စစ်တွေမြို့က လူပေါင်း ၁၀၀၀ ခန့်ကို ကိုရိုနာဗိုင်းရပ်စ်ပိုးရှိမရှိ သွေးနမူနာယူစစ်မယ်

စစ်တွေမြို့ ကနေ စတင်တဲ့ ရာနဲ့ချီတဲ့ ကူးစက်မှုတွေဖြစ်

ရခိုင်ပြည်နယ်အတွင်းမှာ ကိုရိုနာဗိုင်းရပ်စ် ကိုဗစ် -၁၉ ရောဂါ ကူးစက်ခံရမှုအများဆုံးဖြစ်တဲ့ စစ်တွေမြို့နယ်အတွင်းက လူပေါင်း ၁၀၀၀ ခန့်စီကနေ သွေးနမူနာတွေကို ရယူပြီး စစ်ဆေးမှုတွေ ပြုလုပ်သွားမှာ ဖြစ်တယ်လို့ ပြည်နယ် ပြည်သူ့ကျန်းမာရေး ဌာနရဲ့ ထုတ်ပြန်ချက်အရ သိရပါတယ်။

အဲ့ဒီ သွေးနမူနာယူတဲ့ လုပ်ငန်းစဉ်ကို ဩဂုတ် ၃၁ ရက် ဒီကနေ့က စတင်ပြီး စက်တင်ဘာ ၅ ရက်နေ့အထိ ဆောင်ရွက်သွားမှာ ဖြစ်ပြီး ဒီကနေ့မှာတော့ စစ်တွေမြို့မဈေးကြီး အတွင်းမှာ ရှိနေသူတွေဆီကနေ ရယူသွားမှာ ဖြစ်တယ်လို့ ပြည်နယ်ကျန်းမာရေးဌာန လက်ထောက်ညွှန်ကြားရေးမှူး ဒေါက်တာစိုးဝင်းပိုင်က ဘီဘီစီကိုပြောပါတယ်။

အခုလို ပြည်သူ တစ်ထောင်လောက်စီကနေ သွေးနမူနာတွေကို ရယူပြီးစစ်ဆေးမှုတွေ ပြုလုပ်ဖို့ စီစဉ်ခဲ့ရတာဟာ ကူးစက်ပြန့်ပွားမှု မြန်ဆန်နေတဲ့ စစ်တွေမြို့နယ်အတွင်းက ပြည်သူတွေဆီမှာ ဗိုင်းရပ်စ်ပိုး ဘယ်လောက်ထိ ကူးစက်မှုတွေ ရှိနေပြီလဲဆိုတာကို သိရှိနိုင်ဖို့အတွက် ပြုလုပ်ရတာ ဖြစ်တယ်လို့ ဒေါက်တာစိုးဝင်းပိုင်က ရှင်းလင်းပြောကြားပါတယ်။

အဲ့ဒီ ဓာတ်ခွဲနမူနာစစ်ဆေးတာကို အများပြည်သူနဲ့ သက်ဆိုင်တဲ့နေရာတွေဖြစ်တဲ့ ဆေးရုံ၊ ဈေး၊ ဘဏ်၊ လေဆိပ်၊ ရပ်ကွက်နဲ့ ကယ်ဆယ်ရေးစခန်းတွေလို နေရာတွေမှာ နေထိုင်သူတွေထံကနေ ရယူသွားမှာဖြစ်ပြီး လက်ထိပ်ကနေ သွေးဖောက်ယူမှာ ဖြစ်ကာ ကျပန်းစနစ်နဲ့ ရယူမှာဖြစ်ကြောင်း ကျန်းမာရေးဌာနရဲ့ထုတ်ပြန်ချက်မှာ ဖော်ပြပါရှိပါတယ်။

စစ်တွေစျေးမှာလည်း သွေးနမူနာယူစစ်မယ်

အခုလိုမျိုး ပြည်သူ တစ်ထောင်လောက်စီကနေ သွေးနမူနာတွေယူပြီး စစ်ဆေးမှုတွေပြုလုပ်ဖို့ ပြင်ဆင်နေတာဟာ ကောင်းတဲ့ လုပ်ဆောင်ချက်တစ်ခုအဖြစ် လက်ခံနိုင်ပေမဲ့ စစ်ဆေးခံရမယ့် ပြည်သူတစ်ယောက်ချင်းစီရဲ့ သဘောထားက အဓိကကျနေပြီး အခက်အခဲတချို့တော့ရှိလာနိုင်တယ်လို့ စစ်တွေမြို့ခံ ဦးဦးသန်းထွန်းက သုံးသပ်ပါတယ်။

ဒါ့ကြောင့် ပြည်သူတွေအနေနဲ့ ဒီလိုမျိုးဆောင်ရွက်တဲ့အပေါ်မှာ ပူးပေါင်းပါဝင်ကြဖို့နဲ့ တကယ်လို့ သွေးနမူနာကိုစစ်ဆေးတဲ့ အခါမှာ Positive ဖြစ်လို့ရှိရင်လဲ ကာယကံရှင်ရဲ့ ခွင့်ပြုချက်နဲ့သာ တို့ဖတ်နမူနာတွေကို ဆက်လက်ရယူမှာဖြစ်ပြီး ခွင့်ပြုသူတွေကိုတော့ ဆေးရုံမှာ သီးသန့်ထားရှိကာ အခမဲ့ ဆေးဝါးကုသမှုတွေ ပြုလုပ်ပေးသွားမယ်လို့ ဒေါက်တာစိုးဝင်း ပိုင်က ပြောပါတယ်။

"ဒီနေ့ စပြီးတော့ ဆင်းဖို့လုပ်နေတယ်။ ဈေးတို့ဘာတို့သွားမယ်။ ပြည်သူလူထုထဲမှာ ဘယ်လောက်များကူးစက်ထား ပြီးလဲ ဆိုတာသိချင်လို့ လက်ထိပ်က သွေးကိုဖောက်စစ်မှာ၊ အဲ့ဒီတော့ သဘောကတော့ ဈေးမှာ Random ရွေးပြီးတော့စစ်မှာ၊ စစ်တဲ့သူကို ဘယ်လိုလုပ်မယ်။ ဘာလုပ်မယ်ဆိုတာကို ရှင်းပြမယ်။ သူကိုယ်တိုင်က သဘောတူတယ် ဆိုမှ စစ်မယ်။ စစ်လို့ Positive တွေ့လာရင် နှာခေါင်းတို့ဖတ်ကိုလဲ သဘောတူရင်ယူမယ်။ အခုတွေ့တဲ့ Positive လူနာတွေထဲမှာ ရောဂါလက္ခဏာမပြတဲ့သူတွေများတယ်။ အဲ့ဒီအတွက် ဘယ်လောက်ရှိလဲဆိုတာကို သိချင်လို့လုပ်တာပါ"လို့ ဒေါက်တာစိုးဝင်းပိုင်က ပြောပါတယ်။

အခုပြည်သူတွေဆီက သွေးနမူနာတွေရယူပြီးတော့ စစ်ဆေးမှုတွေပြုလုပ်တာက လက်ရှိစစ်တွေမြို့ပေါ်မှာ ကူးစက်မှုများပြားနေတဲ့ ကိုဗစ်-၁၉ ဖြစ်ပွားမှုအခြေအနေနဲ့ပတ်သက်လို့ ရှေ့ဆက် ဆောင်ရွက်မယ့် ကိစ္စရပ်တွေမှာ အထောက်အကူပြုနိုင်မှာဖြစ်ပြီး အဲ့ဒီကရလာတဲ့အဖြေတွေကိုကြည့်ပြီးတော့ ပြောင်းလဲသင့်တာတွေကို ပြောင်းလဲ ဆောင်ရွက်ရမှာဖြစ်တယ်လို့ ဆိုပါတယ်။

ဓာတ်ပုံ ရင်းမြစ်, Myint lwin

လက်ရှိမှာတော့ စစ်တွေမြို့ပေါ်မှာ ဒီကနေ့မနက်ပိုင်းအထိ ကျန်းမာရေးဌာနရဲ့ထုတ်ပြန်ချက်အရ ပိုးတွေ့အတည်ပြု လူနာပေါင်း ၁၈၃ ယောက်ထိရှိနေပြီဖြစ်ကာ တစ်ပြည်နယ်လုံး အတိုင်းတာမှာတော့ ၃၄၅ ဦးအထိ ကူးစက်ခံထားရတာ လဲဖြစ်ပါတယ်။

အခုလိုမျိုး ပြည်သူတွေဆီကနေ သွေးနမူနာတွေယူပြီး စစ်ဆေးမှုတွေပြုလုပ်နိုင်မှ စစ်တွေမြို့ပေါ်မှာ ဘယ်နှစ်ရာခိုင်နှုန်းအထိ ကူးစက်ပျံ့နှံ့မှု ဖြစ်ပွားနေတယ်ဆိုတာကို သိရှိရမှာဖြစ်တဲ့အတွက် လက်ခံနိုင်တဲ့ လုပ်ရပ်ဖြစ်တယ်လို့ စစ်တွေမြို့ခံ ဦးဦးသန်းထွန်းက ပြောပါတယ်။

လက်ရှိမှာ ရခိုင်ပြည်နယ်အတွင်း ကိုဗစ်-၁၉ ကူးစက်မှုအခြေအနေက မြင့်မားလာနေတာကြောင့် သက်ဆိုင်ရာ ဒေသအာဏာပိုင်တွေအနေနဲ့ ကိုင်တွယ်ဖြေရှင်းတာတွေ၊ စီမံခန့်ခွဲမှုတွေ လွဲချော်ခဲ့လို့ရှိရင် စီးပွားရေး၊ လူမှုရေးတို့လို နောက်ဆက်တွဲပြဿနာတွေ ကြီးထွားလာမှာကိုလည်း ပြည်သူတွေအကြား စိုးရိမ်မှုတွေရှိနေကြပါတယ်။

ရခိုင်ပြည်နယ်မှာ ကိုဗစ် ၁၉ ပိုးကူးစက်ခံနေရကြောင်း စစ်ဆေးတွေ့ရှိခဲ့တဲ့ နှစ်ပတ်ကျော်အတွင်း မြို့နယ်ပေါင်း ၁၅ ခုအထိ ပျံ့နှံ့ကူးစက်မှုဖြစ်ပွားနေတာကို တွေ့ရှိရပြီး စစ်တွေပြီးရင် ကျောက်ဖြူမြို့မှာတော့ အတည်ပြုလူနာပေါင်း ၅၃ ဦးရှိကာ ဒုတိယအများဆုံး ကူးစက်ခံရတဲ့ မြို့နယ်တစ်ခုလဲဖြစ်ပါတယ်။

စစ်တွေဆေးရုံမှာ ကိုဗစ်လူနာ ၁၃၀ ကျော်လက်ခံ ကုသနေ

ပိုးကူးစက်ခံထားရကြောင်း စစ်ဆေးတွေ့ရှိခဲ့တဲ့ အတည်ပြုလူနာတွေကို သက်ဆိုင်ရာမြို့နယ်တွေအလိုက် ကုသမှုတွေပြုလုပ်ပေးနေပြီး တစ်ပြည်နယ်လုံးမှာ ပိုးတွေ့လူနာတွေကိုကုသမှုပေးနိုင်တဲ့ ခုတင်ပါင်း ၇၂၆ ခုရှိနေပြီး လက်ရှိမှာတော့ ပိုးတွေ့သူစုစုပေါင်းက ၃၄၅ ဦးအထိရှိနေတာဖြစ်ပါတယ်။

စစ်တွေမြို့နယ်အတွက်တော့ ကုတင် ၁၀၀ ပြင်ဆင်ထားပေမဲ့ လက်ရှိမှာ ပိုးတွေ့လူနာ ၁၈၅ ဦးရှိနေပြီဖြစ်တဲ့အတွက် စစ်တွေဆေးရုံကြီးအပြင် သူနာပြုသင်တန်းကျောင်း၊ တိုင်းရင်းဆေးရုံနဲ့ စစ်တွေတက္ကသိုလ်တို့မှာပါ စီစဉ်နေပြီး လိုအပ်လာပါက ရခိုင်ပြည်နယ်လွှတ်တော်အဆောက်အအုံ ကိုပါ အသုံးပြုသွားမယ်လို့ ဒေါက်တာစိုးဝင်းပိုင်က ပြောပါတယ်။

ဩဂုတ်လ ၃၁ ရက်နေ့ ညနေပိုင်းအထိ ရခိုင်ပြည်နယ်အတွင်း ၁၇ မြို့ထဲမှာ ၁၅ မြိုနယ်က ကိုဗစ်-၁၉ ရောဂါပိုးကူးစက်ခံထားရပြီး ရသေ့တောင်နဲ့ ရမ်းဗြဲမြို့နယ်နှစ်မြို့နဲ့ပဲ ကျန်ရှိတော့တာဖြစ်ပါတယ်။

စစ်တွေမြို့ပေါ်မှာ လက်ရှိဖြစ်ပွားနေတဲ့ ကိုရိုနာဗိုင်းရပ်စ် ကူးစက်မှုမြင့်မားလာနေတဲ့အတွက် အဲ့ဒီပိုးတွေ့လူနာတွေကို ဆေးဝါးကုသမှုတွေပြုလုပ်နိုင်ရေး မြန်မာပြည်အနှံ့အပြားမှာ တာဝန်ထမ်းဆေင်နေကြတဲ့ ဆေးဝန်ထမ်းပေါင်း ၉၀ ကျော်တို့ဟာ စေတနာ့ဝန်ထမ်းတွေအဖြစ် စစ်တွေဆေးရုံကြီးကိုရောက်ရှိနေကြပြီး အလွှာအသီးသီးက ဝန်ထမ်းတွေပါဝင်တယ်လို့ စစ်တွေဆေးရုံအုပ်ကြီး ဒေါက်တာဇော်လွင်က ဘီဘီစီကို ပြောပါတယ်။


BBC Burmese

https://www.bbc.com/burmese/burma-53973399

အမေရိကန်မှာ ကိုဗစ်ကူးစက်သူ ၆ သန်း ကျော်ပြီ

Texas ပြည်နယ် Wylie မြို့က အထက်တန်းကျောင်းတခုမှာ ကိုယ်အပူချိန် တိုင်းပေးနေတဲ့ ဆရာမတဦး။ (ဇူလိုင် ၁၄၊ ၂၀၂၀)

ကမ္ဘာတလွှား COVID-19 ကူးစက်ပျံ့နှံ့မှုတွေ ဆက်ပြီးဖြစ်နေတာမှာ အမေရိကန် ပြည်ထောင်စုမှာ ကူးစက်သူ ၆,၀၀၀,၀၀၀ ကျော်နဲ့သေဆုံးသူ ၁၈၀,၀၀၀ ကျော်ရှိပါတယ်။ အနောက်အလယ်ပိုင်း ပြည်နယ်တွေဖြစ်တဲ့ Iowa ၊ တောင်နဲ့ မြောက် Dakotaနဲ့ Minnesota ပြည်နယ်တွေမှာ တရက်တာ ကူးစက်မှုနှုန်း မြင့်တက်လာတယ်လို့လည်း Johns Hopkins တက္ကသိုလ်စာရင်းတွေအရ သိရပါတယ်။ ဒါပေမဲ့ တနိုင်ငံလုံး အတိုင်းအတာနဲ့ COVID-19 ကြောင့်သေဆုံးသူ၊ ဆေးရုံတက်ရသူနဲ့ အတည်ပြုလူနာတွေ့ရှိတဲ့ နှုန်းကတော့ ကျဆင်းလာနေတာပါ။ အမေရိကန်ပြည်ထောင်စုမှာ COVID-19 ကူးစက်မှု အများဆုံးအရေအတွက်ရှိနေပေမဲ့ ဘရာဇီး၊ ပီရူးတို့နဲ့ နှိုင်းယှဉ်ရင် တဦးချင်းကူးစက်မှုနှုန်း ပိုနည်းတယ်လို့ ရိုက်တာ စာရင်းတွေအရ သိရပါတယ်။

ပြင်သစ်နိုင်ငံမှာ အင်္ဂါနေ့ကစလို့ ကျောင်းတွေပြန်ဖွင့်ဖို့ စီစဉ်ထားပါတယ်။ နိုင်ငံတွင်း ရောဂါကူးစက်မှုနှုန်း မြင့်တက်နေသေးတာကြောင့် ကျောင်းသားတွေ ရောဂါကူးစက်နိုင်တဲ့ အန္တရာယ်ရှိတဲ့ အပေါ်စိုးရိမ်မိကြောင်း ပညာရေးဝန်ကြီး Jean-Michel Blanquer က တနင်္ဂနွေနေ့ကပြောပါတယ်။ ပြင်သစ်မှာ နေ့တိုင်း ကူးစက်သူ လူနာသစ် ထောင်နဲ့ချီမြင့်တက်နေဆဲဖြစ်ပါတယ်။ ဆရာဝန်တွေကတော့ ပိုတင်းကြပ်တဲ့ စည်းမျဉ်းတွေ ချမှတ်ဖို့၊ အသက် ၆ နှစ်အထက် ကလေးငယ်တွေကို နှာခေါင်းစည်းတပ်ဖို့နဲ့ တချို့ကို အွန်လိုင်းကနေပဲ သင်ယူကြဖို့ တိုက်တွန်းထားပါတယ်။ အခုချမှတ်ထားတဲ့ အစီအစဉ်အရ နိုင်ငံတွင်းကျောင်းတွေကို ပြန်ဖွင့်သွားမှာဖြစ်ပြီး အသက် ၁၁ နှစ်အထက်ကလေးငယ်တွေအားလုံး နှာခေါင်စည်းကို တနေ့လုံးဝတ်ဆင်ထားဖို့နဲ့ သွားလာလှုပ်ရှားမှုနဲ့ လူစုလူဝေး စည်းကမ်းသတ်မှတ်ချက်တွေချမှတ်ထားပါတယ်။

အစောပိုင်းတုန်းက COVID-19 ကူးစက်တဲ့ ဒဏ်ကို အပြင်းအထန်ခံခဲ့ရတဲ့ အီတလီမှာ ဒီသီတင်းပတ်တွင်း ကူးစက်မှုနှုန်းပြန်မြင့်တက်နေပြီး အရေးပေါ်လူနာ လူနာဦးရေ ၈၀ ကျော်ရှိပါတယ်။ နယူးဇီလန်မှာတော့ ကျောင်းတွေနဲ့ စီးပွါးရေးလုပ်ငန်းတွေ ကိုဒီကနေ့ ပြန်ဖွင့်မှာဖြစ်ပြီး လူအများသွားလာတဲ့ နေရာတွေမှာ နှာခေါင်းစည်းတပ်ဆင်ကြဖို့ အာဏာပိုင်တွေက အားလုံးကို တိုက်တွန်းထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/covid-main/5564582.html

 

ရခိုင်ပြည်နယ် ကိုဗစ်အကြပ်အတည်းကြား စစ်ရေးတင်းမာမှုများ ရှိနေဆဲ

ဘူးသီးတောင်မြို့နယ် စိုင်းဒင်စျေးရွာရောက် စစ်ရှောင်များ။ (ဓါတ်ပုံ -MP Oung Thaung Shway)


ကိုရိုနာဗိုင်းရပ်စ် ကူးစက်မှုတွေ တိုးလာနေတဲ့ ရခိုင်ပြည်နယ်မှာ လက်နက်ကိုင် ပဋိပက္ခတွေလည်း ဆက်လက်ဖြစ်ပွားနေတာကြောင့် ဒေသခံတွေ ထိခိုက်သေကြေမှုတွေ ကြုံနေရတဲ့အကြောင်း ပြောပြပါမယ်။ ဗွီအိုအေမြန်မာပိုင်း သတင်းထောက် ကိုသက်နိုင်က သတင်းပေးပို့ထားပါတယ်။

ရခိုင်ပြည်နယ်မှာ ကပ်ရောဂါကူးစက်ခံရသူ အတည်ပြုလူနာတွေ ဆက်တိုးနေချိန်မှာပဲ စစ်ရေးတင်းမာမှုတွေနဲ့ ကြုံနေရဆဲ ဖြစ်ပါတယ်။ ဒီရက်ပိုင်းအတွင်းမှာပဲ ရသေ့တောင်မြို့နယ်မှာ လက်နက်ကြီးကျည် ကျရောက်ပေါက်ကွဲမှုတွေကြောင့် ဒေသခံတွေ ထိခိုက်ဒဏ်ရာ ရခဲ့ကြသလို ဘေးလွတ်ရာ တိမ်းရှောင်နေကြရတယ်လို့ ရသေ့တောင်မြို့နယ် ပြည်သူ့လွှတ်တော်အမတ် ဒေါ်ခင်စောဝေက ပြောပါတယ်။

"အခုက COVID -19 ကလည်း ဖြစ်နေတယ်။ ရသေ့တောင်မြို့နယ်မှာ ဆိုရင်လည်း တချို့နေရာတွေ ဆိုရင် တိုက်ပွဲတွေ ဖြစ်တယ်။ တိုက်ပွဲတွေ မဖြစ်ဘဲနဲ့လည်း လက်နက်ကြီးကျတယ်၊ အဲဒါမျိုးတွေလည်း တွေ့နေရပါတယ်။ အဲတော့ ဒဏ်ရာရတဲ့ လူနာတွေလည်း ရသေ့တောင်မြို့ပေါ်မှာ လာကုရတာ ရှိတယ်။ ဒီနေ့မှာလည်း စေတီပြင်မှာ လက်နက်ကြီးကျပြီးတော့ အသက် ၁၇နှစ် အရွယ်တစ်ယောက် ဒဏ်ရာရသွားတယ်။"

ရသေ့တောင်မြို့နယ်မြောက်ပိုင်းမှာ ပြီးခဲ့တဲ့ သီတင်းပတ်ကတည်းက လက်နက်ကြီး လက်နက်ငယ်တွေနဲ့ ပစ်ခတ်မှုတွေ ရှိနေတာကြောင့် ဒေသခံတချို့ ဘေးလွတ်ရာ ထွက်ပြေးနေရတယ်လို့လည်း ရသေ့တောင်မြို့က စစ်ရှောင် ဒုက္ခသည်တွေအရေး ကူညီပေးနေတဲ့ ကိုဘက္ကာက ပြောပါတယ်။

