ဝန်ထမ်းများ ကိုဗစ်ချေးငွေထက် အထောက်အပံ့ ပိုမျှော်လင့်



Share/Bookmark
ရန်ကုန်မြို့ရဲ့ ဘတ်စ်ကားဂိတ်တခုမှာ ရုံးသွားဖို့ ဘတ်စ်ကားစောင့်နေကြတဲ့ ရုံးဝန်ထမ်းအမျိုးသမီးတချို့။ (မေ ၂၉၊ ၂၀၂၀)

ကိုဗစ်ကပ်ရောဂါ အကြပ်အတည်းကာလအတွင်း နိုင်ငံဝန်ထမ်းတွေအတွက် ၂ လစာ ချေးငွေထုတ်ပေးဖို့ အစိုးရက ပြင်ဆင်နေပေမဲ့ ချေးငွေထက် အထောက်အပံ့ရဖို့ မျှော်လင့်သူတွေ ရှိနေတဲ့အကြောင်းပြောပြပါမယ်။ ဗွီအိုအေမြန်မာပိုင်း သတင်းထောက် မအိမ့်သန္တာထွန်းက သတင်းပေးပို့ထားပါတယ်။

ကိုဗစ်ကပ်ရောဂါ ကြုံနေရချိန်မှာ အစိုးရဝန်ထမ်းတွေ အခက်အခဲ ပြေလည်စေဖို့ ရည်ရွယ်ပြီး အစိုးရက အောက်တိုဘာလ ၁ ရက်နေ့ကစပြီး လစာ ၂ လစာ ကြိုတင်ထုတ်ပေးဖို့ စီစဉ်နေပါတယ်။ ကြိုတင်လစာတွေကိုတော့ အတိုးမဲ့ချေးငွေအဖြစ် ဆိုင်းငံ့ကာလ ၆ လနဲ့ ပြန်ဆပ်ကာလ ၁ နှစ် သတ်မှတ်ထားပါတယ်။

မော်လမြိုင်တက္ကသိုလ် ရူပဗေဒဌာန ကထိက ဒေါက်တာထွန်းထွန်းနိုင်က အကြပ်အတည်းကာလ ချေးငွေထုတ်ပေးမယ့် အစီအစဉ်ကို ကြိုဆိုတယ်လို့ ပြောပါတယ်။

“ဒါမျိုးက နာဂစ်တုန်းကလည်း ချေးခဲ့ဖူးတယ်။ နာဂစ်တုန်းကတော့ ၃ လစာ ချေးတာ၊ ခုက ဝန်ထမ်းတွေအကုန်လုံးဆိုတော့ ၂ လစာချေးတာပေါ့။ ဥပဒေမှာတော့ အဲ့လိုချေးမယ်ဆိုရင် ၃ လအထိ ချေးလို့ရတယ်။ အခုက ဝန်ထမ်းတွေကတော့ အဆင်ပြေတာပေါ့။ အားလုံးက ဝမ်းသာတယ် ကြိုဆိုကြတယ်ပေါ့။ ၂ လစာကို အောက်တိုဘာ ၁ ရက်နေ့ ထုတ်ပေးမယ်ပြောတယ်။ လူမှုဖူလုံရေးတော့ ရှိတယ်။ ဒါပေမဲ့ ကျနော်တို့ ပညာရေးဝန်ကြီးဌာန မပါဘူး။ ပိုက်ဆံရှာတဲ့ ဌာနမဟုတ်ဘဲ ပိုက်ဆံဖြုန်းတဲ့ ဌာနဖြစ်နေတော့ ကျနော်တို့ကို လူမှုဖူလုံကြေးမပေးဘူး။ အဲ့တာကို ကျနော်တို့က ဆရာများသမဂ္ဂကလည်း ရဖို့ကြိုးစားနေတယ်၊ ဒါပေမယ့် ခုချိန်ထိတော့ မရသေးဘူး။”

ဒါပေမဲ့လည်း ချေးငွေအဖြစ် ကြိုတင်လစာ ထုတ်ပေးတာထက် လူမှုဖူလုံရေးအဖြစ် ထောက်ပံ့တာမျိုးကို မျှော်လင့်နေသူတွေလည်း ရှိပါတယ်။

