KNU ထိန်းချုပ်နယ်မြေမှာ ရွေးကောက်ပွဲကျင်းပမည်

၂၀၁၀ ခုနှစ်တုန်းက မြန်မာနိုင်ငံရဲ့ ပထမဆုံး ရွေးကောက်ပွဲအတွက် မဲပေးပုံကို ပြသနေတဲ့ ကရင်အမျိုးသားတဦးကို ရန်ကုန်မြို့မှာ တွေ့ရ။ (အောက်တိုဘာ ၀၁၊ ၂၀၁၀)

ကရင်အမျိုးသားအစည်းအရုံး (KNU) အပါအဝင် တိုင်းရင်းသားလက်နက်ကိုင်အဖွဲ့တွေ ထိန်းချုပ်ရာ နယ်မြေတချို့မှာ နိုဝင်ဘာလ ရွေးကောက်ပွဲကျရင် ပထမဆုံးအကြိမ် မဲပေးခွင့်ရတော့မယ့်အကြောင်း ပြောပြပါမယ်။ ဗွီအိုအေမြန်မာပိုင်းသတင်းထောက် မအဂ္ဂနွန်က တင်ပြပေးပါမယ်။

ကရင်ပြည်နယ် ကြာအင်ဆိပ်ကြီးမြို့နယ်မှာ KNU ထိန်းချုပ်နယ်မြေမှာ လာမယ့်ရွေးကောက်ပွဲကျရင် ပထမဆုံးအကြိမ်အဖြစ် မဲပေးခွင့်ရကြတော့မှာ ဖြစ်ပါတယ်။ အစိုးရအုပ်ချုပ်မှု မရှိပေမဲ့လည်း မဲပေးနိုင်အောင် စီစဉ်ထားတဲ့အကြောင်း ကရင်ပြည်နယ် ရွေးကောက်ပွဲကော်မရှင် အတွင်းရေးမှူး ဦးမောင်မောင်နိုင်က ပြောပါတယ်။

“အဓိက ကျနော်တို့က မြို့တိုင်းမြို့တိုင်းမှာ KNU နေရာမှာလည်း တိုးတယ်၊ ဒီဘက်က မြို့တွေက လူဦးရေတွေက များလာတာ၊ တိုးတာ ရှိတာပေ့ါ၊ ထူးထူးခြားခြားတော့ ကြာအင်ဆိပ်ကြီးဘက်က KNU ထိန်းချုပ်မြေထဲမှာဆိုလို့ရှိရင် အုပ်ချုပ်ရေးမှူးဘာညာ မရှိသော်ညာလည်း လူဦးရေစာရင်းတွေ မဲစာရင်းတွေ ညှိနှိုင်းပြီးတော့မှ ကောက်ခံတာ သူတို့ကို မဲပေးလို့ရအောင်တော့ ကျနော်တို့က အဲ့ဘက်မှာ မဲရုံတွေ တိုးပေးထားတာရှိတယ်၊ အဲ့ဘက်မှာဆိုရင်တော့ ကြာအင်ဆိပ်ကြီးမှာဆိုရင်တော့ မဲရုံပေါ့ အထူးအနေနဲ့ လုပ်ပေးထားတာ ၁၂ ရုံပေါ့။ အခြားနေရာတွေက ဒီတိုင်းပဲ ရွာတွေမှာ တိုးတဲ့ဟာလည်း ရှိပါတယ်ခင်ဗျာ။”

ခန့်မှန်းခြေ မဲပေးခွင့်ရှိသူ ၂၀၀,၀၀၀ ကျော်လောက်ရှိတဲ့ ကြာအင်ဆိပ်ကြီးမြို့နယ်က မြန်မာအစိုးရနဲ့ အပစ်အခတ် ရပ်စဲထားတဲ့ KNU ထိန်းချုပ်ရာနယ်မြေမှာ ရွေးကောက်ပွဲ လုပ်ငန်းတွေကို လွတ်လွတ်လပ်လပ် ခွင့်ပြုထားတယ်လို့လည်း KNU ဒူပလာရာခရိုင်း အတွင်းရေးမှူးစောလစ်စတန်က ပြောပါတယ်။