"အသစ်ရောက်လာတဲ့ စစ်ရှောင်တွေကတော့ဗျာ။ ရေဇိုးချောင်းကျေးရွာက ၁၀၀ ကျော်လောက်တော့ ရှိတယ်။ ငစံဘော် ကျေးရွာကတော့ မရောက်လာသေးဘူး။ သူတို့က နီးစပ်တဲ့ကျေးရွာတွေကို ထွက်ပြေး နေကြတာ။ ကျနော်တို့လည်း လမ်းကြောင်းမကောင်းတော့ စားနပ်ရိက္ခာတွေ သွားပို့ဖို့ အခက်အခဲဖြစ်နေတယ်။ မေယုမြစ်မှာရှိတဲ့ မြန်မာ့တပ်မတော်ရေတပ်က အမြဲတမ်းပစ်ခတ်နေတော့ သွားပြီးတော့ ကူညီ ထောက်ပံ့ပေးဖို့ အခက်အခဲဖြစ်နေတယ်ဗျာ။"

ပြီးခဲ့တဲ့ သီတင်းပတ်ထဲ ရခိုင်ပြည်နယ်မြောက်ပိုင်း ကျောက်တော်မြို့နယ်မှာ လက်နက်ကြီးကျည် ကျရောက်ပေါက်ကွဲမှုကြောင့် ဒေသခံတွေ ထိခိုက်သေကျေမှုတွေ ရှိခဲ့တယ်လို့လည်း ကျောက်တော်မြို့နယ် ပြည်သူ့လွှတ်တော်အမတ် ဦးထွန်းဝင်းက ပြောပါတယ်။

"တပ်မတော်စစ်ကြောင်း တစ်ခုက ရွာထဲကနေ လမ်းမဘက်ကို တက်လာတာပေါ့နော်။ အဲဒီမှာ ကောက်စိုက်နေတဲ့ အမျိုးသမီးတစ်စုက ကြောက်လန့်ပြီးတော့ ရွာထဲကို ဝင်လာကြတဲ့အချိန် လက်နက်ကြီးကျည် ထိပြီးတော့ ၄ ယောက်လောက် ဒဏ်ရာရတယ်ဆိုပြီးတော့ ကျနော်တို့ကို ဆက်သွယ်လာတယ်။ တစ်ယောက်ကတော့ ဆေးရုံမှာ သေသွားတယ်လို့ကြားတယ်။ နှစ်ယောက်ပေါ့နော်၊ အပေါက်ဝက တစ်ယောက်ရယ်၊ ကျောက်တော် ချင်းရွာရပ်ကွက်က အသက် သုံးဆယ်အရွယ် မောင်နိုင်ဝင်းဆိုတဲ့ တစ်ယောက်ရယ်။"

ကိုရိုနာဗိုင်းရပ်စ် ကူးစက်မှုဒဏ် အဓိကခံနေရတဲ့ ရခိုင်ပြည်နယ်မှာ စစ်ရေးတင်းမာမှုတွေကြောင့် ဒေသခံတွေ ထိခိုက်သေဆုံးတဲ့အထိ အန္တရာယ်ကျရောက်နေတဲ့အတွက် တိုက်ပွဲတွေ အမြန်ဆုံးရပ်ဖို့ လိုအပ်နေပြီလို့လည်း ရသေ့တောင်မြို့နယ် ပြည်သူ့လွှတ်တော်အမတ် ဒေါ်ခင်စောဝေက တိုက်တွန်းပါတယ်။

"ရခိုင်မြောက်ပိုင်း တိုက်ပွဲဖြစ်နေတဲ့နေရာတွေက တော်တော်စိန်ခေါ်မှု များတာပေါ့နော်။ ကိုယ့်အိမ်မှာ ကိုယ်နေ ရင်း အိမ်ပေါ်ကို လက်နက်ကြီး ကျည်ကျလာတာကို ရင်ဆိုင်နေရတယ်။ အခုက COVID-19 ရောဂါလည်း ကိုယ့်ရဲ့ကျေးရွာမှာ ဘယ်နေ့ရောက်လာမလဲ စစ်ရှောင်စခန်းတွေမှာ ဘယ်နေ့များ ရောက်လာမလဲဆိုပြီးတော့ စိုးရိမ်နေကြရပါတယ်။ အခုလို COVID-19 ဖြစ်နေတဲ့ ကာလမှာတော့ တိုက်ပွဲတွေကို ရပ်တန့်ထားဖို့ တိုက်တွန်းထား တာလည်း ရှိပါတယ်။ အခုလည်း တောင်းဆိုပါတယ်။"

လက်နက်ကိုင်ပဋိပက္ခတွေကြောင့် နေရပ်စွန့်ခွာထွက်ပြေးနေကြရတဲ့ စစ်ရှောင်ဦးရေ ၂၀၀,၀၀၀ ကျော်လောက် ရှိမယ်လို့ ခန့်မှန်းထားတဲ့ ရခိုင်ပြည်နယ်မှာ မကြာသေးခင် သီတင်းပတ်အနည်းငယ်ကစ ကိုရိုနာဗိုင်းရပ်စ် ကူးစက်မှုတွေ ရုတ်တရက် တိုးလာရာက အသွားအလာ ကန့်သတ်ထိန်းချုပ်ထားပါတယ်။ စစ်တွေမြို့နယ်မှာ ညမထွက်ရအမိန့် အပါအဝင် ပြည်နယ်တခုလုံးမှာလည်း မလိုအပ်ရင် အိမ်ပြန်မထွက်ကြဖို့ ညွှန်ကြားထားပါတယ်။ 


သက်နိုင်/VOA (Burmese)

https://burmese.voanews.com/a/rakhine-covid/5564648.html

ပိုးတွေ့လူနာနဲ့ထိတွေ့ခဲ့တဲ့ နေပြည်တော်က လူ ၇၀ ကျော်ကို စောင့်ကြည့်နေ

နေပြည်တော် စီလမ်းဆုံ အဝင်ဂိတ်မှာ နေပြည်တော်ကို ဝင်ရောက်လာတဲ့ ခရီးသွားတွေကို ၂၀၂၀၊ ဧပြီ ၁၄ ရက်နေ့က ကျန်းမာရေး စစ်ဆေးပေးနေစဉ် / ဓာတ်ပုံ - သက်စုအောင်/ RFA


လူနာနံပါတ် ၆၅၉ ဟာ သြဂုတ်လထဲမှာ ရခိုင်ပြည်နယ်ကနေတဆင့် နေပြည်တော်ကို လာရောက်ခဲ့ဖူးတဲ့အတွက်၊ အဲဒီလူနာနဲ့ ဆက်စပ်သူ ၇၀ ကျော်ကို ကျန်းမာရေးစစ်ဆေးတာ၊ ကန့်သတ်စောင့်ကြည့်တာတွေ လုပ်ဆောင်နေ တယ်လို့ နေပြည်တော် ပြည်သူ့ကျန်းမာရေးနှင့် ကုသရေးဦးစီးဌာန ဒုတိယ ညွှန်ကြားရေးမှူး ဒေါက်တာမျိုးစုကြည် က RFA ကိုပြောပါတယ်။

လူနာနဲ့ အနီးကပ် ထိတွေ့ခဲ့သူ ငါးယောက်ကို အာခေါင်တို့ဖတ်၊ နှာခေါင်းတို့ဖတ်ယူ စစ်ဆေးရာမှာ သုံးဦးမှာ ပိုးမတွေ့ရကြောင်းနဲ့ နှစ်ဦးရဲ့ အဖြေကိုစောင့်ဆိုင်းနေဆဲလို့ ဒေါက်တာ မျိုးစုကြည်က ပြောပါတယ်။

အသက် ၂၁ နှစ်အရွယ် လူနာနံပါတ် ၆၅၉ ဟာ သူနေထိုင်ရာ ရခိုင်ပြည်နယ် အမ်းမြို့ကနေ နေပြည်တော်ကို သြဂုတ်လ  ၁၉ ရက်နေ့မှာ ရောက်ရှိခဲ့ပြီး နေပြည်တော် ပုဗ္ဗသီရိမြို့နယ်က အိမ်တစ်အိမ်မှာ တည်းခိုခဲ့ပါတယ်။

၂၂ ရက်နေ့မှာ တော့ အလုပ်သမား ညွှန်ကြားမှုဦးစီးဌာနကလုပ်တဲ့ ရာထူးဝင် စာမေးပွဲကို သွားရောက်ဖြေဆိုခဲ့ပြီး အဲဒီနေ့မှာပဲ အမ်းမြို့ကို ပြန်သွားခဲ့တယ်လို့ သိရပါတယ်။

ဒါ့ကြောင့် နေပြည်တော်ရောက်တုန်းမှာ သူတည်းခဲ့တဲ့နေအိမ်က မိသားစုဝင် သုံးဦး၊ ကားမောင်းလိုက်ပို့ခဲ့သူ တစ်ဦး၊ အဲဒီကားသမားနဲ့ တစ်ခန်းတည်း နေထိုင်သူတစ်ဦး စုစုပေါင်း ငါးဦးကို အသွားအလာ ကန့်သတ်စောင့် ကြည့်ပြီး သြဂုတ်လ ၃၀ ရက်က အာခေါင်တို့ဖတ်ယူကာ စစ်ဆေးခဲ့တယ်လို့ သိရပါတယ်။

အဲဒီ ငါးဦးထဲက လူနာနံပါတ် ၆၅၉ တည်းခိုခဲ့တဲ့ အိမ်ကမိသားစုဝင် သုံးဦးလုံးမှာ ပိုးမတွေ့ရကြောင်းနဲ့ ကျန်နှစ်ဦးကတော့ အဖြေမရသေးကြောင်း ဒေါက်တာမျိုးစုကြည်က ရှင်းပြပါတယ်။

ဒါ့အပြင် လူနာနံပါတ် ၆၅၉ နဲ့ အလုပ်သမား ညွှန်ကြားမှုဦးစီးဌာနမှာ စာမေးပွဲအတူတူဖြေဆိုသူ ၄၈ ဦး ရှိခဲ့ပြီး အဲဒီထဲက ခြောက်ဦးဟာ နေပြည်တော်က ဖြစ်ပါတယ်။ ကျန်တဲ့သူတွေကတေ့ာ တိုင်းနဲ့ ပြည်နယ် နယ်စုံက ဖြစ်တဲ့အတွက် သက်ဆိုင်ရာ တိုင်းနဲ့ ပြည်နယ်တွေကို အကြောင်းကြားထားတယ်လို့လည်း ဒေါက်တာ မျိုးစုကြည်က ပြောပါတယ်။

စာမေးပွဲဖြေဆိုရာမှာ MASK တပ်တာ၊ Face Shield အသုံးပြုပြီး အကာအကွယ်တွေနဲ့ ဆောင်ရွက်ခဲ့တာကြောင့် သူနဲ့အတူ စာမေးပွဲဖြေဆိုခဲ့သူတွေနဲ့ စာမေးပွဲမှာ ကြီးကြပ်ဆောင်ရွက်ခဲ့တဲ့ ဝန်ထမ်း ၂၃ ဦးတို့ကိုတော့ သူတို့ရဲ့ နေအိမ်တွေမှာပဲ အသွားအလာ ကန့်သတ်စောင့်ကြည့်နေတယ်လို့ ဒေါက်တာ မျိုးစုကြည်က ရှင်းပြပါတယ်။

ဒီနေ့ထိတော့ နေပြည်တော်မှာ ကိုရိုနာဗိုင်းရပ်စ် ပိုးတွေ့သူ မရှိသေးဘူးလို့ ဒေါက်တာမျိုးစုကြည်က ဆိုပါတယ်။

ပြီးခဲ့တဲ့ သြဂုတ် ၂၁ ရက်ကစပြီး ရခိုင်ကနေ နေပြည်တော်ကို လာတဲ့သူတွေအနေနဲ့ သက်ဆိုင်ရာက စီစဉ်ထားတဲ့ နေရာမှာ အသွားအလာ ကန့်သတ်စောင့်ကြည့်မှာဖြစ်ကြောင်း နေပြည်တော်ကောင်စီက ညွှန်ကြားချက်ထုတ် ထားပြီး၊ သြဂုတ် ၃၀ ညအထိ ရခိုင်ကနေ နေပြည်တော်ကိုလာတဲ့သူ စုစုပေါင်း အယောက် ၈၀ ကျော်ရှိတယ် လို့လည်း နေပြည်တော်ကျန်းမာရေးနှင့် ကုသရေးဦးစီးဌာနကနေတဆင့် စုံစမ်းသိရပါတယ်။


RFA Burmese

https://www.rfa.org/burmese/news/coronavirus-in-myanmar-08312020045309.html

 

ရခိုင်မှာ ကပ်ရောဂါကူးစက်မှု မယုံသူတွေ ရှိတာကြောင့် ကာကွယ်ထိန်းချုပ်ရေး အခက်အခဲရှိနေ


ကိုရိုနာဗိုင်းရပ်စ် ကူးစက်ပြန့်ပွားမှုများနေတဲ့ ရခိုင်ပြည်နယ်က ဒေသခံပြည်သူတစ်ချို့ဟာ ဗိုင်းရပ်စ်ကူးစက်မှု အပေါ် မယုံကြည်ဖြစ်နေတာကြောင့် ကာကွယ်ထိန်းချုပ်ရေးမှာ အခက်အခဲတွေရှိနေပါတယ်။

ရခိုင်ဒေသခံပြည်သူတချို့ဟာ ပြည်နယ်အတွင်း ကိုရိုနာဗိုင်းရပ်စ် ကူးစက်ခံရသူတွေရှိနေတယ်ဆိုတာကို မယုံကြည်ကြဘူး ဖြစ်နေကြပါတယ်။

မြောက်ဦးမြို့နယ် မြောင်းဘွေချေကျေးရွာ ဒေသခံ ဦးခင်မောင်သန်းက ဒါဟာ အစိုးရရဲ့မူဝါဒ (ပေါ်လစီ) တစ်ခုလို့ ကျေးရွာကလူတွေက ထင်နေကြောင်း ပြောပါတယ်။

“ကျေးရွာကလူတွေက  ပညာမရှိတဲ့သူတွေဆိုတော့ မယုံကြည်ကြတဲ့သူတွေက ဒါကို ပေါ်လစီတစ်ခုလို့ ပြောနေကြတယ်။ အများကြီးပဲ အဲလိုမြင်နေကြတာ ကျေးရွာထဲမှာလည်းရှိတယ်”

ဒီလိုမယုံကြည်နိုင်ဖြစ်နေရတာဟာ ဒေသခံတွေဆီကို သတင်းအချက်အလက်စီးဆင်းမှု အားနည်းပြီး အစိုးရရဲ့ လုပ်ဆောင်ချက်တွေအပေါ် ယုံကြည်မှု ပျက်ပြားနေတဲ့အတွက်ကြောင့်ဖြစ်တယ်လို့ လူမှုကူညီရေး လုပ်နေသူ တွေက ထောက်ပြကြပါတယ်။

ရခိုင်မျိုးနွယ်စုများ အစည်းအရုံး REC အတွင်းရေးမှူး ကိုဇော်ဇော်ထွန်းက မယုံကြည်ကြသူတွေ အများအပြား ရှိနေပြီး ဖုန်းနဲ့ဆက်သွယ်မေးမြန်းကြတဲ့အတွက် ဖြေရှင်းပြရကြောင်း ပြောပါတယ်။

“ပိုးတွေ့တဲ့လူတွေတောင် ပထမ လက်မခံချင်ကြဘူး စစ်တယ်ပိုးတွေ့တယ်ဆိုတာ ကျန်းမာရေးက အကြောင်း ကြားတယ် ဒါပေမဲ့ သူတို့က လက်မခံချင်ဘဲ ဖုန်းဆက်မေးလာကြတယ်၊ ဘာလို့လဲဆိုတော့ သူတို့မှာ ရောဂါ လက္ခဏာမပြဘူး ဒီတိုင်းပဲ အဲတော့ သူတို့က တစ်ခုခုမဟုတ်၊ မမှန်တာလားလို့ သံသယဝင်ကြတာ ကျနော်တို့ ကို မေးလာရင်တော့ ဖြေရှင်းပြရတယ်၊အခုတော့ သဘောပေါက်သွားပြီ ဒါပေမဲ့ နယ်တွေမှာတော့ရှိနေတုန်း ပဲလို့ ကြားတယ်”

သြဂုတ် ၂၈ ရက်နေ့ မနက် ၈ နာရီအထိ ကျန်းမာရေးဝန်ကြီးဌာနက ထုတ်ပြန်ချက်အရ ဗိုင်းရပ်စ် ကူးစက်ခံထား ရသူ ၁၄ ဦး ရှိနေပြီဖြစ်တဲ့ မြောက်ဦးမြို့မှာ ပထမဆုံး ပိုးတွေ့ရှိသူတွေ နေထိုင်တဲ့လမ်းကို ကန့်သတ်စောင့်ကြည့်ဖို့ လုပ်ဆောင်ခဲ့ပေမယ့် နောက်ထပ်တွေ့ရှိသူတွေ နေထိုင်တဲ့လမ်းကို မလုပ်ဆောင်တာတွေကြောင့် ဒေသခံတွေက မကျေနပ်ကြဘဲ ကန့်သတ်စောင့်ကြည့်တာကို ပယ်ဖျက်လိုက်ကြပါတယ်။

ဗိုင်းရပ်စ်ရှိနေတယ်ဆိုတာကို မယုံကြည်တဲ့အတွက် ပိုးထိန်းချုပ်ကာကွယ်ရေးလုပ်ဆောင်ရာမှာ အခက်အခဲတွေ ဖြစ်နေတယ်လို့ မြောက်ဦးမြို့နယ် လူမှုကူညီရေးအဖွဲ့က ကိုသန်းထွန်းက ပြောပါတယ်။

“အခက်အခဲက ကျနော်တို့ဆို မက်စ်တွေ လက်ဆေးတာတွေ ပေးဝေတယ် အခမဲ့ပေါ့ ဒါပေမဲ့ ဒီနေ့ပေးလိုက်ရင် နောက်နေ့ မတပ်လာတော့ဘူး၊ အိမ်မှပဲထားခဲ့လိုက်တယ် စိတ်လဲမကောင်းဘူး၊ ဒေါသလည်းဖြစ်တယ်၊ ဈေးထဲမှာဆိုရင် မက်စ်မတပ်ရင် ဈေးထဲပေးမဝင်ဘူး၊ အပြင်မှာတပ်တယ် ဈေးထဲရောက်တော့ ဖြုတ်ထားလိုက် တယ် အဲလိုမျိုး”

ရခိုင်ပြည်နယ် အစိုးရအဖွဲ့ဝင် စည်ပင်သာယာရေးဝန်ကြီး ဦးဝင်းမြင့်က ဗိုင်းရပ်စ်ကူးစက်မှုဟာ ရခိုင်ပြည်နယ်မှာ တကယ်ဖြစ်နေပြီး ပြည်သူတွေအနေနဲ့ နားလည်မှုမလွဲဖို့ တိုက်တွန်းလိုက်ပါတယ်။

“အစိုးရဖက်က ဘက်ပေါင်းစုံလုပ်နေတယ် လွဲမှားနေတော့ အသိပညာပေးမှုတွေကလည်း မထိရောက်ဘူးဖြစ် နေတယ်၊ ပြည်သူတွေ အထင်မြင်လွဲမှားမှုကို မလွဲမှားဖို့ပြောကြားလိုပါတယ်၊ ဒီရောဂါက အမှန်တကယ်ဖြစ် ပျက်နေတဲ့ ရောဂါဖြစ်ပါတယ်”

ပြည်သူတွေမယုံကြည်ကြတဲ့အတွက် ပိုးကူးစက်မှု ထိန်းချုပ်ရေးလုပ်ငန်းတွေမှာ အခက်အခဲတွေရှိနေပြီး ကူးစက်မှုတွေ ပိုဖြစ်ပွားနေရတယ်လို့ လူမှုကူညီရေးလုပ်ဆောင်နေသူတွေက ဆိုပါတယ်။

သြဂုတ်လထဲမှာတင် ရခိုင်ပြည်နယ်မှာ ကိုရိုနာဗိုင်းရပ်စ် ကူးစက်ခံရသူ ၂၀၀ ကျော်တွေ့ရှိထားပြီး ပိုးကူးစက်ခံ ရသူတွေ ဒီရက်အတွင်း နေ့တိုင်းနီးပါး ထပ်တိုးနေပါတယ်။

စစ်တွေ၊ မောင်တော၊ မြောက်ဦး၊ ပေါက်တော၊ ဘူးသီးတောင်၊ ကျောက်တော်၊ မင်းပြား၊ မြေပုံ၊ ကျောက်ဖြူ၊ သံတွဲ၊ တောင်ကုတ်နဲ့ ပုဏ္ဏားကျွန်းမြို့နယ်တွေမှာ ပိုးကူးစက်ခံရသူတွေရှိထားတာ ဖြစ်ပါတယ်။


RFA Burmese

https://www.rfa.org/burmese/news/difficult-to-control-coronavirus-in-rakhine-08302020221237.html

(၃၁-၈-၂၀၂၀) ရက်နေ့၊ နံနက် (၈:၀၀) နာရီ COVID-19 ရောဂါဓာတ်ခွဲအတည်ပြုလူနာသစ် (၁၂) ဦးတွေ့ရှိ

၁။     (၃၀-၈-၂၀၂၀) ရက်နေ့အတွက် COVID-19 ရောဂါ ဓာတ်ခွဲစစ်ဆေးရာတွင်-

- အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ဒုတိယအသုတ်) ဓာတ်ခွဲနမူနာ (၁,၀၀၀) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) မှ (ဒုတိယအသုတ်) ဓာတ်ခွဲနမူနာ (၃၇)  ခု၊

