့က Stay at Home မြို့နယ်တွေဖြစ်တဲ့အတွက်ကြောင့်မို့လို့ အိမ်တိုင်ယာရောက် သွားပြီးတော့ ကောက်ပါတယ်။ အဲ့ဒီမှာ ရပ်ကျေးတွေအနေနဲ့ အစုအဖွဲ့တွေ စုဖွဲ့မယ်။ ပြီးရင် ကြေညာထားတဲ့ လမ်းတွေပေါ့ဗျာ၊ အဲ့ဒီကို ကျနော်တို့ ကိုယ်တိုင်ကိုယ်ကျ သွားပြီးတော့ ကျနော်တို့ ကောက်မှာပါ။ အသက် ၆၀ ကျော်ရယ်၊ နာမကျန်းဖြစ်သူရယ်ပေါ့၊ အဲ့ဒီမှာ ကျနော်တို့ တစ်ခါတည်း ကောက်မှာပါ။ အနည်းဆုံး ၅ ယောက်ပေါ့၊ အုပ်စုဖွဲ့မယ်။ ကျနော်တို့ စည်းမျဉ်းလုပ်ထားတယ်။ စည်းမျဉ်းတွေနဲ့ ကျနော်တို့ ကောက်ပါမယ် ခင်ဗျ။”

ကပ်ရောဂါကူးစက်မှု ရှိ၊ မရှိ စောင့်ကြည့်စစ်ဆေးခံနေရသူတွေ ကြိုတင်မဲ ကောက်ယူရာမှာတော့ ကျန်းမာရေးဝန်ထမ်းတွေပါ အကူအညီပေးဖို့ စီစဉ်ထားတယ်လို့လည်း ခရိုင်ကော်မရှင်ဥက္ကဋ္ဌ ဦးသိန်းလှိုင်ကပြောပါတယ်။

“Quarantine Center တွေကျတော့ ကျနော်တို့က အစုအဖွဲ့လိုက်တော့ မသွားဘူးဗျ၊ ကော်မရှင် အဖွဲ့ဝင် ၂ ယောက်က နေပြီးတော့ သတ်မှတ်ထားတဲ့ အချိန်မှာ သွားပြီးတော့ ကြိုတင်မဲ ပေးဖို့ ဆန္ဒရှိမရှိဆိုတာ အရင် မေးမယ်လေ၊ ဆန္ဒရှိတယ်ဆိုရင် ကျနော်တို့ကတော့ ကြိုတင်မဲကိုတော့ ဆုတ်ပေးလိုက်မယ်လေ။ ဒါပေမဲ့ Q Center တွေရဲ့ ကျန်းမာရေး တာဝန်ရှိတဲ့သူတွေကနေ တဆင့် သူတို့ ဆောင်ရွက်ပေးရမှာပေါ့။ ဆန္ဒရှိတဲ့သူကို ပေးပါဆိုပြီး ကျန်းမာရေး တာဝန်ရှိတဲ့သူတွေက ပေးလိုက်မယ်၊ ပေးလိုက်ပြီးလို့ အဆင်ပြေပြီဆိုရင် ဆန္ဒမဲ ပေးတဲ့ အိတ်ထဲကို ပြန်ထည့်ပြီး ပိတ်ပြီးတော့ ကျနော်တို့ ကော်မရှင် အဖွဲ့တွေကို ပြန်ပေးပေါ့နော်။ လိုက်လံ ဆောင်ရွက်ပေးရမှာက ကျန်းမာရေး တာဝန်ခံတွေပေါ့နော်။”

ပဲခူးတိုင်းမှာလည်း ရွေးကောက်ပွဲနေ့ကျရင် မဲပေးဖို့ အခက်အခဲရှိတဲ့ ဝန်ထမ်းတွေ အပါအဝင် ကြိုတင်မဲပေးခွင့် ရှိသူတွေ ဒီတပတ်ကစ မဲပေးခွင့် ရကြမှာပါ။ ပဲခူးတိုင်းအတွင်း ကြိုတင်မဲပေးဖို့ ပြင်ဆင်ထားတဲ့ အခြေအနေကိုတော့ တိုင်းရွေးကောက်ပွဲ ကော်မရှင်ဥက္ကဋ္ဌ ဦးအောင်မြင့်က ခုလိုပြောပါတယ်။

