ချင်းပြည်နယ်မှာ ပြည်တွင်း ကူးစက်ခံရတဲ့ ကိုဗစ် လူနာ ၃ဦးတွေ့

ချင်းပြည်နယ် တောင်ပိုင်းမင်းတပ်မြို့မှာ ပြည်တွင်းကူးစက်မှုတွေ စတွေ့

ချင်းပြည်နယ်တောင်ပိုင်း မင်းတပ်မြို့မှာ ပြည်တွင်း ကိုဗစ် ဒုတိယလှိုင်းရဲ့ ကူးစက်မှုလို့ ယူဆရတဲ့ ပထမဆုံး ကိုဗစ် လူနာ ၃ဦး ပြန်တွေ့လာရပါတယ်။

ကျန်းမာရေးနဲ့ အားကစားဝန်ကြီးဌာန ရဲ့ ထုတ်ပြန်ချက်အရ ပြည်တွင်း ကူးစက်မှု ဖြစ်တဲ့ အတည်ပြုလူနာ ၃ ဦးကို မင်းတပ်မြို့မှာ စက်တင်ဘာလ၂၀ ရက်နေ့ကစပြီး တွေ့ခဲ့တာလည်း ဖြစ်ပါတယ်။

ဒီ အတည်ပြုလူနာတွေဟာ မင်းတပ်မြို့က မိသားစုဝင် ၃ ဦးဖြစ်ပြီး ခရီးသွား ရာဇဝင်မရှိတာကြောင့် သူတို့ ဘယ်ကနေ ကူးစက်ခံရတယ် ဆိုတာ အတည်မပြုနိုင်သေးကြောင်း မင်းတပ်မြို့နယ်က ဆေးရုံက ဒေါက်တာဇော်ဝင်းနိုင်က ဘီဘီစီကို ပြောပါတယ်။

သူတို့ကို လက်ရှိ မင်းတပ်မြို့ ပြည်သူဆေးရုံကြီးမှာ ကုသမှုပေးနေကြောင်း သူတို့ ထိတွေ့ ဆက်ဆံမှုရှိခဲ့သူ ၄၀ဦးခန့်ကို တို့ဖတ်နမူနာ ယူပြီးစစ်ဆေးမှုတွေ ပြုလုပ်ထားကြောင်းလည်း ဒေါက်တာ ဇော်ဝင်းနိုင်က ပြောပါတယ်။

ချင်းပြည်နယ်မှာ ကူးစက်မှုတွေကာကွယ်ဖို့ အတွက် အသိပညာပေးလုပ်ငန်းတွေဆောင်ရွှက်

ချင်းပြည်နယ်ဟာ မြန်မာနိုင်ငံက ပထမဆုံး ကိုဗစ် လူနာ တွေ့ရှိခဲ့တာ ဖြစ်ပြီးတော့ ကျန်းမာရေးနဲ့ အားကစားဝန်ကြီးဌာန ရဲ့ ထုတ်ပြန်ချက်အရ ကိုရိုနာဗိုင်းရပ်စ် မြန်မာနိုင်ငံမှာ စတင် ကူးစက်ခံရတဲ့ အချိန်ကနေ စက်တင်ဘာလ ၂၁ ရက်နေ့ အထိ စုစုပေါင်း၂၁ ဦးကူးစက်ခံထားရပါတယ်။

ချင်းပြည်နယ်က ကူးစက်ခံထားရသူတွေကတော့ တီးတိန်က ၈ဦး၊ တွန်းဇံက ၇ ဦး ၊ဟားခါးက တစ်ဦး၊ ထန်တလန်က တစ်ဦး ၊မင်းတပ်က ၄ ဦး နဲ့စုစုပေါင်း ၂၁ ဦး ဖြစ်ပါတယ်။

မင်းတပ်မြို့က ပထမဆုံး ကိုဗစ်လူနာကတော့ လူနာအမှတ် ၂၃၂ ဖြစ်ပြီး၊သူကိုတော့ ဟားခါးဆေးရံကို ပို့ပြီး ကုသမှု ပေးခဲ့တာဖြစ်ပါတယ်။

မင်းတပ်မြို့ဆေးရုံ အနေနဲ့ အခု ကိုရိုနာဗိုင်းရပ်စ်ပိုးတွေ့သူ ၃ ဦးကို ပထမဆုံး ကုသပေးနေတာလည်း ဖြစ်ပါတယ်။

နယ်စပ်က အိန္ဒိယ ပြန်တွေ ပြန်လက်ခံခဲ့ပေမဲ့ ဒီရက်ပိုင်း ပိုးမတွေ့

မင်းတပ်မြို့မှာ တွေ့တဲ့ ကူးစက်ခံရတဲ့ ကိုဗစ် လူနာ ၃ ဦး ကတော့ မိသားစု တစ်စုက ၃ဦး ဖြစ်ပြီးတော့ ရန်ကုန်က ပြန်လာတဲ့သူ တစ်ဦးက တစ်ဆင့် ကူးစက်ခံရတာဖြစ်တယ်လို့ ယူဆရကြောင်းလည်း ဒေါက်တာဇော်ဝင်းနိုင် ကပြောပါတယ်။

"မိသားစုလိုက် ၉ လ ရယ်၊ ၂ နှစ် ရယ်၊ လင်မယားနှစ်ယောက်ရယ်၊ မိသားစုလေးယောက်ထဲမှာ ၃ ‌ယောက် မှာ တွေ့တယ်၊ ၉ လ သား ကလေးက မတွေ့ဘူး"လို့သူကပြောပါတယ်။

လူနာက အနံ့မရလို့ ဖျားတယ်၊နှာစေး၊ ချောင်းဆိုးတယ်ဆိုပြီးလာဆက်သွယ်လို့ ကွာရန်တင်းထားတာပြီး စောင့်ကြည့်တာကနေ ပိုးတွေ့တာပါလို့လည်း ဒေါက်တာဇော်ဝင်းနိုင်က ပြောပါတယ်။

ချင်းပြည်နယ်မှာ အခုလို ပြည်တွင်း ကူးစက်မှုကနေ ထပ်မံ ကူးစက်ခံရတဲ့ လူနာ အရေအတွက်ဟာ ထပ်တိုးလာဖို့ အလားလာရှိတယ်လို့လည်း ဒေါက်တာဇော်ဝင်းနိုင်က ပြောပါတယ်။

လက်ရှိမှာတော့ ကူးစက်ခံရတဲ့ မိသားစုတွေနဲ့ အတူ ၉ လ ကလေးကို အတူထားမယ်လို့ ဆုံးဖြတ်ပြီး မင်းတပ်မြို့ ဆေးရုံမှာပဲ ဆက်ထားတယ်လို့ လည်းသိရပါတယ်။

ဒါအပြင် မင်းတပ် အထက ၁ နဲ့ အထက ၃ ‌၊ ရွှေနှလုံးတော် ကက်သလစ် ဘုရားကျောင်းတို့ကို ကွာရန်တင်းစင်တာအဖြစ်ထားရှိပြီး ကူးစက်ခံရသူနဲ့ထိတွေ့ခဲ့သူတွေကို အသွားအလာ ကန့်သတ်ထားရှိတယ်လို့လည်း ချင်းပြည်နယ် အစိုးရအဖွဲ့ ထံကနေ သိရပါတယ်။

ဒါ့အပြင် ကွာရန်တင်း ဝင်ရမယ့်သူ အရေအတွက် များလာလို့ရှိရင်တော့ မင်းတပ် အထက ၂ နဲ့ အိမ်တွင်းမှုသိပ္ပံကျောင်းတွေကို ကွာရန်တင်းစင်တာတွေအဖြစ် ဆက်ထားသွားမယ်လို့လည်း ချင်းပြည်နယ် လူမှု‌ရေးဝန်ကြီး ပေါင်လွန်မင့်ထန်က ပြောပါတယ်။

ဒီအတည်ပြုလူနာတွေ မတွေ့ခင် အထိ ချင်းပြည်နယ်မှာ ပြည်ပက နယ်စပ်က အိန္ဒိယ ပြန်တွေ ပြန်လက်ခံနေပေမဲ့ ပိုးတွေ့သူ မရှိဘဲ၊ စောင့်ကြည့် စခန်းတွေမှာပဲ လူရှိပြီး ကိုဗစ် လူနာလည်း ချင်းပြည်နယ်က ဆေးရုံတွေပေါ်မှာ မရှိဖြစ်နေရာက နေ အခု တစ်ဖန် ပြည်တွင်းကူးစက်မှု ပြန်တွေ့လာရတာလည်း ဖြစ်ပါတယ်။

မင်းတပ်မှာ ပိုးတွေ့သူ စုစုပေါင်း ၄ဦးရှိပြီ


BBC Burmese

https://www.bbc.com/burmese/burma-54252966

ကိုဗစ် ကုသထိန်းချုပ်ရေး ကျန်းမာရေး ဝန်ကြီးဟောင်းပါဝင်တဲ့ နည်းပညာကူညီရေး အဖွဲ့ဖွဲ့

ဆေးဖြန်း

မြန်မာနိုင်ငံမှာ ကိုဗစ် ပိုးကူးစက်သူဦးရေ ဆက်တိုက် မြင့်မားလာနေချိန်မှာ အရင် ကျန်းမာရေး ဝန်ကြီးဟောင်း ပါမောက္ခ ဒေါက်တာကျော်မြင့် ဦးဆောင်ပြီး နည်းပညာပိုင်းဆိုင်ရာ အကူအညီပေးရေး အဖွဲ့တဖွဲ့ကို အစိုးရက ထပ်မံဖွဲ့စည်းလိုက်ပါတယ်။

ဒီအဖွဲ့မှာ ကုသရေး၊ ဆေးရုံတွေ စံမံခန့်ခွဲရေး၊ ပြည်သူ့ကျန်းမာရေး၊ ကူးစက်နှိမ်နင်းရေး အစရှိတဲ့ ကျွမ်းကျင် အငြိမ်းစား ပါမောက္ခကြီးတွေ ပါဝင်ပါတယ်။

ဒါ့အပြင် ရက်ပိုင်းအတွင်းမှာပဲ ကိုဗစ် ကုသရေးစင်တာတွေ အရေးပေါ် တိုးချဲ့တည်ဆောက်ထားပြီး တခြားပြည်နယ်နဲ့တိုင်းတွေက ဆေးဘက်ဆိုင်ရာ ဝန်ထမ်းတွေလည်း ကိုဗစ်လူနာ အများဆုံး တွေ့ရတဲ့ ရန်ကုန်တိုင်းကို အားဖြည့်ဖို့ ရောက်လာပါတယ်။

အဲဒီ နည်းပညာပိုင်းဆိုင်ရာ အကူအညီပေးရေး အဖွဲ့ရဲ့ လုပ်ဆောင်ချက်တွေနဲ့ ပတ်သက်လို့ ကျန်းမာရေး ဝန်ကြီးဌာန ပြောခွင့်ရသူ ညွှန်ကြားရေးမှူး ဒေါက်တာ သန်းနိုင်စိုးက ဘီဘီစီကို အခုလို ပြောပါတယ်။

"ပင်စင်အငြိမ်းစား ယူထားပေမယ့် အရေးကြုံရင် သူတို့မှာရှိတဲ့ အင်မတန်မှ အဖိုးတန်လှတဲ့ ပညာတွေ၊ အတွေ့အကြုံတွေကို အသုံးပြုပြီးတော့ နည်းပညာပိုင်းဆိုင်ရာ ကျွမ်းကျင်မှုပိုင်းဆိုင်ရာမှာ အမျိုးသားအဆင့် ကိုဗစ်ကော်မတီကို လိုအပ်တဲ့ အကြံဉာဏ်တွေ အများကြီး ပေးနိုင်လို့ တကယ့်ကို အဖိုးတန်တဲ့ ကျွမ်းကျင်မှုပိုင်းဆိုင်ရာ အဖွဲ့ကြီး ဖြစ်တယ်" လို့ ဆိုပါတယ်။

ကျွမ်းကျင် ပညာရှင် အငြိမ်းစား ပါမောက္ခကြီးတွေဘက်ကလည်း လိုအပ်တဲ့ အကူအညီတွေ ပံပိုးပေးနေသလို နိုင်ငံတဝန်း ဆေးရုံတွေနဲ့ ကွာရန်တင်း စင်တာတွေ လုံလုံလောက်လောက် ရှိဖို့၊ လိုအပ်တဲ့ ဝန်ထမ်းအရေအတွက်နဲ့ စေတနာ့ဝန်ထမ်း ဦးရေ လုံလောက်ဖို့ ရှိဖို့ အပါအဝင် ဆေးဝါးနဲ့ ဆေးပစ္စည်းတွေ လုံလောက်မှု ရှိဖို့ကိုလည်း သက်ဆိုင်ရာ ဝန်ကြီးဌာနတွေဘက်က ဆောင်ရွက်နေတယ်လို့ ကိုဗစ် ၁၉ ကာကွယ်ထိန်းချုပ်ကုသရေး အမျိုးသားအဆင့် ဗဟိုကော်မတီ ဥက္ကဋ္ဌ ဒေါ်အောင်ဆန်းစုကြည်က ပြောကြားထားပါတယ်။

ကိုဗစ်အတည်ပြုလူနာဦးရေနဲ့ သေဆုံးသူ ဦးရေ တဖြည်းဖြည်း တိုးလာနေပေမယ့်လည်း ကုသဆောင်ရွက်မှုအပိုင်းမှာတော့ နိုင်နင်းမှု ရှိတယ်လို့ ဒေါက်တာ သန်းနိုင်စိုးက ဆိုပါတယ်။

"လက်ရှိအခြေအနေအထားကတော့ စိုးရိမ်ရပါတယ်။ စိုးရိမ်လို့လည်း semi-lockdown တို့ Stay At Home တတ်နိုင်သမျှ အိမ်မှာပဲ နေပေးကြပါ။ အိမ်မှာ နေမှသာလျှင် ကူးစက်ခံရမှုတွေက ပြတ်တောက်မှာပေါ့။ မနိုင်မနင်းဖြစ်တဲ့ အခြေအနေတော့ မရှိသေးဘူးဗျ။ ရုန်းကန်ရတဲ့ အခြေအနေတော့ ရှိတာပေါ့နော်။ နဂိုကနဲ့စာရင် workload က ဆယ်ဆလောက်များလာတယ်။ ဒီ workload ကို နိုင်ဖို့အတွက်က

နံပါတ်၁ အရေးကြီးဆုံးက လူနာတွေကို ကုသစောင့်ရှောက်မှုတွေ ပေးရင်းနဲ့ ကူးစက် မခံရဖို့ အဓိကပေါ့။ ဒါကတော့ အရေးကြီးဆုံး ဆောင်ရွက်ရတာပေါ့နော်။

နံပါတ် ၂ ကတော့ လူနာများလာတာနဲ့အမျှ လူတွေတွေကို ခွဲခြားပြီး ကုသပေးနိုင်မယ့်နေရာ isolation and treatment centre ပေါ့။"

ကျန်းမာရေးဝန်ကြီးဌာနအနေနဲ့ အိမ်ပြင်မထွက်ရစည်းကမ်းတွေကို ချမှတ်တာ၊ ကူးစက်ခံရသူတွေက တဆင့်ထိတွေ့မှုတွေကိုလိုက်လံဖော်ထုတ်ကာ ကွင်းဆက်ဖြတ်တာ၊ လိုအပ်တဲ နေရာတွေကို အုပ်ချုပ်ရေး အဖွဲ့တွေနဲ့ ပူးပေါင်းလုပ်ဆောင်တာစတဲ့ အရာတွေကိုနိုင်နိုင်နင်းနင်းလုပ်ဆောင်နေတယ်လို့လည်း ဒေါက်တာသန်းနိုင်စိုးကပြောပါတယ်။

လက်ရှိ ကမ္ဘာ့တဝန်း ပျံ့နှံ့နေတဲ့ ကိုရိုနာဗိုင်းရပ်စ်နဲ့ ပတ်သက်ပြီး မြန်မာအစိုးရက ကျပ် ဘီလျံ တထောင်ကျော် အသုံးပြုသွားမယ်လို့ နိုင်ငံတော် အတိုင်ပင်ခံ ဒေါ်အောင်ဆန်းစုကြည်က စက်တင်ဘာလ ၂၁ ရက်နေ့မှာ ပြည်သူတွေကို မိန့်ခွန်းပြောကြားထားပါတယ်။

တကယ်လို့ ကိုဗစ်ကာကွယ်ဆေးတွေ တခြား ကမ္ဘာ့နိုင်ငံတွေက ထုတ်လာရင်လည်း အချိန်နဲ့ တစ်ပြေးညီ မြန်မာနိုင်ငံကို အမြန်ဆုံး ရောက်ဖို့ကိုလည်း အစိုးရအနေနဲ့ ဆောင်ရွက်နေတယ်လို့လည်း ဆိုပါတယ်။

ဒါကြောင့် ပြည်သူတွေ အနေနဲ့ စိတ်ဓာတ်မကျကြဖို့နဲ့ ကျန်းမာရေးဝန်ကြီးဌာနက ထုတ်ပြန်ထားတဲ့ စည်းကမ်းတွေကို လိုက်နာကြဖို့ ဒေါ်အောင်ဆန်းစုကြည်က တိုက်တွန်းထားပါတယ်။

မြန်မာနိုင်ငံမှာ ကိုရိုနာဗိုင်းရပ်စ်ကြောင့် သေဆုံးသူဦးရေ ၁၁၅ ဦးရှိပြီ ဖြစ်ပြီး ဗိုင်းရပ်စ်ပိုး ကူးစက်ခံထားရသူဦးရေကလည်း ၆,၇၄၃ ရှိပြီလို့ ကျန်းမာရေးနဲ့ အားကစားဝန်ကြီးဌာနက စက်တင်ဘာ ၂၂ ရက် ည ၈ နာရီ ထုတ်ပြန်ချက်မှာ ဖော်ပြထားပါတယ်။

ကိုဗစ်အတည်ပြုလူနာ တနေ့တခြား တိုးလာနေတဲ့အတွက် ကိုကိုးကျွန်းမြို့နယ်ကလွဲလို့ ရန်ကုန်တိုင်းအတွင်းက မြို့နယ်တွေအားလုံးမှာ ပြည်သူတွေ အိမ်မှာပဲ နေကြဖို့ တင်းကြပ်တဲ့ စည်းမျဉ်းတွေ ချမှတ်ထားခဲ့ပေမယ့် စက်တင်ဘာလ ၂၁ ရက်နေ့မှာ ပိုးတွေ့ရှိသူဦးရေ ၆၆၅ ဦးအထိ စံချိန်တင် တွေ့ရှိခဲ့တာပါ။

အဲဒီထဲက ကူးစက်ခံရသူ အများစုကလည်း ရန်ကုန်တိုင်းက ဖြစ်ပါတယ်။

ဒါ့အပြင် ပိုးကူးစက်ခံရသူ ဦးရေ မြင့်တက်နေတဲ့ ရန်ကုန်တိုင်းအတွင်း ဆေးရုံကုတင်တိုးဖို့အတွက်ကိုလည်း ဒဂုံတောင်အောင်မြင့်မိုရ်အိမ်ရာ၊ သုဝဏ္ဏဘောလုံးကွင်း အစရှိတဲ့နေရာတွေမှာ ထပ်မံတိုးချဲ့မှုတွေကို လုပ်ဆောင်နေပါတယ်။

သုဝဏ္ဏ မြက်ခင်းတု အားကစားကွင်းမှာ တိုးချဲ့ တည်ဆောက်လိုက်တဲ့ ကိုဗစ်-၁၉ ရောဂါ ကုသရေးဌာန(သုဝဏ္ဏ)


BBC Burmese

https://www.bbc.com/burmese/burma-54251227

 

ကိုရိုနာဗိုင်းရပ်စ် ကူးစက်မှု ရန်ကုန်က စက်ရုံတချို့ကို ရောက်ရှိ

ရန်ကုန်မြို့က အထည်ချုပ်စက်ရုံ အလုပ်သမားတချို့ကို တွေ့ရစဉ်

Photo: Aung Thain Kha/RFA

ကိုရိုနာဗိုင်းရပ်စ် ကူးစက်မှုဟာ ရန်ကုန်က အလုပ်သမား ရာနဲ့ချီရှိတဲ့ စက်ရုံတွေထဲအထိ ရောက်လာတယ်လို့ မြန်မာနိုင်ငံလုံးဆိုင်ရာ အလုပ်သမား သမဂ္ဂများအဖွဲ့ချုပ် (CTUM) လက်ထောက် အထွေထွေအတွင်းရေးမှူး ဒေါ်ဖြိုးစန္ဒာစိုးက ပြောပါတယ်။

အများစုကတော့ လှိုင်သာယာမြို့နယ်က စက်ရုံတွေ ဖြစ်တယ်လို့  ဆိုပါတယ်။

CTUM အဖွဲ့ဝင်တွေဟာ သစ်ထုတ်လုပ်ရေး၊ စက်မှုကုန်ထုတ်နဲ့ အစားအသောက်ထုတ်လုပ်ရေး စက်ရုံတွေ အပါအဝင် ရန်ကုန်တိုင်းထဲက  စက်ရုံပေါင်း တစ်ရာကျော်မှာ လုပ်ကိုင်နေတာပါ။

ကူးစက်ခံထားရတာ အဲဒီထဲမှာ စက်ရုံ ၁၆ ရုံ ရှိပြီး တစ်ရုံကို တစ်ယောက်ကနေ နှစ်ယောက် ပိုးကူးစက် ခံရထားတယ်၊ အသွားအလာကန့်သတ် စောင့်ကြည့်ရေး စင်တာတွေမှာ စောင့်ကြည့်ခံနေရသူတွေ ရာနဲ့ချီ ရှိနေတယ်လို့ သိရပါတယ်။

ဒီအထဲမှာ စက်ရုံတစ်ရုံကို လုံးဝပိတ်ထားပြီး ကျန်တဲ့စက်ရုံတွေကတော့ ပုံမှန်အတိုင်း ဆက်လက် လည်ပတ်နေကြသလို အဲဒီအထဲမှာမှ စက်ရုံ ငါးရုံလောက်ကပဲ ကျန်းမာရေးဌာန၊ အလုပ်သမားအဖွဲ့တွေနဲ့ ပူးပေါင်းဆောင်ရွက်တယ်လို့ ဒေါ်ဖြိုးစန္ဒာစိုးက ပြောပါတယ်။

CTUM အနေနဲ့တော့ ပူးပေါင်းဆောင်ရွက်ခွင့်ပေးတဲ့ စက်ရုံတွေမှာ ပိုးသတ်ဆေးဖျန်းတာ၊ နေထိုင်တဲ့ အဆောင်တွေအထိပါ ဆေးဖျန်းတာတွေ ဆောင်ရွက်ပေးတဲ့အပြင် ထိစပ်သူတွေကို ရှာဖွေဖော်ထုတ်ပေးတာတွေ ကူညီပေးနေတယ်လို့ ဆိုပါတယ်။

ပြီးခဲ့တဲ့ရက်ပိုင်းကလဲ အလုပ်သမားတစ်သောင်းနီးပါးရှိတဲ့ အထည်ချုပ်စက်ရုံတစ်ရုံမှာ ကိုရိုနာဗိုင်းရပ်စ် ကူးစက်ခံရသူ တစ်ယောက်တွေ့ခဲ့ပြီး သူကတဆင့် ကူးစက်သူ ထပ်မံ တိုးပွားလာမှာ စိုးရိမ်နေကြပါတယ်။

စက်တင်ဘာလ ၂၀ ရက်နေ့ညက ထုတ်ပြန်တဲ့ ကျန်းမာရေးဌာနရဲ့ အမိန့်မှာ စက်တင်ဘာလ ၂၁ ရက်နေ့က စတင်ကာ ရန်ကုန်တိုင်းထဲက မြို့နယ်တွေ နေအိမ်မှာပဲနေကြဖို့နဲ့ CMP လို့ခေါ်တဲ့ ကုန်ကြမ်းယူ၊ ကုန်ချောပေး လက်ခစားစနစ်နဲ့ လုပ်ကိုင်တဲ့ အလုပ်တွေ၊ စက်ရုံတွေက ဝန်ထမ်းတွေကို စက်တင်ဘာလ ၂၄ ရက်ကနေ အောက်တိုဘာလ ၇ ရက်နေ့ထိ အလုပ်နားထားဖို့ ဖော်ပြထားပါတယ်။

နှစ်ပတ်ရပ်နားထားရမယ့် စက်ရုံတွေက အလုပ်သမားတွေကိုတော့ အစိုးရက လူမှုဖူလုံရေးကြေး ထောက်ပံ့ ပေးသွားမယ်လို့ သိရပါတယ်။


RFA Burmese

https://www.rfa.org/burmese/news/covid-19-in-factories-09222020085631.html

လားရှိုးမှာ ကိုရိုနာဗိုင်းရပ်စ် စစ်ဆေးရေးစခန်း ဖွင့်လှစ်

လားရှိုးမြို့ မိုးကုတ်ဝိပ္ပသနာကျောင်းတိုက်မှာ ကိုရိုနာဗိုင်းရပ်စ် ရောဂါပိုး ရှိ/မရှိ စစ်ဆေးနိုင်တဲ့စခန်းကို ၂၀၂၀ စက်တင်ဘာ ၂၂ ရက်နေ့က အစိုးရဖွင့်လှစ်ပြီး ကျန်းမာရေးစောင့်ရှောက်မှုတွေပေးနေစဉ်။ / Photo: Kan Thar/RFA