- နေပြည်တော် ပြည်သူ့ဆေးရုံကြီး ကုတင် (၁၀၀၀) မှ ဓာတ်ခွဲနမူနာ (၉) ခု၊

- ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ (၉၈) ခုနှင့်

- ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၂၈)ခု၊

- စုစုပေါင်း ဓာတ်ခွဲနမူနာ (၁,၁၇၂) ခုအား ထပ်မံစစ်ဆေးခဲ့ရာ-

• COVID-19 ရောဂါဓာတ်ခွဲအတည်ပြုလူနာသစ် (၁၂) ဦးတွေ့ရှိပါသည်။


၂။ (၃၁-၈-၂၀၂၀) ရက်နေ့၊  နံနက် (၈:၀၀) နာရီအထိ  မြန်မာနိုင်ငံတွင် COVID-19 ရောဂါ ဓာတ်ခွဲအတည်ပြုလူနာ (၇၈၇) ဦး ရှိပြီဖြစ်ပါသည်။

၃။ (၃၀-၈-၂၀၂၀) ရက်နေ့အတွက်  COVID-19 ရောဂါ ဓာတ်ခွဲစစ်ဆေးမှုများအနေဖြင့် -

- အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်)(NHL) မှ ဓာတ်ခွဲနမူနာ (၁,၅၇၀) ခု၊ 

- ဆေးသုတေသနဦးစီးဌာန(DMR) မှ ဓာတ်ခွဲနမူနာ (၄၁၉) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန(မန္တလေး) မှ ဓာတ်ခွဲနမူနာ (၃၀၁) ခု၊

- နေပြည်တော် ပြည်သူ့ဆေးရုံကြီး ကုတင်(၁၀၀၀) မှ ဓာတ်ခွဲနမူနာ (၉)ခု

- ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ (၉၈) ခုနှင့် 

- ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၂၈)ခု၊

- စုစုပေါင်း(၂,၄၂၅) ခုအား  စစ်ဆေးခဲ့ပါသည်။


Ministry of Health and Sports, Myanmar

https://www.facebook.com/MinistryOfHealthAndSportsMyanmar

စစ်တွေမှာ COVID-19 လူနာတွေ တိုးလာရင် ကုသစောင့်ရှောက်မှုပုံစံ ပြောင်းမယ်

ရန်ကုန်မြို့က Quarantine စင်တာတခုမှာ ကိုရိုနာဗိုင်းရပ်စ် စမ်းသပ်စစ်ဆေးဖို့ ပြင်ဆင်နေတဲ့ ကျန်းမာရေးဝန်ထမ်းများ။ (မေ ၁၆၊ ၂၀၂၀)

ရခိုင်ပြည်နယ် စစ်တွေမှာ COVID-19 ကူးစက်ခံရသူတွေအတွက် နောက်ထပ် ပြင်ဆင်ထားတဲ့ ကုတင်နေရာ ၁၁၀ ကျန်ရှိနေပြီး ဒီထက်များလာရင်တော့ စစ်တွေတက္ကသိုလ်မှာ တိုးချဲ့ဖို့၊ နောက်ဆုံးအဆင့်အနေနဲ့ အိမ်မှာပဲထားပြီး ကုသမှု ပေးဖို့အထိ စဉ်းစားသုံးသပ်နေရတဲ့အကြောင်း မသိင်္ဂီထိုက် စုစည်းတင်ပြပေးထားပါတယ်။

မြန်မာနိုင်ငံတွင်း COVID-19 ကူးစက်မှု အများဆုံးဖြစ်တဲ့ စစ်တွေက ကုတင် ၅၀၀ ဆန့် ဆေးရုံကြီးမှာ တနင်္ဂနွေနေ့အထိ COVID-19 ကူးစက်ခံရသူ လူပုဂ္ဂိုလ် ၁၈၁ ဦးကို ကုသစောင့်ရှောက်မှု ပေးနေပါတယ်။ နောက်ထပ် COVID-19 ကူးစက်ခံရသူတွေအတွက် ကုတင်နေရာ ၁၁၀ ထပ်ပြီး ပြင်ဆင်ထားတယ်လို့ စစ်တွေ ဆေးရုံအုပ်ကြီး ဒေါက်တာ ဇော်လွင်က ဗွီအိုအေကို ပြောပါတယ်။

“ပထမက ၁၀၀၊ နောက် ၁၀၀ ပေါ့၊ အဲဒါကြောင့် စစ်တွေဆေးရုံမှာ ၂၀၀ ပေါ့။ သူနာပြုသင်တန်းကျောင်းက ၄၀ ဆိုတော့ ၂၄၀ ပေါ့။ အဲဒီ ၂၄၀ မှာ ကျနော်တို့ ညနေကထွက်တဲ့ ၈ ယောက်နဲ့ ပေါင်းရင် ၁၈၀ စာပေါ့နော်။ အဲတော့ ကျနော်တို့ဆေးရုံမှာ နောက်ထပ် ၆၀ စာ ရှိသေးတယ်ပေါ့။ အကယ်၍များ ဒီထက်ပိုများရင်တော့ တိုင်းရင်းဆေးရုံမှာ နောက်ထပ် ၅၀ စာ ရှိပါတယ်။ အဲတော့ ကျနော်တို့ ကုတင်လွတ် အခန်းလွတ်က နောက်ထပ် ၁၁၀ ခန့် ရှိပါတယ်ဗျ။”

ဒီအရေအတွက်ထက် ထပ်ပြီး လိုအပ်လာရင်တော့ စစ်တွေတက္ကသိုလ်ကို အသုံးပြုဖို့ ဆွေးနွေးညှိနှိုင်းမှုတွေ ရှိထားပြီး ဆေးရုံမှာ လက်ရှိ တက်ရောက်ကုသသူတွေထဲက ရောဂါသက်သာသူတွေကို သီးခြားခွဲပြီး နေရာပြောင်းရွှေ့ထားဖို့လည်း စီစဉ်ထားပါတယ်။ တကယ်လို့ လိုအပ်လာခဲ့ရင်တော့ အိမ်မှာပဲ ကုသမှုပေးဖို့ထိ ဆွေးနွေးထားပါတယ်။

“Positive တွေ့တဲ့လူကို အိမ်မှာပဲထားပြီး ရောဂါဖြစ်လာတယ်ဆိုရင် ဆေးရုံကို Contact လုပ်ပြီး ဖုန်းနဲ့သော်လည်းကောင်း၊ ဆေးရုံ အရေးပေါ်ကားနဲ့ သွားကြိုတာသော်လည်းကောင်းပေါ့၊ အဲလိုမျိုးကတော့ ကျနော်တို့ ပြည်ထောင်စုအဆင့်နဲ့ ပြည်နယ်အဆင့် လူကြီးမင်းများကလည်း အဲဒီဟာကိုပဲ အထူးဂရုစိုက်ပြီးတော့ ဒါ ဆွေးနွေးနေကြတယ်ဆိုတာ ရှိပါတယ်။ အဲလိုမျိုး နောက်ပိုင်း တကယ်များလာမယ်ဆို ဒါမျိုးဖြစ်နိုင်တယ်လို့လည်း ဒါ ပြောလို့ရတဲ့ အနေအထားတခု ရှိတယ်ပေါ့နော်။”

လတ်တလော အခြေအနေမှာတော့ COVID-19 ကူးစက်ခံရသူ ပုဂ္ဂိုလ်တွေကို အိမ်မှာထားပြီး ကုသမှုပေးရမယ့် အခြေအနေ မရှိသေးကြောင်းနဲ့ ဆေးရုံမှာ ကြပ်မတ် ကုသမှုပေးတာက ရောဂါ ပြန့်ပွားကူးစက်မှုကိုပါ ထိန်းချုပ်ဖို့ ရည်ရွယ် ဆောင်ရွက်တာလို့ စစ်တွေဆေးရုံအုပ်ကြီးက ပြောပါတယ်။

အခု ရခိုင်က COVID-19 ကူးစက်မှုက ပြန့်ပွားမှုနှုန်းများပြီး ရောဂါပြင်းထန်မှု နည်းတယ်ဆိုပြီး ပြောဆိုနေကြတဲ့ အပေါ်မှာလည်း စစ်တွေဆေးရုံအုပ်ကြီး ဒေါက်တာ ဇော်လွင်က သတိပေးပါတယ်။

“ကူးစက်မှု မရှိအောင်တော့ ထိန်းချုပ်ရမယ်။ ကူးစက်မှု မရှိအောင်တော့ နေရမှာ ဖြစ်ပါတယ်။ နောက်တခု ပြောချင်တာက ကျနော်တို့ ဆေးရုံကိုတက်တဲ့ လူနာတွေရဲ့ အနေအထားဟာဆိုရင် အခုလက်ရှိ ၂ ပတ်လောက်ပဲ ရှိတဲ့အချိန်မှာ ဒီလိုဖြစ်ပေမယ့် နောက်ထပ်တပတ် တတိယပတ်လိုမှာ ရောဂါရဲ့ ပြောင်းလဲမှုက ဘယ်လိုဖြစ်မလဲဆိုတာ ကျနော်တို့က အတိအကျ မပြောနိုင်ဘူး။”

စစ်တွေဆေးရုံကြီးမှာတော့ COVID-19 လူနာတွေနဲ့ COVID-19 လူနာမဟုတ်သူတွေကို ဆေးရုံမှာ သီးခြား အဆောင်တွေခွဲထားပြီး ဆေးရုံပစ္စည်း အသုံးအဆောင်တွေ၊ ဆေးရုံဝန်ထမ်းတွေလည်း ခွဲခြားထားပါတယ်။ ကုသရေးပိုင်းအတွက် နောက်ထပ် ရောက်လာမယ့် အကူအညီတွေလည်း ရှိတဲ့အတွက် လုံလောက်မှုရှိတဲ့ အနေအထားပါလို့လည်း ဆေးရုံအုပ်ကြီး ဒေါက်တာ ဇော်လွင်က ပြောပါတယ်။

မြန်မာနိုင်ငံမှာ အခုအချိန်ထိ COVID-19 ကူးစက်ခံရမှု ရှိမရှိ ကျယ်ကျယ်ပြန့်ပြန့် မစစ်ဆေးနိုင်သေးပါဘူး။ ဗိုင်းရပ်စ် ကူးစက်ခံရသူတွေနဲ့ ထိတွေ့ဆက်စပ်မှု ရှိသူတွေကိုသာ သီးသန့်ခွဲထုတ် စစ်ဆေးနေတာ ဖြစ်ပါတယ်။ လက်ရှိအချိန်ထိ COVID-19 စစ်ဆေးထားသူ တနင်္ဂနွေနေ့အထိ ၁၅၇,၈၄၃ ဦးရှိပြီး ပိုးကူးစက်ခံရသူ ၇၇၅ ဦး ရှိနေတာပါ။ စောင့်ကြည့်နေသူက ၇,၆၂၄ ဦး ရှိနေပါတယ်။ လက်ရှိအချိန်ထိ COVID-19 ကြောင့် သေဆုံးသူ ၆ ဦးရှိကြောင်း အစိုးရက ထုတ်ပြန်ထားပါတယ်။


မသိင်္ဂီထိုက်/VOA (Burmese)

https://burmese.voanews.com/a/covid19-sittwe/5564041.html

စစ်တွေဆေးရုံ က ကိုဗစ် လူနာတွေ အခြေအနေကောင်း

ဓာတ်ပုံ ရင်းမြစ်, Myint Lwin

စစ်တွေဆေးရုံက ကိုဗစ်လူနာ အများစုဟာ စိုးရိမ်စရာ မရှိဘဲ ယေဘုယျ အနေအထားအရ အတော်များများဟာ အခြေအနေကာင်းမွန်တယ်လို့ စစ်တွေ ဆေးရုံအုပ်ကြီး ဒေါက်တာဇော်လွင်က ဘီဘီစီကိုပြောပါတယ်။

စစ်တွေ ဆေးရုံမှာ ကိုဗစ်လူနာအဖြစ် ကုသနေသူ ၁၇၂ ဦးအနက် လူနာ ၃ ဦး ကို ဂရုစိုက် ကုသပေးနေရပြီး၊ဒါဟာလည်း ကိုဗစ်ရောဂါကြောင့် မဟုတ်ဘဲ ဆီးချိုနဲ့ အဆုတ်နဲ့ပတ်သက်တဲ့ ယခင်ရောဂါတွေကြောင့် ဖြစ်တယ်လို့လည်း သူက ရှင်းပြပါတယ်။

ကိုဗစ် လူနာ ၃ဦး ကို အထူးကြပ်မတ်ကုသဆောင်မှာ ကုသပေးနေရတယ်ဆိုတဲ့ သတင်းတွေ နဲ့ ပတ်သက်လို့လည်း မဟုတ်မှန်ကြောင်း ဒေါက်တာဇော်လွင် က ပြောပါတယ်။

စစ်တွေဆေးရုံမှာ ကိုရိုနာဗိုင်းရပ်စ် ကူးစက်ခံရသူ လူနာ ၁၇၂ ဦး ကျော်အနက် အများစုဟာ ပြင်းပြင်းထန်ထန် ခံစားရတဲ့ ရောဂါလက္ခဏာ မပြကြကြောင်းနဲ့ သူတို့ဟာ လူနာဆောင်မှာပဲ ကုသမှုတွေ ခံယူနေကြကြောင်းလည်း သူက ရှင်းပြပါတယ်။

စစ်တွေဆေးရုံဟာ လက်ရှိ အနေအထားအရ ကိုဗစ်လူနာတွေကို နိုင်နိုင်နင်းနင်း ကုသနိုင်တယ်လို့ပြော

သြဂုတ်၃၀ ရက်နေ့ ည ၈နာရီ ကျန်းမာရေးနဲ့ အားကစားဝန်ကြီးဌာန ထုတ်ပြန်ချက်မှာ ကိုရိုနာဗိုင်းရပ်စ်ပိုးတွေ့သူ လူနာသစ် ၂၆ ဦးထပ်မံ တွေ့ရှိခဲ့ပြီးတော့ ရခိုင်ပြည်နယ် က ၂၁ ဦးနဲ့ ရန်ကုန်က ၅ ဦးပါဝင်လာတာ တွေ့ရပါတယ်။

သြဂုတ်၃၀ ရက်နေ့ ညပိုင်း ရောဂါပိုးတွေ့သူတွေစာရင်းမှာတော့ စစ်တွေက ကိုရိုနာဗိုင်းရပ်စစ် ပိုးတွေ့ရှိသူ လူနာ ၈ ဦးသာပါဝင်တာ တွေ့ရပါတယ်။

အခု လက်ရှိ သြဂုတ်၃၀ ရက်နေ့ ည ၈နာရီ အချိန်အထိ မြန်မာနိုင်ငံမှာ အတည်ပြုလူနာပေါင်း ၇၇၅ ဦး၊ သေဆုံးသူပေါင်း ၆ဦးနဲ့ ပိုးကင်းစင်သူပေါင်း ၃၅၂ဦး ရှိနေပြီ ဖြစ်ပါတယ်။

စစ်တွေဆေးရုံကို ကိုဗစ်လူနာ ၂၀၀ တက်ရောက် ကုသနိုင်ဖို့ တိုးချဲ့ ပြင်ဆင်ထားသလို လက်ရှိ စစ်တွေဆေးရုံကြီးမှာ လူနာ ၁၃၅ ဦးနဲ့ သူနာပြုအဆောင်မှာ လူနာ ၃၀ ကျော်နဲ့ နှစ်ခုပေါင်း ၁၇၂ ဦးခန့် ကုသလျက်ရှိတယ်လို့လည်း ဆရာဝန်ကြီးဒေါက်တာဇော်လွင် ကပြောပါတယ်။

စစ်တွေဆေးရုံမှာ နောက်ထပ် ကိုဗစ် လူနာ ၆၀ လောက်အတွက် နေရာရှိသေးသလို တိုင်းရင်းဆေးရုံမှာ လည်းလူနာ ၅၀ ပေါင်း ကိုဗစ် လူနာ ၁၁၀ လောက်ကို လက်ခံ ကုသပေးနိုင်တဲ့ အနေအထားရှိတယ်လို့လည်း သူကရှင်းပြပါတယ်။

နောက်ထပ် ကိုဗစ်လူနာ ၁၀၀ ကျော်အတွက် စစ်တွေမှာ အသင့်ပြင်ထား

သြဂုတ်လ တတိယပတ်ကစလို့ သီတင်းတစ်ပတ်ကျော် အချိန်တိုအတွင်း ကိုဗစ် ကူးစက်သူ ၂၀၀ ကျော်ရှိခဲ့တဲ့ ရခိုင်ပြည်နယ်က ကူးစက်မှုတွေကို စမ်းသပ်ကြည့်ခဲ့ရာမှာ ကနဦးရလဒ်တွေအရ ရခိုင်မှာဖြစ်နေတဲ့ ကိုရိုနာဗိုင်းရပ်စ်ဟာ မျိုးဗီဇ ပြောင်းပြီး ကူးစက်မှုနှုန်းမြန်တဲ့ ဗိုင်းရပ်စ်ဖြစ်နေတယ်ဆိုတာကို တွေ့ရှိခဲ့တယ်လို့ ဆေးသုတေသနဦးစီးဌာနထံက သိရပါတယ်။

အဲဒီ ကူးစက်မှုတွေဟာ ကမ္ဘာ့နိုင်ငံတချို့မှာ ပျံ့နှံ့ဖြစ်ပွားနေတဲ့ မျိုးဗီဇပြောင်း ဗိုင်းရပ်စ် ဟုတ်မဟုတ်ကို ကျန်းမာရေးနဲ့ အားကစားဝန်ကြီးဌာန၊ ဆေးသုတေသန ဦးစီးဌာနက စစ်ဆေးခဲ့တာမှာ အခုလို တွေ့ရှိခဲ့တာ ဖြစ်တယ်လို့ အဲဒီဌာနက ဒုတိယညွှန်ကြားရေးမှူး ဒေါက်တာမြတ်ထွဋ်ညွန့်က ဘီဘီစီကိုပြောပါတယ်။

တွေ့ရှိချက်တွေအရ အဲဒီပိုးကူးစက်ပျံနှံ့မှုက ပုံမှန်ထက် ၁၀ ဆ လောက်အထိ မြန်တယ်လို့ သူက ပြောပါတယ်။

ပြင်းထန်မှုကတော့ အရင်အမျိုးအစားနဲ့ အခုအမျိုးအစားက သိပ်မကွာခြားကြောင်းနဲ့ လေ့လာမှု တစ်ခုလုံး ပြီးစီးရင်တော့ ဒီမျိုးဗီဇက ဘယ်ဒေသက မျိုးဗီဇလည်းဆိုတာ သိနိုင်မယ်လို့ ဆိုပါတယ်။

စစ်တွေမြို့မှာ အိမ်မှာပဲနေကြဖို့ အမိန့်ထုတ်ထား

စစ်တွေဆေးရုံကတော့ ကိုဗစ်လူနာတွေ အတွက် အခုစီစဥ်တဲ့နေရာတွေမှာ မလုံလောက်တော့မှသာ စစ်တွေ တက္ကသိုလ်ကို ဆေးရုံအဖြစ် ကုသတဲ့ သူတွေ ထားရှိဖို့အတွက် ဆောင်ရွက်ဖို့ စီစဥ်ထားတယ်လို့လည်း စစ်တွေဆေးရုံအုပ်ကြီးက ဘီဘီစီကို ရှင်းပြပါတယ်။

ရခိုင်ပြည်နယ်မှာ အများစု ကူးစက်ခံနေရသူတွေကတော့ စစ်တွေက ဖြစ်ပြီးတော့ စစ်တွေက ကိုရိုနာဗိုင်းရပ်စစ် ကူးစက်မှုဟာ မြန်တယ် များတယ်လို့ ပြောလို့ရကြောင်းနဲ့ သို့သော်လည်း ရောဂါလက္ခဏာက မပြင်းထန်ကြောင်းလည်း ဒေါက်တာဇော်လွင် က ရှင်းပြပါတယ်။

စစ်တွေဆေးရုံဟာ ကူးစက်ရောဂါ အထူးကုသတဲ့ ဆေးရုံသီးသန့် မဟုတ်တာကြောင့် လူနာတွေ နဲ့ ကုသတဲ့ ဆရာဝန်တွေ အကြားထိတွေဆက်ဆံရာမှာ အားနည်းချက်အချို့ရှိကြောင်းလည်း စစ်တွေမှာ စေတနာ့ဝန်ထမ်းအဖြစ် လာရောက်ကုသပေးနေတဲ့ ဆရာဝန်တစ်ဦးက ဘီဘီစီကို ပြောပါတယ်။

အခုလို ကိုဗစ်လူနာတွေရှိသလို ကိုဗစ်ရောဂါမဟုတ်တဲ့ လူနာတွေကိုလည်းစစ်တွေမှာ ကုသပေးနေ ရကြောင်းနဲ့ အဲဒီလူနာတွေကြားမှာ ကူးစက်မှု မရှိအောင်စီစဥ်ပေးရကြောင်း စစ်တွေဆေးရုံက ဆရာဝန်တွေကပြောပါတယ်။

အခုအခါ စစ်တွေဆေးရုံကို စေတနာ့ဝန်ထမ်း ၈၀ ကျော်ရောက်ရှိနေပြီးတော့ အလွှာအသီးသီးက ကျွမ်းကျင်သူတွပါလာတာရယ်၊ အဆောက်အအုံနဲ့ လူနာအနေအထား၊ လက်ရှိ ကုသရမှု အနေအထားတွေဟာ၊ အဆင်ပြေတယ် နိုင်နိုင်နင်းနင်း ကုသနိုင်တဲ့ အနေအထားရှိတယ်လို့ ပြောလို့ရကြောင်း စစ်တွေ ဆေးရုံအုပ်ကြီး ဒေါက်တာဇော်လွင် ကပြောပါတယ်။


BBC Burmese

https://www.bbc.com/burmese/burma-53964791

ကိုဗစ်-၁၉ သတင်းမှားတွေကြောင့် လူရာနဲ့ချီ သေခဲ့ရ

တစ်နေရာရာကနေ အစပြုလိုက်ရာကနေ အွန်လိုင်းပေါ် မှာ ပုံကြီးချဲ့လာတဲ့ လုပ်ကြံပြောဆိုမှုတွေကြောင့်ဖြစ်

အခုနှစ်အစ ပထမ သုံးလပိုင်းအတွင်း ကိုရိုနာဗိုင်းရပ်စ်အကြောင်း သတင်းအချက်အလက် အမှားတွေကြောင့် ကမ္ဘာတဝန်းမှာ အနည်းဆုံး လူ ၈၀၀ လောက် အသက်ဆုံးရှုံးခဲ့ရတယ်လို့ လေ့လာသူတွေက ပြောပါတယ်။