“၂၉ ရက်နေ့ကနေစပြီးတော့ ကြိုတင် ဆန္ဒမဲတွေက ဒီ Stay at Home ဒေသ အသက် ၆၀ ကျော်တဲ့ သူတွေ အကုန်လုံးကို ကြိုတင်ဆန္ဒမဲ နေအိမ်မှာပဲ ပေးခိုင်းတာဖြစ်ပါတယ်။ ဒါကြောင့်မို့လို့ သူတို့ကို ၂၉ ရက်နေ့ကနေ စပြီး ဆောင်ရွက်ရမှာ ဖြစ်ပါတယ်။ အဲ့ဒီ ရွေးကောက်ပွဲ လုပ်တဲ့နေ့မှာ မအားလပ်တဲ့ ဌာနဆိုင်ရာတွေရှိမယ် နောက်တစ်ခါ ရွေးကောက်ပွဲလုပ်တဲ့ နေ့မှာ ရွေးကောက်ပွဲနဲ့ ပတ်သက်ပြီးတော့ တာဝန်ထမ်းဆောင်ရမယ့်သူတွေ သူတို့တွေကိုဆိုရင် ၂၉ ရက်၊ ၁၀ လ၊ ၂၀၂၀ ကနေ စပြီးတော့ ၅ ရက်နေ့အထိ ကြိုတင် ဆန္ဒမဲ ပေးပိုင်ခွင့်ရှိပါတယ်။ နောက် သာမာန် ခရီးသွားလာဖို့ ရှိတဲ့ အရပ်သားတွေ အနေနဲ့ကတော့ ၆ ရက်နဲ့ ၇ ရက်၊ နှစ်ရက်ပေါ့။ ကြိုတင် ဆန္ဒမဲ ပေးရမှာဖြစ်ပါတယ်။ ဒါက ရပ်ကွက် ကျေးရွာ ရွေးကောက်ပွဲ ကော်မရှင် အဖွဲ့ခွဲ ရုံးတွေမှာ ပေးရမှာဖြစ်ပါတယ်။”

ပြည်ထောင်စု ရွေးကောက်ပွဲ ကော်မရှင်ကတော့ နိုဝင်ဘာ ၈ ရက်နေ့မှာ ကျင်းပမယ့် အထွေထွေရွေးကောက်ပွဲမှာ မဲပေးတဲ့ လုပ်ငန်းစဉ်တွေကို ကိုဗစ်ကပ်ရောဂါ ကာကွယ်ထိန်းချုပ် ကုသရေးလုပ်ငန်းစဉ်တွေနဲ့ အညီ ဖြစ်စေဖို့ ဆောင်ရွက်နေတယ်လို့ မနေ့ကပဲ သတင်းထုတ်ပြန်ထားပါတယ်။ မဲဆန္ဒရှင်တွေ အနေဖြင့်လည်း ကပ်ရောဂါကာလမှာ နှာခေါင်းစည်းတပ်တာ၊ တစ်ဦးနဲ့ တစ်ဦး သတ်မှတ်အကွာအဝေးအတိုင်း ခပ်ခွာခွာနေတာ စတာတွေ အပါအဝင် ကျန်းမာရေးဝန်ကြီးဌာနက ထုတ်ပြန်ထားတဲ့ ညွှန်ကြားချက်တွေကို လိုက်နာကြဖို့လည်း တိုက်တွန်းထားပါတယ်။ 

အိမ့်သန္တာထွန်း/VOA (Burmese)

https://burmese.voanews.com/a/election-myanmar-early-voting/5635894.html