ကျောက်တော်မြို့မှာ ရဲစခန်းမှူး ပစ်သတ်ခံရ

ရခိုင်ပြည်နယ် စစ်တွေမြို့ရှိ လုံခြုံရေးယူထားတဲ့ မြန်မာနိုင်ငံ ရဲတပ်ဖွဲ့ဝင်တချို့။ (နိုဝင်ဘာ ၁၅၊ ၂၀၁၈)

ရခိုင်မြောက်ပိုင်း ကျောက်တော်မြို့မရဲစခန်းက စခန်းမှူးကို အမည်မသိ လူတစ်စုက သေနတ်နဲ့ ပစ်ခတ်ခဲ့တာကြောင့် သေဆုံးသွားတဲ့ အကြောင်းပြောချင်ပါတယ်။ ဗွီအိုအေမြန်မာပိုင်း သတင်းထောက် ကိုသက်နိုင်က ရခိုင်ပြည်နယ်ကနေ သတင်းပေးပို့ထားပါတယ်။

ရခိုင်ပြည်နယ် ကျောက်တော်မြို့မရဲစခန်းက စခန်းမှူး ဒုရဲမှူးထွန်းနိုင်ဦးကို သြဂုတ်လ ၁၂ ရက် မနေ့က ညနေပိုင်းက ရဲစခန်းအနီးမှာ သေနတ်နဲ့ ပစ်ခတ်ခံရပြီး သေဆုံးသွားတာဖြစ်ပါတယ်။

သေဆုံးသွားတဲ့ စခန်းမှူး ထွန်းနိုင်ဦးဟာ စခန်းအနီးက လက်ဖက်ရည်ဆိုင်က အပြန် မနေ့က ညနေ ၇နာရီ ကျော်လောက်မှာ ပစ်ခတ်ခံရတာဖြစ်တယ်လို့ ကျောက်တော်ဒေသခံတစ်ဦးက ပြောပါတယ်။

"ကျနော်တို့ သိသလောက်ကတော့ မနေ့က ညနပိုင်း ၇ နာရီကျော်လောက်က အဲဒီရဲစခန်းဘက်က သေနတ်သံ ဒိုင်းဒိုင်းဆိုပြီး ကြားတယ်။ သေနတ်သံစဲတော့ တပ်မိသားစု ရဲစခန်းမိသားစုတွေကို ဖုန်းလှမ်းဆက်ကြည့်တော့ စခန်းမှူး သေနတ်ဒဏ်ရာနဲ့ သေဆုံးနေတယ်ဆိုပြီးတော့ပြောတယ်။"

သေဆုံးသူရဲ့အလောင်းကို ကျောက်တော်ပြည်သူ့ဆေးရုံကို ပို့ဆောင်ထားတယ်လို့လည်း နီးစပ်ရာဒေသခံတွေက ပြောဆိုကြပါတယ်။

စခန်းမှူး ဒုရဲမှူး ထွန်းနိုင်ဦး အသတ်ခံရတာနဲ့ ပတ်သတ်ပြီး မေးမြန်းဖို့ ကျောက်တော်မြို့နယ် အုပ်ချုပ်ရေးမှူးနဲ့ ရခိုင်ပြည်နယ် ရဲတပ်ဖွဲ့ ပြောခွင့်ရသူတွေကို ဗွီအိုအေက ဆက်သွယ်ခဲ့ပေမဲ့ မရခဲ့ပါဘူး။

ရခိုင်မြောက်ပိုင်းတိုက်ပွဲတွေအတွင်းမှာ အရပ်သားတွေသာမက ရဲတပ်ဖွဲ့ဝင်တွေပါ လက်နက်ကိုင်တွေရဲ့ သတ်ဖြတ်တာတွေကို ခံနေရတာကြောင့် ပြည်သူတွေရဲ့ လုံခြုံရေး အရင်ကထက် ပိုပြီး စိုးရိမ်စရာဖြစ်လာတယ်လို့လည်း အမျိုးသားလွှတ်တော်ကိုယ်စားလှယ် ဒေါ်ထုမေက ပြောပါတယ်။

