မင်းပြားနဲ့ ပေါက်တောမှာ လက်နက်ကြီးကျည်ကြောင့် အရပ်သား ကိုးဦးဒဏ်ရာရ

မင်းပြားမြို့နယ် စက္ကရေကျေးရွာမှာ လက်နက်ကျည်ကျလို့ ဒဏ်ရအမျိုးသမီးကို အောက်တိုဘာလ ၂၉ ရက်နေက စစ်တွေဆေးရုံသို့ ယူဆောင်လာစဥ်။

Photo: Ni Min Tun/RFA

ရခိုင်ပြည်နယ်မှာ တိုက်ပွဲတွေ ရပ်ဖို့နဲ့ လက်နက်ကိုင် ပဋိပက္ခတွေ အတွင်းမှာ ကလေးတွေ သေဆုံးဒဏ်ရာရတာ ၁ဝဝ ကျော်သွားပြီလို့ ကုလသမဂ္ဂ က သတိပေးခဲ့ပြီး ရက်ပိုင်းမှာပဲ နောက်ထပ် ထိခိုက်မှုတွေ ရှိနေပါတယ်။

မနေ့ကဆိုရင် မင်းပြားနဲ့ ပေါက်တောမြို့နယ်ထဲက မြစ်ကမ်းနဘေး ရွာတချို့ဟာ လက်နက်ကြီး၊ လက်နက်ငယ် တွေနဲ့ ပစ်ခတ်ခံရလို့ အရပ်သား ကိုးယောက် ဒဏ်ရာရခဲ့တဲ့အကြောင်း မိသားစုဝင်တွေကိုယ်တိုင်က RFA ကို ပြောပါတယ်။ ဒီအထဲမှာ အရွယ်မရောက်သေးတဲ့ ကလေးတွေနဲ့ သက်ကြီးရွယ်အိုတွေ ပါဝင်ပါတယ်။

မင်းပြားမြို့နယ်ကဆိုရင်

စက္ကရေရွာက

    ၁၄ နှစ်အရွယ် ခြောက်တန်းကျောင်းသူ မသန်းသန်းစိုးနဲ့ မဋ္ဌေးဋ္ဌေးဝေ

    အသက် ၇ဝ ကျော်အရွယ် ဦးအောင်ကျော်နု

သက်ပုန်းရွာက

    ၃၂ နှစ်အရွယ် ဦးမျိုးမင်းဇော်

ပေါက်တောမြို့နယ်ကဆိုရင်

ကျော်ရှင်ရွာက

    ၆ နှစ်အရွယ် မဦးမြတ်ဝင်း

    ၂၉ နှစ်အရွယ် ဒေါ်သန်းနုခင်

    ၂၇ နှစ်အရွယ် ဒေါ်သန်းနုဝင်း

    ၅၈ နှစ်အရွယ် ဒေါ်မထွန်းစိန်

    ၅၅ နှစ်အရွယ် ဦးအောင်သာမောင် တို့ ဖြစ်တယ်လို့ မိသားစုဝင်တွေနဲ့ ရွာသားတွေက ပြောပါတယ်။

ဒဏ်ရာရသူတွေကို ပေါက်တောနဲ့ မင်းပြားက မြို့နယ်ဆေးရုံတွေကို ပို့ဆောင်ခဲ့ပြီး၊ ဒဏ်ရာပြင်းထန်တဲ့ မသန်းသန်းစိုးကိုတော့ ပေါက်တောဆေးရုံကနေ စစ်တွေဆေးရုံကို ဒီနေ့လယ်မှာပဲ အရေးပေါ် ပို့ဆောင် လိုက်ရပါတယ်။

မသန်းသန်းစိုးရဲ့ဖခင် ဦးကျော်ဆန်းကတော့ မြန်မာရေတပ်က ပစ်တာလို့ စစ်တွေမြို့မှာ သတင်းထောက်တွေ ကို ပြောပါတယ်။

“မနက် ၉ နာရီလောက်မှာ ကျနော်တို့ရွာဘက် လှည့်ပစ်တာပါ။ ကျနော့်သမီးက အိမ်မှာပဲ ပုန်းနေတာ။ အဲဒီအချိန် ကျည်ကလာမှန်တာ။ မြန်မာစစ်သားတွေက ပစ်တာပါ။ ဇက်ရေယာဉ် နှစ်စီးနဲ့ ရေယာဉ်ငယ် တစ်စီးပါ။ သူတို့ပစ်တာက ရွာထဲကိုပဲ များသောအားဖြင့် ပစ်ပါတယ်။ လက်နက်ကြီးက လေးငါးချက် လောက် ပစ်သွားတယ်။ ရွာထဲက မောင်ဘထွန်းအိမ်မှာတောင် မပေါက်သေးတဲ့ လက်နက်ကြီးကျည်တစ်လုံး ကျန်ခဲ့တယ်။ ရွာထဲကို ကျလာတာ”

ပေါက်တောမြို့နယ် ကျော်ရှင်ရွာမှာလည်း အသက် ၆ နှစ်အရွယ် ကလေးငယ် တစ်ဦး အပါအဝင် ငါးဦး ဒဏ်ရာရ သွားတယ်လို့ ကျော်ရှင်ရွာသား ဦးဆန်းဝင်း ကလည်း RFA ကို ပြောပါတယ်။

“နေ့လယ် ၁ နာရီခွဲလောက်မှာ လက်နက်ကြီးက အိမ်ကိုကျပြီးတော့ ပွင့်ထွက်သွားတာ။ လူကတော့ ငါးယောက် ဒဏ်ရာရတယ်။ ဒဏ်ရာရသူတွေကို လူမှုကူညီရေးကားနဲ့ ပေါက်တောဆေးရုံကို ယူသွားပြီ”

တပ်မတော်ရေယာဉ်က ပစ်ခတ်တာဆိုတဲ့ ဒေသခံတွေရဲ့ ပြောဆိုချက်နဲ့ ပတ်သက်ပြီး တပ်မတော်သတင်းမှန် ပြန်ကြားရေးအဖွဲ့ ဥက္ကဋ္ဌ ဗိုလ်ချုပ်ဇော်မင်းထွန်းကို RFA က ညနေစောင်းအထိ ဖုန်း ၁၇ ကြိမ်ခေါ်ဆိုခဲ့ပေမယ့် လက်ခံဖြေဆိုမှု မရှိခဲ့ပါဘူး။

ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးမှူးရုံး (OHCHR) ကနေ အောက်တိုဘာ ၂၁ ရက်နေ့က ထုတ်ပြန်တဲ့ ကြေညာချက်ထဲမှာ ရခိုင်ပြည်နယ်က ဆက်ဖြစ်နေတဲ့ ပဋိပက္ခတွေကြောင့် အရပ်သား သေဆုံး ဒဏ်ရာရတဲ့သတင်းတွေ ကြားသိရပြီး၊ ၂ဝ၂ဝ ပထမ သုံးလပတ်အတွင်း တစ်နိုင်ငံလုံး အတိုင်းအတာအရ ဒီလို ပဋိပက္ခတွေကြောင့် ကလေးငယ် ၁ဝဝကျော် သေကြေဒဏ်ရာရခဲ့တယ်လို့ ဖော်ပြထားပါတယ်။ ဒါ့အပြင် ဒီကိန်းဂဏန်းဟာ ၂ဝ၁၈ ကထက် သိသိသာသာ ပိုများနေပြီး၊ ၂ဝ၁၉ ထက်လည်း ထက်ဝက်ကျော် များနေတယ်လို့ ဖော်ပြထားပါတယ်။

မင်းပြားမြို့နယ် သက်ပုန်းရွာက ဦးစိုးထွန်းချေ ကလည်း

“ကျနော်တို့ မင်းပြားမြို့နယ် သက်ပုန်းကျေးရွာမှာလေ ပေါက်တောမြို့နယ်ကို လွန်တာနဲ့ ပစ်ခတ်ပြီးတော့ သွားတာ။ လက်နက်ကြီးနဲ့ ပစ်ခတ်လို့ မျိုးမြင့်ဇော်ဆိုတဲ့ အမျိုးသားတစ်ဦးကို ထိသွားတယ်။ အခု မင်းပြား ဆေးရုံကို သွားနေပါတယ်။ ဒဏ်ရာကတော့ နားထင်မှာပါ။ လက်နက်ကြီးကျည်ထိသွားတာ။ ကျည်စဝင်နေလို့ မင်းပြားဆေးရုံကို သွားကြတာ”

အောက်တိုဘာလ ၂၇ ရက်နေ့ကတော့ ပေါက်တောမြို့နယ်ကနေ မင်းပြားမြို့နယ်ဘက်ကို ဆန်တက်လာတဲ့ တပ်မတော်ရေယာဉ်ကို ရက္ခိုင့်တပ်တော် (AA) က ခေါင်းလောင်းချောင်းရွာဘက်မှာ တိုက်ခိုက်ခဲ့ပေမယ့် မနေ့က ပစ်ခတ်မှုကတော့ တိုက်ပွဲဖြစ်တာမရှိဘဲ တပ်မတော်ရေယာဉ်တွေက ကျေးရွာတွေထဲကို ပစ်တာလို့ ဒေသခံတွေ က ပြောပါတယ်။

စက္ကရေရွာက ကျောင်းထိုင်ဆရာတော် ဦးသူရိယဝံကလည်း အရပ်သားတွေကို ပစ်မှတ်ထားပြီး တိုက်ခိုက်တာမျိုးတွေ မလုပ်ဖို့မိန့်ကြားပါတယ်။

“ရွာသားတွေကတော့ ကြောက်ပြီး ဟိုပြေး ဒီပြေး ပြေးနေကြတယ်။ ဥပဇင်းကျောင်းကို လာသူတွေကလာ အကုန်လုံး။ ရွာသူရွာသားတွေအတွက် လုံခြုံရေးဆိုတာ အာမခံချက်မရှိဘူး။ ရွာကိုလျှောက်ပြီးတော့ ပစ်သွားတာပေါ့ သူတို့က။ လက်နက်ငယ်တွေ လက်နက်ကြီးတွေ အကုန်လုံးပါတယ်။ အဓိက ဥပဇင်းအနေနဲ့ ပြောချင်တာကတော့ ဒီလိုအပြစ်မဲ့တဲ့ပြည်သူတွေကို အဓိကရွာတွေကို ပစ်မှတ်ထားပြီးတော့ မပစ်ပါနဲ့လို့ ရွာသူ၊ ရွာသား တွေရဲ့ အသက်အိုးအိမ် စည်းစိမ်တွေကို ကူညီစောင့်ရှောက်ပေးကြပါလို့ ပြောချင်တယ်”

မင်းပြားမြို့နယ်က ပြည်နယ်လွှတ်တော် ကိုယ်စားလှယ် ဦးလှသိန်းအောင်ကလည်း တိုက်ပွဲမဖြစ်ဘဲ ရွာတွေကို ပစ်တာ မဖြစ်သင့်ဘူးလို့ ပြောပါတယ်။

“ကျနော်တို့ကတော့ ကိုယ့်ဟာနဲ့ကိုယ် လာတဲ့အနေအထားမှာ တစ်စုံတစ်ရာမဖြစ်ဘဲနဲ့ ဒီလိုပစ်ခတ်ပြီး တက်လာတယ်ဆိုတော့ မြစ်ကြောင်းတစ်လျှောက်မှာ ကျေးရွာတွေရှိတယ်။ အဲဒီကျေးရွာတွေမှာ လူတွေနေတာ။ တိရစ္ဆာန်တွေနေတာ မဟုတ်ဘူး။ လူတွေနေတာဖြစ်တဲ့အတွက် တစ်စုံတစ်ရာမဖြစ်ဘဲနဲ့ ရမ်းသမ်းပြီးတော့ ပစ်ခတ်တာတွေ မလုပ်သင့်ဘူး။ ရမ်းသမ်းပစ်ခတ်ပြီး ဒဏ်ရာရတဲ့အပေါ်မှာတော့ ကျနော်တို့ကတော့ ဒါမလုပ်သင့်တဲ့ အလုပ်ကို လုပ်တာလို့ပဲ မြင်တယ်”

တပ်မတော် သတင်းမှန်ပြန်ကြားရေးအဖွဲ့ ဗိုလ်ချုပ် ဇော်မင်းထွန်းကတော့  AA အဖွဲ့က ရွာတွေမှာနေပြီး ပြည်သူတွေကို အသုံးပြု တိုက်ခိုက်တာတွေကြောင့် အရပ်သားထိခိုက်မှုတွေ ရှိနိုင်ကြောင်း၊ တပ်မတော် ဘက်ကတော့ စစ်ဆင်ရေးတွေမှာ အရပ်သားတွေ မထိခိုက်အောင် လုပ်ဆောင်နေကြောင်း ဇူလိုင်လဆန်းမှာ RFA ကို ဖြေကြားထားပါတယ်။

ရခိုင်ပြည်နယ်မြောက်ပိုင်း မင်းပြားမြို့နယ်နဲ့ ရသေ့တောင်မြို့နယ်တွေအတွင်း မြစ်ထဲက တပ်မတော် ရေယာဉ်တွေကို AA အဖွဲ့က ကမ်းပေါ်ကနေ တိုက်ခိုက်တာတွေရှိပြီး၊ တပ်မတော်ဘက်ကလည်း ပြန်လည် ရှင်းလင်း ပစ်ခတ်တာတွေ ရှိပါတယ်။

မနေ့က ဖြစ်ရပ်နဲ့ပတ်သက်လို့တော့ တပ်မတော်က ဘာကြောင့် ပစ်ခတ်တယ်ဆိုတာကို RFA အနေနဲ့ ရှင်းရှင်းလင်းလင်း မသိရသေးပါဘူး။

AA ပြောခွင့်ရပုဂ္ဂိုလ် ဦးခိုင်သုခကတော့ မင်းပြားနဲ့ ပေါက်တောမြို့နယ် အစပ်မှာ မနေ့က တိုက်ပွဲဖြစ်တာမရှိဘဲ၊ ရွာတွေကို မြန်မာစစ်တပ်က အသားလွတ် ပစ်ခတ်ခဲ့တာ ရှိတယ်လို့ပြောပါတယ်။ မြန်မာစစ်တပ်က တဖက်သတ် ပစ်တာဖြစ်ပြီး၊ မြစ်ကမ်းပါးတစ်လျှောက်က ရွာတွေကို လူမျိုးရေးမုန်းတီးစိတ်နဲ့ မြန်မာစစ်တပ်ကနေ ပစ်ခတ်လေ့ ရှိတယ်လို့လည်း ဦးခိုင်သုခက ထည့်သွင်းပြောဆိုခဲ့ပါတယ်။

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် သောမတ်စ် အန်ဒရူး (Thomas Andrews) ကတော့ ရခိုင်ရွာတွေအပေါ် တိုက်ခိုက်နေတာတွေ ချက်ချင်းရပ်ဖို့နဲ့ ကလေးငယ်တွေ သေဆုံး ဒဏ်ရာရနေတဲ့ အပေါ် ဝမ်းနည်းကြောင်း စက်တင်ဘာလ ၂၂ ရက်နေ့က ပြောဆိုခဲ့ပါတယ်။

RFA က ရရှိထားတဲ့စာရင်းတွေအရ ရခိုင်ပြည်နယ်နဲ့ ချင်းပြည်နယ် ပလက်ဝမြို့နယ်တွေမှာ ပြီးခဲ့တဲ့ ၂ဝ၁၈ ခုနှစ် ဒီဇင်ဘာလကနေ မနေ့က အောက်တိုဘာလ ၂၉  ရက်နေ့အထိ သေဆုံးတဲ့အရပ်သား ၃ဝ၃ ဦးနဲ့ ထိခိုက် ဒဏ်ရာရသူပေါင်း ၆၈၁ ဦးအထိ ရှိသွားပြီဖြစ်ပါတယ်။


RFA Burmese

https://www.rfa.org/burmese/news/nine-civilians-injured-rakhine-10302020085657.html

ရွေးကောက်ပွဲအတွက် အပစ်ရပ် သက်တမ်းတိုးကြောင်း တပ်မတော်ထုတ်ပြန်

၂၀၂၀ မတ်လ ၆ ရက်နေ့က ရှမ်းပြည်‌‌မြောက်ပိုင်း ကွတ်ခိုင်မြို့နယ် ကောင်းခါးကျေးရွာတွင် တပ်မတော်သားတချို့ကို တွေ့ရစဉ်။

အကြမ်းဖက်အဖွဲ့တွေ လှုပ်ရှားနေတဲ့နယ်မြေတွေကလွဲလို့ ကျန်တဲ့ တိုင်းရင်းသားဒေသတွေမှာ နိုဝင်ဘာလကုန်အထိ အပစ်အခတ် ရပ်စဲရေး တိုးမြှင့်မယ်လို့ တပ်မတော်က ကြေညာလိုက်ပါတယ်။

၂၀၂၀ ပြည့်နှစ် မေလကတည်းက စတင်‌ကြေညာခဲ့တဲ့ တစ်ဘက်သတ် အပစ်အခတ် ရပ်စဲရေးကို တပ်မတော်ဘက်က တစ်လတစ်ကြိမ် လစဉ်ပုံမှန် သက်တမ်းတိုးလာခဲ့တာဖြစ်ပြီး အခုတစ်ကြိမ်မှာလည်း နိုဝင်ဘာလကုန် ၃ဝ ရက်နေ့အထိ ထပ်ပြီး သက်တမ်းတိုးလိုက်တာပါ။

ကပ်ရောဂါထိန်းချုပ်ရေးလုပ်ငန်းတွေ အောင်မြင်အောင် ဆောင်ရွက်နိုင်ဖို့နဲ့၊ လာမယ့်နိုဝင်ဘာလ ၈ ရက်နေ့မှာ ရွေးကောက်ပွဲ တရားမျှတစွာ ကျင်းပနိုင်ဖို့အတွက် တပ်မတော်ဘက်က အပစ်အခတ်ရပ်စဲရေး ထပ်ပြီး သက်တမ်းတိုးလိုက်တာလို့လည်း ထုတ်ပြန်ချက်မှာ ဖော်ပြထားပါတယ်။

အစိုးရနဲ့ တပ်မတော်က အကြမ်းဖက်အဖွဲ့လို့ ကြေညာထားတဲ့ ရခိုင့်တပ်တော် (AA) လှုပ်ရှားနယ်မြေတွေဖြစ်တဲ့ ရခိုင်ပြည်နယ်နဲ့ ချင်းပြည်နယ် ပလက်ဝမြို့နယ်ဘက်မှာတော့ ဒီအပစ်အခတ်ရပ်စဲရေး ကြေညာချက်က သက်ရောက်မှုရှိမှာ မဟုတ်ပါဘူး။

တပ်မတော်ဘက်က တစ်ဘက်သတ် အပစ်အခတ်ရပ်မယ့်ဒေသတွေထဲ AA လှုပ်ရှားနယ်မြေတွေကို မထည့်ထားတာဟာ အစိုးရ တာဝန်ရှိသူတွေနဲ့ တပ်မတော်တို့ ညှိနှိုင်းဆုံးဖြတ်ထားတာဖြစ်တယ်လို့ သမ္မတရုံး ပြောရေးဆိုခွင့်ရှိသူ ဦးဇော်ဌေးက ပြောဆိုထားပါတယ်။

တပ်မတော်ဘက်က ဒီလိုတစ်ဘက်သတ် အပစ်အခတ်ရပ်စဲရေးဆောင်ရွက်ထားပေမယ့် တချို့ဒေသမှာ တိုက်ပွဲတွေ ရှိနေဆဲပါ။

စက်တင်ဘာလ ၂၃ ရက်နေ့ကနေ အောက်တိုဘာ ၂၀ ရက်နေ့အထိ RCSS/SSA တိုင်းရင်းသားလက်နက်ကိုင်အဖွဲ့နဲ့ အကြိမ် ၃၀၊ MNDAA၊ TNLA ပူးပေါင်းတပ်ဖွဲ့နဲ့  ၁၀ ကြိမ်၊ TNLA အဖွဲ့နဲ့  ၈ ကြိမ် ဖြစ်ခဲ့တယ်လို့ တပ်မတော်သတင်းမှန်ပြန်ကြားရေးအဖွဲ့ ဥက္ကဋ္ဌ ဗိုလ်ချုပ်ဇော်မင်းထွန်းက စနေနေ့က သတင်းစာရှင်းလင်းပွဲမှာ ပြောဆိုထားပါတယ်။

ပြီးခဲ့တဲ့ သြဂုတ်လနှောင်းပိုင်းကနေ စက်တင်ဘာလနှောင်းပိုင်းအတွင်းမှာ MNDAA၊ TNLA ပူးပေါင်းတပ်ဖွဲ့နဲ့  လေးကြိမ်၊ TNLA အဖွဲ့နဲ့ သုံးကြိမ်၊ MNDAA အဖွဲ့နဲ့ နှစ်ကြိမ် အပါအဝင် စုစုပေါင်း တိုက်ပွဲ ၁၃ ကြိမ်ဖြစ်ခဲ့တာကြောင့် ဒီလအတွင်း တိုက်ပွဲဖြစ်ပွားနှုန်းဟာ ပြီးခဲ့တဲ့လထက် အဆပေါင်းများစွာ ပိုများတာလည်းဖြစ်ပါတယ်။

တပ်မတော်သတင်းမှန်ပြန်ကြားရေးအဖွဲ့က လစဉ်ထုတ်ပြန်ပြောဆိုတဲ့ တိုက်ပွဲဖြစ်ပွားနှုန်းတွေထဲမှာ ရခိုင်ပြည်နယ်က တိုက်ပွဲဖြစ်ပွားမှု နှုန်းတွေကိုတော့ ထည့်သွင်းရေတွက်လေ့ မရှိပါဘူး။

တပ်မတော်က အကြမ်းဖက်အဖွဲ့လို့ ကြေညာထားတဲ့ AA ရခိုင့်တပ်တော်ရှိတဲ့ ရခိုင်ပြည်နယ်ထဲမှာ နေ့စဉ်ဆိုသလို တိုက်ပွဲတွေရှိနေဆဲပါ။

RFA က စုဆောင်းရရှိထားတဲ့ အချက်အလက်တွေအရ ရခိုင်မြောက်ပိုင်းနဲ့ ချင်းပြည်နယ် ပလက်ဝမြို့နယ်တွေမှာ ပြီးခဲ့တဲ့ ၂၀၁၈ ဒီဇင်ဘာလကနေ မနေ့ကအထိ သေဆုံးတဲ့ အရပ်သား ၃၀၃ ဦးနဲ့ ထိခိုက်ဒဏ်ရာရသူပေါင်း ၆၈၁ ဦးအထိ ရှိနေပါတယ်။


RFA Burmese

https://www.rfa.org/burmese/news/Myanmar-Military-extend-ceasefire-10302020075215.html

 

မြန်မာ ကိုဗစ်လူနာကုသရေး ဆေးရုံတွေ တိုးချဲ့ဖို့ ပြင်ဆင်နေ

ရန်ကုန်မြို့ရှိ Quarantine Center တခုတွင် ကိုဗစ်သံသယရှိလူနာစာရင်းကို စစ်ဆေးနေသည့် PPE ဝတ်စုံဝတ် ပရဟိတလုပ်သားတစ်ဦး။ (အောက်တိုဘာ ၁၊ ၂၀၂၀)

မြန်မာနိုင်ငံမှာ ကိုဗစ်ကပ်ရောဂါကြောင့် သေဆုံးမှုတွေနဲ့ ကူးစက်မှုတွေ တိုးနေချိန်မှာပဲ တိုင်းနဲ့ ပြည်နယ်တွေမှာပါ လူနာတွေကို ကုသပေးနိုင်အောင် ဆေးရုံတွေကို တိုးချဲ့ပြင်ဆင်နေတဲ့အကြောင်း ပြောပြပါမယ်။ ဒီသတင်းကို ဗွီအိုအေမြန်မာပိုင်း သတင်းထောက် မစုစုက တင်ဆက်ပေးမှာပါ။

ကိုဗစ်ကပ်ရောဂါ ကူးစက်သူ နေ့စဉ် ထောင်ဂဏန်းဝန်းကျင်နဲ့ သေဆုံးသူ ပုံမှန်လိုလို ရှိနေချိန်မှာ ကူးစက်မှု အများစုကြုံနေရတဲ့ ရန်ကုန်တိုင်းမှာသာမက တိုင်းနဲ့ပြည်နယ်တွေမှာပါ ပြင်ဆင်မှုတွေ တိုးမြှင့်လာနေတာပါ။ အစိုးရရုံးဆိုက်ရာ နေပြည်တော်မှာလည်း လတ်တလောမှာ ကိုဗစ်ပိုးတွေ့လူနာ ၃၀၀ ကျော်ကို ဆေးရုံတွေမှာ ထားရှိကုသနေပြီး၊ နောက်ထပ်လည်း တိုးချဲ့ပြင်ဆင်နေတယ်လို့ နေပြည်တော် ပြည်သူ့ကျန်းမာရေးဦးစီးဌာန၊ ဒုညွှန်ချုပ် ဒေါက်တာမြတ်ဝဏ္ဏစိုးက VOA ကိုပြောပါတယ်။

“ကျနော်တို့ အခုလောလောဆယ်အထိကတော့ လူနာ ၂၀၀ လောက်အထိတော့ လက်ခံပြီးတော့ ကုသနိုင်တဲ့အနေအထားမှာ ရှိနေပါတယ်။ ဒါလတ်တလော အခြေအနေပေါ့။ တကယ်လို့ ဒီထက်ပိုပြီးတော့ လိုအပ်လာမယ်ဆိုရင်လည်း နေပြည်တော်၊ သီရိမြို့တွေမှာရှိတဲ့ ကုတင် ၅၀ ဆေးရုံတွေမှာ ထပ်ပြီးတော့ ကိုဗစ်လူနာကိုပဲ သီးသန့်ထားလို့ရပါတယ်။ ထို့အတူပဲ လူနာတယောက် Positive ဖြစ်မယ်ဆိုရင် သူ့ရဲ့ Contact တွေကို Quarantine လုပ်ရပါတယ်။ အဲဒါလည်း ကျနော်တို့ နေပြည်တော်စည်ပင်ရိပ်သာမှာ လုပ်သလို၊ တချို့ Contact တွေကို သက်ဆိုင်ရာဆေးရုံတွေဖြစ်တဲ့ ပျဉ်းမနားတို့၊ လယ်ဝေးဆေးရုံတို့၊ အဲဒီဆေးရုံတွေမှာ Quarantine ထားလို့ရပါတယ်။”

နေပြည်တော်ကို ရောက်လာသူတွေထဲက အသွားအလာ ကန့်သတ်ထားတဲ့ မြို့တွေကလာသူတွေကို သီတင်း ၂ ပတ်ကြာ စောင့်ကြည့်စစ်ဆေးဖို့၊ တခြားမြို့တွေက လာသူတွေဆိုရင်တော့ ၃ ရက် သီးခြားစောင့်ကြည့်မှာ ဖြစ်ပါတယ်။ ရောဂါပိုးကူးစက်မှု အဓိက ကြုံနေရတာကြောင့် အိမ်ပြင်မထွက်ဖို့ အမိန့်ထုတ်ထားတဲ့ ရန်ကုန်တိုင်းမှာ ကူးစက်မှုတွေ ကျဆင်းအောင် ဆောင်ရွက်စရာတွေ ကျန်သေးတယ်လို့လည်း ရန်ကုန်တိုင်း ကိုဗစ်ကော်မတီ ဒုဥက္ကဋ္ဌ ဒေါက်တာဇော်ဝေစိုးက ပြောပါတယ်။

“အထူးသဖြင့် ကျနော်တို့ ရုံးပိတ်ရက် ၅ ရက် ရှိမှာဖြစ်ပါတယ်။ အဲဒီရုံးပိတ်ရက် ၅ ရက်ဟာ ကျနော်တို့ အသုံးချတတ်ရင် COVID -19 ထိန်းချုပ်ရေးအတွက် အခွင့်အရေးတခုဖြစ်ပါတယ်။ ကျနော်တို့ အသုံးမချတတ်လို့ မလိုက်နာ၊ မဆောင်ရွက်ရင် ဒီ ၅ ရက်ဟာ ကျနော်တို့ကို ကောင်းကောင်းဒုက္ခပေးနိုင်တဲ့ ၅ ရက်ဖြစ်ပါတယ်။ ဒါကို အားလုံးသိရှိပြီး သတိကြီးစွာနဲ့ နေထိုင်သွားလာဖို့ လိုသလို၊ သည်းခံထိန်းချုပ်ကြဖို့ အရေးကြီးပါတယ်။”