လူမှုကွန်ရက်ပေါ်က သတင်းအမှားတွေကြောင့် လူ ၅၈၀၀ ဆေးရုံတင်ပို့ခဲ့ရတယ်လို့ American Journal of Tropical Medicine and Hygiene ဆိုတဲ့ အပူပိုင်းဒေသ ဆေးဝါး၊ တစ်ကိုယ်ရေနဲ့ ပတ်ဝန်းကျင် သန့်ရှင်းရေးဆိုင်ရာ အမေရိကန်ဂျာနယ်ထဲက လေ့လာချက်တစ်ခုမှာ ဖော်ပြထားပါတယ်။

အတော်များများဟာ မက်သနော ဒါမှမဟုတ် အရက်ပါတဲ့ သန့်ရှင်းရေးသုံး ပစ္စည်းတွေ သောက်ခဲ့ကြလို့ သေဆုံးခဲ့ကြတာပါ။

ကိုဗစ်-၁၉ ရောဂါ အလျင်အမြန် ပျံ့နှံ့ခဲ့သလို ရောဂါအကြောင်း သတင်းအမှားတွေလည်း တစ်ချိန်တည်း တစ်မုဟုတ်ချင်း ပျံ့နှံ့ခဲ့ပြီး လုပ်ကြံပြောဆိုမှုတွေ၊ ကောလာဟလတွေ၊ ရှေးရိုးအယူစွဲတွေကြောင့် လူသေဆုံးမှုတွေ၊ ထိခိုက်နာကျင်မှုတွေ ဖြစ်ခဲ့ရပါတယ်။

ထိခိုက်သေဆုံးသူ အတော်များများဟာ ယုံကြည်စိတ်ချရတဲ့ ဆေးဘက်ဆိုင်ရာ အကြံပြုချက်မျိုးတွေနဲ့ ဆင်တူတဲ့ ကြက်သွန်ဖြူတွေ အများကြီးစား ဒါမှမဟုတ် ဗီတာမင်ဆေးတွေ အများကြီးသောက် စတဲ့ အကြံပေးချက်မျိုးတွေကို ရောဂါ မကူးအောင် ကာကွယ်နည်းတွေအဖြစ် လိုက်နာ လုပ်ဆောင်ခဲ့ကြတယ်လို့ အဲဒီလေ့လာချက်ကို ပြုစုခဲ့သူ သုတေသီတွေက ပြောပါတယ်။ တချို့ဆိုရင် နွားကျင်ငယ်ရည်ကိုတောင် သောက်ခဲ့ကြပါတယ်။

ဒီလို လုပ်ရပ်မျိုးတွေကြောင့် သူတို့ရဲ့ ကျန်းမာရေးအပေါ် အကြီးအကျယ် ထိခိုက်လာစေခဲ့တယ်လို့ သုတေသီတွေက ပြောပါတယ်။

ဒီလို ကပ်ရောဂါအကြောင်း သတင်းမှားတွေကို တန်ပြန် တိုက်ဖျက်ဖို့ဟာ နိုင်ငံတကာ အဖွဲ့အစည်းတွေ၊ အစိုးရနဲ့ လူမှုကွန်ရက်တွေရဲ့ တာဝန်ဖြစ်တယ်လို့ အဲဒီလေ့လာချက်မှာ ကောက်ချက်ချထားပါတယ်။

ဒါပေမဲ့ တုံ့ပြန်ဆောင်ရွက်မှု နှေးကွေးပြီး ဟာကွက်တွေ ရှိနေတဲ့အတွက် နည်းပညာကုမ္ပဏီတွေအနေနဲ့ ဝေဖန်ခံနေကြရပါတယ်။

ယူကေ နိုင်ငံမှာဆိုရင် အွန်လိုင်းကြောင့် အန္တရာယ် ဖြစ်ရမှုတွေနဲ့ ပတ်သက်တဲ့ စည်းမျဉ်းတွေ ထုတ်ပြန်နိုင်ဖို့ နှစ်နဲ့ချီ ကြာဦးမှာ ဖြစ်ပါတယ်။

ဗိုင်းရပ်စ်နဲ့ ပတ်သက်တဲ့ သတင်းအမှားတွေကြောင့် ကိုယ်ထိလက်ရောက် တိုက်ခိုက်မှု၊ မီးရှို့မှုနဲ့ သေဆုံးမှုတွေ ဖြစ်ခဲ့ရတယ် ဆိုတဲ့ ဆက်နွှယ်မှု အထောက်အထားတွေကို ဘီဘီစီက စုံစမ်းသိခဲ့ရပြီး ဆရာဝန်တွေ၊ ကျွမ်းကျင်သူတွေ၊ ခံခဲ့ရသူတွေရဲ့ အတွေ့အကြုံတွေကို မေးမြန်းကြည့်ခဲ့ပါတယ်။

အွန်လိုင်းပေါ်က ကောလာဟလတွေကြောင့် အိန္ဒိယနိုင်ငံမှာ လူအုပ်စုနဲ့ တိုက်ခိုက်ကြတာတွေ၊ အီရန်နိုင်ငံမှာ လူအများအပြား အဆိပ်သင့်မှုတွေ ရှိခဲ့ပါတယ်။

တစ်နေရာရာကနေ အစပြုလိုက်ရာကနေ အွန်လိုင်းပေါ် မှာ ပုံကြီးချဲ့လာတဲ့ လုပ်ကြံပြောဆိုမှုတွေကြောင့် ယူကေနဲ့ နိုင်ငံတချို့မှာ တယ်လီဖုန်းအင်ဂျင်နီယာတွေ ခြိမ်းခြောက် တိုက်ခိုက်ခံခဲ့ရပြီး တယ်လီဖုန်းတိုင်တွေ မီးရှို့ခံခဲ့ရပါတယ်။

လူမှုကွန်ရက်ဟာ လူလိမ်လူညာတွေ အတွက် ဒီကပ်ရောဂါကြီးကို အခွင့်ကောင်းယူပြီး ရောဂါမကူးနိုင်ဘူးဆိုတဲ့ အဆောင်တွေ ရောင်းတာမျိုး၊ အံ့ဖွယ်ဆေးရည် ဆိုပြီး ရေရောထားတဲ့ အရောင်ချွတ်ဆေးတွေ ဝယ်ခိုင်းတာမျိုးတွေ လုပ်ဖို့ကိုလည်း အထောက်အကူ ဖြစ်စေခဲ့ပါတယ်။

ကိုဗစ်-၁၉ ထိုးဆေးတွေ စထွက်ပေါ်လာနေတဲ့ အခုလိုအချိန်မှာပဲ ဒီဆေးတွေကို ဆန့်ကျင်သူတွေက လူတွေကို ဒီဆေးတွေနဲ့ ကိုယ့်ကိုယ်ကို မကာကွယ်ကြဖို့ လူမှုကွန်ရက်ကို အသုံးပြုပြီး သိမ်းသွင်း ပြောဆိုလာကြမယ့် အန္တရာယ်မျိုး ထပ်ရှိနေပါတယ်။

ကိုဗစ်-၁၉ ထိုးဆေးတွေအကြောင်း လွဲမှားတဲ့ သတင်းအချက်အလက်တွေကို လူမှုကွန်ရက် ကုမ္ပဏီတွေက ဖြုတ်ပစ်တာမျိုး၊ ထောက်ပြတာမျိုးတွေ လုပ်နေတဲ့ကြားက အမေရိကန်ပြည်သူ ၂၈ ရာခိုင်နှုန်းက မိုက်ခရိုဆော့ဖ် ကုမ္ပဏီအကြီးအကဲ ဘေလ် ဂိတ်စ်ဟာ လူတွေရဲ့ခန္ဓာကိုယ်ထဲမိုက်ခရို ချစ်ပ် အပြားတွေ ထည့်နိုင်ဖို့ အဲဒီထိုးဆေးတွေကို သုံးချင်နေတာလို့ ယုံကြည်နေကြကြောင်း အမေရိကန်မှာ မကြာသေးခင်က လုပ်ခဲ့တဲ့ စစ်တမ်းတွေအရ သိရပါတယ်။

ဒီလို သတင်းမှားတွေကြောင့် တကယ်ထိရောက်တဲ့ ကိုရိုနာဗိုင်းရပ်စ် ထိုးဆေးတစ်ခု အောင်အောင်မြင်မြင် အသုံးပြုနိုင်ရေးကို လုံးဝ ထိခိုက်သွားစေနိုင်တယ်လို့ ဆရာဝန်တွေက သတင်းမှားတွေ စုံစမ်းဖော်ထုတ်နေတဲ့ ဘီဘီစီအဖွဲ့ကို ပြောပါတယ်။


BBC Burmese

https://www.bbc.com/burmese/burma-53964789

(၃၀-၈-၂၀၂၀) ရက်နေ့၊ ည (၈:၀၀)နာရီ COVID-19 ရောဂါ ဓာတ်ခွဲအတည်ပြုလူနာသစ် (၂၆) ဦး တွေ့ရှိ



၁။ (၃၀-၈-၂၀၂၀) ရက်နေ့အတွက် COVID-19 ရောဂါ ဓာတ်ခွဲစစ်ဆေးရာတွင် -

- အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမအသုတ်) ဓာတ်ခွဲ နမူနာ (၅၇၀)ခု၊

- ဆေးသုတေသနဦးစီးဌာန (DMR)မှ  ဓာတ်ခွဲနမူနာ (၄၁၉) ခုနှင့်

- ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) မှ (ပထမအသုတ်) ဓာတ်ခွဲနမူနာ (၂၆၄) ခု

- စုစုပေါင်း (၁,၂၅၃)ခု အား ယနေ့၊ ညနေတွင် စစ်ဆေးပြီးစီးခဲ့ရာ -

• COVID-19 ရောဂါ ဓာတ်ခွဲအတည်ပြုလူနာသစ် (၂၆) ဦး တွေ့ရှိရပါသည်။


၂။ (၃၀-၈-၂၀၂၀) ရက်နေ့၊ ည (၈:၀၀)နာရီအထိ မြန်မာနိုင်ငံတွင် COVID-19 ရောဂါဓာတ်ခွဲ အတည်ပြုလူနာ (၇၇၅) ဦးရှိပြီ ဖြစ်ပါသည်။


၃။ ဓာတ်ခွဲအတည်ပြု လူနာဟောင်း (old confirmed case) များ၏ ဓာတ်ခွဲနမူနာစစ်ဆေးမှု တွင် (၂) ကြိမ်ဆက်တိုက် ပိုးမတွေ့ရှိသူအသစ် (၁) ဦး (Case-361) ရှိသဖြင့် ယနေ့အထိရောဂါပိုးကင်းစင်လာသူ စုစုပေါင်း (၃၅၂) ဦး ရှိပါသည်။ ၎င်းတို့အနက် (၃၄၇) ဦးအား ဆေးရုံမှဆင်းခွင့်ပြုခဲ့ပြီးဖြစ်ကာ သတ်မှတ်နေရာများ တွင် အသွားအလာဆက်လက်ကန့်သတ်၍ စောင့်ကြပ်ကြည့်ရှုလျက်ရှိပါသည်။    

၄။ ဓာတ်ခွဲအတည်ပြုလူနာများအနက် သေဆုံးသူ (၆)ဦး ရှိပါသည်။ 

၅။ (၂၉-၈-၂၀၂၀) ရက်နေ့၊ နေ့လယ် (၁၂:၀၀) နာရီမှ (၃၀-၈-၂၀၂၀)ရက်နေ့၊ နေ့လယ် (၁၂:၀၀) နာရီအတွင်း တွေ့ရှိရသော စောင့်ကြည့်လူနာအသစ် (၅၃) ဦးရှိပါသည်။


Ministry of Health and Sports, Myanmar

https://www.facebook.com/MinistryOfHealthAndSportsMyanmar

Portland ဆန္ဒပြမှု ထိပ်တိုက်တွေ့ရင်း တဦးသေဆုံး

သမ္မတ Trump ကို ထောက်ခံသူများ။ (သြဂုတ် ၂၉၊ ၂၀၂၀)


အမေရိကန်ပြည်ထောင်စု Oregon ပြည်နယ် Portland မြို့မှာ လူမျိုးရေး ဆန္ဒပြပွဲတွေ ဆက်တိုက် ပေါ်ပေါက်နေတာမှာ မနေ့ စနေနေ့ညပိုင်းက Black Lives Matter ဆန္ဒပြသူတွေနဲ့ သမ္မတ Trump ကို ထောက်ခံတဲ့ ဆန္ဒပြသူတွေကြား ပဋိပက္ခတွေ ဖြစ်ခဲ့တဲ့အတွက် လူ ၁ ဦး သေဆုံးခဲ့ပါတယ်။

မြို့တွင်း ၃ လမ်းနဲ့ Alder လမ်းထောင့်မှာ ဆန္ဒပြသူတွေ အချင်းချင်း ပဋိပက္ခတွေကြား သေနတ်နဲ့ ပစ်ခတ်ခဲ့တဲ့အတွက် လူ ၁ ဦး ရင်ဘတ်သေနတ်ထိမှန် ဒဏ်ရာရပြီး သေဆုံးခဲ့တာဖြစ်ကြောင်း Portland မြို့ ရဲတပ်ဖွဲ့က ကြေညာချက် ထုတ်ပြန်ပါတယ်။

သေဆုံးခဲ့သူက လူဖြူအမျိုးသားတဦးဖြစ်ကြောင်း အစောပိုင်း သတင်းတွေမှာ ဖော်ပြခဲ့ပါတယ်။

သမ္မတ Trump ကို ထောက်ခံတဲ့ ဆန္ဒပြသူ ၆၀၀ လောက် မြို့တွင်းမှာ စနေနေ့တိုင်း စုဝေးခဲ့တာ သီတင်း ၃ ပတ်ဆက်တိုက်ရှိနေပြီ ဖြစ်ပါတယ်။ သူတို့လိုက်ပါလာတဲ့ယာဉ်ကို လူမျိုးရေး ဆန္ဒပြသူတွေက ရှေ့ကပိတ်ပြီး တားဆီးခဲ့တာကနေ ပဋိပက္ခတွေ ဖြစ်ခဲ့တာပါ

ပြီးခဲ့တဲ့ ကြာသပတေးနေ့က ကျင်းပပြီးစီးခဲ့တဲ့ ရီပတ်ဘလစ်ကန်ပါတီ ညီလာခံမှာ သမ္မတ Trump က Portland မြို့ကို လွတ်လပ်တဲ့ အစွန်းမရောက်သူတွေ နေထိုင်တဲ့ မြို့တမြို့အဖြစ် ဖော်ညွှန်းခဲ့ပြီး အကြမ်းဖက်သူတစုကြောင့် မြို့တွင်း ဆန္ဒပြပွဲတွေ ဖြစ်ပေါ်နေရကြောင်း ပြောဆိုခဲ့တာပါ။

ဒုတိယအကြိမ် သမ္မတသက်တမ်း ရွေးကောက်ခံတဲ့ ညီလာခံမှာ ပြောကြားခဲ့တဲ့ သူ့မိန့်ခွန်းထဲမှာလည်း သမ္မတ Trump က တရားဥပဒေ စိုးမိုးရေးနဲ့ အမိန့်အာဏာ တည်မြဲရေးကို အဓိက ထည့်သွင်း ပြောဆိုခဲ့ပါတယ်။

၃ လလောက်ကြာအောင် ဖြစ်ပွားနေခဲ့တဲ့ Portland မြို့ ညစဉ်ရက်ဆက် လူမျိုးရေး ဆန္ဒပြပွဲတွေအတွင်း လူပေါင်းရာနဲ့ချီကို ပြည်နယ်နဲ့ အစိုးရ အာဏာပိုင်တွေက ဖမ်းဆီးနေတဲ့ကြားကပဲ ဆန္ဒပြပွဲတွေက ဆက်ပြီး ဖြစ်ပွားနေတာပါ။

ပြီးခဲ့တဲ့ မေလနှောင်းပိုင်းက Minnesota ပြည်နယ် Minneapolis မြို့မှာ လူမည်းအမျိုးသား George Floyd ဆိုသူကို ရဲက ဖမ်းဆီးတဲ့အချိန်မှာ သေဆုံးခဲ့ရတဲ့အတွက် နိုင်ငံတဝန်း အခုလို ဆန္ဒပြပွဲတွေ ပေါ်ပေါက်နေတာလည်း ဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/protesters-clash-in-portland/5563640.html

ကမ္ဘာတဝန်း ကိုဗစ်ကူးစက်မှု လူ ၂၅ သန်းကျော်ပြီ

အိန္ဒိယနိုင်ငံ နယူးဒေလီမြို့က ဈေးတခုမှာ နှာခေါင်းစည်းတပ် ဈေးဝယ်လာသူများ။ (သြဂုတ် ၃၀၊ ၂၀၂၀)


ကမ္ဘာတဝန်းမှာ ကိုရိုနာဗိုင်းရပ်စ် ကူးစက်ခံရသူ အရေအတွက်ဟာ ၂၅ သန်းကျော်သွားပြီဖြစ်ပြီး အိန္ဒိယနိုင်ငံမှာလည်း နေ့စဉ်ကူးစက်မှုနှုန်းမှာ ကမ္ဘာ့စံချိန် တင်ခဲ့ပါတယ်။

အိန္ဒိယနိုင်ငံမှာ လွန်ခဲ့တဲ့ ၂၄ နာရီအတွင်း ကိုရိုနာဗိုင်းရပ်စ် ကူးစက်ခံရသူ ၇၈,၇၆၁ ယောက်ရှိတာကြောင့် ဒါဟာ ကမ္ဘာပေါ်မှာ ကပ်ရောဂါစဖြစ်ချိန်ကစပြီး နေ့စဉ်ကူးစက်မှုနှုန်းမှာ အများဆုံး စံချိန်တင်ခဲ့တာ ဖြစ်ပါတယ်။

အိန္ဒိယအစိုးရက စီးပွားရေးပြန်ဖွင့်ဖို့ နိုင်ငံတဝန်းမှာ ကန့်သတ်မှုတွေကို ဆက်ပြီး လျှော့ချလာနေချိန်မှာပဲ ကူးစက်မှုတွေ တိုးလာနေတာဖြစ်ပြီး နေ့စဉ်ကူးစက်မှုနှုန်း ၇ သောင်းခွဲကျော်တာ ၄ ရက်ဆက်တိုက် ရှိသွားပါပြီ။ ဒါ့အပြင် အိန္ဒိယနိုင်ငံမှာ သေဆုံးသူ ၆၃,၀၀၀ ကျော်ရှိပါတယ်။

အမေရိကန်နိုင်ငံကတော့ ကူးစက်သူ ၆ သန်းကျော်နဲ့ ကမ္ဘာပေါ်မှာ ကူးစက်မှု အများဆုံးဖြစ်ပြီး ဘရာဇီးလ်နိုင်ငံက ၃.၈ သန်းနဲ့ ဒုတိယ၊ အိန္ဒိယနိုင်ငံက ၃.၅ သန်းနဲ့ ကူးစက်မှု တတိယအများဆုံး ဖြစ်ပါတယ်။

တချိန်တည်းမှာပဲ ဥရောပတိုက်က မြို့ကြီးတွေ အတော်များများမှာလည်း ဗိုင်းရပ်စ်ကြောင့် ကန့်သတ်မှုတွေ ပြန်လုပ်လာတာကို စနေနေ့က ကန့်ကွက် ဆန္ဒပြခဲ့ကြပါတယ်။

ဂျာမနီနိုင်ငံ ဘာလင်မြို့မှာ နှာခေါင်းစည်းတပ်ဖို့ တယောက်နဲ့တယောက် ခပ်ခွာခွာနေဖို့ စည်းမျဉ်းတွေ ချမှတ်ခဲ့တာကြောင့် လူတွေ သောင်းနဲ့ချီပြီး လမ်းပေါ်ထွက် ဆန္ဒပြခဲ့ကြပြီး ဆန္ဒပြတဲ့သူ ၃၀၀ လောက်ကို ဖမ်းဆီးလိုက်တယ်လို့ ရဲတပ်ဖွဲ့က ပြောပါတယ်။

လန်ဒန်မှာလည်း အလားတူ ကန့်သတ်မှုတွေကြောင့် ဆန္ဒပြတဲ့သူတွေဟာ Trafalgar ရင်ပြင်မှာ စုဝေး ဆန္ဒပြခဲ့ကြပါတယ်။ ဒါ့အပြင် ပဲရစ်မြို့မှာလည်း လူတိုင်း နှာခေါင်းစည်းတွေ မဖြစ်မနေ တပ်ရမယ့်အပေါ် လူတွေ ရာနဲ့ချီ ဆန္ဒပြခဲ့ကြပြီး ဆွစ်ဇာလန်နိုင်ငံ ဇူးရစ်မြို့မှာလည်း ဆန္ဒပြတဲ့သူ ၁,၀၀၀ လောက်က COVID စည်းမျဉ်းတွေကို မယုံကြည်ကြောင်းနဲ့ လွတ်လပ်စွာ နေခွင့်ပေးဖို့ တောင်းဆိုခဲ့ကြပါတယ်။


ဗွီအိုအေ (မြန်မာပိုင်း)

https://burmese.voanews.com/a/world-covid19/5563649.html

အတည်ပြုလူနာသစ် ၁၆ ဦးထဲမှာ ရန်ကုန်က ၁၁ ဦး ပါဝင်

ရန်ကုန်မြို့၊ ကမာရွတ်မြို့နယ်၊ အင်းစိန်လမ်း လူကူးတံတားပေါ်မှ ဖြတ်သန်းသွားလာသူတွေကို တွေ့ရစဉ် / ဓာတ်ပုံ - ကျော်ဇင်သန်း/ RFA


ကိုရိုနာဗိုင်းရပ်စ် ကူးစက်ခံသူအရေအတွက် ဆက်တိုက်များပြားလာနေပြီး အဲဒီထဲမှာ ပြီးခဲ့တဲ့လတွေအတွင်း ပြည်ပခရီးသွားရာဇဝင်မရှိတဲ့သူတွေ အများအပြားပါဝင်နေပါတယ်။

