မန္တလေးရေဘေး ကယ်ဆယ်ကူညီရေးများဆောင်ရွက်



Share/Bookmark
မန္တလေးရေဘေး ကယ်ဆယ်ကူညီရေးများဆောင်ရွက်နေတဲ့ မြင်ကွင်း။ (ဓာတ်ပုံ - Okkar Thein - ဇူလိုင် ၂၀၊ ၂၀၂၀)
မြန်မာနိုင်ငံ အထက်ပိုင်းဒေသတွေမှာ ရေကြီးနိုင်တဲ့ အန္တရာယ် သတိပေးနေချိန်မှာပဲ မန္တလေးတိုင်းမှာ ရေထိန်းတံခါး ကျိုးပေါက်ရာက ဒေသခံတွေဘေးလွတ်ရာ ပြောင်းရွှေ့နေရတဲ့ အကြောင်း ဗွီအိုအေမြန်မာပိုင်း သတင်းထောက်စုစုက ပြောပြပါမယ်။

မန္တလေးတိုင်း၊ အမရပူရမြို့နယ်၊ မန္တလေး-စစ်ကိုင်း ကမ်းနားလမ်းမှာရှိတဲ့ ရွှေဂဲရေထိန်းတံခါး မနေ့က တနင်္ဂနွေညမှာ ကျိုးပေါက်ပြီး ဧရာဝတီမြစ်ရေ စီးဝင်လာတာကြောင့် အနီးအနားကဒေသခံတွေ ကုန်းမြင့်ပိုင်းဆီရွှေ့ပြောင်းနေကြပါတယ်။ ဒီကနေ့ မွန်းလွဲပိုင်းအထိ ရွာ ၄ ရွာမှာ ရေဝင်နေတာကြောင့် ဒေသခံတွေ ကယ်ဆယ်ရေးစခန်းတွေမှာ တိမ်းရှောင်နေရတယ်လို့လည်း ရွာဘုံလူမှုကူညီရေးအသင်းက ကိုကျော်ဇင်ထွန်းက VOA ကိုပြောပါတယ်။

“ရေကတော့ တောက်လျှောက်တိုးနေတာပဲ။ ရေဝင်လာတော့ သူတို့လောလောဆယ် ကုန်းမြင့်ရာကို ရွှေ့နေကြရတာပေါ့။ ဆွေမျိုးနီးစပ်တော်ရာဆီ၊ ကယ်ဆယ်ရေးစခန်းတွေဆီ လောလောဆယ်ရွှေ့နေကြတယ်။ ကျနော်တို့ ဒီစစ်ကိုင်းလမ်းပေါ်က ဘုရားဝင်းတွေ၊ ဘုန်းကြီးကျောင်းဝင်းတွေထဲမှာ ကယ်ဆယ်ရေးစခန်းဖွင့်ထားတယ်။ လူအသေအပျောက်တော့ မရှိဘူးဗျ။ ဒီပွဲတော်ရွာကတော့ မနက် ၃နာရီကတည်းက ကျနော်တို့ stand by နေတဲ့အချိန်မှာတော့ ရေမဝင်သေးဘူး။ မနက် ၁၀နာရီထိုးမှ ရေစဝင်တာပါ။”
အမရပူရမြို့ ရွှေဂဲ ရေထိန်းတံခါး ကျိုးပေါက်ပြီး ဧရာဝတီမြစ်ရေ စီးဆင်းဝင်လာနေတဲ့ မြင်ကွင်း။ (ဓာတ်ပုံ - Okkar Thein - ဇူလိုင် ၂၀၊ ၂၀၂၀)
ဒီနေ့ နေ့လယ်ပိုင်းအထိ ကယ်ဆယ်ရေးစခန်းမှာ ရောက်ရှိနေသူ ခန့်မှန်းခြေ လူ ၄,၀၀၀ လောက်ရှိမယ်လို့လည်း လူမူဝန်ထမ်း ကယ်ဆယ်ရေးနဲ့ ပြန်လည်နေရာချထားရေး ဝန်ကြီးဌာနက သတင်းထုတ်ပြန်ထားပါတယ်။ လူကယ်ပြန်ဝန်ကြီး ဒေါက်တာဝင်းမြတ်အေး ကတော့ မြစ်ရေဝင်ရောက်တာကို ဟန့်တားနိုင်ဖို့အတွက် ကျောက်ကြီးချ ရေထိန်းတဲ့လုပ်ငန်းတွေကို ဒီကနေ့ နေ့လည်ပိုင်းကစ ဆောင်ရွက်နေပြီ ဖြစ်ကြောင်း အစိုးရပိုင်သတင်းမီဒီယာတွေကို ပြောဆိုခဲ့ပါတယ်။