ရုံးပိတ်ရက်ရှည်တဲ့ကာလကို ရောက်နေပေမဲ့လည်း အခါကြီးရက်ကြီးတွေမှာ လူစုလူဝေးမဖြစ်စေဖို့ကိုလည်း ကိုဗစ်ရောဂါကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီဥက္ကဋ္ဌဖြစ်သူ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း သတိပေးထားပါတယ်။

“သီတင်းကျွတ်က နီးလာပြီဆိုတော့ သီတင်းကျွတ်အတွက် အစီအစဉ်တွေ လုပ်နေတဲ့အခါမှာ လူစုလူဝေးမဖြစ်တဲ့ အစီအစဉ်တွေပဲလုပ်ဖို့ ကျမအနေနဲ့ သတိပေးချင်ပါတယ်။ ဘာဖြစ်လို့လည်းဆိုတော့ နှစ်တိုင်းနှစ်တိုင်းမှာ ကျမတို့ရဲ့ ပြည်သူတွေဟာ ဒီသီတင်းကျွတ် အချိန်မျိုးမှာဆိုရင် ဘုရားသွားတာ၊ ကျောင်းသွားတာ၊ ဘုန်းတော်ကြီးကျောင်းတွေ သွားတာ၊ စေတီတော်ကြီးတွေကို သွားပြီးတော့ဖူးတာ ဒါတွေကတော့ လုပ်နေကြအလုပ်တွေ ဖြစ်ပါတယ်။ ဒါပေမဲ့ ဒီအချိန်မှာတော့ လုပ်လို့မဖြစ်ပါဘူး။ လုပ်လို့မဖြစ်တဲ့အခါကျတော့ တခြားနည်းနဲ့ ကျမတို့ရဲ့အထွဋ်အမြတ် ဘာသာရေးအရ၊ ဗုဒ္ဓဘာသာအရ အထွဋ်အမြတ်နေ့ တနေ့ဖြစ်တဲ့ သီတင်းကျွတ်ကို ကျမတို့ဆင်နွှဲရမှာပေါ့။ ဒါကြောင့်မို့လို့ သီတင်းကျွတ်ကို ကုသိုလ်လည်းရအောင်လို့ စိတ်လည်းအေးချမ်းရအောင်လို့ ဆင်နွှဲကြရမယ်ဆိုတာ အခုကတည်းကနေစပြီး စဉ်းစားထားကြပါ။”

ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့မွန်းလွဲပိုင်း ထုတ်ပြန်ပြီးချိန်အထိဆို ပြည်တွင်းမှာကိုဗစ်အတည်ပြု လူနာပေါင်း ၅၀,၄၀၃ ဦးရှိနေပြီး၊ သေဆုံးသူကတော့ ၁,၁၉၉ ဦးရှိနေပါတယ်။ မြန်မာ့ရိုးရာ သီတင်းကျွတ်ကာလမှာ လူကြီးမိဘတွေကို ဂါရဝပြုရာမှာလည်း ကပ်ရောဂါကာလ ထုတ်ပြန်ထားတဲ့စည်းမျဉ်းတွေအတိုင်း လိုက်နာဖို့ကို ကျန်းမာရေးနဲ့ အားကစားဝန်ကြီးဌာနက တိုက်တွန်းထားပါတယ်။ 


 စုစု/VOA (Burmese)

https://burmese.voanews.com/a/myanmar-covid/5641538.html

မြန်မာ့ကိုဗစ်နောက်ဆုံးအခြေအနေနဲ့ ရွေးကောက်ပွဲအတွက် ကြိုတင်ပြင်ထားမှု

ရန်ကုန် ကွာရန်တင်းစင်တာမှ ကျန်းမာရေးဝန်ထမ်းများ မဲပေးကြသည့်မြင်ကွင်း။ (အောက်တိုဘာ ၂၉၊ ၂၀၂၀)

ကိုဗစ်ဖြစ်နေဆဲ မြန်မာနိုင်ငံမှာ ရွေးကောက်ပွဲလည်း ကျင်းပတော့မှာဖြစ်တဲ့အတွက် ကိုဗစ် နောက်ဆုံးအခြေအနေနဲ့ ကာကွယ်ရေးအတွက် ပြင်ဆင်ထားတာတွေကို ကျန်းမာရေးနဲ့အားကစားဝန်ကြီးဌာန ပြောခွင့်ရ ဒေါက်တာသန်းနိုင်စိုးကို ကိုဝင်းမင်းက မေးရာမှာ နောက်ဆုံး ကူးစက်မူအခြေအနေကို သူက အခုလို စတင် သုံးသပ်ပြပါတယ်။

ဒေါက်တာသန်းနိုင်စိုး။ ။ ကိန်းဂဏန်းအရ ကြည့်မယ်ဆိုရင် ကျနော်တို့က နည်းနည်းပြန်တက်တယ်ပေါ့နော်။ ဒါပေမယ့် ကျနော်တို့ အမြင့်ဆုံးတက်ခဲ့တဲ့အနေအထား ၂,၁၀၀ ကျော် တက်ခဲ့တဲ့အနေအထားတော့ ပြန်မရောက်ဘူး။ ပြီးတဲ့အခါကျရင် Test Positivity Rate (စစ်တာစုစုပေါင်းထဲကပိုးတွေ့နှုန်း) နဲ့ ပြန်ကြည့်ရင်တော့ ၉-၈- ၇ ရာခိုင်နှုန်းအထိ ဆင်းခဲ့ပြီးမှ၊ အခုရက်ပိုင်း ၁၀-၁၁ ပြန်ဖြစ်တာလေးတော့ ရှိတယ်ပေါ့နော်။ ဒါလေးကတော့ ကျနော်တို့ နည်းနည်းစိုးရိမ်တယ်။ ဒါပေမယ့် ကျနော်တို့ အမြန်ဆုံး ပြန်လည်ထိန်းချုပ်နိုင်အောင် ဆောင်ရွက်နေတယ်ပေါ့နော်။ ဒါတွေကလည်း တနည်းအားဖြင့် ပြန်တက်လာတာထက်စာရင်၊ တန်းနေတယ် ၊ တည်နေတယ်လို့ ပြောရမှာပေါ့နော်။ အဲဒါတွေကလည်း ဘာဖြစ်လို့ တည်နေရသလဲ၊ ဘာဖြစ်လို့ တန်းနေတာလဲ၊ ဒီအကြောင်းတရားကို နေ့စဉ် နေ့တိုင်းပေါ့နော် ရန်ကုန်တိုင်းဒေသကြီးက တကယ့်ကို ပညာရှင်တွေပေါင်းစုံ နေ့စဉ်နေ့တိုင်း အဖြေရှာနေတယ်ခင်ဗျ။

ကိုဝင်းမင်း။ ။ ဟုတ်ကဲ့ ဆရာတို့ အခု ဒီသုံးသပ်တဲ့အခါကျတော့ နောက်ဆုံးအခုအချိန်ထိပေါ့နော်၊ ဒီကူးစက်မှု တန့်နေရခြင်းအကြောင်းအရင်းက ဘာကြောင့်လို့ သုံးသပ်ထားမိသလဲ။

ဒေါက်တာသန်းနိုင်စိုး။ ။ အဓိက အစု အစု အစု လေးတွေပေါ့နော်။ Cluster of Cases (လူနာအစုလိုက်) လေးတွေ၊ ကျနော်တို့ သွားတွေ့တယ်။ ဘယ်နေရာမှာ သွားတွေ့သလဲဆိုတော့ စျေးမှာ သွားတွေ့တယ်။ လိုက်နာမှုတွေ အားနည်းသွားတာတွေ ရှိတာပေါ့နော်။ ဒီစျေးတွေကို အထူးအလေးအနက် ထားပြီးတော့ပညာပေးတဲ့ လုပ်ငန်းတွေ၊ ပံ့ပိုးကူညီတဲ့အပိုင်းတွေ၊ တိုးချဲု. ပြီးတော့ ဆောင်ရွက်ဖို့ ရှိပါတယ်ခင်ဗျ။ ဒီရက်ပိုင်းလည်း စပြီးတော့ ဆောင်ရွက်နေပါပြီ။ နောက်တခုက ဘုန်းတော်ကြီးကျောင်းတို့၊ ဘိုးဘွားရိပ်သာတို့၊ အဲလိုနေရာမျိုးတွေမှာလည်း Cluster of Cases (လူနာအစုလိုက်) လေးတွေ ပေါ့နော်၊ ခုနပြောသလို အုပ်စုလိုက် အုပ်စုလိုက် ထွက်လာတာပေါ့နော် ။ တယောက်တွေ့တယ်၊ သူနဲ့ Contact Tracing (ထိတွေ့သူတွေကိုခြေရာခံ) လိုက်လိုက်တယ်၊ ၇၀ လောက် ထွက်လာတယ်။ တချို့နေရာတွေဆိုရင် ၂၀၀၊ ၃၀၀ လောက်တောင် ထွက်လာတယ်။ အဲဒီအခါကျတော့ Institution-based (အဖွဲ့အစည်းအခြေပြု) ပေါ့နော်။ ဒါလေးတွေမှာ ကျနော်တို့ အားထည့်ပြီး လိုက်နာရမယ်။ တချို့ကျတော့လည်း စက်ရုံအလုပ်ရုံတွေမှာ Cases (လူနာ) တွေ၊ Cluster (အစုလိုက်) ဖြစ်တာ ရှိတယ်ပေါ့နော်။ နောက် Community (ရပ်ရွာ) ထဲကလည်း ကြိုကြားကြိုကြား ထွက်တဲ့ဟာပေါေ့နာ်။ ဒါလေးတွေကိုလည်း ပြည်သူအားလုံးက အတူတကွ ဒီအချိန်လေးမှာ ဖိပြီးတော့ လိုက်နာလိုက်ရင် ကျနော်တို့ ဒါကို ကျော်ဖြတ်နိုင်မှာ ဖြစ်တယ်ပေါ့နော်။

ကိုဝင်းမင်း။ ။ ဟုတ်ကဲ့ နောက်တခုက အစုလိုက်နေရတဲ့ နေရာတွေပေါ့နော် ဆရာခုနပြောတဲ့ ဘုန်းတော်ကြီးကျောင်းတို့၊ ဘိုးဘွားရိပ်သာတို့ အဲဒီတွေမှာရော ဆရာတို့ ဘယ်လို အစီအစဉ်နဲ့ လုပ်ဖို့ ပြင်ဆင်ထားတာရှိသလဲ။

ဒေါက်တာသန်းနိုင်စိုး။ ။ တချို့ ဘိုးဘားရိပ်သာတွေမှာဆိုရင် Geriatric Care (သက်ကြီးကျန်းမာရေးစာင့်ရှောက်မူ) လိုမျိုးသွားပြီးတော့၊ တကယ့်ကို ဒီဘက်ကလည်း PPE (အကာအကွယ်ဝတ်စုံ) တွေ ဝတ်ပြီးတော့ ဆရာဝန်တွေ သွားကြည့်ပေးတယ်။ တချို့ ဘိုးဘားရိပ်သာတွေမှာဆိုရင် ဝန်ထမ်းတွေကို စစ်ပေးတာတို့ပေါ့နော်။ အဖိုးအဖွားတွေကို စစ်ပေးတာတို့ ဒါမျိုးကျတော့ စျေးထက်စာရင် တနိုင်တပိုင်ပေါ့နော် ဒါတွေ ဆောင်ရွက်ပေးတယ်။ တချို့ ဘုန်းတော်ကြီးကျောင်းတွေ High Risk (အန္တရာယ်မြင့်မြင့်မားမား)ဖြစ်တဲ့ဟာတွေပေါ့နော်။ Contact Case (လူနာနဲ့ထိတွေတာ) တွေရှိခဲ့တဲ့ ဘုန်းတော်ကြီးကျောင်းတွေ၊ ဒါမျိူးတွေကိုလည်း ကျနော်တို့ စစ်ပေးတာတို့ ရှိတယ်ပေါ့နော်။ နောက် စက်ရုံကျတော့လည်း၊ ထိတွေ့မှု ရှိတဲ့နေရာတွေ ဒါတွေလည်း ကျနော်တို့ စစ်တဲ့အပိုင်းတွေတော့ ရှိပါတယ်။

ကိုဝင်းမင်း။ ။ ဟုတ်ကဲ့ အဲဒီတော့ ရွေးကောက်ပွဲမှာတော့ အထူးသဖြင့်တော့ ကိုဗစ်ကူးစက်မှု များနေတဲ့ ဒေသတွေမှာတော့၊ ပိုပြီးတော့ ကာကွယ်ရေးအတွက်ပေ့ါနော် အဓိက ဘာအကြံပေးချင်ပါသလဲ။

ဒေါက်တာသန်းနိုင်စိုး။ ။ အဓိက ကတော့ လက်ရှိ ပါးစပ်၊ နှာခေါင်းက ထွက်တဲ့အမှှုန်ပေါ့နော်။ ကူးစက်ပုံက အခုထိလည်း၊ မျက်စိ၊ ပါးစပ်၊ နှာခေါင်းက ဝင်တယ်၊ အဲဒါ နံပတ် (၁)။ နံပတ် (၂) က ထွက်လာတဲ့ အမှုန်တွေက ကပ်ကျန်နေတဲ့အခါ လက်နဲ့ကိုင်မိရင် ပြန်ကူးစက်နိုင်တယ်။ ဥပမာ လက်မဆေးပဲနဲ့ ခုနပြောတဲ့ မျက်စိ၊ ပါးစပ်၊ နှာခေါင်းကို ကိုင်မိရင်ပေါ့နော်။ အဲ့ဒိတော့ နံပတ် (၁) က၊ အဲဒီ ကူးစက်ပုံ (၂) ခုကို၊ Mask (ပါးစပ်နဲ့နှာခေါင်းစည်း) ပေါ့နော်။ Mask ဆိုတာက Surgical Masks (ရိုးရိုးခွဲခန်းသုံး ပါးစပ်နဲ့နှာခေါင်းစည်း) ရဲ့ Grade (အဆင့်အတန်း) က အမျိုးမျိုး ရှိနိုင်တယ်။ ဒါကြောင့်မို့ KN95 Mask တွေပေါ့နော်၊ အဲ့နေ့မှာ အဖြစ်များတဲ့နေရာတွေကို ဦးစားပေးပြီး ထောက်ပံ့ဖို့ စီစဉ်ထားတယ်။ နောက်တခုက ဝင်တာနဲ့ လက်ကို လက်ဖြန်းဆေးရေပေါ့နော်။ ကျွန်တော်တို့ဒီ လက်နဲ့ ညှစ်နေရမှာစိုးလို့၊ တယောက်ပြီးတစ်ယောက်လေ။ အဲ့ဒါ လက်ကို သေချာ ဖြန်းပေးမယ်။ ဖြန်းတဲ့အခါမှာ လက်ချောင်းလေးတွေ ကားပေးထားဖို့လိုတယ်။ ဒါမှ လက်ချောင်းလေးတွေကြားထဲကို ရောက်မယ်။ လက်ဖဝါး လက်ခုံပေါ့နော် ၂ ကြိမ်ဖြန်းပေးမယ်။ စိုသွားပြီဆိုရင် အသေအချာပေါ့နော် လက်ဖဝါး လက်ဖမိုး လက်ခေါက်ချိုး လက်ဆေးနည်း ၇ ဆင့်ပေ့ါနော၊် ဒါလေးတွေနဲ့ သေချာဆေးလိုက်မယ်။ ခြောက်တဲ့အထိပေါ့နော်၊ စောင့်လိုက်ပြီးတော့၊ စက္ကန့် ၂၀-၃၀ လောက်ဆိုရင် ပြီးပြီပေါ့နော်။ အဲလောက်အတွင်းမှာဆိုရင် သူ့လက်က သန့်သွားပြီပေါ့နော်။ ဒါနဲ့ ပတ်သက်ပြီးရင် မဲပေးတဲ့လုပ်ငန်းစဉ်အကုန် ဆောင်ရွက်လို့ရတယ်။ ပြီးရင် ထွက်ခါနီးမှာ တခေါက်ထပ်ပြီးရင် လက်ဖြန်းဆေးရည်နဲ့ တခါ ဖြန်းပြီးဆေးပေးမယ်။ ပြီးရင် လက်သန်းမှင်တို့မယ်၊ ပြန်ထွက်မယ်။ အဲ့ဒိတော့ မဲပေးတဲ့ လုပ်ငန်းစဉ်တခုလုံးကလည်း မိနစ်ပိုင်းပဲ ကြာမှာဖြစ်တယ်။ WHO ရဲ့ သတ်မှတ်ချက်အရဆိုရင်တော့ ရောဂါပိုးရှိသူနဲ့ ၁၅ မိနစ် ထိတွေ့မှသာလျှင် Primary contact (တိုက်ရိုက်အနီးကပ်ထိတွေ့သူ) လို့ ခေါ်တာပေါ့နော်။ ကျနော်တို့ ဒါတွေအကုန် စမ်းသပ်ပြီးပြီ၊ တချို.ဆို ၆ မိနစ်၊ ၇ မိနစ်ဆိုရင် အကုန်ပြီးသွားပြီ။ နည်းနည်း ကိုယ်စားလှယ်များတဲ့ နေရာတွေပေါ့နော်၊ မဲပုံး ၄ ပုံး ၅ ပုံးလောက် ရှိမယ်ဆိုရင်တော့ ၁၀ မိနစ်လောက် ကြာမယ်၊ အလွန်ဆုံးပေါ့နော်။ အထဲမှာ ဝန်ထမ်းတွေကလည်း လိုအပ်ရင် Face shield တပ်ထားမယ်ပေါ့နော်။ Level 2 PPE ဝတ်တာတို့ နောက် အဖျား တိုင်းတာတွေလည်း ပါမယ်။ တကယ်လို့ ဖျားတဲ့နာတဲ့လူတွေ မဲပေးချင်ရင် သပ်သပ်လမ်းကြောင်း စီစဉ်ထားမယ်။ အတိုဆုံးလမ်းကြောင်းနဲ့ အမြန်ဆုံးပေးပြီး ပြန်ထွက်နိုင်မယ့်ဟာပေါ့နော်။

ကိုဝင်းမင်း။ ။ ဟုတ်ကဲ့ လက်အိတ်တွေရော သုံးဖို့ ရှိသေးလား ဆရာ။

ဒေါက်တာသန်းနိုင်စိုး။ ။ လက်အိတ်ကတော့ ဆရာရယ် လိုအပ်ရင်တော့ သုံးမယ်လို့ Agree (သဘောတူတာ) လုပ်ထားတာတော့ရှိတယ်။ ဒါပေမယ့် နေရာတိုင်းမှာတော့ မသုံးဘူးပေါ့နော်။ အရင်တုန်းကတော့ စစချင်းတုန်းကတော့ သုံးဖို့လုပ်ခဲ့တယ်။ ဒါပေမယ့် ကျနော်တို့က လက်အိတ်ဝတ်နေကျမဟုတ်ဘူး၊ ကျနော်တို့လူမျိုးတွေက။ အဲဒီအခါကျတော့ လက်အိတ်ဝတ်တာနဲ့တင်ပဲ မလိုအပ်တဲ့ ထိတွေ့မှုတွေများမှာလည်း စိုးရိမ်ရတယ်ပေါ့နော်။ ကျနော် ခုနပြောတဲ့ Level 2 PPE (အဆင့် ၂ အကအကွယ်ဝတ်စုံ) ဝတ်တဲ့လူတွေကတော့ လက်အိပ် ပါမှာပေါ့နော်။ သာမန် မဲလာပေးမယ့်သူတွေအတွက်တော့ မပါဘူးပေါနော် နေရာတော်တော်များများမှာ။

ကိုဝင်းမင်း။ ။ ဟုတ်ကဲ့ ကျေးဇူးအများကြီးတင်ပါတယ်ဆရာ။ 


 ၀င်းမင်း/VOA (Burmese)

https://burmese.voanews.com/a/covid-myanmar-election-preparation-/5640907.html

 

ရွေးကောက်ပွဲကာလ ပဋိပက္ခ၊ အဓိကရုဏ်း၊ အငြင်းပွားမှုတွေ ဖြစ်လာနိုင်


နိုဝင်ဘာလ ၈ နေ့မှာ ကျင်းပမယ့် ပါတီစုံအထွေထွေ ရွေးကောက်ပွဲမှာ အဓိကရုဏ်းလိုတွေအပြင် အငြင်းပွားမှုတွေ၊ ပဋိပက္ခတွေ ဖြစ်နိုင်ချေ အလားအလာ အများကြီးရှိတယ်လို့ လေ့လာစောင့်ကြည် သူတွေက ပေးပို့ထားတယ်လို့ New Myanmar Foundation အဖွဲ့က ဒေါ်မြနန္ဒာသင်းက ပြောပါတယ်။

New Myanmar Foundation နဲ့ ရွေကောက်ပွဲ မိတ်ဖက်အဖွဲ့တွေ ပူးပေါင်းပြီး ရွေးကောက်ပွဲ အကြိုကာလ အငြင်းပွားမှု၊ ပဋိပက္ခတွေနဲ့ လုံခြုံရေး အခြေအနေအပေါ် သဘောထားစစ်တမ်းကို အောက်တို ဘာလ ၂၉ ရက် မနေ့က အွန်လိုင်းကနေ ရှင်းလင်းထုတ်ပြန်ခဲ့တာပါ။

မဲရုံတွေအနီးမှာ မမျှော်မှန်းနိုင်တဲ့ အခြေအနေမျိုးတွေ ဖြစ်သွားနိုင်တယ်လို့ New Myanmar Foundation က ဒေါ်မြနန္ဒာသင်းက ပြောပါတယ်။

“ဒီသုံးလအတွင်းမှာတော့ ရွေးကောက်ပွဲ ပဋိပက္ခကို ကြည့်ဖြစ်တဲ့အခါ အဓိကရုဏ်းလိုဟာမျိုးကလည်း ဖြစ်နိုင်တယ်ပေါ့နော်။ အဓိကရုဏ်း ဒါမှမဟုတ် ရွေးကောက်ပွဲနားနီးမှ ဥပမာ မဲပုံးတွေလုသွားတာမျိုး တွေလည်းဖြစ်နိုင်တယ်၊ မဲရုံတွေအနီးမှာ ပြဿနာတွေဖြစ်နိုင်တယ် တခြားမမျှော်မှန်းနိုင်တဲ့ အခြေအနေ တွေလည်း ဖြစ်နိုင်တယ်လို့ ကျွန်မတို့ ယူဆတယ်။ လုံခြုံရေးအသုံးပြုနိုင်မှု၊ လုံခြုံရေး အစီအစဉ်တွေ ကောင်းမွန်စွာချနိုင်မှု၊ ဒေသခံပြည်သူတွေနဲ့ ရွေးကောက်ပွဲ လုံခြုံရေးအဖွဲ့တွေ ပူးပေါင်းဆောင်ရွက်မှုတွေ ကနေ ရာခိုင်နှုန်း ကွာသွားမယ်လို့ ထင်တယ်။ ဒါပေမဲ့ ဖြစ်နိုင်ခြေ အလားအလာ အများကြီးရှိတယ်လို့ စောင့်ကြည့်လေ့လာသူတွေက သတင်းပေးပို့ထားပါတယ်။”

ပြီးခဲ့တဲ့ ၂၀၁၅ ရွေးကောက်ပွဲထက် အခု ၂၀၂၀ ရွေးကောက်ပွဲဟာ အငြင်းပွားမှုတွေ၊ ပဋိပက္ခတွေ ပိုများနိုင်သလို လက်နက်ကိုင်ပဋိပက္ခများတဲ့ ဒေသတွေ၊ လူဦးရေထူးထပ်ပြီး မဲဆွဲစည်းရုံးမှု ပြင်းထန်တဲ့ နေရာဒေသတွေမှာ ထိခိုက်နစ်နာမှုတွေအတွက် ပိုပြီးကုစားမှုတွေလုပ်ဖို့ လိုတယ်လို့လည်း ဖော်ပြထားပါတယ်။

၂၀၂၀ ရွေးကောက်ပွဲအပြီး ဖြစ်လာမယ့် အငြင်းပွားမှုပဋိပက္ခတွေကို လျော့နည်းအောင် ကြိုတင်ပြင်ဆင်မှုတွေ လုပ်သင့်တယ်လို့လည်း ဒေါ်မြနန္ဒာသင်းက ပြောပါတယ်။

“အထူးသဖြင့်က ရွေးကောက်ပွဲအပြီးမှာ ဖြစ်လာမယ့် အငြင်းပွားမှု ပဋိပက္ခတွေကို ပိုပြီးတော့ စိတ်ဝင်စား ပါတယ်။ ဘာလို့လည်းဆိုတော့ ဒီဟာက ကိုဗစ်လည်း ဖြစ်နေတဲ့အချိန်ဆိုတော့ ဥပမာ ရွေးကောက်ပွဲ ရလာဒ်အပေါ်မှာ ကန့်ကွက်တဲ့ကိစ္စတွေ ဒါမျိုးတွေလည်း ဖြစ်လာနိုင်တယ်ဆိုတော့ ကျွန်မ တို့တွေက ကြိုတင်ပြင်ဆင်ပြီးတော့ တတ်နိုင်သမျှ ပဋိပက္ခအငြင်းပွားမှုကို အနည်းဆုံးဖြစ်အောင် ကြိုတင်ပြင်မှုတွေ လုပ်သင့်ပါတယ်။”

ဒီအချက်အလက်တွေဟာ သြဂုတ်၊ စက်တင်ဘာနဲ့ အောက်တိုဘာ သုံးလအတွင်း ပဋိပက္ခတွေ ဖြစ်ပွားနေတဲ့ ရခိုင်မြောက်ပိုင်းနဲ့ ချင်းပြည်နယ် ပလက်ဝမြို့နယ်တွေအပါအဝင် ပြည်နယ်နဲတိုင်းအချို့က မဲဆန္ဒနယ် ၁၀၀ လောက်ကို လေ့လာပြီး နိုင်ငံရေးပါတီတွေ၊ ကိုယ်စားလှယ်လောင်းတွေ၊ အရပ်ဘက်အဖွဲ့အစည်းတွေနဲ့ တွေ့ဆုံမေးမြန်းစစ်တမ်းရယူခဲ့ပြီး အစီရင်ခံစာပေါင်း ၄၅၀ကို အခြေခံကာ ထုတ်ပြန်တာဖြစ်တယ်လို့လည်း ပြောပါတယ်။

ရွေးကောက်ပွဲလို အင်မတန် ရှုပ်ထွေးတဲ့ဖြစ်စဉ်မှာ ပဋိပက္ခမဖြစ်အောင် အကြမ်းမဖက်ရေးမူကို တိတိကျကျ လိုက်နာသလို ထောက်ခံသူတွေလည်း တိတိကျကျ လိုက်နာဖို့ ကြိုးစားနေတယ်လို့ အမျိုးသားဒီမိုကရေစီအဖွဲ့ချုပ် NLD ပါတီ အောင်နိုင်ရေးကော်မတီပြောရေးဆိုခွင့်ရှိသူ ဒေါက်တာမျိုးညွန့်က ပြောပါတယ်။

“ရွေးကောက်ပွဲမှ မစရသေးဘူး၊ ဒီရွေးကောက်ပွဲဟာ မသမာခဲ့မှုဖြစ်ခဲ့ရင်ဆိုပြီး နိုင်ငံရေးပါတီ ၃၄ ခုက တပ်မတော်ကို သွားရောက်ပြီးတော့ အကူအညီပေးဖို့ တောင်းဆိုခဲ့တာလည်းရှိပါတယ်။ မဖြစ်ခင်ကတောင် ဒီလိုစွပ်စွဲနေတယ်ဆိုတော့ ရွေးကောက်ပွဲလို အင်မတန်ရှုပ်ထွေးတဲ့ ဖြစ်စဉ်တစ်ခုမှာ ဒီလိုစွပ်စွဲချက်တွေ ဖြစ်လာနိုင်တယ်ဆိုတာ ဖြစ်နိုင်ခြေ တစ်ခုပါပဲ။ ကျွန်တော်တို့ကတော့ ပဋိပက္ခမဖြစ်အောင် အကြမ်းမဖက်ရေးမူကို တိတိကျကျလိုက်နာတယ်။ ကျွန်တော်တို့ ထောက်ခံသူတွေလည်း တိတိကျကျ လိုက်နာဖို့ အစွမ်းကုန်ကြိုးစားနေပါတယ်။”