“ဒီမှာတချို့ရပ်ကွက်ရဲ့ စာရေးတွေ လာတွေ့ဆုံပြီးပြောတယ်။ နောက်တစ်ခုကတော့ တချို့နိုင်ငံရေးပါတီတွေလာပြီး ချဉ်းကပ်တာတွေ ရှိတယ်။ အဲ့ဒါပါပဲ လာပြီးတော့ စာရေးလာပြောတဲ့ဟာက မဲပေးပိုင်ခွင့်ရှိသောသူများရဲ့ စာရင်းများ လာပြီးတော့ ကပ်ပေးချင်လို့ပါတဲ့ လာကပ်ပေးပိုင်းခွင့်ရှိပါလား၊ လာညှိနှိုင်းတော့ ခွင့်ပြုချက်ပေးလိုက်ပါတယ်။”

မြန်မာအစိုးရနဲ့ အပစ်အခတ်ရပ်စဲမထားတဲ့ တိုင်းရင်းသား လက်နက်ကိုင်အဖွဲ့ တခုဖြစ်တဲ့ မြောက်ပိုင်းရှမ်းပြည်တပ်မတော် SSPP/SSA ထိန်းချုပ်နယ်မြေမှာလည်း ရွေးကောက်ပွဲ လုပ်ငန်းတွေ လုပ်ခွင့်ရနေတယ်လို့ နိုင်ငံရေးလေ့လာသုံးသပ်သူ စိုင်းထွန်းအောင်လွင်က ပြောပါတယ်။

“ဝမ့်ဟိုင်း အဲ့မှာတွေပဲ သူတို့ပြောတဲ့ သတင်းတွေအရ SSPP က ထုတ်တဲ့ ပုံအရ သူတို့ ကော်မရှင်စာရင်းတွေလည်း ပါမှာပေ့ါနော်။ အနိမ့်ဆုံး လူဦးရေ ၁၀,၀၀၀ လောက်ရှိတယ်ပေါ့။ ဒါပေမဲ့ သူတို့ ထိန်းချုပ်နယ်မြေလို့ခေါ်တဲ့ အဲ့ဒီ မိုင်းရူးနဲ့ ကျေးသီး နယ်မြေတို့မှာလည်း လူဦးရေက ၂၀၀,၀၀၀ လောက်ရှိတယ်ဆိုတော့ အဲ့ဒီနယ်တွေထဲ လွတ်လွတ်လပ်လပ်မဲဆွယ်စည်းရုံးတာတွေ ဘာတွေလည်း ပေးလုပ်မယ် ... သဘောမျိုးပြောထားတယ်ဖြစ်ပါတယ်ဗျ။ ဒါတော့ ထိန်းချုပ်နယ်မြေပြောတာပေါ့နော်။ လှုပ်ရှားနယ်မြေ ပြောမယ်ဆိုရင်တော့တန့်ယန်း၊ မိုင်းရယ်တို့၊ လာရှို့တို့ဘက်က သီပေါတို့ အဲ့လိုဘက်တွေပါ ပါတယ်ပေါ့။”

ပြီးခဲ့တဲ့ ၂၀၁၀ ပြည့်နှစ် ရွေးကောက်ပွဲတုန်းက ဝမ့်ဟိုင်းမှာ ရွေးကောက်ပွဲ ကျင်းပခွင့်ရခဲ့သလို၊ မိုင်းရှုး၊ ကျေးသီးမြို့နယ်တွေမှာ ၂၀၁၇ ခုနှစ်တုန်းက ကြားဖြတ်ရွေးကောက်ပွဲ ကျင်းပခွင့်ရခဲ့ပေမဲ့ ၂၀၁၅ ခုနှစ် ရွေးကောက်ပွဲမှာတော့ တိုက်ပွဲတွေကြောင့် ရှမ်းပြည်နယ်တွင်းက မြို့နယ်တချို့မှာ ရွေးကောက်ပွဲတွေ မကျင်းပနိုင်ခဲ့ပါဘူး။ 

အဂ္ဂနွန်/ ဗွီအိုအေ ( မြန်မာပိုင်း)

https://burmese.voanews.com/a/myanmar-election-and-knu/5541940.html