ကမ္ဘာအဝန်း ကိုဗစ်ကူးစက်သူ သန်း ၃၀ ကျော်ပြီ

အိန္ဒိယနိုင်ငံ Ahmedabad မြို့က ဘူတာရုံတခုမှာ COVID-19 စစ်ဆေးဖို့ တန်းစီနေတဲ့ ခရီးသွားများ။ (စက်တင်ဘာ ၁၈၊ ၂၀၂၀)

ကမ္ဘာတဝန်းမှာ ကိုရိုနာဗိုင်းရပ်စ် ကူးစက်မှုတွေဟာ အလျင်အမြန် ဆက်လက်ဖြစ်ပေါ်နေပြီး အခုဆိုရင် ကူးစက်သူ အရေအတွက်ဟာ ၃၀.၈ သန်း ကျော်သွားပြီဖြစ်တယ်လို့ Johns Hopkins တက္ကသိုလ်က ပြောလိုက်ပါတယ်။ အဲဒီထဲမှာ အမေရိကန်နိုင်ငံကတော့ ကူးစက်မှု အများဆုံးနိုင်ငံအဖြစ် ဆက်ရှိနေပြီး ကူးစက်သူ ၆.၈ သန်းလောက် ရှိပါတယ်။

အမေရိကန် အနောက်တောင်ပိုင်းနဲ့ အလယ်ပိုင်းက ပြည်နယ်တွေမှာ မကြာသေးခင်က ကူးစက်မှုတွေ တိုးလာတာဟာ ကျောင်းတွေနဲ့ တက္ကသိုလ်တွေ ပြန်ဖွင့်လိုက်တာကြောင့်လည်း ဖြစ်ပါတယ်။ ဒါ့အပြင် မော်တော်ဆိုင်ကယ်တွေနဲ့ ၄ ရက်ကြာ စီတန်းလှည့်လည်တာက မစ်ဇူရီပြည်နယ်နဲ့ တခြားပြည်နယ်တွေမှာ ကူးစက်မှုတွေ တိုးလာစေတာ ဖြစ်ပါတယ်။

အမေရိကန်နိုင်ငံပြီးရင်တော့ အိန္ဒိယနိုင်ငံက ကူးစက်သူ ၅.၄ သန်းကျော်နဲ့ ဒုတိယ၊ ဘရာဇီးလ်က ၄.၅ သန်းနဲ့ တတိယအများဆုံး ဖြစ်ပါတယ်။ ဒါ့အပြင် အမေရိကန်နိုင်ငံမှာ ဗိုင်းရပ်စ်ကြောင့် သေဆုံးသူ ၁၉၀,၀၀၀ ကျော်သွားပြီဖြစ်ပြီး တကမ္ဘာလုံးမှာတော့ သေဆုံးသူ ၉၅၇,၀၀၀ ကျော်သွားပြီဖြစ်ပါတယ်။

ဒါ့အပြင် ဥရောပနိုင်ငံတွေမှာလည်း ဗိုင်းရပ်စ်နဲ့ပတ်သက်တဲ့ ကန့်သတ်မှု အသစ်တွေကို ချမှတ်လာနေပြီး စပိန်နိုင်ငံမှာဆိုရင်လည်း မက်ဒရစ်မြို့က ဆင်းရဲတဲ့နေရာတချို့မှာ မနက်ဖြန် တနင်္လာနေ့ကစပြီး လူတွေကို အပြင်မထွက်ကြဖို့ အမိန့်ထုတ်လိုက်ပါတယ်။ အသွားအလာတွေ ကန့်သတ်လိုက်ပေမယ့်လည်း လူတွေအနေနဲ့ အလုပ်တွေကိုတော့ သွားနိုင်တယ်လို့ ဆိုပါတယ်။

ဗြိတိန်နိုင်ငံမှာတော့ ပြီးခဲ့တဲ့ သီတင်းပတ်အတွင်း ကူးစက်သူ အရေအတွက်ဟာ ၂ ဆတိုးပြီး ၆,၀၀၀ လောက်ရှိခဲ့တာကြောင့် တနိုင်ငံလုံး အတိုင်းအတာနဲ့ လူတွေကို အပြင်မထွက်ဖို့ အမိန့်ကို ပြန်ထုတ်ဖို့ စဉ်းစားနေတယ်လို့ ပြောပါတယ်။ ဒါ့အပြင် လာမယ့် စက်တင်ဘာ ၂၈ ရက်ကစပြီး ဗိုင်းရပ်စ်ကူးစက်ခံထားရပြီး ကိုယ့်ဘာသာကိုယ် အိမ်ထဲမှာ သီးသန့်ခွဲနေဖို့ ပျက်ကွက်တဲ့သူတွေကို စတာလင်ပေါင် ၁၀,၀၀၀ ဒဏ်ငွေရိုက်သွားမယ်လို့ ပြောလိုက်ပါတယ်။


 ဗွီအိုအေ (မြန်မာပိုင်း)

https://burmese.voanews.com/a/covid-infected-world-wide/5590519.html

ကမ္ဘာအဝန်း ကိုဗစ်ကူးစက်သူ သန်း ၃၀ ကျော်ပြီ ကမ္ဘာအဝန်း ကိုဗစ်ကူးစက်သူ သန်း ၃၀ ကျော်ပြီ Reviewed by THITHTOOLWIN on 00:03 Rating: 5

No comments:

Powered by Blogger.