နိုင်ငံရေးလေ့လာသုံးသပ်သူ ဦးမောင်မောင်စိုးကတော့ လက်ရှိအချိန်မှာ အဓိကရုဏ်းလိုဖြစ်နိုင်တာ မတွေ့ရသေးပေမယ့် အကြီးအကျယ် အငြင်းပွားမှုတော့ သေချာပေါက်ဖြစ်နိုင်တယ်လို့ သုံးသပ်ပါတယ်။

“တပ်ကပေးတဲ့ ကြိုတင်မဲဟာ မဲအိတ်တွေပွင့်နေလို့ ပယ်မဲလုပ်မယ့်အချိန်မှာ တပ်က သတင်းစာရှင်းလင်း လုပ်ပြီးပြောထားတာ မဲအိတ်တွေက သူဟာသူ ပွင့်နေတာ ဆိုတာဖြစ်နေတာ။ အခု မနေ့က ကြိုတင်မဲ ပေးတော့လည်း မဲအိတ်တွေ ကော်နဲ့ပိတ်ရပြုရနဲ့ လိုအပ်ချက်တွေတော့ များတယ်ဗျ။ ဒါတွေက အငြင်းပွား ဖွယ်ရာတွေ ဖြစ်တာပေါ့။ အငြင်းပွားဖွယ်ရာရှိရင်တော့ ပြဿနာက အနည်းနဲ့အများတော့ ဖြစ်နိုင်တာပဲ။ ဒါပေမဲ့ အဓိကရုဏ်းတွေ ဘာတွေ ကြီးကြီးမားမား ဖြစ်လာနိုင်သလားဆိုရင်တော့ လောလောဆယ်မှာ ဒါမျိုးဖြစ်နိုင်တဲ့ အခြေအနေ မတွေ့သေးပါဘူး။ သေချာပေါက်ဖြစ်နိုင်တာတစ်ခုကတော့ အကြီးအကျယ် အငြင်းပွားမှုတော့ ဖြစ်ပွားနိုင်မယ်ထင်ပါတယ်။”

ကြံ့ခိုင်ဖွံ့ဖြိုးရေးပါတီ ပြောရေးဆိုခွင့်ရှိသူ ဦးသိန်းထွန်းဦးကတော့ အခု၂၀၂၀ မှာ မဲဆွယ်စည်းရုံးရေး အနှောင့်အယှက် အပေးခံတာတွေရှိပြီး မြေပြင်ရဲ့ လက်ရှိအနေအထားတွေအရ ရွေးကောက်ပွဲနေ့ မဲရေ တွက်တဲ့အချိန်အထိ စိုးရိမ်တယ်လို့ သူရဲ့ အမြင်ကို ပြောပါတယ်။

“ကျွန်တော် အင်မတန် စိုးရိမ်နေတဲ့ ကိစ္စပဲဗျ။ မြေပြင်အခုဖြစ်နေတဲ့ ဘယ်တုန်းကမှ မကြုံဖူးတဲ့ ကျွန်တော်တို့ အပေါ်မှာ အနှောင့်အယှက်ပေးခံရမှုက ဒီ ၂၀၂၀ မှာ တအားထူးခြားတယ်။ မဲဆွယ်စည်းရုံးရေး အသံချဲ့စက် မပါဘဲ သွားတာတောင် ရပ်ထဲ၊ ရွာထဲမှာ လမ်းပိတ်ဆို့ပြီး ကကြတယ်၊ ခုန်ကြတယ်၊ သီချင်းတွေဖွင့်ပြီးတော့ အနှောက်အယှက်တွေ ပေးကြတယ်။ ဒီမြေပြင်ရဲ့ လက်ရှိအနေထားတွေ ကြည့်ပြီးတော့ ရွေးကောက်ပွဲနေ့ နောက် မဲရေတဲ့အချိန်အထိ ကျွန်တော် စိုးရိမ်ပါတယ်လို့ ကျွန်တော်ရဲ့ ကိုယ်ပိုင်အမြင် တစ်ခုဖြစ်ပါတယ်ဗျ။”

ရွေးကောက်ပွဲ အကြိုကာလမှာ လက်ရှိ ပါတီထောက်ခံသူတွေ အချင်းချင်း ပဋိပက္ခတွေ တွေ့နေရပြီ ဖြစ်သလို ရွေးကောက်ပွဲနေ့နဲ့ ရွေးကောက်ပွဲ အပြီးမှာလည်း ၂၀၁၅ထက် အငြင်းပွားမှုတွေ၊ ကန့်ကွက်မှုတွေ ဖြစ်လာနိုင်တယ်လို့ ပွင့်လင်းမြန်မာရှေ့ဆောင်အဖွဲ့က ဦးအေးကျော်က ပြောပါတယ်။

“ရွေးကောက်ပွဲအကြိုကာလပေါ့၊ ဒီကာလမှာတော့ ၂၀၁၅ နဲ့  နှိုင်းယှဉ်မယ်ဆိုရင် မဲဆွဲစည်းရုံးရေး ကာလထဲမှာ ပါတီထောက်ခံသူ အချင်းချင်း ပဋိပက္ခဖြစ်တာတွေ တွေ့နေရပြီပေါ့နော်။ ရွေးကောက်ပွဲ နေ့မှာလည်း မလိုလားအပ်တဲ့ ပြဿနာလေးတွေ ၂၀၁၅ထက် ပိုတွေ့နိုင်တယ်လို့ ထင်တယ်ဗျ။ အဲဒီလိုပဲ ရွေးကောက်ပွဲအပြီး ရွေးကောက်ပွဲဆိုင်ရာ အငြင်းပွားမှုတွေ၊ ကန့်ကွက်မှုတွေကလည်း ၂၀၁၅ ထက် ပိုပြီးတော့ ဆိုးဆိုးဝါးဝါး ပေါ်ပေါက်လာနိုင်တယ်လို့ ကျွန်တော်တော့ ခန့်မှန်းမိတယ်ဗျ။”

ရွေး‌ကောက်ပွဲနေ့မှာ ပဋိပက္ခတွေကို တားဆီးနိုင်ဖို့ ရွေးကောက်ပွဲကော်မရှင်အနေနဲ့ အရပ်ဘက်အဖွဲ့ အစည်းတွေ၊ စေတနာ့ဝန်ထမ်းတွေနဲ့ ပူးပေါင်းဆောင်ရွက်ဖို့လည်း ဒီအစီရင်ခံစာက အကြံပြု တိုက်တွန်းထားပါတယ်။

သက်ဆိုင်ရာ မြို့နယ်အသီးသီးမှာ ရွေးကောက်ပွဲဆိုင်ရာ လုံခြုံရေးနဲ့ စီမံခန့်ခွဲရေးကော်မတီအဖွဲ့တွေမှာ Call Center လိုမျိုး ဖွင့်လှစ်ချိတ်ဆက်ဆောင်ရွက်ဖို့လည်း တိုက်တွန်းထားပါတယ်။

ရွေးကောက်ပွဲဆိုင်ရာ လုံခြုံရေးနဲ့ စီမံခန့်ခွဲရေးကော်မတီတွေ ဖွဲ့စည်းထားပေမယ့် နိုင်ငံရေးပါတီတွေ၊ လွှတ်တော်ကိုယ်စားလှယ်လောင်းတွေနဲ့ ပြည်သူတွေက သိရှိမှုနည်းနေသေးတယ်လို့လည်း ဆိုပါတယ်။

ရွေးကောက်ပွဲကာလအတွင်းမှာ ရပ်ရွာအေးချမ်းသာယာရေး ပျက်ပြားအောင် ဆူပူလှုံ့ဆော်နေသူတွေကို ထိထိရောက်ရောက် အရေးယူဖို့ နိုင်ငံတော်သမ္မတ ဦးဝင်းမြင့်က အောက်တိုဘာ ၁၆ ရက် နေ့က ‌ကြေညာချက် ထုတ်ပြန် အမိန့်ပေးထားပါတယ်။

မဲဆွယ်ကာလအတွင်းမှာ အကြမ်းဖက်တာ၊ ခြိမ်းခြောက်နှောင့်ယှက်တာတွေနဲ့ ဘာသာရေး၊ လူမျိုးရေးအကြောင်း ပြပြီး ဆူပူအောင်လှုံ့ဆော်နေသူတွေကို တွေ့နေရတယ်လို့ နိုင်ငံတော်သမ္မတ အမိန့်ကြေညာချက်မှာ ဖော်ပြထားပါတယ်။


RFA Burmese

https://www.rfa.org/burmese/program_2/conflicts-during-2020-election-10302020051734.html

မဲပေးရာမှာ ရပ်ကျေးကော်မရှင်ဥက္ကဋ္ဌလုပ်ရပ်ကို ဒေသခံတွေကန့်ကွက်ကြ

မကွေးတိုင်း၊ ပခုက္ကူခရိုင်၊ ပေါက်မြိုနယ် ကျွန်းရင်းရွာမှာ ကြိုတင်မဲကိစ္စနဲ့ပတ်သက်ပြီး ပြဿနာဖြစ်ပွားတာကြောင့် မြိုနယ်ကော်မရှင်က ရှင်းပြနေတာကို တွေ့ရစဉ်

Photo: Soe Yar Zar

မကွေးတိုင်း၊ ပခုက္ကူခရိုင်၊ ပေါက်မြို့နယ်၊ ကျွန်းရင်းကျေးရွာမှာ ရွေးကောက်ပွဲအတွက် ကြိုတင်မဲပေးရာမှာ ရပ်ကျေးကော်မရှင်ဥက္ကဋ္ဌက သူမဲပေးချင်တဲ့ပါတီကို တံဆိပ်နှိပ်ပေးလိုက်တယ်ဆိုပြီး ဒေသခံတွေက မကျေနပ်ကြဘဲ လူစုလူဝေးနဲ့ ကန့်ကွက်ခဲ့ကြပါတယ်။ မနေ့က အသက် ၆၀ နှစ်အထက်တွေကို ကြိုတင်မဲ ပေးခိုင်းရာမှာ အဖော်ပါလာသူတွေကို လိုက်ပါခွင့်မပေးဘဲ ရပ်ကျေးကော်မရှင်ဥက္ကဋ္ဌက သူကိုယ်တိုင် တံဆိပ်နှိပ်ပေးတာတွေ လုပ်ခဲ့တယ်လို့ ဒေသခံတွေက ဆိုပါတယ်။

ကြိုတင်မဲပေးသူ အယောက် ၄၀ မြောက်မှာတော့ ရပ်ကျေးကော်မရှင်ဥက္ကဋ္ဌဟာ မဲပေး သူတွေပေးခိုင်းတဲ့ ပါတီကိုမပေးဘဲ သူပေးချင်တဲ့ပါတီကို မဲပေးတယ်ဆိုပြီး မဲလာပေး သူတွေက လူစုလူဝေးနဲ့ ကန့်ကွက် တောင်းဆိုခဲ့ပါတယ်။ မြို့နယ်နဲ့ ခရိုင်ကော်မရှင်ရုံးအဖွဲ့ဝင်တွေ ရောက်လာပြီး ကျေးရွာကော်မရှင်အဖွဲ့ဝင်တွေကို အရေးယူပေးမှာဖြစ်သလို ကြိုတင်မဲပေးခဲ့တဲ့ လူ ၄၀ ကို လည်း ပြန်လည်မဲပေးခွင့်ပေးမယ်ဆိုပြီး ညှိနှိုင်းတာကြောင့် ပြေလည်မှုရခဲ့တယ်လို့ ပေါက်မြို့နယ် ပြည်သူ့လွှတ်တော် ကိုယ်စားလှယ်လောင်း ဦးရဲထွန်းဦးက ပြောပါတယ်။

ကျွန်းရင်းကျေးရွာပြဿနာမှာပါဝင်တဲ့သူတွေကို ခရိုင်ကော်မရှင်က ဒီနေ့လာရောက်စစ်ဆေးမယ်လို့ ပေါက်မြို့နယ် ရွေးကောက်ပွဲကော်မရှင် အတွင်းရေးမှူး ဒေါ်ဇင်မာသက်က ပြောပါတယ်။ ကျွန်းရင်းကျေးရွာဟာ အိမ်ခြေ ၄၀၀ ကျော်ရှိကာ မဲပေးခွင့်ရှိသူ ၁၇၀၀ ကျော်ရှိတယ်လို့လည်း သိရပါတယ်။


RFA Burmese

https://www.rfa.org/burmese/news/kyunyin-village-advance-voting-problem-10302020063839.html

ဗန်းမော်က လေကြောင်းရုံးအနုကြမ်းစီးခံရပြီး တစ်ဦးသေဆုံး

ဓာတ်ပုံ - ဗန်းမော်မြို့နယ်ရဲတပ်ဖွဲ့ 

ကချင်ပြည်နယ်၊ဗန်းမော်မြို့လယ် က မြန်မာ့အမျိုးသားလေကြောင်းလိုင်းရုံး ဒီမနက်မှာ အနုကြမ်းစီးခံရပြီး မန်နေဂျာရဲ့ ဇနီးအသတ်ခံခဲ့ရတယ်လို့ ဗန်းမော်အမတ် ဦးအောင်သိန်းက ဘီဘီစီကိုအတည်ပြုပါတယ်။

Mask တပ်ထားတဲ့ လူသုံး‌ယောက်ရုံးခန်းထဲဝင်လာကာ မန်နေဂျာကို ထိုးကြိတ်ပြီးသတိလစ်သွားတဲ့အခါ ထိုင်ခုံမှာ တိတ်တွေနဲ့ပတ်ပြီး ချုပ်ထားခဲ့တယ်လို့ ရဲကိုထွက်ချက်ပေးထားပါတယ်။ သူသတိရလာတဲ့အခါ မီးဖိုခန်းထဲက ဇနီးရဲ့အလောင်းကိုတွေ့ခဲ့ရတယ်လို့ ထွက်ချက်ပေးထားတာပါ။

 မန်နေဂျာကို ဆေးရုံတင်ထားရပြီး မစိုးရိမ်ရဘူး  ဦးအောင်သိန်းကပြောပါတယ်။ 

အဲ့ဒီရုံးခန်းမှာ မိသားစု ၄ ယောက်နေထိုင်တာဖြစ်ပြီး အိမ်ပေါ်ထပ်မှာ အိပ်ပျော်နေတဲ့  ၅တန်းနဲ့ ၃တန်းအရွယ် သမီးလေးနှစ်‌ယောက်ကတော့ ထိခိုက်မှုမရှိခဲ့ဘူးလို့ သူကပြောပါတယ်။ မီးခံသေတ္တာထဲက ငွေကျပ် သိန်း ၂၀ လည်းယူဆောင်သွားကြတယ်လို့ ရဲကိုထွက်ချက်ပေးထားပါတယ်။ 


ဘီဘီစီမြန်မာပိုင်း

https://www.facebook.com/BBCnewsBurmese

ထိုင်း-မြန်မာနယ်စပ် ယာဉ်မောင်းနှစ်ဦး ကိုဗစ်ကူးစက်

မြန်မာဘက်က ကုန်ကားမောင်းသမားတွေကို ထိုင်းဘက်က COVID 19 စစ်ဆေးပေးနေတဲ့ မြင်ကွင်း။ ( အောက်တိုဘာ ၂၉၊ ၂၀၂၀)

ကိုဗစ်ကပ်ရောဂါကြောင့် ယာယီပိတ်ထားရတဲ့ ထိုင်း၊ မြန်မာနယ်စပ် ကုန်သွယ်ရေး ပြန်ဖွင့်လိုက်ပြီး ရက်ပိုင်းအတွင်းမှာပဲ မြန်မာနိုင်ငံသား ယာဉ်မောင်း ၂ ယောက်မှာ ရောဂါပိုးကူးစက်နေတာ စစ်ဆေးတွေ့ရှိတာကြောင့် စောင့်ကြည့်စစ်ဆေးနေတဲ့အကြောင်း ပြောပြပါမယ်။ ဗွီအိုအေမြန်မာပိုင်း သတင်းထောက် မအေးအေးမာက ထိုင်း မြန်မာနယ်စပ်ကနေ သတင်းပေးပို့ထားပါတယ်။

ထိုင်းနိုင်ငံမဲဆောက်မြို့နဲ့ မြန်မာနိုင်ငံ မြဝတီမြို့ကြား နယ်စပ်ကုန်သွယ်ရေး ပြန်ဖွင့်ပြီး ၄ ရက်အကြာမှာပဲ မြန်မာကုန်တင်ကားမောင်းသမား ၂ ဦး ရောဂါပိုးကူးစက်နေတာ အတည်ပြုခဲ့တာ ဖြစ်ပါတယ်။ ကပ်ရောဂါကြောင့် သီတင်းတပတ်ကြာ ယာယီရပ်နားထားပြီး တနင်္လာနေ့ကစ ပြန်ဖွင့်ခဲ့ရာမှာတော့ ယာဉ်မောင်းတွေ၊ ကုန်တင်ကုန်ချ အလုပ်သမားတွေ အပါအဝင် နယ်စပ်ကုန်သွယ်ရေးမှာ အလုပ်လုပ်ကိုင်နေသူတွေကို မဲဆောက်မြို့က ကုန်စည်လွှဲပြောင်းရေး နယ်စပ်ဒေသက သတ်မှတ်နယ်မြေမှာ ထိုင်းနိုင်ငံက ရောဂါပိုးရှိ၊ မရှိ စောင့်ကြည့် စစ်ဆေးနေတာပါ။ ဒီလိုစစ်ဆေးရာမှာ မြန်မာနိုင်ငံသား ယာဉ်မောင်း ၂ ဦးမှာ ရောဂါကူးစက်နေကြောင်း မနေ့တုန်းကပဲ စစ်ဆေးအတည်ပြုခဲ့တာလို့လည်း ကရင်ပြည်နယ် မြဝတီခရိုင်အုပ်ချုပ်ရေးမှူး ဦးတေဇာအောင်က ပြောပါတယ်။

"မနေ့က ဟုတ်တယ်၊ လေးဘီးကား ခြောက်ဘီးကာ Light Truck, High Truck ကားအုပ်စုတွေထဲက ကားလေးတွေရှိတယ်။ ဒေသသုံးပစ္စည်းတွေ သယ်တဲ့ကားတွေ ရှိတယ်။ ဒီဘက်ကတော့ ခါလီသွားတယ်။ ဟိုဘက်ကတော့ ကားတွေ ချိန်းပြီး ကုန်တွေ ဒေသသုံးပစ္စည်းတွေကို ကုန်သွယ်တဲ့ကားတွေ ရှိတယ်။ ကားလေးတွေထဲက ၂ ဦးတွေ့တယ်။ သူတို့နေတဲ့နေရာမှာပဲ သူတို့နဲ့ ထိတွေ့မှုရှိတယ် ကျနော်တို့ BCF ဇုန်မှာတော့ မရှိဘူး။ ကားပေါ်က မဆင်းဘူး၊ တိုက်ရိုက်သွာတာပေါ့။"

မြန်မာနိုင်ငံမှာ ကိုဗစ်ကပ်ရောဂါ တကျော့ပြန် ကူးစက်မှုတွေ တိုးလာနေချိန်မှာပဲ နယ်စပ်မြို့ဖြစ်တဲ့ မြဝတီမှာလည်း ရောဂါကူးစက်သူတွေ များလာနေသလို သေဆုံးသူတွေလည်း ရှိနေတာကြောင့် ထိန်းချုပ်ဖို့ ကြိုးစားနေတယ်လို့လည်း ခရိုင်အုပ်ချုပ်ရေးမှူး ဦးတေဇာအောင်က ပြောပါတယ်။

"မနေ့က အဲဒီ ၂ ဦးအပါအဝင် ၇၄ ဦး ရှိတယ်။ အဲဒီထဲက ၄၂ ဦးကတော့ဆေးရုံက ဆင်းသွားပြီ ပထမဦးဆုံးမှာတော့ ၃ ဦး သေတာ ရှိတယ်။ အဓိကတော့ ပိုးတွေ့နိုင်ခြေများတဲ့ primary contact COVID တွေကိုတော့ အထူး ထားတဲ့ လုံးချင်းအိမ်ယာ ၅၀ အဲဒီနေရာမှာထားတယ် secondary contact COVID ကတော့ တတ်နိုင်သမျှ Home quarantine ထားတယ် ရပ်ကွက် ၅ ကျွန်းတောစျေးဘက်ဆိုရင် တယောက် ၂ယောက်ကနေ ၃ ယောက်ထိရှိလာပြီ။ လမ်းက ရှည်တော့ အဲဒီ နေရာတွေကို ကွင်းဆင်းစစ်ဆေးပြီးရင် သူတို့ကို ကိုဗစ်စစ်ဆေးပေးမယ်။"

နယ်စပ်မြိုံ့ဖြစ်တဲ့ မြဝတီမြိုံ့မှာ အိမ်နီးချင်း ထိုင်းနိုင်ငံကနေ အကြောင်းအမျိုးမျိုးနဲ့ ပြန်ရောက်လာသူတွေ အပါအဝင် ရောဂါကူးစက်မှု မရှိအောင် သီးခြားခွဲ စောင့်ကြည့်စစ်ဆေးတာတွေကိုလည်း ပုံမှန်လုပ်နေတယ်လို့ ပြောပါတယ်။

"ပုံမှန်ကတော့ ၁၀၀ နဲ့ ၂၀၀ကြားမှာ primary contact တခုတည်းပဲပေါ့ နောက် ခရီးသွားရာဇဝတ်ရှိသူတွေ ဆိုရင် ၁၀၀ ဝန်းကျင်းလောက်ရှိတယ်။ ပြည်တော်ပြန်တို့ IDC (ထိုင်းလူဝင်မှုကြီးကြပ်ရေးအချုပ်ထောင်) က လာတဲ့သူတွေကတော့ ၄၀၀ ကနေ ၅၀၀ လောက်ရှိတယ်၊ နေရာမတူအောင်ထားတယ်။ positive ချင်းတူရင်တောင်မှ အတူတူထားလို့ မရဘူး။"

ထိုင်းနိုင်ငံမှာ ကိုဗစ်ကပ်ရောဂါကြောင့် သေဆုံးသူ ၅၉ ယောက်နဲ့ ကူးစက်သူ ၃,၆၀၀ လောက်ရှိခဲ့ပေမဲ့ မကြာသေးခင် လတွေကစလို့ ရောဂါကူးစက်မှုတွေ ကျဆင်းလာနေရာက ကန့်သတ်မှုတွေ လျှော့ပေါ့လာချိန်မှာပဲ မြန်မာနိုင်ငံမှာ ကူးစက်မှုတွေ မြင့်တက်လာတာကြောင့် နယ်စပ်ဒေသတွေမှာ သွားလာလှုပ်ရှားမှုတွေကို ကန့်သတ်ထားပြီး စောင့်ကြည့် စစ်ဆေးနေတာပါ။ မြန်မာနိုင်ငံမှာတော့ ကိုဗစ်ကပ်ရောဂါ ကူးစက်မှုတွေ တိုးလာနေရာမှာ အခုဆိုရင် သေဆုံးသူ ၁,၀၀၀ ကျော်နဲ့ ကူးစက်သူ ၅၀,၀၀၀ ကျော်အထိ ရှိနေပါတယ်။ 


မအေးအေးမာ/VOA (Burmese)

https://burmese.voanews.com/a/thai-myanmar-border-mm-driver-covid/5641470.html

အိန္ဒိယရွှေမှောင်ခိုမှု မြန်မာနိုင်ငံတွင်း အဆက်အသွယ်ရှိနိုင်

 

အိန္ဒိယနိုင်ငံထဲ ရွှေချောင်းမှောင်ခို တင်သွင်းမှုနဲ့ ဆက်စပ်နေတဲ့ မြန်မာ၊ နီပေါနဲ့ ဘူတန်နိုင်ငံက လူတွေနဲ့ ပတ်သက်တဲ့ သဲလွန်စ တွေ ကို ရှာဖွေ တွေ့ရှိထားပြီလို့ အိန္ဒိယ အမျိုးသား စုံစမ်းစစ်ဆေးရေး အေဂျင်စီ (NIA)က ပြောကြောင်း အိန္ဒိယ သတင်းဌာနတွေက ကြာသပတေးနေ့က ပြောပါတယ်။

ဩဂုတ်လတုန်းက အိန္ဒိယနိုင်ငံ နယူးဒေလီမြို့ ရထားဘူတာတစ်ခုမှာ အလေးချိန် ၈၃.၆၂၁ ကီလို (၅၁.၂ ပိဿာ) ရှိတဲ့ ရွှေချောင်းတွေ သိမ်းဆည်းရရှိခဲ့တဲ့ အမှုရဲ့ နောက်ဆက်တွဲအဖြစ် ကြာသပတေးနေ့က အိန္ဒိယ အမျိုးသား စုံစမ်းစစ်ဆေးရေး အေဂျင်စီ (NIA)က Guwahti၊ Sangli နဲ့ Maharashtra ဒေသက နေရာ ၄ ခုမှာ ရှာဖွေ စစ်ဆေးမှုတွေ ပြုလုပ်ခဲ့တာဖြစ်တယ်လို့ NIA ကို ကိုးကားပြီး The Times of India သတင်းစာမှာ ဖော်ပြထားတာပါ။

အဲဒီလိုရှာဖွေရာမှာ သိမ်းဆည်း ရမိတဲ့ စာရွက်စာတမ်းတွေနဲ့ အီလက်ထရွန်းနစ် ပစ္စည်း ကိရိယာတွေထဲမှာ ရွှေချောင်းတွေလွှဲပြောင်း ပေးပို့တဲ့ သတင်းအချက်အလက် အသေးစိတ် ပါရှိပြီး ဒီ ရာဇဝတ်မှုထဲ ပါဝင်တဲ့ သူတွေရဲ့ အထောက်အထားတွေကိုလည်း တွေ့ရှိခဲ့ ရတယ်လို့ ပြောပါတယ်။

တရားခံအဖြစ် စွပ်စွဲခံထားရသူတွေကို စစ်ဆေးမေးမြန်းချက်အရ အာသံပြည်နယ် Guwahati မြို့ကနေ ရွှေချာင်း တွေကို နယူးဒေလီ မြို့ကို ပို့ဖို့ ရွှေချောင်း သယ်ဆောင်လာသူတွေက ညွှန်ကြားခဲ့တာ ဖြစ်ကြောင်း၊ အဲဒီလို ညွှန်ကြား ခဲ့သူတွေဟာ မြန်မာ၊ နီပေါနဲ့ ဘူတန်နိုင်ငံတွေမှာ ရှိတဲ့ အဆက်အသွယ်တွေကတဆင့် ရွှေမှောင်ခိုသွင်းလာတဲ့ သံသယရှိစဖွယ် အချက်အလက် တွေကို ရှာဖွေ တွေ့ရှိခဲ့ရတယ်လို့လည်း NIA က ပြောပါတယ်။

ဩဂုတ်လ ၂၈ ရက်နေ့က လူ ၄ ဦးဆီက ရူပီး ကုဋေ ၄၂.၈၉ (အမေရိကန်ဒေါ်လာ ၅ သိန်း ရ သောင်းကျော်) တန်ဖိုးရှိတဲ့ ရွှေချောင်း တွေ ရှာဖွေသိမ်းဆည်းရမိတဲ့အမှုကို နယူးဒေလီ က NIA ရုံးက စက်တင်ဘာလ ၁၆ ရက်နေ့က မှတ်တမ်းတင်ပြီး အမှုဖွင့်ထားတာ ဖြစ်ပါတယ်။

