ငယ်ရွယ်သူတွေပါ ကိုဗစ်ကြောင့် သေဆုံးလာတဲ့အတွက် ပိုပြီး သတိထားဖို့လို

ရန်ကုန်မြို့ လှိုင်သာယာမြို့နယ်မှာ တွေ့ရတဲ့ မြင်ကွင်း။ (မေ ၁၆၊ ၂၀၂၀)

မြန်မာနိုင်ငံမှာ ကိုဗစ်ရောဂါကြောင့် သေဆုံးသူတွေ တိုးလာနေပြီး ရောဂါအခံမရှိသူတွေ၊ အသက်ငယ်ရွယ်သူတွေပါ ပါဝင်လာတာကြောင့် အရင်ထက်ပိုပြီး ကူးစက်မှုအန္တရာယ်ကို သတိထားကြဖို့ ကျန်းမာရေးပညာရှင်တွေ တိုက်တွန်းနေတဲ့အကြောင်း ပြောပြပါမယ်။ ဒီအကြောင်းကို ဗွီအိုအေမြန်မာပိုင်း သတင်းထောက်စုစုက တင်ဆက်ပေးမှာပါ။

အသက် ၁၃နှစ်အရွယ် မိန်းကလေးငယ်တဦး အပါအဝင် ရောဂါအခံမရှိတဲ့သူတွေပါ ကိုဗစ်ရောဂါနဲ့ သေဆုံးမှုတွေ ရှိနေတာကြောင့် ကူးစက်နိုင်တဲ့ အန္တရာယ်ကို ကျန်းမာရေးပညာရှင်တွေ သတိပေးနေတာပါ။ အစောပိုင်းမှာ ရောဂါလက္ခဏာမပြင်းထန်ပေမဲ့ ရုတ်တရက် သေဆုံးတဲ့အထိ ကြုံရနိုင်တာကြောင့် မပေါ့ဆဖို့လည်း ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက ပြောပါတယ်။

“အခုက နောက်ခံရောဂါရှိတဲ့သူတွေမှာတင်သေဆုံးတာ မဟုတ်ပါဘူး။ မရှိတဲ့သူတွေလည်း သေဆုံးနေပါတယ်။ အသက်ကလည်း ကြီးမယ်၊ နောက်ခံရောဂါကလည်း ရှိမယ်ဆိုရင်တော့ သေဆုံးမှုကပိုပြီးတော့ အဆများမယ်ဆိုတာ သိနိုင်မှာဖြစ်ပါတယ်။ သို့သော် နောက်ခံရောဂါမရှိပဲနဲ့ လူကောင်းကြီးကလည်း သေနိုင်တယ်ဆိုတာလည်း သိစေချင်ပါတယ်။ နောက်တခုက သူ့ရဲ့ထူးခြားချက်က တခြားရောဂါတွေနဲ့မတူဘဲ သူဟာဆိုလို့ရှိရင် ရောဂါလက္ခဏာသိပ်အဆိုးကြီးတော့ မဟုတ်ဘူးပေါ့နော်။ Moderate လောက်ရှိပြီးတော့ အဲဒီအချိန်ကနေပြီးတော့ ချက်ချင်းလက်ငင်းပဲ ရောဂါလက္ခဏာဆိုးပြီးတော့ အသက်သေဆုံးတဲ့အထိ ဖြစ်နိုင်တယ်ဆိုတာ ပြည်သူတွေကို သတိပြုစေချင်ပါတယ်။ လက်ရှိမှာဆိုရင် ICU မှာ လူနာအယောက် ၃၀ လောက်ရှိပါတယ်။"

ကျန်းမာရေးနဲ့ အားကစားဝန်ကြီးဌာနရဲ့ ဒီနေ့မွန်းလွဲပိုင်းအထိ ထုတ်ပြန်ချက်တွေအရ နောက်ထပ် သေဆုံးသူ ၁၁ ဦး အပါအဝင် စုစုပေါင်း ၅၇ ဦးနဲ့ ရောဂါကူးစက်ခံရသူ ၃,၈၀၀ ကျော် ရှိနေပါတယ်။ ရောဂါပျောက်ကင်းလို့ ဆေးရုံဆင်းခွင့်ရသူ ၉၀၀ ကျော်ရှိတယ် ဆိုပေမဲ့ ဒါဟာ ပိုးတွေ့လူနာ အားလုံးရဲ့ ၂၀ ရာခိုင်နှုန်းကျော်သာ ရှိနေပါတယ်။ ရောဂါပိုး ကင်းစင်သွားရင်တောင်မှ ပြန်လည်ထူထောင်ဖို့ အချိန်ယူရတာကြောင့် ကြိုတင်ကာကွယ်ဖို့ အရေးကြီးကြောင်းလည်း ဒေါက်တာခင်ခင်ကြီးက သတိပေးထားပါတယ်။