ရှမ်းပြည်နယ်မြောက်ပိုင်း လားရှိုးမြို့က မိုးကုတ်ဝိပ္ပသနာကျောင်းတိုက်မှာ ကိုရိုနာဗိုင်းရပ်စ် ရောဂါပိုး ရှိ/မရှိ စစ်ဆေးနိုင်တဲ့စခန်းကို ဖွင့်လှစ်ထားပြီး အစိုးရက ကျန်းမာရေးစောင့်ရှောက်မှုတွေပေးနေပါတယ်။

ကိုရိုနာဗိုင်းရပ်ဖြစ်ပွားနှုန်းများနေတဲ့နေရာကပြန်လာပြီး အသွားအလာကန့်သတ်စောင့်ကြည့်ခံရတဲ့သူတွေကို သတ်မှတ်ရက်အလိုက် ဒီစခန်းမှာ နှာခေါင်းတို့ပတ် အာခေါင်တို့ပတ်တွေယူပြီး မန္တလေးမြို့ကို ပို့ဆောင်စစ်ဆေး တာဖြစ်ပါတယ်။

ကျန်းမာရေးဝန်ထမ်းအင်အား အလေအလွင့်မဖြစ်စေဖို့နဲ့ စနစ်တကျဖြစ်အောင် မိုးကုတ်ဝိပ္ပသနာကျောင်း တစ်နေရာထဲမှာစုပြီး နှာခေါင်းအာခေါင်တို့ပတ် ယူပေးနေတာဖြစ်တယ်လို့ လားရှိုးမြို့ ကိုရိုနာဗိုင်းရပ်စ်ရောဂါ ကာကွယ်ထိန်းချုပ်ရေးကော်မတီ အတွင်းရေးမှူးလည်းဖြစ်၊ မြို့နယ် ပြည်သူ့ကျန်းမာရေးဌာနမှူးလည်းဖြစ်တဲ့ ဒေါက်တာအေးနိုင်ကပြောပါတယ်။

ရပ်ဝေးခရီးကပြန်လာပြီး နေအိမ်၊ ဟိုတယ်တွေမှာ အသွားအလာစောင့်ကြည့်ခံနေရတဲ့သူတွေကို လားရှိုးမြို့ ကိုရိုနာဗိုင်းရပ်စ်ရောဂါ ကာကွယ်ရေးပရဟိတကွန်ယက် အကူအညီနဲ့ စခန်းမှာ ဆေးလာစစ်နိုင်ဖို့ အကြို အပို့လုပ်ပေးနေတယ်လို့လည်း ဆိုပါတယ်။

လားရှိုးမြို့မှာ တစ်ပတ်နှစ်ကြိမ် နှာခေါင်းအာခေါင်တို့ပတ်နမူနာယူရလေ့ရှိပြီး ဒီကနေ့ ဒီစခန်းကနေ လူဦးရေရှစ်ဆယ်ကျော်ရဲ့ နှာခါင်း၊အာခေါင် တို့ပတ်တွေ ရယူခဲ့တာဖြစ်ပြီးတော့ မနက်ဖြန်မှာ မန္တလေးမြို့ကို ပို့ဆောင်စစ်ဆေးမှာဖြစ်ပါတယ်။

လူဦးရေခြောက်ရာကျော်ရဲ့ နှာခေါင်းအာခေါင်တို့ပတ်နမူနာစစ်ဆေးခဲ့ပြီးပြီးလို့ ကိုရိုနာဗိုင်းရပ်စ်ရောဂါ ကာကွယ် ထိန်းချုပ်ရေးကော်မတီ ဥက္ကဋ္ဌ ဦးအာကာလင်း က RFA ကိုပြောပါတယ်။

ရပ်ဝေးကနေပြန်လာတဲ့သူတွေကို လားရှိုးကိုမဝင်ခင် ခေးနင်းတိုးဂိတ်နဲ့ မြို့ရှောင်လမ်းဂိတ်တွေမှာ ကျန်းမာရေး စစ်ဆေးနေပါတယ်။

ကိုရိုနာဗိုင်းရပ်စ်ရောဂါဖြစ်ပွားနှုန်းများတဲ့ ဒေသက ပြန်လာတဲ့သူတွေ၊ ရောဂါကူးစက်ခံထားရသူနဲ့ ထိတွေ့ခဲ့သူတွေ အနေနဲ့ မိမိနေအိမ်မှာဘဲ ၂၁ ရက် အသွားအလာကန့်သတ်နေထိုင်ခွင့်ပြုထားတာပါ။

ဆန္ဒအလျှောက် ဟိုတယ်မှာ နေထိုင်လိုတယ်ဆိုရင်တော့ ၁၄ ရက် ကိုယ့်အစီအစဉ်နဲ့ကိုယ် ကုန်ကျစရိတ်ခံ နေခွင့်လည်းရှိပါတယ်။

အစိုးရက စီစဉ်ထားတဲ့ ကျန်းမာရေးစောင့်ကြည့် စင်တာမှာနေထိုင်ချင်သူတွေကတော့ စောင့်ကြည့်ကာလ ၁၄ ရက်အတွက် ကာလမှာ စားစရိတ် ကျပ်တစ်သိန်း ပေးသွင်းရမှာပါ။

လားရှိုးမှာ အသွားအလာကန့်သတ်စောင့်ကြည့်ခံရသူတွေကို ကိုရိုနာဗိုင်းရပ်စ် ရောဂါပိုး ရှိ/မရှိ အခမဲ့ နှစ်ကြိမ်စစ်ဆေးပေးနေပါတယ်။


RFA Burmese

https://www.rfa.org/burmese/news/lashio-swab-center-09222020085443.html

 

(၂၂-၉-၂၀၂၀) ရက်နေ့၊ ည (၈:၀၀) နာရီ COVID-19 ရောဂါ ဓာတ်ခွဲအတည်ပြုလူနာသစ် (၂၇၃) ဦး တွေ့ရှိ


၁။ (၂၂-၉-၂၀၂၀)  ရက်နေ့၊ နံနက် (၈:၀၀)နာရီမှ ည  (၈:၀၀)နာရီအတွင်း COVID-19  ဓာတ်ခွဲ စစ်ဆေးချက်များအရ -

- အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL)မှ (ပထမအသုတ်) ဓာတ်ခွဲ နမူနာ (၁,၀၁၇)ခု၊

- ဆေးသုတေသနဦးစီးဌာန (DMR) ဓာတ်ခွဲနမူနာ ဓာတ်ခွဲနမူနာ (၂၈၂) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) မှ (ပထမအသုတ်) ဓာတ်ခွဲနမူနာ (၃၆၃) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန(မော်လမြိုင်)မှ  (ပထမအသုတ်) ဓာတ်ခွဲနမူနာ (၂၅၁) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန(တောင်ကြီး)မှ  (ပထမအသုတ်) ဓာတ်ခွဲနမူနာ (၉၃) ခု၊

- ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ (၁၁၁) ခု၊

- ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၄) ခု၊

- ပြည်သူ့ဆေးရုံကြီး၊ မူဆယ်မြို့မှ ဓာတ်ခွဲနမူနာ (၂၄) ခု၊

- ပြည်သူ့ဆေးရုံကြီး၊ မြိတ်မြို့မှ ဓာတ်ခွဲနမူနာ (၃) ခု၊

- ပြည်သူ့ဆေးရုံကြီး၊ ပြည်မြို့မှ ဓာတ်ခွဲနမူနာ (၇) ခု၊

- ပြည်သူ့ဆေးရုံကြီး၊ မြစ်ကြီးနားမြို့မှ ဓာတ်ခွဲနမူနာ (၃) ခု၊

- ပြည်သူ့ဆေးရုံကြီး၊ မြောင်းမြမြို့မှ ဓာတ်ခွဲနမူနာ (၁) ခု၊

- ပြည်သူ့ဆေးရုံကြီး၊ တောင်ငူမြို့မှ ဓာတ်ခွဲနမူနာ (၁) ခု၊

- ပြည်သူ့ဆေးရုံကြီး၊ မကွေးမြို့မှ ဓာတ်ခွဲနမူနာ (၁၁) ခု၊

- ပြည်သူ့ဆေးရုံကြီး၊ ဘားအံမြို့မှ ဓာတ်ခွဲနမူနာ (၁၅) ခု၊

- ပြည်သူ့ဆေးရုံကြီး၊ ဟားခါးမြို့မှ ဓာတ်ခွဲနမူနာ (၂၀) ခု၊

- ပြည်သူ့ဆေးရုံကြီး၊ ပုသိမ်မြို့မှ ဓာတ်ခွဲနမူနာ (၁၂) ခု၊

- ပြည်သူ့ဆေးရုံကြီး၊ မြဝတီမြို့မှ ဓာတ်ခွဲနမူနာ (၈) ခု၊

- နေပြည်တော် ပြည်သူ့ဆေးရုံကြီး (ခုတင် ၁၀၀၀) မှ ဓာတ်ခွဲနမူနာ (၂၀) ခုနှင့်

- နေပြည်တော် အမှတ် (၂)တပ်မတော်ဆေးရုံကြီး (ခုတင် ၁၀၀၀)မှဓာတ်ခွဲနမူနာ (၂၅၃)ခု

စုစုပေါင်း (၂,၄၉၉) ခုအား ယနေ့ညနေတွင် စစ်ဆေးပြီးစီးခဲ့ရာ -

• COVID-19 ရောဂါ ဓာတ်ခွဲအတည်ပြုလူနာသစ် (၂၇၃) ဦး တွေ့ရှိရပါသည်။  


၂။ (၂၂-၉-၂၀၂၀) ရက်နေ့၊ ည (၈:၀၀)နာရီအထိ မြန်မာနိုင်ငံတွင် COVID-19 ရောဂါဓာတ်ခွဲ အတည်ပြုလူနာ (၆,၇၄၃) ဦးရှိပြီ ဖြစ်ပါသည်။

၃။ ဓာတ်ခွဲအတည်ပြု လူနာဟောင်း (old confirmed case) များအနက် စုစုပေါင်း (၁,၉၅၁) ဦး အား ဆေးရုံမှဆင်းခွင့်ပြုခဲ့ပြီးဖြစ်ပါသည်။                         

၄။ ယနေ့အထိ ဓာတ်ခွဲအတည်ပြုလူနာများအနက် သေဆုံးသူပေါင်း (၁၁၅)ဦး ရှိပါသည်။ 


၅။ (၂၁-၉-၂၀၂၀) ရက်နေ့၊ နေ့လယ် (၁၂:၀၀) နာရီမှ (၂၂-၉-၂၀၂၀)ရက်နေ့၊ နေ့လယ် (၁၂:၀၀) နာရီအတွင်း တွေ့ရှိရသော စောင့်ကြည့်လူနာအသစ် (၃၇၂) ဦးရှိပါသည်။


Ministry of Health and Sports, Myanmar

https://www.facebook.com/MinistryOfHealthAndSportsMyanmar

အီရန်ကို ကန်အရေးယူပိတ်ဆို့မှုသစ်ချမှတ်

အမေရိကန်အလံနဲ့ အီရန်အလံ။

အီရန်နိုင်ငံရဲ့ နျူကလီးယားနဲ့ ပဲ့ထိန်းတပ်ဒုံးလက်နက်တွေအပြင် သမရိုးကျ လက်နက်အစီအစဉ်တွေကို ထိန်းချုပ်နိုင်ရေးအတွက် အမေရိကန်ပြည်ထောင်စုက ဒဏ်ခတ်ပိတ်ဆို့မှု အသစ်တွေချမှတ်လိုက်ပါတယ်။

အီရန်ကို လက်နက်မရောင်းချနိုင်အောင် ကုလသမဂ္ဂက ဒဏ်ခတ်ပိတ်ဆို့မှုတွေ အကန့်အသတ်မရှိပြန်ချမှတ်လိမ့်မယ်လို့ အမေရိကန်က စနေနေ့နှောင်းပိုင်းမှာ အခိုင်အမာပြောဆိုထားတာပါ။ အီရန်နိုင်ငံရဲ့ နျူကလီယား၊ ပဲ့ထိန်းတပ်ဒုံးလက်နက်နဲ့ သမရိုးကျလက်နက်ဆိုင်ရာ အစီအစဉ်တွေနဲ့ ပတ်သက်နေတဲ့ လူပုဂ္ဂိုလ်နဲ့ ကုမ္ပဏီ ပေါင်း ၂ ဒါဇင်ကျော်ကို သမ္မတ Donlad Trump အစိုးရအဖွဲ့က ဒဏ်ခတ်အရေးယူလိုက်ကြောင်း အိမ်ဖြူတော် ပြည်တွင်းလုံခြုံရေးအကြံပေး Robert O’Brien ကတနင်္လာနေ့မှာပြောပါတယ်။

အိမ်ဖြူတော်က ထုတ်ပြန်ခဲ့တဲ့သမ္မတအမိန့်မှာတော့ လက်နက်နဲ့ ဆက်စပ်နေတဲ့ ပစ္စည်းကိရိယာတွေ၊ စစ်လက်နက်တွေကို အီရန်နိုင်ငံကို အသွင်းအထုတ်လုပ်တဲ့နေရာမှာ ပါဝင်ပတ်သက်နေတဲ့ လူပုဂ္ဂိုလ်တွေရဲ့ ဥစ္စာပစ္စည်းပိုင်ဆိုင်မှုတွေကို ကန့်သတ်ထိန်းချုပ်မယ့် အစီအစဉ်တွေပါဝင်ပါတယ်။ လိုက်နာမှုမရှိတဲ့ ပြည်ပနိုင်ငံသားတွေနဲ့ စီးပွါးရေးလုပ်ငန်းတွေအပေါ် အပြစ်ပေးအရေးယူမယ့်အစီအစဉ်တွေကိုလည်း အမေရိကန်နိုင်ငံခြားရေးဌာနနဲ့ ဘဏ္ဍာရေးဌာနကလည်း အသီးသီး ကြေငြာထားကြပါတယ်။ 


 ဗွီအိုအေ (မြန်မာပိုင်း)

https://burmese.voanews.com/a/us-iran-sanctions/5592962.html

မြေပုံမြို့နယ်မှာ ဒေသခံနှစ်ဦးကို တပ်မတော်က ဖမ်းဆီးရိုက်နှက်ခဲ့

ရခိုင်ပြည်နယ် စစ်တွေမြို့မှာ လုံခြုံရေးယူနေတဲ့ စစ်သားတစ်ဦိးကို ၂၀၁၉ စက်တင်ဘာ ၂၀ ရက်နေ့က တွေ့ရစဉ်

ရခိုင်ပြည်နယ် မြေပုံမြို့နယ်ထဲက မြိုင်သာယာရွာသားနှစ်ယောက်ကို တပ်မတော်က မနေ့က ဖမ်းဆီး ရိုက်နှက်စစ်ဆေးခဲ့တဲ့အတွက် ဒဏ်ရာတွေ ရရှိခဲ့ကြတယ်လို့ မိသားစုဝင်တွေနဲ့ ဒေသခံတွေက ပြောပါတယ်။

မြေပုံမြို့နယ် မြိုင်သာယာရွာက အသက် ၂၆ နှစ်အရွယ် ကိုထွန်းမြင့်သန်းနဲ့ အသက် ၂၈ နှစ်အရွယ် ကိုမြင့်မောင် တို့ နှစ်ယောက် စက်တင်ဘာ ၂၁ ရက် မနေ့မနက်က ဖမ်းဆီးခံခဲ့ရတာပါ။ ယိုးဆနွင်းရွာမှာ ကလေးမွေးစာရင်းယူဖို့အသွား လမ်းမှာ တပ်မတော်စစ်ကြောင်းတခုနဲ့ တွေ့ပြီး၊ ဖမ်းဆီးခံခဲ့ရတာဖြစ်တယ်လို့ မိသားစုဝင်တွေနဲ့ ဒေသခံတွေက ပြောပါတယ်။

ဥက္ကံရွာမှာ ယာယီတပ်စခန်းချထားတဲ့ စစ်ကြောင်းကနေ ဖမ်းဆီးခဲ့တာဖြစ်ပြီး၊ ရိုက်နှက်ခံရလို့ ခေါင်းနဲ့ မျက်နှာမှာ ဒဏ်ရာတွေ ရခဲ့တယ်လို့ အမည်မဖော်လိုတဲ့ မိသားစုဝင်တစ်ဦးက ပြောပြပါတယ်။

“မနေ့က ၈ နာရီလောက်က ယိုးဆနွှင်းကိုသွားပြီးတော့ ထွန်းမြင့်သန်းရဲ့ကလေး မွေးစာရင်းကို သွားပေးတာ။ ဆိုင်ကယ်နဲ့ နှစ်ယောက်သွားတာ အဲဒီလမ်းမှာ ဥက္ကံဆိုတဲ့ရွာက စစ်သား ဖမ်းပြီး ရိုက်တယ်။ AA နဲ့ ပတ်သက် တယ်ဆိုပြီးတော့ ရိုက်လွှတ်လိုက်တာ။ မြင့်မောင်ဆိုတဲ့သူမှာတော့ ဦးခေါင်းကွဲ သွားတယ်။ ထွန်းမြင့်သန်း ကတော့ မျက်နှာတွေ အကုန်လုံး ရောင်ရမ်းပြီးတော့ ဖြစ်သွားပါတယ်။ လေးယောက်လောက် ဝိုင်းပြီးတော့ ရိုက်တယ်လို့ပြောတယ်။ လက်ရှိ အခြေအနေက သူတို့ကို ဆေးထိုးနေရတယ်ပေါ့။ စစ်တပ်က အထက်က လူကြီးတွေကိုလည်း ပြောချင်ပါတယ်။ အခုလို ရွာမှာ ရိုးရိုးသားသား လုပ်ကိုင်စားသောက်နေတဲ့သူတွေကို မနှိပ်စက်ပါနဲ့။ ဒီလို နောက်ထပ် မလုပ်ပါနဲ့လို့ ပြောချင်ပါတယ်။”

သူတို့နှစ်ယောက်ကို ပြန်လွှတ်ပေးဖို့  ဖမ်းဆီးထားတဲ့စစ်ကြောင်းက ဗိုလ်မှူးဆီမှာ မိသားစုဝင်တွေနဲ့ ကျေးရွာတာဝန်ရှိသူတွေ သွားရောက် တောင်းဆိုခဲ့ကြတဲ့အတွက် မနေ့ညနေ ၆ နာရီလောက်မှာ ပြန်လွှတ်ပေးလိုက်တယ်လို့ မြိုင်သာယာရွာ အုပ်ချုပ်ရေးမှူး ဦးမောင်လှခင် က RFA ကို ပြောပါတယ်။

“ရပ်မိရပ်ဖ နှစ်ယောက်ပါတယ်။ ပြီးတော့ ဆယ်အိမ်မှူး နှစ်ယောက်ပါတယ်။ ခေါ်ထားတဲ့ကောင်လေးမိဘနှစ် ယောက်ပါတယ်။ နောက်တစ်ယောက်မှာ ဇနီးတစ်ယောက်ပါတယ်။ သူတို့နဲ့အတူ ကျနော်တို့ ဗိုလ်မှူးနဲ့ သွားတွေ့တယ်။ ဗိုလ်မှူးက ကျနော်တို့ကို ပြောတယ်။ သူတို့ဖုန်းထဲမှာ မသင်္ကကာစရာတွေ တွေ့တယ်။  Miss call ပေးထားတာတွေ တွေ့တယ်တဲ့။ မသင်္ကစရာတွေ့တာနဲ့ ခေါပြီး စစ်ဆေးတာပါ အုပ်ချုပ်ရေးမှူး။ ဘာမှစိုးရိမ်စရာ မလိုပါဘူးဆိုပြီး ပြောတယ်။ ကျနော်တို့သွားတာနဲ့ ခဏနေရင် သူတို့ကိုပြန်လွှတ်ပေးလိုက်ပါတယ်။”

ရခိုင်မှာ စစ်ဘေးဒုက္ခသည်တွေကို ကူညီပေးနေတဲ့ ကိုအမ်းသားကြီးကလည်း ဒဏ်ရာရသူတွေနဲ့ ပတ်သက်ပြီး ရွာသားတွေက သူ့ကို အကူအညီ တောင်းလာတယ်လို့ ပြောပါတယ်။

“အကိုတို့ တချက်လောက်ကူညီပါဦးဆိုပြီးတော့ ပြောလာတယ်။ ကျနော်တို့လည်း အဲဒီနေရာနဲ့ နည်းနည်းလှမ်းတော့ ဘယ်လိုအကူအညီပေးလို့ ပေးရမှန်းမသိဘူး ဖြစ်သွားတယ်။ အဖွဲ့အစည်းတစ်ခုဆိုတာ ဂုဏ်သိက္ခာရှိတယ်။ အဲဒီအဖွဲ့ကို အုပ်ထိန်းထားတဲ့ အုပ်ထိန်းသူရှိတယ်။ အဲဒီအုပ်ထိန်းသူတွေက သိပါလျက်နဲ့ ဥပမာပြောရလို့ရှိရင် သတင်းမှန်ပြန်ကြားရေးအဖွဲ့ပေါ့။ အဲဒီသတင်းမှန်ပြန်ကြားရေးအဖွဲ့က ပေါ်တင်ကြီးကို လိမ်ပြီးတော့ ပြောနေတဲ့အခါကျတော့ အဲဒီအထက်အရာရှိတွေက လူ့အခွင့်အရေးချိုးဖောက်ဖို့ စေခိုင်းနေသလို ဖြစ်နေတယ်။”

လူ့အခွင့်အရေး ရှေ့နေတစ်ဦးဖြစ်တဲ့ ဦးဇော်ဇော်မင်း ကလည်း အရပ်သားတွေအပေါ် အခုလို ညှဉ်းပန်း နှိပ်စက်တာဟာ လူ့အခွင့်အရေးချိုးဖောက်မှုဖြစ်သလို၊ စစ်ရာဇဝတ်မှုလည်း မြောက်တယ်လို့ ပြောပါတယ်။

“စစ်တပ်က ပြည်သူတွေ သံသယနဲ့ ဖမ်းဆီးညှဉ်းပန်းနှိပ်စက်တာ ကျနော်တို့ရထားသလောက်တော့ လူပေါင်း ၂ဝဝ ကျော်လောက် ရှိတယ်။ တချို့က လက်လွန်ပြီးတော့ တပ်မတော်လက်ထဲမှာ သေဆုံးသွားတာတွေ ရှိတယ်။ ဒီကိစ္စနဲ့ပတ်သက်လို့ တပ်မတော်ကလည်း အောက်ခြေတပ်သားတွေကို ထိရောက်စွာ ကိုင်တွယ် အရေးယူမှု မရှိသလို အစိုးရကလည်း ဒါတွေကို နှုတ်ဆိတ်နေသလို တွေ့နေရတယ်။ အရပ်သားပြည်သူတွေကို ညှဉ်းပန်း နှိပ်စက်တာတွေအပေါ်မှာ အစိုးရကလည်း နှုတ်ဆိတ်နေခြင်းဟာ တပ်မတော်သားတွေ ကျူးလွန်နေတာကို အားပေးသလိုဖြစ်နေတယ်။ ကျနော်တို့ကတော့ အဲဒီလိုပဲ မြင်တယ် ”

ဒီသတင်းနဲ့ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့ ဥက္ကဋ္ဌ ဗိုလ်ချုပ်ဇော်မင်းထွန်း ကို RFA က အကြိမ်ကြိမ် ဆက်သွယ်ခဲ့ပေမယ့် ဖုန်းဖြေဆိုမှု မရှိခဲ့ပါဘူး။

ရခိုင်ပြည်နယ်မှာ တပ်မတော်နဲ့ ရက္ခိုင့်တပ်တော် AA အကြား ဖြစ်ပွားနေတဲ့ စစ်ရေးပဋိပက္ခတွေအတွင်း အရပ်သားတွေကို သံသယနဲ့ ဖမ်းဆီးနှိပ်စက်စစ်ဆေးတဲ့ သတင်းတွေ ဆက်တိုက် ထွက်ပေါခဲ့တာပါ။ ဒဏ်ရာတွေနဲ့ ပြန်လွတ်လာတဲ့ အရပ်သားတွေလည်းရှိသလို၊ စစ်ကြောရေးကာလအတွင်းမှာ သေဆုံးသွားသူတွေလည်း ရှိခဲ့ပါတယ်။

RFA က ရရှိထားတဲ့ အချက်အလက်တွေအရ ရခိုင်မြောက်ပိုင်းမှာ ၂ဝ၁၉ နှစ်ဆန်းပိုင်းကနေ ပြီးခဲ့တဲ့ သြဂုတ်လ ၈ ရက်နေ့အထိ တစ်နှစ်ကျော်ကာလအတွင်း စစ်ကြောရေးစခန်းမှာ ဖမ်းဆီးစစ်ဆေးချိန် သေဆုံးတဲ့ အရပ်သား ၃ဝ အထိ ရှိပါတယ်။