အာသံပြည်နယ်က NIA အဖွဲ့နဲ့ အကောက်ခွန်အဖွဲ့တွေဆီက သတင်းတွေအရ အိန္ဒိယ အရှေ့မြောက်ပိုင်းဒေသက ရွှေမှောင်ခို တင်သွင်းတဲ့ အကြီးဆုံး လမ်းကြောင်း ဖြစ်လာကြောင်း Deccan Herald သတင်းဌာနက ပြောပါတယ်။ ရွှေတွေကို မြန်မာနယ်စပ် ကတဆင့် မဏိပူရ၊ မီဇိုရမ်၊ Nagaland၊ နဲ့ Arunachal Predeshပြည်နယ်တွေကို ဖြတ်သယ်တာဖြစ်တယ်လို့လည်း ပြောပါတယ်။ တရုတ်ပြည်က မှောင်ခိုရွှေ အများစုက အိန္ဒိယမြန်မာ နယ်စပ်တစ်လျှောက်က အများဆုံး ဝင်ရောက်တာ ဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/india-gold-smuggling-case-/5641314.html

မိုင်းပန်မြို့နယ် မဲရုံသွားစစ်သည့် အစိုးရ ဝန်ထမ်း ၂ဦးကို RCSS/SSA တပ်သားများပစ်ခတ်ဟုဆို


သျှမ်းပြည်တောင်ပိုင်း မိုင်းပန်မြို့နယ် နားမွန်ကျေးရွာအုပ်စုတွင်း မဲရုံသွားစစ်သည့် ခရိုင်အုပ်ချုပ်ရေးမှူး ၂ ဦး အား ပစ်ခတ်မိကြောင်း RCSS/SSA က အတည်ပြုပြောဆိုသည်။

အောက်တိုဘာ ၂၇ ရက် နေ့လည် ၁ နာရီ ဝန်းကျင်က မဲရုံဝန်ထမ်း နှင့်မဲရုံ ပစ္စည်းများ သွားပို့ဆောင်သည့် လင်းခေးခရိုင်အုပ်ချုပ်ရေးမှူး နှင့် အဖွဲ့ စီးနင်းလိုက်ပါလာသည့် မော်တော်ယာဉ်ကို သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) မှ ပစ်ခတ်ခဲ့ကြောင်း ပြောခွင့်ရ ပုဂ္ဂိုလ် ဒုဗိုလ်မှူးကြီး အုပ်ခေး က အတည်ပြုပြောဆိုသည်။

“ဟုတ်ပါတယ်။ အဲ့ဒီ အုပ်ချုပ်ရေးမှူးတို့အဖွဲ့ ကို RCSS တပ်ဖွဲ့ဝင်တွေ မတော်တဆ ပစ်ခတ်မိတာ အဲ့ဒါ မှန်ပါတယ်။ အထက်ကနေစီမံချက် ရှိရှိနဲ့ အမိန့်နဲ့ ပစ်ခတ်ခိုင်းတာတော့ လုံးဝ မဟုတ်ဘူး” ဟု RCSS/SSA ပြောခွင့်ရ က သျှမ်းသံတော်ဆင့် ကိုပြောသည်။

လင်းခေးခရိုင်အုပ်ချုပ်ရေးမှူးတို့အဖွဲ့ မိုင်းပန်မြို့နယ်သို့ ကွင်းဆင်းစစ်ဆေးမည်ကို RCSS/SSA ဆက်ဆံရေးရုံးကို အကြောင်းကြားထားသော်လည်း မတော်တဆ ဖြစ်မိသွားကြောင်း RCSS/SSA ကပြောသည်။

“ အကြောင်းကြားထားတဲ့ဟာကို RCSS/SSA တပ်ဖွဲ့ဝင် ရှေ့တန်းတွေ က မကြားသိရသေးဘူး။ ရှေ့တန်းဆိုတော့ လမ်းဖြတ်ကူးတဲ့ချိန်မှာ အဲ့ဒီ ယာဉ်တန်းက ရုတ်တရက် ရောက်ချလာတော့ သူတို့လည်း အလန့်တကြား ပစ်ခတ်မိရတာပါ” ဒုဗိုလ်မှူးကြီး အုမ်ခေး က ဆိုသည်။

RCSS/SSA အနေဖြင့် သက်ဆိုင်ရာ ရဲဘော်များကို ကြီးလေးသည့် ပြစ်ဒဏ်နှင့် အရေးယူသွားမည် ဖြစ်ကြောင်း၊ စည်းမျဉ်းစည်းကမ်း အတိုင်း အရေးယူဆောင်ရွက်သွးမည်ဖြစ်ကြောင်းလည်း ဒုဗိုလ်မှူးကြီး အုမ်ခေး က ထပ်လောင်း ပြောသည်။

“ဘယ်လိုပဲ ဖြစ်နေနေ RCSS ကတော့ အမှားရှိတယ်လို့တော့ ဝန်ခံပါတယ်။ အဲ့ဒါကြောင့်မလို့ တာဝန်ရှိ ပုဂ္ဂိုလ်တွေနဲ့ သက်ဆိုင်တဲ့ သူတွေကို ကြီးလေးတဲ့ ပြစ်ဒဏ် ပြီးတော့ အဖွဲ့အစည်းရဲ့ စည်းမျဉ်းစည်းကမ်းအတိုင်း အရေးယူသွားမယ်လို့တော့ ဌာနချုပ်က ကြားသိရပါတယ်” ဒုဗိုလ်မှူးကြီး အုမ်ခေး ကပြောသည်။

နိုဝင်ဘာ ၈ ရက်နေ့မှာ ကျင်းပမည့် ၂၀၂၀ ပါတီစုံ အထွေထွေရွေးကောက်ပွဲနေ့မှာ ဆန္ဒမဲ လာပေးမည့် ပြည်သူလူထုများ အနေဖြင့် မကြောက်ရွံ့စေရန် RCSS/SSA က ပြောကြားခဲ့သည်။

လက်ရှိ အခြေအနေမှာ ပုံမှန် ပြန်ဖြစ်နေပြီဖြစ်ကြောင်း၊ ပါတီများလည်း ထိုနယ်မြေသို့ စည်းရုံးရေးဆင်းရန် ပြန်လည်ပြင်ဆင်နေကြပြီဖြစ်ကြောင်း သိရသည်။

“ရွေးကောက်ပွဲနဲ့ ပတ်သက်ပြီး ဘာမှ မစိုးရိမ်ရပါဘူး။ အဲ့ဒီ ကျေးရွာမှာလည်း ၁ ရက်နေ့ ၂ ရက်နေ့ မှာ ပြန်လည် စည်းရုံးရေး ဆင်းဖို့ စီစဉ်ထားပါတယ်” ဟု မိုင်းပန်မြို့နယ် ပြည်သူ့ လွှတ်တော်ကိုယ်စားလှယ်လောင်း စိုင်းကျော်ခိုင် က ပြောသည်။

ဒဏ်ရာ ရသူ နှစ်ဦးကို အောက်တိုဘာ (၂၇) ရက်နေ့ကတည်းက တောင်ကြီး စဝ်စံထွန်းဆေးရုံသို့ ပို့ဆောင်ဆေးကုပေးနေကြောင်း သိရသည်။

၂၀၂၀ ပါတီစုံ ဒီမိုကရေစီ ရွေးကောက်ပွဲ ကျင်းပရန် ၉ ရက်သာ ကျန်ရှိပါသည်။


SHAN News (Burmese Version)

https://www.facebook.com/shannewsburmese

ချောင်းဆိုးတာကို အိမ်မှာပဲ သက်သာအောင် လုပ်ချင်တယ်ဆိုရင်


၃၀ အောက်တိုဘာ

မိုးရွာတာ စိပ်ပြီး ရာသီဥတုလေးလည်း အေးလာတဲ့အခါကျတော့ ခန္ဓာကိုယ်က အပရိက နာဖျားမှုလေး တွေ ဖြစ်လာတာပေါ့။ ဒီထဲမှာ ချောင်းဆိုးတာလည်း တစ်ခု အပါအဝင်ပါပဲ။ ချောင်းခြောက်ဆိုးတဲ့ သူလည်း ရှိသလို ချွဲထတဲ့သူလည်း ရှိတာပေါ့။ ဒီလိုအချိန်မှာ ဆေးရုံ ဆေးခန်း မသွားချင်သေးဘူးဆိုရင် အိမ်မှာတင် သက်သာအောင် ဘယ်လိုလုပ်နိုင်မလဲ။ နည်းလမ်းကောင်း လေးတွေ မျှဝေပေးလိုပါတယ်။

ချောင်းဆိုးခြင်းအတွက် အိမ်တွင်းနည်းလမ်းများ

•ပျားရည်

ပျားရည်စစ်စစ် တစ်ဇွန်း၊ နှစ်ဇွန်းလောက် သောက်ပေးတာက ပိုးတွေကို သေစေပြီး ချောင်းဆိုးတာကို သက်သာစေပါတယ်။ ဒါပေမယ့် တစ်နှစ်အောက် ကလေးတွေကိုတော့ ပျားရည်မတိုက်ပါနဲ့။ အခန့်မသင့်ရင် အဆိပ်သင့်တတ်ပါတယ်။

•အရည်ပူပူလေးတွေ သောက်ပေးပါ။

ရေနွေးကြမ်းတွေ၊ စွပ်ပြုတ်ပူပူလေးတွေ နှစ်သက်ရာ သောက်ပေးနိုင်ပါတယ်။ ဘာမှမရှိရင်တောင် ရေနွေးအဖြူကို ပူပူလေး သောက်ပေးပါ။ တစ်နေကုန် တစိမ့်စိမ့်သောက်နေတာက လည်ချောင်းထဲက ချွဲတွေပျော်စေသလို ချောင်းဆိုးရလွန်းလို့ လည်ချောင်းနာတာကိုလည်း သက်သာစေပါတယ်။

•ချင်း

ချင်းက လေပြွန်ကြွက်သားတွေကို ပြေလျော့စေတာကြောင့် လေပြွန်ကျဉ်းတာကို သက်သာစေပါတယ်။ ချင်းကို အစိမ်းအတိုင်းပဲ ဝါးပေးနိုင်သလို၊ ချင်းပြုတ်ရည်လေးကို ပျားရည်လေးထည့်ပြီး ပူပူလေး သောက်ပေးလို့လည်း ရပါတယ်။

•ရေ

ချောင်းဆိုးနေတဲ့အချိန်ဆို သာမန်ထက် ရေများများ သောက်ပေးသင့်ပါတယ်။ လည်ချောင်းထဲကို ရှင်းသွားစေတဲ့အပြင် ချောင်းဆိုးရလို့ လည်ပင်းနာတာလည်း သက်သာစေပါတယ်။ ဒါ့ပြင် တစ်ကိုယ် လုံးမှာ ရေဓာတ်ပြည့်ဝနေတဲ့အတွက် ချွဲသလိပ်တွေလည်း ကျဲသွားပါတယ်။ သူ့ဟာသူ ပျော်ကျသွားတဲ့ အတွက် အားသုံးပြီး ဟပ်ထုတ်စရာတောင် မလိုတော့ပါဘူး။

•ရေနွေးငွေ့ရှူပါ။

နှာခေါင်းပိတ်ရင် ရေနွေးငွေ့ရှူလို့ရသလို ချောင်းဆိုးရင်လည်း ရှူလို့ရပါတယ်။ ရေနွေးငွေ့က အသက်ရှူ လမ်းကြောင်းတစ်လျှောက်ကို စိုစွတ်စေလို့ ချောင်းချောက်ဆိုးတာ သက်သာစေပါတယ်။ ဒါ့ပြင် ချွဲတွေကိုလည်း ပျော်စေပါတယ်။ ကြိုက်နှစ်သက်ရင် ရေနွေးထဲကို ပရုတ်ဆီထည့်ပြီး ရှူလို့ရပါတယ်။

•နှာခေါင်းကို သန့်စင်ပါ။

တချို့က နှာစေးရာက ချွဲတွေ အသက်ရှူလမ်းကြောင်းထဲရောက်ပြီး ချောင်းဆက်ဆိုးတာပါ။ ဒါကြောင့် နှာရည်တွေကို ရှင်းထုတ်ပစ်မှ နောက်က ချောင်းဆိုးတာ သက်သာမှာပါ။ ဒါကြောင့် နှာခေါင်းကို ရေကြက်သီးနွေးနဲ့ ကျင်းပစ်ပြီး နှာရည်တွေ ထုတ်ပစ်ပါ။

•ပရုတ်ဆီ

ဒါအလွယ်ဆုံးနည်းပါပဲ။ ပရုတ်ဆီ လက်တစ်ကလော်လောက်ကို လက်ဖဝါးထဲထည့်ပြီး ပွတ်ရှူလိုက်ပါ။ ပရုတ်ဆီမှာပါတဲ့ menthol (မန်သော်)က အသက်ရှူလမ်းကြောင်းကို ပွင့်စေပြီး အသက်ရှူရကောင်း စေပါတယ်။ ဒါ့ပြင် ချွဲကိုလည်း ပျော်စေပါတယ်။ ကလေးတွေဆိုရင်လည်း ရင်ဘတ်မှာ နည်းနည်း လူးထားပေးရင် အနံ့ကို ရှူနေရတာကြောင့် အရင်ကထက် ချောင်းဆိုးတာ သက်သာလာမှာပါ။

•ဆားရည်နဲ့ အာလုပ်ကျင်းပါ။

ဆားရည်နွေးနွေးလေးနဲ့ အာလုပ်ကျင်းတာက လည်ချောင်းက အချွဲတွေကို ပျော်စေသလို ယားယံတာကိုလည်း သက်သာစေပါတယ်။ သာမန်ပလုပ်ကျင်းသလို မဟုတ်ဘဲ လည်ချောင်းထဲထ ိရောက်အောင် သေချာ အာလုပ်ကျင်းကြည့်ပါ။

•ဆေးဝါးတွေ မှီဝဲချင်တယ်ဆိုရင်

လူကြီးတွေအနေနဲ့ကတော့ ချောင်းဆိုးပျောက်ငုံဆေးတွေ၊ လည်ပင်းနာသက်သာစေတဲ့ ငုံဆေးတွေ ငုံပေးနိုင်ပါတယ်။ ချောင်းခြောက်ဆိုးရင် ချောင်းဆိုးပျောက်ဆေး၊ ချွဲထရင် ချွဲပျော်ဆေး စသဖြင့် ဆေးဆိုင်မှာ မေးဝယ်ပြီး ရက်တို သောက်နိုင်ပါတယ်။ ဓာတ်မတည့်လို့ ချောင်းဆိုးတာဆိုရင်တော့ ဓာတ်မတည့်ဖြေဆေး (ဥပမာ cetirizine လိုမျိုး) သောက်ပေးနိုင်ပါတယ်။ ကလေးဆိုရင်တော့ ကိုယ့်သဘောနဲ့ကိုယ် ဆေးမတိုက်စေချင်ပါဘူး။

ဘာတွေ ရှောင်ကြဉ်ရမလဲ။

•ချောင်းဆိုးနေတယ်ဆို တခြားလူတွေနဲ့ ရောမနေပါနဲ့။ သပ်သပ်နေပါ။ ဝေးဝေးနေပါ။

•မကြာခဏ လက်ဆေးပါ။

•ဓာတ်မတည့်တာကြောင့်ဆိုရင် ဓာတ်မတည့်စေတဲ့ အကြောင်းအရင်းကို ဖယ်ရှားပါ။

•ဆီကြော်တွေ၊ ကော်ဖီ၊ လက်ဖက်ရည်၊ ချိုလွန်းတာတွေ၊ အဆီများတာတွေ၊ အရက် စတာတွေကို ခဏရှောင်ထားပါ။

ဒီလိုအခြေအနေတွေဆိုရင်တော့ ဆေးခန်းသွားပြပါ။

•ချောင်းဆိုးတာ ၄-၅ရက်လောက် ကြာနေပြီဆိုရင်

•ချွဲမှာ အရောင်တွေပါလာပြီဆိုရင်

•အဖျားနဲ့ တွဲလာပြီဆိုရင်

•လူက နေလို့မကောင်းတော့ဘူးဆိုရင်

•ကလေးတွေမှာ အသက်ငယ်လွန်းရင်၊ အဖျားနဲ့ တွဲဖြစ်ရင်၊ ကလေးက အသက်ကို အားစိုက်ရှူ နေရပြီဆိုရင် ဆရာဝန်နဲ့ ပြသပြီး သေသေချာချာ ကုသမှု ခံယူသင့်ပါပြီ။

ဒီအိမ်တွင်းနည်းလမ်းတွေက ဆရာဝန်မပြနိုင်ခင် စပ်ကြားမှာ ကိုယ့်ကိုယ်ကို စောင့်ရှောက်နိုင်မယ့် နည်းလမ်းတွေပါ။ တတ်နိုင်ရင်တော့ ဆရာဝန်နဲ့ ပြသပြီး ကျန်းမာရေးစောင့်ရှာက်မှုခံယူတာက အကောင်းဆုံးပါပဲ။


ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn

ရေးသားသူ Dr. Htet Htet Zaw Win

https://www.facebook.com/MyanmarDigitalNews

ကြွပ်ကြွပ်အိတ်အတွင်း ဖုန်းနှစ်လုံးထည့် အားသွင်းထားရာမှ မီးလောင်မှု မန္တလေးတွင် ဖြစ်ပွား


မန္တလေး ၃၀  အောက်တိုဘာ

မန္တလေးမြို့တွင် ကြွပ်ကြွပ်အိတ်အတွင်း ဖုန်းနှစ်လုံး ထည့်အားသွင်းထားရာမှ အပူလွန်ကဲပြီး မီးလောင်မှု ဖြစ်ပွားခဲ့ကြောင်း သိရသည်။

အောက်တိုဘာ ၃၀ ရက် နံနက် ၂ နာရီခွဲအချိန်ခန့်က မန္တလေးမြို့ ချမ်းအေးသာစံမြို့နယ်၊ ၂၉လမ်း၊ ၇၉ လမ်းနှင့် လမ်း ၈၀ ကြားရှိ သရဖူစားသောက်ဆိုင် ဖြစ်ပွားခဲ့ခြင်းဖြစ်သည်။

မီးလောင်နေစဉ် အဆောက်အဦ အပေါ်ထပ်အခန်းတွင် ပိတ်မိနေသည့် အမျိုးသား၊ အမျိုးသမီး (၁၁) ဦး အသက်ရှင်လျက် ကယ်ထုတ်နိုင်ခဲ့ကြောင်း သိရသည်။


အဆိုပါ မီးလောင်မှုအား မန္တလေးတိုင်းဒေသကြီး မီးသတ်ဦးစီးဌာနမှ မီးသတ်တပ်ဖွဲ့ဝင် သန္ဓေ(၆၀)၊ အရန်(၁၃၀)၊ မီးငြိှမ်းသတ်ယာဉ်(၂၅)စီး၊ ရေသယ်ယာဉ်(၅)စီးဖြင့် ငြှိမ်းသတ်ခဲ့ရပြီး နံနက် ၃ နာရီကျော် အချိန်တွင် မီးငြိမ်းခဲ့ပြီး၊ မီးလောင်မှုကြောင့် စားသောက်ဆိုင်ပိုင်ရှင်ကို မန္တလေးမြို့ ချမ်းအေးသာစံ မြို့နယ် အမှတ်(၈)မြို့မရဲစခန်း၌  အမှုဖွင့်ထားကြောင်း သိရသည်။

မန္တလေးမြို့တွင် ပြီးခဲ့သည့်အောက်တိုဘာ ၁၃ ရက်တွင်လည်း အလှပြင်ဆိုင် မီးလောင်မှု ဖြစ်ပွားခဲ့ရာ အမျိုးသမီး ငါးဦး သေဆုံးမှုဖြစ်ပွားခဲ့သည်။


ဖြိုးအိ

Myanmar Digital News

https://www.facebook.com/MyanmarDigitalNews

ဖိလစ်ပိုင်မှာ ကြက်တိုက်ပွဲဝင်ဖမ်းတဲ့ ရဲအရာရှိ ဒဏ်ရာရသေဆုံး

ဖိလစ်ပိုင်နိုင်ငံ Manila မြို့က ကြက်တိုက်ပွဲ။ (သြဂုတ် ၁၀၊ ၂၀၁၄)

ဖိလစ်ပိုင်နိုင်ငံမှာ တရားမဝင် ကြက်တိုက် လောင်းကစားဝိုင်းတခုကို ဝင်ရောက်ဖမ်းဆီးခဲ့တဲ့ ရဲတပ်ဖွဲ့ဝင်တစ်ယောက် ကြက်အတက်မှာ တပ်ထားတဲ့ ဘလိတ်ဓားနဲ့ ထိခိုက်မိတာကြောင့် သေဆုံးသွားခဲ့ရပါတယ်။

Samar မြောက်ပိုင်းပြည်နယ်က San Jose ရဲဌာနအကြီးအကဲ Christian Bolok က တိုက်ကြက်ကို ဖမ်းဖို့ ကြိုးစားတုန်း ကြက်အတက်မှာ တပ်ထားတဲ့ ဘလိတ်ဓားအသွားက သူ့ရဲ့ ပေါင်ခြံရင်းက သွေးကြောမကြီးကို ပြတ်ရှမိတာကြောင့် သွေးထွက်လွန် သေဆုံးသွားခဲ့တာပါ။ ရဲတပ်ဖွဲ့က စီးနင်းမှုထဲ ကြက်ပွဲ စီစဉ်သူ ၃ ဦး ဖမ်းဆီးခံရပြီး တိုက်ကြက်တော်တော်များများကိုလည်း သိမ်းဆည်းမိခဲ့ပါတယ်။

ကြက်ပွဲတွေက ဖိလစ်ပိုင် ကျေးလက်ဒေသတွေမှာ လူကြိုက်များသလို ကြက်တိုက် လောင်းကစားပွဲတွေ လုပ်လေ့ရှိတဲ့နေရာလည်း ဖြစ်ပါတယ်။

ဒါပေမဲ့ ဖိလစ်ပိုင် တစ်နိုင်ငံလုံးမှာ ကိုရိုနာဗိုင်းရပ်စ် ထိန်းချုပ်ဖို့ ကြက်ပွဲတွေ၊ တခြား အားကစားနဲ့ ယဉ်ကျေးမှုဆိုင်ရာ ပွဲလမ်းသဘင်တွေကို ပိတ်ပင်ထားတာပါ။

ဖိလစ်ပိုင်နိုင်ငံမှာ ကိုရိုနာဗိုင်းရပ်စ်ကြောင့် သေဆုံးသူ ၇,၁၁၄ ဦး အပါအဝင် ကူးစက်သူ ၃၇၅,၀၀၀ ကျော်ရှိတယ်လို့ Johns Hopkins ကိုရိုနာ ဗိုင်းရပ်စ် သတင်းရင်းမြစ်ဌာနက ထုတ်ပြန်ထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/philippines-cockfight-death/5640100.html

မြန်မာ COVID စမ်းသပ် ကာကွယ်ရေး ပစ္စည်းတွေ ကုလကူညီ

မှတ်တမ်းဓါတ်ပုံ- မေလ ၁၀ ရက်နေ့တုန်းက WFP နှငင့် UNICEF မှလှူသော COVID စမ်းသပ် ကာကွယ်ရေး ပစ္စည်းများ

မြန်မာနိုင်ငံမှာ ကိုရိုနာဗိုင်းရပ်စ်ကူးစက်မှုနှုန်းမြင့်တက်လာနေချိန်မှာ ကုလသမဂ္ဂအဖွဲ့ က ဌာနေ ညှိနှိုင်းဆောင်ရွက်ရေးမှူး Ola Almgren ဦးဆောင်တဲ့အဖွဲ့က တဆင့် ကပ်ရောဂါအတွက် လိုအပ်တာတွေကို ထောက်ပံ့ကူညီပေးခဲ့တယ်လို့ ကုလသမဂ္ဂ ပြောခွင့်ရ Stephane Dujarric ကပြောပါတယ်။

မြန်မာနိုင်ငံအတွက် ရောဂါထိန်းချုပ်ရေး အကူအညီအဖြစ် ရောဂါစစ်ဆေးရေး ကရိယာ test kits ၃၀၀,၀၀၀နီးပါး နဲ့တစ်ကိုယ်ရေး ကာကွယ်ရေး ပစ္စည်း ၂၆၀,၀၀၀ ကျော်ကိုပေးအပ်ခဲ့ကြောင်းနဲ့ လတ်တလော ကုလသမဂ္ဂ ကလေးများရန်ပုံငွေအဖွဲ့ UNICEF နဲ့ ကမ္ဘာ့ စားနပ်ရိက္ခာ အစီအစဉ်အဖွဲ့ WFP က လူ ၁ သန်းလောက်အတွက် ငွေကြေးအကူအညီပေးနေကြောင်း ပြောပါတယ်။

ဒါ့အပြင် အခုလို ကပ်ရောဂါဖြစ်ပွါးရတဲ့ အပေါ်မှာ ပုဂ္ဂလိက ကဏ္ဍနဲ့ ကျေးလက်ဒေသတွေကို ကြီးကြီးမားမားရိုက်ခတ်မှုရှိတာကို တွေ့ရှိနေကြောင်းကိုကုလသမဂ္ဂ ဖွံ့ဖြိုးတိုးတက်ရေး အစီအစဉ် (UNDP)နဲ့ ကမ္ဘာ့ စားနပ်ရိက္ခာနဲ့ စိုက်ပျိုးရေး အဖွဲ့ (FAO)က ပြောတယ်လို့Dujarric က ပြောပါတယ်။

ကျောင်းတွေပိတ်ထားရတဲ့ အတွက်လည်း WFP က မိသားစု ၁၄၅,၀၀၀ လောက်အတွက် အစားအသောက်တွေကို ထောက်ပံ့ပေး နေ တယ်လို့ ပြောပါတယ်။ ကုလသမဂ္ဂ ပညာရေး၊ သိပ္ပံနဲ့ ယဉ်ကျေးမှုအဖွဲ့ UNESCO နဲ့ ကုလသမဂ္ဂ ကလေးများရံပုံငွေ အဖွဲ့ UNICEF တို့ပူးပေါင်းပြီး ဆရာ၊ ဆရာမ ၉၀,၀၀၀ ကျော်၊ ကျောင်းသားတွေနဲ့ မိသားစုတွေအတွက် လမ်းညွှန်ချက်တွေ ချမှတ်ပေးခဲ့ပြီး အိမ်ကနေ စာသင်နိုင်ဖို့ သင်ကြားရေး ပစ္စည်းတွေကိုလည်း ထောက်ပံ့ပေးခဲ့တယ်လို့ ပြောပါတယ်။

ဒါ့အပြင် နိုင်ငံတကာရွှေ့ပြောင်းအလုပ်သမားများ အကူအညီပေးရေး အဖွဲ့IOM ကလည်း ကပ်ရောဂါကာလ အလုပ်အကိုင်မရှိ တာကြောင့် မြန်မာနိုင်ငံကို ပြန်ရောက်လာတဲ့ ရွှေ့ပြောင်းလုပ်သား ၁၃၀,၀၀၀ နီးပါးကို သောက်ရေနဲ့ တခြားလိုအပ်တဲ့ ပစ္စည်းတွေ ထောက်ပံ့ ပေးအပ်ခဲ့တယ်လို့ ပြောခွင့်ရ Dujarric ကပြောပါတယ် ။

လောလောဆယ် မြန်မာနိုင်ငံက တကမ္ဘာလုံးအတိုင်းအတာနဲ့COVID-19 ကူးစက်မှုနှုန်း အများဆုံး နိုင်ငံပေါင်း (၉၀)စာရင်းထဲမှာ အဆင့် (၇၅)မှာရှိတယ်လို့ WHO ကမ္ဘာ့ကျန်းမာရေးအဖွဲ့က ပြုစုတဲ့ စာရင်းကို ကိုးကားပြီး မြန်မာနိုင်ငံ ကျန်းမာရေးနဲ့ အားကစား ဝန်ကြီး ဌာနက အောက်တိုဘာ(၂၈) ရက် ကသတင်းထုတ်ပြန်ပါတယ်။ ပြီးခဲ့တဲ့ သီတင်းပတ်တုန်းက အဆင့် ၇၆ မှာရှိနေခဲ့တာပါ။

ကျန်းမာရေးဝန်ကြီးဌာနရဲ့ သတင်းထုတ်ပြန်ချက်အရ မြန်မာနိုင်ငံမှာ အခုအချိန်ထိ COVID-19ကူးစက်သူပေါင်း ၅၀၀,၄၀၃ ယောက်နဲ့ နဲ့ သေဆုံးသူ ၁၁,၉၉ ယောက်ရှိနေပြီ ဖြစ်ပါတယ်။ မနေ့က လူနာသစ် ၁,၃၃၁ ဦးရှိပြီး သေဆုံးသူက ၂၇ ဦး ရှိပါတယ်။