“လူငယ်တွေဟာ လက်ရှိမှာဆိုရင် ကိုဗစ်ကနေပြီးတော့ ရှောင်လွှဲလို့မရပါဘူး။ ကိုဗစ်ကူးစက်နိုင်ပါတယ်။ ဖြစ်ပွားရင်လည်း သေဆုံးတဲ့အထိ ဖြစ်နိုင်ပါတယ်။ ICU ထဲလည်းရောက်ပြီးတော့ အသက်သေတဲ့အထိလည်း ဖြစ်နိုင်တယ်ဆိုပေမဲ့လို့ အများစုကတော့ သိပ်ဆိုးရွားပြင်းထန်တဲ့ အဆင့်တော့မရှိပါဘူး။ သို့သော် ကိုယ်သာဆိုးရွားပြင်းထန်းစွာ မခံစားရပေမယ့်လို့ ကိုယ့်မိသားစု၊ ကိုယ့်အဖိုးအဖွားတွေဆီ ကူးစက်စေတယ်ဆိုရင် သူတို့ဟာ ဒီ COVID- 19 ရဲ့တိုက်ခိုက်မှုကို မတွန်းလှန်နိုင်ပါဘူး။ သူတို့တော်တော်ကြီးကို ပြင်းပြင်းထန်ထန် ခံစားရပါတယ်။ ကောင်းသွားရင်တောင်မှ ဒါကိုရက်ကြာကြာနဲ့ကုပြီးတော့မှ ကောင်းလာတဲ့အခြေအနေဖြစ်ပါတယ်။"

ဆေးရုံတွေမှာ ရောဂါပိုးရှိ၊ မရှိစောင့်ကြည့်စစ်ဆေးနေတဲ့ဝန်ကို လျှော့ချဖို့ ရည်ရွယ်ပြီး ဆောင်ရွက်နေတဲ့ ရန်ကုန်တိုင်း အင်းစိန်ဖျားနာကု အခမဲ့ဆေးခန်းမှာလည်း ၂ ရက်အတွင်း စစ်ဆေးသူလူနာ ၅၂ ဦးထဲက တဝက်ကျော်မှာ ကူးစက်မှုရှိကြောင်း အတည်ပြုထားပါတယ်။ ကပ်ရောဂါကြောင့် ပုဂ္ဂလိက အထွေထွေရောဂါကု ဆေးခန်းတွေကို ပိတ်ထားရသလို၊ အတည်ပြုလူနာတွေနဲ့ ထိတွေ့မှုရှိတာတွေကြောင့် ဆေးရုံတချို့ ပိတ်ထားရပြီး တချို့နေရာတွေမှာ အခမဲ့ဆေးကုခန်းတွေဆီ လာရောက်ပြသသူတွေလည်း တိုးလာနေပါတယ်။

ကျန်းမာရေးဝန်ကြီးဌာနကတော့ မနေ့ကပဲ ကျန်းမာရေးဝန်ထမ်းတွေအတွက် ကာကွယ်ရေးဆိုင်ရာ လမ်းညွှန်ချက်တွေ ထုတ်ပြန်ခဲ့တာပါ။ ဒါပေမဲ့လည်း လမ်းညွှန်ချက်မှာ ပုဂ္ဂလိက ဆေးခန်းတွေအတွက် မပါဝင်သေးတာကြောင့် ညွှန်ကြားချက်တွေ ထုတ်ပြန်စေချင်တယ်လို့ ရန်ကုန်တိုင်းဖျားနာကု အခမဲ့ဆေးခန်းတာဝန်ခံ ဒေါက်တာကျော်မင်းထွန်းက ပြောပါတယ်။

