အိန္ဒိယ ကိုဗစ်ပိုးတွေ့သူ ၅ သန်းနီးပါး ရှိလာ

ကိုဗစ် ရောဂါ ရှိ၊ မရှိ စစ်ဆေးဖို့ စောင့်ဆိုင်းနေကြသူများကို အိန္ဒိယနိုင်ငံ Jammu မြို့မှာ တွေ့ရ။ (စက်တင်ဘာ ၁၅၊ ၂၀၂၀)

အာရှတလွှား ကိုရိုနာဗိုင်းရပ်စ်ကူးစက်မှုတွေ ဆက်ဖြစ်နေပြီး အိန္ဒိယမှာ ဒီကနေ့တရက်ထဲ လူနာသစ် ၈၃,၀၀၀ ကျော်နဲ့ သေဆုံးသူ ၁,၀၀၀ ကျော် ရှိတဲ့အတွက် စုစုပေါင်းကူးစက်သူ ၅,၀၀၀,၀၀၀ နီးပါးနဲ့ သေဆုံးသူ ၈၀,၀၀၀ ကျော်ရှိပါတယ်။

အမေရိကန်ပြီးရင် ကမ္ဘာမှာ ကူးစက်မှု ဒုတိယအများဆုံးဖြစ်တဲ့ အိန္ဒိယမှာပြီးခဲ့တဲ့ တပတ်အတွင်းမှာပဲ ကူးစက်သူပေါင်း ၆၀၀,၀၀၀ ကျော်ရှိတာပါ။ ရောဂါကူးစက်မှုဒဏ်ကို အဆိုးဆုံးခံနေရတဲံ Maharashtra ပြည်နယ်မှာ ကူးစက်သူ ၁,၀၀၀,၀၀၀ ကျော်ရှိပြီး တခြား Andhra Pradesh ၊ Tamil Nadu ၊ Karnataka နဲ့ Uttar Pradesh ပြည်နယ်တွေမှာလည်း ကူးစက်မှုနှုန်းက မြင့်တက်နေပါတယ်။ တချိန်ထဲမှာပဲ ပြန်ပြီးကျန်းမာလာတဲ့သူ အရေအတွက် ၇၇.၈ ရာခိုင်နှုန်းနဲ့ အိန္ဒိယက တကမ္ဘာလုံးမှာ ရောဂါကူးစက်ပြီး ပြန်ကောင်းလာတဲ့နှုန်း အများဆုံးဖြစ်တယ်လို့ Johns Hopkins တက္ကသိုလ် စာရင်းတွေအရ သိရပါတယ်။

တရုတ်နိုင်ငံမှာတော့ ပြည်ပက ပြန်လာသူတွေထဲ ရောဂါကူးစက်သူ လူနာသစ် ၈ ဦး ဒီကနေ့ အတည်ပြုခဲ့ပြီး ဒီအထဲ Ruili မြို့ကနေ နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသား ၂ ဦးပါဝင်ပါတယ်။ Ruili မြို့မှာ တနင်္လာနေ့ ညနေပိုင်းက စလို့ အသွားအလာတွေကို သီတင်းတပတ် ကန့်သတ်ထားပြီး ဒေသခံတွေကို မြို့တွင်းက ထွက်ခွါခွင့် တားမြစ်ထားပါတယ်။ မြို့နေလူထုအာလုံး ရောဂါပိုးစစ်ဆေးဖို့နဲ့ နယ်စပ်ဒေသ တရားမဝင်ကုန်သွယ်မှုတွေကို တင်းတင်းကြပ်ကြပ်ကိုင်တွယ်သွားမယ်လို့ အစိုးရက ကြေညာချက်ထုတ်ပြန်ထားပါတယ်။ တရုတ်နိုင်ငံတွင်း ပြည်တွင်း ကူးစက်မှု အသစ်မရှိတာ တစ်လ ဆက်တိုက်ရှိနေပြီဖြစ်ပါတယ်။

တောင်ကိုရီးယားမှာတော့ နေ့စဉ်ကူးစက်မှုနှုန်း ၁၀၀ ဝန်းကျင်မှာ ရှိနေလာတာ ၃ ရက်ဆက်တိုက်ရှိနေပြီဖြစ်ပါတယ်။ ဒီကနေ့ အတည်ပြုလူနာသစ် ၁၀၆ ယောက်ရှိတာကြောင့် စုစုပေါင်း ကူးစက်သူ ၂၂,၀၀၀ ကျော်နဲ့ သေဆုံးသူ ၃၆၇ ယောက်ရှိပါတယ်။ ကူးစက်မှုနှုန်း များခဲ့တဲ့ မြို့တော် Seoul နဲ့ ဒေသတဝိုက် လူချင်းခပ်ခွါခွါနေကြဖို့ စည်းကမ်းတွေကို အစိုးရက တနင်္လာနေ့က စပြီး ဖြေလျော့ပေးခဲ့ပါတယ်။

ဗွီအိုအေ (မြန်မာပိုင်း)

https://burmese.voanews.com/a/india-covid/5583971.html