 ဗွီအိုအေ (မြန်မာပိုင်း)

https://burmese.voanews.com/a/myanmar-covid-un-test-kit-/5640722.html

ဒေါ်အောင်ဆန်းစုကြည်နဲ့ သမ္မတဦးဝင်းမြင့် နေပြည်တော်မှာ ကြိုတင်မဲပေး


နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့  သမ္မတဦးဝင်းမြင့် တို့ဟာ ဒီနေ့ အောက်တိုဘာလ ၂၉ ရက် နေ့  မနက်ပိုင်းက နေပြည်တော်၊ ဇမ္ဗူသီရိမြို့နယ် ရွေးကောက်ပွဲကော်မရှင်အဖွဲ့ခွဲ မဲရုံမှာ ကြိုတင်မဲ လာရောက် ပေးခဲ့ပါတယ်။

သမ္မတ ဦးဝင်းမြင့်က သူ့မဲစာရင်းပါတဲ့ ရန်ကုန်တိုင်း တာမွေမြို့နယ်အတွက် ကြိုတင်မဲပေးခဲ့တာဖြစ်ပြီး၊ ဒေါ်အောင်ဆန်းစုကြည် ကတော့ သူ့ရဲ့အိမ်ထောင်စုစာရင်းရှိရာ ရန်ကုန်တိုင်း ဗဟန်းမြို့နယ်အတွက် ကြိုတင် မဲပေးခဲ့တာဖြစ်ပါတယ်။

သမ္မတဦးဝင်းမြင့်က ပြည်သူတွေကို ယုံကြည်အားကိုးကြောင်းနဲ့ ပြည်သူတွေကလည်း NLD ပါတီကို ယုံကြည်မှု အပြည့်ရှိမယ်လို့ ယုံကြည်ကြောင်း မဲပေးအပြီးမှာ မီဒီယာတွေကို ပြောပါတယ်။

"ပြည်သူတွေကတော့ ယုံကြည်အားကိုးပြီးသားပါ။ ပြည်သူတွေအပေါ်မှာ ကျနော်တို့က ယုံကြည်မူအပြည့် ရှိပါတယ်။ ပြည်သူတွေကလည်း ကျနော်တို့ကို ယုံကြည်မှု အပြည့်ရှိတယ်လို့ ယုံကြည်ထားပါတယ်။"

နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ဟာ လက်ရှိ နေပြည်တော် ဇမ္ဗူသီရိမြို့နယ်မှာ နေထိုင်နေပေမယ့်လည်း သူတို့မဲစာရင်းပါတဲ့ဒေသက ကိုယ်စားလှယ်လောင်းတွေအတွက် ကြိုတင်မဲပေးဖို့ ရွေးကောက်ပွဲကော်မရှင်ဆီကို ပုံစံ ၁၅ တင်သွင်းခဲ့တာဖြစ်ပါတယ်။

ကိုရိုနာကပ်ရောဂါကာလမှာ ရွေးကောက်ပွဲ မဲပေးခွင့်မဆုံးရှုံးစေဖို့ ကိုယ့်ရဲ့ မူလမဲဆန္ဒနယ်တွေကို သွားရောက်မဲ မပေးနိုင်တဲ့သူတွေအတွက်၊ အထူးကိစ္စရပ်အနေနဲ့ ပုံစံ ၁၅ လျှောက်ထားပြီး ကြိုတင်မဲပေးနိုင်ကြောင်း ကော်မရှင် က ထုတ်ပြန်ထားပါတယ်။ ဒါ့အပြင် အသက် ၆၀ နှစ်နဲ့အထက် မဲဆန္ဒရှင်တွေကိုလည်း အောက်တိုဘာ ၂၉ ရက် ကနေ နိုဝင်ဘာ ၅ ရက်နေ့ထိ ကြိုတင်မဲပေးဖို့ ခွင့်ပြုထားတဲ့အတွက် နိုင်ငံတော်သမ္မတနဲ့ အတိုင်ပင်ခံတို့ဟာ အဲဒီသတ်မှတ်ချက်တွေနဲ့ ကိုက်ညီနေတာဖြစ်ပါတယ်။

အလားတူပဲ အသက် ၇၀ ကျော်ပြီဖြစ်တဲ့ ပြည်ထောင်စုကောင်းကျိုးဆောင်ပါတီ ဥက္ကဋ္ဌ ဗိုလ်ချုပ်ကြီးဟောင်း  သူရဦးရွှေမန်း လည်း ဒီနေ့ နေပြည်တော်၊ ပုဗ္ဗသီရိမြို့နယ်က ညောင်ပင်ကြီးစုကျေးရွာ မူလတန်းလွန်ကျောင်းက မဲရုံအမှတ် (၂) မှာ ကြိုတင်ဆန္ဒမဲ လာရောက်ပေးခဲ့ပါတယ်။

သူရဦးရွှေမန်းက ရွေးကောက်ပွဲဆိုတာ အစိုးရကို ရွေးချယ်တဲ့ပွဲဖြစ်လို့ လူတိုင်းမဲပေးဖို့ တာဝန်ရှိတာကြောင့် နိုင်ငံသားတစ်ယောက်အနေနဲ့ မဲလာရောက်ပေးတာဖြစ်တယ်လို့ ပြောပါတယ် ။

"မဲပေးတယ်ဆိုတာက နိုင်ငံကို ကောင်းကျိုးပြုမယ့် အစိုးရတစ်ရပ် ပေါ်ပေါက်ရေးအတွက် ဒီထက်ပို ပြောမယ်ဆိုရင် နိုင်ငံကို ပိုကောင်းအောင်လုပ်ပေးနိုင်တဲ့အစိုးရကို ရွေးချယ်တဲ့ပွဲဖြစ်ပါတယ်။ ဒါကြောင့် ဒီလိုမဲပေးဖို့က လူတိုင်း လူတိုင်းမှာတာဝန်ရှိပါတယ်၊ ဒါကြောင့်မို့ နိုင်ငံသားတစ်ယောက်အနေနဲ့ တာဝန် ရှိတာနဲ့အညီ လာရောက်မဲပေးတာဖြစ်ပါတယ်။"

နေပြည်တော်မှာ နိုင်ငံခေါင်းဆောင်တွေ၊ လူသိများထင်ရှားတဲ့သူတွေ ဒီနေ့ ကြိုတင်မဲပေးခဲ့ကြသလို ကျေးရွာ ရပ်ကွက်တွေထဲမှာလည်း အသက် ၆၀ ကျော် မဲဆန္ဒရှင်တွေ ကြိုတင်မဲလာပေးကြတာကို တွေ့ရပါတယ်။

နေပြည်တော် ပျဉ်းမနားမြို့နယ် ကံဦးကျေးရွာအုပ်စု ရပ်ကွက်အုပ်ချုပ်ရေးမှူးရုံးမှာ ဖွင့်လှစ်ထားတဲ့ မဲရုံမှာ၊  ကြိုတင်ဆန္ဒမဲလာပေးတဲ့ အသက် ၆၀ ကျော်အရွယ် ဦးကျော်ထွန်းက မဲပေးရတာ အခက်အခဲမရှိဘူးလို့ ပြောပါတယ်။

"သုံးကြိမ်လောက်တော့ရှိပါပြီ ။ အခက်အခဲမရှိပါဘူး အေးဆေးပါပဲ။ ပီတိဖြစ်ပါတယ်။ ကျနော့်အကြိုက် ကတော့ NLD ပဲလေ၊ ဘာဖြစ်လို့လည်းဆိုတော့ ဒီပြင်အဖွဲ့အစည်းတွေရွေးနေရင် အသစ်လိုပြန်ဖြစ် သွားမယ်လေ၊ အဲဒါကြောင့် NLD ပဲရွေးတယ် ကျန်တာမရွေးဘူး။"

ဒီနေ့ ကြိုတင်မဲပေးတဲ့နေရာကို ကိုယ်စားလှယ်လောင်းတွေလည်း လာရောက်လေ့လာတာတွေရှိပါတယ်။

ပျဉ်းမနားမြို့နယ် ကြံ့ခိုင်ဖွံ့ဖြိုးရေးပါတီ အတွင်းရေးမှူးလည်းဖြစ် ပြည်သူ့လွှတ်တော် ကိုယ်စားလှယ်လောင်း ဦးမြင့်အောင်သန်းရဲ့ ရွေးကောက်ပွဲကိုယ်စားလှယ်ဖြစ်သူ ဦးဇော်ထူးအောင်က မဲရုံအတွင်း လိုအပ်ချက်တွေ တွေ့ရတယ်လို့ ပြောပါတယ်။

"လိုအပ်ချက်တွေကတော့ တော်တော်များတယ်ခင်ဗျ၊ ကျနော်ကတော့ အခုလက်ရှိ ပြည်သူ့လွှတ်တော် ကိုယ်စားလှယ်လောင်း ဦးမြင့်အောင်သန်းနဲ့ လိုက်ပြီးတော့ကြည့်တာ ပထမဦးဆုံးသော မဲရုံ၊ သို့သော်လည်းပဲ ကိုယ်နေထိုင်တဲ့ကျေးရွာက မဲရုံတွေမှာ ကြည့်လိုက်တဲ့အခါမှာ အောက်ခြေမှာရှိတဲ့ ကော်မရှင်တွေရယ် နောက်ပြီးတော့မှ မဲရုံကိုယ်စားလှယ်တွေရယ် မဲလာပေးတဲ့သူတွေရယ် အဲဒီလူတွေအားလုံးက တစ်ယောက်နဲ့ တစ်ယောက်က အသိတွေက မတူကြပါဘူးခင်ဗျ၊ မတူကြတဲ့အခါမှာ လုပ်တဲ့ကိုင်တဲ့အခါမှာ အခက်အခဲတွေ အများကြီးဖြစ်တာပေါ့၊ နောက်မဲရုံအတွင်းမှာလည်းပဲ Covid 19 နဲ့ ဆိုပေမယ့်လို့ မဲရုံအတွင်းမှာလည်းပဲ လူအင်အားတွေက ဘယ်လိုပဲဖြစ်ဖြစ် အတိုင်းအတာတစ်ခုအထိတော့ ရှိနေကြတာပါပဲဗျ။"

ဒီနေ့ မှာ အသက် ၆၀ နဲ့အထက် မဲန္ဒရှင်တွေအပြင် ရွေးကောက်ပွဲနေ့မှာ တာဝန်ထမ်းဆောင်ဖို့ရှိတဲ့ ဝန်ထမ်းတွေ လည်း ကြိုတင်မဲ လာပေးကြတာကို တွေ့ရပါတယ်။

ပြည်ထောင်စုနယ်မြေ နေပြည်တော် မြို့နယ် ရှစ်ခုမှာ  ပြည်သူ့လွှတ်တော်အတွက် မဲဆန္ဒနယ် ရှစ်နေရာနဲ့ အမျိုးသားလွှတ်တော် မဲဆန္ဒနယ် နှစ်နေရာ၊ စုစုပေါင်း မဲဆန္ဒနယ် ၁၀ နေရာရှိပြီး၊  ပါတီ ၁၁ ခု နဲ့ တစ်သီးပုဂ္ဂလ ကိုယ်စားလှယ် ရှစ်ဦးတို့က ဝင်ရောက်ယှဉ်ပြိုင်ကြမှာဖြစ်ပါတယ်။

နေပြည်တော် ပြည်ထောင်စုနယ်မြေမှာ ဆန္ဒမဲပေးပိုင်ခွင့်ရှိသူ အရေအတွက်က ကိုးသိန်းကျော်ရှိပြီး၊ အသက် ၆၀ နဲ့အထက် ကြိုတင်ဆန္ဒမဲ ပေးခွင့်ရှိသူက တစ်သိန်းကျော်ရှိတယ်လို့ ပြည်ထောင်စုနယ်မြေ နေပြည်တော် ရွေးကောက်ပွဲကော်မရှင်အဖွဲ့ခွဲ စာရင်းတွေအရ သိရပါတယ်။


RFA Burmese

https://www.rfa.org/burmese/news/president-winmyint-dassk-advance-voting-10292020033654.html

၂၀၂၀ ရွေးကောက်ပွဲနဲ့ တစ်သီးပုဂ္ဂလအမတ်လောင်းတွေရဲ့ အလားအလာ

ဦးလှဌေးမဲဆွယ်စည်းရုံးစဥ်

နိုဝင်ဘာလ ၈ရက်မှာ ကျင်းပမယ့် ၂၀၂၀ရွေးကောက်ပွဲ ကျင်းပဖို့ ရက်ပိုင်းသာ လိုတော့တဲ့အချိန် ကိုဗစ်ကပ်ရောဂါနဲ့ကြုံနေရလို့ ကိုယ်စားလှယ်လောင်းတွေ မဲဆန္ဒရှင်တွေနဲ့ တိုက်ရိုက်ထိတွေ့ မဲဆွယ်ရာမှာ အခက်အခဲတွေနဲ့ ကြုံနေရပါတယ်။

ဒါကြောင့် ပါတီကို လူတွေသိပြီးသားဖြစ်တဲ့ ပါတီကိုယ်စားပြု ကိုယ်စားလှယ်လောင်းတွေထက် မဲဆန္ဒရှင်တွေနဲ့ မဖြစ်မနေမိတ်ဆက်ဖို့လိုတဲ့ တစ်သီးပုဂ္ဂလတွေအတွက် အခက်အခဲတွေ ရှိနေပါတယ်။

ဒါ့အပြင် နိုင်ငံရေးပါတီကိုယ်စားပြုသူနဲ့ တစ်သီးပုဂ္ဂလတွေ ရွေးကောက်ပွဲဆိုင်ရာ အခွင့်အရေးတွေ တန်းတူရကြတယ်ဆိုပေမဲ့ မတူတဲ့ ထူးခြားချက်က အစိုးရ ရုပ်မြင်သံကြားကနေ နိုင်ငံရေးပါတီတွေက မဲဆွယ်ဟောပြောခွင့် ရကြပြီး တစ်သီးပုဂ္ဂလတွေကတော့ အဲ့ဒီအခွင့်ရေး မရကြပါဘူး။

ယေဘုယျအားဖြင့် တစ်သီးပုဂ္ဂလတွေထက် ပါတီကိုယ်စားပြုပြိုင်တဲ့သူတွေက လူအင်အား၊ ငွေအင်အားနဲ့ အခြားအထောက်အပံ့တွေလည်း ပိုရကြပါတယ်။

ဒါပေမဲ့ ပါတီကိုယ်စားပြုခွင့်မရသူတွေ၊ ပါတီကို ဆက်ကိုယ်စားမပြုချင်တော့သူတွေ ရှိနေတာအပြင် ကိုယ့်သဘောထားကို ကိုယ် လွတ်လွတ်လပ်လပ် ထုတ်ဖော်ယှဥ်ပြိုင်ချင်သူတွေကတော့ တစ်သီးပုဂ္ဂလအဖြစ် ဝင်ပြိုင်ကြပါတယ်။

ဒီရွေးကောက်ပွဲမှာ ထူးခြားချက်က ၂၀၁၅တုန်းက လက်ရှိ အာဏာရပါတီ NLD ကို ကိုယ်စားပြုအနိုင်ရခဲ့တဲ့ လက်ရှိလွှတ်တော်ကိုယ်စားလှယ်တချို့က တစ်သီး ပုဂ္ဂလအနေနဲ့ ဝင်ပြိုင်လာတာပါ။

အရင်က NLD အခု တစ်သီးပုဂ္ဂလ

မင်္ဂလာတောင်ညွန့်က ပြိုင်မယ့် ဦးလှဌေး

သူတို့ ဒီရွေးကောက်ပွဲမှာ တစ်သီးပုဂ္ဂလအနေနဲ့ ဝင်ပြိုင်ရတဲ့ အဓိကအကြောင်းက ၂၀၁၅ မှာ ကိုယ်စားပြုအနိုင်ရခဲ့တဲ့ မိခင်ပါတီ အမျိုးသားဒီမိုကရေစီအဖွဲ့ချုပ် NLD ကနေ ၂၀၂၀ မှာ ဆက်ကိုယ်စားပြုခွင့် မရတော့တာကြောင့် ဖြစ်ပါတယ်။

၂၀၁၅ရွေးကောက်ပွဲမှာ NLD ပါတီကိုယ်စားပြုအနိုင်ရခဲ့ပြီး အခုရွေးကောက်မှာ တစ်သီးပုဂ္ဂလအနေနဲ့ ဝင်ပြိုင်ဖို့ စာရင်းပေးထားတဲ့ လက်ရှိလွှတ်တော်ကိုယ်စားလှယ်တွေ ကတော့

    ရန်ကုန်တိုင်း ဒေသကြီး လွှတ်တော် မင်္ဂလာတောင်ညွန့် မဲဆန္ဒနယ်(၁) က ဦးလှဌေး၊

    ရန်ကုန်တိုင်းဒေသကြီးလွှတ်တော် ထန်းတပင်(၁)က ဦးအောင်ဘုန်းကျော်စံဦး၊

    ကယားပြည်နယ် အမျိုးသားလွှတ်တော် မဲဆန္ဒနယ်(၈)က ဒေါ်ရှားမူ ၊

    ရခိုင် ပြည်သူ့လွှတ်တော် ဂွမဲဆန္ဒနယ်က ဦးမြင့်‌ဝေ၊

    ရခိုင် ပြည်နယ်လွှတ်တော် မာန်အောင် မဲဆန္ဒနယ်(၂)က ဦးတင်နု(ခ)တင်နုအောင်၊

    ကရင် ပြည်နယ်လွှတ်တော် ကော့ကရိတ်မဲဆန္ဒနယ်(၁)က ဦးစိုးဌေးနဲ့

    စစ်ကိုင်းတိုင်း တိုင်းဒေသကြီးလွှတ်တော် ချောင်းဦးမဲ ဆန္ဒနယ်(၂) က ဦးကျော်ဆန်းတို့ ဖြစ်ပါတယ်။ 

သူတို့အခုလို တစ်သီးပုဂ္ဂလအနေနဲ့ ဝင်ပြိုင်ဖို့ဆုံးဖြတ်ခဲ့တာနဲ့ ပတ်သက်ပြီး တစ်သီးပုဂ္ဂလဖြစ်ဖြစ်၊ တခြားပါတီကဖြစ်ဖြစ် ဝင်ပြိုင်သူတွေကို ပါတီက ထုတ်ပယ်တဲ့အကြောင်း NLD က သြဂုတ်လ ၃၁ရက် ရက်စွဲနဲ့ ကြေညာချက်ထုတ်ပြန်ပြီး တုံ့ပြန်ခဲ့ပါတယ်။

အမျိုးသားဒီမိုကရေစီအဖွဲ့ချုပ်ပါတီဝင်တွေ ပါတီဗဟိုက ရွေးထားတဲ့ ကိုယ်စားလှယ်လောင်းတွေနဲ့ ယှဥ်အရွေးခံမယ်ဆိုရင် ပါတီဝင်အဖြစ်က ထုတ်ပယ်မယ်ဆိုတဲ့ မူရှိထားပြီးဖြစ်လို့ ပါတီဝင် ၄၀ နီးပါးကို ထုတ်ပယ်လိုက်တယ်လို့ ပါတီပြောခွင့်ရ ဒေါက်တာမျိုးညွန့်က ပြောထားပါတယ်။

NLD ပါတီကနေ ကိုယ်စားလှယ်အရွေးမခံရလို့ တစ်သီးပုဂ္ဂလနဲ့ အခြားပါတီကအရွေးခံမယ့် သူတွေရှိနေတာ ပါတီအတွက်မဟုတ်ဘဲ နိုင်ငံအတွက်၀မ်းနည်းကြောင်း ချင်းပြည်နယ်၊ စစ်ကိုင်းတိုင်းဒေသကြီး၊ တနင်္သာရီ တိုင်းဒေသကြီး အဖွဲ့ချုပ်အောင်နိုင်ရေးအဖွဲ့တွေနဲ့ စက်တင်ဘာ ၃၀ ရက်‌က ထုတ်လွှင့်ခဲ့တဲ့ အွန်လိုင်း စကား ဝိုင်းမှာလည်း အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်ကလည်း ပြောခဲ့ပါတယ်။

"နောက်အကြိမ်ကြိမ်အခါခါ ဒီမိုကရေစီစနစ်အောက်မှာ အခွင့်အရေးတွေ ရှိတယ်ဆိုတာကို သတိမပြုမိတာ ၀မ်းနည်းတယ်။

တကယ့်ကို ဒီမိုကရေစီသ‌ဘောတရားကို နှလုံးသွင်းမိပြီဆိုရင် ဒီတစ်ခါမနိုင်လည်း နောက်တစ်ခါ ငါနိုင်နိုင်တယ်။ အဓိကက ကိုယ်စားလှယ်လုပ်ဖို့ လုပ်နေတာ မဟုတ်ဘူ။ အဓိကက နိုင်ငံ့ ၀န်ထမ်းပေးဖို့။ ဒီဟာအတွက် လုပ်နေတာပဲ။ ကိုယ်စားလှယ်တွေမှ နိုင်ငံအတွက် လုပ်နိုင်တာမဟုတ်ဘူး" လို့ ဆိုပါတယ်။

တစ်သီးပုဂ္ဂလတွေအနေနဲ့ ပါတီထိန်းချုပ်မှုမရှိဘဲ ကိုယ်ပိုင်သဘောထားကို လွတ်လွတ်လပ်လပ် ထုတ်ပြောလို့ ရတယ်ဆိုပေမဲ့ ပါတီကိုယ်စားပြုပြိုင်တုန်းကထက် အခက်အခဲတွေ ပိုရှိနေပါတယ်။

ဒါ့အပြင် သူတို့အတွက် ကြီးမားတဲ့ နောက်စိန်ခေါ်မှုကလည်း လူထုအကြား ရေပန်းအစားဆုံး၊ လူထုထောက်ခံမှုအရှိဆုံး မိခင်ပါတီ‌‌‌ဟောင်း အာဏာရပါတီ NLD က ကိုယ်စားလှယ်တွေ နဲ့ ထိပ်တိုက် ယှဥ်ပြိုင်ရဖို့ ရှိနေတာပါ။

NLD က ကိုယ်စားလှယ်လောင်းတွေနဲ့ ပြန်ပြိုင်ကြမယ့် NLD က ကိုယ်စားလှယ်တွေကို ပါတီမူဝါဒအရ ပါတီက ထုတ်ပယ်ခဲ့

သူနဲ့ ပြိုင်ရမယ့် NLD လွှတ်တော်ကိုယ်စားလှယ်လောင်းက သူ့ထက်အသက်အများကြီးငယ်ပြီး အတွေ့အကြုံလည်းနည်းလို့ သူနိုင်မယ်လို့ ယုံကြည်တဲ့အကြောင်း မင်္ဂလာတောင်ညွန့် မဲဆန္ဒနယ်(၁) ကဝင်ပြိုင်မယ့် လက်ရှိလွှတ်တော်ကိုယ်စားလှယ် တစ်သီးပုဂ္ဂလ ကိုယ်စားလှယ်လောင်း ဦးလှဌေးက ပြောပါတယ်။

သူယှဥ်ပြိုင်ရမယ့် အမျိုးသားဒီမိုကရေစီအဖွဲ့ချုပ်လွှတ်တော်ကိုယ်စားလှယ်လောင်းက အသက် ၂၉ နှစ်အရွယ် မသက်ထားစုကြည်ပါ။

ဒါပေမဲ့ လာမယ့်ရွေးကောက်ပွဲမှာ တစ်သီးပုဂ္ဂလကိုယ်စားလှယ်လောင်းတွေအတွက် အလားအလာက နည်းပါးနေဆဲဖြစ်တယ်လို့ နိုင်ငံရေးလေ့လာသုံးသပ်သူ ဒေါက်တာရန်မျိုးသိမ်းက သုံးသပ်ထားပြီး ဦးလှ‌‌‌ဌေးအနေနဲ့လည်း အနိုင်ရဖို့ မလွယ်ဘူးလို့ ပြောပါတယ်။

"ကိုလှဌေးနိုင်ဖို့တော့ သိပ်မလွယ်ဘူးဗျ။ ကျွန်တော့်သုံးသပ်ချက်အရဆိုရင် ဒီချုပ်ကိုယ်စားလှယ်နဲ့ ကိုလှဌေး မဲကွဲရင် ပြည်ခိုင်ဖြိုးတောင် နိုင်သွားနိုင်တယ်။"

NLDက ဆက်မရွေးတော့ပေမဲ့ သူဘာကြောင့် တစ်သီးပုဂ္ဂလအနေနဲ့ ဆက်ဝင်ပြိုင်ရတယ်ဆိုတာနဲ့ ကိုဗစ်ကာလမှာ ကြုံနေရတဲ့ မဲဆွယ်စည်းရုံးရေး အခက်အခဲတွေကို ဦးလှဌေးက ဘီဘီစီကို အခုလို ထပ်ဖြည့် ပြောပါတယ်။

" ကျွန်တော့်နယ်မှာ ပထမဦးစားပေးအဆင့်( ၁)နဲ့ အရွေးခံခဲ့ရပေမယ့် ပါတီက ပြန်ချပေးတော့ ပါမလာဘူး။ အဲ့လိုမပါတော့တဲ့အခါ မဲဆန္ဒနယ်ထဲက ကျွန်တော့်ကို ထောက်ခံတဲ့သူတွေရဲ့ ရင်ထဲကအသံကို ကြားရတယ်။တချို့ဆို လူတစ်ထောင်ကျော် လက်မှတ်ထိုးပြီး ပြန်စဥ်းစားပေးဖို့ နေပြည်တော်ကို တင်တာတွေရှိတယ်။ မီဒီယာတွေနဲ့ ဆုံတဲ့အခါ ကျွန်တော့်ကို ဒီနေရာပြန်ရွေးပေးဖို့ တောင်းဆိုတာတွေ ရှိတယ်။ ဒီ့အပြင် တယ်လီဖုန်း ဆက်ပြီး ဘယ်လိုနည်းနဲ့ ဖြစ်ဖြစ် ဝင်ပေးဖို့ ပြောတဲ့လူတွေ ရှိတယ်။ အဲ့ဒါကြောင့် အဲ့ဒီအချက်တွေ အကြောင်းပြုပြီး ကျွန်တော့်ကို ထောက်ခံတဲ့သူတွေ လိုလားတဲ့သူတွေ ပြည်သူတွေ တော်တော် များရှိနေသေးတာ တွေ့ ရတဲ့အတွက် တစ်သီးပုဂ္ဂလ ဝင်ပြိုင်ရတာ ဖြစ်ပါတယ်။ "

ပြီးတော့ သူက မင်္ဂလာတောင်ညွန့်မှာ မွေးဖွားကြီးပြင်းခဲ့သူ ဖြစ်တာ၊ သူ့မဲဆန္ဒနယ်အတွက် တင်မက ရန်ကုန်တိုင်းဒေသကြီးလွှတ်တော်ကနေ အစိုးရကိုထိန်းကျောင်းခဲ့တဲ့ အတွေ့အကြုံတွေရှိနေတာက သူ့ရဲ့ အားသာချက်လို့ ဆိုပါတယ်။

တီဗီမှာ ပါတီတွေ မဲဆွယ်စည်းရုံးခွင့်ရသလို တစ်သီးပုဂ္ဂလတွေကိုလည်း အဲဒီလိုမျိုး အခွင့်ရေးမျိုးရရင် တန်းတူညီမျှမှုရှိသွားမယ်လို့ သူကပြောခဲ့ပြီး အခုကိုဗစ်ကာလမှာ ချမှတ်ထားတဲ့ စည်းကမ်းတွေ လိုက်နာပြီး ပြည်သူတွေ ရောဂါမကူးအောင် သတိထားရတဲ့ အတွက် အရင်ရွေးကောက်ပွဲ မဲဆွယ်တုန်းကထက် အများကြီး ကွာခြားမှုရှိတယ်လို့ သူက ပြောပါတယ်။

ဦးလှဌေးတို့လို လူတွေကို အမျိုးသားဒီမိုကရေစီအဖွဲ့ချုပ်က ၂၀၂၀ရွေးကောက်ပွဲ အတွက် ဆက်မရွေးတာနဲ့ပတ်သက်ပြီး