မေလဆန်းတုန်းကလည်း ပုဏ္ဏားကျွန်းမြို့နယ်ထဲက ကျောက်ဆိပ်ရွာသား ငါးယောက်ကို သံသယနဲ့ ဖမ်းဆီးခဲ့ ပြီး စစ်တွေမြို့မရဲစခန်းကို တပ်မတော်ရေယာဉ်နဲ့ ပို့ဆောင်ချိန် ရေယာဉ်ပေါ်မှာ ထိုးကြိတ်ရိုက်နှက်ခဲ့တဲ့ ဗွီဒီယို တခု လူမှုကွန်ရက်စာမျက်နှာပေါ်မှာ ပျံ့နှံ့ခဲ့ဖူးပါတယ်။

ဒီဖြစ်ရပ်မှာတော့ တပ်မတော်က ဝန်ခံခဲ့ပြီး၊ ဥပဒေနဲ့မညီဘဲ စစ်ဆေးမေးမြန်းခဲ့တဲ့ တပ်ဖွဲ့ဝင်တွေကို အရေးယူ မယ်လို့ မေလ ၁၂ ရက်နေ့မှာ သတင်းထုတ်ပြန်ခဲ့ပါတယ်။

စစ်ပွဲတွေအတွင်း ရခိုင်နဲ့ ချင်းပြည်နယ်ထဲက ဒေသခံအရပ်သားတွေဟာ ဥပဒေမဲ့ သတ်ဖြတ်ခံရတာ၊ ဖမ်းဆီးခံရ တာ၊ ပျောက်ဆုံးသွားတာ၊ ညှဉ်းပန်းနှိပ်စက်ခံရတာ၊ အစုလိုက် အပြုံလိုက် ပြောင်းရွှေ့နေထိုင်ရတာတွေ ရှိနေပြီး၊ ဒါတွေဟာ စစ်ရာဇဝတ်မှု၊ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေ မြောက်နိုင်တယ်လို့ ဒီလထဲ ကျင်းပတဲ့ လူ့အခွင့်အရေးကောင်စီ ၄၃ ကြိမ်မြောက် အစည်းအဝေးမှာ ကုလသမဂ္ဂ လူ့အခွင့်အရေး မဟာမင်းကြီး မီရှဲ ဘတ်ရှ်လတ်ခ် Michelle Bachelet က သတိပေးခဲ့ပါတယ်။

မြန်မာနိုင်ငံထဲမှာ ဆိုးရွားတဲ့ လူ့အခွင့်အရေး ချိုးဖောက်မှုတွေ ဖြစ်နေတယ်ဆိုပြီး စွပ်စွဲခံထားရတဲ့ ပြဿနာတွေ ကို ကိုင်တွယ်ဖို့  နိုင်ငံတကာ တရားရေးလမ်းကြောင်းအတိုင်း ဆောင်ရွက်နေတဲ့ ကိစ္စရပ်တွေမှာ မြန်မာအစိုးရအနေနဲ့  အပြည့်အဝ ပူးပေါင်းဆောင်ရွက်ဖို့လည်း သူကတိုက်တွန်းခဲ့ပါတယ်။


RFA Burmese

https://www.rfa.org/burmese/news/myanmar-soldiers-torture-two-villagers-in-myebon-09222020075937.html

သမ္မတ ရှီကျင့်ဖျင်ကို ဝေဖန်သူ တရုတ်သူဌေး ထောင် ၁၈ နှစ်ကျ

ကိုရိုနာဗိုင်းရပ်စ် ပျံ့နှံမှုကို တရုတ်အစိုးရရဲ့ ကိုင်တွယ်မှုအကြောင်း ဝေဖန် ရေးသားခဲ့ပြီးတဲ့နောက် မတ်လထဲမှာ မစ္စတာ ရန် ပျောက်ဆုံးသွားခဲ့

တချိန်က အိမ်ခြံမြေ လုပ်ငန်းမှာ သြဇာရှိပြီး တရုတ်သမ္မတ ရှီကျင့်ဖျင်ကို ပြင်းပြင်းထန်ထန် ဝေဖန်လေ့ရှိတဲ့ တရုတ်သူဌေးကြီးတဦး အဂတိလိုက်စားမှု စွဲချက်တွေနဲ့ ထောင် ၁၈ နှစ် ပြစ်ဒဏ်ချခံလိုက်ရပါတယ်။

သူဌေးကြီး မစ္စတာ ရန် ဂျင်ချမ်း ဟာ "အဂတိလိုက်စားမှု၊ လာဘ်ပေးလာဘ်ယူ လုပ်မှု၊ အများပြည်သူ ရန်ပုံငွေတွေကို အလွဲသုံးစားလုပ်မှု" စတဲ့ စွဲချက်တွေနဲ့ အပြစ်ရှိကြောင်း ဘေကျင်းမြို့မှာ ရှိတဲ့ တရားရုံးတခုက အမိန့်ချခဲ့တယ်လို့ တရုတ်အစိုးရပိုင် သတင်းမီဒီယာ Global Times သတင်းစာက ဖော်ပြပါတယ်။

နောက်ပြီး တရုတ်ယွမ်ငွေ ၄.၂ သန်း သူ ဒဏ်ကြေးပေးဆောင်ရမယ်လို့လည်း ဆိုပါတယ်။

သမ္မတ ရှီကို ဝေဖန်ထားတယ်လို့ ပြောဆိုကြတဲ့ ဆောင်းပါးတိုတစ်ပုဒ် ရေးသားပြီးတဲ့နောက် မကြာမီမှာပဲ ဒီနှစ် မတ်လတုန်းက မစ္စတာ ရန် ပျောက်ဆုံးသွားခဲ့တာ ဖြစ်ပါတယ်။

အဲဒီစာထဲမှာ သမ္မတ ရှီလို့ တိုက်ရိုက် သုံးနှုန်းထားတာ မဟုတ်ပေမယ့် သမ္မတကို ဝေဖန်ထားတယ်လို့ အများက ယူဆထားကြတာပါ။

မစ္စတာ ရန်ဟာ ၁.၂၅ သန်း တန်ကြေးရှိတဲ့ တံစိုးလက်ဆောင်တွေကို ရယူခဲ့သလို တရုတ် ယွမ်ငွေ သန်း ၅၀ နီးပါးကိုလည်း ငွေအလွဲသုံးစား လုပ်ခဲ့တယ်လို့ ဒေသတွင်း အရေးကြီးတဲ့ အမှုတွေကို ကိုင်တွယ်လေ့ရှိတဲ့ ဘေကျင်းတရားရုံးတခုက ပြောပါတယ်။

မစ္စတာ ရန်အနေနဲ့ ဒီပြစ်မှုတွေအားလုံးကို "ဆန္ဒအလျောက်" ဖြောင့်ချက်ပေးနိုင်တယ်ဆိုပေမယ့် တရားရုံးဆုံးဖြတ်ချက်ကိုတော့ အယူခံတင်ခွင့် မရှိဘူးလို့ ပြောဆိုမှုတွေလည်း ရှိနေပါတယ်။

ဟွာရမ်း အိမ်ခြံမြေ ကုမ္ပဏီရဲ့ ဥက္ကဋ္ဌဟောင်းဖြစ်သူ မစ္စတာ ရန်ဟာ စီးပွားရေးလောကမှာ သြဇာညောင်းတဲ့ သူဌေးကြီးတဦး ဖြစ်ခဲ့ရုံတင် မကပါဘူး။

ဝန်ကြီးဌာနတခုက အရာရှိရဲ့ သားဖြစ်တဲ့ သူဟာ ပါတီ ထိပ်ပိုင်း ခေါင်းဆောင်တွေနဲ့ နီးကပ်တဲ့ ဆက်ဆံရေး ရှိသူလို့ ပြောဆိုကြပြီး အထူးသဖြင့် ပါတီအပေါ် ထိထိရောက်ရောက် ဝေဖန်ခွင့် ရထားသူတဦးလို့လည်း ယူဆကြပါတယ်။

ဝေဖန်သူတွေ၊ အစိုးရနဲ့ သဘောထားကွဲလွဲသူတွေကို ကန့်သတ် ထိန်းချုပ်ဖို့အတွက် တရုတ်အစိုးဟာ အဂတိလိုက်စားမှု ပုဒ်မတွေကို သုံးလေ့ရှိတယ်လို့ လူ့အခွင့်အရေးအဖွဲ့တွေက တလျှောက်လုံး စွပ်စွဲပြောဆိုနေပါတယ်။

ကွန်မြူနစ်ပါတီ ဆန့်ကျင်ရေး အမြင်သဘောထားများ

မစ္စတာ ရန်ရေးသားခဲ့တဲ့ စာတမ်းတို တပိုဒ်ဟာ ကိုရိုနာဗိုင်းရပ် ပျံ့နှံ့မှုနဲ့ ပတ်သက်လို့ တရုတ်အစိုးရဲ့ ကိုင်တွယ်မှုအကြောင်း ဝေဖန်ရေးသားထားတာ ဖြစ်ပြီး သမ္မတ ရှီကျင့်ဖျင် ရုပ်မြင်သံကြားကနေ မိန့်ခွန်းပြောကြားပြီးတဲ့နောက်မှာ အဲဒီလို ရေးခဲ့တာပါ။

သူ့ရဲ့ ဝေဖန်စာထဲမှာတော့ မစ္စတာ ရှီလို့ တိုက်ရိုက် ရေးသားထားတာ မရှိပါဘူး။

ဒါပေမဲ့ China Digital Times သတင်းဌာနကြီးရဲ့ သတင်းတပုဒ်မှာတော့ "မိန့်ခွန်းနဲ့ ပတ်သက်လို့ ကျွန်တော်လည်း တာဝန်သိစွာ၊ သိချင်စိတ် အင်မတန် ပြင်းပြစွာ လေ့လာနေပါတယ်။ အဲဒီမှာ ကျွန်တော် မြင်ခဲ့တာကတော့ အဝတ်အစားအသစ်တွေ ဝတ်ဆင်ပြီး မတ်တပ်ရပ်နေတဲ့ ဘုရင်မင်းမြတ်တပါး မဟုတ်ပါဘူး။ အဝတ်တထည်မှ မဝတ်ဘဲ ကိုယ်တုံးလုံး ဖြစ်နေတဲ့ ပြောင်ချော်ချော် လူပြက်တယောက် ဖြစ်ပြီး သူဟာ မင်းဧကရာဇ်တပါးပါးလို့ ဆက်တိုက် ပြောဆိုနေတယ်" လို့ ရေးသားထားပါတယ်။

ဒီစာ ရေးပြီး မကြာမီမှာပဲ မစ္စတာ ရန့်ကို " ကြီးလေးတဲ့ စည်းကမ်းချိုးဖောက်မှုတွေနဲ့ သံသယရှိတဲ့အတွက်" စုံစမ်းစစ်ဆေးနေတယ်လို့ ကြေညာခဲ့ပါတယ်။

နောက်ပိုင်းမှာတော့ သူ့ကို ကွန်မြူနစ်ပါတီကနေ ထုတ်ပယ်ကြောင်းကိုလည်း ကြေညာခဲ့ပါတယ်။

အမှန်တရားကို စိတ်ထဲရှိတဲ့အတိုင်း ဟောဟောဒိုင်းဒိုင်း ပြောဆိုခဲ့မှုတွေအတွက် "Ren Cannon" "ရန် အမြောက်" လို့ နာမည်ပြောင် ပေးခံထားရတဲ့ မစ္စတာ ရန်အတွက်တော့ အာဏာပိုင်တွေရဲ့ မျက်မုန်းကျိုးတာ ခံရတာ ဒါ ပထမဆုံး အကြိမ်တော့ မဟုတ်ပါဘူး။

သမ္မတ ရှီကို ဝေဖန်ခဲ့တဲ့အတွက် ၂၀၀၆ ခုနှစ်မှာလည်း တွစ်တာလိုမျိုး သူ့ရဲ့ မိုက်ခရိုဘလော့ခ် အကောင့်တွေ အပိတ်ခံခဲ့ရပါတယ်။

တရုတ်အစိုးရပိုင် မီဒီယာကို အခွန်ဆောင်သူတွေရဲ့ ရန်ပုံငွေနဲ့ တည်ထောင်ထားတဲ့အတွက် ကွန်မြူနစ်ပါတီအစား ပြည်သူတွေကို အလုပ်အကျွေးပြုသင့်တယ်လို့ ဝေဘို ဘလော့ခ်မှာ သူရေးခဲ့ပါတယ်။

သူ့ရဲ့ ရေးသားချက်ကို အစိုးရ သတင်းမီဒီယာက နောက်ပိုင်းမှာ ဝေဖန်ခဲ့ပါတယ်။

သူဟာ "ကွန်မြူနစ်ပါတီ ဆန့်ကျင်ရေး အတွေးအမြင်တွေ ရှိသူတဦး"လို့လည်း ရည်ညွှန်း ပြောဆိုခဲ့ပါတယ်။ 


BBC Burmese

https://www.bbc.com/burmese/burma-54251226

အမေရိကန်အခြေစိုက်စခန်းနဲ့ ပုံစံတူ နေရာကို ဗုံးကြဲတိုက်ခိုက်လေ့ကျင့်နေတဲ့ ဗွီဒီယို တရုတ် ထုတ်ပြန်

တရုတ် H-6K ဗုံးကြဲလေယာဉ်အမျိုးအစား

ပစိဖိတ်သမုဒ္ဒရာထဲက အမေရိကန်ပိုင် Guam ကျွန်းပေါ်က စစ်စခန်းနဲ့ သဏ္ဍာန်တူ စခန်းတခုကို နျူကလီးယား လက်နက် တပ်ဆင် အသုံးပြု နိုင်တဲ့ H-6 ဗုံးကြဲလေယာဉ်နဲ့ပုံစံတူ လေ့ကျင့်တိုက်ခိုက်မှုကို ရိုက်ကူးထားတဲ့ ဗွီဒီယိုကို တရုတ်လေတပ်က ထုတ်ပြန် လိုက်ပါတယ်။ အမေရိကန်နဲ့ တရုတ်ကြားဆက်ဆံရေးတင်းမာနေတဲ့ အချိန်မှာ အခုလို ပုံစံတူလေ့ကျင့်တဲ့ ဗွီဒီယိုကို တရုတ်က ထုတ် ပြန်လိုက်တာဖြစ်တဲ့အတွက် တင်းမာမှုတွေ ထပ်တိုးလာမယ့်အရေး စိုးရိမ်စရာ ဖြစ်ပါတယ်။ ဗွီဒီယိုထဲမှာ ဂူအမ်ကျွန်းပေါ်က အမေရိကန် Andersen လေတပ်အခြေစိုက်စခန်းနဲ့ ပုံစံတူ စခန်းကို နျူကလီးယားလက်နက်တပ်ဆင်အသုံးပြုနိုင်တဲ့ တရုတ်လုပ် H-6ဗုံးကြဲလေယာဉ်နဲ့ တိုက်ခိုက်နေပုံကို ရိုက်ကူးထားတာပါ။ အဲဒီဗွီဒီယိုကို ဆိုရှယ်မီဒီယာတစ်ခုမှာ ထုတ်ပြန်ခဲ့တာ ဖြစ်ပါတယ်။

ပစိဖိတ် သမုဒ္ဒရာထဲက ဂူအမ်ကျွန်းမှာ အမေရိကန်တို့ရဲ့ အဓိက စစ်အခြေစိုက်စခန်းတွေရှိပြီး ဒီလေတပ်စခန်းတွေဟာ အာရှ- ပစိဖိတ်ဒေသမှာ ပဋိပက္ခတွေဖြစ်ပွားရင် အဓိက ပစ်မှတ်ထားတိုက်ခိုက်ခံရမယ့် နေရာတွေအဖြစ် ယူဆထားတာပါ။

အခုထုတ်ပြန်လိုက်တဲ့ "The god of war H-6K goes on the attack!" (စစ်နတ်ဘုရားH-6K က တိုက်ခိုက်မှု စတင်လိုက်ပြီ ) လို့ နာမည်ပေးထားတဲ့ ဒီဗွီဒီယိုမှာအခြေစိုက်စခန်းတခုကနေ H-6 ဗုံးကြဲလေယာဉ် ထွက်ခွာသွားပြီး လေယာဉ်မှူးက ပြေးလမ်းတခုကို ဒုံးကျည်ပစ်လွှတ်လိုက်တဲ့ပုံ ရိုက်ကူးပြထားတာပါ။ ဒုံးကျည်သွားရာလမ်းကြောင်းမှာ ပြနေတဲ့ ဂြိုလ်တု ဓါတ်ပုံတွေအရ ဗွီဒီယိုထဲ ရိုက်ကူးပြထားတဲ့ လေတပ်စခန်းဟာ ဂူအမ်ကျွန်းပေါ်က Andersen လေတပ်စခန်းနဲ့ တပုံစံတည်း ဖြစ်ပါတယ်။

အခု ဒီဗွီဒီယိုကို ထုတ်ပြန်လိုက်တဲ့ အချိန်ကလည်း ထိုင်ဝမ်ကျွန်းနားမှာ တရုတ်တို့ စစ်ရေးလေ့ကျင့်မှု ဒုတိယနေ့ပြုလုပ်တဲ့ အချိန်နဲ့ တိုက်ဆိုင်နေပါတယ်။ ထိုင်ဝမ်ကို အမေရိကန် အကြီးတန်းအရာရှိကြီး တဦး လာရောက်လည်ပတ်တဲ့ အပေါ် မကျေနပ်တာကို ပြသတဲ့အနေနဲ့ တရုတ်ကထိုင်ဝမ်ကျွန်းနားမှာ စစ်ရေးလေ့ကျင့်မှုတွေပြုလုပ်နေတာပါ။ ဒီဗွီယိုနဲ့ပတ်သက်လို့ မေးမြန်းချက်ကိုအမေရိကန် နဲ့ တရုတ် နှစ်ဘက်စလုံးက တစုံတရာတုန့်ပြန်ခြင်းမရှိဘူးလို့ ရိုက်တာသတင်းက ပြောပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/us-china-tension-/5592777.html

COVID-19 ကာကွယ်ဆေး တကမ္ဘာလုံး အသုံးပြုနိုင်ရေး WHO အစီအစဉ် နိုင်ငံပေါင်း ၁၅၀ ကျော် ပါဝင်

COVID-19 ကာကွယ်ဆေးကို ကမ္ဘာတလွှား တန်းတူညီမ ျှ ဖြန့်ဝေပေးနိုင်ဖို့ လုပ်ဆောင်နေတဲ့ WHO က ဦးဆောင်တဲ့ COVAX အစီအစဉ်မှာ ပါဝင်ဆောင်ရွက်မယ့် နိုင်ငံတွေဟာ အခုဆို ၁၅၀ ကျော်သွားပြီလို့ WHO က တနင်္လာနေ့ ဂျနီဗာသတင်းစာရှင်းလင်းပွဲမှာ ပြောပါတယ်။

ဒီနိုင်ငံတွေထဲမှာ ဝင်ငွေသိပ်ကောင်းတဲ့ နိုင်ငံ ၆၄ နိုင်ငံပါဝင်ပြီး သူတို့ဟာ ဝင်ငွေနည်းပါးတဲ့ နိုင်ငံပေါင်း ၉၂ နိုင်ငံနဲ့ လက်တွဲဆောင်ရွက်မှာ ဖြစ်ကြောင်း ကိုဗစ်ရောဂါ ကာကွယ်ရေး ဆိုင်ရာ နိုင်ငံတကာ ပါဝင်တဲ့ GAVI အဖွဲ့ အကြီးအကဲ Seth Berkley က ဆိုပါတယ်။ ဒါဟာ ကမ္ဘာ့လူဦးရေ သုံးပုံ ၂ ပုံကို ကိုယ်စားပြုတဲ့ နိုင်ငံပေါင်း ၁၅၆ နိုင်ငံ ပါဝင်ပြီး ပူးပေါင်း ဆောင်ရွက်လာတာ ဖြစ်ကြောင်း လည်း ပြောပါတယ်။

အမေရိကန်နိုင်ငံမှာ COVID- 19 ကပ်ရောဂါကြောင့် သေဆုံးရသူက တနင်္လာနေ့မှာ ၂ သိန်းနီးပါး (၁၉ ၉ ,၆၉ ဝ) ရှိနေပါပြီ။Johns Hopkins တက္ကသိုလ်က ကောက်ယူတဲ့ စစ်တမ်းတွေ အရ အမေရိကန်မှာ အကူးစက်ခံရသူကလည်း ၇ သန်းနီးပါး (၆,၈၂၉,၉ ၅၆) ရှိနေတာ ကြောင့် ဒီရောဂါ ကူးစက်မှုရော သေဆုံးမှုပါ ကမ္ဘာမှာ အများဆုံး ဖြစ်နေတာပါ။

ကူးစက်မှု များလာတာကို အမေရိကန်အနောက်တောင်ပိုင်းနဲ့ အနောက် အလယ်ပိုင်း ဒေသတွေမှာ တွေ့ရပြီး ဒါဟာ အဲဒီဒေသတွေက ကျောင်းတွေ ကောလိပ်တွေပြန်ဖွင့်ရာကနေ ကူးစက်တာ ဖြစ်ပါတယ်။

Johns Hopkins တက္ကသိုလ်က ကောက်ယူတဲ့ စစ်တမ်းအရ ကိုရိုနာဗိုင်းရပ်စ်အကူးစက်ခံရသူဟာ ကမ္ဘာတလွှားမှာ လူပေါင်း ၃၁ သန်းကျော်နေပြီဖြစ်ပြီး သေဆုံးရသူ ပေါင်းက တသန်းနီးပါး (၉၆၀,၀၀၀) ရှိနေတာပါ။

ကိုရိုနာဗိုင်းရပ်စ် ကူးစက်မှုတွေ တိုးလာတာကြောင့် ဥရောပတိုက်တလွှားက နိုင်ငံတွေမှာ ဒီရောဂါ ကူးစက်မှု ထိန်းချုပ်နိုင်ဖို့ တားမြစ် ကန့်သတ်ချက် အသစ်တွေ ချမှတ်နေကြပါတယ်။


ဗွီအိုအေ (မြန်မာပိုင်း)

https://burmese.voanews.com/a/covid-vaccine-more-than-150-countries-/5592770.html

သိန်း ၈၀၀ ကျော် အလွဲသုံးစားလုပ်တယ်လို့ ကျိုက်ထီးရိုး ဂေါပက စာရေး စွပ်စွဲခံရ

ဆံတော်ရှင်ကျိုက်ထီးရိုးစေတီတော်ကို တွေ့ရစဉ်

Photo: Nyan Soe Win / RFA

မွန်ပြည်နယ်၊ ကျိုက်ထိုမြို့နယ်၊ ဆံတော်ရှင်ကျိုက်ထီးရိုးစေတီတော် ဂေါပကအဖွဲ့ရုံးက စာရေးကြီး ဦးမြင့်သန်းက ဘုရားဘဏ္ဍာငွေကျပ်သိန်းပေါင်း ၈၆၀ ကျော်ကို အလွဲသုံးစားပြုခဲ့တယ်လို့ စွပ်စွဲခံထားရပြီးနောက် စက်တင်ဘာ ၂၁ ရက်နေ့ မနေ့က ကင်မွန်းချောင်းနယ်မြေရဲစခန်းမှာ ထိန်းသိမ်းခံလိုက်ရပါတယ်။

စခန်းမှာ တိုင်ချက်ဖွင့်ထားတယ်လို့ ကျိုက်ထီးရိုးဂေါပကအဖွဲ့ရဲ့ ဒုတိယအဖွဲ့ခေါင်းဆောင်က RFA ကိုပြောပါတယ်။

“ကျွန်တော်တို့ ရဲစခန်းမှာ တိုင်ချက်ဖွင့်ထားပြီးပြီခင်ဗျ၊ ငွေစာရင်း ကွာတာပါ၊ တရားစွဲဖို့အတွက် ကျွန်တော်တို့ တာဝန်ပေးထားတဲ့ ရုံးအဖွဲ့မှူးက တရားစွဲလိုက်ပါပြီ။ အဲဒါ ရဲစခန်းကို မေးတော့မှ အတိအကျ သိမယ်လေ၊ အမှုဖွင့်လိုက်ပြီဆိုတော့ တရားဥပဒေအတိုင်း သွားရတော့မယ်”

ရွှေဆိုင်းအရောင်းဌာနနဲ့ ဘက်စုံအလှူခံဌာနတွေကနေ ဘုရားဂေါပကအဖွဲ့ရုံးထံ ပေးသွင်း အပ်နှံထားတဲ့ငွေ ကွာဟမှု ရှိနေတယ်လို့ စွပ်စွဲတိုင်ကြားခံခဲ့ရတာလို့ ကင်မွန်းချောင်းနယ်မြေရဲစခန်းက ရဲအုပ်ဖြိုးဝေမျိုးက ပြောပါတယ်။

“အခုတော့ အမှုဖွင့်ထားပြီးပါပြီး၊ ရာဇသတ်ကြီးပုဒ်မ ၄၀၈ နဲ့ပဲ အရေးယူထားပါတယ်ခင်ဗျ၊ ဒီနေ့တော့ ရမန်ယူတယ်၊ မနက်ဖြန်မှ အသေးစိတ် စစ်ရမယ်ခင်ဗျ။ ရာဇသတ်ကြီးပုဒ်မ ၄၀၈ ဆိုတာက အာမခံပေးလို့ မရဘူးလေ၊ အဲဒါ ကျွန်တော်တို့ ရမန်နဲ့ စစ်ရတာ၊ ရမန် တစ်လရတာပေါ့နော်”