ဒီလိုအခြေအနေမှာ အာဏာပိုင်တွေက ကူးစက်မှုလျော့ပါးရေးအတွက် စီစဉ်နေကြပြီး ကျန်းမာရေးဝန်ထမ်းတွေကတော့ ကူးစက်ခံထားရသူတိုင်းကို ဆေးရုံပို့ဖို့ဆိုတာ မဖြစ်နိုင်တော့တဲ့အတွက် နေအိမ်မှာပဲ သက်သာပျောက်ကင်းအောင် နေထိုင်ဖို့ ညွှန်ကြားရတာမျိုး ဖြစ်လာနိုင်တယ်လို့ ပြောပါတယ်။

ကျန်းမာရေးနဲ့ အားကစားဝန်ကြီးဌာနက ဓာတ်ခွဲနမူနာ ၅၈၀ ကို မနေ့က ဒုတိယအသုတ် စစ်ဆေးရာမှာ ကိုရိုနာဗိုင်းရပ်စ်ပိုး ကူးစက်ခံနေရသူ ၁၆ ဦး ရှိတယ်လို့ ဒီနေ့ သြဂုတ်လ ၃၀ ရက်နေ့ မနက်ပိုင်းမှာ သတင်း ထုတ်ပြန်ပါတယ်။

အဲဒီ ၁၆ ဦးထဲမှာ ရန်ကုန်တိုင်းက ၁၁ ဦး ပါဝင်ပါတယ်။ အင်းစိန်မြို့နယ်က သုံးဦး၊ တာမွေမြို့နယ်က သုံးဦး၊ ရွှေပြည်သာမြို့နယ်က နှစ်ဦး၊ မြောက်ဥက္ကလာ၊ တောင်ဒဂုံ၊ ဒဂုံဆိပ်ကမ်းနဲ့ ကမာရွတ်မြို့နယ်တွေက တစ်ဦးစီ ဖြစ်ပါတယ်။

ပြည်ပက ပြန်လာသူ ခြောက်ဦးဖြစ်ပြီး ကျန်တဲ့သူတွေက  ပြည်တွင်းကူးစက်ခံရသူတွေပါ။

ဗိုင်းရပ်စ်ပိုးဟာ ကူးစက်နှုန်းမြန်လာပြီး ပြည်တွင်းကူးစက်ခံရသူ အများဆုံး ပါဝင်လာနေတဲ့အတွက် စိတ်ပူစရာဖြစ်နေတယ်လို့ အင်းစိန်မြို့နယ် စဉ့်ငူရပ်ကွက်မှာ နေထိုင်တဲ့ ဦးလှမြင့်က ပြောပါတယ်။

“ပိုးတွေ့လူနာက ကျွန်တော်တို့ သစ္စာဝါဒီလမ်းကဆိုတော့ ကျွန်တော်တို့နဲ့က တစ်မှတ်တိုင် ခြားတယ် ဆိုတော့ နည်းနည်းတော့ အလှမ်းဝေးတယ်။ ဝေးတယ်ဆိုပေမယ့် ဒီလိုပိုးမျိုးက ကူးစက်နှုန်းမြန်တဲ့အတွက် လူတွေက ဟိုတုန်းကလို အပြင်ထွက်မှု ပြုမှုတွေ သိပ်မထွက်ကြတော့ဘူးပေါ့။ ဒီနေ့ အတိုင်းအတာနဲ့ဆိုရင် တော်တော်ကြီးကို ကျဲသွားတယ်။ အခုလို ပြင်ပခရီးသွားလာမှု ရာဇဝင်မရှိတဲ့သူက ဒီလို ပိုးတွေ့တဲ့အတွက်ကြောင့် ပြည်သူတွေမှာ စိုးရိမ်မှုတွေ တော်တော် များနေပါတယ်။”

အင်းစိန်မြို့နယ်က ပိုးတွေ့လူနာ သုံးဦးရဲ့ မိသားစုဝင်တွေ၊ ထိတွေ့ခဲ့သူတွေကို လောလောဆယ် အပြင်မထွက်၊ အိမ်မှာပဲ နေထိုင်ကြစေဖို့ စီစဉ်ထားပြီး သူတို့နေထိုင်တဲ့ လမ်းသွယ်တွေကို Yellow Line လို့ အဝါရောင်ဖဲကြိုးနဲ့ အဝင်အထွက် ကန့်သတ်လိုက်တယ်လို့ အင်းစိန်မြို့နယ် တိုင်းဒေသကြီး လွှတ်တော်ကိုယ်စားလှယ် ဦးဝေဖြိုးဟန်က ပြောပါတယ်။

“သတင်းထွက်ထွက်ချင်းပဲ ကျွန်တော်တို့သွားပါတယ်။ သက်ဆိုင်ရာ တာဝန်ရှိသူတွေ အကုန်လုံးနဲ့ အတည်ပြုလူနာတွေ နေတဲ့အိမ်တွေကိုလည်း မိသားစုစာရင်း ဘာတွေကောက်ပေါ့ဗျာ။ ပြီးတော့ ပိုးသတ်ဆေးဖျန်းတဲ့ အလုပ်တွေလုပ်တယ်။ သူတို့နေတဲ့ လမ်းသွယ်ဆိုလည်း လမ်းသွယ်တွေကို Yellow Line တွေ တားပြီး ပိတ်လိုက်တယ်။ နောက် လုံခြုံရေးတွေဘာတွေ ချပေါ့နော်။ သူတို့ အပြင်တွေ ဘာတွေ ထွက်မှာစိုးလို့။ အဲဒါကတော့ မနက်က သုံးယောက်လုံးနဲ့ ပတ်သက်ပြီး အဲဒါတွေ လုပ်ဖြစ်တယ်။ ကျန်းမာရေးဝန်ကြီးဌာနရဲ့ ညွှန်ကြားချက်အတိုင်းပဲ ကျွန်တော်တို့က ဆက်လုပ်ရမှာလေ၊ လောလောဆယ်တော့ အိမ်ထဲက အိမ်ပြင် မထွက်ဖို့ပဲ အရင်လုပ်ထားရတာပေါ့နော်။ "

သြဂုတ်လ ၂၉ ရက်နေ့က ပထမသုတ်အဖြစ် ဓာတ်ခွဲနမူနာ ၁၄၇၄ ခုကို စစ်ဆေးခဲ့ရာမှာ ပြည်ပခရီးသွားရာဇဝင်မရှိတဲ့ အတည်ပြုလူနာ ၇၇ ဦးကို စံချိန်တင် တွေ့ရှိခဲ့ပါတယ်။

အဲဒီထဲမှာလည်း ရန်ကုန်တိုင်း ဒလမြို့နယ်က တစ်ဦးနဲ့ သာကေတမြို့နယ်က တစ်ဦးတို့မှာ ပိုးတွေ့ရှိခဲ့ပါတယ်။ သူတို့ဟာ ပြည်ပခရီးသွားရာဇဝင်လည်းမရှိသလို၊ အတည်ပြုလူနာနဲ့ ထိတွေ့မှုလည်း မရှိခဲ့ပါဘူး။ ဒလမြို့နယ်က အတည်ပြုလူနာကတော့ စစ်တွေကို ခရီးသွား ရာဇဝင်ရှိခဲ့တယ်လို့ ထုတ်ပြန်ထားပါတယ်။

နိုင်ငံတကာမှာတော့ ကူးစက်ခံနေရပြီ၊ Positive ဖြစ်နေပြီ ဆိုပေမယ့် အိမ်မှာပဲ ပိုးကင်းစင်အောင် နေဖို့ စီစဉ်နေကြတယ်လို့ ရန်ကုန်မြို့က ဆရာဝန်တစ်ဦးဖြစ်တဲ့  ဒေါက်တာ ဥက္ကာကြည်ဝင်းက သုံးသပ်ပါတယ်။

"ဒီလိုမျိုး များများစစ်နိုင်ရင်တော့ ကျွန်တော်ထင်တာကတော့ များများတွေ့မှာပဲ။ တွေ့လာတာနဲ့အမျှ အခုတောင်မှ သတင်းတွေ နည်းနည်း ကြားနေရပြီပေါ့နော်။ ပိုးတွေ့လူနာတိုင်းကို ဆေးရုံတင်ဖို့ဆိုတာ နောက်ပိုင်းဆိုရင် မဖြစ်နိုင်တော့ဘူးပေါ့လေ။ ကျွန်တော်တို့ ဒါက ကျွန်တော်တို့ နိုင်ငံတွေမှ မဟုတ်ပါဘူး၊ အမေရိကလို အရမ်းကူးစက်တဲ့ နိုင်ငံတွေမှာ Positive ဖြစ်တာနဲ့ ဆေးရုံမတင်ဘူးပေါ့နော်။ ကျွန်တော်တို့ နိုင်ငံမှာ လူနာအရေအတွက် နည်းသေးတဲ့အတွက်ကြောင့်မို့လို့ Positive ဆိုတိုင်း ဆေးရုံတင်တာပေါ့။ နောက်ပိုင်းကျရင် ဘယ်လိုဖြစ်သွားမလဲဆိုတော့ Home Quarantine ခေါ်မှာပေါ့ ကိုယ်အိမ်မှာပဲနေ၊ ဘယ်လို လက္ခဏာမျိုးဆိုတော့မှ ဆေးရုံကိုလာခဲ့ဆိုပြီး ကျွန်တော်ထင်တာကတော့ အဲဒီလိုတွေ ကြေညာရတဲ့အဆင့်ထိ ရောက်လာလောက်မယ် ထင်ပါတယ်။”

ကျန်းမာရေးနဲ့ အားကစားဝန်ကြီးဌာန ဗဟိုကူးစက်ရောဂါတိုက်ဖျက်ရေးဌာန ညွှန်ကြားရေးမှူး ဒေါက်တာ ခင်ခင်ကြီးကတော့ ရန်ကုန်တိုင်းမှာ ပြည်တွင်းကူးစက်မှုတွေရှိနေပြီးလားဆိုတာ ဖြေဖို့ ဆက်လက်စောင့်ကြည့်ရဦးမယ်လို့ ပြောပါတယ်။

“ရခိုင်လိုဆိုရင် ဒါ ပြည်တွင်းကူးစက်မှု ရှိနေတယ်လို့ ပီပီပြင်ပြင် ပြောလို့ရတယ်ပေါ့။ ရန်ကုန်အနေနဲ့ကတော့ ရန်ကုန်မှာတွေ့တဲ့သူများစုကတော့ ရခိုင်ပြည်နယ် မြို့နယ်တွေက ပြန်လာတယ် ဒါမျိုးတွေများတယ်။ အခုလက်ရှိအနေအထားမှာတော့ ရန်ကုန်တိုင်းမှာ ပြည်တွင်းကူးစက်မှုတွေ ရှိနေပြီလားဆိုတဲ့ဟာ ဖြေဖို့အတွက်ကတော့ ဆက်စောင့်ကြည့်ရဦးမှာ အခုနေတော့ ဆုံးဖြတ်လို့ မရသေးပါဘူး။”

လက်ရှိအခြေအနေနဲ့ ကူးစက်ရောဂါရဲ့ သဘောသဘာဝအရ ကူးစက်မှုမြင့်တက်နေတဲ့ ကာလဖြစ်တာကြောင့် တက်နေဦးမှာဖြစ်ပြီး ရောဂါကာကွယ်ထိန်းချုပ်ရေးနည်းလမ်းကို ပြည်သူတွေက ပူးပေါင်းဆောင်ရွက်ရင် ကူးစက်မှုတန့်သွားမှာဖြစ်လို့ ပြည်သူတွေ လုပ်ဆောင်သင့်တဲ့ ကိစ္စရပ်တွေကို လုပ်ဆောင်ကြဖို့လည်း ဒေါက်တာ ခင်ခင်ကြီးက တိုက်တွန်းထားပါတယ်။

မြန်မာနိုင်ငံမှာ ဒီနေ့မနက် ၈ နာရီအထိ ကိုရိုနာဗိုင်းရပ်စ် အတည်ပြုလူနာ စုစုပေါင်း ၇၄၉ ဦးအထိ ရှိနေပြီး အဲဒီထဲမှာ သေဆုံးသူ ၆ ဦးနဲ့ ရောဂါပိုးကင်းစင်လာသူ ၃၅၁ ဦးထဲက ဆေးရုံကဆင်းခွင့်ရခဲ့သူ ၃၄၇ ဦး ရှိပါတယ်။


RFA Burmese

https://www.rfa.org/burmese/news/coronavirus-in-yangon-08302020064353.html

လွှတ်တော်ကိုယ်စားလှယ်လောင်း အမည်စာရင်းတွေ ကြေညာထား

ရန်ကုန်မြို့၊ ကြည့်မြင်တိုင်မြို့နယ်၊ သီတာရပ်ကွက်မှာ ၂၀၂၀ အထွေထွေရွေးကောက်ပွဲအတွက် ဆန္ဒမဲပေးခွင့်ရှိသူ စာရင်းကြည့်နေသူတွေကို တွေ့ရစဉ်


လာမယ့် နိုဝင်ဘာလ ၈ ရက်နေ့မှာကျင်းပမယ့် ၂၀၂၀ အထွေထွေရွေးကောက်ပွဲမှာ ဝင်ရောက်ယှဉ်ပြိုင်ခွင့်ရတဲ့ လွှတ်တော်ကိုယ်စားလှယ်လောင်းတွေရဲ့ အမည်စာရင်းတွေကို ဒီနေ့ စတင်ကြေညာလိုက်ပါတယ်။

ရန်ကုန်တိုင်း ရွေးကောက်ပွဲကော်မရှင် ဥက္ကဋ္ဌ ဦးကြည်မြင့်က ရန်ကုန်တိုင်း အပါအဝင် တစ်ပြည်လုံးမှာ ၂၀၂၀ ရွေးကောက်ပွဲ ဝင်ရောက်ယှဉ်ပြိုင်ခွင့်ရတဲ့ ကိုယ်စားလှယ်လောင်းတွေရဲ့ စာရင်းကို သက်ဆိုင်ရာ ရွေးကောက်ပွဲ ကော်မရှင် အဖွဲ့ခွဲတွေက ဒီနေ့စတင်ကြေညာထားတယ်လို့ RFA ကို ပြောပါတယ်။

ကရင်ပြည်နယ်မှာလည်း ရွေးကောက်ပွဲမှာ ပါဝင်ယှဉ်ပြိုင်ခွင့်ရတဲ့ ကိုယ်စားလှယ်လောင်းတွေရဲ့ အမည်စာရင်း တွေကို သက်ဆိုင်ရာခရိုင်အလိုက် ရွေးကောက်ပွဲကော်မရှင်ရုံးတွေမှာ ကပ်ထားတယ်လို့ ပြည်နယ်ရွေးကောက် ပွဲကော်မရှင်ဥက္ကဋ္ဌ ဦးကျော်ဝင်းမောင်က ပြောပါတယ်။

လက်ရှိ ပြည်ထောင်စု ရွေးကောက်ပွဲကော်မရှင်မှာ မှတ်ပုံတင်ထားတဲ့ နိုင်ငံရေးပါတီပေါင်း ၉၄ ခုရှိရာမှာ ပါတီ ၂ ခုကို ယာယီရပ်ဆိုင်းထားတဲ့အတွက် ၉၂ ပါတီက ရွေးကောက်ပွဲ ဝင်ရောက်ယှဉ်ပြိုင်ကြမှာဖြစ်ပါတယ်။

ပြည်ထောင်စုတစ်ဝှမ်းလုံးမှာ စည်းရုံးမယ့်ပါတီပေါင်း ၇၆ ပါတီနဲ့ တိုင်းနဲ့ ပြည်နယ်တွေမှာ စည်းရုံးမယ့် ပါတီ ၁၈ ပါတီတို့ကို ခွင့်ပြုထားတယ်လို့ ပြည်ထောင်စု ရွေးကောက်ပွဲကော်မရှင်က ထုတ်ပြန်ထားပါတယ်။

၂၀၂၀ ရွေးကောက်ပွဲအတွက် ပထမအကြိမ်မဲစာရင်းအရ တစ်နိုင်ငံလုံးအတိုင်းအတာနဲ့ ဆန္ဒမဲပေးခွင့်ရှိသူ ၃၇ သန်းခွဲ ရှိပါတယ်။


RFA Burmese

https://www.rfa.org/burmese/news/candidate-list-08302020025233.html

ပြည်ခရိုင်အုပ်ချူပ်ရေးမှူးရုံးရှေ့ရှိ ရွှေဆိုင်အား သေနတ်အတုဖြင့် လုယက်သူအမျိူးးသားနှစ်ဦးအား နာရီပိုင်းအတွင်း ဖမ်းဆီးရမိ



 ပြည်    သြဂုတ်   ၃၀

      ပဲခူးတိုင်း ဒေသကြီး   ပြည်ခရိုင် အုပ်ချူပ်ရေးမှူးရုံး ရှေ့ရှိ ရွှေဆိုင်အား သေနတ်အတုဖြင့် ဝင်ရောက်လုယက်သူ အမျိူးးသား နှစ်ဦးအား ရဲတပ်ဖွဲ့ နှင့် ပြည်သူပူးပေါင်းဖမ်းဆီးရမိခဲ့ကြောင်း ပြည်ခရိုင် ရဲတပ်ဖွဲ့မှူး ဒုတိယရဲမှူးကြီး အောင်မိုးထံက  သိရသည် ။

      ဖြစ်စဉ်မှာ သြဂုတ် ၂၉ ရက် ညနေ  ၅း၂၀  နာရီ ခန့် ပြည်မြို့နယ်၊ ရွှေကူရပ်ကွက်၊ ရွှေတစ်ချောင်းလမ်းနှင့် ပန်းပဲ တန်းလမ်းထောင့် ပြည်ခရိုင်အုပ်ချူပ်ရေးမှူးရုံး ရှေ့ ရှိ "မေ့သရဖူ" ရွှေဆိုင်တွင် ဆိုင်ရှင် ဖြစ်သူသည် ရှိနေစဉ် ဆိုင်ရှေ့သို့ ဆိုင်ကယ်ဖြင့် ဆိုင်ကယ်စီး ဦးထုပ်ဆောင်းထားသော အမျိုးသား(၂)ဦး ရောက်ရှိလာခဲ့ပြီး ၎င်းတို့(၂)ဦးအနက် ထက်ဇော်အောင် (၂၃) နှစ်မှ ယာဘက်လက်ထဲတွင် ခဲသီးထည့်ပစ်ရသော ဂက်စ်ဗူးငယ်တပ်ဆင်ထားသည့် Walther CP 99 စာတမ်း ပါ ကော်သေနတ်အား ကိုင်ဆောင်၍လည်းကောင်း၊ ပြည့်ဖြိုးအောင် (၂၄) နှစ်မှ Nato တံဆိပ်ပါ (အရပ်ခေါ်-ငရုတ်ကောင်း ဖျန်းဆေးဗူး)ကိုင်ဆောင်၍ လည်းကောင်း ရွှေဆိုင်အတွင်းသို့ ဝင်ရောက်လာပြီး ကော်သေနတ် ကိုင်ဆောင်ထားသူ ထက်ဇော်အောင်မှ "မလှုပ်နဲ့၊ စကားမပြောနဲ့၊ လှုပ်ရင်ပစ်သတ်မယ်"ဟု ပြောကာ မှန် ကောင်တာ ရှိုးကေ့(စ်)အတွင်းမှ ရွှေထည်ပစ္စည်းများအား ပီနံအိတ်ဖြင့် ထည့်နေစဉ် ဆိုင်ရှင်ဖြစ်သူ ကို ---- မှ ပြန်လည် ထိုးကြိတ်ခုခံရာ ပြည့်ဖြိုးအောင်မှ လက်ထဲတွင် ကိုင်ထားသော အရပ်ခေါ် -ငရုတ်ကောင်းဖျန်း ဆေးဗူးဖြင့် ၎င်းအား ဖျန်းပက်ခဲ့သည့်အပြင် ခဲစေ့ပါ ကော်သေနတ်ဖြင့် ပစ်ခတ်ခဲ့သဖြင့် ဦးခေါင်း နောက်စေ့ ပေါက်ပြဲ၊ ဝဲနား ရွက်အောက်ပွန်းခြစ်၊ ဝဲပါးအောက်ပွန်းခြစ် ဒဏ်ရာများ ရရှိခဲ့သည် ။ 

အဆိုပါ သတင်းအား ရလျှင်ရခြင်း ပြည် ခရိုင်ရဲတပ်ဖွဲ့မှူး ဦးစီး ရဲတပ်ဖွဲ့ဝင်များသည် အခင်းဖြစ်နေရာသို့ ချက်ချင်း သွားရောက်စစ်ဆေးခဲ့ပြီး အဆိုပါ ပြစ်မှုကျူးလွန်သူ (၂)ဦးအား ရပ်ကွက်နေ ပြည်သူများ၏ ပူးပေါင်း ကူညီမှုဖြင့် ဖမ်းဆီးရမိပြီးဖြစ်၍ ပြည်မြို့ အမှတ် (၁)နယ်မြေရဲစခန်းက အမှုဖွင့် ဆောင်ရွက်ထား ရှိကြောင်း ပြည်ခရိုင် ရဲတပ်ဖွဲ့မှူရုံးက သိရသည်။ 


ဆန်းတင့် (ရေကြည်)

Myanmaalinn

https://www.facebook.com/MYANMAALINNNEWS

လူမည်းအမျိုးသား ပစ်ခတ်ခံရမှု Wisconsin ပြည်နယ်မှာ ဆက်လက်ဆန္ဒပြ

လူမည်းအမျိုးသား Jacob Blake ပစ်ခတ်ခံရမှုအတွက် ချီတက် ဆန္ဒပြကြသူများ။ (သြဂုတ် ၂၇၊ ၂၀၂၀)


Wisconsin ပြည်နယ် Kenosha မြို့မှာ လူမည်းအမျိုးသား Jacob Blake ကို လူဖြူရဲအရာရှိက သေနတ်နဲ့ ပစ်ခတ်မှုအတွက် လူထုဆန္ဒပြမှုတွေကို စနေနေ့မှာလည်း တွေ့နေရပါတယ်။