"ကျမတို့ ရခိုင်ပြည်နယ်ဟာ ဒီအချိန်မှာ သာမာန်ပြည်သူတွအတွက် ကျမတို့ စိုးရိမ်မကင်းဖြစ်မိတယ်။ လုံခြုံရေးအရရော ဘဝလုံခြံုရေးအရရော စိတ်ဓာတ်ပိုင်းဆိုင်ရာ လုံခြံုရေးအရရော ကျမတို့ ရခိုင်ပြည်နယ်ဟာ အင်မတန်မှ စဉ်းစားဖို့ သင့်နေတဲ့ ပြည်နယ်တစ်ခု ဖြစ်နေပါပြီ။ အထူးသဖြင့် ငြိမ်းချမ်းဖြစ်စဉ်မှာ မပါဝင်တာကလည်း ပြည်သူတွေ မလုံခြံုဖို့ အခြေအနေ တစ်ခုဖြစ်နေပါတယ်။ ကျမတို့က ဒီအခြေအနေကို တအားစိုးရိမ်တယ်။ သာမာန်စိုးရိမ်တဲ့ အခြေအနေ မဟုတ်တော့ဘူး။ ဘယ်သူ့ကိုမဆို အသက်တွေ ဆုံးရှုံးအောင်၊ ဘဝတွေ ဆုံးရှုံးအောင် ဆောင်ရွက်နိုင်တာကြောင့် ကျမတို့ တော်တေ်ာလေး စိုးရိမ်နေပါပြီ။"

ကျောက်တော်မြို့မှာ ပြီးခဲ့တဲ့ ဇွန်လ ၁၃ ရက်နေ့ကလည်း ကျောက်တော်မြို့သစ်ရပ်ကွက်မှာ ဆိုင်ကယ်နဲ့သွားတဲ့ ရဲအရာရှိတစ်ဦးကို အမည်မသိ ဆိုင်ကယ်သမားနှစ်ယောက်က ဓားနဲ့ ထိုးသတ်ခဲ့တာကြောင့် သေဆုံးသွားခဲ့ပါတယ်။

ပြီးခဲ့တဲ့ ၂၀၁၉ ခုနှစ် သြဂုတ်လ ၁၉ ရက်နေ့ကကလည်း ကျောက်တော်မြို့မရစခန်းမှူး ရဲမှူး စောသန်းလွင်ဟာ ဓားထိုးခံရပြီး သေဆုံးသွားခဲ့သလို ၂၀၁၉ စက်တင်ဘာလ ၂၂ရက်နေ့မှာလည်း ကျောက်တော်ရဲစခန်းက ရဲတပ်ကြပ်တစ်ဦး ဓားထိုးခံရပြီး သေဆုံးသွားပါသေးတယ်။

ဒါအပြင့် စစ်တွေမြို့မှာလည်း ပြီးခဲ့တဲ့ ဇွန်လ ၂၉ ရက်နေ့ ကနေပိုင်းက စစ်တွေမြို့ အမှတ် ၁ ရဲစခန်းက တပ်ကြပ်ကြီးတစ်ဦးဟာသူရဲ့ နေအိမ်အနီးမှာ အမည်မသိလူနှစ်ဦးက ဓားနဲ့ ထိုးသတ်ခံခဲ့ရပါတယ်။

ရခိုင်မြောက်ပိုင်းတိုက်ပွဲတွေ အတွင်းမှာ ရဲကင်းစန်းတွေလည်း မကြာခဏတိုက်ခံရတာတွေ ရှိသလို ရဲတပ်ဖွဲ့ဝင်တွေ ဌာနဆိုင်ရာဝန်ထမ်းတွေလည်း မကြာခဏဆိုသလို လက်နက်ကိုင်တပ်ဖွဲ့တွေရဲ့ ဖမ်းဆီးမှုတွေကို ခံနေကြရပါတယ်။

သက်နိုင် / ဗွီအိုအေ ( မြန်မာပိုင်း)

https://burmese.voanews.com/a/rakhine-kyauk-taw/5541923.html