မင်းပြားမြို့နယ်တွင် ဒေသခံရွာသားတစ်ဦး မိုင်းနင်းမိ၍ သေဆုံး



Share/Bookmark

နိရဥၥရာ၊ ေအာက္တိုဘာ ၁၇/ ၂ဝ၂ဝ

ရခိုင်ပြည်နယ်၊ မင်းပြားမြို့နယ်၊ မြစ်နားရွာကျေးရွာမှ ဒေသခံရွာသားတစ်ဦး သူ့၏ ဥယျာဉ်ခင်းသို့ သွားစဉ် မိုင်းနင်းမိပြီး ဒဏ်ရာအပြင်းအထန်ရရှိသွားကာ သေဆုံးသွားကြောင်း သတင်းရရှိသည်။

၎င်း မိုင်းနင်းမိသူမှာ မြစ်နားရွာကျေးရွာမှ ဦးမောင်ညိမ်း (၆၈) နှစ်ဖြစ်ပြီး ၎င်းမှာ ယနေ့ နံနက် ၉ နာရီခန့်က သူ့၏ ဥယျာဉ်ခင်းအတွင်း မိုင်းနင်းမိကာ ဒဏ်ရာအပြင်းအထန် ရရှိသွားခဲ့ပြီး မင်းပြားဆေးရုံ၌ သေဆုံးသွားကြောင်း ညီတော်စပ်သူ ဦးကျော်ဝင်းက ပြောသည်။

“ဆေးရုံမှာ ဆုံးပါတယ်။ သွေးထွက်လွန်သွားတယ်လို့ ပြောပါတယ်။ ညာဘက် ခြေတစ်ဘက်လည်း ပြတ်သွားပါတယ်။ သူက သူ့ရဲ့ ဥယျာဉ်ခင်းကို သွားတာ။ သူ့ဥယျာဉ်ခင်းက မြေပြင်ကနေ တောင်ကုန်းတွေအထိ ပါပါတယ်။ အခု မိုင်းနင်းမိတာက အဲဒီ သူပိုင်တဲ့ တောင်ကုန်းစောင်းလေးမှာပါ။ မြေပြန့်လည်း မဟုတ်ဘူး၊ တောင်အပေါ်ထိလည်း မဟုတ်ဘူးပေါ့။ အဲဒီမှာ သူစစချင်း မိုင်းနင်းမိတုန်း ဒဏ်ရာက ထုံနေတယ်ထင်တယ်။ သူ့ဟာသူ အိမ်ကို ဖုန်းဆက်ခေါ်လို့ အိမ်ကလူတွေ သိရတာ” ဟု နိရဥ္စရာသို့ ပြောသည်။

ဦးမောင်ညိမ်း၏ ညာဘက်ခြေ ဒူးအောက်မှ အရိုးအဆစ်များမှာ ကြေမွသွားကြောင်း၊ ဘယ်ဘက် ခြေထောက်အားလည်း မိုင်းအစများ ထိသွားကြောင်း၊ ယနေ့ နံနက် ၁၁ နာရီခွဲခန့်က မင်းပြားဆေးရုံကြီး၌ သေဆုံးသွားကြောင်း မိသားစုဝင်များက ပြောသည်။

မြစ်နားရွာ၏ အရှေ့ဘက် မိုင်ခွဲခန့်အကွာတွင် ဦးမောင်ညိမ်း၏ ဥယျာဉ်ခင်းရှိကြောင်း မြစ်နားရွာကျေးရွာ၏ အုပ်ချုပ်ရေးမှူး ဦးမောင်လပြည့်က ပြောသည်။

“သူ့မှာ ဒဏ်ရာက အရမ်းပြင်းပါတယ်။ ခြေတစ်ဘက် ပြတ်သွားတယ်ပေါ့။ သူ့ဥယျာဉ်ကို အလုပ်လုပ်ဖို့ သွားတုန်း မိုင်းနင်းမိတာပါ။” ဟု အုပ်ချုပ်ရေးမှူးက နိရဥ္စရာသို့ ပြောသည်။

ယင်းကိစ္စနှင့်ပတ်သက်ပြီး မင်းပြားမြို့နယ် ပြည်နယ်လွှတ်တော်ကိုယ်စားလှယ် ဦးလှသိန်းအောင်အား ဆက်သွယ်ခဲ့ရာ ဖုန်းအဆက်သွယ် မရရှိခဲ့ပါ။


ဆောင်းဇာခြည်

Narinjara

https://www.facebook.com/narinjara.info



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