Kenosha မြို့မှာ ဒီသီတင်းပတ် အစောပိုင်းတုန်းက ဆန္ဒပြမှုတွေနဲ့ မတည်မငြိမ် ဖြစ်ခဲ့တဲ့အတွက် ပြည်နယ်လုံခြုံရေးတပ်တွေ ချထားချိန်မှာပဲ ဒီလူထုဆန္ဒပြမှုကို Blake ရဲ့ မိသားစုနဲ့ တက်ကြွလှုပ်ရှားသူတွေက စီစဉ်တာဖြစ်ပါတယ်။

အသက် ၂၉ နှစ်ရှိပြီဖြစ်တဲ့ Blake ဟာ သြဂုတ်လ ၂၃ ရက် တနင်္ဂနွေနေ့တုန်းက သူ့သားသမီးငယ်တွေ ရှေ့မှာပဲ ရဲက နောက်ကနေ သေနတ်နဲ့ ၇ ချက် ပစ်ခတ်တာခံခဲ့ရပြီး ခန္ဓာကိုယ် တစိတ်တပိုင်း မလှုပ်ရှားနိုင်ဘဲ ဖြစ်ခဲ့ရပါတယ်။

ရဲတွေရဲ့ ရက်စက်တဲ့လုပ်ရပ်နဲ့ ခွဲခြားဆက်ဆံခံရမှုအတွက် တနိုင်ငံလုံး ဆန္ဒပြမှုတွေ ဖြစ်ပွားနေချိန်မှာ လူဖြူအများစု နေထိုင်ရာ မြို့ကလေးမှာ အခုလို ဖြစ်ပွားခဲ့တာဖြစ်ပြီး တနင်္လာညမှာတော့ မီးရှို့ဖျက်ဆီးမှုတွေနဲ့ တခြား အကြမ်းဖက်မှုတွေ ဖြစ်ပွားခဲ့တဲ့အပြင် နောက်တနေ့မှာတော့ ဆယ်ကျော်သက်တယောက်ရဲ့ ပစ်ခတ်မှုကြောင့် ဆန္ဒပြနေသူ ၂ ဦး သေဆုံးခဲ့ရပြီး ၁ ဦး ဒဏ်ရာရခဲ့တာပါ။

သေနတ်နဲ့ပစ်ခတ်သူဟာ အသက် ၁၇ နှစ်အရွယ် Kyle Rittenhouse ဖြစ်ပြီး အခု သူ့ကို ရာဇဝတ်ပြစ်မှု ၆ ခုနဲ့ စွဲချက်တင်ထားပါတယ်။

လူမည်းအမျိုးသား Blake ကို ပစ်ခတ်ခဲ့တဲ့ ရဲအရာရှိ Rusten Sheskey ကတော့ စုံစမ်းစစ်ဆေးမှု လုပ်နေချိန်မှာ ခွင့်နဲ့ နေနေရပါတယ်။ Kenosha မြို့ တည်ငြိမ်ဖို့နဲ့ တရားဥပဒေ စိုးမိုးရေးအတွက် ပြည်နယ်အုပ်ချုပ်ရေးမှူး Tony Evers က ပြည်နယ်လုံခြုံရေးတပ်တွေကို ဒီသီတင်းပတ် အစောပိုင်းမှာပဲ တိုးချထားခဲ့တာပါ။


ဗွီအိုအေ (မြန်မာပိုင်း)

https://burmese.voanews.com/a/protests-in-wisconsin/5563524.html

အမေရိကန်ရဲတပ်ဖွဲ့တွင်း လူမျိုးရေးခွဲခြားမှု ပျောက်အောင်လုပ်ဖို့ ကုလသမဂ္ဂ တိုက်တွန်း

ဝါရှင်တန်ဒီစီ လူထုချီတက် ဆန္ဒပြပွဲမှာ လက်သီးလက်မောင်းတန်း ပြောကြားနေတဲ့ Jacob Blake ရဲ့ဖခင်။ (သြဂုတ် ၂၈၊ ၂၀၂၀)


အမေရိကန်ပြည်ထောင်စုရဲ့ တရားဥပဒေစိုးမိုးရေး အဖွဲ့တွေအတွင်းမှာ ပုံစံတကျရှိနေတဲ့ လူမျိုးရေးခွဲခြားမှုတွေကို ရှင်းလင်းဖယ်ရှားဖို့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံး (OHCHR) ပြောခွင့်ရ Rupert Coleville က သောကြာနေ့က တိုက်တွန်းလိုက်ပါတယ်။

“Jacob Blake ကို ပစ်ခတ်မှုဟာ အမေရိကန်နိုင်ငံမှာ အာဖရိကန်-အမေရိကန်တွေ ဥပဒေစိုးမိုးရေး အာဏာပိုင်တွေနဲ့ ရင်ဆိုင်ဖြေရှင်းရတဲ့အခါမှာ ဘယ်လောက်အထိ ခွဲခြားဆက်ဆံခံနေရပြီး အန္တရာယ်တွေ များနေသလဲ ဆိုတာကို သတိပေးလိုက်တာ ဖြစ်ပါတယ်။ ဒီလို ကြေကွဲဝမ်းနည်းစရာဖြစ်ရပ်က ပုံစံတကျရှိနေတဲ့ လူမျိုးရေးခွဲခြားမှုနဲ့ ရဲတပ်ဖွဲ့လုပ်ငန်းတွေကြား ရှိနေတဲ့ ဆက်စပ်မှုတွေကို အမြန်ဆုံး ဖယ်ရှားပစ်ဖို့လိုတယ် ဆိုတာကို ထပ်လောင်းအတည်ပြုလိုက်တာ ဖြစ်တယ်” လို့ Rupert Coleville က ပြောပါတယ်။

ပြီးခဲ့တဲ့ သြဂုတ်လ ၂၃ ရက်နေ့က အသက် ၂၉ နှစ်အရွယ် Jacob Blake ဟာ သူ့ရဲ့ကားပေါ်ကို တက်ဖို့လုပ်နေစဉ်မှာ ရဲက နောက်ကနေလိုက်လာပြီး သေနတ်နဲ့ အနီးကပ် ၇ ချက် ပစ်ခဲ့ပြီးတဲ့နောက် သူက အဲဒီလို ပြောကြားလိုက်တာပါ။ ရဲတပ်ဖွဲ့က အဲဒီလို ပစ်ခတ်မှုကြောင့် နိုင်ငံတဝန်းမှာ ဆန္ဒပြပွဲတွေလည်း ဖြစ်ပေါ်လာခဲ့ပါတယ်။

ဗွီဒီယိုတွေမှာ တွေ့ရတာအရတော့ ရဲတပ်ဖွဲ့ဟာ Blake ကို အင်အားသုံး နှိမ်နင်းခဲ့ပြီး အဲဒီလို အင်အားသုံးတဲ့နေရာမှာလည်း အင်အားအလွန်အကျွံ သုံးခဲ့ပုံရပြီး သေစေနိုင်တဲ့ လက်နက်ကိုင်ဆောင် အသုံးပြုတဲ့နေရာမှာ နိုင်ငံတကာက သတ်မှတ်ထားတဲ့ စံနှုန်းတွေအတိုင်း လိုက်နာခြင်းမရှိတဲ့ပုံ တွေ့ရတယ်လို့ OHCHR ပြောခွင့်ရက ပြောတယ်။

ဒါ့အပြင် Blake ကို အင်အားသုံး နှိမ်နင်းခဲ့တာဟာ လူမျိုးရေးခွဲခြားတဲ့ သဘောသဘာဝမျိုးရှိတာ အများကြီးဖြစ်နိုင်တယ်လို့လည်း ပြောပါတယ်။


ဗွီအိုအေ (မြန်မာပိုင်း)

https://burmese.voanews.com/a/un-us-racism-eradication/5563058.html

အိန္ဒိယ အန်ဒမန်ကျွန်းစုက ရှားပါး မျိုးနွယ်စုကို ကိုဗစ် ကူးစက်

ဂရိတ်အန်ဒမန် လူမျိုးစုက မောင်နှမ နှစ်ဦး ပို့ဘလဲမြို့မှာတွေ့ရစဥ်

အိန္ဒိယနိုင်ငံ အန်ဒမန်ကျွန်းစု (ကပ္ပလီကျွန်းစု)က လူသူအထိအတွေ့နည်းတဲ့ ကျွန်းသား လူမျိုးစုတစ်စုကို ကိုရိုနာဗိုင်းရပ်စ် ကူးစက်ခံနေရပါတယ်။

အန်ဒမန်ကျွန်းစု ကျွန်းသားတွေအနက် 'ဂရိတ် အန်ဒမန် လူမျိုးစု' ကျွန်းသား ၁၀ ဦးဟာ ပြီးခဲ့တဲ့ လအတွင်း ကိုရိုနာဗိုင်းရပ်စ် ကူးစက်ခံထားရတယ်လို့ ကျန်းမာရေး အရာရှိ တစ်ဦးက ဘီဘီစီကို ပြောပါတယ်။

သူတို့ထဲက လေးဦးဟာ ဝေးလံသီခေါင်တဲ့ ကျွန်းမှာ နေကြသူတွေ ဖြစ်ပြီး လွန်ခဲ့တဲ့ တစ်ပတ်က ကူးစက်ခံရတာပါ။ကျန် ခြောက်ဦး ကတော့ မြို့ပေါ် ကျွန်းသားတွေ ဖြစ်ပြီး ပြီးခဲ့တဲ့လက ကူးစက်ခံရသူတွေပါ။

မျိုးနွယ်ကွဲပြားကြတဲ့ ကျွန်းသားတွေ အနက် 'ဂရိတ် အန်ဒမန် လူမျိုးစု'ကျွန်းသားတွေက လူဦးရေ အရ ၅၀ ကျော်သာ ရှိပြီး အများစုဟာ သန္တာကျောက်တန်း တွေ နဲ့ ပြည့်နှက်နေတဲ့ ကျွန်းစုက ကျွန်း၃၇ ခု အနက် တစ်ခုမှာပဲ နေကြတာပါ။

အန်ဒမန် နဲ့ နီကိုဘာကျွန်း အရှေ့ပိုင်းမှာ ကိုဗစ်ကူးစက်ခံရသူပေါင်း ၂၉၈၅ ဦး ရှိပြီး ဇွန်လဆန်းပိုင်းမှာ ၄၁ ဦး သေဆုံးခဲ့ပါတယ်။

ပို့ဘလဲမြို့ အနီးက စတြိတ်ကျွန်းပေါ်မှာ နေထိုင်တဲ့ လူဦးရေနည်းပါးပြီး မျိုးနွယ်စု ပျောက်ကွယ်တော့မယ့် အခြေအနေနဲ့ ရင်ဆိုင်နေရတဲ့ 'ဂရိတ် အန်ဒမန် လူမျိုးစု' တွေကြား ကူးစက်မှုကို ပထမဆုံးတွေ့ခဲ့တာကတော့ သူတို့မျိုးနွယ်စုက လူဦးရေ ၅၃ ဦးလုံးကို ပြီးခဲတဲ့ သီတင်းပတ်တုန်းက စစ်ဆေးခဲ့ရာမှာ တွေ့ခဲ့ရတာ ဖြစ်တယ်လို့ အကြီးတန်းကျန်းမာရေး အရာရှိ ဒေါက်တာ အဗစ်ရွိုင်က ဘီဘီစီကို ပြောပါတယ်။

ကျန်းမာရေး နဲ့ အရေးပေါ် ကယ်ဆယ်ရေး လုပ်သားတွေဟာ လွန်ခဲ့တဲ့ သီတင်းပတ်က လှိုင်းထန်တဲ့ ပင်လယ်ပြင် ကို မော်တော်ဘုတ်တွေနဲ့ ဖြတ်သန်းပြီး အဲဒီလူမျိုးစုဝင်တွေကို ကိုဗစ် ကူးစက်မှု ရှိမရှိ တစ်ရက်အတွင်း အပြီး စစ်ဆေးခဲ့ပါတယ်။ သူတို့ အားလုံးဟာလည်း ပူးပေါင်း ဆောင်ရွက်မှု ရှိတယ် လို့ ဒေါက်တာရွိုင် က ပြောပါတယ်။

သူတို့ထဲက ကူးစက်ခံရသူ နှစ်ဦးကိုတော့ ဆေးရုံတင်လိုက်ရပြီး ကျန်နှစ်ဦး ကိုတော့ ကန့်သတ်စောင့်ကြည့်စခန်း မှာ ကွာရန်တင်း လုပ်ထားပါတယ်။

သူတို့ မျိုးနွယ်ထဲက မြို့ပေါ်မှာ အနေကြာ အလုပ်လုပ်ကိုင်နေတဲ့ တခြား ခြောက်ဦးမှာ ပြီးခဲ့တဲ့လက ပိုးတွေ့ခဲ့တယ်လို့ ဒေါက်တာရွိုင်က ပြောပါတယ်။ သူတို့ခြောက်ဦးလုံးကတော့ ပြန်ကောင်းသွားကြပါပြီ။

သူတို့ထဲက လူတော်တော်များများဟာ ပို့ဘလဲမြို့ နဲ့ သူတို့ နေထိုင်ရာ ဝေးလံခေါင်သီကျွန်းအကြား အသွားအလာ လုပ်နေကြလို့ အဲဒီကနေ ဗိုင်းရပ်စ် ကူးစက်ခံရပုံရတယ်လို့ သူက ပြောပါတယ်။ တချို့ က မြို့ပေါ်မှာ ကျပန်း အလုပ်လုပ်ကြပါတယ်။

မျက်နှာမှာ ဆေးခြယ်ထားတဲ့ ဂျာရာဝါး မျိုးနွယ်စုဝင် တစ်ဦး

လောလောဆယ်တော့ ကျွန်းစုထဲက တခြား ကျွန်းသား လူမျိုးစုတွေဆီကို ရောဂါမကူးစေရေးဟာ ပထမ ဦးစားပေး လုပ်ငန်းဖြစ်တယ်လို့ ဒေါက်တာရွိုင်က ပြောပါတယ်။

ဒါကြောင့် သူတို့ ရဲ့ အသွားအလာတွေကို စောင့်ကြည့်နေပြီး တခြားမျိုးနွယ်စုတချို့ကိုလည်း စမ်းသပ် စစ်ဆေးမှုတွေ အများအပြား လုပ်ဆောင်ပေးနေတယ်လို့လည်း သူက ပြောပါတယ်။

လူဦးရေနည်းပါး ပျောက်ကွယ်တော့မယ့် အခြေအနေရှိနေတဲ့ မျိုးနွယ်စု ငါးမျိုးဟာ အန်ဒမန်ကျွန်းစုမှာ နေထိုင်ကြပါတယ်။ အဲဒီငါးမျိုးက ဂျာရာဝါး၊ မြောက်ပိုင်းဆင်တင်လိစ်၊ ဂရိတ် အန်ဒမန်၊ အွန်ဂျီ နဲ့ ရှော်မ်ပင် မျိုးနွယ်စုတို့ ဖြစ်ပါတယ်။

ဂျာရာဝါးနဲ့ မြောက်ပိုင်းဆင်တင်လိစ် မျိုးနွယ်စုတွေဟာ တခြား လူများစုကျွန်းသားတွေ နဲ့ ရောနှော ပေါင်းစပ်သွားတာ မရှိပါဘူး။ မြောက်ပိုင်းဆင်တင်လိစ် ကျွန်းသားတွေဟာ တခြားလူတွေနဲ့ ကင်းရှင်းချင်လို့ အပြင်လူတွေလာရင် ရန်ပြုတတ်ကြပါတယ်။ သူတို့ ကျွန်းကို သူစိမ်းလည်း အဝင်မခံပါဘူး။

၂၀၁၈ ခုနှစ်တုန်းက အမေရိကန်နိုင်ငံသား ဂျွန်အယ်လင်ချောင်ဟာ ကျွန်းဆီကို လာဖို့ ကြိုးစားတဲ့ အတွက် လေးမြားတွေ နဲ့ ပစ်ခတ် အသတ်ခံ ရဖူးပါတယ်။

၁၈၅၀ ပြည့်လွန် နှစ်တွေအတွင်း ဗြိတိသျှတွေ ကျွန်းစုကိုသိမ်းပိုက်ထားစဉ်က ဂရိတ် အန်ဒမန် မျိုးနွယ်စု ဦးရေဟာ ငါးထောင်ကျော် ရှိတယ်လို့ မျိုးနွယ်စုတွေရဲ့ ရပိုင်ခွင့်နဲ့ ရပ်တည်ပိုင်ခွင့်ကို လှုံ့ဆော်အားပေးတဲ့ လန်ဒန် အခြေစိုက် Survival International အဖွဲ့ ရဲ့ ပြောဆိုချက်အရ သိရပါတယ်။

ကျွန်းပေါ်လာနေထိုင်သူတွေသယ်လာတဲ့ ရောဂါပိုးတွေနဲ့ ထိတွေ့ရာက နောက်ပိုင်းမှာ သူတို့ လူဦးရေ ကျဆင်းခဲ့ပါတယ်။

"ဂရိတ်အန်ဒမန်မျိုးနွယ်စုဝင်တွေမှာ ကိုဗစ်-၁၉ ကူးစက်ခံရတာ အင်မတန် ဂရုစိုက်ရမှာ ဖြစ်ပါတယ်။ ကပ်ရောဂါရဲ့ ကြောက်စရာဆိုးကျိုးကြောင့် သူတို့ လူဦးရေ ပျောက်သွားနိုင်တာကို သူတို့လည်း သိမှာပါ"လို့ Survival International အဖွဲ့ရဲ့ အကြီးတန်း သုတေသီ ဆိုဖီ ဂရစ်ဂ်က ပြောပါတယ်။

ဂရိတ် အန်ဒမန်ဘာသာစကားတွေကို တတ်ကျွမ်းခဲ့သူတွေထဲက နောက်ဆုံးတစ်ဦးဖြစ်တဲ့ ဘိုအာ ဆီနီယာဟာ ၂၀၁၀ ခုနှစ် အသက် ၈၅ နှစ် မှာ ကွယ်လွန်ခဲ့တာပါ။ ဒီကျွန်းတွေကို မနုဿဗေဒ ပညာရှင်တွေအတွက် အိပ်မက်ကျွန်းတွေလို့ ခေါ်တတ်ကြပြီး အဲဒီကျွန်းတွေဟာ ကမ္ဘာပေါ်မှာ ဘာသာစကား ကွဲပြားမှု အများဆုံး ရှိတဲ့ နေရာတွေထဲက တစ်ခု ဖြစ်ပါတယ်။

လတ်တလောမှာတော့ ကျွန်းစု တောင်ဘက်နဲ့ အလယ်ပိုင်းကြားက ကြိုးဝိုင်းသစ်တောကြီးထဲမှာ နေထိုင်တဲ့ ရေကြည်ရာ မြက်နုရာ လှည့်လည် နေတတ်တဲ့ ဂျာရာဝါး မျိုးနွယ်စုဝင် ၄၇၆ ဦးကျော်ဟာ ရောဂါပိုး ကူးစက်မှု ရှိလာတဲ့နောက်ပိုင်း တောအစွန်အဝေးဆုံးဆီကို ပြောင်းပြီး သီးခြားနေထိုင်နေပြီလို့ တာဝန်ရှိသူတွေက ပြောပါတယ်။

လူဦးရေနည်းပါး ပျောက်ကွယ်တော့မယ့် အခြေအနေရှိနေတဲ့ မျိုးနွယ်စု ငါးမျိုးဟာ အန်ဒမန်ကျွန်းစုမှာ နေထိုင်ကြပါတယ်။

မဖြစ်မနေနဲ့ အရေးပေါ်ကယ်ဆယ်ရေး အလုပ်တွေအတွက် လူတွေ ကြိုးဝိုင်းသစ်တောထဲက အန်ဒမန်လမ်းမကြီးကို ဖြတ်သွားရတဲ့ အခါ သူတို့တွေနဲ့ ရောဂါဒဏ်ခံနိုင်အားနည်းတဲ့ မျိုးနွယ်စုဝင်တွေကို ထိတွေ့မိတဲ့ အန္တရာယ် အနည်းဆုံး အခြေအနေ အာဏာပိုင်တွေက ဖြစ်စေချင်တဲ့အတွက် အဲဒီလို ပြောင်းသွားကြတာပါ။

၁၉၇၀ ခုနှစ်တွေက ဖောက်ခဲ့တဲ့ အဲဒီလမ်းမကြီးဟာ ဘာရာတန်းကျွန်းနဲ့ ဒစ်လစ်ပါးမြို့ကြားက ရွာ ၄၀၀ ကို ဆက်သွယ်ထားတဲ့ တစ်ခုတည်းသော လမ်းမကြီး ဖြစ်ပါတယ်။

ကျွန်းတစ်ကျွန်းပေါ်မှာ နေထိုင်တဲ့၊ လူဦးရေ ၁၁၅ ယောက်ကျော်ရှိတဲ့ အွန်ဂျီလူမျိုးစုဝင်တွေကို စစ်ဆေးဖို့ ကျန်းမာရေးဝန်ထမ်းတွေနဲ့ ဆရာဝန်တွေပါတဲ့ အဖွဲ့တစ်ခုကို လွှတ်ထားတယ်လို့ ဒေါက်တာ ရွိုင်က ပြောပါတယ်။

ဒါ့အပြင် ရှော်မ်ပင် လူမျိုးစုဝင်တွေကိုလည်း စစ်ဆေးမှာ ဖြစ်ပါတယ်။

အဲဒီကျွန်းသား မျိုးနွယ်တွေ နေထိုင်ရာကျွန်းတွေကို သွားလာတဲ့ အရေးပေါ်ကယ်ဆယ်ရေးနဲ့ ကျန်းမာရေးဝန်ထမ်းတွေဟာ ကျွန်းတွေဆီ မသွားခင် ကိုဗစ်ကင်းရှင်းကြောင်း စစ်ဆေးရမှာ ဖြစ်ပြီး အပြန်မှာ ကွာရန်တင်းတစ်ပတ်ဝင်ရမှာ ဖြစ်ပါတယ်။

အခုထိတော့ အဲဒီကျွန်းစုက ကျွန်း ၁၀ ကျွန်းပေါ်မှာ ပိုးကူးစက်မှုတွေ့ထားပြီးဖြစ်တယ်လို့ ဒေါက်တာရွိုင်က ပြောပါတယ်။