" ဒီချုပ်ပါတီရဲ့ကိုယ်စားလှယ်လောင်း ရွေးချယ်မှုက ၂၀၁၅တုန်းကထက် သိပ်ထူးထူးခြားခြားပြောင်းလဲတာကို သိပ်မတွေ့ရသလောက်ပါ။ ပါတီက မရွေးလို့ တစ်သီးပုဂ္ဂဝင်ပြိုင်မယ့်သူတွေထဲမှာ လုပ်ရည်ကိုင်ရည်ရှိတဲ့၊ လုပ်နိုင်ကိုင်နိုင်တဲ့သူတွေ ပါတယ်။ ဒီချုပ်ပါတီအနေနဲ့ လုပ်ရည်ကိုင်ရည်ရှိတဲ့ ကိုယ်စားလှယ် လောင်း တချို့ကို မရွေးချယ်နိုင်ခဲ့တာဟာ ပါတီအတွက်ရော နိုင်ငံအတွက်ပါ နစ်နာတယ်လို့ မြင်ပါတယ်" လို့ ဒေါက်တာရန်မျိုးသိမ်းက ထပ်ဖြည့်ပြောပါတယ်။

ဒုရဲမှူးဟောင်းမိုးရန်နိုင် ဖမ်းဆီး ခံရစဉ်

ရိုက်တာ သတင်းထောက်တွေရဲ့ အမှုနဲ့ ပတ်သက်လို့ ထောင်တစ်နှစ်ချခံရတဲ့ ဒုရဲမှူးဟောင်း မိုးရန်နိုင်ကလည်း သူနေထိုင်တဲ့ စစ်ကိုင်းတိုင်းဒေသကြီး လွှတ်တော် ခင်ဦးမြို့နယ် မဲဆန္ဒနယ်(၂) ကနေ တစ်သီးပုဂ္ဂလအနေနဲ့ ဝင်ပြိုင်ဖို့ ရှိပါတယ်။

"တစ်သီးပုဂ္ဂလဆိုတော့ ပြည်သူလူထုကိုပိုပြီး တိုက်ရိုက်ထိတွေ့နိုင်မယ်။ ပြည်သူလူထုရဲ့အသံကို လျင်လျင်မြန်မြန်ပိုသိနိုင်မယ်။ ပြီးတော့ ကိုယ်တင်ပြမယ့်ကိစ္စကိုလည်း အထက်ကို ဘယ်သူမှ ထပ်တင်ပြစရာမရှိဘူး။ ဥပဒေနဲ့ ညီတယ်ဆိုရင် ဒါကို လွှတ်တော်တွင်းကို တိုက်ရိုက် အမြန်ဆုံး တင်ပြနိုင်တယ်ဆိုတဲ့ ယူဆချက် ကျွန်တော့်မှာရှိပါတယ်။ လွတ်လွတ်လပ်လပ်သွားမယ်လို့ စိတ်ကူးပြီး ဒီလိုဆုံးဖြတ်တာပါ" လို့ သူက ဘီဘီစီကို ပြောပါတယ်။

တက်ကြွလှုပ်ရှားသူ အစုအဖွဲ့

အလုပ်သမားနဲ့ လယ်သမားတွေကို ကိုယ်စားပြုလှုပ်ရှားနေတဲ့ တက်ကြွလှုပ်ရှားသူတွေကလည်း တစ်သီး ပုဂ္ဂလအနေနဲ့ ဒီရွေးကောက်ပွဲမှာ ဝင်ပြိုင်ကြဖို့ရှိပါတယ်။

သူတို့ထဲက လူသိအများဆုံးကတော့ လှိုင်သာယာ အရှေ့ပိုင်း ပြည်သူ့လွှတ်တော် မဲဆန္ဒနယ်ကပြိုင်မယ့် အလုပ်သမားအရေးလှုပ်ရှားသူ ရှေ့နေဦးဌေးနဲ့ ရန်ကုန်တိုင်းဒေသကြီး တိုင်းလွှတ်တော် ကော့မှူးမဲဆန္ဒနယ်(၁)က ဝင်ပြိုင်မယ့် တောင်သူလယ် သမားသမဂ္ဂဥက္ကဋ္ဌ ဒေါ်စုစုနွေးတို့ဖြစ်ပါတယ်။

သူတို့ တက်ကြွလှုပ်ရှားသူ အစုအဖွဲ့ ရွေးကောက်ပွဲဝင်မယ့်အကြောင်း ဇူလိုင်၆ရက်နေ့က Sky Hotel မှာ မိတ်ဆက်သတင်းစာရှင်းလင်းပွဲ လုပ်ခဲ့ပါတယ်။

အဲဒီမှာ ဦးဌေးနဲ့ မစုစုနွေးအပါအဝင် တစ်သီးပုဂ္ဂလဝင်ပြိုင်ကြမယ့် အလုပ်သမားနဲ့ လယ်သမားအရေး တက်ကြွလှုပ်ရှားသူ ၁၁ ယောက်ကို တစုတစည်းတည်း တွေ့ရပါတယ်။

တကယ်လို့ သူတို့ လွှတ်တော်ထဲရောက်သွားရင် သူတို့ ကိုယ်စားပြုနေတဲ့ အလုပ်သမားအရေး၊ လယ်သမားအရေးတွေ ပိုလုပ်နိုင်မယ်လို့ ယုံကြည်ပြီး ရွေးကောက်ပွဲဝင်တာလို့ ရှေ့နေ ဦးဌေး နဲ့ မစုစုနွေး အပါအဝင် တခြားတက်ကြွလှုပ်ရှားသူတွေ အားလုံးက ပြောကြပါတယ်။

ပြည်သူ့လွှတ်တော် ကော့မှူးမဲဆန္ဒနယ်ကနေ ဒေါ်အောင်ဆန်းစုကြည် ဆက်မပြိုင်တော့ဘူးကြားလို့ အဲဒီနေရာက ဝင်ပြိုင်ဖို့ အရင်ကစီစဉ်ခဲ့ပေမဲ့ ဒေါ်အောင်ဆန်းစုကြည်က အဲ့ဒီနေရာကဆက် ပြိုင်မှာဖြစ်လို့ အမေနဲ့သမီး ပြိုင်တာမျိုး မဖြစ်ချင်တဲ့အတွက် လွှတ်တော်ပြောင်းပြီး ရန်ကုန်တိုင်းဒေသကြီးလွှတ်တော် ကော့မှူးမဲဆန္ဒနယ်(၁)ကနေ ပြိုင်ဖြစ်ခဲ့တာလို့ မစုစုနွေးက ပြောပါတယ်။

မစုစုနွေးဟာ NLD ပါတီဝင်အဖြစ် နှစ်ပေါင်းများစွာ တက်ကြွလှုပ်ရှားခဲ့သူ ပါတီဝင်ဟောင်း တယောက်ဖြစ်ပြီး သူတစ်သီးပုဂ္ဂလဝင်ပြိုင်တဲ့အတွက် ပါတီက သူ့ကို ထုတ်လိုက်ပြီလို့ ပြောပါတယ်။

"၂၀၁၅ မှာ NLD အစိုးရ ဖြစ်လာပြီးနောက်ပိုင်း ၂၀၁၈ အထိတော့ လယ်သမားတွေအတွက် မြေယာအငြင်းပွားမှု ဆောင်ရွက်ရတာ အဆင်ပြေခဲ့တယ်။ မြေယာအငြင်းပွားမှုတွေ တင်ပြလို့ရတယ်။ ဒါပေမဲ့ လွှတ်တော် ကိုယ်စားလှယ်တွေက ပူးပေါင်းဆောင်ရွက်တာတွေ မလုပ်လာဘူး။ မြေယာဥပဒေနဲ့ ပတ်သက်တဲ့ ပြင်ဆင်ချက်တွေမှာ လယ်သမားတွေကို တိုက်ရိုက်အကျိုးပြုတဲ့ ဥပဒေတွေ ထွက်လာတာ မရှိဘူး။

နောက်တော့ လွှတ်တော်ထဲမှာ လယ်သမားအသံတွေ ပျောက်နေတယ်။ အလုပ်သမား အသံတွေလည်း ပျောက်နေတယ်။ အဲတော့ ကျွန်မတို့ လယ်သမား၊ အလုပ်သမားသမဂ္ဂတွေက ဒီအလုပ်သမား လယ်သမားတွေရဲ့ အခက်အခဲ ပြဿနာကို လယ်သမား၊ အလုပ်သမားအသံကို ကိုယ်စားပြုဖို့ တစ်သီးပုဂ္ဂအနေနဲ့ ဝင်ပြိုင်ဖို့ ရွေးချယ်ခဲ့တာပါ" လို့ ဘီဘီစီကို ပြော ပါတယ်။

ဒါ့အပြင် ကိုဗစ်ကာလမှာ မဲဆွယ်စည်းရုံးရတဲ့ အခက်အခဲကို မစုစုနွေးက အခုလို ထပ်ဖြည့်ပြောပါတယ်။

"ကျွန်မတို့ တစ်သီးပုဂ္ဂလအနေနဲ့က နာမည်စာရင်းထွက်လာပြီးမှ ရွေးကောက်ပွဲအတွက် ဗီနိုင်းရိုက်ရတာတို့၊ လက်ကမ်းစာစောင်တို့ ဘာတို့ အကုန်လုံးပြင်ဆင်ဆောင်ရွက်ရတာ။ တစ်သီးပုဂ္ဂလတွေ ဝင်ပြိုင်ရတာအခက်အခဲတွေ အများကြီးရှိတယ်။ စိန်ခေါ်မှုတွေအများကြီးရှိတယ်။ ဘာတွေလဲဆိုတော့ ကိုဗစ်ကာလမှာ ကျွန်မတို့ လုံးဝ စည်းရုံးလို့မရဘူး။ Stay at home ဆိုတော့ အိမ်ထဲမှာပဲနေရတယ်။ဘာမှ လုပ်ခွင့်မရှိဘူး။ ဆိုင်းဘုတ်တွေ လိုက်ထောင်တာလည်း ကော်မရှင်ဥပဒေ အယောက်၅၀ ထက် မကျော်ရဘူး။

ဒါပေမဲ့ ဥပဒေအတိုင်းပဲ ဆောင်ရွက်တယ်။ အဲ့ဒါတောင်မှ ကျွန်မတို့ကို ကော်မရှင်ကနေ ကျေးရွာအုပ်စုတစ်စုကို ဆိုင်းဘုတ်တစ်ခုပဲ‌ထောင်ဖို့ တားမြစ်တာတွေ ကြုံရတယ်။ တစ်သီးပုဂ္ဂလ ဝင်ပြိုင်တာဖြစ်တဲ့အတွက် ကျွန်မတို့မှာ ငွေအင်အားရှိရင် နေရာတိုင်းမှာ ထောင်ခွင့်ရှိတယ်လို့ ပြန်ပြောရတယ်။ အဲလိုမျိုး အကြိတ်အနယ် ပြန်ပြောတော့မှ ခွင့်ပြုတာမျိုးရှိတယ်။ "

မဲဆွယ်ဆိုင်းဘုတ်ထောင်ဖို့လုပ်တော့လည်း သူ့မိခင်ပါတီ‌ဟောင်း ထောက်ခံသူတွေရဲ့ နှောင့်ယှက်တာ ခံခဲ့တာကို သူက ထည့်ပြောပါတယ်။

"နောက်တစ်ခုက စည်းရုံးရေးဆင်းနေတဲ့အချိန် ကျွန်မတို့ဆိုင်းဘုတ်တွေ သွားထောင်တော့ အဲ့ဒီနေရာကို ရောက်လာတဲ့ ဒေသခံတွေကို ဘာကြောင့်ဆိုင်းဘုတ်ထောင်ရလဲ။ ဘာကြောင့် တစ်သီးပုဂ္ဂလဝင်ရလဲဆိုတာ ရှင်းပြနေတုန်း ကျွန်မပြောတဲ့အသံတွေကို မကြားရအောင် NLD ပါတီက ကျွန်မတို့ မိခင်ပါတီ ကလူတွေက ဆောင်းဘောက်တွေဖွင့်ပြီး ဟန့်တားပိတ်ပင်တာတွေ ကြုံရတယ်။ အဲ့ဒါနဲ့ပတ်သက်လို့လည်း ကော်မရှင်ကို စာတင်ထားတယ်။ စာတင်ထားတာနဲ့ ပတ်သက်ပြီး အခုချိန်ထိ ဘာအကြောင်းမှမပြန်သေးဘူး။ နောက်ဆုံးကျတော့ ဘာအထိ ဖြစ်လာလဲဆိုရင် ၂၄ရက်၊ ၉လ၊ ၂၀၂၀က ကျွန်မတို့ တောင်သူ လယ်သမားသမဂ္ဂ အလံတွေ ခိုးခံရတဲ့အဆင့်ထိ ဖြစ်လာတယ်။ ဆိုင်းဘုတ်ထောင်တဲ့ အိမ်တွေက သူတို့လက်မှတ်ထိုးတောင်းဆိုလို့ တကယ်တမ်း ဆိုင်းဘုတ်သွားထောင်တော့လည်း တာဝန်မယူဘူးလို့ ပြောတာတွေ ကြုံရတယ်။ "

ပါတီတွေက မဲဆွယ်စည်းရုံးရေးအတွက် တီဗီလွှင့်ခွင့်ရပြီး တစ်သီးပုဂ္ဂလတွေက လွှင့်ခွင့် မရတာနဲ့ ပတ်သက်လို့လည်း

"တစ်သီးပုဂ္ဂလတွေကိုလည်း ရွေးကောက်ပွဲဥပ‌ဒေနဲ့ အညီ ပါတီတွေနဲ့ တန်းတူဝင်ရောက် ယှဥ်ပြိုင် ခွင့်ပေးထားတဲ့အတွက် အဲ့ဒီအခွင့်ရေးကို ကျွန်မတို့ ခံစားချင်တယ်။ ပါတီတွေမှာ ဒီလိုခံစားခွင့်ရှိရင် တစ်သီးပုဂ္ဂလတွေမှာလည်း မြန်မာ့အသံတို့၊ အသံလွှင့်ဌာနတွေကနေ လွှင့်ပြီး တန်းတူ အခွင့်အရေးရချင်ပါတယ် "လို့ မစုစုနွေးက ပြောပါတယ်။

အမျိုးသမီးတစ်သီးပုဂ္ဂလကိုယ်စားလှယ်လောင်းတွေ

ကချင်ပြည်နယ်လွှတ်တော် အင်ဂျန်းယန်မဲဆန္ဒနယ်(၂)ကနေ မရန်ဂျာဆိုင်းခေါန် ထပ်ပြိုင်မယ်

၂၀၂၀ ရွေးကောက်ပွဲဝင်မယ့် တစ်သီးပုဂ္ဂလ ကိုယ်စားလှယ်လောင်း ၂၆၆ ဦး မှာ အမျိုးသမီးကိုယ်စားလှယ်လောင်း ပါဝင်မှုက ၂၄ ဦး ရှိနေတာကြောင့် ရာခိုင်နှုန်းအားဖြင့် ၉.၀၂ ရာခိုင်နှုန်း ရှိတယ်လို့ ပြောနိုင်ပါတယ်။

အဲ့ဒီသူတွေထဲ ၂၀၁၅ရွေးကောက်ပွဲမှာ ရခိုင်အမျိုးသားပါတီ ANP ကနေ အနိုင်ရထားတဲ့ ရခိုင်ပြည်နယ် အမျိုးသားလွှတ်တော်ကိုယ်စားလှယ် ဒေါ်ထုမေ၊ ကချင်တော်လှန်ရေး ခေါင်းဆောင်ဟောင်း မရန်ဘရန်ဆိုင်းရဲ့ သမီးဖြစ်သူ ၂၀၁၅ တုန်းက ကချင်ပြည်နယ်ဒီမိုကရေစီ ပါတီKSDP ကိုယ်စားပြုပြီး ကချင်ပြည်နယ် အင်ဂျန်းယန်မဲဆန္ဒနယ်က အနိုင်ရထားတဲ့ မရန်ဂျာဆိုင်းခေါန် တို့လည်းပါပါတယ်။

ကချင်ပြည်နယ်လွှတ်တော် အင်ဂျန်းယန်မဲဆန္ဒနယ်(၂)ကနေ မရန်ဂျာဆိုင်းခေါန် ထပ်ပြိုင်မှာ ဖြစ်ပေမယ့် ဒီရွေးကောက် ပွဲမှာတော့ ဘယ်ပါတီကိုမှ ကိုယ်စားမပြုဘဲ တစ်သီးပုဂ္ဂလအဖြစ် ဝင်ရောက် ရွေးချယ်ခံမှာ ဖြစ်ပါတယ်။

ဒေါ်ထုမေကတော့ ရခိုင်အမျိုးသားပါတီ ANP က ထွက်ခွင့်တောင်းထားပေမဲ့ ထွက်ခွင့်မရတဲ့ အတွက် ရွေးကောက်ပွဲမှာ ရန်ကုန်တိုင်း ရခိုင်တိုင်းရင်းသားရေးရာဝန်ကြီး နေရာအတွက် တစ်သီးပုဂ္ဂလအနေနဲ့ ဝင်ပြိုင်မှာပါ။

ဒေါက်တာညိုညိုသင်း

အမျိုးသမီး တစ်သီးပုဂ္ဂလ ကိုယ်စားလှယ်လောင်းတွေထဲ လူသိများတဲ့ နောက် တယောက်ကတော့ ၂၀၁၅မှာ ဗဟန်းမြို့နယ်ကနေ တစ်သီးပုဂ္ဂလအနေနဲ့ ဝင်ပြိုင်ခဲ့ပြီး အခုရွေးကောက်ပွဲမှာ တနင်္သာရီတိုင်း အမျိုးသားလွှတ်တော် မဲဆန္ဒနယ်(၉) က ဝင်ပြိုင်မယ့် ဒေါက်တာညိုညိုသင်းပါ။

ဒေါက်တာ ညိုညိုသင်းဟာ ၂၀၁၀ ရွေးကောက်ပွဲတုန်းက ဒီမိုကရက်တစ်ပါတီ( မြန်မာ)ရဲ့ ကိုယ်စားလှယ်အဖြစ် ဗဟန်းမြို့နယ်ကကနေ ဝင်ရောက်ယှဉ်ပြိုင်အနိုင်ရခဲ့ပြီး တိုင်းဒေသကြီးကိုယ်စားလှယ် အဖြစ် အရွေးခံခဲ့ရဖူးသူ ဖြစ်ပါတယ်။

၂၀၁၅ ရွေးကောက်ပွဲမှာ တစ်သီးပုဂ္ဂလ အဖြစ် ဝင်ပြိုင်ခဲ့ပြီး အခု ၂၀၂၀ရွေးကောက်ပွဲမှာပါ တစ်သီးပုဂ္ဂလ အဖြစ် ဆက်ပြိုင်ဖို့ ကြိုးစားနေတာပါ။

"နိုင်ငံရေးပါတီကြီးတွေကတော့ တစ်သီးပုဂ္ဂလတွေထက် သက်ဆိုင်ရာရုံးခွဲတွေ ပိုဖွင့်နိုင်တဲ့အခြေနေ ရှိတယ်။ အဲ့ဒီတော့ စည်းရုံးရေးဆင်းတဲ့အခါ ပြည်သူလူထုနဲ့တွေ့ဆုံဖို့ စီစဥ်တဲ့အခါမှာ တစ်သီးပုဂ္ဂလတွေအနေနဲ့ အခက်အခဲရှိတွေ ရှိတယ်။ အုပ်ချုပ်ရေးပိုင်းတွေ၊ ကော်မရှင်ပိုင်းတွေ ဆက်သွယ်တဲ့အခါမှာလည်း ကိုယ့်လူခံ ရှိမထားဘူးဆိုရင် အခက်အခဲတွေရှိနိုင်ပါတယ်"လို့ ပြောထားပါတယ်။

တနင်္သာရီ တိုင်းက ဝင်ပြိုင်ရတာနဲ့ ပတ်သက်လို့လည်း "တနင်္သာရီတိုင်းက စီးပွားရေး အရင်းအမြစ် ကြွယ်ဝပေမယ့် အခု ကျွန်မဝင်ရောက်ယှဥ်ပြိုင်မယ့် တနင်္သာရီမြို့နယ်လေးဆိုရင် ဒုတိယ အဆင်းရဲဆုံးမြို့နယ်လေး အဖြစ်ရှိနေတယ်။

အဲ့ဒီက ပြည်သူလူထုရဲ့ဘဝက မမြင့်မားဘူး။ လူနေမှုအဆင့်တန်းကလည်းနိမ့်တယ်။ ရွာပေါင်း ၂၀၀ ကျော် ရှိပေမယ့် တိုက်နယ်ဆေးရုံ ၃ ရုံ ပဲရှိပြီး ချို့တဲ့ကြတယ်။ ဒါကြောင့် တနင်္သာရီတိုင်းဒေသကြီးမှာ စီးပွားရေး အရင်းမြစ် တွေ စနစ်တကျ ဖွံ့ ဖြိုးဖို့ရယ်။ လိုအပ်နေတဲ့ နိုင်ငံရေး အရင်းအမြစ်တွေကို စနစ်တကျ ပျိုးထောင်ဖို့ ရည်ရွယ်ပြီးတော့ ဒီရွေးကောက်ပွဲမှာ တနင်္သာရီတိုင်းကို ရွေးချယ်လိုက်ရတာ ဖြစ်ပါတယ်" လို့ ပြောပါတယ်။

အမျိုးသမီးတွေ တစ်သီးပုဂ္ဂလ ဝင်ပြိုင်ခဲ့တဲ့ လမ်းကြောင်းကို ပြန်ကြည့်လိုက်ရင် ၂၀၁၀ရွေးကောက်ပွဲနဲ့ ၂၀၁၅ ရွေးကောက်ပွဲမှာ အမျိုးသမီး တစ်သီးပုဂ္ဂလတွေ အနိုင်ရထားတာ မရှိသေးတဲ့အတွက် ဒီရွေးကောက်ပွဲ မှာတော့ ပထမဆုံး အနိုင်ရမလားဆိုတာ စောင့်ကြည့်ရမှာပါ။

လွှတ်တော်ထဲက တစ်သီးပုဂ္ဂလ

၁၉၉၀ ရွေးကောက်ပွဲကစပြီး တစ်သီးပုဂ္ဂလကိုယ်စားလှယ်တွေ ဝင်ရောက်ယှဥ်ပြိုင်အနိုင်ရခဲ့တဲ့ ရာဇဝင် ကို ပြန်ကြည့်လိုက်ရင် ၁၉၉၀ မှာ ၈၇ ဦးဝင်ပြိုင်ပြီး ၆ဦး အနိုင်ရခဲ့တယ်။ ၂၀၁၀ ရွေး ကောက်ပွဲမှာ တစ်သီးပုဂ္ဂလကိုယ်စားလှယ်လောင်း ၁၁၀ ဝင်ပြီး ၆ ဦး အနိုင်ရခဲ့တာ ရှိပါတယ်။

နောက်ဆုံးကျင်းပခဲ့တဲ့ ၂၀၁၅ ရွေးကောက်ပွဲမှာတော့ တစ်သီးပုဂ္ဂလ ကိုယ်စားလှယ်လောင်း ၃၁၀ ဝင်ပြိုင်ခဲ့တာမှာ ၅ ဦးအနိုင်ရခဲ့ပါတယ်။ ၂၀၁၈ ကြားဖြတ်ရွေးကောက်ပွဲမှာလည်း တစ်သီးပုဂ္ဂလ အမတ်တစ်ယောက် အနိုင်ရထားတာရှိတဲ့အတွက် လက်ရှိမြန်မာ့လွှတ်တော်ထဲမှာ တစ်သီးပုဂ္ဂလ အမတ် ၆ ဦး ရှိနေပါတယ်။

တစ်သီးပုဂ္ဂလနဲ့ အငြင်းပွားမှု

၂၀၁၅ ရွေးကောက်ပွဲရလဒ်ရဲ့ ထူးခြားချက်က အနိုင်ရခဲ့တဲ့ တစ်သီးပုဂ္ဂလ ကိုယ်စားလှယ်တစ်ဦး ကန့်ကွက်ခံရလို့ သူ့ကို ကန့်ကွက်ခဲ့တဲ့ တစ်သီးပုဂ္ဂလကို အနိုင်ပေးခဲ့တာ ရှိပါတယ်။

၂၀၁၅ ရွေးကောက်ပွဲမှာ ကချင်ပြည်နယ် အမျိုးသားလွှတ်တော် မဲဆန္ဒနယ် အမှတ်(၅)က အနိုင်ရခဲ့တဲ့ တစ်သီးပုဂ္ဂလ အမတ် ဦးဇခုန်တိန့်ယန်းကို တရားမဲ့ပြုကျင့်မှုတွေနဲ့ ရွေးကောက်ပွဲရလဒ် ပျက်ပြယ်အောင် လုပ်ဆောင်ခဲ့တယ်လို့ တစ်သီးပုဂ္ဂလအမတ်လောင်း ဦးယောနာနဲ့ အမျိုးသား ဒီမိုကရေစီအဖွဲ့ချုပ်က ဦးစံဝေခေါင်လွမ်းတို့က ရွေးကောက်ပွဲ ကော်မရှင်မှာ တိုင်ကြားကန့်ကွက်ခဲ့တာပါ။

ဦးယောနာက ဦးဇခုန်တိန့်ယန်းနဲ့ မဲဆန္ဒနယ်တနယ်တည်း ဝင်ပြိုင်ခဲ့ပြီး ဒုတိယ မဲအများဆုံး ရထားတဲ့သူဖြစ်ပါတယ်။

ချီဖွေမှာ မဲလာဆွယ်တဲ့ NLD အမတ်လောင်းတွေကို တရားမဲ့ ရိုက်နှက်တယ်၊ မဲဆွယ်တာတွေကို ပိတ်ပင်တယ်ဆိုပြီး ကန့်ကွက်တိုင်ကြားခံရခဲ့တာပါ။

ဒီအမှုကို ရွေးကောက်ပွဲကော်မရှင်က ကြားနာစစ်ဆေးခဲ့ပြီး ကန့်ကွက်တဲ့ ဒုတိယမဲအများဆုံးရထားတဲ့ တစ်သီးပုဂ္ဂလကိုယ်စားလှယ် ဦးယောနာကို အနိုင်ပေးခဲ့ပါတယ်။

၂၀၁၀နဲ့ ၂၀၁၅ရွေးကောက်ပွဲတွေမှာ တစ်သီးပုဂ္ဂလအဖြစ် ဝင်ပြိုင်အနိုင်ရခဲ့တဲ့ ပြည့်သူ့စစ်ခေါင်းဆောင်ဟောင်း ဇခုန်တိန့်ယန်းဟာ လက်ရှိမှာတော့ ၂၀၁၉ခုနှစ်က ပါတီတည်ထောင်ခွင့်ရထားတဲ့ ဒီမိုကရေစီပါတီသစ်(ကချင်) (N.D.P)မှာနာယကအဖြစ် တာဝန်ယူနေပါတယ်။

အနာဂတ်အလားအလာ


တစ်သီးပုဂ္ဂလ ကိုယ်စားလှယ်လောင်း ပါဝင်မှု

၂၀၂၀ မှာ ရန်ကုန်က တစ်သီးပုဂ္ဂလ အများဆုံးဝင်မယ့် တိုင်းဖြစ်ပြီး တစ်သီးပုဂ္ဂလ ၃၂ ဦး ဝင်ပြိုင်မှာပါ။ ရခိုင်ပြည်နယ်ကတော့ ဒုတိယအများဆုံးနဲ့ ၂၇ ဦး ပြိုင်မှာ ဖြစ်ပါတယ်။ အနည်းဆုံးဝင်ပြိုင်မယ့်နေရာကတော့ ၅ ဦးပဲ ဝင်ပြိုင်မယ့် တနင်္သာရီတိုင်း ဖြစ်ပါတယ်။

တစ်သီးပုဂ္ဂလတွေ ဝင်ပြိုင်ခဲ့တဲ့ ရာဇဝင်အရ ၂၀၁၀ ရွေးကောက်ပွဲမှာ ၁၁၀ ဦး ဝင်ပြိုင်တာကနေ ၂၀၁၅ မှာ ၃၁၀ အထိတိုးလာလို့ ပြိုင်တဲ့သူ ပိုများလာတယ်လို့ ဆိုနိုင်ပါတယ်။