“အခု ကျနော်တို့ သဲအိတ်တွေ သိန်း သုံးဆယ် နီးပါးဖိုးပေါ့၊ သဲအိတ်တွေလုပ်နေတယ်။ အဲဒါကတော့ ဒီကြားကနေပြီးတော့ ကန့်လန့်ဖြတ်တာကို မကျော်အောင်ဆိုပြီးတော့ ဆောင်ရွက်တဲ့ကိစ္စပေါ့။ ပေါက်တည်တဲ့ကိစ္စအတွက်ကတော့ သက်ဆိုင်ရာဌာနဆိုင်ရာတွေကနေပြီးတော့ ဒီအတွက်ကို ကျောက်အိတ်တွေ ချဖို့အတွက် စီစဉ်ဆောင်ရွက်နေတယ်ပေါ့နော်။”

တချိန်တည်းမှာပဲ မိုးလေဝသနဲ့ ဇလဗေဒညွှန်ကြားမှု ဦးစီးဌာနကလည်း ဧရာဝတီမြစ်ရေဟာ နောက်၂ ရက်အတွင်း စိုးရိမ်ရေမှတ် ရောက်လာနိုင်တာကြောင့် မြစ်ကမ်းဘေးနဲ့ မြေနိမ့်ပိုင်းတွင်း နေထိုင်သူတွေ သတိထားကြဖို့ နှိုးဆော်ထားပါတယ်။ ဧရာဝတီနဲ့ ချင်းတွင်းမြစ် အထက်ပိုင်းဒေသတွေမှာ ဒီရက်ပိုင်းအတွင်း မိုးများတဲ့အတွက် စိုးရိမ်ရေမှတ်အထိ ရောက်ခဲ့တာတွေ ရှိခဲ့တာကြောင့် မြစ်ကြောင်းတလျှောက်မှာလည်း သတိထားကြဖို့ မိုးလေဝသနဲ့ ဇလဗေဒညွှန်ကြားမှု ဦးစီးဌာန လက်ထောက်ညွှန်ကြားရေးမှူး ဦးမျိုးထွန်းဦးက ပြောပါတယ်။

“မန္တလေး၊ စစ်ကိုင်း၊ မြင်းမူ၊ ပခုက္ကူ၊ ညောင်ဦးတို့ ဒီစခန်းတွေက စိုးရိမ်ရေမှတ်ကို ရောက်ဖို့ရာဆိုရင် ၂ပေကနေ ၃ပေလောက်အလိုအထိ ရှိနေတာကိုတွေ့ရတယ်။ တွေ့ရတဲ့အတွက်ကြောင့် ဒါကရေခံလည်းကောင်းနေပြီပေါ့။ ဒုတိယထပ်ပြီးတော့သာ တတိယဆည်ဘက်မှာ မိုးတွေက ကောင်းလာခဲ့မယ်ဆိုရင် အောက်ဘက်မှာလည်း ရေကရေခံကောင်းနေတယ်။ ဒါကြောင့်မို့ ဧရာဝတီမြစ်အောက်ပိုင်း စခန်းတွေကဆိုရင်လည်း အဓိက ဒီမြို့တွေပေါ့။ မြစ်ကမ်းနားမှာရှိနေတဲ့ မြို့တွေဟာ သတိထားသင့်တယ်ပေါ့နော်။”

ကချင်ပြည်နယ်မှာလည်း မနေ့တုန်းက မိုးသည်းထန်မှုကြောင့် မြစ်ကြီးနားခရိုင်၊ ကန်ပိုက်တီမြို့နယ်က ဝိုင်းမော်-ဆဒုံး-ကန်ပိုက်တီ ကားလမ်းမကြီးဘေး ကမ်းပါးမြေပြိုကျမှုဖြစ်ပွားခဲ့တာကြောင့် ဆဒုံးမြို့ဝင်ဂိတ်မှာ ယာဉ်အသွားအလာ ရပ်ဆိုင်းထားရကြောင်းလည်း ပြန်ကြားရေး ဝန်ကြီးဌာနက သတင်းထုတ်ပြန်ထားပါတယ်။

ကချင်ပြည်နယ်၊ ဖားကန့်မြို့နယ်မှာလည်း လူပေါင်း ၂၀၀ ကျော် သေကြေထိခိုက်ခဲ့တဲ့ မြေပြိုကျမှု ကြုံခဲ့ရတဲ့ ဝှေခါမှာပဲ ဒီကနေ့မနက်အစောပိုင်းလောက်က မြေပြိုကျမှု ထပ်မံဖြစ်ပွားရာက အိမ်တချို့ ပျက်စီးသွားခဲ့ပေမဲ့ ထိခိုက်သေဆုံးမှုတော့ မရှိခဲ့ပါဘူးရှင်။

စုစု  / ဗွီအိုအေ ( မြန်မာပိုင်း)
https://burmese.voanews.com/a/mandalay--flood/5509627.html

Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