“မနေ့က Protocol ထွက်လာတော့ ဪ ကျနော်တို့က ပျော်သွားတာပေါ့နော်။ ဒီဆေးရုံ ဆေးခန်းတွေအတွက်များလားပေါ့။ ကြည့်လိုက်တော့ ဘယ်ဟုတ်မလဲ Government Section အတွက်ကို ချပေးထားတာ။ အခုက လူနာတယောက် Positive ထွက်တာနဲ့ ဆေးခန်းပိတ်၊ ဆရာဝန်တွေနဲ့ ဝန်ထမ်းတွေ Q သွား အဲလိုရှိတော့ ဘယ်သူက ဖွင့်ရဲတော့မှာလဲ။ အဲဒါကြောင့် ကျနော်တို့က အဲလိုအနေအထားမျိုးကို ဖြစ်နိုင်ရင် မြန်မြန်လေးဖြေရှင်းစေချင်တယ်။ ပြီးရင် Protocol တခု မြန်မြန်ချပေးစေချင်တယ်။ ပြီးတော့ အခုပိတ်ထားတဲ့ဆေးခန်းတွေဆို ရွှေလမင်းဆိုလည်း ပိတ်၊ ဗဟိုရ်စည်ဆိုလည်းပိတ် တကယ်တော့ အဲဒါက မဟုတ်သေးဘူး။ ဆေးခန်းလာပြတဲ့ လူနာက Positive ထွက်ကောင်းထွက်နိုင်တယ်။ ထွက်ရင်လည်း ဆေးဖြန်း ပြီးရင် ဆက်ကြည့်။ လူနာနဲ့ Contact ရှိတဲ့ဆရာဝန် မနေ့ကထုတ်ပြန်ချက်လို Level 2 ဝတ်ထားတယ်ဆို Swab ယူ။ Negative ဆို ဆက်ကု လူနာကိုဆက်ကြည့် အဲလိုလုပ်ပေးရမှာပေါ့နော်။"

ကပ်ရောဂါ ကူးစက်မှုတွေ တိုးလာနေတာနဲ့အမျှ ကျန်းမာရေးအတွက် လိုအပ်ချက်တွေနဲ့ စိန်ခေါ်မှုတွေလည်း တိုးလာနေပါတယ်။ ဒီလိုအခြေအနေမျိုးမှာ ပုဂ္ဂလိက ကျန်းမာရေးစောင့်ရှောက်မှု လုပ်ငန်းတွေရဲ့ အခန်းကဏ္ဍကိုလည်း ထည့်သွင်းအသုံးချဖို့ လိုတယ်လို့ ဒေါက်တာကျော်မင်းထွန်းက တိုက်တွန်းပါတယ်။

"Private Section အနေနဲ့ကို အခုက အဲလိုဖြစ်နေတယ်။ ခံတပ်က ပျက်နေတော့ ပျက်စီးသွားတဲ့ပုံစံဖြစ်နေတော့ ဖြစ်နိုင်ရင် အဲဒီခံတပ်ကို မြန်မြန်လေးတည်ဆောက်စေချင်တယ်။ အဲဒီ ခံတပ်ပိတ်တော့မှ အပေါ်မှာ Workload မပိတော့မှာ။ မပိတော့မှ ကျနော်တို့တခြားလုပ်ရမယ့်အလုပ်တွေ ဆက်လုပ်ရမှာ။ အခုက လူနာတွေက ဆီးချိုတွေတက်၊ သွေးတွေတိုး အဲလိုဖြစ်နေတယ်။ လူနာတွေက ပြီးရင် ဆေးရုံကိုမလာချင်ကြဘူး။ ရှိတဲ့ဆေးနဲ့မှေးသောက် ပြီးရင် စပ်ဆေးဆိုင်ရောက်သွား စပ်ဆေးတွေသောက်။ အဲလိုဖြစ်နေတော့ မနေ့ကချပေးသလို GP တွေအတွက်ကို Protocol အမြန်ချပေးစေချင်တယ်။ နောက် ဆေးခန်း၊ ဆေးရုံ၊ ဒီ Private Section အနေနဲ့လုပ်ပြီးတော့ မြန်မြန်လေးဖွင့်ပြီးတော့ လူနာတွေကိုဆက်ပြီး ကြည့်စေချင်တယ်ပေါ့နော်။"

တကျော့ပြန် ရောဂါကူးစက်မှုတွေ စတင်ဖြစ်ပွားခဲ့တဲ့ ရခိုင်ပြည်နယ်မှာ ညမထွက်ရအမိန့်နဲ့ တတ်နိုင်သမျှ အိမ်ပြင်မထွက်ဖို့ အမိန့်ထုတ်ထားသလို အခုအခါ ကူးစက်မှုအများဆုံးဖြစ်နေတဲ့ ရန်ကုန်တိုင်းအတွင်း နေရာတော်တော်များများမှာလည်း မလိုအပ်ရင် အပြင်မသွားဖို့ ညွှန်ကြားချက်တွေ ထုတ်ပြန်ထားပါတယ်။

စုစု/VOA (Burmese)

https://burmese.voanews.com/a/myanmar-covid/5586985.html