ဒါပေမဲ့၂၀၂၀မှာ၂၈ဝ ပဲဝင်ပြိုင်ဖို့ စာရင်းပေးထားရာကနေ ရွေးကောက်ပွဲ မကျင်းပနိုင်တဲ့ နယ်မြေတွေ ရှိလာတဲ့အတွက် ၂၆၆ ပဲ ကျန်တော့လို့ ပြန်လျော့သွားပါတယ်။

ဒါပေမယ့် ဒီရွေးကောက်ပွဲမှာ တစ်သီးပုဂ္ဂလကိုယ်စားလှယ်တွေ အရင်ရွေးကောက်ပွဲတွေကထက် နေရာများများပို အနိုင်ရလာ မလား၊ မရဘူးလား ဆိုတာကို ဒေါက်တာရန်မျိုးသိမ်းက ခန့်မှန်းထားပါတယ်။

"လာမယ့် ရွေးကောက်ပွဲမှာလည်း တစ်သီးပုဂ္ဂလကိုယ်စားလှယ်လောင်းတွေရဲ့ အနိုင်ရရှိနိုင်ခြေက ဂဏန်းနှစ်လုံး (two digit) ထိ ဖြစ်မလာနိုင်သေးဘူးလို့ ထင်တယ်။

မဲဆန္ဒနယ်တစ်ခုမှာ ဒေသခံဖြစ်တဲ့အပြင် မဲဆန္ဒရှင်ပြည်သူလူထုရဲ့ယုံကြည်မှုနဲ့ ထောက်ခံမှု သိသိသာသာရတဲ့၊ နိုင်ငံရေးအရ၊ လူမှုရေးအရ သြဇာကြီးတဲ့သူမျိုးတွေပဲ တစ်သီးပုဂ္ဂလအဖြစ် ဝင်ပြိုင်ရင် နိုင်ခြေများမယ်ထင်ပါတယ်။

တစ်သီးပုဂ္ဂလကိုယ်စားလှယ်လောင်းတွေဟာ ဒီချုပ် နဲ့ ပြည်ခိုင်ဖြိုး ပါတီကြီးနှစ်ခုကို ယှဉ်နိုင်ဖို့၊ ဖြတ်ကျော်အနိုင်ရဖို့ဆိုတာ အတော်လေးကို ခက်ခဲနေဆဲဖြစ်ပါတယ်" လို့ သူက ပြောပါတယ်။

ဒါ့အပြင် လက်ရှိနိုင်ငံရေးအခင်းအကျင်းအရ အာဏာရပါတီ အပါအဝင် အခြားပါတီကြီးတွေက အစိုးရဖွဲ့နိုင်ဖို့ နေရာများများအနိုင်ရဖို့ လုံးပန်းနေကြတာ၊ လူကို မကြည့်နဲ့ ပါတီကိုပဲ ကြည့်ရမယ်ဆိုတဲ့ အယူအဆကလည်း လွှမ်းမိုးနေသေးတာ စတာတွေကြောင့် တစ်သီးပုဂ္ဂလတွေအနေနဲ့ ဒီအခြေနေကို ကျော်လွှားနိုင်ဖို့ အချိန်ယူ ကြိုးစားရုန်းကန်ရဦးမှာ သေချာပါတယ်။ 


BBC Burmese

https://www.bbc.com/burmese/burma-54666353

တိုင်ဖွန်း မိုလာဗေ့ ကြောင့် ရေကြီးမြေပြိုခဲ့မှုတွေအတွင်း လူ ၁၉ ဦး သေဆုံးခဲ့ပါတယ်။

ရွှံနွံတွေအောက်ကနေ အသက်ရှင်နိုင်ဘွယ် လူတွေကို ကယ်ထုတ်နိုင်ဖို့ ကြိုးစားနေ

ဗီယက်နမ်နိုင်ငံမှာ အားပြင်းတဲ့ တိုက်ဖွန်းမုန်တိုင်း တိုက်ခတ်ခဲ့အပြီး မိုးအဆက်မပြတ် ရွာသွန်းမှုတွေကြောင့် ဖြစ်ပွားခဲ့တဲ့ မြေပြိုမှုတွေအတွင်း အနည်းဆုံး လူ ၁၉ ဦး သေဆုံးခဲ့ပါတယ်။ နောက်ထပ် လူဒါဇင်နဲ့ချီလည်း ပျောက်ဆုံးနေပါတယ်။

မိုလာဗေ့ (Molave) တိုင်ဖွန်းမုန်တိုင်းဟာ ဗုဒ္ဓဟူးနေ့မှာ ဒါနောင်းမြို့အနီးက ပင်လယ် ကမ်းရိုးတန်းကို ဝင်ရောက်ခဲ့ပြီး မိုးကြီး လေပြင်းတွေလည်း တိုက်ခတ်ခဲ့ပါတယ်။

တိုင်ဖွန်း မုန်တိုင်းဒဏ်ကို ဗီယက်နမ်နိုင်ငံ အလယ်ပိုင်းက လူတစ်သန်းကျော် ရင်ဆိုင် ကြုံတွေ့ခဲ့ရပြီး ထိခိုက်ပျက်စီးမှုတွေ အကြီးအကျယ် ရှိခဲ့ပါတယ်။

တနာရီ ၁၄၅ ကီလိုမီတာနှုန်းနဲ့ တိုက်ခတ်ခဲ့တဲ့ မိုလာဗေ့ မုန်တိုင်း မကျရောက်ခင် လူ ၃၇၅၀၀၀ လောက်ကို ဘေးလွတ်ရာကို ရွှေ့ပြောင်းပေးခဲ့ပါတယ်။

ဒါပေမဲ့ ကြာသပတေးနေ့မှာတော့ တိုင်ဖွန်းမုန်တိုင်းဟာ ထိုင်းနိုင်ငံနဲ့ မြန်မာနိုင်ငံဘက်ကို ဦးတည်သွားပြီ ဖြစ်ပြီး မြေပြိုမှုတွေ ဖြစ်ပွားခဲ့တဲ့ ဝေးလံခေါင်ဖျားတဲ့ ဗီယက်နမ်ရွာတွေက အသက်ရှင် ကျန်ရစ်သူတွေကို ကယ်ဆယ်ရေးသမားတွေက အပူတပြင်း ရှာဖွေနေကြပါတယ်။

ကွမ်နမ်ပြည်နယ်က ရွာသုံးရွာမှာ အနည်းဆုံး လူ ၁၉ ယောက်ရဲ့ ရုပ်အလောင်းတွေကို ရွှံ့နွံတွေထဲကနေ ကယ်ဆယ်ရေးသမားတွေ ဆွဲထုတ်ခဲ့ကြတယ်လို့ နိုင်ငံပိုင် သတင်းမီဒီယာမှာ ရေးသားထားပါတယ်။

လူဘယ်နှစ်ယောက် သေဆုံးခဲ့သလဲ ဆိုတာကတော့ လက်ရှိအချိန်ထိ တိတိကျကျ မသိရသေးသလို သေဆုံးသူဦးရေ နောက်ထပ် မြင့်တက်နိုင်တယ်လို့လည်း တချို့သတင်းတွေမှာ ခန့်မှန်း ဖော်ပြနေပါတယ်။

မြေထိုးစက်တွေ အသုံးပြုပြီး စစ်သားတွေက ရွှံ့တွေ ဖယ်ရှားနေကြ

သေဆုံးသူ ဦးရေ အနည်းဆုံး လူ ၄၀ ထက်မနည်း ရှိတယ်လို့ တချို့သတင်းတွေမှာ ဖော်ပြကြပေမဲ့ နောက်ထပ် လူအတော်များများ ပျောက်ဆုံးနေဆဲ ဖြစ်ပါတယ်။

"ကျွန်မ သမီးနှစ်ယောက်ကို အိမ်နီးနားချင်းတွေက ရွှံ့တွေထဲကနေ ဆွဲထုတ်ခဲ့ကြတယ်။ ကျွန်မ အဖေလည်း ဆုံးပြီ။ အခု ကျွန်မနားမှာ ဘယ်သူမှ မရှိတော့ဘူး။ အားလုံး ရွှံ့ထဲမှာ အသက်ဆုံး ခဲ့ကြပြီ" လို့ ဒေသခံ ဟို သီဟက AFP သတင်းဌာနကို ပြောပါတယ်။

ရာသီဥတု ဆိုးဝါးမှုကြောင့် အဟန့်အတား ဖြစ်ခဲ့တဲ့ ကယ်ဆယ်ရေးလုပ်ငန်းတွေကို အကူအညီပေးဖို့အတွက် ရာနဲ့ချီတဲ့ စစ်သားတွေကို စက်ကိရိယာပစ္စည်း အစုံအလင်နဲ့ စေလွှတ်ထားပါတယ်။

မြေထိုးစက်တွေ အသုံးပြုပြီး စစ်သားတွေ ရှင်းလင်းရေးတွေ လုပ်နေရာ မြေပြိုခဲ့တဲ့ နေရာတခုကို ဗီယက်နမ် ဒုဝန်ကြီးချုပ် ကိုယ်တိုင် သွားရောက် ကြည့်ရှုခဲ့ပါတယ်။

"မုန်တိုင်းဝင်ရောက်လာနိုင်တဲ့ လမ်းကြောင်း ဒါမှမဟုတ် မိုးရေချိန် အတိုင်းအတာကို ကျွန်တော်တို့ ခန့်မှန်း တွက်ဆနိုင်ပါတယ်။

ဒါပေမဲ့ ဘယ်အချိန် မြေပြိုမှု ဖြစ်မလဲ ဆိုတာတော့ မခန့်မှန်းနိုင်ဘူး" လို့ သူက ပြောပါတယ်။

"လမ်းတွေမှာ ရွှံ့နွှံတွေ ထူထူထပ်ထပ် ဖုံးလွှမ်းနေပြီး မိုးဆက်သည်းထန်နေဆဲပါ။ ဒါပေမဲ့ ကယ်ဆယ်ရေးလုပ်ငန်းတွေကို မြန်မြန်ဆန်ဆန် ဆောင်ရွက်ရပါမယ်"လို့လည်း ဆိုပါတယ်။

တိုင်ဖွန်းကြောင့် နိုင်ငံအလယ်ပိုင်းမှာ လူနေအိမ် ထောင်သောင်းချီ အိမ်ခေါင်မိုးတွေ လန်သွားခဲ့

သီးခြားဖြစ်စဉ်အနေနဲ့ ငါးဖမ်းသမား ၁၂ ယောက်ရဲ့ ရုပ်အလောင်းကို ကြာသပတေးနေ့မှာ ရှာတွေ့ခဲ့တယ်လို့ နိုင်ငံပိုင် သတင်းမီဒီယာမှာ ရေးသားထားပါတယ်။

တိုင်ဖွန်းမုန်တိုင်း စဝင်ရောက်ခဲ့တဲ့ ဗုဒ္ဓဟူးနေ့မှာ သူတို့ရဲ့လှေ နစ်မြုပ်သွားခဲ့တာ ဖြစ်တယ်လို့လည်း ဖော်ပြထားပါတယ်။

ဗီယက်နမ်နိုင်ငံဟာ အောက်တိုဘာလ အစောပိုင်းကတည်းက မုန်တိုင်းတွေ၊ မိုးသည်းထန်မှုတွေနဲ့ ရေကြီးမြေပြိုမှုတွေနဲ့ ကြုံတွေ့ခဲ့ရတာပါ။

တိုင်ဖွန်း မိုလာဗေ့ဟာ ဒီလအတွင်း ဗီယက်နမ်နိုင်ငံမှာ တိုက်ခတ်ခဲ့တဲ့ ၄ ကြိမ်မြောက် မုန်တိုင်းဖြစ်ပါတယ်။

သီတင်းပတ်တွေနဲ့ချီ ရေကြီးမြေပြိုမှုတွေ ဆိုးဆိုးဝါးဝါး ဖြစ်ပွားခဲ့တဲ့ နေရာတွေမှာ ဒီတိုင်ဖွန်းမုန်တိုင်းကြောင့် အခြေအနေကို ပိုဆိုးဝါးသွား စေခဲ့ပါတယ်။

မုန်တိုင်း မတိုက်ခင်ကတည်းက လူ ၃ သိန်းကျော်ကို ဘေးလွတ်ရာကို ကြိုတင်ရွှေ့ပြောင်းပေးခဲ့

တိုင်ဖွန်းဒဏ်ကြောင့် အိမ်ကိုးသောင်းလောက် ခေါင်မိုးတွေ လန်သွားခဲ့ပြီး ရပ်ကွက် ၇၀၀ ကျော်မှာလည်း လျှပ်စစ်မီးတွေ ပြတ်တောက်နေကြောင်း၊ အခြေခံ အဆောက်အအုံတွေနဲ့ စိုက်ခင်းတွေ ပျက်စီးသွားခဲ့သလို သန့်ရှင်းတဲ့ သောက်သုံးရေလည်း ပြတ်လပ်နေကြောင်း နိုင်ငံတကာ ကြက်ခြေနီအဖွဲ့က ပြောပါတယ်။

"တိုင်ဖွန်းမုန်တိုင်းကြောင့် ဗီယက်နမ်နိုင်ငံ အလယ်ပိုင်းမှာရှိတဲ့ ထောင်သောင်းချီတဲ့ ပြည်သူတွေ ဆင်းရဲဒုက္ခ ရောက်နေကြရချိန်မှာ အခုလို ရေကြီးမြေပြိုမှုတွေကြောင့် လူတွေ အသက်ဆုံးရှုံးခဲ့ရတဲ့ အတွက် အရမ်းကို ဝမ်းနည်း စိတ်ထိခိုက်ရပါတယ်" လို့ ဗီယက်နမ် ကြက်ခြေနီအဖွဲ့ ဥက္ကဋ္ဌက ပြောပါတယ်။

ဗီယက်နမ်နိုင်ငံ အလယ်ပိုင်းက ဒေသတွေမှာ စနေနေ့အထိ မိုးဆက်လက် သည်းထန်နိုင်တယ်လို့ မိုးလေဝသပညာရှင်တွေက ခန့်မှန်းထားပါတယ်။

မိုလာဗေ့ မုန်တိုင်းဟာ ဗီယက်နမ်နိုင်ငံမှာ မတိုက်ခတ်ခင် ဖိလစ်ပိုင်နိုင်ငံကို အရင်ဖြတ်ကျော် ဝင်ရောက်ခဲ့တာပါ။

ဖိလစ်ပိုင်နိုင်ငံမှာလည်း ရေကြီးရေလျှံမှု၊ မြေပြိုမှုတွေကြောင့် လူ ၁၆ ယောက်ထက်မနည်း သေဆုံးခဲ့တယ်လို့ ဖိလစ်ပိုင် သဘာ၀ ဘေးအန္တရာယ်ဆိုင်ရာ တာဝန်ရှိသူတွေက ကြာသပတေးနေ့က ပြောပါတယ်။ 


BBC Burmese

https://www.bbc.com/burmese/world-54732165

တရုတ်အလုပ်ရှင် ပိတ်လှောင်ခံရသူ မြန်မာအမျိုးသမီးတွေ ပြန်လွတ်မြောက်

တရုတ်မြန်မာနယ်စပ် တရုတ်နိုင်ငံ ရွှေလီမြို့စစ်ဆေးရေးဂိတ် မြင်ကွင်း။ (မေ ၂၅၊ ၂၀၁၂)

တရုတ်နိုင်ငံမှာ အလုပ်ရှင်ရဲ့ ကန့်သတ်ချုပ်ခြယ်မှုတွေ ခံနေရတဲ့အကြောင်း လူမှုကွန်ရက်ပေါ်မှာ ဖော်ပြလိုက်ပြီးနောက် မြန်မာအလုပ်သမား အမျိုးသမီး ၄၀ နီးပါး ပြန်လည်လွတ်မြောက်လာတဲ့အကြောင်း ပြောပြမှာပါ။ ဗွီအိုအေမြန်မာပိုင်းသတင်းထောက် ကိုဇော်ထက်က သတင်းပေးပို့ထားပါတယ်။

တရုတ်နိုင်ငံ ရွှေလီမြို့က ဖုန်းအားသွင်းကြိုးစက်ရုံမှာ အလုပ်လုပ်နေကြတဲ့ မြန်မာအမျိုးသမီး ၃၉ ယောက်ဟာ အလုပ်ရှင်ကို လစာတိုးတောင်းပြီး မကြာခင်မှာပဲ အဆောင်ဝင်းထဲ ပိတ်လှောင်ခံခဲ့ရကြောင်း Facebook လူမှုကွန်ရက်မှာ ဖော်ပြလိုက်ပြီးနောက် ပြန်လည်လွတ်မြောက်လာခဲ့ကြတာပါ။ သူတို့ရင်ဆိုင်နေရတဲ့ အခြေအနေအကြောင်း ဗီဒီယိုကို တနင်္လာနေ့မှာပဲ လက်ကိုင်ဖုန်းကနေ ဖော်ပြအကူအညီ တောင်းခဲ့ရာက နောက်တနေ့မှာပဲ မြန်မာနိုင်ငံ လူကုန်ကူးမှု တားဆီးရေး တာဝန်ရှိသူတွေ ရွှေလီမြို့က ရဲတပ်ဖွဲ့ကို အကြောင်းကြားခဲ့တာပါ။

တရက်တည်းမှာပဲ တရုတ်ရဲတပ်ဖွဲ့က စက်ရုံပိုင်ရှင်ကို စစ်ဆေးခဲ့ပြီး မြန်မာနိုင်ငံသား မိန်းကလေးတွေကိုလည်း ကယ်ထုတ်ခဲ့ကြောင်း တရုတ်နိုင်ငံ ရွှေလီမြို့နဲ့ ကပ်လျက်ရှိနေတဲ့ မြန်မာနိုင်ငံနယ်စပ် မူဆယ်မြို့က လူကုန်ကူးမှုတားဆီးရေးအဖွဲ့ခေါင်းဆောင် ရဲမှူးမင်းနိုင်က ဗွီအိုအေကို ပြောပါတယ်။

“သူတို့ကို စက်ရုံကနေ ခြံဝန်းကို သော့ခတ်ပိတ်ထားတယ်၊ ထမင်း မကျွေးဘူး ရေမတိုက်ဘူးဆိုပြီးတော့ တင်လာတဲ့အတွက် ကျနော်တို့ကနေ တရုတ်ရွှေလီမှာရှိတဲ့ ရဲရယ်၊ နယ်စပ်ဆက်ဆံရေးရုံးရယ်ကို စာပို့ပြီးတော့ ဖြေရှင်းပေးဖို့ အကူအညီ တောင်းခံလိုက်တယ်၊ တရုတ်ရဲဌာနကနေ ရှင်းပေးလိုက်တဲ့အတွက် ပြေလည်သွားတဲ့အခါမှာ ၃၉ ယောက်ထဲမှာ ၆ ယောက်ကတော့ မနက်ခင်းက ၁၁ နာရီလောက်မှာ ကျနော်တို့ မြန်မာ နိုင်ငံဘက်ကို ပြန်ရောက်လာပါတယ်။”

အလုပ်ရှင်ရဲ့ ကန့်သတ်ချုပ်ခြယ်မှုတွေ ခံခဲ့ရတဲ့ အမျိုးသမီးတွေဟာ အရင်အလုပ်ဟောင်း အထည်ချုပ်စက်ရုံက ကိုဗစ်ကာလ အရှုံးပေါ်ပြီး ပိတ်သွားရာက ဖုန်းအားသွင်းကြိုးစက်ရုံကို ပြီးခဲ့တဲ့ ၂ လလောက်က ပြောင်းလာပြီး အလုပ်လုပ်ခဲ့တာပါ။ အလုပ်ဟောင်းမှာ တလ ယွမ်ငွေ ၁,၅၀၀ ပြီး အလုပ်သစ်က ၁,၀၀၀ ပဲပေးတဲ့အပြင် အလုပ်ချိန်ကလည် ပိုလာတဲ့အတွက် လုပ်ခတိုးတောင်းရင်း အခုလိုအခြေအနေ ရောက်ခဲ့ ကြတာပါ။

ဒါကအလုပ်ရှင် အလုပ်သမား ပြဿနာဖြစ်ပေမဲ့ တရားဝင်အလုပ်လုပ်ခွင့်မရတဲ့ တရုတ်ပြည်ရဲ့ အခြေအနေကြောင့် နှစ်ဘက် အလုပ်သမားရုံးနဲ့ ဖြေရှင်းလို့မရဘဲ လူကုန်ကူးတားဆီးရေးအဖွဲ့နဲ့ နယ်စပ်ဆက်ဆံရေးရုံး တာဝန်ရှိသူတွေက ဖြေရှင်းပေးရကြောင်း ရဲမှူးမင်းနိုင်က ပြောပါတယ်။

“ဒီဘက်က အလုပ်သမား ဦးစီးဌာနကလည်း တရုတ်ဘက်က ရွှေလီမှာရှိတဲ့ အလုပ်သမားဦးစီးဌာနကို အကြောင်းကြားပေးဖို့၊ ကူညီဖြေရှင်းပေးဖို့ တော်တော်လေး ခက်တယ်ဗျ။ ဒါကို ဟိုဘက်နဲ့ ဒီဘက် အလုပ်သမားနဲ့ အလုပ်ရှင်နဲ့ နားလည်မှု ယူပြီးတော့သာ လုပ်နေကြရတာ ဖြစ်တဲ့အတွက် ဒါကတော့ ရှိတော့ ရှိနေမှာပဲဗျ။”

တရုတ်နိုင်ငံနယ်စပ်ဒေသတွေမှာ အလုပ်လုပ်နေတဲ့ မြန်မာအလုပ်သမားတွေရဲ့ စာရင်းအတိအကျကို ရနိုင်ဖို့ကတော့ ခက်ခဲတယ်လို့ ယူနန်ပြည်နယ် ကူမင်းမြို့က ကောင်စစ်ဝန်ရုံးနဲ့ ပေကျင်းမြို့တော်က မြန်မာသံရုံး တာဝန်ရှိသူတွေက ပြောပါတယ်။ တရုတ်အစိုးရရဲ့ သူ့နိုင်ငံသားတွေ အလုပ်အကိုင် အခွင့်အလမ်း ဦးစားပေး မူဝါဒကြောင့် တရားဝင်အလုပ်လုပ်ခွင့်နဲ့ အစိုးရချင်း သဘောတူ အလုပ်သမား စေလွှတ်ဖို့ ကိစ္စတွေဟာလည်း အခုအချိန်အထိ ဆွေးနွေးညှိနှိုင်းနေရဆဲ ဖြစ်ပါတယ်။


ဇော်ထက်/VOA (Burmese)

https://burmese.voanews.com/a/ruli-china-myanmar-migrant/5640208.html

ထိုင်းက နိုင်ငံခြားသားအလုပ်သမားတွေ အလုပ်လုပ်ခွင့်သက်တမ်းတိုးဖို့ သတိပေးနေ

ကိုဗစ်အရေးပေါ်ကာလမှာ ဗီဇာနဲ့ အလုပ်လုပ်ခွင့်အထောက်အထားများ သက်တမ်းတိုးနေတဲ့ နိုင်ငံခြားသားအလုပ်သမားများ။ (ဓာတ်ပုံ - ထိုင်းလဝက - အောက်တိုဘာ ၂၉၊ ၂၀၂၀)

မြန်မာနိုင်ငံသားတွေ အပါအဝင် ထိုင်းနိုင်ငံရောက် နိုင်ငံခြားသား အလုပ်သမားတွေ ကိုဗစ်ကပ်ရောဂါကာလ နေထိုင်ခွင့်ဗီဇာ သက်တမ်းတိုးရမယ့် နောက်ဆုံးရက်နီးလာတာကြောင့် ထိုင်းအာဏာပိုင်တွေ သတိပေးနေတဲ့အကြောင်းကို ဗွီအိုအေမြန်မာပိုင်းသတင်းထောက် မအေးအေးမာက ပြောပြပါမယ်။

မြန်မာ၊ ကမ္ဘောဒီးယားနဲ့ လာအိုနိုင်ငံတွေက အလုပ်သမားတွေ ထိုင်းနိုင်ငံမှာ ကပ်ရောဂါကာလ နေထိုင်အလုပ်လုပ်ခွင့် သက်တမ်း ထပ်တိုးဖို့ ဒီလကုန် နောက်ဆုံး သတ်မှတ်ထားတာကြောင့် အချိန်မှီ ဆောင်ရွက်ကြဖို့နဲ့ ပျက်ကွက်ခဲ့မယ်ဆိုရင် အရေးယူခံရမှာဖြစ်ကြောင်း သတိပေးနေတာပါ။ သတ်မှတ်ရက်အမီ ဗီဇာသက်တမ်းတိုးဖို့ ပျက်ကွက်မယ်ဆိုရင် ဒဏ်ငွေအဖြစ် ထိုင်းဘတ်ငွေ ၁၀၀,၀၀၀ အထိ ပေးဆောင်ရမှာ ဖြစ်ကြောင်း ထိုင်းနိုင်ငံပြည်ထဲရေးနဲ့ အလုပ်အကိုင်ရှာဖွေရေးဌာနတွေက ဒီတပတ်ထဲမှာပဲ သတိပေးထားကြောင်း မြန်မာအလုပ်သမားရေး ဆောင်ရွက်နေတဲ့ ရွှေ့ပြောင်းအလုပ်သမားအခွင့်အရေးကွန်ယက်ရဲ့ဥက္ကဋ္ဌ ဦးအောင်ကျော်က ပြောပါတယ်။

"ခွင်ြ့ပုထားတာ COVID 19 ကာလမှာ အောက်တိုဘာလ ၃၁ ရက်ထိပဲ ခွင့်ပြုထားတာ ကိုဗစ် ကာလမှာ အလုပ်သမားတွေ တရားဝမင်စာရွက်စာတမ်းတွေလုပ်ဖို့ ခက်ခဲတာ မြန်မာနိုင်ငံမှာ စာအုပ်တွေပြန်လုပ်ဖို့ ခက်ခဲတာကြောင့် ကင်းလွတ်ခွင့်ပြုထားတာ အခုချိန်မှာတော့ ဌာနဆိုင်ရာရုံးတွေကလည်း ပုံမှန်ပြန်လုပ်နေပြီဆိုတော့ သူတို့က သက်ဆိုင်ရာလုပ်ငန်းရှင် အဟောင်းပဲဖြစ်ဖြစ် လုပ်ငန်းရှင်အသစ်မှာပဲဖြစ်ဖြစ် တရားဝင် အလုပ်လုပ်ခွင့် လက်မှတ်ရအောင်လုပ်ဖို့ ဗီဇာသက်တမ်းတိုးတာကို ၃၁ ရက်နေ့ထိ နောက်ဆုံးထားလုပ်ဖို့ပြောထားတာ ဒီလိုမလုပ်ရင်တော့ ငွေဒဏ်တွေ ကျမခံဖို့ ပြစ်ဒဏ်တွေ ထုတ်ပြန်ထားတာကိုတွေ့ရတယ်။"

ထိုင်းပြည်ထဲရေး ဝန်ကြီးဌာနရဲ့ ထုတ်ပြန်ချက်မှာတော့ အချိန်မီသက်တမ်းမတိုးတဲ့ အလုပ်သမားတွေကို အရေးယူမှာ ဖြစ်တာကြောင့် သက်ဆိုင်ရာ နိုင်ငံတွေက သံရုံးတွေ အနေနဲ့ မိမိနိုင်ငံသားတွေကို အသိပေးနှိုးဆော်ဖို့လည်း တိုက်တွန်းထားပါတယ်။ ဗီဇာသက်တမ်းတိုးဖို့ ပျက်ကွက်နေသူတွေ ရက်ပေါင်း ၉၀ အတွင်း အကြောင်းမကြားရင်၊ ထောင်ဒဏ်ငွေဒဏ် ပြည်နှင်ဒဏ်အပြင် နာမည်ပျက် အမည်မည်း စာရင်းသွင်းပြီး ထိုင်းနိုင်ငံဝင်ရောက်ခွင့်ကိုပါ ရာသက်ပန် ပိတ်ပင်ခံရမယ်လို့လည်း သတိပေးထားပါတယ်။ ထိုင်းအာဏာပိုင်တွေက အခုလို သတိပေးနေပေမဲ့ လက်တွေ့လုပ်ဖို့ အခက်အခဲတွေ ရှိနေတုန်းပဲလို့လည်း ထိုင်းနိုင်ငံ အခြေစိုက် ပညာရေးနဲ့ ဖွံဖြိုးရေးဖောင်ဒေးရှင်းက အလုပ်သမားရေးလှုပ်ရှားသူ ဦးမင်းဦးက ပြောပါတယ်။

