အိန္ဒိယမှာ အရက်ပုန်းသောက်ပြီး လူ ၉၀ နီးပါး သေဆုံး၊ လူ ၂ ဒါဇင်ကျော် ဖမ်းဆီးထား

ပန်ဂျပ်ပြည်နယ်မှာ ဘေးမကင်းတဲ့ အရက်ပုန်းသောက်ပြီး လူသေဆုံးမှုအတွက် မီဒီယာတွေကို ရှင်းပြနေတဲ့ အိန္ဒိယရဲအရာရှိအချို့။ (သြဂုတ် ၁၊ ၂၀၂၀)

အိန္ဒိယနိုင်ငံမှာ သောက်သုံးဖို့ ဘေးမကင်းတဲ့ အရက်ပုန်းရောင်းချမှုနဲ့ ဆက်စပ်ပြီး လူ ၂ ဒါဇင်ကျော်ကို ရဲက ဖမ်းဆီးလိုက်သလို ရဲတပ်ဖွဲ့ဝင်နဲ့ အာဏာပိုင်တချို့လည်း ရာထူးက ရပ်ဆိုင်းထားပါတယ်။ ဒီ အရက်ပုန်း သောက်တာကြောင့် လူ ၈၀ ကျော် သေဆုံးခဲ့ရတာပါ။

အိန္ဒိယနိုင်ငံမြောက်ပိုင်း ပန်ဂျပ်ပြည်နယ်မှာ တရားမဝင် အရက်သောက်တာကြောင့် လူပေါင်း အနည်းဆုံး ၈၆ ဦးအထိ သေဆုံးအပြီး ပြီးခဲ့တဲ့အပတ်ထဲက စစ်ဆေးမှုတွေ လုပ်ခဲ့ရာမှာ မနေ့ကတော့ ဒီ တရားမဝင် အရက်ချက်နေရာပေါင်း ၃၀ ကျော်ကို ဝင်စီးကာ၊ ခုလို ဖမ်းဆီးခဲ့တာလို့ အိန္ဒိယအရာရှိတဦးက ဆိုပါတယ်။

ဒါ့အပြင် ရဲ ၆ ဦးနဲ့ အခြားအရာရှိ ၇ ဦးကိုလည်း ဒီ အဆိပ်ဖြစ်စေတဲ့ အရက်တွေရောင်းချမှု မတားမြစ်နိုင်ခဲ့တဲ့အပေါ် တာဝန်က ရပ်ဆိုင်းထားလိုက်ပြီး တရားရေးဘက်က စစ်ဆေးမှုတွေကိုလည်း ခရိုင် ၃ ခုမှာ လုပ်ဆောင်နေပါတယ်။

အိန္ဒိယနိုင်ငံမှာ ဆင်းရဲသားတွေအနေနဲ့ တရားဝင်လိုင်စင်ရ အစိုးရဆိုင်တွေက အရက်က စျေးကြီးတာမို့ စျေးသက်သာတဲ့ ခုလို ဒေသခံတွေချက်တဲ့ တရားမဝင် အရက်တွေကို သောက်သုံးလေ့ရှိပါတယ်။

ခုလို နိုင်ငံမြောက်ပိုင်းမှာမဖြစ်ခင် သောကြာနေ့တုန်းကပဲ နိုင်ငံတောင်ပိုင်းက Andhra Pradesh ပြည်နယ်မှာလည်း ကိုရိုနာဗိုင်းရပ်စ်ဆိုင်ရာ Lockdownd ချ အသွားအလာ ကန့်သတ်ထားပြီး အရက်ရောင်းချမှု ကန့်သတ်ထားချိန်မှာ လူ ၅ ဦးဟာ အရက်ပျံပါတဲ့ လက်ဆေးရည် (Hand Gel) သောက်ပြီး သေဆုံးခဲ့ပါသေးတယ်။

မနှစ်တုန်းကတော့ အိန္ဒိယနိုင်ငံ အနောက်မြောက်ပိုင်း အာသံပြည်နယ်မှာ ခုလို အဆိပ်ဖြစ်စေတဲ့ အရက်သောက်သုံးမှု ၂ ကြိမ်ထဲ လူပေါင်း အနည်းဆုံး ၁၃၃ ဦး သေဆုံးခဲ့ရပါတယ်။

ဗွီအိုအေ (မြန်မာပိုင်း)

https://burmese.voanews.com/a/india-spurious-liquor-killed/5528081.html