ပစ္စည်းစီမံခန့်ခွဲပိုင်ခွင့်ကို တနည်းနည်းနဲ့ အပ်နှံခြင်းခံထားရချိန် အဲဒီပစ္စည်းနဲ့ စပ်လျဉ်းပြီး ရာဇဝတ်မကင်းတဲ့ ဖောက်ဖျက်မှုကို ကျူးလွန်မယ်ဆိုရင် ထောင်ဒဏ် ခုနစ်နှစ်အထိ ချမှတ်နိုင်တဲ့အပြင် ငွေဒဏ်လည်း ချမှတ် နိုင်တယ်လို့ ရာဇသတ်ကြီးဥပဒေ ပုဒ်မ ၄၀၈ မှာ ပြဋ္ဌာန်းထားပါတယ်။


RFA Burmese

https://www.rfa.org/burmese/news/kyite-htee-yoe-guardian-accused-09222020064641.html

ထိုင်းရောက်မြန်မာတွေ နေရပ်ပြန်မှု လျော့နည်းလာ

ထိုင်းနိုင်ငံကနေ မြန်မာပြည်ပြန်လာသူတွေကို ၂ဝ၂ဝ စက်တင်ဘာ ၂၀ ရက်နေ့က မြဝတီ အမှတ်၂ တံတားမှာ တွေ့ရစဉ်

Photo: Thant Zin Aung's FB

ထိုင်းနိုင်ငံရောက်  မြန်မာအလုပ်သမားတွေ နယ်စပ်ဂိတ်ဖြတ်ကျော်ပြီး နေရပ်ပြန်နိုင်ကြပေမယ့် မြန်မာနိုင်ငံမှာ ကိုရိုနာဗိုင်းရပ်စ် ပျံ့နှံ့မှု များပြားလာတာကြောင့်  နေရပ်ပြန်ဖို့ တွန့်ဆုတ်လာကြပါတယ်။

မဲဆောက်မြို့ ချစ်ကြည်ရေးတံတား အမှတ် (၂) ကနေ ဖြတ်ပြန်သူ လေးငါးရာ နေ့စဉ်ရှိခဲ့ပေမယ့်  အခုဆိုရင် တစ်ရာကျော်လော်ပဲ ရှိတော့တယ်လို့ မဲဆောက်မြို့က မြန်မာအလုပ်သမား သံအရာရှိ ဦးဝေလင်းမောင်က ပြောပါတယ်။

“အရင်ထက်စာရင် ရောဂါဖြစ်နေတဲ့တဲ့ကာလဆိုတော့ ပြန်တဲ့လူကနည်းတယ်။ မနေ့ကဆိုရင် ၁၄၀ လောက်ပဲ ရှိတယ်။ ပုံမှန်အတိုင်းဆိုရင် တစ်ရက်ကို လေးရာ၊ ငါးရာပေါ့။ အခုတော့ နောက်ပိုင်း ရောဂါနည်းနည်းများတဲ့ ကာလမှာ တစ်ရာလောက်ပဲ ပြန်လာပါတယ်။ နောက်တစ်ခုက အလုပ်သက်တမ်းတိုးပေးတဲ့ ကိစ္စတွေရှိမယ်။   တချို့ အလုပ်ပြန်လုပ်ခွင့်မဲ့သွားတဲ့ ကလေးတွေရှိတယ်။ အဲဒီကလေးတွေ၊ အဲဒီအလုပ်သမားတွေကတော့ အလုပ်လုပ်ခွင့်ပြန်ရသွားတော့ တချို့အလုပ်သမားတွေက (နယ်စပ်ကို) ပြန်မလာတော့ဘူး။ ဟိုမှာပဲ သက်တမ်းပြန်တိုးတယ်”

နေရပ်ပြန်သူ နည်းသွားတဲ့အကြောင်းရင်းထဲမှာ အလုပ်လုပ်ခွင့် သက်တမ်းကုန်နေသူတွေကို ထိုင်းအစိုးရက သက်တမ်း ပြန်တိုးပေးနေတဲ့အချက်လည်း ပါဝင်နိုင်တယ်လို့   ဦးဝေလင်းမောင်က ပြောပါတယ်။

မတ်လ ၂၁ ရက်နေ့ကနေ စက်တင်ဘာလ ၂၁ ရက်နေ့ထိ ဒီတံတားကနေနေရပ်ပြန်သူ တစ်သိန်း နှစ်သောင်းကျော် ရှိနေပြီလို့ သူက ပြောပါတယ်။

ထိုင်းနိုင်ငံမှာ အစိုးရချင်း နှစ်နိုင်ငံ နားလည်မှုစာချွန်လွှာနဲ့ အလုပ်လုပ်နေတဲ့ MOU အလုပ်သမား ရှစ်သိန်းကျော် ရှိပြီး မည်သူမည်ဝါဖြစ်ကြောင်း အထောက်ထားပြနိုင်သူ တစ်သန်းကျော်ရှိတယ်လို့ မြန်မာအလုပ်သမား သံအရာရှိ ရုံးစာရင်းတွေအရ သိရပါတယ်။

ကပ်ဘေးကာလအတွင်း  စက်ရုံအလုပ်ရုံတွေ ပိတ်လိုက်တာကြောင့်  အလုပ်သမားတွေ နေ့စဉ် နေရပ်ပြန်နေချိန်မှာ ထိုင်းအစိုးရက  သက်တမ်းကုန်သွားတဲ့ အလုပ်သမားတွေကို ၂၀၂၂ ခုနှစ် မတ်လထိ သက်တမ်းတိုးပေးခဲ့ပါတယ်။

ကပ်ဘေးကာလအတွင်း မဲဆောက်-မြဝတီ၊ ကော့သောင်း- ရနောင်းလမ်း၊ တာချီလိတ်-မယ်ဆိုင် လမ်းတွေကနေ ပြန်သူတွေနဲ့ပါဆိုရင် တစ်သိန်းခွဲကျော်ရှိနေပြီလို့ သိရကြောင်း မြန်မာပြည်သားအရေး ပူးတွဲလှုပ်ရှားမှု ကော်မတီ ဥက္ကဋ္ဌ ဦးမိုးကြိုးကတော့ပြောပါတယ်။

မြန်မာနိုင်ငံမှာ ကိုရိုနာဗိုင်းရပ်စ်ကူးစက်မှုနဲ့ သေဆုံးနှုန်းဟာ ထိုင်းနိုင်ငံထက် ပိုများလာနေပါပြီ။

မြန်မာနိုင်ငံအတွင်း ကူးစက်မှု မြင့်တက်လာနေတာကြောင့် ထိုင်းနိုင်ငံထဲကိုလည်း နှစ်ပတ်အတွင်း ကူးစက် လာနိုင်ကြောင်း ထိုင်းကျန်းမာရေးဝန်ကြီးဌာနက ဒီလဆန်းပိုင်းက သတိပေးထားပါတယ်။

နယ်စပ်ကို တရားမဝင် ဖြတ်ကျော်ဝင်ရောက်သူတွေကို  ထိုင်းအာဏာပိုင်တွေက ဖမ်းဆီး အရေးယူနေပါတယ်။

ထိုင်းနိုင်ငံမှာ ရက်ပေါင်း တစ်ရာကျော် ပြည်တွင်း ကူးစက်မှုမရှိတော့လို့ ကန့်သတ်ချက်တွေ ဖြေလျှော့ပေးနေ ချိန်မှာ နေရပ်ပြန်ရွှေ့ပြောင်း မြန်မာအလုပ်သမားထဲက နှစ်နှစ်အရွယ် ကလေးငယ်မှာ ပိုးကူးစက်ခံရတာ တွေ့တယ်လို့  စက်တင်ဘာ ၁၃ ရက်နေ့က အတည်ပြုခဲ့ပါတယ်။

သူတို့ မိသားစု အလုပ်လုပ်ခဲ့တဲ့ ထိုင်းနိုင်ငံ နကော်စီဌာမရ၊ စလေဘူရီနဲ့ အယုဒ္ဒယမြို့တွေမှာ ကျန်းမာရေး ဝန်ထမ်းတွေ စစ်ဆေးခဲ့ပါတယ်။


RFA Burmese

https://www.rfa.org/burmese/news/returning-burmese-workers-from-thai-decrease-09222020053056.html

သုဝဏ္ဏကိုဗစ်ကုသရေးဌာနကို ခုတင် ၇၇၀ ဆံ့အဖြစ် ထပ်မံတိုးချဲ့

သုဝဏ္ဏအားကစားကွင်းအတွင်း ကိုဗစ်အရေးပေါ်လူနာကုသရေးဌာန စတင်တည်ဆောက် 

ဧရာဝတီဖောင်ဒေးရှင်းရဲ့ လှူဒါန်းမှုနဲ့ ငါးရက်အတွင်းအပြီး တည်ဆောက်ထားတဲ့ သုဝဏ္ဏကိုဗစ်ယာယီကုသရေးဌာနကို အခုအခါ ခုတင် ၇၇၀ ဆံ့အဖြစ် ထပ်မံတိုးချဲ့ဆောက်လုပ်ဖို့ ရန်ကုန်ကိုဗစ်ကော်မတီက ဆုံးဖြတ်ဆောင်ရွက်နေပြီဖြစ်တယ်လို့ ဧရာဝတီဖောင်ဒေးရှင်းက စက်တင်ဘာ ၂၂ မှာ ကြေညာပါတယ်။ 

လက်ရှိလူနာတွေ လက်ခံထားရှိ ကုသနေပြီဖြစ်တဲ့ သုဝဏ္ဏမြတ်ခင်းတုအားကစားကွင်းက ကုသရေးဌာနကို ဧရာဝတီ စင်တာ (A) အဖြစ် သတ်မှတ်ထားပြီး အဲဒီမှာ လူနာ ၄၂၅ ဦးကို ကုသပေးနေပြီဖြစ်ပါတယ်။

ဓာတ်ပုံ-ဧရာဝတီဖောင်ဒေးရှင်း

သုဝဏ္ဏလူငယ်လေ့ကျင့်ရေးစခန်းက လက်ရွေးစင် ကစားသမားအဆောင်ကိုတော့ ဧရာဝတီ စင်တာ (B) အဖြစ် ကုတင် ၂၇၀ တိုးချဲ့မှာဖြစ်ပါတယ်။

သုဝဏ္ဏအားကစားကွင်းမှာတော့ အရေးပေါ်လူနာတွေကို အနီးကပ်ကြပ်မတ် ကုသပေးနိုင်ဖို့ ၇၅ ခုတင်ဆံ့ စင်တာ (C) ကို ပြင်ဆင်ထားရှိမှာဖြစ်ပါတယ်။ 

စင်တာ (B) နဲ့(C) တွေမှာ ဒီစက်တင်ဘာလကုန်ကစပြီး လူနာတွေ လက်ခံနိုင်ဖို့ ကြိုးပမ်းဆောင်ရွက်နေတယ်လို့ ဆိုပါတယ်။ 

တိုးချဲ့မယ့် ကုသရေးဌာနတွေအပါအဝင် စင်တာ ၃ ခုလုံးမှာ ကျန်းမာရေးနဲ့စေတနာ့ဝန်ထမ်း စုစုပေါင်း ၃၅၀ အတွက် နေထိုင်မယ့်အဆောင်နေရာတွေကိုပါ စီမံဆောင်ရွက်ထားတယ်လို့ ဧရာဝတီဖောင်ဒေးရှင်းက သတင်းထုတ်ပြန်ထားပါတယ်။ 

မြန်မာမှာ စက်တင်ဘာ ၂၂ ရက်ညနေပိုင်းထိ ကိုဗစ်အတည်ပြုလူနာ ၆,၄၇၁ ဦးနဲ့ သေဆုံးသူက ၁၀၀ ဦးရှိပြီဖြစ်ပါတယ်။ 

Update: ကျန်းမာရေးနဲ့အားကစားဝန်ကြီးဌာနရဲ့ အခု ညနေ ငါးနာရီထုတ်ပြန်ချက်အရ သေဆုံးသူ ၁၃ ဦးထပ်မံတွေ့ရှိရတာကြောင့် စုစုပေါင်းသေဆုံးသူ ၁၁၃ ဦးထိ ရှိလာပြီဖြစ်ပါတယ်။ 


BBC Burmese

https://www.facebook.com/BBCnewsBurmese

မြန်မာမှာ ကိုဗစ်လူနာတွေထဲ သေဆုံးသူ တစ်ရာ ရှိပြီ

ကပ်ရောဂါအတွက် ကျပ်ဘီလီယံ တစ်ထောင်သုံးတာဟာ သမိုင်းတလျှောက် အများဆုံးသုံးတဲ့ပမာဏ ဖြစ်

ရန်ကုန်တစ်တိုင်းလုံး ကိုကိုးကျွန်းကလွဲလို့ အကျုံးဝင်တဲ့ အိမ်မှာနေဖို့ အမိန့် စတင်အသက်ဝင်တဲ့ စက်တင်ဘာ ၂၁ ရက်မှာပဲ မြန်မာနိုင်ငံ မှာ ကိုဗစ်အတည်ပြုလူနာစုစုပေါင်းက ခြောက်ထောင်ကျော်ခဲ့ပါပြီ။

လူနာ ခြောက်ထောင်ကျော်မှာ ရန်ကုန်တစ်မြို့တည်းကပဲ လေးထောင်ခန့် ရှိပါတယ်။

နိုင်ငံတော်ရဲ့အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကလည်း ရန်ကုန်မှာ အိမ်မှာနေဖို့အမိန့် စတင်အသက်ဝင်တဲ့နေ့မှာ တိုင်းပြည်ကို မိန့်ခွန်း ပြောခဲ့ပါတယ်။

ကိုဗစ်ရောဂါနဲ့ပတ်သက်တဲ့ လိုအပ်ချက်တွေနဲ့ အကျိုးဆက်တွေအတွက် ကျပ်ဘီလီယံတစ်ထောင်ကျော် သုံးဖို့ ဖယ်ထားတဲ့အကြောင်း ဒေါ်အောင်ဆန်းစုကြည်ကပြောခဲ့ပါတယ်။

ဒါက ကပ်ရောဂါအတွက် သမိုင်းတလျှောက် အများဆုံးသုံးတဲ့ပမာဏလည်းဖြစ်ပါတယ်။

တက်သုတ်ရိုက်အမိန့်စာ

ရုံးပိတ်ရက် တနင်္ဂနွေမှာ ပြုလုပ်တဲ့ ပြည်ထောင်စုအစိုးရအဖွဲ့အစည်းအဝေးအပြီး နေ့မကူးခင်မှာပဲ ကျန်းမာရေးနဲ့ အားကစားဝန်ကြီးဌာနဟာ ပင်လယ်ထဲ က ကိုကိုးကျွန်းကလွဲလို့ ရန်ကုန်တစ်တိုင်းလုံးကို အိမ်မှာနေဖို့ အမိန့်ကို အလျင်အမြန်ပဲ ထုတ်ခဲ့ပါတယ်။

စက်တင်ဘာ ၂၁ ရက် မနက် ၈ နာရီမှာ အသက်ဝင်မယ့်အမိန့်ကို စက်တင်ဘာ ၂၀ ရက်ည ၈ နာရီမှာထုတ်လို့ ဝေဖန်မှုတွေ ရှိခဲ့ပါတယ်။ ဒါ့အပြင် စာပါညွှန်ကြားချက်တွေ မရှင်းလင်းတဲ့အတွက် လူထုကြား အငြင်းပွားစရာတချို့ ဖြစ်ခဲ့ပါတယ်။

စာထဲမှာဖော်ပြချက်အရတော့ အစိုးရဝန်ထမ်းတွေရုံးတက်ဖို့ကို နှစ်ပတ်ဆင်း၊ နှစ်ပတ်နား ဆောင်ရွက်ရမှာဖြစ်ပါတယ်။

အထည်ချုပ်လို လက်ခစားလုပ်ငန်းတွေက ဝန်ထမ်းတွေကတော့ လာမယ့် စက်တင်ဘာ ၂၄ ရက်ကနေ အောက်တိုဘာ ၇ ရက် အထိ အလုပ်မသွားဖို့ အမိန့်စာမှာ ဖော်ပြထားပါတယ်။

ဘဏ်နဲ့ငွေကြေးလုပ်ငန်းတွေ၊ စက်သုံးဆီဆိုင်တွေ၊ စားသောက်ကုန်နဲ့သားငါးအအေးခန်းတွေ၊ ဆေးနဲ့ဆေးပစ္စည်းတွေ၊ရေသန့်နဲ့ နေ့စဉ်တစ်ကိုယ်ရည်သုံးပစ္စည်းထုတ်သူတွေကလွဲလို့ ပုဂ္ဂလိက အဖွဲ့အစည်းတွေနဲ့ ကုမ္ပဏီတွေကတော့ အိမ်ကနေအလုပ်လုပ်ရမှာပါ။

ဒါပေမဲ့ အိမ်မှာလုပ်လို့မရတဲ့ ပုဂ္ဂလိကလုပ်ငန်းတချို့ဟာ အလုပ်တွေရပ်ရမလား၊ မရပ်ရဘူးလား ဆိုတာ ခွဲခြားရခက်ခဲ့တာတွေ ရှိခဲ့ပါတယ်။

အဲဒီလိုဝေခွဲမရဖြစ်နေတဲ့လုပ်ငန်းတွေထဲမှာ အိမ်အရောက်ပို့ဆောင်ရေးလုပ်ငန်းတွေကနေ သံရုံးလို နေရာအထိ ပါတယ်လို့ ISP Myanmar ရဲ့ ဒါရိုက်တာ ဦးအောင်သူငြိမ်းက ဘီဘီစီကိုပြောပါတယ်။

'အမိန့်စာက ရှင်းလင်းမှုမရှိလို့ ပြည်သူတွေကြားမှာ နားလည်သလိုအဓိပ္ပာယ်ဖွင့်နေကြရတယ်' လို့ လည်း သူကပြောပါတယ်။

ပို့ဆောင်ရေးနဲ့ ဆက်သွယ်ရေး ဝန်ကြီးဌာနက လေဆိပ်၊ ဆိပ်ကမ်း အလုပ်တွေနဲ့ ဆက်စပ်တဲ့ ပုဂ္ဂလိက ကုမ္ပဏီတွေကို လုပ်ငန်းခွင်ထဲ သွားရောက်ခွင့်ရဖို့ ကျန်းမာရေးနဲ့အားကစားဝန်ကြီးဌာနဆီ စာပို့ခဲ့ပါတယ်။

ရှင်းလင်းတဲ့အသေးစိတ်ထုတ်ပြန်ချက်တွေ လိုအပ်

ရောဂါကူးစက်ပျံ့နှံ့မှုကို ထိန်းချုပ်ဖို့ အချိန်လုနေရတာကြောင့် ပြည်ထောင်စုအစိုးရအဖွဲ့ အစည်းအဝေးအပြီးမှာပဲ ကျန်းမာရေးဝန်ကြီးဌာနက ဒီအမိန့်ကို အလျင်အမြန်ပဲ ထုတ်ခဲ့တာဖြစ်တယ်လို့ အစိုးရအဖွဲ့ဝင်ဝန်ကြီးတစ်ဦးက ဘီဘီစီကိုပြောပါတယ်။

တခြား သက်ဆိုင်ရာဝန်ကြီးဌာနတွေက အသေးစိတ်ထုတ်ပြန်ချက်တွေ ထပ်ထုတ်ဖို့ရှိတယ်လို့ သူကဆက်ပြောပါတယ်။

ကူးစက်မှုတွေဖြတ်တောက်ဖို့ လူတွေအိမ်ထဲမှာနေဖို့လိုအပ် လို့ ကျန်းမာရေးပြောခွင့်ရသူ ပြောပါတယ်။

အမျိုးသားအဆင့် ကိုဗစ်-၁၉ ထိန်းချုပ်ရေး ဗဟိုကော်မတီက အများပြည်သူနဲ့သက်ဆိုင်တဲ့ ကိစ္စတွေမှာ ရှင်းလင်းတဲ့ ညွှန်ကြားချက်တွေပေးပြီးပြီလို့တော့ သူကပြောပါတယ်။

စားသောက်ဆိုင်လုပ်ငန်းတွေကိုလုံးဝမပိတ်သိမ်းဘဲ ပါဆယ်စနစ်နဲ့ရောင်းချဖို့၊ အိမ်အရောက်ပို့ အစားအသောက်လုပ်ငန်းတွေ ဆက်လက်လည်ပတ်ဖို့၊ ဈေးဝယ်စင်တာတွေမှာဆိုလည်း အဝတ်အထည်နဲ့ ဇိမ်ခံပစ္စည်းတွေကလွဲလို့ ဆေးဝါး၊ သားငါး၊ ကုန်ခြောက် နဲ့ လျှပ်စစ်ပစ္စည်းတွေ ဆက်ရောင်းဖို့ ညွှန်ကြားထားတယ်လို့ သူက ဆက်ပြောပါတယ်။

"အမိန့်စာနဲ့ ရုံးစာ ဆိုတာရှိတယ်။ ကျန်းမာရေးဝန်ကြီးဌာနကထုတ်လိုက်တာအမိန့်စာ။ ရုံးစာတွေထဲမှာ အသေးစိတ်ပါတယ်။ လူတွေက အမိန့်စာပဲ ဖတ်ရပြီး ရုံးစာမဖတ်ရတဲ့အခါ မရှင်းလင်းတာတွေဖြစ်သွားတာပါ။ သက်ဆိုင်တဲ့ဌာနဆိုင်ရာတွေက ဆက်ထုတ်ပါလိမ့်မယ်" လို့ သူကပြောပါတယ်။

ပြည်သူကြားမှာ အမိန့်စာနဲ့ပတ်သက်လို့ ကျန်းမာရေးလိုအပ်ချက်ကြောင့်ဆိုတာကို ရှင်းရှင်းလင်းလင်းနားလည်ခဲ့ကြပြီး ရုတ်တရက် ထုတ်ပြန်လိုက်လို့ပြင်ဆင်ချိန်မရတဲ့အပိုင်းနဲ့ တိကျတဲ့အသေးစိတ်ညွှန်ကြားချက်တွေ မပါဝင်တဲ့အချက်ကိုပဲ ထောက်ပြခဲ့ကြတာဖြစ်ပါတယ်။

ကူးစက်မှုတွေဖြတ်တောက်ဖို့အိမ်ထဲမှာနေကြဖို့လို

ကျန်းမာရေးဝန်ကြီးဌာနရဲ့အမိန့်စာမှာ မဖြစ်မနေ ဈေးဝယ်စရာရှိရင် တစ်ယောက်ပဲ အပြင်ထွက်ဖို့၊ ဆေးခန်းသွားရင် နှစ်ယောက်ထက်မပိုဖို့ ပါဝင်ပါ တယ်။ သတ်မှတ်ဦးရေထက် ပိုချင်ရင်ပဲဖြစ်ဖြစ်၊ တခြားအရေးပေါ်ကိစ္စတွေအတွက် သွားစရာရှိရင်ပဲဖြစ်ဖြစ် ရပ်ကွက်အုပ်ချုပ်ရေးကို ခွင့်ပြုချက် တောင်းပြီးသွားဖို့ ညွှန်ကြားထားပါတယ်။

ကပ်ရောဂါ ထိန်းချုပ်တဲ့အခြေအနေမှာ တစ်ရက်ဆို ဆိုသလောက် အရေးပါလို့ ဒီလိုအမိန့်စာကို အလျင်အမြန်ထုတ်ရတာလို့ ကျန်းမာရေးဝန်ကြီးဌာန ပြောခွင့်ရပုဂ္ဂိုလ် ဒေါက်တာသန်းနိုင်စိုးက ပြောပါတယ်။ လော့ဒေါင်းချတာမျိုးမဟုတ်ဘဲ အရေးကြီးတဲ့အခြေအနေအလိုက် ဖြေလျှော့မှုတွေ ပေးထားတယ်လို့လည်း သူကပြောပါတယ်။

"လူတွေတစ်ယောက်စီကနေ တစ်ယောက် ကူးနေတာတွေကို အမြန်ဖြတ်တောက်ဖို့ အိမ်ထဲမှာပဲ အမြန်နေခိုင်းဖို့လိုနေပြီ။ ဒါမှ ထိန်းချုပ်ရေးမှာ ကျွန်တော်တို့က နိုင်နိုင်နင်းနင်း ပြန်ဖြစ်မှာ" လို့ သူကပြောပါတယ်။

စံချိန်တင်ပိုးတွေ့မှုတွေ ဆက်တိုက်တွေ့ရှိနေလို့ ကုသရေးပိုင်းမှာ ဝန်ထုပ်ဝန်ပိုးတွေဖြစ်နေပါပြီ။ လက်ရှိအခြေအနေအရ ရန်ကုန်မှာ ကိုဗစ်-၁၉ ကုသပေးတဲ့နေရာက ၄ ခုပဲရှိပြီး ဖောင်ကြီး၊ ဝေဘာဂီ၊ တောင်ဥက္ကလာနဲ့ သုဝဏ္ဏမြက်ခင်းတုဘောလုံးကွင်းက ဧရာဝတီကိုဗစ်ကုသရေး စင်တာတို့ပဲဖြစ်ပါတယ်။

ကျန်တဲ့ ကိုဗစ်စင်တာတွေက ရောဂါကုသတဲ့နေရာတွေမဟုတ်ဘဲ ရောဂါလက္ခဏာ မပြသသူတွေနဲ့မပြင်းထန်တဲ့ သူတွေကို သီးခြား ခွဲထားပြီးစောင့်ကြည့်တဲ့နေရာတွေဖြစ်ပါတယ်။