"လူတွေက အလုပ်လည်း မရှိ၊ သက်တမ်းတိုးဖို့ကလည်း အခက်အခဲရှိတယ်လေ။ သူတို့က လျှော့ပေးလိုက်တယ်ဆိုတာက အလုပ်ရှင် အသစ်ပြောင်းဖို့အတွက် နောက်ကျနေတာတို့၊ အလုပ်ရှင် မပြောင်းဖြစ်တာတို့ ပြောရရင်တော့ အလုပ်လွှဲပြောင်းစာ သေတာကို... ကာလကို အကန့်အသတ်မရှိဘဲ ပေးတိုးတယ်။ အောက်တိုဘာ ၃၁ ရက်နေ့ထိ တိုးပေးလိုက်တာ တချို့ကတော့ အကျိုးခံစားခွင့်တွေ မရှိဘူး မဟုတ်ဘူး။ ရှိတယ် အများစုကတော့ ဒီကိုဗစ်ကာလမှာ သက်တမ်းတိုးဖို့က အများစုကတော့ သက်တမ်းတိုးနိုင်သူနည်းလိမ့်မယ် ဒုက္ခတွေရောက်မှာပေါ့ဗျာ။"

ကပ်ရောဂါကြောင့် သွားလာလှုပ်ရှားမှုတွေ ကန့်သတ်ခဲ့တဲ့ ထိုင်းနိုင်ငံမှာ အလုပ်အကိုင်နဲ့ စားဝတ်နေရေး အခက်အခဲတွေကြောင့် သန်းနဲ့ချီတဲ့ မြန်မာအလုပ်သမားတွေထဲက နေရပ်ပြန်ကြသူတွေလည်း သိန်းဂဏန်းအထိ ရှိခဲ့ပါတယ်။ ကိုဗစ်ကပ်ရောဂါကြောင့် သေဆုံးသူ ၅၉ ယောက်နဲ့ ကူးစက်သူ ၃,၆၀၀ လောက်ရှိခဲ့တဲ့ ထိုင်းနိုင်ငံမှာ မကြာသေးခင်လတွေကစလို့ ရောဂါကူးစက်မှုတွေ လျော့ပါးလာရာက လုပ်ငန်းတွေ ပြန်လည် လည်ပတ်လာရာက အလုပ်သမား လိုအပ်ချက်တွေ ရှိနေတာကြောင့် မြန်မာနိုင်ငံသားတွေ အပါအဝင် အိမ်နီးချင်းနိုင်ငံတွေက ရွှေ့ပြောင်းအလုပ်သမားတွေကို အလုပ်လုပ်ခွင့်ပေးဖို့လည်း စီစဉ်နေတာပါ။ ဒါပေမဲ့လည်း မြန်မာနိုင်ငံမှာ ရောဂါကူးစက်မှုတွေ တကျော့ပြန် တိုးလာနေတာကြောင့် အလုပ်သမားတွေ ခေါ်ယူဖို့အတွက်လည်း ထိုင်းနိုင်ငံဘက်က တွန့်ဆုတ်နေပါတယ်။


မအေးအေးမာ/VOA (Burmese)

https://burmese.voanews.com/a/thai-visa-extension/5640016.html

မြန်မာမှာ ကိုရိုနာဗိုင်းရပ်စ်ကူးစက်ခံရသူ ငါးသောင်းကျော်လာ

ကိုဗစ်-၁၉ ပိုး ရှိ-မရှိ စစ်ဆေးရန် ကျန်းမာရေးဝန်ထမ်းတဦးက နှာခေါင်းတို့ဖတ် ယူနေစဉ်။

Photo: AFP

ကျန်းမာရေးနှင့် အားကစားဝန်ကြီးဌာနရဲ့ ထုတ်ပြန်ချက်အရ မြန်မာနိုင်ငံမှာ ကိုရိုနာဗိုင်းရပ်စ်ကြောင့် သေဆုံးတဲ့သူ စုစုပေါင်း ၁၁၉၉ ယောက် ရှိသွားပါပြီ။

ဒီကနေ့ အောက်တိုဘာလ ၂၉ ရက်နေ့ ထုတ်ပြန်ချက်စာရင်းမှာ သေဆုံးတဲ့သူ ၂၇ ယောက် တိုးလာတာဖြစ်ပြီးတော့ သေဆုံးတဲ့သူတွေထဲမှာ ၂၂ ယောက်ဟာ ရောဂါအခံရှိသူတွေ ဖြစ်ပါတယ်။ ဒီကနေ့ တစ်ရက်တည်းမှာ ကိုရိုနာဗိုင်းရပ်စ်ကူးစက်ခံရသူ လူနာသစ် ၁၃၃၁ ယောက် တိုးလာတာပါ။

မြန်မာနိုင်ငံမှာ လက်ရှိအချိန်ထိ ရောဂါကူးစက်ခံရတဲ့သူ စုစုပေါင်း ၅၀၄၀၃ ယောက် ရှိသွားပြီဖြစ်ပြီးတော့ ပြန်လည်သက်သာလာတဲ့သူက စုစုပေါင်း ၃၀၀၀၇ ယောက် ရှိပါပြီ။

ကပ်ရောဂါကာလအတွင်း နိုဝင်ဘာလ ၈ ရက်နေ့မှာ ကျင်းပမယ့် ရွေးကောက်ပွဲကျင်းပဖို့အတွက် ၁၀ ရက်ပဲလိုပါတော့တယ်။ ဒီကနေ့ အောက်တိုဘာလ အောက်တိုဘာ ၂၉ ရက်နေ့မှာ တစ်နိုင်ငံလုံးက အသက် ၆၀ ကျော် လူကြီးတွေ ကြိုတင်မဲပေးကြပါတယ်။

ကပ်ရောဂါ ကာလအတွင်း အသက်အရွယ်ကြီးသူတွေ  အဆင်ပြေအောင်မဲပေးနိုင်ဖို့ အောက်တိုဘာ ၂၉ ရက်နေ့ကနေ နိုဝင်ဘာ ၅ ရက်နေ့ထိ ပြည်ထောင်စုရွေးကောက်ပွဲကော်မရှင်က ကြိုတင်မဲပေးခွင့်ပြုထားတာပါ။

ရခိုင်ပြည်နယ်ထဲက မြို့နယ်အားလုံး၊ ရန်ကုန်တိုင်းမှာ ကိုကိုးကျွန်းမှအပ ကျန်တဲ့မြို့နယ်အားလုံး၊ မန္တလေးတိုင်း၊ ပဲခူးတိုင်း၊ ဧရာဝတီတိုင်း၊ မွန်ပြည်နယ်နဲ့ ကချင်ပြည်နယ်တွေထဲက ၁၃ မြို့နယ်တွေမှာထုတ်ပြန်ထားတဲ့ မလိုအပ်ပဲ အိမ်ပြင်မထွက်ရ stay-at-home အမိန့်ကို လာမယ့် နိုဝင်ဘာလ ၈ ရက်နေ့  အထွေထွေရွေးကောက်ပွဲနေ့အတွက် ပယ်ဖျက်ပေးမယ်လို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။

မြန်မာနိုင်ငံဟာ ကမ္ဘာ့ရောဂါကူးစက်မှု နိုင်ငံတွေထဲမှာ ၇၅ နိုင်ငံမြောက် ရောဂါကူးစက်မှုအများဆုံးဖြစ်လာပြီး အာဆီယံ ဆယ်နိုင်ငံမှာတော့ တတိယမြောက် သေဆုံးမှုအများဆုံးနိုင်ငံ ဖြစ်နေပါတယ်။

လတ်တလော မြန်မာနိုင်ငံမှာ ကိုရိုနာဗိုင်းရပ်စ် ကူးစက်ခံရတဲ့သူဟာ ပျမ်းမျှအားဖြင့် တစ်နေ့ကို တစ်ထောင်ကျော်ရှိနေပြီး၊ ပျမ်းမျှသေဆုံးတဲ့သူ တစ်နေ့ကို အယောက် ၃၀ လောက်ရှိနေတာပါ။


RFA Burmese

https://www.rfa.org/burmese/news/coronavirus-cases-in-myanmar-10292020111852.html

ICRC ရိက္ခာတင် လှေဝန်ထမ်းတွေ ပြောကြားချက်နဲ့ တပ်မတော်ထုတ်ပြန်ချက် ကွဲလွဲနေ


ရခိုင်ပြည်နယ်စစ်တွေမြို့ကနေ ဘူးသီးတောင်မြို့နယ်ထဲက ဒုက္ခသည်တွေအတွက် အပြည်ပြည်ဆိုင်ရာ ကြက်ခြေနီအဖွဲ့ ICRC ရဲ့ စားနပ်ရိက္ခာတွေ ထောက်ပံ့ဖို့သွားတဲ့ အငှားစက်လှေတစ်စီး ရသေ့တောင်မြို့နယ် ပြိန်းတောရွာအနီးမှာ အောက်တိုဘာ ၂၈ ရက် မနေ့က ပစ်ခတ်ခံရလို့ စက်လှေမီးလောင်ပြီး လူသေဆုံးတဲ့ သတင်းကို RFA က မနေ့ညက ထုတ်လွှင့်ခဲ့ရာမှာ...ဒီသတင်းထုတ်လွှင့်ချက်ဟာ မှန်ကန်မှုမရှိဘဲ တပ်မတော်ရဲ့ ဂုဏ်သိက္ခာညိုးနွမ်းအောင် RFA က ထုတ်လွှင့်ဖော်ပြခဲ့တယ်လို့ တပ်မတော် သတင်းမှန်ပြန်ကြားရေးအဖွဲ့ ကဒီနေ့ သတင်းထုတ်ပြန် စွပ်စွဲပြောဆိုလိုက်ပါတယ်။

RFA ရဲ့ သတင်းထုတ်လွှင့်ချက်ဟာ စက်လှေပေါ်မှာ လိုက်ပါသွားပြီး အသက်ရှင်ကျန်ရစ်သူ စက်လှေသမားတွေရဲ့ ပြောဆိုချက်ကို အခြေခံပြီး ရေးသားထုတ်လွှင့်ခဲ့တာ ဖြစ်ပါတယ်။ ဒီအချက်တွေမှာ တပ်မတော်သတင်းမှန် ပြန်ကြားရေးအဖွဲ့ရဲ့ ထုတ်ပြန်ချက်ပါ အကြောင်းအရာတွေနဲ့ ကွဲလွဲတာတွေ ရှိနေပါတယ်။  

တပ်မတော်သတင်းမှန်ပြန်ကြားရေးအဖွဲ့ရဲ့ အောက်တိုဘာ ၂၈ ရက် မနေ့ညက ထုတ်ပြန်ကြေညာချက်မှာ.. ဒီစက်လှေ ပေါ်လိုက်လာတဲ့  AA အဖွဲ့က တပ်မတော်စစ်ရေယာဉ်တွေကို စတင်ပစ်ခတ်တာကြောင့် တပ်မတော်က ပြန်လည် ပစ်ခတ်ခဲ့တာလို့လည်း ဖော်ပြထားပါတယ်။

တပ်မတော်ရဲ့ ထုတ်ပြန်ချက်မှာ ဖော်ပြထားတဲ့... "AA အကြမ်းဖက်သောင်းကျန်းသူတွေက စက်လှေပေါ်ကနေ လက်နက်ကြီး လက်နက်ငယ်တွေနဲ့ ပစ်ခတ်တယ်" ဆိုတဲ့ အချက်နဲ့ပတ်သက်လို့ အသက်ရှင်လျက် လွတ်မြောက်လာတဲ့ စက်လှေဝန်ထမ်း သုံးဦးထဲက ကိုကံအေးချမ်းကို RFA က မေးမြန်းရာမှာ... သူတို့ လေးဦးစလုံးဟာ AA အဖွဲ့နဲ့ ပတ်သက်မှုမရှိသလို စက်လှေပေါ်မှာလည်း သူတို့ လေးဦးကလွဲလို့ ဘယ်သူမှ ပါမလာကြောင်း၊ လက်နက်ဆိုလို့ သူတို့မှာ ဓားကောင်းကောင်းတစ်ချောင်းတောင် မပါကြောင်း၊ တပ်မတော်ရေယာဉ်က စစ်ဆေးရင် အဆင်သင့်ဖြစ်အောင် သူတို့ လေးဦးစလုံးဟာ စက်လှေခေါင်မိုးပေါ်မှာ ရှိနေခဲ့ကြကြောင်း RFA ကို ပြောဆိုပါတယ်။

ဒဏ်ရာရသူနှစ်ဦးထဲက တစ်ဦးဖြစ်သူ အသက် ၃၄ နှစ်အရွယ် ဦးမောင်သန်းဝေက သူတို့စက်လှေနဲ့ ပတ်သက်လို့ တပ်မတော် ရေယာဉ်ထံမှာ လုံခြုံရေးအရ စစ်ဆေးခံပြီး တရားဝင်ခွင့်ချက် စာရွက်စာတမ်းတွေကို ထုတ်ပြဖို့ ကြိုးစားနေချိန်မှာပဲ လက်နက်ကြီး လက်နက်ငယ်တွေနဲ့ ပစ်ခတ်ခံခဲ့ရတာလို့ ပြောပါတယ်။

“ကျွန်တော်တို့ မနေ့က ICRC အဖွဲ့ရဲ့ ကယ်ဆယ်ရေးပစ္စည်းတွေ ပေးဖို့ သွားတာပါ။ တပ်နဲ့ ပြိန်းတောရွာနားမှာ တွေ့ပါတယ်။ သူတို့က အထက်ပိုင်းကနေ ဆင်းလာတာ၊ ကျွန်တော်တို့ကတော့ အတက်ပေါ့။ သူတို့လည်း စက်အရှိန် လျှော့ထားတယ်။ ကျွန်တော်တို့လည်း စက်အရှိန် လျှော့ထားပါတယ်။ ကျွန်တော်တို့ကလည်း သူတို့ခေါ်စစ်မယ်ဆိုရင် အဆင်သင့်ဖြစ်အောင် ဆိုပြီးတော့ စာရွက်စာတမ်းတွေကိုပါ လက်မှာ အဆင်သင့် ကိုင်ထားပါတယ်။ အဲဒီအချိန်မှာပဲ သူတို့ ပြိန်းတောချောင်းထဲဘက် ဝင်သွားပြီးနောက် ပြန်လှည့်လာပါတယ်။ ပြန်လှည့်လာတော့ ကျွန်တော်တို့ကလည်း လှမ်းခေါ်မယ်ထင်လို့ လှေကို သူတို့အနီးကို သွားကပ်ဖို့ကြိုးစားတယ်။ အဲဒီမှာ သူတို့က အကပ်မခံဘဲ ပစ်တော့တာပဲ”

တပ်မတော်ရေယာဉ်နှစ်စီးကနေ လက်နက်ကြီး လက်နက်ငယ်တွေနဲ့ တရစပ် ပစ်ခတ်လို့ လှေပေါ်ပါလာသူ လေးဦးစလုံးဟာ လှေဝမ်းထဲ ဝင်ပြေးပြီး ပုန်းအောင်းနေခဲ့ကြရတယ်လို့ ဆိုပါတယ်။

အဲဒီအချိန်မှာပဲ လက်နက်ကြီးကျည်တစ်လုံးဟာ ဆီပေပါကို ထိမှန်ပေါက်ကွဲပြီးတော့ မီးစတင် လောင်ကျွမ်းခဲ့တာလို့ ပြောပါတယ်။

မီးလောင်ကျွမ်းနေတဲ့ စက်လှေပေါ်ကို တပ်မတော်သားတချို့ တက်လာပြီး ICRC အမှတ်တံဆိပ်ပါ ရိက္ခာပစ္စည်းတွေကို ကြည့်ပြီးတော့ ပြန်ဆင်းသွားကြတယ်လို့ အဲဒီလှေပေါ်မှာ ပုန်းအောင်းနေခဲ့ရတဲ့ လှေဝန်ထမ်း ကိုကံအေးချမ်းက ပြောပါတယ်။

“ပထမဆုံးတစ်ချက် စပစ်တော့ မထိသေးဘူး။ ကျွန်တော်လည်း လှေဝမ်းထဲကို ဆင်းပြေးလိုက်တယ်။ ကျွန်တော် လှေဝမ်းထဲမှာ ပုန်းနေချိန်မှာပဲ သူတို့က လက်နက်ကြီးတွေနဲ့ ပစ်ပါတယ်။ အဲဒီအချိန်မှာပဲ ဆီပေပါကို ထိမှန်ပြီးတော့ လှေက မီးစလောင်ပါတယ်။ ကျွန်တော်တို့လည်း တော်တော် ကြောက်နေကြတယ်။ သူတို့က လက်နက်ကြီး လက်နက်ငယ်တွေနဲ့ အသားကုန်ပစ်တာ။ အဲလိုပစ်ရင်း သူတို့ရဲ့ ဇက်ရေယာဉ်နဲ့ ကျွန်တော်တို့လှေကို ကမ်းနားကို တွန်းပါတယ်။ ကမ်းကိုတွန်းရင်း သူတို့က ကျွန်တော်တို့လှေပေါ်ကို တက်လာကြပါတယ်။ တက်လာတော့ လှေဝမ်းထဲပုန်းနေတဲ့ ကျွန်တော်တို့က ပြေးဖို့ အချိန်မရလိုက်ဘူး။ သူတို့က ပစ္စည်းတွေကို အုပ်ထားတဲ့ တာပေါ်လင်စကို ဖွင့်ကြည့်ပါတယ်။ စားကုန်ပစ္စည်းတွေက ICRC တံဆိပ်နဲ့ဆိုတော့ ICRC အဖွဲ့ကလို့ သူတို့ သိသွားပုံရပါတယ်။ ပြီးတော့ တာပေါ်လင်စကို ပြန်အုပ်ထားလိုက်တယ်။ သူတို့တက်လာတာ၊ ပြန်ဆင်းတာတွေကို ကျွန်တော်တို့ အတိုင်းသား ကြားနေရပါတယ်”

တပ်မတော်သားတွေက လှေပေါ်ကနေ ဆင်းသွားကြပြီးနောက် လှေပေါ်ပုန်းနေခဲ့တဲ့ လှေဝန်ထမ်းသုံးဦးဟာ ရေထဲကို ခုန်ဆင်းပြီးတော့ ထွက်ပြေးလွတ်မြောက် လာကြတာလို့ ဆိုပါတယ်။

ဒီဖြစ်စဉ်ကြောင့် စက်လှေနဲ့ စားနပ်ရိက္ခာတွေ မီးလောင် ပျက်စီးသွားသလို စက်လှေဝန်ထမ်း လေးဦးအနက် တစ်ဦးသေဆုံးပြီး တစ်ဦး ဒဏ်ရာရခဲ့တာပါ။ အသက် ၂၀ အရွယ် ကိုမောင်ချေကတော့ လှေပေါ်မှာပဲ မီးလောင်ကျွမ်း သေဆုံးသွားပြီး အသက် ၅၀ အရွယ် ဦးလှဝင်းမောင်နဲ့ အသက် ၃၄ နှစ်အရွယ် ဦးမောင်သန်းဝေတို့ နှစ်ဦးက လောင်ဒဏ်ရာတွေ အသီးသီးရရှိခဲ့ကြပါတယ်။

အပြည်ပြည်ဆိုင်ရာ ကြက်ခြေနီကော်မတီ (ICRC)က တော့ အဲဒီစက်လှေဟာ ICRC အဖွဲ့ရဲ့ အကူအညီတွေကို သယ်ယူပို့ဆောင်ပေးနေတဲ့ အငှားမော်တော်ယာဉ်တစ်စီး ဖြစ်ပြီး မနေ့က ဖြစ်ရပ်အပေါ် လွန်စွာ ဝမ်းနည်းရကြောင်း မနေ့က ထုတ်ပြန်ပြောဆိုခဲ့ပါတယ်။ ICRC ရဲ့ ထုတ်ပြန်ချက်မှာ... လှေပေါ်ပါလာတဲ့ စက်လှေဝန်ထမ်း လေးဦးဟာ ICRC ဝန်ထမ်းတွေ မဟုတ်ကြောင်း၊ သူတို့ဟာ စက်လှေမောင်းဝန်ထမ်းတွေလို့ ဖော်ပြထားပါတယ်။ ဒီအကြောင်းနဲ့ပတ်သက်လို့ စိစစ်မေးမြန်းနိုင်ဖို့ RFA က ICRC အဖွဲ့ ပြောခွင့်ရသူကို ဆက်သွယ်နေဆဲ ဖြစ်ပါတယ်။

တပ်မတော်သတင်းမှန် ပြန်ကြားရေးအဖွဲ့ရဲ့ မနေ့က ထုတ်ပြန်ချက်မှာတော့ မနေ့က ရသေ့တောင်မြို့နယ် မေယုမြစ်အတွင်း အုပ်ချုပ်မှု ကိစ္စရပ်တွေဆောင်ရွက်နေတဲ့ တပ်မတော်စစ်ရေယာဉ် ၃ စီးဟာ မနေ့မနက်ပိုင်းမှာ အောင်ဇေယျကျေးရွာကနေ ရသေ့တောင်မြို့ကို ခုတ်မောင်းလာစဉ် အောင်ဇေယျ ကျေးရွာရဲ့ တောင်ဘက် မီတာ ၂၀၀၀ ခန့်အကွာ မင်းကျွန်းအနီးကိုအရောက်၊ အနောက်ဘက်ကမ်းက အရှိန်နဲ့ မောင်းနှင်လာတဲ့ စက်လှေပေါ်ကနေ AA အကြမ်းဖက် သောင်းကျန်းသူတွေက လက်နက်ကြီး၊ လက်နက်ငယ်တွေနဲ့ နှောက်ယှက် ပစ်ခတ်လို့ တပ်မတော် စစ်ရေယာဉ်ပေါ်မှာ လိုက်ပါလာတဲ့ လုံခြုံရေး တပ်ဖွဲ့ဝင်တွေက ပြန်လည်ပစ်ခတ် တိုက်ခိုက်ခဲ့ရာမှာ AA အကြမ်းဖက် သောင်းကျန်းသူတွေ စီးနင်းလာတဲ့ အဲဒီစက်လှေဟာ မီးစွဲလောင်ပြီး မေယုမြစ်အတွင်း မျောပါသွားခဲ့တယ်လို့ ပါရှိပါတယ်။

တပ်မတော်ရဲ့ ထုတ်ပြန်ပြောဆိုချက်တွေနဲ့ အခင်းဖြစ်တဲ့လှေပေါ်မှာ လိုက်ပါလာတဲ့သူတွေရဲ့ ပြောဆိုချက်တွေ ကွဲလွဲနေတာနဲ့ ပတ်သက်လို့ တပ်မတော်သတင်းမှန်ပြန်ကြားရေးအဖွဲ့ ဥက္ကဋ္ဌ ဗိုလ်ချုပ် ဇော်မင်းထွန်းကို RFA က အကြိမ်ကြိမ် ဆက်သွယ်မေးမြန်း ခဲ့ပေမယ့် ဒီညနေ ၅ နာရီထိ ဖုန်းလက်ခံဖြေကြားတာ မရှိခဲ့ပါဘူး။

AA တပ်ဖွဲ့ဝင်တွေ စီးနင်းလာတဲ့ စက်လှေဖြစ်ပြီး တပ်မတော်က လက်နက်ကြီး လက်နက်ငယ်တွေနဲ့ ပြန်လည်ပစ်ခတ်တာဆိုတဲ့ တပ်မတော်ရဲ့ ထုတ်ပြန်ချက်နဲ့ ပတ်သက်လို့  AA အဖွဲ့ ပြောခွင့်ရပုဂ္ဂိုလ် ဦးခိုင်သုခ က... ဗုဒ္ဓဟူးနေ့မနက်က ပစ်ခတ်ခံရတဲ့ စက်လှေအနီးမှာ AA အဖွဲ့နဲ့ တိုက်ပွဲဖြစ်ပွားခဲ့တာမရှိဘူးလို့ RFA ကို ပြောပါတယ်။

မနေ့က ဖြစ်စဉ်အတွင်း ထိခိုက်ဒဏ်ရာရခဲ့တဲ့ စက်လှေဝန်ထမ်းနှစ်ဦးကို စေတီပြင်တိုက်နယ် ဆေးရုံကို ပို့ဆောင်ခဲ့ပြီး အဲဒီကတစ်ဆင့် စစ်တွေဆေးရုံကြီးကို ဆက်လက်ပို့ဆောင်ရာမှာ မိုးချုပ်သွားတဲ့အတွက် ရသေ့တောင်မြို့နယ် လောင်းချောင်းကျေးရွာမှာ ညအိပ် ရပ်နားခဲ့ရပါတယ်။

ဒီနေ့မနက်မှာ ICRC အဖွဲ့ရဲ့အမြန်ယာဉ်တွေနဲ့ လူနာတွေကို သွားရောက်ခေါ်ယူဖို့ စီစဉ်ရာမှာ ရခိုင်ပြည်နယ်အစိုးရအဖွဲ့ဆီက ခွင့်ပြုချက်ကို ဒီနေ့ ညနေပိုင်းမှ ရရှိခဲ့ပြီး ဒဏ်ရာရသူနှစ်ဦးကို  စစ်တွေဆေးရုံကို ဒီနေ့ညနေပိုင်းမှာ သယ်ယူပို့ဆောင်ပေးခဲ့တယ်လို့  အကူအညီ ပေးနေသူတွေက ပြောပါတယ်။

ရသေ့တောင်မြို့နယ်က အမျိုးသားလွှတ်တော်ကိုယ်စားလှယ် ဦးခင်မောင်လတ်ကတော့ အားလုံးအတွက် အဆင်ပြေစေဖို့အတွက် လှေအဝင်အထွက်တွေကို စနစ်တကျနဲ့ စီစစ်တဲ့နည်းလမ်းနဲ့ ဆောင်ရွက်သင့်တယ်လို့ အကြံပြုပါတယ်။

“လုံခြုံရေးတင်းကျပ်စေချင်ရင်လည်း အဝင်အထွက် မြစ်ဝမှာ စစ်ဆေးရေးဂိတ်တွေဖွင့်လို့ရတယ်။ အထောက်အထားတွေ ပါလား၊ ဖြတ်သန်းသွားလာခွင့်တွေ ပါလား၊ ဘာကိစ္စသွားလဲ... အဲလိုမျိုးတွေ လုပ်ထားရင်ကောင်းမယ်။ အခုက နိုင်ငံတကာ အဖွဲ့အစည်း ဖြစ်နေတော့ တိုင်းပြည်လည်း ပုံရိပ်ဆိုးတာပေါ့။ ဆိုတော့ အဲလိုမျိုး စနစ်တကျနဲ့ သွားသင့်သွားထိုက်တဲ့ လှေတို့ သင်္ဘောတို့ကို သွားခွင့်ပေးလိုက်၊ အဲလိုမျိုးဆိုရင် အကုန်လုံးအတွက် အဆင်ပြေမယ်လို့ ယူဆပါတယ်”

ရသေ့တောင်မြို့နယ် အပါအဝင် ရခိုင်မြောက်ပိုင်းက မြို့နယ်အချို့မှာ တပ်မတော်နဲ့ AA အဖွဲ့အကြား တိုက်ပွဲတွေ ပြင်းထန်နေဆဲ ဖြစ်ပါတယ်။

RFA က စုဆောင်းရရှိထားတဲ့ အချက်အလက်တွေအရ ရခိုင်မြောက်ပိုင်းနဲ့ ချင်းပြည်နယ် ပလက်ဝမြို့နယ်တွေမှာ ပြီးခဲ့တဲ့ ၂၀၁၈ ဒီဇင်ဘာလကနေ မနေ့ကအထိ သေဆုံးတဲ့ အရပ်သား ၃၀၃ ဦးနဲ့ ထိခိုက်ဒဏ်ရာရသူပေါင်း ၆၇၂ ဦးအထိ ရှိနေပါတယ်။


RFA Burmese

https://www.rfa.org/burmese/news/icrc-boat-attack-10292020082551.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