အန်ဒမန်ကျွန်းစုမှာ ဆေးရုံ နှစ်ရုံ၊ ကျန်းမာရေး ဌာန သုံးခု နဲ့ ကိုရိုနာပိုး ကူးစက်ခံရသူတွေကို ကုသပေးတဲ့ ဌာန ၁၀ ခု ရှိပါတယ်။ အဲဒီနေရာဟာ အိန္ဒိယ တဝန်းမှာ ဆေးစစ်မှု အမြင့်ဆုံး နေရာတွေထဲက တစ်ခုလည်း ဖြစ်ပါတယ်။

တခြားနေရာတွေမှာတော့ ဘရာဇီးနဲ့ ပီရူးနိုင်ငံတွေက မျိုးနွယ်စု တချို့မှာလည်း ကိုဗစ်-၁၉ ကူးစက်ခံနေရပါတယ်။

ဘရာဇီးနိုင်ငံမှာ အမေဇုန် ဒေသတလျှောက်က တိုင်းရင်းမျိုးနွယ်စုဝင် ၂၈၀ ကျော်ဟာ ကိုရိုနာဗိုင်းရပ်စ် ကူးစက်ခံရပြီး သေဆုံးခဲ့ပါတယ်။


BBC Burmese

https://www.bbc.com/burmese/world-53946372

(၃၀-၈-၂၀၂၀) ရက်နေ့၊ နံနက် (၈:၀၀)နာရီ COVID-19 ရောဂါဓာတ်ခွဲအတည်ပြုလူနာသစ် (၁၆) ဦးတွေ့ရှိ

၁။     (၂၉-၈-၂၀၂၀) ရက်နေ့အတွက် COVID-19 ရောဂါ ဓာတ်ခွဲစစ်ဆေးရာတွင် -

- အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်) (NHL)မှ ဒုတိယအသုတ် ဓာတ်ခွဲ နမူနာ (၅၂၄) ခု၊

- ဆေးသုတေသနဦးစီးဌာန (DMR) မှ ဒုတိယအသုတ် ဓာတ်ခွဲနမူနာ (၅၂) ခုနှင့်

- ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၄) ခု တို့အား ထပ်မံ စစ်ဆေးပြီးစီးခဲ့ရာ -

• COVID-19 ရောဂါဓာတ်ခွဲအတည်ပြုလူနာသစ် (၁၆) ဦးတွေ့ရှိပါသည်။

၂။   (၃၀-၈-၂၀၂၀) ရက်နေ့၊  နံနက် (၈:၀၀) နာရီအထိ  မြန်မာနိုင်ငံတွင် COVID-19 ရောဂါ ဓာတ်ခွဲအတည်ပြုလူနာ (၇၄၉)ဦး ရှိပြီဖြစ်ပါသည်။

၃။ (၂၉-၈-၂၀၂၀) ရက်နေ့အတွက်  COVID-19 ရောဂါ ဓာတ်ခွဲစစ်ဆေးမှုများ အနေဖြင့် -

- အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်)(NHL) မှ ဓာတ်ခွဲနမူနာ (၁,၀၈၄) ခု၊ 

- ဆေးသုတေသနဦးစီးဌာန(DMR) မှ ဓာတ်ခွဲနမူနာ (၂၄၅) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန(မန္တလေး) မှ ဓာတ်ခွဲနမူနာ (၁၁၀) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) မှ ဓာတ်ခွဲနမူနာ (၂၇၂) ခု၊

- ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ (၁၀၀) ခု၊

- ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၂၈) ခု၊

- နေပြည်တော်ပြည်သူ့ဆေးရုံကြီး ခုတင် (၁၀၀၀) မှ ဓာတ်ခွဲနမူနာ (၃) ခု၊

- ပြည်သူ့ဆေးရုံကြီး၊ ပုသိမ်မြို့မှ ဓာတ်ခွဲနမူနာ (၁၁) ခုနှင့် 

- ရန်ကုန်မြို့၊ အမှတ်(၁) တပ်မတော်ဆေးရုံကြီး ခုတင် (၁၀၀၀) မှ ဓာတ်ခွဲနမူနာ (၂၀၁) ခု၊

စုစုပေါင်း (၂,၀၅၄) ခုအား  စစ်ဆေးခဲ့ပါသည်။


Ministry of Health and Sports, Myanmar

https://www.facebook.com/MinistryOfHealthAndSportsMyanmar

မြန်မာအလုပ်သမားတွေခေါ်ယူရေး ထိုင်းလုပ်ငန်းရှင်တွေ ရက်ရွေ့ဆိုင်းမည်

ဘန်ကောက်မြို့မှာတွေ့ရတဲ့ ရွှေ့ပြောင်းအလုပ်သမားများ

မြန်မာနိုင်ငံတွင်း COVID-19 ကူးစက်မှုတွေ မြင့်တက်နေတဲ့ အတွက် မြန်မာအလုပ်သမားတွေ ခေါ်ယူတာကို ရွှေ့ဆိုင်းထားဖို့ ထိုင်း စီးပွါးရေး လုပ်ငန်းရှင်တွေကို ထိုင်းကျန်းမာရေး အာဏာပိုင်တွေက တောင်းဆိုတော့မှာ ဖြစ်ပါတယ်။

မြန်မာအပါအဝင် နိုင်ငံ အတော်များများမှာ ကိုရိုနာဗိုင်းရပ်စ် ကူးစက်မှုနှုန်းမြင့်တက်နေကြောင်း၊ မြန်မာနိုင်ငံတွင်းအစောပိုင်းကပြည်ပကပြန်လာသူတွေမှာပဲ ရောဂါကူးစက်မှု တွေ့ရပေမယ့် အခု သီတင်း ၂ ပတ်ထဲ ပြည်တွင်းကူးစက်မှုနှုန်းတိုးလာနေကြောင်း ထိုင်း ကူးစက်ရောဂါ ဌာန အကြီးအကဲ Sophon Iamsirithavorn ကပြောပါတယ်။ ထိုင်းနိုင်ငံတွင်း ရောဂါကူးစက်ပျံ့နှံ့မှု ထိန်းချုပ် ကာကွယ်ရေးဖို့ လောလောဆယ် မြန်မာ အလုပ်သမားတွေ ခေါ်ယူတာကို ရွှေ့ဆိုင်းထားဖို့အရေး စီးပွါးရေးလုပ်ငန်းရှင်တွေရဲ့ ပူးပေါင်းဆောင်ရွက်မှုကို ရယူ သွားမယ်လို့ လည်း Dr Sophon က ပြောပါတယ်။

မြန်မာနဲ့ နယ်စပ်ချင်း မိုင် ၁၄၀၀ ကျော်ထိစပ်နေတာဖြစ်တဲ့အတွက် မြန်မာနိုင်ငံဘက်ကနေ တရားမဝင် ရွှေ့ပြောင်းလုပ်သားတွေ ခိုးဝင်မလာနိုင်အောင် နယ်စပ် လုံခြုံရေးကို တိုးမြှင့်ထားတယ်လို့လည်း Bangkok Post သတင်းစာက ပြောပါတယ်။ နယ်စပ် လုံခြုံ ရေးတိုးမြှင့်ဖို့နဲ့ နယ်စပ်က တရားဝင် ဝင်ရောက်လာသူတွေကို လိုအပ်တဲ့ ကျန်းမာရေးစစ်ဆေးမှုတွေ ပြုလုပ်ဖို့ ထိုင်း၊ မြန်မာ နယ်စပ် ပြည်နယ်ခရိုင်တွေ ဖြစ်တဲ့ Chiang Mai ၊ Chiang Rai ၊ Mae Hong Son၊ Ranong အပါအဝင် ပြည်နယ်ခရိုင် ၁၀ ခုက အုပ်ချုပ် ရေးမှုး တွေကို အမိန့်ပေးထားတယ်လို့လည်း ပြည်ထဲရေး ဝန်ကြီးဌာန အမြဲတမ်း အတွင်းဝန် Chatchai Phromlert က ပြောပါ တယ်။

ထိုင်းနိုင်ငံမှာ COVID-19 ကူးစက်သူ စုစုပေါင်း ၃၄၀၀ ကျော်နဲ့ သေဆုံးသူ ၅၈ ယောက် ရှိပါတယ်။ ပြည်တွင်းကူးစက်မှု ၂၄၀၀ ကျော်ရှိပြီး ကျန် ၄၇၀ ကျော်က ပြည်ပကနေ ရောဂါကူးစက်လာသူတွေ ဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-migrant-worker-thailand-/5562857.html

ကိုဗစ်ကပ်ရောဂါကာလ မူးယစ်ဆေး ထုတ်လုပ်ရောင်းဝယ်မှု ပိုတိုးလာ

၂၀၂၀ ခုနှစ် ဖေဖော်ဝါရီလကနေ ဧပြီလအတွင်း မြန်မာနိုင်ငံ ရှမ်းပြည်နယ်အတွင်း ဖမ်းဆီးရမိတဲ့ မူးယစ်ဆေးဝါးနဲ့ ဆက်စပ်ပစ္စည်းများ။

COVID-19 ကာလ နယ်စပ်တွေ ပိတ်ထားပေမယ့် မူးယစ်ဆေးကိုတော့ မတားနိုင်ဘဲ ပိုပြီး ထုတ်လာကြတဲ့အပြင် အရှေ့တောင်အာရှဒေသ နယ်စပ်တွေကို ဖြတ်သန်း သယ်ဆောင်နေကြပြီးတော့ စျေးလည်းကျလာပါတယ်။

အထူးသဖြင့် တရားမဝင် နယ်စပ်ဝင်ထွက်ပေါက်တွေ များတဲ့ မြန်မာနိုင်ငံကနေ ဒီ Methamphetamine ဆေးပြားတွေ ဖြတ်သန်းသယ်ပို့ဖို့ လွယ်ကူပြီး အထွက်များလာတာကြောင့် မနှစ်ကထက် စျေးတဝက်ထိ ကျလာကာ တပြားကို တဒေါ်လာအောက်ထိ စျေးကျသွားပြီလို့ စောင့်ကြည့်နေသူတွေက ဆိုပါတယ်။

ကုလသမဂ္ဂ မူးယစ်ဆေးဝါးနဲ့ ပြစ်မှုဆိုင်ရာရုံး (UNODC) က အရှေ့တောင်အာရှနဲ့ ပစိဖိတ်ဒေသ အရာရှိချုပ် Jeremy Douglas က ဒီနှစ် ၂၀၂၀ မှာလည်း ဒီ မဲခေါင်ဒေသတွင်းမှာ အရင်နှစ် အနည်းငယ်ကအတိုင်း ထုတ်လုပ်မှု ပုံမှန်ဆက်တက်နေတယ် ဒါမှမဟုတ် မနှစ်ကထက် ပိုတိုးလာတယ်လို့ ဗွီအိုအေကို ပြောပါတယ်။

အထူးသဖြင့် မြန်မာ၊ ထိုင်းနဲ့ လာအို သုံးနိုင်ငံနယ်စပ်တွေ ထိစပ်နေတဲ့ ဝေးလံခေါင်ဖျားပြီး ဥပဒေမဲ့တဲ့ အရင်က ဘိန်းဖြူထွက်တဲ့ အချက်အချာဒေသ ရွှေတြိဂံနယ်မြေမှာ အခုတော့ နိုင်ငံတကာ မူးယစ်ဂိုဏ်းတွေက Methamphetamine ဆေးပြားစက်ရုံတွေ အကြီးအကျယ် ထောင်ထားလိုက်ပြီလို့ UNODC က ပြောပါတယ်။

ဒီစက်ရုံတွေကို မြန်မာနိုင်ငံ ရှမ်းပြည်နယ်တွင်း တိုင်းရင်းသားလက်နက်ကိုင်တွေနဲ့ အစိုးရ ပြည်သူ့စစ်တွေက အကာအကွယ် ပေးထားတာမို့ ဒီမူးယစ်ဆေးပြားလေးတွေဟာ အရှေ့တောင်အာရှတလွှားအပြင် စျေးပိုကောင်းတဲ့ သြစတြေးလျနဲ့ ဂျပန်အထိတောင် ရောက်နေပြီး မှောင်ခိုမှုပမာဏက ဒေါ်လ ၆၁.၄ ဘီလီယျံအထိ ရှိနေပြီလို့ UNODC က ဆိုပါတယ်။

ကိုဗစ်ကာလ Amazon လို On-line စီးပွားဖြစ်သူတွေလိုပဲ မူးယစ်ဂိုဏ်းတွေကလည်း တီထွင်ထုတ်လုပ်ပြီး ဖြန့်ချိအား ကောင်းလာတာကြောင့် ထိုင်းနဲ့မြန်မာမှာ ဖမ်းဆီးမိတာတွေလည်း များလာတယ်၊ စျေးကလည်း လိုက်ကျလာတဲ့အထိ ဖြစ်တယ်လို့ International Crisis Group နိုင်ငံတကာ ပဋိပက္ခလေ့လာရေးအဖွဲ့ရဲ့ မြန်မာနိုင်ငံတာဝန်ခံ Richard Horsey က ပြောပါတယ်။

ဒီ မူးယစ်ဆေးဂိုဏ်းတွေဟာ အရင်က ရှမ်းပြည်မြောက်ပိုင်းကနေပဲ အဓိက ခိုးထုတ်တာကနေ အခု ပိုအထုတ်များလာတဲ့ ဒီနှစ်ဆန်းကစပြီး ရှမ်းပြည် အရှေ့ပိုင်းနဲ့ တောင်ပိုင်းအပြင် ရခိုင်ပြည်နယ်က ရေလမ်းကိုပါ အကြီးအကျယ် သုံးလာနေတယ်လို့လည်း Richard Horsey က ပြောပါတယ်။


ဗွီအိုအေ (မြန်မာပိုင်း)

https://burmese.voanews.com/a/drugs-produce-covid/5563020.html

ရခိုင်က ကိုဗစ်ပိုး ဗီဇပြောင်း ကူးစက်မြန်ပိုးဖြစ်တယ်လို့ ဆေးသုတေသနပြော

ရန်ကုန်တိုင်း တောင်ဒဂုံမြို့နယ်က Fever Clinic အပါအဝင် ကိုရိုနာဗိုင်းရပ်စ်ကူးစက်ခံရသူ နေထိုင်ရာ အနီးတစ်ဝိုက်ကို ပိုးသတ်ဆေးဖြန်း

သီတင်းတစ်ပတ်ကျော် အချိန်တိုအတွင်း ကိုဗစ် ကူးစက်သူ ၂၀၀ ကျော်ရှိခဲ့တဲ့ ရခိုင်ပြည်နယ်က ကူးစက်မှုတွေကို စမ်းသပ်ကြည့်ခဲ့ရာမှာ ကနဦးရလဒ်တွေအရ ရခိုင်မှာဖြစ်နေတဲ့ ကိုရိုနာဗိုင်းရပ်စ်ဟာ မျိုးဗီဇ ပြောင်းပြီး ကူးစက်မှုနှုန်းမြန်တဲ့ ဗိုင်းရပ်စ်ဖြစ်နေတယ်ဆိုတာကို တွေ့ရှိခဲ့တယ်လို့ ဆေးသုတေသနဦးစီးဌာနထံက သိရပါတယ်။

အဲဒီကူးစက်မှုတွေဟာ ကမ္ဘာ့နိုင်ငံတချို့မှာ ပျံ့နှံ့ဖြစ်ပွားနေတဲ့ မျိုးဗီဇပြောင်း ဗိုင်းရပ်စ် ဟုတ်မဟုတ်ကို ကျန်းမာရေးနဲ့ အားကစားဝန်ကြီးဌာန၊ ဆေးသုတေသန ဦးစီးဌာနက စစ်ဆေးခဲ့တာမှာ အခုလို တွေ့ရှိခဲ့တာ ဖြစ်တယ်လို့ အဲဒီဌာနက ဒုတိယညွှန်ကြားရေးမှူး ဒေါက်တာမြတ်ထွဋ်ညွန့်က ဘီဘီစီကိုပြောပါတယ်။

တွေ့ရှိချက်တွေအရ အဲဒီပိုးကူးစက်မှုပျံနှံ့မှုက ပုံမှန်ထက် ၁၀ ဆ လောက်အထိ မြန်တယ်လို့ သူက ပြောပါတယ်။

ပြင်းထန်မှုကတော့ အရင်အမျိုးအစားနဲ့ အခုအမျိုးအစားက သိပ်မကွာခြားကြောင်းနဲ့ လေ့လာမှု တစ်ခုလုံး ပြီးစီးရင်တော့ ဒီမျိုးဗီဇက ဘယ်ဒေသက မျိုးဗီဇလည်းဆိုတာ သိနိုင်မယ်လို့ ဆိုပါတယ်။

မျိုးဗီဇတစ်ခုလုံး လေ့လာမှုက ရက်ပိုင်းအတွင်း ပြီးစီးမယ်လို့လည်း သိရပါတယ်။

မြန်မာနိုင်ငံက ကိုရိုနာဗိုင်းရပ်စ် ကူးစက်မှုမှာ ရခိုင်ပြည်နယ်မှာ သြဂုတ် ၂၉ မနက်ပိုင်းအထိ ကူးစက်သူ ၂၃၈ ဦးနဲ့ အများဆုံးဖြစ်နေတာဖြစ်ပြီး နေ့စဉ် တိုးလာနေတဲ့ပြည်တွင်းကူးစက်မှုတွေကြောင့် ကိုဗစ်ဒုတိယလှိုင်းနဲ့ကြုံနေရတာလားလို့ စိုးရိမ်တာတွေရှိလာနေပါတယ်။

ပိုးသတ်ဆေးဖြန်း

ဒါကြောင့် တစ်ပြည်လုံး အတိုင်းအတာနဲ့ ကူးစက်မှုတွေ ထပ်တိုးမလာအောင် သတိပြုသင့်တာတွေနဲ့ ပတ်သက်ပြီး ကျန်းမာရေးဝန်ထမ်းတွေ၊ ပိုးတွေ့ပြီး ပြန်ကောင်းလာတဲ့သူတွေနဲ့ ကိုဗစ်ရောဂါနဲ့ဆက်နွှယ်ပတ်သက် စေတနာ့ဝန်ထမ်း လုပ်ဆောင်နေသူတွေကို ခွဲခြားဆက်ဆံတာတွေမလုပ်ဖို့နဲ့ အဲဒီလို ခွဲခြားဆက်ဆံတာကြောင့် တစ်ခါတစ်ရံ ပိုဆိုးတာတွေ ဖြစ်တတ်တဲ့အတွက် ခွဲခြားဆက်ဆံတာတွေ မလုပ်သင့်ဘူးလို့ ဒေါက်တာမြတ်ထွဋ်ညွန့်က ပြောပါတယ်။

ရခိုင်က ကိုဗစ်အတည်ပြုလူနာအားလုံးရဲ့ ၇၉ ရာခိုင်နှုန်းဟာ ရောဂါလက္ခဏာမပြသူတွေဖြစ်လို့ သြဂုတ်လ ၁၀ ရက်နေ့နောက်ပိုင်း ရခိုင်ပြည်နယ်တွင်းကို ခရီးသွားလာမှုရှိထားရင် ရောဂါပိုးသယ်ဆောင်ဖြန့်ဖြူးသူ ဖြစ်နိုင်တာကြောင့် နီးစပ်ရာကျန်းမာရေးဌာနနဲ့ အာဏာပိုင်တွေထံ ချက်ချင်းအကြောင်းကြားဖို့ ကျန်းမာရေးနဲ့အားကစားဝန်ကြီးဌာနက တိုက်တွန်းထားပါတယ်။

ဒါ့အပြင် ကိုဗစ်-၁၉ ရောဂါဟာ လေထဲက ကူးစက်တဲ့ရောဂါ ဖြစ်နိုင်ခြေများတဲ့အတွက် ကူးစက်မြန်ရောဂါ ဖြစ်တယ်လို့ ရန်ကုန်တိုင်းကျန်းမာရေးဦးစီးဌာနက သတိပေးထုတ်ပြန်ထားပါတယ်။

လက်ရှိမှာဆို မြန်မာမှာ ကိုရိုနာဗိုင်းရပ်စ်ကူးစက်သူစုစုပေါင်းဟာ သြဂုတ် ၂၉ ရက်ညပိုင်းအထိ ၇၃၃ ဦးရှိနေပါတယ်။


BBC Burmese

https://www.bbc.com/burmese/world-53959444

(၂၉-၈-၂၀၂၀) ရက်နေ့၊ ည (၈:၀၀)နာရီ COVID-19 ရောဂါ ဓာတ်ခွဲအတည်ပြုလူနာသစ် (၇၇) ဦး တွေ့ရှိ


၁။ (၂၉-၈-၂၀၂၀) ရက်နေ့အတွက် COVID-19 ရောဂါ ဓာတ်ခွဲစစ်ဆေးရာတွင် -

- အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမအသုတ်) ဓာတ်ခွဲ နမူနာ (၅၆၀) ခု၊

- ဆေးသုတေသနဦးစီးဌာန (DMR)မှ  ဓာတ်ခွဲနမူနာ မှ (ပထမအသုတ်) (၁၉၃) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) မှ ဓာတ်ခွဲနမူနာ (၁၁၀) ခု၊

- ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) မှ ဓာတ်ခွဲနမူနာ (၂၇၂) ခု၊

- ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ (၁၀၀) ခု၊

- ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၂၄) ခု၊

- နေပြည်တော် ပြည်သူ့ဆေးရုံကြီး ခုတင် (၁၀၀၀)မှ ဓာတ်ခွဲနမူနာ (၃) ခု၊

- ပြည်သူ့ဆေးရုံကြီး၊ ပုသိမ်မြို့မှ ဓာတ်ခွဲနမူနာ (၁၁) ခုနှင့်

- ရန်ကုန်မြို့၊ အမှတ် (၁) တပ်မတော်ဆေးရုံကြီး ခုတင် (၁,၀၀၀) မှ ဓာတ်ခွဲနမူနာ (၂၀၁) ခု၊