နေရာတွေပြည့်နေလို့ ကိုဗစ်စင်တာတွေ ထပ်တိုးချဲ့ရင်တောင် ဆေးပစ္စည်းနဲ့ ကျန်းမာရေးဝန်ထမ်းပိုင်း အရင်းအမြစ်အရ ကုသရေးဌာနတွေ ထပ်ချဲ့နိုင်မှာ မဟုတ်တော့ဘဲ စောင့်ကြည့်ရေးစင်တာတွေပဲ ထပ်ချဲ့နိုင်မှာဖြစ်တယ်လို့ ကုသရေးပိုင်းက ဆရာဝန်တွေကပြောပါတယ်။

"ကိုဗစ်စင်တာတွေမှာ ရောဂါပြင်းထန်တဲ့သူရှိလာရင် အရေးပေါ်လူနာတင်ယာဉ်နဲ့ ကုသရေးစင်တာတွေကို ပို့ဆောင်ပြီးကုသမှာပါ" လို့ ရန်ကုန် ဆေးရုံကြီးအရေးပေါ်ဌာနက ပါမောက္ခ ဒေါက်တာ မော်မော်ဦးက ပြောပါတယ်။

မြန်မာမှာ စက်တင်ဘာ ၂၂ ရက်မနက်ပိုင်းအထိ ကိုဗစ်အတည်ပြုလူနာ ခြောက်ထောင်ကျော်နဲ့ သေဆုံးသူက ၁၀၀ ဦးရှိပြီဖြစ်ပါတယ်။ 


BBC Burmese

https://www.bbc.com/burmese/burma-54245106

မန္တလေးခရိုင်အတွင်း COVID-19 ရောဂါ ဓာတ်ခွဲအတည်ပြုလူနာ (၉၂)ဦး ရှိပြီ


မန္တလေးခရိုင်အတွင်း(၂၂-၉-၂၀၂၀) ရက်နေ့ နံနက်ပိုင်းအထိ COVID-19 ရောဂါ ဓာတ်ခွဲအတည်ပြုလူနာ (၉၂)ဦး ရှိကြောင်း မန္တလေးတိုင်းဒေသကြီးအစိုးရအဖွဲ့ထံမှ သတင်းရရှိသည်။ 

မန္တလေးခရိုင်အတွင်းရှိ COVID-19 ရောဂါ ဓာတ်ခွဲအတည်ပြုလူနာများမှာ အောင်မြေသာစံမြို့နယ်တွင် (၄)ဦး၊ ချမ်းအေးသာစံမြို့နယ်တွင် (၂၁)ဦး၊ မဟာအောင်မြေမြို့နယ်တွင် (၂၀)ဦး၊ ချမ်းမြသာစည်မြို့နယ်တွင် (၈)ဦး၊ ပြည်ကြီးတံခွန်မြို့နယ်တွင် (၄)ဦး၊ အမရပူရမြို့နယ်တွင် (၂၅)ဦး၊ ပုသိမ်ကြီးမြို့နယ်တွင် (၁၀)ဦးစီ ရှိကြောင်း (၂၂-၉-၂၀၂၀) ရက်နေ့ နံနက်ပိုင်းအထိ စာရင်းများအရ သိရသည်။ 

မန္တလေးတိုင်းဒေသကြီးအတွင်း (၂၂-၉-၂၀၂၀)ရက်နေ့နံနက်ပိုင်းအထိ COVID-19 ဓာတ်ခွဲအတည်ပြုလူနာ (၁၇၈)ဦး ရှိပြီဖြစ်ပြီး မြန်မာနိုင်ငံတွင် ယနေ့(၂၂-၉-၂၀၂၀) နံနက် (၈:၀၀) နာရီအထိ  COVID-19 ရောဂါ ဓာတ်ခွဲအတည်ပြုလူနာ (၆၄၇၁)ဦး ရှိပြီဖြစ်သည်။


The Mandalay News Journal

https://www.facebook.com/TheMandalayNewsJournal

နိုင်ငံ့ဝန်ထမ်းများ လစာ (၂) လစာ ထုတ်ချေးခြင်းကို အောက်တိုဘာ (၁) ရက် စတင်မည်


COVID-19 ကြောင့် ဖြစ်ပေါ်လာနိုင်သည့် သက်ရောက်မှုများအပေါ် ကုစားနိုင်ရေးအတွက် နိုင်ငံ့ဝန်ထမ်း (အမြဲတမ်း) များအား လစာ (၂) လစာ ကြိုတင် ထုတ်ပေး၍ ဆိုင်းငံ့ကာလ (၆) လ၊ ပြန်ဆပ်ကာလ (၁) နှစ် သတ်မှတ်ကာ အတိုးမဲ့ ထုတ်ချေးခြင်းကို အောက်တိုဘာ (၁) ရက်နေ့တွင် စတင် ဆောင်ရွက်မည် ဖြစ်သည်။ 

တစ်နိုင်ငံလုံး အတိုင်းအတာဖြင့် အမြဲထမ်းဝန်ထမ်း စုစုပေါင်း ၁,၀၇၇,၄၉၃ ဦး အတွက် ငွေကျပ် ၅၅၄.၉၇၃ ဘီလီယံ ကို ထုတ်ချေးသွားမည် ဖြစ်ကြောင်း နိုင်ငံတော်သမ္မတရုံးမှ သိရှိရသည်။

ပြန်လည် ပေးဆပ်ရမည့် ချေးငွေ ဖြစ်သောကြောင့် ပုံမှန်ဝင်ငွေ ရရှိသောအမြဲတမ်း ဝန်ထမ်းများကိုသာ ထုတ်ချေးခြင်း ဖြစ်ကြောင်း သိရှိရသည်။


The Mandalay News Journal

https://www.facebook.com/TheMandalayNewsJournal

ကိုဗစ်ကြောင့်ပိတ်ထားရတဲ့ မူဆယ် ရွှေလီ နယ်စပ်ပြန်ဖွင့်

တရုတ်မြန်မာနယ်စပ် ရွှေလီမြို့ရှိ နယ်စပ်စစ်ဆေးရေးဂိတ်။ (စက်တင်ဘာ ၃၀၊ ၂၀၀၇)

မြန်မာနိုင်ငံနဲ့နယ်စပ် တရုတ်နိုင်ငံ ရွှေလီမြို့မှာ ကိုဗစ်ကပ်ရောဂါ ကာကွယ်တားဆီးရေးအတွက် သီတင်းတပတ်ကြာ အသွားအလာ ကန့်သတ်ထားတာတွေ အဆုံးသတ်လိုက်တာကြောင့် နယ်စပ်ကုန်သွယ်ရေးတွေ ပြန်လည်စတင်လိုက်တဲ့အကြောင်းကို ဗွီအိုအေမြန်မာပိုင်းသတင်းထောက် ကိုဇော်ထက်က တင်ပြထားပါတယ်။

သီတင်းတပတ်ကြာ အသွားအလာ ကန့်သတ်ထားတဲ့ တရုတ်ရွှေလီမြို့ကို မနေ့က ညပိုင်းက ဖြေလျှော့လိုက်သလို မူဆယ်နယ်စပ် အကောက်ခွန်ဂိတ်ကိုလည်း တရုတ်နိုင်ငံက ဒီနေ့ပဲပြန်ဖွင့်လိုက်တာကြောင့် နှစ် နိုင်ငံက ကုန်ကားတွေ အပြန်အလှန်ဝင်ထွက်နေကြပါပြီ။

ရွှေလီမြို့ရောက် မြန်မာနိုင်ငံသား နှစ် ယောက်မှာ ကိုဗစ်ရောဂါပိုး တွေ့ရှိခဲ့ပြီးနောက် အသွားအလာကန့်သတ်မှုတွေ စတင်ခဲ့တဲ့ စက်တင်ဘာ ၁၅ ရက်က စလို့ တရုတ်ဘက်သွားလို့မရဘဲ ၇ ရက်လောက် စောင့်နေရတဲ့ ကုန်ကား ၁၀၀ ကျော်ဟာလည်း ဒီနေ့ပဲ ဝင်ခွင့်ရကုန်ကြပြီလို့ မူဆယ်ဆန်ကုန်စည်ဒိုင်ရဲ့ ဒုဥက္ကဋ္ဌ ဦးမင်းသိန်းက VOA ကိုပြောပါတယ်။

“ဒီနေ့အတိုင်းအတာနဲ့ပြောရရင် ရွှေလီမြို့ထဲကို အဝင်ကုန်ကားမျိုးစုံ ပစ္စည်းမျိုးစုံ မြန်မာပြည်ကဆိုရင် ဆန်တို့၊ ပဲတို့၊ သကြားတို့၊ ကြက်သွန်တို့၊ ငရုပ်သီးတို့၊ အခြားကုန်မျိုးစုံတင်ထားတဲ့ ကားအစီး ၁၃၀ လောက်က စဝင်နေပြီ ရွှေလီမြို့ထဲကို။ အဲဒီအတွက် ၇ ရက်တာ ရပ်ဆိုင်းသွားတဲ့ တရုတ်- မြန်မာ ကုန်သွယ်ရေးဟာ ဒီနေ့မှာတော့ ပြန်ပြီးတော့ လှုပ်လှုပ်ရှားရှား ဖြစ်လာပြီး ဝင်လို့ထွက်လို့ ရသွားပြီပေါ့လေ။”

တရုတ်နိုင်ငံဘက်က ဆောက်လုပ်ရေးပစ္စည်း၊ အိမ်သုံးပစ္စည်း၊ အထည်အလိပ်နဲ့ ဆေးဝါးပစ္စည်းတွေလည်း ဒီနေ့ပဲ မြန်မာနိုင်ထဲ ဝင်လာကြောင်းလည်း ပြောပါတယ်။

ရွှေလီမြို့ထဲမှာနေကြတဲ့ မြန်မာအလုပ်သမားအများစုလည်း ဒီနေ့ စက်ရုံတွေ၊ စျေးဆိုင်တွေမှာ အလုပ်ပြန်ဆင်းကြပါတယ်။ ဒါပေမဲ့ လုပ်ငန်းခွင် ပြန်ဝင်မယ် ဆိုရင်တော့ ရွှေလီမြို့ ကျန်းမာရေးဌာနက ထုတ်ပေးတဲ့ ကိုဗစ်ရောဂါစစ်ဆေးပြီးစီးကြောင်း အထောက်အထားစာရွက် ပြရမယ်လို့ ဒီနေ့အလုပ်ပြန်ဆင်းတဲ့ မြန်မာလုပ်သား ကိုနေမင်းဖြိုးက ပြောပါတယ်။

“ဒီနေ့ဆိုရင် အလုပ်တွေ တော်တော်များများ ပြန်လုပ်ရပြီလေ။ စက်ရုံတွေရော၊ ဒီလိုမျိုး အလုပ်သမားတွေရော အကုန်လုံး ဖွင့်တယ်၊ ဖွင့်တာကတော့ အခု။ သူတို့ကျန်းမာရေး စစ်ဆေးပြီးသား ဆိုပြီးတော့မှ စာရွက်ကလေးတွေ ပေးတာလေ၊ အဲဒီစာရွက် ရှိတဲ့သူဆိုရင် သွားလို့လာလို့၊ လုပ်လို့ရတယ်။ မရှိဘူးဆိုရင် ဖမ်းမယ်ပေါ့ အဲဒီလို။”

ပြီးခဲ့တဲ့ စက်တင်ဘာ ၁၃ရက်မှာ မြန်မာအလုပ်သမား ၂ယောက်မှာ ကိုဗစ်ရောဂါပိုး စစ်ဆေးတွေ့ရှိပြီးတဲ့နောက် ရွှေလီအာဏာပိုင်တွေက အရေးပေါ် ကျန်းမာရေးကန့်သတ်ချက်တွေချပြီး တမြို့လုံးအတိုင်းအတာနဲ့ ရောဂါစစ်ဆေးမှုတွေ တပတ်ကြာ လုပ်ခဲ့တာပါ။ မြန်မာ နှစ် ယောက်ရဲ့ လက်ရှိ ကျန်းမာရေး အခြေအနေက တည်ငြိမ်နေပြီလို့ တရုတ်သတင်းဌာနတွေမှာ ရေးသားထားပါတယ်။

ရွှေလီတမြို့နယ်လုံး ကိုဗစ်ရောဂါ စစ်ဆေးတာတွေ တပတ်လောက် လုပ်ပြီးတဲ့နောက်မှာ ရောဂါရှိသူ ထပ်မတွေ့တော့လို့ မြို့အချက်အချာ နေရာတွေမှာ အရေးပေါ် ကျန်းမာရေး ကန့်သတ်ချက်တွေကို မနေ့က စက်တင်ဘာ ၂၁ ရက်မှာ ဖြေလျှော့ပေးလိုက်ပြီး ညပိုင်းမှာလည်း တမြို့နယ်လုံး မီးရှုးမီးပန်းတွေ ပစ်ဖောက်ခဲ့တာပါ။

ယူနန်ပြည်နယ်ထဲ ကိုဗစ်အတည်ပြုလူနာ ထပ်မတွေ့တော့တဲ့အချိန် မြန်မာပြည်တွင်း အရေအတွက် မြန်မြန်ဆန်ဆန်တိုးလာတာကလည်း ကုန်သွယ်ရေးနဲ့ လူအဝင်အထွက်အတွက် အတားအဆီးအနေနဲ့ ရှိနေဦးမယ်လို့ ကုန်သည်တွေက မြင်ပါတယ်။ မူဆယ်ခရိုင်အုပ်ချုပ်ရေး လက်ထောက်ညွှန်ကြားရေးမှူး ဦးမောင်မောင်သန်းကတော့ လူအဝင်အထွက်ကန့်သတ်တာကတော့ အရင်အတိုင်း ဆက်ရှိနေလိမ့်မယ်လို့ VOA ကိုပြောပါတယ်။

“ကျနော်သိသလောက်ကတော့ လူအဝင်အထွက်က ဒီအတိုင်းပဲဗျ။ သူက (တရုတ်က) နည်းနည်း ကျနော့်အထင်ပြောရရင် ပိုပြီးတော့၊ သူတို့ ရွှေလီမှာ လုံးလုံး clear ဖြစ်သွားရင် ဒီဘက်ကဝင်မယ့်သူကို တအားကြပ်မယ့် သဘောတော့ ရှိတာပေါ့လေ။ သူတို့အားလုံး all negative ဗျ၊ စစ်ပြီးပြီ သူတို့တမြို့လုံးက။”

မြန်မာနိုင်ငံ ကိုဗစ်အတည်ပြုလူနာစတွေ့တဲ့ မတ်လကုန်ကစလို့ တရုတ်ဘက်က မြန်မာနဲ့ထိစပ်နေတဲ့ နယ်စပ်ပေါက်တွေကို လုံခြုံရေးတင်းကြပ်ထားပြီး လူအဝင်အထွက်ကိုလည်း ဒီနေ့အထိ ပိတ်ထားတာပါ။ ကုန်ကားတွေကတော့ ကျန်းမာရေးစစ်ဆေးမှု လုပ်ထားတဲ့ ယာဉ်မောင်းတွေနဲ့ နယ်စပ်ဂိတ်မှာ အပြန်အလှန် လူအစားထိုးဝင်ရောက်တဲ့ စနစ်ကို တရုတ်ဘက်က ကျင့်သုံးထားတာဖြစ်ပါတယ်။


ဇော်ထက်/VOA (Burmese)

https://burmese.voanews.com/a/myanmar-china-border-ruili-muse/5592998.html

ထိုင်းမြန်မာနယ်စပ်ကန့်သတ်ချက်တွေကြောင့် ကုန်သွယ်ရေးထိခိုက်

မြန်မာဘက်ကိုပိုမယ့်ထိုင်းကုန်စည်များလည်းမဲဆိုင်ဘက်မှာ ပိတ်မိနေတဲ့ မြင်ကွင်း။ (စက်တင်ဘာ ၂၂၊ ၂၀၂၀)

ကပ်ရောဂါ ကူးစက်မှုတွေ တိုးလာနေတဲ့ မြန်မာနိုင်ငံနဲ့ အိမ်နီးချင်း ထိုင်းနိုင်ငံကြား ရောဂါပြန့်ပွားမယ့် အန္တရာယ်ကို ထိန်းချုပ်တဲ့အနေနဲ့ ကန့်သတ်မှုတွေ တိုးမြှင့်လာတာကြောင့် နယ်စပ်ကုန်သွယ်ရေးမှာ ထိခိုက်မှုတွေ ကြုံနေရတဲ့အကြောင်း ပြောပြပါမယ်။ ဗွီအိုအေမြန်မာပိုင်းသတင်းထောက် မအေးအေးမာက ထိုင်းမြန်မာနယ်စပ်ကနေ သတင်းပေးပို့ထားပါတယ်။

အိမ်နီးချင်း မြန်မာနိုင်ငံမှာ ကပ်ရောဂါဖြစ်ပွားမှုတွေ တိုးလာနေတာကြောင့် ထိုင်းနိုင်ငံမြောက်ပိုင်း မဲဆိုင်နဲ့ ရှမ်းပြည်နယ် တာချီလိတ်ကြား ဆက်သွယ်ထားတဲ့ ချစ်ကြည်ရေးတံတား အမှတ် ၂ ကနေ ဖြတ်သန်းနေတဲ့ မြန်မာကုန်တင်ကား အရေအတွက်ကို ခြောက် စီးသာ ဖြတ်သန်းခွင့်ပြုဖို့ ပြီးခဲ့တဲ့ သီတင်းပတ်ထဲမှာပဲ ကန့်သတ်လိုက်တာပါ။ အရင်က ကန့်သတ်ချက်မရှိဘဲ ဝင်ထွက်ခွင့်ပေးထားပေမဲ့ အခုအခါ ထိုင်းနိုင်ငံဘက်က သိသိသာသာ လျှော့ချလိုက်ပြီးနောက်မှာတေ့ မြန်မာဘက်ကလည်း အလားတူ ထိုင်းဘက်က ကုန်တင်ကား ခြောက် စီးသာ ဝင်ခွင့်ပြုဖို့ ပြန်လည်ကန့်သတ်လိုက်ပါတယ်။

အပြန်အလှန် ကန့်သတ်ချက်တွေကြောင့် ကုန်သွယ်ရေးမှာ ထိခိုက်လာနေတဲ့ အခြေအနေနဲ့ ပတ်သက်လို့ မနေ့တုန်းက ထိုင်းနိုင်ငံ ကပ်ရောဂါ ထိန်းချုပ်ရေး အစည်းအဝေးမှာ ဆွေးနွေးခဲ့ကြပါတယ်။

လတ်တလော ထိုင်းမြန်မာနယ်စပ်တွေမှာ လုပ်ဆောင်နေတဲ့ ထိုင်းအစိုးရဲ့ ကန့်သတ်တားဆီးမှုတွေဟာ မြန်မာနိုင်ငံအတွင်းမှာ ပိုးဆိုးလာနေတဲ့ ကိုဗစ်ရောဂါပိုး ထိုင်းဘက်ကိုပြန့်ပွားကူးဆက်လာမှာကို ကာကွယ်တဲ့အနေနဲ့ လုပ်ဆောင်နေတာဖြစ်တယ် အခြေအနေပိုဆိုးမလာရအောင် ထိုင်းက ကြိုတင်ကာကွယ်နေတာဖြစ်ပြီး နှစ်နိုင်ငံ နားလည်မှု လွဲမှားမှုတွေပြေလည်နိုင်ဖို့ ကြိုးစားလုပ်ဆောင်နေကြောင်း ထိုင်းနိုင်ငံ ချင်းရိုင်ခရိုင် ဒုတိယ အုပ်ချုပ်ရေးမှူး Mr. Krit Petch Petchaburanin က ထိုင်းဘာသာနဲ့ ပြောဆိုသွားတာပါ။

မြန်မာဘက်ကလာတဲ့ ကားမောင်းသူကို ထိုင်းဘက်ကို ဖြတ်မောင်းခွင့်မပေးတော့ဘဲ ထိုင်းဘက်ကကားမောင်းသူနဲ့ လူချင်းလဲပြီး ထိုင်းဘက်ကို ဝင်ရတော့မယ့် ထိုင်းနယ်စပ်အာဏာပိုင်တွေရဲ့ ကန့်သတ်ချက်ကြောင့် ထိုင်းနိုင်ငံကနေ တာချီလိတ် ဝင်မယ့် ကုန်စည်နဲ့ စွမ်းအင်သုံးဆီတင်ကားတွေ အစီး ၆၀၀ ကျော် မဲဆိုင်ဘက်မှာ ပိတ်နေတာပါ။

အခုလို ထိုင်းဘက်က ကန့်သတ်မှုတွေ ပိုများလာလို့ တာချီလိတ်အာဏာပိုင်တွေကလည်း ထိုင်းဘက်ကဝင်လာတဲ့ ထိုင်းနိုင်ငံသားနဲ့ ကုန်စည်တွေကို တားဆီးပိတ်ပင်တာတွေဖြစ်ခဲ့ပြီးတဲ့နောက် မြန်မာဘက်ကလည်း ထိုင်းကုန်စည် ဖြတ်သန်းမှုတွေကို ပိတ်ပင်ထားတဲ့အတွက် နယ်စပ်ကုန်သွယ်ရေး တနေ့ ဘတ်သန်းပေါင်း ၁၀၀ ကျော် ဆုံးရှုံးနစ်နာမှုတွေ ရှိနေကြောင်း ထိုင်းနယ်စပ်ကုန်သည်တွေက ဆိုပါတယ်။

ဒီကိစ္စကို အမြန်ဆုံးပြေလည်အောင်ဖြေရှင်းပေးဖို့သက်ဆိုင်ရာအာဏာပိုင်တွေကို တောင်းဆိုနေကြောင်း ထိုင်းသတင်းတွေမှာ ဖော်ပြနေတာပါ။

မြန်မာနိုင်ငံမှာ စက်တင်ဘာလဆန်းက စပြီး ကိုဗစ်၁၉ ကပ်ရောဂါဖြစ်ပွားမှုနှုန်း မြင့်မားလာတဲ့အတွက် ထိုင်းဘက်ကလည်း စိုးရိမ်မှုတွေဖြစ်ပြီး နယ်စပ်မှာ သံဆူးကြိုးတွေ ကာရံတာ လူဝင်လူထွက်တွေကို ဖမ်းဆီးတာတွေ မြန်မာဘက်ကလာတဲ့ ရေထွက်ပစ္စည်းတင်တဲ့ကားတွေကို ပိတ်ပင်လိုက်တာတွေလည်းရှိနေပါတယ်။ အခုအခါမှာတော့ ထိုင်းမြောက်ပိုင်းမှာ နှစ်ဘက်တင်းမာတဲ့ အခြေအနေထိဖြစ်သွားခဲ့ပါတယ်။ 


မအေးအေးမာ/VOA (Burmese)

https://burmese.voanews.com/a/thai-myanmar-border/5592913.html

ကိုရိုနာဗိုင်းရပ်စ် ပြန့်ပွားမှုထိန်းချုပ်ရေး ရန်ကုန်အခြေစိုက် သတင်းစာတွေ ယာယီရပ်နား

ရန်ကုန်တိုင်း ဗိုလ်တထောင်မြို့နယ် ၄၈ လမ်းအနီးတွင် သတင်းစာဖတ်နေသူများကို တွေ့ရစဉ်။

Photo: Saw Sergey Doh/RFA

ရန်ကုန်တိုင်းအတွင်းက ၄၅ မြို့နယ်ကို နေအိမ်မှာပဲနေဖို့ အစိုးရက ကြေညာပြီးနောက် တစ်ရက်အကြာမှာ ရန်ကုန်အခြေစိုက် သတင်းစာတွေ ယာယီရပ်နားမှုတွေ ဆက်တိုက်ရှိလာပါတယ်။

ယာယီရပ်နားလိုက်တဲ့ သတင်းစာတွေထဲမှာ စံတော်ချိန်၊ 7 Day News၊ မြန်မာတိုင်းမ်နဲ့ The Voice Daily သတင်းစာတို့ပါဝင်ပါတယ်။

7Day News သတင်းစာက မနက်ဖြန် စက်တင်ဘာလ ၂၃ ရက်နေ့ကစပြီး ထုတ်ဝေမှု ရပ်နားထားမှာဖြစ်သလို သတင်းစာ ပြန်ထွက်မယ့်အချိန်ကို ကြိုတင်အကြောင်းကြားမယ်လို့ စာဖတ်ပရိသတ်တွေကို အသိပေးထား ပါတယ်။ The Voice Daily သတင်းစာကလည်း ရောဂါပိုးကူးစက်မှု ကင်းဝေးစေဖို့အတွက် သတင်းစာ ထုတ်ဝေမှုကို ယာယီရပ်ဆိုင်းထားမယ်လို့ ကြေညာထားပါတယ်။

စံတော်ချိန်ဒစ်ဂျစ်တယ်သတင်းဌာန တာဝန်ခံ ကိုသစ်ငြိမ်းက စံတော်ချိန်သတင်းစာကို စက်တင်ဘာလ ၂၂ ရက်နေ့ ဒီနေ့ကစပြီး တစ်ပတ်ရပ်ဖို့ စီစဉ်ထားသလို ကောင်စီကိုလည်း စာတင်ထားတယ်လို့ ပြောပါတယ်။