မြန်မာ့မီးရထားဌာန အလုပ်သမားအဖွဲ့အစည်းက ဦးဝင်းညွှန့်ကတော့ လူမှုဖူလုံကြေးထည့်ဝင်နေရတဲ့ နိုင်ငံဝန်ထမ်းတွေအတွက် ခံစားခွင့်ရှိသင့်တယ်လို့ ပြောပါတယ်။

“ဖြစ်သင့်တာကတော့ လူမှုဖူလုံရေးက လုပ်ပေးရမယ့်ဟာကို လူမှုဖူလုံရေးက ကျနော်တို့ဘက်ကို မလှည့်နိုင်ဘူး။ အခု လူမှုဖူလုံရေးမှာ ကျန်တဲ့ Former တွေက လစာမရတဲ့သူတွေကို ဦးစားပေးနေရတယ်ပေါ့နှော်။ ကျနော်တို့ ဝန်ထမ်းတွေကျတော့ လူမှုဖူလုံကြေးထည့်ဝင်ထားပေမယ့် ဘာမှလုပ်မပေးနိုင်ဘူးဖြစ်နေတယ်။ နိုင်ငံတော်အနေနဲ့က လူမှုဖူလုံရေးဌာနအနေနဲ့ နိုင်ငံတော်အနေနဲ့ဆိုတာက လူမှုဖူလုံရေးဌာနက အစိုရလက်အောက်မှာရှိတာမို့လို့၊ အဲ့တော့ အဲ့ဒီဌာန အနေနဲ့ကတော့ ကျနော်တို့ အစိုးရဝန်ထမ်းတွေကိုလည်း ကြည့်သင့်တယ်ပေါ့လေ။ အဲ့ဒါနဲ့ ပတ်သက်လို့တော့ ဝန်ထမ်းတော်တော်များများက ပြောကြတယ်။ ဒါပေမဲ့ ဝန်ထမ်းတွေဖြစ်နေတဲ့အတွက် လစာပေထားတဲ့အတွက် အစိုးရကပေးတဲ့ ၂ လစာနဲ့ ပတ်သက်လို့တော့ အစိုးရကိုတော့ ဘာမှ Complain သိပ်မရှိဘူးဗျ။”

နိုင်ငံဝန်ထမ်းတွေက လူမှုဖူလုံကြေးထည့်ဝင်ထားပေမယ့် လစာပုံမှန်ရနေတာကြောင့် လတ်တလော အခြေအနေမှာ ထောက်ပံ့ကြေးပေးဖို့ အစီအစဉ်မရှိသေးဘူးလို့ အလုပ်သမားလူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးမျိုးအောင်က ပြောပါတယ်။

“ထည့်တော့ထည့်တာပေါ့။ သူတို့မှာလည်း တချို့၊ ဒါပေမဲ့ နိုင်ငံဝန်ထမ်းတွေတော်တော်များများကတော့ ဘာပဲပြောပြော လစာရနေတာလေနော်။ နိုင်ငံတော်က ပေးတဲ့လစာရနေတာဖြစ်တဲ့အတွက် ဒါကလည်းပြောရရင်တော့ ဘယ်လိုစဉ်းစားမလဲတော့ မပြောတတ်ဘူးပေါ့နော်။”

ကိုဗစ်ကာလအတွင်း နိုင်ငံဝန်ထမ်းပေါင်း ၁,၀၀၀,၀၀၀ ကျော်အတွက် အတိုးမဲ့ ၂ လစာ ကြိုတင်ထုတ်ချေးဖို့ ကျပ်ဘီလီယံ ၅၅၀ ကျော် လျာထားထားတယ်လို့ သမ္မတရုံးပြောခွင့်ရ ဦးဇော်ဌေးက ပြောထားပါတယ်။


အိမ့်သန္တာထွန်း/VOA (Burmese)

https://burmese.voanews.com/a/myanmar-covid-assistance/5594557.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