- စုစုပေါင်း  (၁,၄၇၄) ခု အား ယနေ့၊ ညနေတွင် စစ်ဆေးပြီးစီးခဲ့ရာ -

• COVID-19 ရောဂါ ဓာတ်ခွဲအတည်ပြုလူနာသစ် (၇၇) ဦး တွေ့ရှိရပါသည်။  

၂။ (၂၉-၈-၂၀၂၀) ရက်နေ့၊ ည (၈:၀၀)နာရီအထိ မြန်မာနိုင်ငံတွင် COVID-19 ရောဂါဓာတ်ခွဲ အတည်ပြုလူနာ (၇၃၃) ဦးရှိပြီ ဖြစ်ပါသည်။

၃။ ဓာတ်ခွဲအတည်ပြု လူနာဟောင်း (old confirmed case) များ၏ ဓာတ်ခွဲနမူနာစစ်ဆေးမှု တွင် (၂) ကြိမ်ဆက်တိုက် ပိုးမတွေ့ရှိသူအသစ် (၂) ဦး (Case – 380 နှင့် 381) ရှိသဖြင့် ယနေ့အထိ ရောဂါပိုးကင်းစင်လာသူ စုစုပေါင်း (၃၅၁) ဦးရှိပါသည်။ ၎င်းတို့အနက် (၃၄၇) ဦးအား ဆေးရုံမှ ဆင်းခွင့်ပြုခဲ့ပြီးဖြစ်ကာ သတ်မှတ် နေရာများတွင် အသွားအလာဆက်လက်ကန့်သတ်၍ စောင့်ကြပ်ကြည့်ရှုလျက်ရှိပါသည်။     

၄။ ဓာတ်ခွဲအတည်ပြုလူနာများအနက် သေဆုံးသူ (၆)ဦး ရှိပါသည်။ 

၅။ (၂၈-၈-၂၀၂၀) ရက်နေ့၊ နေ့လယ် (၁၂:၀၀) နာရီမှ (၂၉-၈-၂၀၂၀)ရက်နေ့၊ နေ့လယ် (၁၂:၀၀) နာရီအတွင်း တွေ့ရှိရသော စောင့်ကြည့်လူနာအသစ် (၅၃) ဦးရှိပါသည်။

၆။ ဓာတ်ခွဲစစ်ဆေးမှုများပြီးစီးချိန်နှင့် သတင်းထုတ်ပြန်ချိန်အကြား အချိန်တိုတောင်းခြင်း ကြောင့် ဓာတ်ခွဲအတည်ပြုလူနာသစ်များ၏ သတင်းအချက်အလက်များကို ပြုစုလျက်ရှိပြီး ထပ်မံထုတ်ပြန် မည်ဖြစ်ပါသည်။


Ministry of Health and Sports, Myanmar

https://www.facebook.com/MinistryOfHealthAndSportsMyanmar

ထိုင်းမှာ တရားမဝင် မြန်မာနိုင်ငံသားတွေ ပါလာတဲ့ကား မှောက်ပြီး ၄ ဦးဒဏ်ရာရ

မြန်မာနိုင်ငံသားတွေကို လူကုန်ကူး သယ်ဆောင်လာပြီး တိမ်းမှောက်ခဲ့တဲ့ကား။ (သြဂုတ် ၂၉၊ ၂၀၂၀ ဓာတ်ပုံ - ထိုင်းနယ်ခြားစောင့်တပ်)


မြန်မာဘက်မှာ ကပ်ရောဂါကူးဆက်မှုတွေ များလာတယ်ဆိုပြီး ထိုင်းနယ်စပ်တွေမှာ လုံခြုံရေး တင်းကျပ်ချိန် ထိုင်း-မြန်မာနယ်စပ် တာခ့်ခရိုင်ထဲမှာ မြန်မာနိုင်ငံသားတွေကို လူကုန်ကူးသူတွေ သယ်ဆောင်လာတဲ့ကား တိမ်းမှောက်တာကြောင့် ကားပေါ်ပါလာတဲ့ မြန်မာနိုင်ငံသား ၄ ဦး ဒဏ်ရာရသွားပါတယ်။ အပြည့်အစုံကို ထိုင်းအခြေစိုက် ဗွီအိုအေ မြန်မာပိုင်း သတင်းထောက် မအေးအေးမာ တင်ပြပေးထားပါတယ်။

မြန်မာနိုင်ငံတွင်းမှာ ကိုဗစ်ကပ်ရောဂါပိုး တွေ့ရှိသူတွေ တိုးလာတာကြောင့် နယ်စပ် ၁၀ နေရာကို စောင့်ကြည့်ဖို့အတွက် ထိုင်းပြည်ထဲရေးဝန်ကြီးဌာနကနေ သတိပေးထားချိန်မှာပဲ ထိုင်း-မြန်မာနယ်စပ် တာခ့်ခရိုင် မယ်လမ အမှတ် ၂ ကျေးရွာအုပ်စုအနီးမှာ လူကုန်ကူးသမားတွေ တင်ဆောင်လာတဲ့ မြန်မာနိုင်ငံသား ၁၃ ဦးပါတဲ့ကား တိမ်းမှောက်ခဲ့တာပါ။

ထိုင်း-မြန်မာနယ်စပ်အခြေစိုက် မြန်မာပြည်သားများအရေး ပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးကတော့ အခုလိုပြောပြပါတယ်။

“ဒီမနက် ထိုင်း-မြန်မာနယ်စပ် မဲဆောက်မြို့ မြောက်ဘက်မှာရှိတဲ့ မယ်လမမြို့နယ် အမှတ် ၂ ကျေးရွာအုပ်စုအနီးမှာ ကားလမ်းဘေး ကင်းပုန်းချ စောင့်ကြည့်စစ်ဆေးနေတဲ့ နယ်ခြားစောင့်အဖွဲ့တွေကို တွေ့မြင်သွားတဲ့ လူကုန်ကူးပြီး သယ်ဆောင်လာတဲ့ကား ၂ စီးက ဖြတ်မောင်းပြေးတော့ ကားပေါ်မှာပါတဲ့ ၁၃ ယောက်ထဲက ၄ ယောက်က ဒဏ်ရာပြင်းထန်စွာ ရသွားတယ်။ ၁၃ ဦးဆိုတာ အမျိုးသမီး ၃ ဦး၊ အမျိုးသား ၁၀ဦး ဖြစ်ပါတယ်။”

ရှေ့ကကားတစီးကတော့ နောက်ကလိုက်လာတဲ့ ရဲတပ်ဖွဲ့ဝင်တွေရဲ့ ဖမ်းဆီးမှုကို လွတ်အောင်မောင်းပြေးသွားခဲ့ပြီး ကျန်ကားတစီးကတော့ အရှိန်မထိန်းနိုင်ဖြစ်ပြီး လမ်းမပေါ်မှာ တိမ်းမှောက်သွားခဲ့တာပါ။ ဒီအတွက် ကားပေါ်မှာ ပါလာသူတွေထဲက ၄ ဦး ဒဏ်ရာရသွားတာ ဖြစ်ပါတယ်။

ကားမောင်းသူ ထိုင်းနိုင်ငံသားကိုလည်း လူမှောင်ခိုမှုနဲ့ ဆက်လက်စစ်ဆေးမှုတွေ လုပ်ဆောင်နေပြီး ဖမ်းမိထားတဲ့ မြန်မာနိုင်ငံသားတွေကိုတော့ Disease Act B.E. 2558 ကပ်ရောဂါ အရေးပေါ်ဥပဒေနဲ့ အရေးယူသွားမှာဖြစ်တယ်လို့ ထိုင်းအာဏာပိုင်တွေက ဆိုပါတယ်။

ကိုဗစ်ရောဂါကပ်ဆိုး ထိန်းချုပ်နိုင်ရေးအတွက် ထိုင်း-မြန်မာနယ်စပ် တာ့ခ်ခရိုင် မဲဆောက်မြို့ကို ထိုင်းဗိုလ်ချုပ် Chalongchai Chaiyakham လာရောက်စစ်ဆေးခဲ့ပြီး တရားမဝင် နယ်စပ်ဖြတ်ကျော် ဝင်ရောက်လာသူတွေကို သတိနဲ့ စောင့်ကြည့်စစ်ဆေးဖို့ ညွှန်ကြားခဲ့ပြီး နောက်တရက်အကြာမှာ ခုလိုဖြစ်ပွားခဲ့တာပါ။

သြဂုတ်လ ၂၈ ရက်နေ့ကတော့ ထိုင်းနိုင်ငံရဲ့ နယ်စပ်နေရာ ၃ ခုလောက်ကနေ ဝင်လာတဲ့ မြန်မာအလုပ်သမား ရာဂဏန်းလောက်ကိုလည်း ဖမ်းဆီးခဲ့ပါတယ်။


မအေးအေးမာ/ ဗွီအိုအေ ( မြန်မာပိုင်း)

https://burmese.voanews.com/a/myanmar-illegal-migrant-workers-car-accident/5562974.html

မလေးရှားရောက် တရားမဝင် မြန်မာနိုင်ငံသား ၁၃၀ ကျော်ကို နေရပ်ပြန်ပို့မည်

မေလ အတွင်းက မလေးရှားအစိုးရ ကပြန်ပို့ပေးခဲ့တဲ့ ထိန်းသိမ်းရေးစခန်းက မြန်မာများ

မလေးရှားနိုင်ငံက တရားမဝင်မြန်မာနိုင်ငံသား ၁၃၀ကျော်ကို နေရပ်ပြန်နိုင်ဖို့ မလေးရှား လူဝင်မူကြီးကြပ်ရေးဌာန နဲ့ ကွာလာလမ်ပူမှာရှိတဲ့ မြန်မာသံရုံးတို့ စီစဉ်ဆောင်ရွက်နေပြီ ဆိုတဲ့သတင်းကို တင်ဆက်ပေးပါမယ်။ ဗွီအိုအေမြန်မာပိုင်း သတင်းထောက် မအေးအေးမာ သတင်းပေးပို့ထားပါတယ်။

မလေးရှားနိုင်ငံ မြန်မာသံရုံးက သံအမတ်ကြီးနဲ့ ကောင်စစ်တာဝန်ခံအရာရှိများ က သြဂုတ်လလည်က မလေးရှားနိုင်ငံ၊ လူဝင်မှုကြီးကြပ်ရေးဌာနက တာဝန်ရှိသူနဲ့ တွေဆုံပြီး မလေးရှားနိုင်ငံမှာ ရှိတဲ့ တရားမဝင် အထောက်အထားမဲ့ မြန်မာနိုင်ငံသား (၁၀,၀၃၀) တသောင်းကျော်ထဲက ကိုယ်ဝန်ဆောင် နဲ့ ကျန်းမာရေး မကောင်းသူ ၁၃၀ ကျော်နေရပ် ပြန်နိုင်ရေးကို စတင်ဆောင်ရွက်ခဲ့တာပါ။

မလေးရှားနိုင်ငံ မြန်မာသံရုံး အလုပ်သမားသံအရာရှိ ဦးအောင်ဇော်မင်းက အခုလို ပြောပြပါတယ်။

“နိုင်ငံခြားရေး ဝန်ကြီးဌာနရဲ့ ၂၈-၈-၂၀၂၀ နေ့ထုတ်ပြန်ကြေညာချက်အရ ပထမဦးဆုံး ကျန်းမာရေး အခက်အခဲဖြစ်နေတဲ့ တရားမဝင်အထောက်အထားမဲ့ မြန်မာအလုပ်သမား ၁၃၁ဦးကို ကနဦး အနေနဲ့ ပြန်ခေါ်နိုင်ရေးညှိနှိုင်းဆောင်ရွက်ထားချက်ကို သတင်းထုတ်ပြန်ထားပါတယ်။ ကိုဗစ်ကာလမှာတော့ တရားမဝင်အထောက်အထားမဲ့ တွေကို ၁၃၁ဦးကို ပထမဦးဆုံးအနေနဲ့ ပြန်ပို့ဖို့ကို စီစဉ်ဆောင်ရွက် နေတာပါ။

မလေးရှား လဝကကို မြန်မာသံရုံးဘက်က ထပ်မံပေးပို့ခဲ့ပါတယ်။ မလေးရှား သံအမတ်ကြီးနဲ့ ကောင်စစ်အရာရှိတွေရဲ့ဆွေးနွေးမူအရ ဒဏ်ကြေးလျှော့ပေါ့မယ်ဆိုရင်လည်း အနည်းဆုံးပမာဏကို သတ်မှတ်သွားဖို့ရှိသလို Special Pass အတွက် ကတော့ တဦးကို မလေးရှား ရင်းဂစ်ငွေ (၁၀၀)ကိုတော့ မဖြစ်မနေ ပေးဆောင်ရမှာဖြစ်တယ်လို့ဆိုပါတယ် ။ အသက် (၁၈)နှစ်အောက်အရွယ်တွေကတော့ဒဏ်ကြေးပေးဆောင်စရာမလိုဘူးလို့ ဆိုပါတယ်။

ခန့်မှန်းချေ မြန်မာနိုင်ငံသား ၅ သိန်းခွဲလောက် အလုပ်လုပ်ကိုင်နေတဲ့ မလေးရှားနိုင်ငံမှာ ကပ်ရောဂါ ကာလ ကန့်သတ်ချက်တွေကြောင့် အလုပ်အကိုင်နဲ့ စားဝတ်နေရေး အခက်အခဲတွေ ကြုံနေရတာပါ။

ဒီကာလ အတွင်းမှာ တရားမဝင်မြန်မာတွေကော တရားဝင်လာတဲ့သူတွေအပါအဝင် ထိန်းသိမ်းရေး စခန်းတွေက မြန်မာတွေပါနေရပ်ပြန်ရေးက ကြန့်ကြာမူတွေရှိနေတာပါ။

တချိုလည်း ကျန်းမာရေး မကောင်းတာကြောင့် ဆုံးပါးသွားသူတွေလည်းရှိတယ်လို့ မလေးရှားနိုင်ငံက လူမူကူညီရေးအသင်းအဖွဲ့တွေက ဆိုပါတယ်။ ကပ်ရောဂါကာလ အခက်အခဲတွေကြားမှာပဲ မြန်မာနိုင်ငံသားတွေထဲက ကိုယ့်ကိုယ်ကို အဆုံးစီရင်ခဲ့သူ ၁၄ဦး ရှိခဲ့သလို၊ နေရပ်ပြန်ဖို့ တရားမဝင် နည်းလမ်းတွေက ကြိုးပမ်းရာက ဖမ်းဆီးခံရသူတွေလည်း အများအပြား ရှိနေပါတယ်။


မအေးအေးမာ/ ဗွီအိုအေ ( မြန်မာပိုင်း)

https://burmese.voanews.com/a/malaysia-myanmar-illegal-immigrant-/5562833.html

ကပ်ဘေးကာလမှာ ထိုင်းကို တရားမဝင်သွားတဲ့ မြန်မာတွေ အဖမ်းခံရ


မြန်မာနိုင်ငံ မြို့အများအပြားမှာ ကိုရိုနာဗိုင်းရပ်စ် ကူးစက်ပျံ့နှံ့မှု ဖြစ်ပွားလာချိန်မှာ ထိုင်းအာဏာပိုင်တွေက နယ်စပ်ဒေသမှာ လုံခြုံရေး ပိုမိုတင်းကျပ်လိုက်ပါတယ်။ နယ်စပ်ကနေ တရားမဝင် ဝင်လာတဲ့ မြန်မာပြည်သားတချို့ ဖမ်းဆီးခံနေရပါတယ်။

မြန်မာနိုင်ငံမှာ ပြီးခဲ့တဲ့ရက်တွေအတွင်း ကိုရိုနာဗိုင်းရပ်စ် ကူးစက်ပျံ့နှံ့မှု ကျယ်ကျယ်ပြန့်ပြန့် ဖြစ်ပွားလာတဲ့အတွက် ထိုင်းမြန်မာနယ်စပ် လုံခြုံရေးတိုးမြှင့်ဖို့၊ နယ်စပ်အဝင်အထွက် ပိုမို စောင့်ကြည့်စစ်ဆေးဖို့ ထိုင်းပြည်ထဲရေးဝန်ကြီးဌာနက ညွှန်ကြားထားပါတယ်။

ကိုဗစ်-နိုင်တီးန်ရောဂါ အထူးဂရုထားနေရတဲ့ ကာလမှာ မြန်မာနိုင်ငံနဲ့ ထိစပ်နေတဲ့ တပ်ခ်၊ ချင်းမိုင်၊ ချင်းရိုင်၊ မယ်ဟောင်ဆောင်၊ ကန်ချနဘူရီ၊ ဖက်ချဘူရီ၊ ပရကျွတ် ခရီခန်၊ လတ်ဘူရီ၊ ချွမ်ဖွန်နဲ့ ရနောင်း စတဲ့ ခရိုင် ၁၀ ခုကို လုံခြုံရေးနဲ့ ကျန်းမာရေး စစ်ဆေးမှုတွေ တိုးမြှင့်ဖို့ ပြည်ထဲရေးဝန်ကြီးဌာန အမြဲတမ်းအတွင်းဝန် ချတ်ချိုင် ဖရွမ်လတ် (Chatchai Phromlert) က ပြောဆိုတယ်လို့ သြဂုတ်လ ၂၈ ရက်နေ့ ဘန်ကောက်ပို့စ်သတင်းမှာ ဖော်ပြထားပါတယ်။

တစ်ရက်တည်းမှာပဲ သောင်းရင်းမြစ်ကို ဖြတ်သန်းပြီး ထိုင်း-မြန်မာ နယ်စပ် မဲဆောက်မြို့ဘက် ဝင်ရောက်လာတဲ့ မြန်မာရွှေ့ပြောင်းအလုပ်သမား ၃၀ ကျော် အဖမ်းခံရတယ်လို့ မြန်မာပြည်သားအရေး ပူးတွဲလှုပ်ရှားမှု ကော်မတီရဲ့ ဥက္ကဋ္ဌ ဦးမိုးကြိုးက ပြောပါတယ်။

“အခုသူတို့ ဘာဘဲပြောပြော ဒုတိယလိုင်း ကိုဗစ်နဲ့ ပတ်သက်လို့ ထိုင်းနိုင်ငံမှာလည်း ဘေးပတ်ဝန်းကျင် နိုင်ငံနဲ့ ပတ်သက်လို့ တစ်စုံတစ်ရာ စိုးရိမ်ကြောင့်ကျနေတာ ရှိတယ်။ အိမ်နီးချင်းနိုင်ငံနဲ့ ပတ်သက်လို့၊ ကမ္ဘာမှာ ကိုဗစ် အလုံခြုံဆုံးနိုင်ငံလို့ သုံးသပ်ထားတဲ့အခါကြတော့ သူကလုံခြုံရေးကို ပိုပြီး ဖိဖိစီးစီး လုပ်လာတဲ့သဘောပေါ့။”

သောင်ရင်းမြစ်ကို ဖြတ်ပြီး ထိုင်းနိုင်ငံဘက် ကူးသန်းသွားလာသူတွေဟာ ဆောက်လုပ်ရေး၊ တောင်ယာ၊ ဈေးရောင်း၊ ကုန်တင်ကုန်ချ စတဲ့ ကျပန်းအလုပ်တွေ လာလုပ်တဲ့လူတွေ ဖြစ်တယ်လို့ ဦးမိုးကြိုးက ပြောပါတယ်။

ကပ်ဘေးဟာ တစ်ကမ္ဘာလုံးမှာ ပျံ့နှံ့ကျရောက်နေပြီး ကပ်ဘေး အစောပိုင်းကာလ နှစ်ဆန်းပိုင်းကတည်းက ကူးစက်ရောဂါပိုး ပျံ့နှံ့မှု ဟန့်တားထိန်းချုပ်နိုင်ဖို့ ထိုင်း-မြန်မာနယ်စပ်ကို လုံခြုံရေး အထူးတင်းကျပ်ထားတာပါ။

သြဂုတ်လ ၂၈ ရက်နေ့မှာ ဘုရားသုံးဆူ နယ်စပ်ဘက်ကနေ တရားမဝင် ဝင်ရောက်လာတဲ့ မြန်မာနိုင်ငံသား ၃၅ ဦးနဲ့ သူတို့ကို သယ်ဆောင်လာတဲ့ ကားသမား နှစ်ဦးကို ရဲက ထိန်းသိမ်းလိုက်တယ်လို့ ဘန်ကောက်ပို့စ် သတင်းစာ အင်တာနက်စာမျက်နှာမှာ ဖော်ပြထားပါတယ်။ သြဂုတ် ၂၈ ရက်နေ့ ကိုရိုနာဗိုင်းရပ်စ်ကူးစက်ခံရမှု ခြောက်ခု ရှိပြီး သူတို့တွေက လေကြောင်းခရီးစဉ်နဲ့ ပြည်ပကနေ ဝင်ရောက်လာသူတွေဖြစ်တယ်၊ သူတို့တွေကို အသွားအလာ ကန့်သတ်ထားတယ်လို့ ဆိုပါတယ်။

ထိုင်းနိုင်ငံမှာ သြဂုတ် ၂၈ ရက်နေ့အထိ ကိုရိုနာဗိုင်းရပ်စ် ကူးစက်ခံရသူ ၃၄၁၀ ရှိတယ်လို့ ထိုင်းနိုင်ငံ ကူးစက်ရောဂါထိန်းချုပ်ရေးဌာန အွန်လိုင်းစာမျက်နှာမှာ ဖော်ပြထားပါတယ်။ အဲဒီထဲမှာ ၉၅ ရာခိုင်နှုန်း ပြန်လည်သက်သာလာပြီဖြစ်ပြီး ဆေးရုံမှာ ကုသမှု ခံယူနေသူပေါင်း ၁၁၅ ဦး ရှိတယ်လို့ ဆိုပါတယ်။ သေဆုံးခဲ့သူက ၅၈ ဦးပါ။

တစ်ချိန်တည်းမှာပဲ မြန်မာနိုင်ငံမှာတော့ ကူးစက်ခံရသူ ၆၅၆ ဦး အထိရှိလာနေပြီး ထက်ဝက်ကျော် ပြန်လည်သက်သာလာပါပြီ။ သေဆုံးသွားသူ ၆ ဦး ရှိခဲ့တယ်လို့ ကျန်းမာရေးဌာနက ကြေညာထားပါတယ်။


RFA Burmese

https://www.rfa.org/burmese/news/illegal-myanmarworkers-were-arrested-by-thaipolice-08292020004034.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