မြန်မာတိုင်းမ်သတင်းစာကိုလည်း  စက်တင်ဘာလ ၂၁ ရက်နေ့ မနေ့ကစပြီး အောက်တိုဘာလ ၇ ရက်နေ့အထိ ယာယီရပ်နားထားကြောင်းနဲ့ ဝန်ထမ်းတွေအားလုံး ရုံးမတက်ဘဲ အိမ်ကနေသာ ဆက်လုပ်သွားမှာဖြစ်သလို အွန်လိုင်းကနေတော့ သတင်းတွေ တင်ဆက်သွားမယ်လို့ မြန်မာတိုင်းမ် သတင်းဌာနရဲ့ စီးပွားရေး သတင်းအယ်ဒီတာ ကိုသစ်နေမိုးက ပြောပါတယ်။

နိုင်ငံတော် သမ္မတရုံး ညွန်ကြားရေးမှူးချုပ် ဦးဇော်ဌေးက မီဒီယာတွေအနေနဲ့ လောလောဆယ် အများစုက နေအိမ်မှာပဲ အလုပ်လုပ်ဖို့၊ မဖြစ်မနေ သွားဖို့လိုအပ်တယ်ဆိုရင် ကျန်းမာရေး စည်းမျဉ်းနဲ့အညီ သက်ဆိုင်ရာ အုပ်ချုပ်ရေး တာဝန်ရှိသူတွေကို အကြောင်းကြားပြီး ဆောင်ရွက်ဖို့ သမ္မတအိမ်တော် သတင်းထောက်တွေ ကနေတဆင့် စက်တင်ဘာလ ၂၁ ရက်နေ့ မနေ့က ပြောထားပါတယ်။


RFA Burmese

https://www.rfa.org/burmese/news/ygn-based-newspapers-suspended-09222020013616.html

ဗိုင်းရပ်စ်ကာကွယ်ဆေး အချိန်နဲ့တစ်ပြေးညီ သုံးနိုင်ဖို့ ပြင်ဆင်ထားကြောင်း အတိုင်ပင်ခံ ပြော

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ၂၀၂၀ စက်တင်ဘာ ၂၁ ရက်နေ့က ပြည်သူလူထုထံ မိန့်ခွန်းပြောကြားစဉ် / Photo: Myanmar State Counsellor Office

ကိုရိုနာဗိုင်းရပ်စ် ကာကွယ်ဆေး၊ ကုသဆေးတွေ ပေါ်ပေါက်လာပြီဆိုရင် မြန်မာနိုင်ငံအတွင်း အချိန်နဲ့ တစ်ပြေးညီ အမြန်ဆုံး ရောက်ရှိနိုင်အောင် အစိုးရက ပြင်ဆင်နေကြောင်း နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်း စုကြည်က စက်တင်ဘာလ ၂၁ ရက်နေ့ မနေ့က ပြည်သူလူထုထံ ပြောကြားတဲ့ မိန့်ခွန်းမှာ ထည့်သွင်းပြောလိုက် ပါတယ်။

ဒီကပ်ရောဂါဟာ ဘယ်လောက်ကြာဦးမလဲဆိုတဲ့ မေးခွန်းတွေနဲ့ ပတ်သက်ပြီး တခြားနိုင်ငံတွေမှာ ကာကွယ်ဆေး၊ ကုသဆေးတွေ ထုတ်လုပ်ဖို့ကြိုးပမ်းနေကြတာရှိပြီး မြန်မာနိုင်ငံအနေနဲ့ ဆေးဝါးမထုတ်လုပ်နိုင်ပေမယ့် အပြည် ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန၊ ကျန်းမာရေးဝန်ကြီးဌာနက တာဝန်ရှိသူတွေက ဆေးထုတ်လုပ် နေတဲ့ နိုင်ငံတွေက သံတမန်တွေနဲ့ ချိတ်ဆက်ပြီး ဆေးဝါးမြန်မြန်ရနိုင်ရေး ညှိနှိုင်းဆွေးနွေးနေတာတွေရှိတယ်လို့ ပြောပါတယ်။

ကာကွယ်ဆေးနဲ့ ကုသဆေးတွေကို ကမ္ဘာ့ကျန်းမာရေးအဖွဲ့ရဲ့ ခွင့်ပြုချက်နဲ့ ထုတ်လုပ်မှုအောင်မြင်တယ်လို့ သေချာမှသာ သုံးစွဲမှာဖြစ်တယ်လို့လည်း သူက ပြောပါတယ်။

ရန်ကုန်တိုင်းအတွင်း ရောဂါပြန့်ပွားမှု မကျသေးတာကို စိတ်ဓာတ်မကျဖို့နဲ့ စပြီးရောဂါ ပြန့်ပွားတဲ့ကာလကနေ တွက်မယ်ဆိုရင် အခုအချိန်မှာ မကျနိုင်သေးကြောင်းနဲ့ ပိုးကူးစက်မှုများနေတဲ့ ရန်ကုန်မှာအတွင်းနေထိုင်သူ တစ်ဦးချင်းစီက ပိုးမကူးအောင် ဂရုစိုက်ကြဖို့ သတိပေးခဲ့ပါတယ်။

ရန်ကုန်မှာ အသွားအလာတွေနည်းသွားတာ၊ နှာခေါင်းစည်းတွေ တပ်တာတွေတွေ့ရလို့ ဝမ်းသာကြောင်းလည်း ပြောပါတယ်။

ကျန်းမာရေးဝန်ကြီးဌာနက ဝန်ထမ်းတွေနဲ့ စေတနာ့ဝန်ထမ်းတွေ ပင်ပန်းလာချိန်မှာ စောင့်ရှောက်ရသူတွေ ပိုများလာပြီး အားလုံးကျေနပ်အောင် စောင့်ရှောက်မှုမပေးနိုင်တာကို သည်းခံပေးဖို့နဲ့ အငြိမ်းစားယူထားတဲ့ ဆရာဝန်ကြီးတွေလည်း ပါဝင်ဆောင်ရွက်နေကြတယ်လို့ ဒေါ်အောင်ဆန်းစုကြည်က ပြောပါတယ်။

ကိုဗစ်အလွန်ကာလမှာ စီးပွားရေးထိခိုက်မှုတွေ နည်းအောင် ပြင်ဆင်ထားကြောင်း၊ အထွေထွေ ပိုလျှံငွေ ဘီလီယံ ၁၀၀၀ ကျော်ကို ကိုဗစ်ရောဂါနဲ့ ပတ်သက်ပြီး အကျိုးဆက်တွေ၊ လိုအပ်ချက်တွေအတွက် သုံးဖို့ပြင်ဆင်ထား တယ်လို့ ပြောပါတယ်။

ဒေါ်အောင်ဆန်းစုကြည်ဟာ ကိုဗစ် -၁၉ ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီ ဥက္ကဋ္ဌ အဖြစ်တာဝန်ယူထားတာဖြစ်ပါတယ်။


RFA Burmese

https://www.rfa.org/burmese/news/dassk-speech-covid-19-09212020230953.html

ပေါက်တောမြို့နယ်တွင် မိုးကြိုးပစ်ခံရ၍ လူငယ်တစ်ဦးသေဆုံး


နိရဥၥရာ၊ စက္တင္ဘာ ၂၂ / ၂ဝ၂ဝ

ရခိုင်ပြည်နယ်၊ ပေါက်တောမြို့နယ်၊ စိုင်းတုတ်ကျေးရွာတွင် ယနေ့ နံနက် ၉ နာရီကျော်အချိန်ခန့်က မိုးကြိုးပစ်ခံရ၍ ဆယ်ကျော်သက်အရွယ် လူငယ်တစ်ဦးသေဆုံးသွားကြောင်း သတင်းရရှိသည်။

သေဆုံးသွားသူမှာ စိုင်းတုတ်ကျေးရွာမှ ဦးခင်မောင်ဝင်း၏သား ကိုနေဇော်ဦး အသက် ၁၈ နှစ်ဖြစ်ပြီး ၎င်းမှာ ရွာ၏ အရှေ့ဖက် ၁ မိုင်ခန့် လယ်ကွင်းတွင် ကျွဲကျောင်းနေစဉ် မိုးကြိုးပစ်ခံရ၍ သေဆုံးသွားခြင်းဖြစ်ကြောင်း စိုင်းတုတ်ကျေးရွာ အုပ်ချုပ်ရေးမှူး ဦးစောမောင်သိန်းက ပြောသည်။

“ သူ့က လယ်ကွင်းမှာ ကျွဲကျောင်းနေတယ်။ အဲဒီအချိန်မှာ မိုးကြိုးပစ်လို့ သေတာ။ မိုးက တအားရွာတယ်။ မိုးကြိုးကတော့ တစ်ချက်၊ နှစ်ချက်လောက်ပစ်သံကြားလိုက်တယ်။ မိုးကြိုးမှန်တာကတော့ သူ့ရင်ဘတ်မှာ မှန်သွားတယ်။ သူ့ခန္ဓာကိုယ်၊ တစ်ကိုယ်လုံးနီးပါး မဲသွားတယ်။” ဟု ၎င်းက ပြောသည်။

သေဆုံးသွားသူ၏ ရုပ်အလောင်းမှာ ယခုအချိန်တွင် ပေါက်တောဆေးရုံသို့ ရောက်ရှိနေပြီး ဆရာဝန် စစ်ဆေးချက်များလုပ်ဆောင်၍ ကျေးရွာသို့ ပြန်လည်ယူဆောင်ကာ သင်္ဂြိုလ်သွားမည်ဖြစ်ကြောင်း သိရှိရသည်။

ရခိုင်ပြည်နယ်အတွင်း ယခု ၂ဝ၂ဝ ခုနှစ်တွင် မိုးကြိုးပစ်ခံရ၍ လူ ၄ ဦးသေဆုံးသွားပြီဖြစ်ကြောင်း သိရှိရသည်။

သေဆုံးသွားသူများမှာ မတ်လ ၃ ရက်နေ့က ရခိုင်ပြည်နယ်၊ မင်းပြားမြို့နယ်၊ ဦးစိုးတင့်ရပ်ကွက်မှ ဆဋ္ဌမတန်းကျောင်းသား မောင်သန်းနု၊ စက်တင်ဘာလ ၁၉ ရက် ညနေ ၆ နာရီအချိန်တွင် စစ်တွေမြို့နယ် ရာတန်ကျေးရွာမှ ကိုမောင်သန်းလင်း (၃ဝ) နှစ်၊  စစ်တွေမြို့နယ်၊ ချောင်းနွယ်ကျေးရွာအုပ်စု၊ ဇော်မတက်ကျေးရွာမှ မအေးဝင်ချေ (၂၃) နှစ်တို့မှာ မိုးကြိုးထိမှန်၍ သေဆုံးသွားကြောင်း သိရှိရသည်။

မိုးကြိုးပစ်ခံရ၍ သေဆုံးသွားသူများကို ငွေကျပ် ၃ သိန်းနှင့် ဒဏ်ရာရရှိသူများကို ငွေကျပ် ၅ သောင်း ထောက်ပံ့ပေးသွားမည်ဖြစ်ကြောင်း ရခိုင်ပြည်နယ်၊ သဘာဝဘေးအန္တရာယ်ဆိုင်ရာ ဦးစီးအရာရှိ ဦးရဲမင်းဦးက ပြောသည်။


ထွန်းခိုင် (တောင်ရင်းကျွန်း)

Narinjara

https://www.facebook.com/narinjara.info

COVID-19 ရောဂါစောင့်ကြပ်ကြည့်ရှုမှုနှင့်ပတ်သက်၍ သတင်းထုတ်ပြန်ခြင်း (၂၂-၉-၂၀၂၀) ရက်နေ့၊ ညနေ (၄:၃၀) နာရီ




၁။ (၂၁-၉-၂၀၂၀) ရက်နေ့အတွက် ဓာတ်ခွဲအတည်ပြုလူနာ (၆၆၅) ဦး၏ မြို့နယ်အလိုက် တွေ့ရှိရမှု အခြေအနေမှာ အောက်ပါအတိုင်း ဖြစ်ပါသည် 


Ministry of Health and Sports, Myanmar

https://www.facebook.com/MinistryOfHealthAndSportsMyanmar

ကိုဗစ် ထိန်းချုပ်မှု ကန့်သတ်ချက်တွေနဲ့ ရန်ကုန်လူထု စိန်ခေါ်မှုများ

ရန်ကုန်တမြို့လုံး နေအိမ်နေ ကန့်သတ်ချက်ထုတ်ပြန်ပြီး၊ ပထမဆုံးနေ့တွေ့ရသည့် ရန်ကုန်မြို့ သတင်းဓါတ်ပုံများဖြစ်ပါသည်။ (စက်တင်ဘာ ၂၁၊ ၂၀၂၀)

ကိုဗစ်ကပ်ရောဂါ ကူးစက်မှုတွေကြောင့် အိမ်ပြင်မထွက်ကြဖို့ အမိန့်ထုတ်ပြန်ထားတာ တနင်္လာနေ့က စတင်အသက်ဝင်တဲ့ ရန်ကုန်တိုင်းအတွင်း ဒေသခံတွေ ဘယ်လိုအခက်အခဲတွေ ကြုံနေရသလဲ။ စုံစမ်းမေးမြန်းထားတဲ့ ဗွီအိုအေ သတင်းထောက် အိမ့်သန္တာထွန်းက ပြောပြမှာပါ။

တကျော့ပြန် ရောဂါကူးစက်မှုတွေကြောင့် သေဆုံးမှုတွေနဲ့ ကူးစက်သူ လူနာသစ်တွေပါ တိုးလာနေတာကြောင့် ရန်ကုန်တိုင်းအတွင်း အိမ်ပြင်မထွက်ဖို့ အမိန့်ထုတ်ထားတာ ဒီနေ့ပဲ စတင်အသက်ဝင်လာခဲ့ပြီ။ နေအိမ်မှာ အလုပ်သမားအနည်းငယ်နဲ့ အော်ဒါယူပြီး အထည်ချုပ် လုပ်ငန်းလုပ်နေတဲ့ ရန်ကုန်မြို့ခံ ဒေါ်သန်းသန်းမော်ကတော့ ရုတ်တရက် ထုတ်ပြန်လိုက်တဲ့ အမိန့်ကြောင့် အလုပ်တွေ ရပ်ထားလိုက်ရတယ်လို့ ပြောပါတယ်။

“လုပ်ငန်းက အကုန်လုံးထိခိုက်သွားတာပေါ့။ ထိခိုက်တာက လုပ်ငန်းတွေ အကုန်လုံးရပ်လိုက်တယ်၊ နောက်ပြီး ကလေးတွေက သွားရလာရ အကုန်ခက်ခဲသွားတဲ့ခါကျတော့ အလုပ်ကိုလည်း အကုန်လုံးရပ်လိုက်ရတော့တာပေါ့။ သွားရေးလာရေးလည်း အဆင်မပြေတာ့ဘူးဆိုတော့ အဲ့လိုဖြစ်သွားတယ်။ အခုကတော့ ရှေ့ဆက်ဘယ်လိုလုပ်ရမလဲမသိဘူးဖြစ်နေတယ် ဒီလိ အခက်အခဲတွေဖြစ်သွားတဲ့ အခါကျတော့၊ အစိုးရထောက်ပံ့ကြေးကလည်း တစ်ခါမှ မရဖူးဘူး၊ ဘာလို့မရတာလည်း ဆိုတော့ လုပ်ငန်းရှိတယ်ဆိုပြီးတော့ အစ်မတို့ကို မပေးဘူး။ အလုပ်ငန်းတွေကလည်း အကုန်လုံးရပ်သွားတဲ့ အခါကျတော့ အစ်မတို့က အခက်အခဲရှိတယ်။”

အိမ်ပြင်မထွက်ဖို့ အမိန့်ကြောင့် အလုပ်မသွားနိုင်ပေမဲ့ အိမ်ကနေ အလုပ်လုပ်ခွင့်ရတဲ့သူတွေလည်း ရှိပါတယ်။ ဒါပေမဲ့လည်း အိမ်ကနေ အလုပ်လုပ်ရတဲ့ နေရာမှာ အကန့်အသတ်တွေ ရှိတာကြောင့် ထိခိုက်မှုတွေကိုတော့ ရှောင်လို့မရနိုင်ဘူးလို့လည်း ကုမ္ပဏီဝန်ထမ်းတဦးဖြစ်တဲ့ ကိုကျော်ဝဏ္ဏက ပြောပါတယ်။

“အကုန်လုံး Stay Home ဆိုပြီးလုပ်လိုက်တာမျိုးကျတော့ လုပ်ငန်းပိုင်းမှာ ထိခိုက်မှုတွေ အများကြီးရှိတယ်။ ဒီကာလကလည်း ဘယ်လောက်ကြာမလဲမသိနိုင်ဘူးဆိုတော့၊ လုပ်ငန်းရှင်တွေ ဖက်ကနေဆိုရင်လည်း ထိခိုက်နစ်နာမှုတွေရှိတယ်၊ နောက်အလုပ်ခွင်တွေပါ ရပ်နားလိုက်ရတဲ့ အတွက်ကြောင့်မို့လို့ ရသင့်ရထိုက်တဲ့ ခံစားခွင့်တို့ လစာတို့၊ နောက်တစ်ခါ Daily လုပ်ရတဲ့ အလုပ်သမားတွေဆိုရင် Daily ကြေးပေါ့နှော်။ အဲ့လိုမျိုးထိခိုက်နစ်နာမှုတွေအများကြီး ရှိတယ်။ အစ်ကိုတို့ကျတော့ ပုဂ္ဂလိက အလုပ်ဖြစ်နေတဲ့ အတွက်ကြောင့်မို့လို့ Work From Home ဆိုတာက ငွေးကြေးပိုင်းရော နောက်တစ်ခါ ငွေကြေးပိုင်းရော ထိခိုက်မှုရှိတာပေါ့။”

ရန်ကုန်တိုင်း ၄၅ မြို့နယ်ထဲက ကိုကိုးကျွန်းကလွဲပြီး အိမ်ပြင်မထွက်ဖို့ အမိန့်ထုတ်ရတဲ့ အစီအစဉ်မှာ အခက်အခဲတွေ ရှိနိုင်တာကို နားလည်ကြောင်းလည်း ဗဟိုကူးစက်ရောဂါတိုက်ဖျက်ရေးဌာန ညွှန်ကြားရေးမှုး ဒေါက်တာခင်ခင်ကြီးက ပြောပါတယ်။

“ဒီအမိန့်ကြောင့်ပေါ့နှော်၊ ဒီ Stay At Home Order ကြောင့် နည်းနည်းအခက်အခဲရှိတယ်ဆို တာတော့ ဖြစ်သွားနိုင်တာတော့ ရှိပါတယ်၊ ဒါပေမယ့် ကျွန်မတို့က နဂိုကတည်းက Stay At Home က ၂၈ မြို့နယ်ကို လုပ်ပြီးသားဖြစ်ပါတယ်။ ၂၈ မြို့နယ်၊၄၄ မြို့နယ်ရှိတာဆိုတော့ နောက် ၁၆ မြို့နယ်လောက်ပဲ တိုးပြီးသဘောပဲဖြစ်ပါတယ်။ အဲ့တော့ အဲ့ဒီ ၁၆ မြို့နယ်မှာလည်း တကယ်ရောဂါဖြစ်ပွားတဲ့မြို့နယ်က ၁၀ မြို့နယ်လောက်ပဲရှိပါတယ်။ ကျန်တဲ့ ၆ မြို့နယ်ကိုပါ တပေါင်းတစ်စည်းတည်းလုပ်လိုက်တဲ့ သဘောပါ။”

ကျန်းမာရေးနဲ့ အားကစားဝန်ကြီးဌာနရဲ့ ဒီနေ့မွန်းလွဲပိုင်းအထိ ထုတ်ပြန်ချက်အရ ကိုဗစ်ရောဂါကြောင့် သေဆုံးသူ နောက်ထပ် ၃ ဦး တိုးလာတဲ့အတွက် စုစုပေါင်း သေဆုံးသူ ၉၇ ဦးအထိ ရှိသွားပါပြီ။ ရောဂါပိုးကူးစက်သူ အတည်ပြုလူနာကတော့ ၆၀၀၀ နီးပါးရှိနေပြီး၊ ရောဂါပိုး ကင်းစင်ပြီး ဆေးရုံက ဆင်းခွင့်ရသူကတော့ ၁,၂၀၀ ကျော် ရှိတယ်လို့လည်း ကျန်းမာရေးဝန်ကြီးဌာနက သတင်းထုတ်ပြန်ထားပါတယ်။


အိမ့်သန္တာထွန်း/VOA (Burmese)

https://burmese.voanews.com/a/covid-yangon-situation-/5591995.html

​မြန်မာ ကိုဗစ်ပိုးတွေ့သူ ၆,၀၀၀ ကျော် သေဆုံးသူ ၉၈ ဦး

ရန်ကုန်တမြို့လုံး နေအိမ်နေ ကန့်သတ်ချက်ထုတ်ပြန်ပြီး၊ ပထမဆုံးနေ့တွေ့ရသည့် ရန်ကုန်မြို့မြင်ကွင်း။ (စက်တင်ဘာ ၂၁၊ ၂၀၂၀)

မြန်မာနိုင်ငံမှာ COVID-19 ရောဂါကြောင့် သေဆုံးသူ ဒီနေ့တယောက်ထပ်တိုးတဲ့အတွက် စုစုပေါင်း သေဆုံးသူ ၉၈ ယောက်ရှိသွားပါပြီ။ သေဆုံးသူဟာ အသက် ၅၅ နှစ်အရွယ် အမျိုးသမီးဖြစ်တယ်လို့ ကျန်းမာရေးနဲ့ အားကစားဝန်ကြီးဌာနရဲ့ ည ၈ နာရီသတင်းမှာ ဖော်ပြထားပါတယ်။ စက်တင်ဘာ ၂၁ ရက် တနင်္လာနေ့မှာ အတည်ပြုလူနာသစ်ကလည်း ၃၄၆ ယောက်ရှိပါတယ်။ ဒါကြောင့် စုစုပေါင်း COVID-19 အတည်ပြုလူနာက ဒီနေ့ည ၈ နာရီအထိ ၆,၁၅၁ ယောက်ဖြစ်ပါတယ်။

ဒီနေ့အတွက် ဓါတ်ခွဲနမူနာတွေကိုတော့ အမျိုးသားကျန်းမာရေးဓါတ်ခွဲဌာန (ရန်ကုန်) အပြင်၊ မန္တလေးနဲ့ မော်လမြိုင်မြို့တွေမှာရှိတဲ့ ပြည်သူ့ကျန်းမာရေးဓါတ်ခွဲဌာနတွေ၊ စစ်တွေ၊ ကျောက်ဖြူ၊ ထားဝယ်၊ မြိတ်၊ မူဆယ်၊ တာချီလိတ်၊ ကျိုင်းတုံ၊ ပြည်၊ တီးတိန်၊ ဘားအံ၊ ပြင်ဦးလွင်၊ မကွေး၊ ပုသိမ်၊ နေပြည်တော်တို့က ပြည်သူ့ဆေးရုံကြီးတွေနဲ့ တပ်မတော်ဆေးရုံကြီးတချို့မှာ နမူနာစုစုပေါင်း ၂,၄၃၉ စစ်ဆေးခဲ့ပါတယ်။

လောလောဆယ်အထိ ဆေးရုံက ဆင်းခွင့်ပြုထားသူ ကိုဗစ်လူနာဟောင်းကတော့ ၁,၄၄၅ ယောက်ရှိတယ်လို့ ကျန်းမာရေးဌာနထုတ်ပြန်ချက်မှာ ဖော်ပြထားပါတယ်။

ကိုဗစ်အတည်ပြုလူနာတွေနဲ့ သေဆုံးသူ အရေအတွက် တိုးနေချိန်မှာ ရန်ကုန်မြို့မှာ မလိုအပ်ရင် အိမ်ပြင်မထွက်ရ အမိန့် ဒီနေ့ကစတင် ထုတ်ပြန်ထားပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/myanmar-covid-cases/5591537.html

ဒဏ်ခတ် ပိတ်ဆို့ ခံထားရတဲ့ သမ္မတပူတင်နဲ့ Barclays ဘဏ် ငွေသန်းချီ ခဝါချမှု ဆက်နွှယ်နေ

ဗလာဒီမီယာ ပူတင်နဲ့ အာကဒီ ရိုတန်ဘာ့ဂ် တို့ ကလေးဘဝကတည်းက ခင်မင်ခဲ့ကြ

ရုရှားသမ္မတ ဗလာဒီမီယာ ပူတင်ရဲ့ အရင်းနှီးဆုံး မိတ်ဆွေတစ်ဦးဖြစ်တဲ့ အာကဒီ ရိုတန်ဘာ့ဂ်ဟာ ငွေကြေး ဒဏ်ခတ်ပိတ်ဆို့မှုတွေကို ရှောင်ဖို့ ငွေမည်းတွေကို ငွေဖြူလုပ်ပြီး လန်ဒန်မြို့က Barclays ဘဏ်ကို အသုံးချခဲ့ဖွယ် ရှိတယ်လို့ ပေါက်ကြားပေါ်ထွက်လာတဲ့ အစီရင်ခံစာ ဖိုင်တွဲတွေမှာ ဖော်ပြထားပါတယ်။

