မြန်မာကိုဗစ် ဓာတ်ခွဲအတည်ပြုစုစုပေါင်း ၄၉,၀၇၂ ဦး၊ သေဆုံး ၁,၁၇၂ ဦး

ရန်ကုန်မြို့စျေးတခုတွင် မျက်နှာအကာအကွယ်များ ဝတ်ဆင်၍ စျေးရောင်းနေသူများ။ အောက်တိုဘာ ၂၂၊ ၂၀၂၀

မြန်မာနိုင်ငံမှာ COVID-19 ရောဂါကူးစက်သူ ၁,၄၀၆ ဦး ထပ်တိုးသလို သေဆုံးသူ ၂၅ ဦး ထပ်တိုးတဲ့အကြောင်း ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ည ၈ နာရီ ထုတ်ပြန်ချက်မှာ ဖော်ပြထားပါတယ်။

လွန်ခဲ့တဲ့ ၂၄ နာရီအတွင်း ဓာတ်ခွဲနမူနာပေါင်း ၁၄,၂၀၆ ခုကို စစ်ဆေးခဲ့တာမှာ အခုလို နောက်ထပ် ကူးစက်သူတွေ တွေ့ရတာပါ။

ဒါကြောင့် အခုချိန်ထိ စစ်ဆေးခဲ့ခဲ့သမ ျှ ဓာတ်ခွဲနမူနာပေါင်း ၆၄၈,၂၄၇ ခုထဲမှာ COVID-19 ဓာတ်ခွဲအတည်ပြုလူနာ စုစုပေါင်း ၄၉,၀၇၂ ဦး ရှိသွားပြီဖြစ်ပါတယ်။ သေဆုံးသူပေါင်း ကတော့ ၁,၁၇၂ ဦးရှိပါပြီ။

ဒီကနေ့ထုတ်ပြန်ချက်အရ ဆေးရုံဆင်းခွင့်ရရှိသူ ၁,၂၆၃ ဦးရှိတာကြောင့် ဆေးရုံကဆင်းသွားသူ စုစုပေါင်းက ၂၈,၆၃၆ ဦး ရှိသွားပါပြီ။

ဒီကနေ့ညစာရင်းတွေအရ ပိုးတွေ့နှုန်း ၉.၉% ၊ ပြန်ကောင်းတဲ့နှုန်း ၅၈.၄% ၊ သေဆုံးနှုန်းက ၂.၄% ရှိတယ်လို့ ကျန်းမာရေးနဲ့ အားကစားဝန်ကြီးဌာန၊ သတင်းထုတ်ပြန်ရေးအဖွဲ့ဝင်၊ ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက သူ့ရဲ့ ဖေ့စ်ဘုတ်မှာ မကြာသေးခင် အချိန်ပိုင်းအတွင်းက ရေးထားပါတယ်။

ဗွီအိုအေ (မြန်မာဌာန)

https://burmese.voanews.com/a/myanmar-covid-cases-close-to-fifty-thousand/5638835.html