ဘီလျံနာ သူဌေးကြီး မစ္စတာ ရိုတန်ဘာ့ဂ်ဟာ သမ္မတပူတင်နဲ့ ငယ်စဉ် ကလေးဘဝကတည်းက သိကျွမ်း ခင်မင်လာခဲ့တာပါ။

၂၀၁၄ ခုနှစ်က မစ္စတာ ရိုတန်ဘာ့ဂ်ကို အမေရိကန်နဲ့ ဥရောပသမဂ္ဂ (အီးယူ) က ငွေကြေးဒဏ်ခတ် ပိတ်ဆို့မှုတွေ ချမှတ်ထားတာ ဖြစ်တဲ့အတွက် သူနဲ့ ဆက်ဆံလုပ်ကိုင်တဲ့ အနောက်နိုင်ငံ ဘဏ်တွေအနေနဲ့ ဆိုးဝါးတဲ့ အကျိုးဆက်တွေနဲ့ ရင်ဆိုင်ရဖွယ် ရှိပါတယ်။

Barclays ဘဏ်ကတော့ ဥပဒေကြောင်းနဲ့ ကျင့်ဝတ်စည်းမျဉ်းဆိုင်ရာ လုပ်သင့်လုပ်ထိုက်တာတွေ အားလုံး သူတို့ လုပ်ခဲ့တယ်လို့ ပြောပါတယ်။

မစ္စတာ ရိုတန်ဘာ့ဂ် ထိန်းချုပ်ထားတယ်လို့ ယူဆရတဲ့ ကုမ္ပဏီတွေက လျှို့ဝှက် ဘဏ်စာရင်းတွေ ဘယ်လိုဖွင့်ထားကြသလဲဆိုတာကို ပေါက်ကြား ပေါ်ထွက်လာတဲ့ "ဘဏ်တွေရဲ့ မသင်္ကာဖွယ် လုပ်ဆောင်မှု အစီရင်ခံစာများ (FinCEN ဖိုင်တွဲများ)" ထဲမှာ ဖော်ပြထားပြီး ဒီဖိုင်တွဲတွေကို ဘီဘီစီရဲ့ Panorama အစီအစဉ်က ဖော်ထုတ်တွေ့ရှိခဲ့တာပါ။

ရင်းနှီးတဲ့ အသိုင်းအဝိုင်းအုပ်စုအတွင်း

၂၀၁၄ ခုနှစ်မတ်လမှာ ယူကရိန်းနိုင်ငံတွင်းက ခရိုင်းမီးယားဒေသကို သိမ်းယူခဲ့တဲ့အတွက် ရုရှားကို အမေရိကန်က စီးပွားရေး ပိတ်ဆို့မှုတွေ ချမှတ်ခဲ့ပါတယ်။

အသက် ၆၈ နှစ်အရွယ် မစ္စတာ အာကဒီ ရိုတန်ဘာ့ဂ်နဲ့ အသက် ၆၃ နှစ်အရွယ် သူ့ရဲ့ညီ ဘောရစ်စ် ရိုတန်ဘာ့ဂ် တို့ကို ရုရှားအစိုးရခေါင်းဆောင်ပိုင်းရဲ့ ရင်းနှီးတဲ့ အသိုင်းအဝိုင်း အုပ်စုထဲက လူတွေအဖြစ် ဗြိတိန် ဘဏ္ဍာရေးဝန်ကြီးဌာနက သတ်မှတ်ခဲ့ပါတယ်။

သူတို့ညီအစ်ကို နှစ်ဦးဟာ ငယ်ငယ်တုန်းက ဂျူဒိုသင်တန်းတစ်ခုကို သမ္မတပူတင်နဲ့ အတူတူတက်ခဲ့ကြတာပါ။

စီးပွားရေးလုပ်ငန်းရှင် မစ္စတာ ရိုတန်ဘာ့ဂ်နဲ့ သမ္မတပူတင်ကို မနှစ်က ဆိုချီမြို့က ဂျူဒိုသင်တန်းတစ်ခုမှာ တွေ့ရစဉ်

လတ်တလော နှစ်တွေအတွင်း မစ္စတာ အာကဒီ ရိုတန်ဘာ့ဂ်ရဲ့ ကုမ္ပဏီတွေက ဂက်စ်ပိုက်လိုင်းတစ်ခု၊ စက်ရုံတစ်ခုနဲ့ လမ်းတွေကို ရုရှားအစိုးရပေးတဲ့ ကန်ထရိုက်တွေကနေတစ်ဆင့် လုပ်ခဲ့ပါတယ်။

သူတို့ ညီအစ်ကို နှစ်ဦးဟာ သမ္မတပူတင် စိတ်ဝင်စား အာရုံစိုက်တဲ့ စီမံကိန်းတွေကို ထောက်ပံ့ ကူညီခဲ့ကြပြီး Gazprom ဂက်စ်စီမံကိန်းနဲ့ ဆိုချီ ဆောင်းရာသီ အိုလံပစ်ပွဲတော်တွေက ကန်ထရိုက်လုပ်ငန်းတွေမှာ ဒေါ်လာငွေ ဘီလျံနဲ့ချီ ငွေတွေ ဝင်ခဲ့ကြတယ်လို့ ဗြိတိန် ဘဏ္ဍာရေးဝန်ကြီးဌာနက ပြောပါတယ်။

၂၀၁၈ ခုနှစ်မှာ အမေရိကန်က မစ္စတာ အာကဒီ ရိုတန်ဘာ့ဂ် ရဲ့ သားဖြစ်သူ အီဂေါ ကို သူတို့ရဲ့ လူပုဂ္ဂိုလ်တစ်ဦးချင်း ဒဏ်ခတ်ပိတ်ဆို့တဲ့ စာရင်းထဲမှာ ထည့်သွင်းခဲ့ပါတယ်။

ဒီဒဏ်ခတ်ပိတ်ဆို့မှုတွေရဲ့ ရည်ရွယ်ချက်က အဲဒီစာရင်းမှာ ပါတဲ့သူတွေကို အနောက်အုပ်စုနိုင်ငံတွေရဲ့ ငွေကြေးစနစ်တစ်ခုလုံးနဲ့ အဆက်ဖြတ်ဖို့ ဖြစ်ပါတယ်။

ဒါပေမဲ့ ရိုတန်ဘာ့ဂ်တို့ ညီအစ်ကိုကတော့ ယူကေနဲ့ အမေရိကန်ကနေတစ်ဆင့် ငွေအလွှဲအပြောင်းတွေ ဆက်လုပ်နေခဲ့တဲ့ ပုံရှိပါတယ်။

ပန်းချီကားတွေနဲ့ ငွေကြေးခဝါချမှု

၂၀၀၈ ခုနှစ်မှာ Advantage Alliance ဆိုတဲ့ ကုမ္ပဏီအတွက် ဘဏ်စာရင်းတစ်ခု Barclays ဘဏ်မှာ ဖွင့်ခဲ့ပါတယ်။

အဲဒီကုမ္ပဏီဟာ ၂၀၁၂ ခုနှစ်ကနေ၂၀၁၆ ခုနှစ်အတွင်း ပေါင်စတာလင် သန်း၆၀ ရွှေ့ပြောင်းခဲ့တယ်လို့ ပေါက်ကြား ပေါ်ထွက်လာတဲ့ ဖိုင်တွဲတွေမှာ ဖော်ပြထားပါတယ်။

ငွေလွှဲမှုအတော်များများဟာ မစ္စတာ ရိုတန်ဘာ့ဂ်တို့ ညီအစ်ကို ဒဏ်ခတ်ပိတ်ဆို့ ခံခဲ့ရအပြီးမှာ လုပ်ခဲ့တာပါ။

ရိုတန်ဘာ့ဂ်တို့ ညီအစ်ကိုဟာ ဒဏ်ခတ်ပိတ်ဆို့မှုကို ရှောင်လွှဲဖို့အတွက် တန်ဖိုးကြီးတဲ့ ပန်းချီကားတွေ လျှို့ဝှက် ဝယ်ယူတာမျိုး လုပ်နေပြီး အဲဒီလို လုပ်တဲ့အထဲမှာပါတဲ့ ကုမ္ပဏီတွေထဲက တစ်ခုဟာ Advantage Alliance ကုမ္ပဏီ ဖြစ်တယ်လို့ အခုနှစ် ဇူလိုင်လမှာ အမေရိကန် ဆီးနိတ်လွှတ်တော်က လုပ်ခဲ့တဲ့ စုံစမ်းစစ်ဆေးရေး တစ်ခုက စွပ်စွဲဖော်ပြခဲ့ပါတယ်။

Advantage Alliance ကုမ္ပဏီကို မစ္စတာ အာကဒီ ရိုတန်ဘာ့ဂ် ပိုင်ဆိုင်တယ် ဆိုတဲ့ အထောက်အထားတွေ အခိုင်အမာ ရှိပြီး ကုမ္ပဏီက လန်ဒန်မြို့ Barclays ဘဏ်က ဘဏ်စာရင်းကနေ သူ့အတွက် တန်ဖိုးကြီး ပန်းချီကား ဒေါ်လာသန်းနဲ့ချီ ဝယ်ပေးခဲ့တယ်လို့ အမေရိကန် စုံစမ်းစစ်ဆေးသူတွေက ကောက်ချက်ချခဲ့ကြပါတယ်။

လျှို့ဝှက်၊ အမည်မဖော်မှုတွေ၊ စည်းမျဉ်း လစ်ဟာမှုတွေကြောင့် ငွေကြေး ခဝါချမှုတွေ၊ ဒဏ်ခတ်ပိတ်ဆို့မှုကို ရှောင်ရှားနိုင်မှုတွေ ဖြစ်လာစေခဲ့တယ်လို့ အစီရင်ခံစာတစ်ခုမှာ ဖော်ပြထားပါတယ်။

ပန်းချီကားဝယ်တဲ့သူတွေဟာ ဘယ်သူဘယ်ဝါဆိုတာကို မေးခွန်းထုတ်ဖို့ ယူကေနဲ့ အမေရိကန် အစိုးရတွေက ပျက်ကွက်ခဲ့တယ်လို့ ဆိုပါတယ်။

ဒဏ်ခတ်ပိတ်ဆို့မှုတွေ ရှိနေတဲ့ကြားက အာကဒီ ရိုတန်ဘာ့ဂ်ဟာ ပန်းချီဆရာကြီး ရနေး မာဂရိရဲ့ La Poitrine ဆိုတဲ့ ပန်းချီကားကို ဒေါ်လာ ၇ သန်းခွဲ ပေးဝယ်နိုင်ခဲ့ပုံ ရပါတယ်။

၂၀၁၄ ခုနှစ် ဇွန်လ ၁၇ ရက်နေ့မှာ မစ္စတာ အာကဒီ ရိုတန်ဘာ့ဂ် နဲ့ ဆက်နွှယ်နေတဲ့ ကုမ္ပဏီတစ်ခုက Advantage Alliance ကုမ္ပဏီရဲ့ လန်ဒန်မြို့ Barclays ဘဏ်စာရင်းကို မော်စကိုမြို့ကနေ ငွေလွှဲခဲ့ပါတယ်။ နောက်တစ်နေ့မှာပဲ Barclays ဘဏ်က နယူးယောက်မှာရှိတဲ့ ပန်းချီကားရောင်းသူထံ ငွေပို့ပေးခဲ့ပါတယ်။

ဘဏ်စာရင်းပိတ်လိုက်

၂၀၁၆ ခုနှစ် ဧပြီလမှာ ရိုတန်ဘာ့ဂ်နဲ့ ဆက်နွှယ်နေသူတွေလို့ မသင်္ကာတဲ့ ဘဏ်စာရင်းအများအပြားကို Barclays ဘဏ်က ဘဏ်တွင်း စုံစမ်းစစ်ဆေးမှုတွေ စလုပ်ခဲ့ပါတယ်။

မသင်္ကာစရာ ငွေအလွှဲအပြောင်းတွေ လုပ်ရာမှာ အသုံးပြုနေတယ်လို့ စိုးရိမ်လာတဲ့အတွက် ၆ လကြာတဲ့အခါ Advantage Alliance ကုမ္ပဏီရဲ့ ဘဏ်စာရင်းကို Barclays ဘဏ်က ပိတ်လိုက်ပါတယ်။

ဒါပေမဲ့ ရိုတန်ဘာ့ဂ်တို့ ညီအစ်ကိုနဲ့ ဆက်နွှယ်နေတယ်လို့ ယူဆရတဲ့ Barclays ဘဏ်စာရင်းတွေကတော့ ၂၀၁၇ ခုနှစ်အထိ ဆက်ဖွင့်ထားဆဲပဲလို့ ပေါက်ကြားခဲ့တဲ့ အစီရင်ခံစာတွေမှာ ဖော်ပြထားပါတယ်။

အဲဒီကုမ္ပဏီတစ်ခုကတော့ Ayrton Development Limited ကုမ္ပဏီဖြစ်ပါတယ်။ အဲဒီကုမ္ပဏီရဲ့ လုပ်ဆောင်မှုတွေအပေါ် Barclays ဘဏ်က မသင်္ကာ ဖြစ်လာခဲ့ပြီး အာကဒီ ရိုတန်ဘာ့ဂ်ဟာ Ayrton Development Limited ရဲ့ ပိုင်ရှင်အစစ် ဖြစ်တယ်လို့ ကောက်ချက်ချခဲ့ပါတယ်။

ရိုတန်ဘာ့ဂ်တို့ ညီအစ်ကိုနဲ့ ဆက်နွှယ်နေတယ်လို့ မသင်္ကာတဲ့ ဘဏ်စာရင်း ဘယ်နှစ်ခုလောက်ရှိသလဲလို့ Panorama အစီအစဉ်က မေးခဲ့ရာမှာ Barclays ဘဏ်က ပြန်ဖြေဖို့ ငြင်းခဲ့ပါတယ်။

"အမေရိကန်ရဲ့ ဒဏ်ခတ်ပိတ်ဆို့မှုတွေနဲ့ ပတ်သက်လို့ လိုက်နာရမယ့် ဥပဒေကြောင်းနဲ့ စည်းမျဉ်းတွေ အားလုံးကို Barclays ဘဏ်က လိုက်နာဆောင်ရွက်ခဲ့ပါတယ်"လို့ Barclays ဘဏ်ပြောခွင့်ရသူက ပြောပါတယ်။

ရိုတန်ဘာ့ဂ် တို့ ညီအစ်ကိုကလည်း တုံ့ပြန်ချက် ပေးဖို့ ငြင်းဆန်ခဲ့ပါတယ်။

FinCen ဖိုင်တွဲဟာ ကမ္ဘာတစ်ဝန်းမှာ ငွေကြေးခဝါချမှုတွေကို အဓိကဘဏ်ကြီးတွေက ဘယ်လို လုပ်ခွင့် ပြုခဲ့ကြသလဲ ဆိုတာကို ဖော်ပြထားတဲ့ လျှို့ဝှက်အစီရင်ခံစာတွေ ဖြစ်ပြီး အခုအခါ ပေါက်ကြားပေါ်ထွက်လာခဲ့တာပါ။

ယူကေဟာ ငွေကြေးစနစ်မှာ မကြာခဏဆိုသလို လျော့ရဲ အားနည်းလေ့ ရှိပြီး လန်ဒန်ဟာ ရုရှားရဲ့ ငွေတွေနဲ့ ဖုံးလွှမ်းခံနေရတယ် ဆိုတာကိုလည်း အဲဒီအစီရင်ခံစာတွေမှာ တွေ့ရပါတယ်။

ဒီအစီရင်ခံစာတွေကို ဖော်ထုတ် ရရှိခဲ့တဲ့ BuzzFeed News သတင်းဌာနက ICIJ စုံစမ်းဖော်ထုတ်ရေး သတင်းထောက်များ နိုင်ငံတကာအဖွဲ့နဲ့ ကမ္ဘာတစ်ဝန်းက သတင်းထောက် ၄၀၀ ကို ပြန်ဝေမျှခဲ့တာ ဖြစ်ပြီး Panorama အစီအစဉ်က ဘီဘီစီအတွက် လေ့လာ သတင်းထုတ်ပြန်ခဲ့တာပါ။


BBC Burmese

https://www.bbc.com/burmese/world-54239902

ဟောင်ကောင်မှာ ၁၉၉၅ ခုနှစ် ကတည်းကစလို့ HSBC ရှယ်ယာတန်ဖိုး အနိမ့်ဆုံး ထိုးကျ

ဓာတ်ပုံ ရင်းမြစ်, Getty Images

HSBC ဘဏ်ကြီးမှာ ငွေဖြူ ငွေမည်းတွေ ခဝါချမှုတွေ ရှိနေတယ် ဆိုတဲ့စွပ်စွဲချက်တွေ ပေါ်ထွက်နေစဉ်မှာပဲ ဟောင်ကောင်ဈေးကွက်မှာ HSBC အစုရှယ်ယာဈေးတွေ အနိမ့်ဆုံး ထိုးကျသွားခဲ့ပါတယ်။

ဒီလို ငွေဖြူ ငွေမည်း ခဝါချမှုတွေ ဖြစ်နေတယ် ဆိုတာကို သိထားပြီးချိန်မှာတောင် HSBC ဘဏ်က အဲဒီလို လုပ်နေသူတွေကို ကမ္ဘာတစ်ဝန်း ဒေါ်လာသန်းပေါင်းများစွာ လွှဲခွင့်ပြုခဲ့တယ် ဆိုတာကို ပေါက်ကြား ပေါ်ထွက်လာတဲ့ လျှို့ဝှက်ဖိုင်တွဲတွေအရ သိရပါတယ်။

ယူကေအခြေစိုက် HSBC ဘဏ်ဟာ ဟောင်ကောင်မှာ နိုင်ငံရေး တင်းမာနေမှုနဲ့ ကိုရိုနာဗိုင်းရပ်စ် ကပ်ရောဂါရဲ့ ဘေးထွက်ဆိုးကျိုးတွေ အပါအဝင် ဖိအားမျိုးစုံနဲ့ ရင်ဆိုင်နေရတာပါ။

အာရှ အစုရှယ်ယာဈေးကွက်မှာ HSBC ရဲ့ အစုရှယ်ယာတန်ဖိုး ထိုးကျသွားနေရာမှာ ဒီကနေ့ တနင်္လာနေ့မှာ ဟောင်ကောင်ဒေါ်လာ ၃၀ အောက် ကျသွားခဲ့ပါတယ်။

လန်ဒန် စတော့ခ်ရှယ်ယာ ဈေးကွက်မှာလည်းပါတဲ့ HSBC ရှယ်ယာဈေးဟာ ဒီနှစ်မှာ ၅၀ ရာခိုင်နှုန်း ကျဆင်းသွားခဲ့ပါတယ်။

HSBC ဘဏ်ရဲ့ ဌာနချုပ်က လန်ဒန်မြို့မှာ ရှိပေမဲ့ အဲဒီရဲ့ အမြတ်တွေဟာ ဟောင်ကောင်မှာ ရှိတဲ့ အာရှ စီးပွားရေး အချက်အချာနေရာကနေ ရနေတာပါ။

အမေရိကန်ဒေါ်လာ သန်း၈၀ (ပေါင်စတာလင် ၆၂ သန်း) ငွေကြေး ခဝါချမှုကြီးမှာ HSBC ပါဝင်ပတ်သက်ခဲ့တဲ့ အခန်းကဏ္ဍအကြောင်းအသေးစိတ်ဟာ "ဘဏ်တွေရဲ့ မသင်္ကာဖွယ် လုပ်ဆောင်မှု အစီရင်ခံစာများ (FinCEN ဖိုင်တွဲများ)" ဆိုတဲ့ အထောက်အထား စာရွက်စာတမ်းတွေကနေ ပေါက်ကြားပေါ်ထွက်လာခဲ့တာပါ။

HSBC ဘဏ်ဟာ အဲဒီငွေမည်းတွေကို ၂၀၁၃ နဲ့ ၂၀၁၄ ခုနှစ်မှာ အမေရိကန်မှာရှိတဲ့ သူတို့ လုပ်ငန်းတွေကနေတစ်ဆင့် ဟောင်ကောင်မှာ ရှိတဲ့ HSBC ဘဏ်စာရင်းတွေထဲ လွှဲပြောင်း ထည့်သွင်းခဲ့တာပါ။

HSBC ဘဏ်ကတော့ ဒီလို လုပ်ရပ်မျိုးတွေကို သတင်းပို့ရေးနဲ့ ပတ်သက်တဲ့ ဥပဒေကြောင်း တာဝန်ဝတ္တရားတွေကို အမြဲကျေပွန်အောင် ဆောင်ရွက်ခဲ့တယ်လို့ ဆိုပါတယ်။


ဖိအားမျိုးစုံနဲ့ ရင်ဆိုင်နေရ

ဒီဖိုင်တွဲတွေ ပေါက်ကြားပေါ်ထွက်မလာခင်မှာ ကတည်းက HSBC ဘဏ်အနေနဲ့ ဖိအားမျိုးစုံနဲ့ ရင်ဆိုင်နေရပြီး ရှယ်ယာဈေး ကျဆင်းနေခဲ့ပြီးသား ဖြစ်ပါတယ်။

ကိုရိုနာဗိုင်းရပ်စ် ကပ်ရောဂါကြောင့် နောက်ထပ်လူတွေ၊ စီးပွားရေးလုပ်ငန်းတွေ အတော်များများ ချေးထားတဲ့ငွေတွေ ပြန်ဆပ်နိုင်ကြမှာ မဟုတ်ဘူးလို့ ယူဆတဲ့အတွက် ဥရောပရဲ့ အကြီးဆုံးဘဏ်ကြီးဖြစ်တဲ့ HSBC ဘဏ်အနေနဲ့ အခုနှစ်အတွက် ရှိလာမယ့် ကြွေးဆုံးငွေ အတွက် အမေရိကန်ဒေါ်လာ ၈ ဘီလျံကနေ ၁၃ ဘီလျံအကြား အရံဖယ်ထားပါတယ်။

HSBC ဘဏ်ရဲ့ ဘတ်ဂျက်နှစ် ပထမ ၆ လတာကာလအတွက် အခွန်မဆောင်ခင် အမြတ်ငွေဟာ ၆၅ ရာခိုင်နှုန်း ကျဆင်းခဲ့တယ်လို့ HSBCက သြဂုတ်လတုန်းက ထုတ်ပြန်ခဲ့ပြီး ဒါဟာ အကဲခတ်တွေ ခန့်မှန်းထားတာထက် အများကြီး ပိုဆိုးနေပါတယ်။

ဒါ့အပြင် HSBC ဘဏ်ဟာ ဟောင်ကောင်မှာ တရုတ်အစိုးရ ထုတ်ပြန်တဲ့ လုံခြုံရေး ဥပဒေကို ထောက်ခံခဲ့တဲ့အတွက် နိုင်ငံရေး အငြင်းပွားမှုထဲ ပါလာခဲ့ပြီး အမေရိကန်ရော ယူကေကပါ ပြင်းပြင်းထန်ထန် ဝေဖန်တာကို ခံခဲ့ရပါတယ်။

ကုန်ကျငွေ လျှော့သုံး

HSBC ဘဏ်ဟာ လောလောဆယ်မှာ သူ့ရဲ့ ကမ္ဘာတစ်ဝန်းက ဘဏ်လုပ်ငန်းတွေကို အကြီးအကျယ် ပြင်ဆင် ပြောင်းလဲပစ်ဖို့ ရှေ့တိုး လုပ်ဆောင်နေပါတယ်။

ဥရောပက လုပ်ငန်းတွေမှာ အရှုံးပေါ်နေတဲ့အတွက် HSBC ဘဏ်ဟာ အာရှမှာပဲ အဓိက ဗဟိုချက်ထားပြီး ရှေ့ဆက် လုပ်ဆောင်သွားမယ်လို့ ဘဏ်အမှုဆောင်ချုပ်အဖြစ် မတ်လတုန်းက တရားဝင် တာဝန်လွှဲပြောင်းယူခဲ့တဲ့ နိုဝယ်လ်ကွင်း က ပြောပါတယ်။

HSBC အနေနဲ့ အလုပ် ၃၅၀၀၀ ဖြုတ်ဖို့ အပါအဝင် အစောပိုင်းက ချမှတ်ခဲ့တဲ့ ပြင်ဆင်ပြောင်းလဲရေး အစီအစဉ်တစ်ခုကို အရှိန်မြှင့် လုပ်ဆောင်သွားမယ်လို့ မစ္စတာကွင်းက ပြောပါတယ်။

တနင်္လာနေ့ ဟောင်ကောင် ရှယ်ယာ ဈေးကွက်မှာ HSBC ရဲ့ ရှယ်ယာဈေးတွေ ထိုးကျသွားခဲ့ပါတယ်။


BBC Burmese

https://www.bbc.com/burmese/world-54234068

အလုပ်အကိုင်ကြောင့် ကပ်ဘေးကာလ အိမ်မှာပဲနေဖို့ ခက်ခဲနေ


ကိုကိုးကျွန်းမြို့နယ်ကလွဲပြီး ရန်ကုန်တိုင်းထဲက မြို့နယ်တွေအားလုံးကို စက်တင်ဘာလ ၂၁ ရက်နေ့ ဒီကနေ့စပြီး နေအိမ်တွေမှာနေကြဖို့ ကျန်းမာရေးဝန်ကြီးဌာနက အမိန့်ထုတ်လိုက်ပေမယ့် ရန်ကုန်မြို့ထဲမှာတော့ ပြီးခဲ့တဲ့ ရက်တွေမှာ သွားလာနေကျအတိုင်း ပုံမှန်သွားလာနေကြတဲ့အပြင် အခြေခံလူတန်းစားတွေမှာလည်း စားဝတ်နေ ရေးအတွက် အလုပ်ကို ပုံမှန်လုပ်ကိုင်နေရဆဲဖြစ်ပါတယ်။

ရန်ကုန်တိုင်းတစ်တိုင်းလုံးက ပြည်သူတွေအနေနဲ့ မလိုအပ်ဘဲ အိမ်ပြင်မထွက်ဖို့ Stay at home အမိန့်ကို အစိုးရက စက်တင်ဘာ ၂၀ ရက် မနေ့ညက ထုတ်ပြန်လိုက်ပြီး အဲဒီအမိန့်ဟာ စက်တင်ဘာလ ၂၁ ရက် ဒီကနေ့ မနက် ၈ နာရီမှာစပြီး အကျုံးဝင်ပါတယ်။

မြန်မာနိုင်ငံမှာ ကိုရိုနာဗိုင်းရပ်စ် ကူးစက်ခံရသူ ခြောက်ထောင်ဝန်းကျင် ရှိလာတဲ့အချိန်မှာ ရောဂါကူးစက်ခံထား ရသူ အများဆုံးရှိတဲ့ ရန်ကုန်တိုင်းအတွင်း အခုလို အမိန့်ထုတ်ပြန်လိုက်တာ ဖြစ်ပါတယ်။

ရန်ကုန်တိုင်းမှာ စုစုပေါင်း  ၄၅ မြို့နယ် ရှိပြီး  ကိုးကိုးကျွန်းမြို့နယ်ကတော့ ဒီအမိန့်မှာ အကျုံးမဝင်ပါဘူး။

ဘဏ်လုပ်ငန်း၊ စက်သုံးဆီ၊ စားသောက်ကုန်၊ ဆေးဝါးဖြန့်ဖြူးရေး၊ ရေသန့်ထုတ်လုပ်ဖြန့်ဖြူးရေး နေ့စဉ် တကိုယ်ရေသုံး ပစ္စည်းထုတ်လုပ်တဲ့စက်ရုံတွေမှာ တာဝန်ထမ်းဆောင်နေသူတွေကလွဲလို့ အားလုံးဟာ နေအိမ်မှာနေကြရမှာပါ။ ဒါပေမဲ့ အငှားယာဉ်မောင်းနေရတဲ့ ဦးဇော်ဦးကတော့ စားဝတ်နေရေးအတွက် မထွက်လို့မရဘူးလို့  RFA ကို ပြောပါတယ်။

တကယ်လို့ မထွက်ရတဲ့အထဲ သူတို့ကားမောင်းသမားတွေ ပါနေရင်လည်း ဥပဒေကို ချိုးဖောက်တာမ ဟုတ်ဘဲ စားဝတ်နေရေးကြောင့်ထွက်ရတာပါ ဆိုပြီး သေချာရှင်းပြမယ်လို့ ဦးဇော်ဦးက ဆိုပါတယ်။

ဦးဇော်ဦးတစ်ယောက်တည်းတော့မဟုတ်ပါဘူး၊ Stay at Home ထဲမှာ အကျုံးဝင်ပေမယ့် မဖြစ်မနေ ထွက်နေရတဲ့ အောက်ခြေလူတန်းစားတွေကတော့ ရန်ကုန်မြို့ထဲမှာ ပုံမှန်အတိုင်းသွားနေရဆဲပါ။

အစိုးရ ကျန်းမာရေးဝန်ကြီးဌာနရဲ့ အမိန့်အရ မဖြစ်မနေ ဈေးဝယ်သွားရမယ်ဆိုရင် တစ်ယောက်ပဲ သွားဖို့နဲ့ ဆေးရုံ ဆေးခန်းဆိုရင် နှစ်ယောက်ပဲ သွားရမယ့်အပြင် အစိုးရ ဝန်ထမ်းတွေအနေနဲ့လည်း နှစ်ပတ်ရုံးတက်၊ နှစ်ပတ် နေအိမ်ကနေ အလုပ်လုပ်တဲ့ အစီအစဉ်နဲ့ အလှည့်ကျ လုပ်သွားရမယ်လို့ ပါရှိပါတယ်။

စမ်းချောင်းမြို့နယ်မှာ ဆိုက်က္ကားနင်းနေတဲ့ ဦးမှုံကြီးကတော့ အားလုံး တန်းတူညီတူဖြစ်အောင် ပိတ်တာမျိုး မဟုတ်ရင်တော့ မိသားစုစားဝတ်နေရေးအတွက် အလုပ် ထွက်လုပ်နေရမှာပဲလို့ ပြောပါတယ်။

ဖွင့်ထားတဲ့ ဈေးတွေမှာတော့ ဈေးသည် အများအပြားက ဆိုင်ထွက်ကြပါတယ်။ ဈေးဝယ်သူရော ဈေးရောင်းသူပါ အများစုက နှာခေါင်းစည်းတပ်ထားကြတာ တွေ့ရပါတယ်။ မကြာသေးခင်က ကပ်ဘေးကာလ အမိန့်၊ ညွှန်ကြား ချက် ချိုးဖောက်မှုနဲ့ ရန်ကုန်မှာနေထိုင်သူ ရာနဲ့ချီ အထိန်းသိမ်းခံခဲ့ရပါတယ်။

မနေ့က ထုတ်ပြန်လိုက်တဲ့ အမိန့်ကို မလိုက်နာရင် တည်ဆဲဥပဒေနဲ့ အရေးယူမယ်လို့လည်း ထုတ်ပြန်ချက်မှာ ဖော်ပြထားပါတယ်။

ဒါပေမဲ့လည်း မဖြစ်မနေ ထွက်နေရမယ့် အောက်ခြေလူတန်းစားတွေကတော့ အစိုးရထုတ်ပြန်ချက်ကို သိသည် ဖြစ်စေ မသိသည်ဖြစ်စေ မိသားစု စားဝတ်နေရေးအတွက်ကတော့ ပုံမှန်အတိုင်း သွားလာနေကြရမှာပဲလို့ ပြောကြပါတယ်။

ကျန်းမာရေးနဲ့ အားကစားဝန်ကြီးဌာနက ဒီကနေ့ မနက်အထိ ထုတ်ပြန်ချက်အရ မြန်မာနိုင်ငံမှာ ကိုရိုနာဗိုင်းရပ်စ် ကူးစက်ခံရသူ စုစုပေါင်း ခြောက်ထောင်ဝန်းကျင် ရှိသွားပြီဖြစ်သလို သေဆုံးသူကတော့  ကိုးဆယ်ကျော်ဖြစ်သွားပြီ ဖြစ်ပါတယ်။


RFA Burmese

https://www.rfa.org/burmese/news/stay-at-home-ygn-09212020101328.html

“ပိုးတွေ့လူနာဆိုတာ ရေခဲတုံးကြီး ရေပေါ်ပေါ်တဲ့အပိုင်းလောက်ပဲရှိ” - ဒေါက်တာခင်ခင်ကြီး, MOHS

ရန်ကုန်မြို့ရှိ အင်းစိန်မြို့နယ်မှာ COVID ရောဂါ ရှိ၊ မရှိ စစ်ဆေးပေးနေတဲ့ ကျန်းမာရေးဝန်ထမ်းများ။ (စက်တင်ဘာ ၂၁၊ ၂၀၂၀)


ကိုဗစ်ကပ်ရောဂါ ကူးစက်မှုတွေ တိုးလာနေတာကြောင့် အိမ်မှာပဲနေထိုင်ကြဖို့ အမိန့်ထုတ်လိုက်တဲ့ ရန်ကုန်မှာ ရောဂါကူးစက်မှု ထိန်းချုပ်ရေး အရှိန်မြှင့် ဆောင်ရွက်ဖို့ ကျန်းမာရေးဝန်ထမ်းတွေ ပြင်ဆင်နေတဲ့အကြောင်း ပြောပြပါမယ်။ ဒီသတင်းကို ဗွီအိုအေမြန်မာပိုင်း သတင်းထောက် မစုစုက တင်ဆက်ပေးမှာပါ။

ကပ်ရောဂါကူးစက်မှုတွေနဲ့ သေဆုံးမှုတွေ တိုးလာနေတာကြောင့် ရန်ကုန်တိုင်းအတွင်း နေထိုင်သူတွေ အိမ်ပြင်မထွက်ကြဖို့အမိန့် ဒီကနေ့ စတင်အသက်ဝင်လာချိန်မှာပဲ ရောဂါထိန်းချုပ်ရေးအတွက် အရှိန်မြှင့်ဆောင်ရွက်ဖို့လည်း ကျန်းမာရေးဝန်ကြီးဌာနက ပြင်ဆင်နေပါတယ်။ ရောဂါကူးစက်မှုတွေနဲ့ ထိတွေ့သူတွေကို ခြေရာခံတာ အပါအဝင် တိုးမြှင့်ဆောင်ရွက်မယ့် အစီအစဉ်တွေကိုတော့ ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက အခုလို ရှင်းပြပါတယ်။

“ကျမတို့ရဲ့ရည်ရွယ်ချက်ကတော့ ပိုးတွေ့တဲ့သူတွေကို အမြန်ဆုံးရှာဖွေဖော်ထုတ်နိုင်မယ်၊ အဲဒါမှသာ သူနဲ့ထိတွေ့ Contact တွေကို ရှာနိုင်မယ်။ ရှာနိုင်မှသာ ရောဂါကူးစက်မှုကို အမြန်ဆုံးထိန်းချုပ်နိုင်မှာဖြစ်တယ်။ အခုလက်ရှိမှာ ပိုးတွေ့တဲ့လူနာဆိုတာက ရေခဲတုန်းကြီးရဲ့ ရေပေါ်ပေါ်နေတဲ့အပိုင်းလောက်ပဲ ရှိပါတယ်။ တကယ့်တကယ် အောက်ခြေမှာမြုပ်နေတာ ၉၀ ရာခိုင်နှုန်းလောက်ရှိပါတယ်။ ဒီ ၉၀ ရာခိုင်နှုန်းသော ပြည်သူလူထုထဲမှာဖြစ်နေတဲ့ ပိုးတွေ့လူနာတွေကို အမြန်ဆုံးရှာဖွေပြီးတော့ သူတို့ကိုသီးခြားထားရှိမယ်၊ သူတို့နဲ့ Contact တွေကို သေချာလိုက်နိုင်မယ်ဆိုရင်တော့ ရောဂါအမြန်ဆုံး ထိန်းချုပ်နိုင်မှာပါ။"

အခုလက်ရှိ ရောဂါပိုးကူးစက်ခံရသူတွေထဲမှာ အတည်ပြုလူနာနဲ့ ထိတွေ့မှုရှိသူ ၁၀၀ မှာ ၁၇ ဦးလောက်က ပိုးရှိနေတာကိုတွေ့ရပြီး၊ ရောဂါသံသကြောင့် ဆေးရုံလာပြသူတွေထဲ စောင့်ကြည့်ခံရသူတွေမှာ ပိုးတွေ့တာကတော့ ၁၂ ရာခိုင်နှုန်းလောက်ရှိတယ်လို့ ဒေါက်တာခင်ခင်ကြီးက ပြောပါတယ်။ အဲဒါကြောင့် အတည်ပြုလူနာနဲ့ ထိတွေ့မှုရှိခဲ့သူတွေအပါအဝင် စောင့်ကြည့်လူနာတွေကို အဓိကဦးစားပေးပြီး ရှာဖွေနေတယ်လို့လည်း ပြောပါတယ်။

ကျန်းမာရေးနဲ့ အားကစားဝန်ကြီးဌာနရဲ့ ဒီနေ့မွန်းလွဲပိုင်းအထိ ထုတ်ပြန်ချက်အရ ပိုးတွေ့လူနာ ၅,၈၀၀ ကျော်နဲ့ သေဆုံးသူကတော့ ၉၇ ဦး ရှိနေပါတယ်။ ရောဂါပျောက်ကင်းလို့ ဆေးရုံဆင်းခွင့်ရသူကတော့ ၁,၂၀၀ ကျော် ရှိထားပြီးဖြစ်ပါတယ်။ ရောဂါကာကွယ်ရေးနဲ့ ပတ်သက်တဲ့ အချက်တွေကို လူတိုင်းလိုက်နာရမှာဖြစ်ပြီးတော့ အဲဒီထဲမှာ ရောဂါပိုးကင်းစင်သွားလို့ ဆေးရုံဆင်းခွင့်ရသူတွေလည်း ပါဝင်တဲ့အကြောင်းကို ပါမောက္ခဒေါက်တာရဲမြက မြန်မာနိုင်ငံဆရာဝန်အသင်းက ပြုလုပ်တဲ့ ကိုဗစ်နဲ့ ပတ်သက်တဲ့ အွန်လိုင်းဆွေးနွေးပွဲမှာ ပြောပါတယ်။

“ကာကွယ်မှုကတော့ လူတိုင်းယူနေရမှာပဲ။ ဒီ Mask တပ်တာရယ်၊ လက်ဆေးတာရယ်၊ လူကြားထဲမသွားတာရယ်၊ ခြောက်ပေကွာတာရယ်က လူတိုင်းလူတိုင်းက အခုဒီပြဿနာမပြီးမချင်းက ယူနေရမှာပဲ။ ဒါကိုလျှော့လို့မရပါဘူး။"

ရောဂါပိုးတွေ့လူနာတိုးလာတဲ့ ရန်ကုန်တိုင်းမှာ ယာယီကုသရေးဆေးရုံတွေ တိုးချဲ့နေပြီး အဲဒီနေရာတွေမှာ လိုအပ်တဲ့ ကျန်းမာရေးစောင့်ရှောက်သူတွေနဲ့ အသွားအလာကန့်သတ်ခံရသူတွေကို ထားမယ့် Quarantine Center တွေမှာ လုပ်အားပေးမယ့် စေတနာ့ဝန်ထမ်းလိုအပ်ချက်ကတော့ တော်တော်များများရှိနေပါတယ်။ အခုလက်ရှိအချိန်မှာ ရောဂါပျောက်ကင်းလို့ ဆေးရုံဆင်းရသူထက် ဆေးရုံတက်ရသူ ပိုးတွေ့လူနာသစ်အရေအတွက်က ပိုများနေတယ်လို့ ဒေါက်တာခင်ခင်ကြီးကပြောပါတယ်။

“အခုလက်ရှိမှာ သောကြာနေ့က ဒေတာအရဆိုရင်တော့ ICU ထဲမှာ အယောက် ၃၀ ရှိပါတယ်။ အောက်စီဂျင်ပေးနေရတာတော့ ၃၁ ယောက်ရှိပါတယ်။ သို့သော် ICU ထဲမှာရှိတဲ့ ၃၀ မှာ ပြန်ကောင်းပြီးတော့ အပြင်ပြန်ရောက်လာသူတွေလည်းရှိပါတယ်။ ဒါကြောင့်မို့ ပြည်သူတွေကိုပြောချင်တာကတော့ ဘယ်အရာမှ ကံကိုယုံပြီး ဆူးပုံနင်းလို့မရပါဘူး။ ကိုယ်ဟာရောဂါဖြစ်လို့ရှိရင် သာမန်လက္ခဏာပဲဖြစ်မယ်၊ သိပ်မဆိုးဘူး၊ ရောဂါလက္ခဏာလည်း ပေါ်ချင်မှပေါ်မယ်၊ အဲလိုမျိုး ကိုဗစ်နဲ့ စာချုပ်ချုပ်ထားတာ မဟုတ်ပါဘူး။ သာမန်လူကောင်းတွေမှာလည်း အခုရောဂါလက္ခဏာ သိပ်မဆိုးပေမဲ့လို့ ရက်ပိုင်းအတွင်းမှာပဲ Oxygen Saturation တွေကျပြီးတော့ ဆိုးဆိုးရွားရွားဖြစ်သွားတာတွေလည်း ရှိတတ်ပါတယ်။ ပြောရမယ်ဆို မြန်မာနိုင်ငံသူ နိုင်ငံသားအားလုံးဟာ ကိုယ်ပိုင်အသိစိတ်ဓာတ်ရှိရှိနဲ့ စည်းကမ်းတွေကိုလိုက်နာကြမှသာ အခုလက်ရှိဖြစ်ပွားနေတဲ့ ရောဂါကူးစက်ဖြစ်ပွားမှု များပြားနေတဲ့အခြေအနေကနေပြီးတော့ ပြောင်းပြန်လှန်နိုင်မှာဖြစ်ပါတယ်၊ ရောဂါဖြစ်ပွားမှုကို ထိန်းချုပ်နိုင်မှာဖြစ်ပါတယ်။"

ပြည်တွင်းကူးစက်နှုန်း အဆမတန်တက်နေတဲ့ ကပ်ရောဂါကူးစက်ပြန့်ပွားမှုကို အမြန်ဆုံးလျှော့ချနိုင်ဖို့အတွက်ဆို အထိရောက်ဆုံးနည်းလမ်းကတော့ ကိုယ့်ရဲ့နေအိမ်တွင်းမှာသာနေထိုင်တဲ့အစီအစဉ်ဖြစ်တယ်လို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။ နေအိမ်အပြင်ကို မဖြစ်မနေထွက်ရတော့မယ်ဆိုရင်လည်း ပါးစပ်နဲ့ နှာခါင်းစည်း Mask တို့ကို သေချာတပ်ဆင်ဖို့ကိုလည်း သတိပေးထားပါတယ်။


စုစု/VOA (Burmese)

https://burmese.voanews.com/a/myanmar-covid-dr-khinkhingyi/5591442.html

နိုင်ငံတဝန်း မိုးသည်းရေကြီးလို့ လူ ၄ ဦးထက်မနည်းသေဆုံးခဲ့

မိုးရွာနေချိန် နှာခေါင်းစည်းတပ် သွားလာနေသော လမ်းသွားလမ်းလာတချို့ကို ရန်ကုန်မြို့မှာတွေ့ရ။ (ဇွန် ၁၄၊ ၂၀၂၀)


အပူပိုင်းမုန်တိုင်း NOUL နောက်ဆက်တွဲအဖြစ် မြန်မာနိုင်ငံ နေရာတော်တော်များများမှာ မိုးသည်းထန် ရေကြီးမှုတွေကြောင့် အနည်းဆုံး လူ ၄ ဦး သေဆုံးပြီး ထိခိုက်ပျက်စီးမှုတွေလည်း ကြုံခဲ့ရတဲ့အကြောင်းကို ဗွီအိုအေမြန်မာပိုင်းသတင်းထောက် မအဂ္ဂနွန်က ပြောပြပါမယ်။

မြန်မာနိုင်ငံမှာ ဒီရက်ပိုင်းအတွင်း မိုးများပြီး ရေကြီးမြေပြိုမှုတွေကြောင့် လူသေဆုံးမှုတွေနဲ့ ထိခိုက်ပျက်စီးမှုတွေ ကြုံနေရသလို၊ နောက်ထပ်လည်း မိုးကြီးနိုင်သေးတယ်လို့ မိုးလေဝသပညာရှင်တွေ ခန့်မှန်းနေကြပါတယ်။ မိုးများရေကြီးမှုတွေ ကြံုခဲ့ရတဲ့ မြန်မာနိုင်ငံတောင်ပိုင်း မွန်ပြည်နယ် ကျိုက်ထိုမြို့နယ်၊ စစ်တောင်းကျေးရွာမှာတော့ ကမ်းရိုးတန်းအနီးက နေအိမ်တလုံး ရေထဲမျောပါရာက လူ ၃ ဦး ရေနစ်သေဆုံးခဲ့ကြောင်း မွန်ပြည်နယ်ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနက ပြည်နယ်ဦးစီးမှူး ဦးသောင်းရွှေက ပြောပါတယ်။

“ဖြစ်စဉ်ကတော့ သူတို့ မိသားစု သူ့ရဲ့ ခင်ပွန်းဖြစ်သူက နေအိမ်မှာ မရှိ၊ မိသားစု ငါးယောက်အိပ်နေတာပေ့ါဗျ၊ ကလေးငယ် နှစ်ယောက်ပေါ့။ လသားအရွယ်တစ်ယောက် ပြီးတော့ ၂ နှစ်အရွယ်တစ်ယောက် သူ့ရဲ့ မိခင်ပေ့ါနော်၊ အဲ့သူတို့ သုံးယောက်က ပါသွားတာပေါ့၊ ရေမျှောပါသွားတယ်။ ကလေးနှစ်ယောက်လွတ်သွားတယ်။”


မွန်ပြည်နယ် သံဖြူဇရပ်မြို့နယ်က စက်စဲကမ်းခြေမှာလည်း လေပြင်းတိုက်ခတ်မှုကြောင့် သစ်ပင်ပြိုလဲပြီး လူ ၁ ဦး သေဆုံးခဲ့သလို၊ ပြည်နယ်အတွင်း အိမ်ခြေ ၁၀၀ လောက် လေဘေးသင့်ခဲ့တယ်လို့လည်း ဦးသောင်းရွှေကပြောပါတယ်။ ပြီးခဲ့တဲ့ စနေနေ့မှာတုန်းကလည်း တနင်္သာရီတိုင်း ကျွန်းစုမြို့နယ်မှာ လေပြင်းတိုက်ခတ်မှုကြောင့် အိမ်ခြေ ၁၀၀ လောက် ထိခိုက်ပျက်စီးခဲ့ကြောင်း ဒေသခံတွေက ပြောပါတယ်။

အပူပိုင်းမုန်တိုင်း NOUL ဟာ ကုန်းတွင်းဝင်ရောက်ပြီး အရှိန်လျော့သွားပေမဲ့ ဘင်္ဂလားပင်လယ်အော် အနောက်မြောက်ပိုင်းမှာ လေဖိအားနည်းရပ်ဝန်းတစ်ခု ဖြစ်ပေါ်နေတယ်လို့ မိုးလေဝသနဲ့ ဇလဗေဒညွှန်ကြားရေးဦးစီးဌာနက သတင်းထုတ်ပြန်ထားပါတယ်။ ဒီတပတ်ထဲမှာပဲ ရခိုင်ကမ်းရိုးတန်းတလျှောက် မိုးကြီးရေကြီးတဲ့ အန္တရာယ်ကြုံရနိုင်တယ်လို့လည်း မိုးလေဝသနဲ့ ဇလဗေဒညွှန်ကြားရေးဦးစီးဌာန ဒုတိယညွှန်ကြားရေးမှူး ဦးလှထွန်းက ပြောပါတယ်။

“အဲ့ဖြတ်တဲ့ကာလဖြစ်တဲ့ ၁၈၊ ၁၉ ရက်၊ ၂၀ ရက်ပေါ့လေ၊ အဲ့ကာလတွေမှာတော့ ဒါမြန်မာနိုင်ငံတောင်ပိုင်းဒေသတွေရော မြစ်ဝကျွန်းပေါ်ဒေသတွေရော ရာသီဥတုဆိုးခဲ့တာတွေ ရှိတာပေါ့။ ဆိုတော့ အဲ့ဒီဟာက ပြီးသွားပြီ။ ပြီးသွားပြီဆိုတာက စောစောကပြောတဲ့ မုန်တိုင်း NOUL ရဲ့ အရှိန်ကြောင့် ဒီတခါ လေပွေလှိုင်းကနေ တဆင့်ပေ့ါလေ၊ ဒီဘင်္ဂလားပင်လယ်အော်ကို ရောက်လာတဲ့အခါကျတော့ လေဖိအားနည်းရပ်ဝန်ကြီးက အားပြန်ပြိုသွားတယ်ပေါ့နော်။ ဒီဧရာဝတီနဲ့ ချင်းတွင်းမြစ် ဒေသခံတွေ မြန်မာနိုင်ငံ မြောက်ပိုင်းဒေသတွေမှာ အခုရက်ပိုင်းမှာ လာမယ့် ၂ ရက်၊ ၃၊ ၄ ရက်လောက်ပေါ့နော်၊ လာမယ့် အခုဒီတစ်ပတ်အတွင်းမှာပဲ မိုးပြန်များနိုင်သေးတော့ ဧရာဝတီရော ချင်းတွင်းရော မြစ်ရေတွေ ပြန်တက်နိုင်တဲ့ အခြေအနေရှိတယ်ပေါ့နော်။"

မြန်မာနိုင်ငံအနှံ့ ပြီးခဲ့တဲ့ ဇူလိုင်ကနေ စက်တင်ဘာ ၁၇ ရက်ထိ မိုးကြီးရေလျှံမှုကြောင့် ပြည်နယ်နဲ့ တိုင်း ၁၁ ခုမှာ မိုးများပြီး ရေကြီးခဲ့ရာက အိမ်ထောင်စု ၂၃,၀၀၀ ကျော်၊ လူဦးရေ

၁၀၀,၀၀၀ နီးပါး ရေဘေးသင့်ခဲ့ကြောင်းလည်း ဘေးအန္တရာယ်ဆိုင်ရာ စီမံခန့်ခွဲမှုဦးစီဌာနက သတင်းထုတ်ပြန်ထားပါတယ်။


အဂ္ဂနွန်/VOA (Burmese)

https://burmese.voanews.com/a/myanmar-weather-noul/5591379.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